ᯖᯮᯒᯪᯖᯮᯪᯀᯉ᯲ ᯉᯪ ᯘᯪ ᯀᯐᯪ ᯇᯉᯰᯮᯄ᯦ᯮᯉᯉ᯲ Turi-turian ni si Aji Panungkunan Turpuk Paopathon (Pangke Android)

Di tingki i laho ma pangisi ni Lobu Namaduma mangalului hotang dohot mallo tu harangan.

ᯑᯪ ᯖᯪᯰᯂᯪ ᯤ ᯞᯂᯬ ᯔ ᯇᯝᯪᯘᯪ ᯉᯪ ᯞᯬᯅᯮ ᯉᯔᯑᯮᯔ ᯔᯝᯞᯮᯞᯮᯤ ᯂᯬᯖᯰ ᯑᯬᯂᯖᯬ᯲ ᯔᯞ᯲ᯞᯬ ᯖᯮ ᯂᯒᯝᯉ᯲

Sahat ma nasida tu Tor Nahapal, hatubuan ni hotang na rimpur-rimpur dohot mallo na balga-balga

ᯘᯂᯖ᯲ ᯔ ᯉᯘᯪᯑ ᯖᯮ ᯖᯒᯬ᯲ ᯉᯂᯇᯞ᯲ ᯂᯖᯮᯅᯮᯀᯉ᯲ ᯉᯪ ᯂᯪᯖᯰ ᯉ ᯒᯔᯪ᯲ᯇᯒᯮ᯲ᯒᯔᯪ᯲ᯇᯒᯮ᯲ ᯑᯬᯂᯖᯬ᯲ ᯔᯞ᯲ᯞᯬ ᯉ ᯅᯞ᯲ᯎᯅᯞ᯲ᯎ

Las ma rohanasida, dung adong be hotang siporsanonna.

ᯞᯘ᯲ ᯔ ᯒᯬᯂᯉᯘᯪᯑ ᯑᯮᯰ ᯀᯑᯬᯰ ᯅᯩ ᯂᯬᯖᯰ ᯘᯪᯇᯒᯬ᯲ᯘᯉᯉᯬ᯲ᯉ

Tuat ma nasida, dung i diida nasida ma bogas ni jolma.

ᯖᯮᯀᯖ᯲ ᯔ ᯉᯘᯪᯑ ᯑᯮᯰ ᯤ ᯑᯪᯤᯑ ᯉᯘᯪᯑ ᯔ ᯅᯬᯎᯘ᯲ ᯉᯪ ᯎᯞᯬ᯲ᯔ

Sai diihuthon ma bogas i, gabe dapot nasida ma si Aji Panungkunan hona
tali do patna dohot tanganna, tungkap so marroha be di tano i.

ᯘᯤ ᯑᯪᯤᯂᯖᯮ᯲ᯂᯉᯬ᯲ ᯔ ᯅᯬᯎᯘ᯲ ᯤ ᯎᯅᯩ ᯑᯇᯖᯬ᯲ ᯉᯘᯪᯑ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯂᯬᯉ ᯖᯞᯪ ᯑᯬ ᯇᯖ᯲ᯉ ᯑᯪᯂᯖᯬ᯲ ᯖᯝᯉ᯲ᯉ ᯖᯮᯰᯂᯇ᯲ ᯘᯬ ᯔᯒ᯲ᯒᯬᯂ ᯅᯩ ᯑᯪ ᯖᯉᯬ ᯤ

Tarsonggot do pangkilalaan nasida mamereng na masa i.

ᯖᯒ᯲ᯘᯬᯰᯎᯖᯬ᯲ ᯑᯬ ᯇᯰᯂᯪᯞᯞᯀᯉ᯲ ᯉᯘᯪᯑ ᯔᯔᯩᯒᯩᯰ ᯉ ᯔᯘ ᯤ

Dijama ma gorakna, adong dope tutu .

ᯑᯪᯐᯔ ᯔ ᯎᯬᯒᯂ᯲ᯉ ᯀᯑᯬᯰ ᯑᯬᯇᯩ ᯖᯮᯖᯮ

Dung i diharhari nasida ma hotang pangihotna i, dung i dipahusor ma ibana.

ᯑᯮᯰ ᯤ ᯑᯪᯂᯒ᯲ᯂᯒᯪ ᯉᯘᯪᯑ ᯔ ᯂᯬᯖᯰ ᯇᯝᯪᯂᯖᯬ᯲ᯉ ᯤ ᯑᯮᯰ ᯤ ᯑᯪᯇᯂᯮᯘᯒᯬ᯲ ᯔ ᯤᯅᯉ

Si Aji Panungkunan do da on, dongan ni Datu Pamurmas na mangubati boru ni raja i! ninna sahalak sian nasida.

ᯘᯪ ᯀᯐᯪ ᯇᯉᯰᯂᯮᯉᯉ᯲ ᯑᯬ ᯑ ᯀᯉᯬ᯲ ᯑᯬᯝᯉ᯲ ᯉᯪ ᯑᯖᯮ ᯇᯔᯒᯮ᯲ᯉᯘ᯲ ᯉ ᯔᯝᯮᯅᯖᯪ ᯅᯬᯒᯮ ᯉᯪ ᯒᯐ ᯤ ᯉᯉᯪ᯲ᯉ ᯘᯂᯞᯂ᯲ ᯘᯪᯀᯉ᯲ ᯉᯘᯪᯑ

I do da tutu! ninna na sada nari.

ᯤ ᯑᯬ ᯑ ᯖᯮᯖᯮ ᯉᯉᯪ᯲ᯉ ᯉ ᯘᯑ ᯉᯒᯪ

Tung begu aha ma ulaning na masa, umbahen tarjadi songon on! ninna sahalak muse .

ᯖᯮᯰ ᯅᯩᯎᯮ ᯀᯂ ᯔ ᯥᯞᯉᯪᯰ ᯉ ᯔᯘ ᯀᯔᯮ᯲ᯅᯂᯉᯩ᯲ ᯖᯒ᯲ᯐᯑᯪ ᯘᯬᯝᯉᯬ᯲ ᯀᯉᯬ᯲ ᯉᯉᯪ᯲ᯉ ᯘᯂᯞᯂ᯲ ᯔᯮᯘᯩ

Dung i sai manjoui ma nasida di harangan i, atik na dohot datu i dapotan mara songon donganna on; hape dang adong na mangalusi.

ᯑᯮᯰ ᯤ ᯘᯤ ᯔᯉ᯲ᯐᯬᯥᯤ ᯔ ᯉᯘᯪᯑ ᯑᯪ ᯂᯒᯝᯉ᯲ ᯤ ᯀᯖᯂᯪ᯲ ᯉ ᯑᯬᯂᯖᯬ᯲ ᯑᯖᯮ ᯤ ᯑᯇᯬᯖᯉ᯲ ᯔᯒ ᯘᯬᯝᯉᯬ᯲ ᯑᯬᯝᯉ᯲ᯉ ᯀᯉᯬ᯲ ᯂᯇᯩ ᯑᯩ ᯀᯑᯬᯰ ᯉ ᯔᯝᯞᯮᯘᯪ

Dung i dihallung nasida ma si Aji Panungkunan tu huta, nunga
mansai gale, songon naung mate nama idaon.

ᯑᯮᯰ ᯤ ᯑᯪᯂᯞ᯲ᯞᯮᯰ ᯉᯘᯪᯑ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯖᯮ ᯂᯮᯖ ᯉᯮᯝ ᯔᯉ᯲ᯘᯤ ᯎᯞᯩ ᯘᯬᯝᯉᯬ᯲ ᯉᯀᯮᯰ ᯔᯖᯩ ᯉᯔ ᯤᯑᯀᯉᯬ᯲

Sahat ma di huta disuapi ma ibana, dipajonok tu pansisuduan.

ᯘᯂᯖ᯲ ᯔ ᯑᯪ ᯂᯮᯖ ᯑᯪᯘᯮᯀᯇᯪ ᯔ ᯤᯅᯉ ᯑᯪᯇᯐᯬᯉᯂᯬ᯲ ᯖᯮ ᯇᯉ᯲ᯘᯪᯘᯮᯑᯮᯀᯉ᯲

Las ma badanna, huhut didampoli ma ibana.

ᯞᯘ᯲ ᯔ ᯅᯑᯉ᯲ᯉ ᯂᯮᯂᯖᯮ᯲ ᯑᯪᯑᯔ᯲ᯇᯬᯞᯪ ᯔ ᯤᯅᯉ

dang sadia leleng nari tarjolma ma ibana.

ᯑᯰ ᯘᯑᯪᯀ ᯞᯩᯞᯰᯩ ᯉᯒᯪ ᯖᯒ᯲ᯐᯞᯬ᯲ᯔ ᯔ ᯤᯅᯉ

Dua ari ibana na peak-peak i di harangan hatubuan ni hotang i; dang adong babiat manang gompul manjonohi ibana.

ᯑᯮᯀ ᯀᯒᯪ ᯤᯅᯉ ᯉ ᯇᯩᯀᯂ᯲ᯇᯩᯀᯂ᯲ ᯤ ᯑᯪ ᯂᯒᯝᯉ᯲ ᯂᯖᯮᯅᯮᯀᯉ᯲ ᯉᯪ ᯂᯬᯖᯰ ᯤ ᯑᯰ ᯀᯑᯬᯰ ᯅᯅᯪᯀᯖ᯲ ᯔᯉᯰ ᯎᯔᯬ᯲ᯇᯞᯮ᯲ ᯔᯉ᯲ᯐᯬᯉᯬᯂᯪ ᯤᯅᯉ

Ai ro do Boru Saniang Naga tu lambungna, jadi dang adong be antong na mangate manjonohi ibana

ᯀᯤ ᯒᯬ ᯑᯬ ᯅᯬᯒᯮ ᯘᯉᯪᯀᯰ ᯉᯎ ᯖᯮ ᯞᯔ᯲ᯅᯮᯰᯉ ᯐᯑᯪ ᯑᯰ ᯀᯑᯬᯰ ᯅᯩ ᯀᯉ᯲ᯖᯬᯰ ᯉ ᯔᯝᯖᯩ ᯔᯉ᯲ᯐᯬᯉᯬᯂᯪ ᯤᯅᯉ

Mansai ngerger do asa mulak gogo ni si Aji Panungkunan, jala hira na mago idaon rohana dang diboto ibana dope manang na didia ibana.

ᯔᯉ᯲ᯘᯤ ᯝᯒᯩ᯲ᯝᯒᯩ᯲ ᯑᯬ ᯀᯘ ᯔᯮᯞᯂ᯲ ᯎᯬᯎᯬ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯐᯞ ᯂᯪᯒ ᯉ ᯔᯎᯬ ᯤᯑᯀᯉᯬ᯲ ᯒᯬᯂᯉ ᯑᯰ ᯑᯪᯅᯬᯖᯬ ᯤᯅᯉ ᯑᯬᯇᯩ ᯔᯉᯰ ᯉ ᯑᯪᯑᯪᯀ ᯤᯅᯉ

Molo disungkun pangisi ni huta i ibana, dang diboto mangalusi.

ᯔᯬᯞᯬ ᯑᯪᯘᯮᯰᯂᯉᯮ᯲ ᯇᯝᯪᯘᯪ ᯉᯪ ᯂᯮᯖ ᯤ ᯤᯅᯉ ᯑᯰ ᯑᯪᯅᯬᯖᯬ ᯔᯝᯞᯮᯘᯪ

Sai dipanotnoti do na manungkun i, alai songon pamereng ni na marnipi.

ᯘᯤ ᯑᯪᯇᯉᯖᯬ᯲ᯉᯬᯖᯪ ᯑᯬ ᯉ ᯔᯉᯮᯰᯂᯉᯮ᯲ ᯤ ᯀᯞᯤ ᯘᯬᯝᯉᯬ᯲ ᯇᯔᯩᯒᯩᯰ ᯉᯪ ᯉ ᯔᯒ᯲ᯉᯪᯇᯪ

Ubati ibana denggan-denggan, dampoli ibana, asa mulak tondina tu ruma, asa taboto tangkas aha na masa tu ibana! ninna Raja Sohuturon Dolok mandok tu Datu Pangontang.

ᯥᯅᯖᯪ ᯤᯅᯉ ᯑᯰᯩᯎᯉ᯲ᯑᯰᯩᯎᯉ᯲ ᯑᯔ᯲ᯇᯬᯞᯪ ᯤᯅᯉ ᯀᯘ ᯔᯮᯞᯂ᯲ ᯖᯉᯬ᯲ᯑᯪᯉ ᯖᯮ ᯒᯮᯔ ᯀᯘ ᯖᯅᯬᯖᯬ ᯖᯰᯂᯘ᯲ ᯀᯂ ᯉ ᯔᯘ ᯖᯮ ᯤᯅᯉ ᯉᯉᯪ᯲ᯉ ᯒᯐ ᯘᯪᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯔᯉ᯲ᯑᯂᯬ᯲ ᯖᯮ ᯑᯖᯮ ᯇᯝᯉᯬ᯲ᯖᯰ

Olo rajanami, sai na denggan do pature-tureonku ibana, pos ma roha ni raja i.

ᯀᯬᯞᯬ ᯒᯐᯉᯔᯪ ᯘᯤ ᯉ ᯑᯩᯰᯎᯉ᯲ ᯑᯬ ᯇᯖᯮᯒᯩᯖᯮᯒᯩᯀᯉᯬ᯲ᯂᯮ ᯤᯅᯉ ᯇᯘᯬ᯲ ᯔ ᯒᯬᯂ ᯉᯪ ᯒᯐ ᯤ

Aha ma tutu na masa, umbahen songon on si Aji Panungkunan on, ninna datu i.

ᯀᯂ ᯔ ᯖᯮᯖᯮ ᯉ ᯔᯘ ᯀᯔᯮ᯲ᯅᯂᯉᯩ᯲ ᯘᯬᯝᯉᯬ᯲ ᯀᯉᯬ᯲ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯀᯉᯬ᯲ ᯉᯉᯪ᯲ᯉ ᯑᯖᯮ ᯤ

Dung i marnipi ma Raja Sohuturon Dolok bornginna i.

ᯑᯮᯰ ᯤ ᯔᯒ᯲ᯉᯪᯇᯪ ᯔ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯅᯒᯬ᯲ᯝᯉᯪ᯲ᯉ ᯤ

Ro ma di nipina i Boru Saniang Naga, didok ma tu raja i,

ᯒᯬ ᯔ ᯑᯪ ᯉᯪᯇᯪᯉ ᯤ ᯅᯬᯒᯮ ᯘᯉᯪᯀᯰ ᯉᯎ ᯑᯪᯑᯂᯬ᯲ ᯔ ᯖᯮ ᯒᯐ ᯤ

Ale Raja Sohuturon Dolok, dang sadia leleng nari marsahit ma muse borumi si Tapi Marhillong Sere, pola songon na pusok hosam pabereng-berenghonsa.

ᯀᯞᯩ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯑᯰ ᯘᯑᯪᯀ ᯞᯩᯞᯰᯩ ᯉᯒᯪ ᯔᯒ᯲ᯘᯂᯖᯪ᯲ ᯔ ᯔᯮᯘᯩ ᯅᯬᯒᯮᯔᯪ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯬᯰ ᯘᯩᯒᯩ ᯇᯬᯞ ᯘᯬᯝᯉᯬ᯲ ᯉ ᯇᯮᯘᯂᯬ᯲ ᯂᯬᯂᯔ᯲ ᯇᯅᯩᯒᯰᯩᯅᯩᯒᯰᯩᯂᯉᯬ᯲ᯘ 

Alai dang sahit tu hamatean dope i.

ᯀᯞᯤ ᯑᯰ ᯘᯂᯖᯪ᯲ ᯖᯮ ᯂᯔᯖᯩᯀᯉ᯲ ᯑᯪᯇᯩ ᯤ

Unang jou be Datu Pamumas.Si Aji Panungkunan ma sungkun manang aha ubatna laho pamalumhon dohot papatehon sahit i.

ᯥᯉᯰ  ᯐᯬᯥ ᯅᯩ ᯑᯖᯮ ᯇᯔᯒᯮ᯲ᯉᯘ᯲ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯔ ᯘᯮᯰᯂᯉᯮ ᯔᯉᯰ ᯀᯂ ᯥᯅᯖ᯲ᯉ ᯞᯂᯬ ᯇᯔᯞᯔᯮ᯲ᯂᯉᯬ᯲ ᯑᯬᯂᯖᯬ᯲ ᯇᯇᯖᯩᯂᯉᯬ᯲ ᯘᯂᯖᯪ᯲ ᯤ

Nunga huhusiphon i tu ibana di na sai tungkap i ibana di harangan hatubuan ni hotang i.

ᯉᯮᯝ ᯂᯮᯂᯮᯘᯇᯪ᯲ᯂᯉᯬ᯲ ᯤ ᯖᯮ ᯤᯅᯉ ᯑᯪ ᯉ ᯘᯤ ᯖᯮᯰᯂᯇ᯲ ᯤ ᯤᯅᯉ ᯑᯪ ᯂᯒᯝᯉ᯲ ᯂᯖᯮᯅᯮᯀᯉ᯲ ᯉᯪ ᯂᯬᯖᯰ ᯤ

Molo dung suang gogona, molo dung tarjolma jala tiur parningotanna marsogot, ba ingotonna do sude songon na hudok i tu ibana na di harangan i !

ᯔᯬᯞᯬ ᯑᯮᯰ ᯘᯮᯀᯰ ᯎᯬᯎᯬᯉ ᯔᯬᯞᯬ ᯑᯮᯰ ᯖᯒ᯲ᯐᯞᯬ᯲ᯔ ᯐᯞ ᯖᯪᯀᯒᯮ᯲ ᯇᯒ᯲ᯉᯪᯝᯬᯖᯉ᯲ᯉ ᯔᯒ᯲ᯘᯬᯎᯖᯬ᯲ ᯅ ᯤᯝᯬᯖᯉᯬ᯲ᯉ ᯑᯬ ᯘᯮᯑᯩ ᯘᯬᯝᯉᯬ᯲ ᯉ ᯂᯮᯑᯂᯬ᯲ ᯤ ᯖᯮ ᯤᯅᯉ ᯉ ᯑᯪ ᯂᯒᯝᯉ᯲ ᯤ

I ma didok Boru Saniang Naga di nipi ni raja i.

ᯤ ᯔ ᯑᯪᯑᯂᯬ᯲ ᯅᯬᯒᯮ ᯘᯉᯪᯀᯰ ᯉᯎ ᯑᯪ ᯉᯪᯇᯪ ᯉᯪ ᯒᯐ ᯤ

Dung i tarsunggul ma Raja Sohuturon Dolok, tarsonggot situtu ma ibana.

ᯑᯮᯰ ᯤ ᯖᯒ᯲ᯘᯮᯰᯎᯞᯮ᯲ ᯔ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯖᯒ᯲ᯘᯬᯰᯎᯖᯬ᯲ ᯘᯪᯖᯮᯖᯮ ᯔ ᯤᯅᯉ

Hehe ma nang pardihutana, didok ma,

ᯂᯩᯂᯩ ᯔ ᯉᯰ ᯇᯒ᯲ᯑᯪᯂᯮᯖᯉ ᯑᯪᯑᯂᯬ᯲ ᯔ

Songon na songgot ho tarsunggul, ale anak ni namboru, adong nipim na jorbut?

ᯘᯬᯝᯉᯬ᯲ ᯉ ᯘᯬᯰᯎᯖᯬ᯲ ᯂᯬ ᯖᯒ᯲ᯘᯮᯰᯎᯞᯮ᯲ ᯀᯞᯩ ᯀᯉᯂ᯲ ᯉᯪ ᯉᯔ᯲ᯅᯬᯒᯮ ᯀᯑᯬᯰ ᯉᯪᯇᯔᯪ᯲ ᯉ ᯐᯒᯬ᯲ᯅᯖᯮ᯲

dang pola dia da, boru ni datulang! ninna raja i.

ᯑᯰ ᯇᯬᯞ ᯑᯪᯀ ᯑ ᯅᯬᯒᯮ ᯉᯪ ᯑᯖᯮᯞᯰ ᯉᯉᯪ᯲ᯉ ᯒᯐ ᯤ

dang pola dia nimmu, anak ni namboru? dang porsea ahu di hatami.

ᯑᯰ ᯇᯬᯞ ᯑᯪᯀ ᯉᯔᯪ᯲ᯔᯮ ᯀᯉᯂ᯲ ᯉᯪ ᯉᯔ᯲ᯅᯬᯒᯮ ᯑᯰ ᯇᯒᯬ᯲ᯘᯩᯀ ᯀᯂᯮ ᯑᯪ ᯂᯖᯔᯪ

lngkon adong do nipim najorbut, umbahen tompu ho tarsunggul.

ᯀᯪᯩᯂᯉᯬ᯲ ᯀᯑᯬᯰ ᯑᯬ ᯉᯪᯇᯔᯪ᯲ ᯉᯐᯒᯬ᯲ᯅᯖᯮ᯲ ᯀᯔᯮ᯲ᯅᯂᯉᯩ᯲ ᯖᯔᯬ᯲ᯇᯮ ᯂᯬ ᯖᯒ᯲ᯘᯮᯰᯎᯞᯮ᯲

Ai ahu pe gabe tarsonggot do dibahen ho! ninna pardihutana i

ᯀᯤ ᯀᯂᯮ ᯇᯩ ᯎᯅᯩ ᯖᯒ᯲ᯘᯬᯰᯎᯖᯬ᯲ ᯑᯬ ᯑᯪᯅᯂᯉᯩ᯲ ᯂᯬ ᯉᯉᯪ᯲ᯉ ᯇᯒ᯲ᯑᯪᯂᯮᯖᯉ ᯤ

Unang pola sai sungkuni ahu, boru ni datulang. Nunga hudok, dang pola dia i! ninna raja i.

ᯥᯉᯰ ᯇᯬᯞ ᯘᯤ ᯘᯰᯂᯮᯉᯪ ᯀᯂᯮ ᯅᯬᯒᯮ ᯉᯪ ᯑᯖᯮᯞᯰ ᯉᯮᯝ ᯂᯮᯑᯂᯬ᯲ ᯑᯰ ᯇᯬᯞ ᯑᯪᯀ ᯉᯉ ᯪ᯲ᯉ ᯒᯐ ᯤ

Ingkon paboaonmu do anak ni namboru, asa sonang rohangku ! ninna pardihutana i.

ᯀᯪᯰᯂᯉᯬ᯲ ᯇᯅᯬᯀᯀᯉᯬ᯲ᯔᯮ ᯑᯬ ᯀᯉᯂ᯲ ᯉᯪ ᯉᯔ᯲ᯅᯬᯒᯮ ᯀᯘ ᯘᯬᯉᯰ ᯒᯬᯂᯰᯂᯮ ᯉᯉᯪ᯲ᯉ ᯇᯒ᯲ᯑᯪᯂᯮᯖᯉ ᯤ

Jadi dipaboa Raja Sohuturon Dolok ma nipina i tu pardihutana i.

ᯐᯑᯪ ᯑᯪᯇᯅᯬᯀ ᯒᯐ ᯘᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯔ ᯉᯪᯇᯪᯉ ᯤ ᯖᯮ ᯇᯒ᯲ᯑᯪᯂᯮᯖᯉ ᯤ

Dung i sai tangis ma pardihutana i, ai tung so ditagam rohana be, na olo songgop dope sahit i tu boru hasianna i.

ᯑᯮᯰ ᯤ ᯘᯤ ᯖᯐᯘᯪ᯲ ᯔ ᯇᯒ᯲ᯑᯪᯂᯮᯖᯉ ᯤ ᯀᯤ ᯖᯰᯮ ᯘᯬ ᯑᯪ ᯖᯎᯔ᯲ ᯒᯬᯂᯉ ᯅᯩ ᯉ ᯀᯬᯞᯬ ᯘᯬᯰᯎᯇᯬ᯲ ᯑᯬᯇᯩ ᯘᯂᯖᯪ᯲ ᯤ ᯖᯮ ᯅᯬᯒᯮ ᯂᯘᯪᯀᯉ᯲ᯉ ᯤ

Unang sai tangis be ho, boru ni datulang.

ᯥᯉᯰ ᯘᯤ ᯖᯝᯘᯪ᯲ ᯅᯩ ᯂᯬ ᯅᯬᯒᯮ ᯉᯪ ᯑᯖᯮᯞᯰ

Ai tangkas do dipaboa Boru Saniang Naga di nipingki, naung dihusiphon ramuan ni ubat i tu si Aji Panungkunan, ninna raja i

ᯀᯤ ᯖᯰᯂᯘ᯲ ᯑᯬ ᯑᯪᯇᯅᯬᯀ ᯅᯬᯒᯮ ᯘᯉᯪᯀᯰ ᯉᯎ ᯑᯪ ᯉᯪᯇᯪᯰᯂᯪ ᯉᯀᯮᯰ ᯑᯪᯂᯮᯘᯇᯪ᯲ᯂᯉᯬ᯲ ᯒᯔᯮᯀᯉ᯲ ᯉᯪ ᯥᯅᯖ᯲ ᯤ ᯖᯮ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯉᯉᯪ᯲ᯉ ᯒᯐ ᯤ

Alai nang pe,songon i didok raja i, sai tangis dope pardihutana i.

ᯀᯞᯤ ᯉᯰ ᯇᯩ ᯘᯬᯝᯉᯬ᯲ ᯤ ᯑᯪᯑᯂᯬ᯲ ᯒᯐ ᯤ ᯘᯤ ᯖᯝᯘᯪ᯲ ᯑᯬᯇᯩ ᯇᯒ᯲ᯑᯪᯂᯮᯖᯉ ᯤ 

Nunga antong hipas si Tapi Marhillong Sere, nunga mirjahirjak ala las ni rohana, hape ingkon peak muse marsahit.

ᯉᯮᯝ ᯀᯉ᯲ᯖᯬᯰ ᯂᯪᯇᯘ᯲ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯬᯰ ᯘᯩᯒᯩ ᯉᯮᯝ ᯔᯒᯪ᯲ᯐᯂᯒᯪ᯲ᯐᯂ᯲ ᯀᯞ ᯞᯘ᯲ ᯉᯪ ᯒᯬᯂᯉ ᯂᯇᯩ ᯀᯪᯰᯂᯉᯬ᯲ ᯇᯩᯀᯂ᯲ ᯔᯮᯘᯩ ᯔᯒ᯲ᯘᯂᯖᯪ᯲

Nunga lam margogo si Aji Panungkunan , nunga lam diingot na masa tu ibana.

ᯉᯮᯝ ᯞᯔ᯲ ᯔᯒ᯲ᯎᯬᯎᯬ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯉᯮᯝ ᯞᯔ᯲ ᯑᯪᯤᯝᯖᯬ᯲ ᯉ ᯔᯘ ᯖᯮ ᯤᯅᯉ

Alai sai songon na gotap-gotap dope baritana, dang apala torang dope dapot na umbegesa.

ᯀᯞᯤ ᯘᯤ ᯘᯬᯝᯉᯬ᯲ ᯉ ᯎᯬᯖᯇ᯲ᯎᯬᯖᯇ᯲ ᯑᯬᯇᯩ ᯅᯒᯪᯖᯉ ᯑᯰ ᯀᯇᯞ ᯖᯬᯒᯰ ᯑᯬᯇᯩ ᯑᯇᯖᯬ᯲ ᯉ ᯀᯔᯮ᯲ᯅᯩᯎᯩᯘ

Dung i dipaspas Datu Pangontang ma si Aji Panungkunan dohot bulung rata dohot lili tunggal, huhut disuapi dohot aek na sian mual na tio, di pat ni Dolok Parnapuranan.

ᯑᯮᯰ ᯤ ᯑᯪᯇᯘ᯲ᯇᯘ᯲ ᯑᯖᯮ ᯇᯝᯉᯬ᯲ᯖᯰ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯑᯬᯂᯖᯬ᯲ ᯅᯮᯞᯮᯰ ᯒᯖ ᯑᯬᯂᯖᯬ᯲ ᯞᯪᯞᯪ ᯖᯮᯰᯎᯞ᯲ ᯂᯮᯂᯖᯮ᯲ ᯑᯪᯘᯮᯀᯇᯪ ᯑᯬᯂᯖᯬ᯲ ᯀᯀᯂᯩ᯲ ᯉ ᯘᯪᯀᯉ᯲ ᯔᯮᯀᯞ᯲ ᯉ ᯖᯪᯀᯬ ᯑᯪ ᯇᯖ᯲ ᯉᯪ ᯑᯬᯞᯂᯬ᯲ ᯇᯒ᯲ᯉᯇᯮᯒᯉᯉ᯲

Tarsonggot ma ibana, dung i tiur ma rohana.

ᯖᯒ᯲ᯘᯬᯰᯎᯖᯬ᯲ ᯔ ᯤᯅᯉ ᯑᯮᯰ ᯤ ᯖᯪᯀᯒᯮ᯲ ᯔ ᯒᯬᯂᯉ

Nunga las roha ni Raja Sohuturon Dolok, disungkun ma,

ᯉᯮᯝ ᯞᯘ᯲ ᯒᯬᯂ ᯉᯪ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯑᯪᯘᯮᯰᯂᯉᯮ᯲ ᯔ

Ale Aji Panungkunan, dia ma alana umbahen na sahat ho tu Tor Nahapal, jala tarihot ho di pambuatan hotang i?

ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲ ᯑᯪᯀ ᯔ ᯀᯞᯉ ᯀᯔᯮ᯲ᯅᯂᯉᯩ᯲ ᯉ ᯘᯂᯖ᯲ ᯂᯬ ᯖᯮ ᯖᯒᯬ᯲ ᯉᯂᯇᯞ᯲ ᯐᯞ ᯖᯒᯪᯂᯖᯬ᯲ ᯂᯬ ᯑᯪ ᯇᯔ᯲ᯅᯮᯀᯖᯉ᯲ ᯂᯬᯖᯰ ᯤ

Olo rajanami, nunga huingot be. Na ditogihon Datu Pamurnas do ahu mambuat hotang tu harangan i.

ᯀᯬᯞᯬ ᯒᯐᯉᯔᯪ ᯉᯮᯝ ᯂᯮᯤᯝᯖᯬ᯲ ᯅᯩ ᯉ ᯑᯪᯖᯬᯎᯪᯂᯉᯬ᯲ ᯑᯖᯮ ᯇᯔᯒᯮ᯲ᯉᯘ᯲ ᯑᯬ ᯀᯂᯮ ᯔᯔ᯲ᯅᯮᯀᯖ᯲ ᯂᯬᯖᯰ ᯖᯮ ᯂᯒᯝᯉ᯲

Dung hurintahi hami hotang i, jala nunga pinapungu , tompu ma ahu diantuk sian pudi; dung i dang huboto be na masa! 

ᯑᯮᯰ ᯂᯮᯒᯉᯪ᯲ᯖᯂᯪ ᯂᯔᯪ ᯂᯬᯖᯰ ᯤ ᯐᯞ ᯉᯮᯝ ᯇᯪᯉᯇᯮᯝᯮ ᯖᯔᯬ᯲ᯇᯮ ᯔ ᯀᯂᯮ ᯑᯪᯀᯉ᯲ᯖᯂᯮ᯲ ᯘᯪᯀᯉ᯲ ᯇᯮᯑᯪ ᯑᯮᯰ ᯤ ᯑᯰ ᯂᯮᯅᯬᯖᯬ ᯅᯩ ᯉ ᯔᯘ

Ala ni aha do umbahen dibahen songon i, ale Aji Panungkunan? ninna raja i.

ᯀᯞ ᯉᯪ ᯀᯂ ᯑᯬ ᯀᯔᯮ᯲ᯅᯂᯉᯩ᯲ ᯑᯪᯅᯂᯉᯩ᯲ ᯘᯬᯝᯉᯬ᯲ ᯤ ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲ ᯉᯉᯪ᯲ᯉ ᯒᯐ ᯤ

Na maradian do hami rajanami di topi Aek Parbaraan; dung i hundul ma hami di toru ni hau gala-gala.

ᯉ ᯔᯒᯑᯪᯀᯉ᯲ ᯑᯬ ᯂᯔᯪ ᯒᯐᯉᯔᯪ ᯑᯪ ᯖᯬᯇᯪ ᯀᯀᯂᯩ᯲ ᯇᯒ᯲ᯅᯒᯀᯉ᯲ ᯑᯮᯰ ᯤ ᯂᯉᯮ᯲ᯑᯞᯮ᯲ ᯔ ᯂᯔᯪ ᯑᯪ ᯖᯬᯒᯮ ᯉᯪ ᯂᯥ ᯎᯞᯎᯞ

Ditallik Datu Pamurnas ma bona ni gala-gala i, haruar ma gotana, mardekdehan tu toru.

ᯑᯪᯖᯞ᯲ᯞᯂᯪ᯲ ᯑᯖᯮ ᯇᯔᯒᯮ᯲ᯉᯘ᯲ ᯔ ᯅᯬᯉ ᯉᯪ ᯎᯞᯎᯞ ᯤ ᯂᯒᯮᯀᯒ᯲ ᯔ ᯎᯬᯖᯉ ᯔᯒ᯲ᯑᯂᯩ᯲ᯑᯩᯂᯉ᯲ ᯖᯮ ᯖᯬᯒᯮ

Dung i adong ma didok muse! ninna si Aji Panungkunan

ᯑᯮᯰ ᯤ ᯀᯑᯬᯰ ᯔ ᯑᯪᯑᯂᯬ᯲ ᯔᯮᯘᯩ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Aha huroha didok? ninna Raja Sohuturon Dolak manungkun muse; nunga sai manigor naeng botoonna udutna.

ᯀᯂ ᯂᯮᯒᯬᯂ ᯑᯪᯑᯂᯬ᯲ ᯉᯉᯪ᯲ᯉ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯔᯉᯮᯰᯂᯉᯮ᯲ ᯔᯮᯘᯩ ᯉᯮᯝ ᯘᯤ ᯔᯉᯪᯎᯒᯬ᯲ ᯉᯀᯰᯩ ᯅᯪᯖᯪᯀᯉᯬ᯲ᯉ ᯥᯑᯖᯮ᯲ᯉ

dang pola dia nian rajanami. Dumenggan do didok rohangku, unang pola sai hupaboa sude! ninna si Aji Panungkunan.

ᯑᯰ ᯇᯬᯞ ᯑᯪᯀ ᯉᯪᯀᯉ᯲ ᯒᯐᯉᯔᯪ ᯑᯮᯔᯩᯰᯎᯉ᯲ ᯑᯬ ᯑᯪᯑᯂᯬ᯲ ᯒᯬᯂᯰᯂᯮ ᯥᯉᯰ ᯇᯬᯞ ᯘᯤ ᯂᯮᯇᯅᯬᯀ ᯘᯮᯑᯩ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Unang pola alang roham ale Aji Panungkunan!

ᯥᯉᯰ ᯇᯬᯞ ᯀᯞᯰ ᯒᯬᯂᯔ᯲ ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲

Ai na bodari marnipi do ahu, ro do Boru Saniang Naga di nipingki jala adong do dipaboa tu ahu ! ninna raja i.

ᯀᯤ ᯉ ᯅᯬᯑᯒᯪ ᯔᯒ᯲ᯉᯪᯇᯪ ᯑᯬ ᯀᯂᯮ ᯒᯬ ᯑᯬ ᯅᯬᯒᯮ ᯘᯉᯪᯀᯰ ᯉᯎ ᯑᯪ ᯉᯪᯇᯪᯰᯂᯪ ᯐᯞ ᯀᯑᯬᯰ ᯑᯬ ᯑᯪᯇᯅᯬᯀ ᯖᯮ ᯀᯂᯮ ᯉᯉᯪ᯲ᯉ ᯒᯐ ᯤ

Songon na tarsonggot ma si Aji Panungkunan, sai dipanotnoti ma raja i; dung i songon na diingot ma sude, dang adong na buni.

ᯘᯬᯝᯉᯬ᯲ ᯉ ᯖᯒ᯲ᯘᯬᯰᯎᯖᯬ᯲ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯘᯤ ᯑᯪᯇᯉᯖᯬ᯲ᯉᯬᯖᯪ ᯔ ᯒᯐ ᯤ ᯑᯮᯰ ᯤ ᯘᯬᯝᯉᯬ᯲ ᯉ ᯑᯪᯤᯝᯖᯬ᯲ ᯔ ᯘᯮᯑᯩ ᯑᯰ ᯀᯑᯬᯰ ᯉ ᯅᯮᯉᯪ

Dung i didok ibana ma tu raja i, molo naung ro do Boru Saniang Naga di nipi ni raja i, nunga tutu be i.

ᯑᯮᯰ ᯤ ᯑᯪᯑᯂᯬ᯲ ᯤᯅᯉ ᯔ ᯖᯮ ᯒᯐ ᯤ ᯔᯬᯞᯬ ᯉᯀᯮᯰ ᯒᯬ ᯑᯬ ᯅᯬᯒᯮ ᯘᯉᯪᯀᯰ ᯉᯎ ᯑᯪ ᯉᯪᯇᯪ ᯉᯪ ᯒᯐ ᯤ ᯉᯮᯝ ᯖᯮᯖᯮ ᯅᯩ ᯤ

Ba nunga diboto raja i na masa i.

ᯅ ᯉᯮᯝ ᯑᯪᯅᯬᯖᯬ ᯒᯐ ᯤ ᯉ ᯔᯘ ᯤ

Ahu pe, ba hupaboa nama sude.

ᯀᯂᯮ ᯇᯩ ᯅ ᯂᯮᯇᯅᯬᯀ ᯉᯔ ᯘᯮᯑᯩ

Songon on ma didok Datu Pamurnas di topi Aek Parbaraan, di na laho mulak hami tu hutanami.

ᯘᯬᯝᯉᯬ᯲ ᯀᯉᯬ᯲ ᯔ ᯑᯪᯑᯂᯬ᯲ ᯑᯖᯮ ᯇᯔᯒᯮ᯲ᯉᯘ᯲ ᯑᯪ ᯖᯬᯇᯪ ᯀᯀᯂᯩ᯲ ᯇᯒ᯲ᯅᯒᯀᯉ᯲ ᯑᯪ ᯉ ᯞᯂᯬ ᯔᯮᯞᯂ᯲ ᯂᯔᯪ ᯖᯮ ᯂᯮᯖᯉᯔᯪ

Ombushononna ma ninna sian hutanami, Dolak Pargarutan, asa mulak marsahit boru ni raja i.

ᯀᯔᯬ᯲ᯅᯘᯮ᯲ᯂᯬᯉᯉᯬ᯲ᯉ ᯔ ᯉᯉᯪ᯲ᯉ ᯘᯪᯀᯉ᯲ ᯂᯮᯖᯉᯔᯪ ᯑᯬᯞᯂᯬ᯲ ᯇᯒ᯲ᯎᯒᯮᯖᯉ᯲ ᯀᯘ ᯔᯮᯞᯂ᯲ ᯔᯒ᯲ᯘᯂᯖᯪ᯲ ᯅᯬᯒᯮ ᯉᯪ ᯒᯐ ᯤ

Hudok do nian tu datu i, asa asi rohana di boru ni raja i, unang diombushon antong sahit tu boru ni raja i.

ᯂᯮᯑᯂᯬ᯲ ᯑᯬ ᯉᯪᯀᯉ᯲ ᯖᯮ ᯑᯖᯮ ᯤ ᯀᯘ ᯀᯘᯪ ᯒᯪᯂᯉ ᯑᯪ ᯅᯬᯒᯮ ᯉᯪ ᯒᯐ ᯤ ᯥᯉᯰ ᯑᯪᯀᯔᯬ᯲ᯅᯘᯮ᯲ᯂᯉᯬ᯲ ᯀᯉ᯲ᯖᯬᯰ ᯘᯂᯖᯪ᯲ ᯖᯮ ᯅᯬᯒᯮ ᯉᯪ ᯒᯐ ᯤ

Alai muruk ma ibana tu ahu.

ᯀᯞᯤ ᯔᯮᯒᯂᯮ᯲ ᯔ ᯤᯅᯉ ᯖᯮ ᯀᯂᯮ

Naeng godang mas di ibana, ale rajanami.

ᯉᯀᯩᯰ ᯎᯬᯑᯰ ᯔᯘ᯲ ᯑᯪ ᯤᯅᯉ ᯀᯞᯩ ᯒᯐᯉᯔᯪ

Ganup mangubati, sai lam tamba ma nian masna, gabe tubu ma roha na jahat di Datu Pamurnas.

ᯎᯉᯇᯮ᯲ ᯔᯝᯮᯅᯖᯪ ᯘᯤ ᯞᯔ᯲ ᯖᯔ᯲ᯅ ᯔ ᯉᯪᯀᯉ᯲ ᯔᯘ᯲ᯉ ᯎᯅᯩ ᯖᯮᯅᯮ ᯔ ᯒᯬᯂ ᯉ ᯐᯂᯖ᯲ ᯑᯪ ᯑᯖᯮ ᯇᯔᯒᯮ᯲ᯉᯘ᯲

Ala nunga huboto, ba i ma ninna rohangku alana, umbahen na diihoti ahu jala dipasombu di harangan i, asa laos mate disi di rohana.

ᯀᯞ ᯉᯮᯝ ᯂᯮᯅᯬᯖᯬ ᯅ ᯤ ᯔ ᯉᯉᯪ᯲ᯉ ᯒᯬᯂᯰᯂᯮ ᯀᯞᯉ ᯀᯔᯮ᯲ᯅᯂᯉᯩ᯲ ᯉ ᯑᯪᯤᯂᯬᯖᯪ ᯀᯂᯮ ᯐᯞ ᯑᯪᯇᯘᯔᯬ᯲ᯅᯮ ᯑᯪ ᯂᯒᯝᯉ᯲ ᯤ ᯀᯘ ᯞᯀᯘᯬ᯲ ᯔᯖᯩ ᯑᯪᯘᯪ ᯑᯪ ᯒᯬᯂᯉ

Alai dang dipaloas Na Martua Debata, ai so adong hubahen na so uhum!" I ma didok si Aji Panungkunan tu raja i

ᯀᯞᯤ ᯑᯰ ᯑᯪᯇᯞᯬᯀᯘ᯲ ᯉ ᯔᯒ᯲ᯖᯮᯀ ᯑᯩᯅᯖ ᯀᯤ ᯘᯬ ᯀᯑᯬᯰ ᯂᯮᯅᯂᯉᯩ᯲ ᯉ ᯘᯬ ᯥᯂᯔᯮ᯲ ᯤ ᯔ ᯑᯪᯑᯂᯬ᯲ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯖᯮ ᯒᯐ ᯤ

Tarsonggot do raja i umbege sangkap ni Datu Pamurnas i, ai datu antong ibana, na godang boto-botoanna.

ᯖᯒ᯲ᯘᯬᯰᯎᯖᯬ᯲ ᯑᯬ ᯒᯐ ᯤ ᯀᯔᯮ᯲ᯅᯩᯎᯩ ᯘᯰᯂᯇ᯲ ᯉᯪ ᯑᯖᯮ ᯇᯔᯒᯮ᯲ᯉᯘ᯲ ᯤ ᯀᯤ ᯑᯖᯮ ᯀᯉ᯲ᯖᯬᯰ ᯤᯅᯉ ᯉ ᯎᯬᯑᯰ ᯅᯬᯖᯬᯅᯬᯖᯬᯀᯉ᯲ᯉ

Alai songon na tarhilas ma rohana marningot hata ni Boru Saniang Naga di nipina i.

ᯀᯞᯤ ᯘᯬᯝᯉᯬ᯲ ᯉ ᯖᯒ᯲ᯂᯪᯞᯘ᯲ ᯔ ᯒᯬᯂᯉ ᯔᯒ᯲ᯉᯪᯝᯖᯬ᯲ ᯂᯖ ᯉᯪ ᯅᯬᯒᯮ ᯘᯉᯪᯀᯰ ᯉᯎ ᯑᯪ ᯉᯪᯇᯪᯉ ᯤ

Jadi didok ma tu si Aji Panungkunan, da ro do nang tu ho Boru Saniang Naga i, di na sai peak ho tungkap di tano i?

ᯐᯑᯪ ᯑᯪᯑᯂᯬ᯲ ᯔ ᯖᯮ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯑ ᯒᯬ ᯑᯬ ᯉᯰ ᯖᯮ ᯂᯬ ᯅᯬᯒᯮ ᯘᯉᯪᯀᯰ ᯉᯎ ᯤ ᯑᯪ ᯉ ᯘᯤ ᯇᯩᯀᯂ᯲ ᯂᯬ ᯖᯮᯰᯂᯇ᯲ ᯑᯪ ᯖᯉᯬ ᯤ

Ro do tutu rajanami. Ai sian dia diboto raja i sudena i? ninna si Aji Panungkunan.

ᯒᯬ ᯑᯬ ᯖᯮᯖᯮ ᯒᯐᯉᯔᯪ ᯀᯤ ᯘᯪᯀᯉ᯲ ᯑᯪᯀ ᯑᯪᯅᯬᯖᯬ ᯒᯐ ᯤ ᯘᯮᯑᯩᯉ ᯤ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Laos di nipingki do i dipaboa.

ᯞᯀᯘᯬ᯲ ᯑᯪ ᯉᯪᯇᯪᯰᯂᯪ ᯑᯬ ᯑᯪᯇᯅᯬᯀ

Didok do tu ahu, naung dipaboa tu ho ubat ni borungki, molo marsahit muse.

ᯑᯪᯑᯂᯬ᯲ ᯑᯬ ᯖᯮ ᯀᯂᯮ ᯉᯀᯮᯰ ᯑᯪᯇᯅᯬᯀ ᯖᯮ ᯂᯬ ᯥᯅᯖ᯲ ᯉᯪ ᯅᯬᯒᯮᯰᯂᯪ ᯔᯬᯞᯬ ᯔᯒ᯲ᯘᯂᯖᯪ᯲ ᯔᯮᯘᯩ

Diorai do tutu manjou Datu Pamurnas; ai dia be jouon i, ai songon i ma jahat ni rohana.

ᯑᯪᯀᯬᯒᯤ ᯑᯬ ᯖᯮᯖᯮ ᯔᯉ᯲ᯐᯬᯥ ᯑᯖᯮ ᯇᯔᯒᯮ᯲ᯉᯘ᯲ ᯀᯤ ᯑᯪᯀ ᯅᯩ ᯐᯬᯥᯀᯉᯬ᯲ ᯤ ᯀᯤ ᯘᯬᯝᯉᯬ᯲ ᯤ ᯔ ᯐᯂᯖ᯲ ᯉᯪ ᯒᯬᯂᯉ

Nuaeng pe paboa ma, dia ma ubat na nidok ni Boru Saniang Naga i, na boi pamalumhon jala papatehon sahit i, ninna Raja Sohuturon Dolok manungkun si Aji Panungkunan.

ᯉᯮᯀᯀᯩᯰ ᯇᯩ ᯇᯅᯬᯀ ᯔ ᯑᯪᯀ ᯔ ᯥᯅᯖ᯲ ᯉ ᯉᯪᯑᯂᯬ᯲ ᯉᯪ ᯅᯬᯒᯮ ᯘᯉᯪᯀᯰ ᯉᯎ ᯤ ᯉ ᯅᯬᯤ ᯇᯔᯞᯔᯮ᯲ᯂᯉᯬ᯲ ᯐᯞ ᯇᯇᯖᯩᯂᯉᯬ᯲ ᯘᯂᯖᯪ᯲ ᯤ ᯉᯉᯪ᯲ᯉ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯔᯉᯮᯰᯂᯉᯮ᯲ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Tutu do i rajanami, nunga huingot be sude.

ᯖᯮᯖᯮ ᯑᯬ ᯤ ᯒᯐᯉᯔᯪ ᯉᯮᯝ ᯂᯮᯤᯝᯖᯬ᯲ ᯅᯩ ᯘᯮᯑᯩ

Ia ubat ni boru ni raja i, i ma gala-gala na pitu hibung sangkariang parbuena ; di tonga-tonga ni gala-gala na sampulguk i ingkon adong sada na tandi balgana dohot ulina sian na onom i, i ma gala-gala sirumondang bulan!" ninna si Aji Panungkunan.

ᯤᯀ ᯥᯅᯖ᯲ ᯉᯪ ᯅᯬᯒᯮ ᯉᯪ ᯒᯐ ᯤ ᯤ ᯔ ᯎᯞᯎᯞ ᯉ ᯇᯪᯖᯮ ᯂᯪᯅᯮᯰ ᯘᯰᯂᯒᯪᯀᯰ ᯇᯒ᯲ᯅᯮᯀᯩᯉ ᯑᯪ ᯖᯬᯝᯖᯬᯝ ᯉᯪ ᯎᯞᯎᯞ ᯉ ᯘᯔ᯲ᯇᯞᯮᯎᯂᯮ᯲ ᯤ ᯀᯪᯰᯂᯉᯬ᯲ ᯀᯑᯬᯰ ᯘᯑ ᯉ ᯖᯉ᯲ᯑᯪ ᯅᯞ᯲ᯎᯉ ᯑᯬᯂᯖᯬ᯲ ᯥᯞᯪᯉ ᯘᯪᯀᯉ᯲ ᯉ ᯀᯬᯉᯔᯬ᯲ ᯤ ᯤ ᯔ ᯎᯞᯎᯞ ᯘᯪᯒᯮᯔᯉᯬ᯲ᯑᯰ ᯅᯮᯞᯉ᯲ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Beha ma bahenon muse gala-gala i? ninna Raja Sohuturon Dolok manungkun.

ᯅᯩᯂ ᯔ ᯅᯂᯩᯉᯉᯬ᯲ ᯔᯮᯘᯩ ᯎᯞᯎᯞ ᯤ ᯉᯉᯪ᯲ᯉ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯔᯉᯮᯰᯂᯉᯮ᯲

dang pola dia be rajanami, asal ma dapot gala-gala na songon i.

ᯑᯰ ᯇᯬᯞ ᯑᯪᯀ ᯅᯩ ᯒᯐᯉᯔᯪ ᯀᯘᯞ᯲ ᯔ ᯑᯇᯖᯬ᯲ ᯎᯞᯎᯞ ᯉ ᯘᯬᯝᯉᯬ᯲ ᯤ

Ai holan panganon ni boru ni raja i do gala-gala i, dung i malum ma hilalaonna! ninna si Aji Panungkunan.

ᯀᯤ ᯂᯬᯞᯉ᯲ ᯇᯝᯉᯉᯬ᯲ ᯉᯪ ᯅᯬᯒᯮ ᯉᯪ ᯒᯐ ᯤ ᯑᯬ ᯎᯞᯎᯞ ᯤ ᯑᯮᯰ ᯤ ᯔᯞᯔᯮ᯲ ᯔ ᯂᯪᯞᯞᯀᯉᯬ᯲ᯉ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Sai dapot ma tutu! ninna raja i.

ᯘᯤ ᯑᯇᯖᯬ᯲ ᯔ ᯖᯮᯖᯮ ᯉᯉᯪ᯲ᯉ ᯒᯐ ᯤ

Dung i marsahit ma tutu muse si Tapi Marhillong Sere; marsak ma raja i jala sai tangis ma pardihutana i.

ᯑᯮᯰ ᯤ ᯔᯒ᯲ᯘᯂᯖᯪ᯲ ᯔ ᯖᯮᯖᯮ ᯔᯮᯘᯩ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯬᯰ ᯘᯩᯒᯩ ᯔᯒ᯲ᯘᯂ᯲ ᯔ ᯒᯐ ᯤ ᯐᯞ ᯘᯤ ᯖᯝᯘᯪ᯲ ᯔ ᯇᯒ᯲ᯑᯪᯂᯮᯖᯉ ᯤ

Asa tutu do na nidok ni Datu Pamurnas i; nunga dipahabang sahit i sian hutana, jala dipasonggop tu si Tapi Marhillong Sere.

ᯀᯘ ᯖᯮᯖᯮ ᯑᯬ ᯉ ᯉᯪᯑᯂᯬ᯲ ᯉᯪ ᯑᯖᯮ ᯇᯔᯒᯮ᯲ᯉᯘ᯲ ᯤ ᯉᯮᯝ ᯑᯪᯇᯂᯅᯰ ᯘᯂᯖᯪ᯲ ᯤ ᯘᯪᯀᯉ᯲ ᯂᯮᯖᯉ ᯐᯞ ᯑᯪᯇᯘᯬᯰᯎᯇᯬ᯲ ᯖᯮ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯬᯰ ᯘᯩᯒᯩ

Jadi didok Raja Sohuturon Dolok ma, Nunga mulak gogom, ale Aji Panungkunan!

ᯐᯑᯪ ᯑᯪᯑᯂᯬ᯲ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯔ ᯉᯮᯝ ᯔᯮᯞᯂ᯲ ᯎᯬᯎᯔᯬ᯲ ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲

Ho do antong na umboto ubat ni borungki, ubat na pamalumhon dohot na papatehon.

ᯂᯬ ᯑᯬ ᯀᯉ᯲ᯖᯬᯰ ᯉ ᯀᯔᯮ᯲ᯅᯬᯖᯬ ᯥᯅᯖ᯲ ᯉᯪ ᯅᯬᯒᯮᯰᯂᯪ ᯥᯅᯖ᯲ ᯉ ᯇᯔᯞᯔᯮ᯲ᯂᯉᯬ᯲ ᯑᯬᯂᯖᯬ᯲ ᯉ ᯇᯇᯖᯩᯂᯉᯬ᯲

Todo ma donganmu laho mangalului gala-gala na pitu sangkariang i, na tubu di dangka papituhon!

ᯖᯬᯑᯬ ᯔ ᯑᯬᯑᯉ᯲ᯔᯮ ᯞᯂᯬ ᯔᯝᯞᯮᯞᯮᯤ ᯎᯞᯂᯞ ᯉ ᯇᯪᯖᯮ ᯘᯰᯂᯒᯪᯀᯰ ᯤ ᯉ ᯖᯮᯅᯮ ᯑᯪ ᯑᯰᯂ ᯇᯇᯪᯖᯮᯂᯉᯬ᯲

Olo rajanami, laho ma hami tutu mangalului! ninna si Aji Panungkunan.

ᯀᯬᯞᯬ ᯒᯐᯉᯔᯪ ᯞᯂᯬ ᯔ ᯂᯔᯪ ᯖᯮᯖᯮ ᯔᯝᯞᯮᯞᯮᯤ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Dung i ditodo ma dua halak donganna na gogo jala na gompis, jala diparade raja i ma balanjonasida siboanonna; ai so binoto antong manang piga ari dalan siboluson, so binoto ari na bolas mulak tu huta.

ᯑᯮᯰ ᯤ ᯑᯪᯖᯬᯑᯬ ᯔ ᯑᯮᯀ ᯂᯞᯂ᯲ ᯑᯬᯝᯉ᯲ᯉ ᯉ ᯎᯬᯎᯬ ᯐᯞ ᯉ ᯎᯔᯬ᯲ᯇᯘᯪ᯲ ᯐᯞ ᯑᯪᯇᯒᯑᯩ ᯒᯐ ᯤ ᯔ ᯅᯞᯉ᯲ᯐᯬᯉᯘᯪᯑ ᯘᯪᯅᯬᯀᯉᯉᯬ᯲ᯉ ᯀᯤ ᯘᯬ ᯅᯪᯉᯬᯖᯬ ᯀᯉ᯲ᯖᯬᯰ ᯔᯉᯰ ᯇᯪᯎ ᯀᯒᯪ ᯑᯞᯉ᯲ ᯘᯪᯅᯬᯞᯮᯘᯉᯬ᯲ ᯘᯬ ᯅᯪᯉᯬᯖᯬ ᯀᯒᯪ ᯉ ᯅᯬᯇᯘ᯲ ᯔᯮᯞᯂ᯲ ᯖᯮ ᯂᯮᯖ

Dung i borhat ma nasida masitompi balanjona be; ditadingkon nasida ma Lobu Namaduma.

ᯑᯮᯰ ᯤ ᯅᯒᯬ᯲ᯂᯖ᯲ ᯔ ᯉᯘᯪᯑ ᯔᯘᯪᯖᯔᯬ᯲ᯇᯪ ᯅᯞᯉ᯲ᯐᯬᯉ ᯅᯩ ᯑᯪᯖᯑᯪᯰᯂᯉᯬ᯲ ᯉᯘᯪᯑ ᯔ ᯞᯬᯅᯮ ᯉᯔᯑᯮᯔ

Sai diihut-ihut nasida ma Aek Parbaraan pahulu, huhut manopi-nopi aek i.

ᯘᯤ ᯑᯪᯤᯂᯖᯮ᯲ᯤᯂᯖᯮ᯲ ᯉᯘᯪᯑ ᯔ ᯀᯀᯂᯩ᯲ ᯇᯒ᯲ᯅᯒᯀᯉ᯲ ᯇᯂᯮᯞᯮ ᯂᯮᯂᯖᯮ᯲ ᯔᯉᯬᯇᯪᯉᯬᯇᯪ ᯀᯀᯂᯩ᯲ ᯤ

Sahat ma nasida tu sada inganan, na godang tubuan gala-gala.

ᯘᯂᯖ᯲ ᯔ ᯉᯘᯪᯑ ᯖᯮ ᯘᯑ ᯤᯝᯉᯉ᯲ ᯉ ᯎᯬᯑᯰ ᯖᯮᯅᯮᯀᯉ᯲ ᯎᯞᯎᯞ

Las ma rohanasida marnida bona ni gala-gala na songon i godang.

ᯞᯘ᯲ ᯔ ᯒᯬᯂᯉᯘᯪᯑ ᯔᯒ᯲ᯉᯪᯑ ᯅᯬᯉ ᯉᯪ ᯎᯞᯎᯞ ᯉ ᯘᯬᯝᯉᯬ᯲ ᯤ ᯎᯬᯑᯰ

Tejek na i, molo tung dapot dison ! ninna rohanasida.

ᯖᯩᯐᯂᯩ᯲ ᯉ ᯤ ᯔᯬᯞᯬ ᯖᯮᯰ ᯑᯇᯖᯬ᯲ ᯑᯪᯘᯉᯬ᯲ ᯉᯉᯪ᯲ᯉ ᯒᯬᯂᯉᯘᯪᯑ

Sai dijangkiti nasida ma gala-gala i, sai dilului di dangka papituhon, hape matua so dapot do sipitu sangkariang, mardongan gala-gala sirumondang bulan.

ᯘᯤ ᯑᯪᯐᯰᯂᯪᯖᯪ ᯉᯘᯪᯑ ᯔ ᯎᯞᯎᯞ ᯤ ᯘᯤ ᯑᯪᯞᯮᯞᯮᯤ ᯑᯪ ᯑᯰᯂ ᯇᯇᯪᯖᯮᯂᯉᯬ᯲ ᯂᯇᯩ ᯔᯖᯮᯀ ᯘᯬ ᯑᯇᯖᯬ᯲ ᯑᯬ ᯘᯪᯇᯪᯖᯮ ᯘᯰᯂᯒᯪᯀᯰ ᯔᯒ᯲ᯑᯬᯝᯉ᯲ ᯎᯞᯎᯞ ᯘᯪᯒᯮᯔᯉᯬ᯲ᯑᯰ ᯅᯮᯞᯉ᯲

Nunga tung mansai loja nasida na manjangkiti i; jadi borhat ma nasida sian inganan i, jala maradian di toru ni hau bolon.

ᯉᯮᯝ ᯖᯮᯰ ᯔᯉ᯲ᯘᯤ ᯞᯬᯐ ᯉᯘᯪᯑ ᯉ ᯔᯉ᯲ᯐᯰᯂᯪᯖᯪ ᯤ ᯐᯑᯪ ᯅᯒᯬ᯲ᯂᯖ᯲ ᯔ ᯉᯘᯪᯑ ᯘᯪᯀᯉ᯲ ᯤᯝᯉᯉ᯲ ᯤ ᯐᯞ ᯔᯒᯑᯪᯀᯉ᯲ ᯑᯪ ᯖᯬᯒᯮ ᯉᯪ ᯂᯥ ᯅᯬᯞᯉᯬ᯲

Dompak dia ma hita muse, ale Aji Panungkunan? ninna donganna i.

ᯑᯔᯬ᯲ᯇᯂ᯲ ᯑᯪᯀ ᯔ ᯂᯪᯖ ᯔᯮᯘᯩ ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲ ᯉᯉᯪ᯲ᯉ ᯑᯬᯐᯉ᯲ᯉ

Ba dang huboto dope, ahu pe nunga tung loja.

ᯅ ᯑᯰ ᯂᯮᯅᯬᯖᯬ ᯑᯬᯇᯩ ᯀᯂᯮ ᯇᯩ ᯉᯮᯝ ᯖᯮᯰ ᯞᯬᯐ

Maradian ma hita jolo! ninna si Aji Panungkunan.

ᯔᯒᯑᯪᯀᯉ᯲ ᯔ ᯂᯪᯖ ᯐᯬᯞᯬ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Sangombas nari marende-ende ma ibana, ninna ma di ende-ende na lungun i,

ᯘᯝᯔᯬ᯲ᯅᯘ᯲ ᯉᯒᯪ ᯔᯒᯉᯩ᯲ᯑᯩᯀᯉᯩ᯲ᯑᯩ ᯔ ᯤᯅᯉ ᯉᯉᯪ᯲ᯉ ᯔ ᯑᯪ ᯀᯉᯩ᯲ᯑᯩᯀᯉᯩ᯲ᯑᯩ ᯉ ᯞᯮᯝᯉᯮ᯲ ᯤ

Tu dia ma da ompung langkahononhon, mangalului pitu sangkariang gala-gala.

ᯖᯮ ᯑᯪᯀ ᯔ ᯑ ᯀᯔᯬ᯲ᯇᯮᯰ ᯞᯰᯂᯂᯬᯉᯉᯬ᯲ᯂᯉᯬ᯲ ᯔᯝᯞᯮᯞᯮᯤ ᯇᯪᯖᯮ ᯘᯰᯂᯒᯪᯀᯰ ᯎᯞᯎᯞ

Simanjojak nunga so tarondolhon, beha ma bahenon mangalangka!

ᯘᯪᯔᯉ᯲ᯐᯬᯐᯂ᯲ ᯉᯮᯝ ᯘᯬ ᯖᯒᯉᯬ᯲ᯑᯞᯬ᯲ᯂᯉᯬ᯲ ᯅᯩᯂ ᯔ ᯅᯂᯩᯉᯉᯬ᯲ ᯔᯝᯞᯰᯂ

Si Tapi Marhillong Sere, boru ni raja, marsahit daba ompung di huta.

ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯬᯰ ᯘᯩᯒᯩ ᯅᯬᯒᯮ ᯉᯪ ᯒᯐ ᯔᯒ᯲ᯘᯂᯖᯪ᯲ ᯑᯅ ᯀᯔᯬ᯲ᯇᯮᯰ ᯑᯪ ᯂᯮᯖ

Ubatna ninna i ma gala-gala, nidok ni Boru Saniang Naga!

ᯥᯅᯖ᯲ᯉ ᯉᯉᯪ᯲ᯉ ᯤ ᯔ ᯎᯞᯎᯞ ᯉᯪᯑᯂᯬ᯲ ᯉᯪ ᯅᯬᯒᯮ ᯘᯉᯪᯀᯰ ᯉᯎ

Dung i mangkuling ma bodat longlong na bolon sian ginjang ni hau i, ninna ma,

ᯑᯮᯰ ᯤ ᯔᯰᯂᯮᯞᯪᯰ ᯔ ᯅᯪᯑᯖ᯲ ᯞᯬᯰᯞᯬᯰ ᯉ ᯅᯬᯞᯉᯬ᯲ ᯘᯪᯀᯉ᯲ ᯎᯉᯪ᯲ᯐᯰ ᯉᯪ ᯂᯥ ᯤ ᯉᯉᯪ᯲ᯉ ᯔ

Songon na hutanda do soarami, ho do i ale Aji Panungkunan?

ᯘᯬᯝᯉᯬ᯲ ᯉ ᯂᯮᯖᯉ᯲ᯑ ᯑᯬ ᯘᯬᯀᯒᯔᯪ ᯂᯬ ᯑᯬ ᯤ ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲

Jadi mamereng ma si Aji Panungkunan dompak ginjang, diida ma tutu bodat longlong na balga i, dung i didok ma, ahu do on tutu daba ompung!

ᯐᯑᯪ ᯔᯔᯩᯒᯩᯰ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯑᯔᯬ᯲ᯇᯂ᯲ ᯎᯉᯪ᯲ᯐᯰ ᯑᯪᯤᯑ ᯔ ᯖᯮᯖᯮ ᯅᯪᯑᯖ᯲ ᯞᯬᯰᯞᯬᯰ ᯉ ᯅᯞ᯲ᯎ ᯤ ᯑᯮᯰ ᯤ ᯑᯪᯑᯂᯬ᯲ ᯔ ᯀᯂᯮ ᯑᯬ ᯀᯉᯬ᯲ ᯖᯮᯖᯮ ᯑᯅ ᯀᯔᯬ᯲ᯇᯮᯰ

Songon na lungun-lungun ma endemi!

ᯘᯬᯐᯉᯬ᯲ ᯉ ᯞᯮᯝᯉᯮ᯲ᯞᯮᯝᯉᯮ᯲ ᯔ ᯀᯉᯩ᯲ᯑᯩᯔᯪ

Ai aha ma huroha na niluluanmu? ninna bodat longlong i manungkun.

ᯀᯤ ᯀᯂ ᯔ ᯂᯮᯒᯬᯂ ᯉ ᯉᯪᯞᯮᯞᯮᯀᯉ᯲ᯔᯮ ᯉᯉᯪ᯲ᯉ ᯅᯬᯑᯖ᯲ ᯞᯬᯰᯞᯬᯰ ᯤ ᯔᯉᯮᯰᯂᯉᯮ᯲

Na mangalului gala-gala do hami do ompung; gala-gala na pitu sangkariang na mardongan gala-gala sirumondang bulan.

ᯉ ᯔᯝᯞᯮᯞᯮᯤ ᯎᯞᯎᯞ ᯑᯬ ᯂᯔᯪ ᯑ ᯀᯔᯬ᯲ᯇᯮᯰ ᯎᯞᯎᯞ ᯉ ᯇᯪᯖᯮ ᯘᯰᯂᯒᯪᯀᯰ ᯉ ᯔᯒ᯲ᯑᯬᯝᯉ᯲ ᯎᯞᯎᯞ ᯘᯪᯒᯮᯔᯉᯬ᯲ᯑᯰ ᯅᯮᯞᯉ᯲

Marsahit do daba ale ompung boru ni raja i, si Tapi Marhillong Sere, paduahali on ma.

ᯔᯒ᯲ᯘᯂᯖᯪ᯲ ᯑᯬ ᯑᯅ ᯀᯞᯩ ᯀᯔᯬ᯲ᯇᯮᯰ ᯅᯬᯒᯮ ᯉᯪ ᯒᯐ ᯤ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯬᯰ ᯘᯩᯒᯩ ᯇᯑᯮᯀᯂᯞᯪ ᯀᯉᯬ᯲ ᯔ

I do ninna na pamalumhon jala na papatehon.

ᯤ ᯑᯬ ᯉᯉᯪ᯲ᯉ ᯉ ᯇᯔᯞᯔᯮ᯲ᯂᯉᯬ᯲ ᯐᯞ ᯉ ᯇᯇᯖᯩᯂᯉᯬ᯲

Nunga loja hami sadari on mardalan manopi-nopi Aek Parbaraan.

ᯉᯮᯝ ᯞᯬᯐ ᯂᯔᯪ ᯘᯑᯒᯪ ᯀᯉᯬ᯲ ᯔᯒ᯲ᯑᯞᯉ᯲ ᯔᯉᯬᯇᯪᯉᯬᯇᯪ ᯀᯀᯂᯩ᯲ ᯇᯒ᯲ᯅᯒᯀᯉ᯲

Dapot hami ma nian nangkin santurpuk bona ni gala-gala; nunga hujangkiti hami, hape so ada dapot di dangka papituhon! ninna si Aji Panungkunan.

ᯑᯇᯖᯬ᯲ ᯂᯔᯪ ᯔ ᯉᯪᯀᯉ᯲ ᯉᯰᯂᯉᯪ᯲ ᯘᯉ᯲ᯖᯒᯮ᯲ᯇᯂᯮ᯲ ᯅᯬᯉ ᯉᯪ ᯎᯞᯎᯞ ᯉᯮᯝ ᯂᯮᯐᯰᯂᯪᯖᯪ ᯂᯔᯪ ᯂᯇᯩ ᯘᯬ ᯀᯑ ᯑᯇᯖᯬ᯲ ᯑᯪ ᯑᯰᯂ ᯇᯇᯪᯖᯮᯂᯉᯬ᯲ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

O ale Aji Panungkunan, dang dison i dapot ho.

ᯀᯬ ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲ ᯑᯰ ᯑᯪᯘᯉᯬ᯲ ᯤ ᯑᯇᯖᯬ᯲ ᯂᯬ

Datdati hamu ma pahulu; disi do adong gala-gala na ni dokmi.

ᯑᯖ᯲ᯑᯖᯪ ᯂᯔᯮ ᯔ ᯇᯂᯮᯞᯮ ᯑᯪᯘᯪ ᯑᯬ ᯀᯑᯬᯰ ᯎᯞᯎᯞ ᯉ ᯉᯪ ᯑᯂᯬ᯲ᯔᯪ

Ihuthon ma dalanmu manopi-nopi aek i; jumpang ho do i muse! ninna bodat longlong i.

ᯤᯂᯖᯮ᯲ᯂᯉᯬ᯲ ᯔ ᯑᯞᯉ᯲ᯔᯮ ᯔᯉᯬᯇᯪᯉᯬᯇᯪ ᯀᯀᯂᯩ ᯤ ᯐᯔᯮ᯲ᯇᯰ ᯂᯬ ᯑᯬ ᯤ ᯔᯮᯘᯩ ᯉᯉᯪ᯲ᯉ ᯅᯬᯑᯖ᯲ ᯞᯬᯰᯞᯬᯰ ᯤ

Olo ba ompung, hununuti hami pe tutu! ninna si Aji Panungkunan.

ᯀᯬᯞᯬ ᯅ ᯀᯔᯬ᯲ᯇᯮᯰ ᯂᯮᯉᯮᯉᯮᯖᯪ ᯂᯔᯪ ᯇᯩ ᯖᯮᯖᯮ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Dung i mardalan ma nasida ; dung potang ari sahat ma nasida tu sada sopo; disi ma nasida marborngin.

ᯑᯮᯰ ᯤ ᯔᯒ᯲ᯑᯞᯉ᯲ ᯔ ᯉᯘᯪᯑ ᯑᯮᯰ ᯇᯬᯖᯰ ᯀᯒᯪ ᯘᯂᯖ᯲ ᯔ ᯉᯘᯪᯑ ᯖᯮ ᯘᯑ ᯘᯬᯇᯬ ᯑᯪᯘᯪ ᯔ ᯉᯘᯪᯑ ᯔᯒ᯲ᯅᯒᯬ᯲ᯝᯉᯪ᯲

Manogotna i dung torang ari didatdati nasida ma muse mardalan.

ᯔᯉᯬᯎᯖᯬ᯲ᯉ ᯤ ᯑᯮᯰ ᯖᯬᯒᯰ ᯀᯒᯪ ᯑᯪᯑᯖ᯲ᯑᯖᯪ ᯉᯘᯪᯑ ᯔ ᯔᯮᯘᯩ ᯔᯒ᯲ᯑᯞᯉ᯲

Jumpang nasida ma sapunguan bona ni gala-gala, jadi las ma rohanasida.

ᯐᯔᯮ᯲ᯇᯰ ᯉᯘᯪᯑ ᯔ ᯘᯇᯮᯝᯮᯀᯉ᯲ ᯅᯬᯉ ᯉᯪ ᯎᯞᯎᯞ ᯐᯑᯪ ᯞᯘ᯲ ᯔ ᯒᯬᯂᯉᯘᯪᯑ

Sai dapot ma nian dison!  ninna rohanasida.

ᯘᯤ ᯑᯇᯖᯬ᯲ ᯔ ᯉᯪᯀᯉ᯲ ᯑᯪᯘᯉᯬ᯲ ᯉᯉᯪ᯲ᯉ ᯒᯬᯂᯉᯘᯪᯑ

Dung i dijangkiti nasida ma gala-gala i, sai dilului ma di ginjang, di dangka papituhon.

ᯑᯮᯰ ᯤ ᯑᯪᯐᯰᯂᯪᯖᯪ ᯉᯘᯪᯑ ᯔ ᯎᯞᯎᯞ ᯤ ᯘᯤ ᯑᯪᯞᯮᯞᯮᯤ ᯔ ᯑᯪ ᯎᯉᯪ᯲ᯐᯰ ᯑᯪ ᯑᯰᯂ ᯇᯇᯪᯖᯮᯂᯉᯬ᯲

Nunga tung loja nasida, hape laos so adong do dapot.

ᯉᯮᯝ ᯖᯮᯰ ᯞᯬᯐ ᯉᯘᯪᯑ ᯂᯇᯩ ᯞᯀᯘᯬ᯲ ᯘᯬ ᯀᯑᯬᯰ ᯑᯬ ᯑᯇᯖᯬ᯲

Borhat ma nasida sian i, dung i maradian ma nasida di toru ni hau bolon.

ᯅᯒᯬ᯲ᯂᯖ᯲ ᯔ ᯉᯘᯪᯑ ᯘᯪᯀᯉ᯲ ᯤ ᯑᯮᯰ ᯤ ᯔᯒᯑᯪᯀᯉ᯲ ᯔ ᯉᯘᯪᯑ ᯑᯪ ᯖᯬᯒᯮ ᯉᯪ ᯂᯥ ᯅᯬᯞᯉᯬ᯲

Dung i marende-ende ma si Aji Panungkunan, ninna ma

ᯑᯮᯰ ᯤ ᯔᯒᯉᯩ᯲ᯑᯩᯀᯉᯩ᯲ᯑᯩ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯉᯉᯪ᯲ᯉ ᯔ

Tu dia ma da ompung langkahononhon, mangalului pitu sangkariang gala-gala.

ᯖᯮ ᯑᯪᯀ ᯔ ᯑ ᯀᯔᯬ᯲ᯇᯮᯰ ᯞᯰᯂᯂᯬᯉᯉᯬ᯲ᯂᯉᯬ᯲ ᯔᯝᯞᯮᯞᯮᯤ ᯇᯪᯖᯮ ᯘᯰᯂᯒᯪᯀᯰ ᯎᯞᯎᯞ

Simanjojak nunga so tarondolhon, beha ma bahenon mangalangka.

ᯘᯪᯔᯉ᯲ᯐᯬᯐᯂ᯲ ᯉᯮᯝ ᯘᯬ ᯖᯒᯉᯬ᯲ᯑᯞᯬ᯲ᯂᯉᯬ᯲ ᯅᯩᯂ ᯔ ᯅᯂᯩᯉᯉᯬ᯲ ᯔᯝᯞᯰᯂ

Si Tapi marhillong Sere, boru ni raja, marsahit daba ompung di huta.

ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯬᯰ ᯘᯩᯒᯩ ᯅᯬᯒᯮ ᯉᯪ ᯒᯐ ᯔᯒ᯲ᯘᯂᯖᯪ᯲ ᯑᯅ ᯀᯔᯬ᯲ᯇᯮᯰ ᯑᯪ ᯂᯮᯖ

Ubatna ninna i ma gala-gala, nidok ni Boru Saniang Naga!

ᯥᯅᯖ᯲ᯉ ᯉᯉᯪ᯲ᯉ ᯤ ᯔ ᯎᯞᯎᯞ ᯉᯪᯑᯂᯬ᯲ ᯉᯪ ᯅᯬᯒᯮ ᯘᯉᯪᯀᯰ ᯉᯎ

Dung i mangkuling ma sada gompul na birong sian ginjang ni hau i, didok ma,

ᯑᯮᯰ ᯤ ᯔᯰᯂᯮᯞᯪᯰ ᯔ ᯘᯑ ᯎᯔᯬ᯲ᯇᯞᯮ᯲ ᯉ ᯅᯪᯒᯬᯰ ᯘᯪᯀᯉ᯲ ᯎᯉᯪ᯲ᯐᯰ ᯉᯪ ᯂᯥ ᯤ ᯑᯪᯑᯂᯬ᯲ ᯔ

Songon na hutanda do soarami, ho do i, ale Aji Panungkunan?

ᯘᯬᯝᯉᯬ᯲ ᯉ ᯂᯮᯖᯉ᯲ᯑ ᯑᯬ ᯘᯬᯀᯒᯔᯪ ᯂᯬ ᯑᯬ ᯤ ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲

Tarsonggot ma si Aji Panungkunan dibereng ma dompak ginjang, diida ma tutu gompul na birong na bolon i, dung i didok ma, Ahu do on tutu daba ompung!

ᯖᯒ᯲ᯘᯬᯰᯎᯖᯬ᯲ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯑᯪᯅᯩᯒᯩᯰ ᯔ ᯑᯔᯬ᯲ᯇᯂ᯲ ᯎᯉᯪ᯲ᯐᯰ ᯑᯪᯤᯑ ᯔ ᯖᯮᯖᯮ ᯎᯔᯬ᯲ᯇᯞᯮ᯲ ᯉ ᯅᯪᯒᯬᯰ ᯉ ᯅᯬᯞᯉᯬ᯲ ᯤ ᯑᯮᯰ ᯤ ᯑᯪᯑᯂᯬ᯲ ᯔ ᯀᯂᯮ ᯑᯬ ᯀᯉᯬ᯲ ᯖᯮᯖᯮ ᯑᯅ ᯀᯔᯬ᯲ᯇᯮᯰ

Songon na lungun-lungun ma ende-endemi ale Aji Panungkunan!

ᯘᯬᯝᯉᯬ᯲ ᯉ ᯞᯮᯝᯉᯮ᯲ᯞᯮᯝᯉᯮ᯲ ᯔ ᯀᯉᯩ᯲ᯑᯩᯀᯉᯩ᯲ᯑᯩᯔᯪ ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲

Aha ma huroha na niluluanmu? ninna gompul na birong i sian ginjang ni hau i.

ᯀᯂ ᯔ ᯂᯮᯒᯬᯂ ᯉ ᯉᯪᯞᯮᯞᯮᯀᯉ᯲ᯔᯮ ᯉᯉᯪ᯲ᯉ ᯎᯔᯬ᯲ᯇᯞᯮ᯲ ᯉ ᯅᯪᯒᯬᯰ ᯤ ᯘᯪᯀᯉ᯲ ᯎᯉᯪ᯲ᯐᯰ ᯉᯪ ᯂᯥ ᯤ

Na mangalului gala-gala do hami da ompung; pitu hibung sangkariang, na mardongan gala-gala sirumondang bulan ! ninna si Aji Panungkunan.

ᯉ ᯔᯝᯞᯮᯞᯮᯤ ᯎᯞᯎᯞ ᯑᯬ ᯂᯔᯪ ᯑ ᯀᯔᯬ᯲ᯇᯮᯰ ᯇᯪᯖᯮ ᯂᯪᯅᯮᯰ ᯘᯰᯂᯒᯪᯀᯰ ᯉ ᯔᯒ᯲ᯑᯬᯝᯉ᯲ ᯎᯞᯎᯞ ᯘᯪ ᯒᯮᯔᯉᯬ᯲ᯑᯰ ᯅᯮᯞᯉ᯲

Tu aha ma bahenonmu gala-gala i, ale Aji Panungkunan? ninna gompul na birong i.

ᯖᯮ ᯀᯂ ᯔ ᯅᯂᯩᯉᯉᯬ᯲ᯔᯮ ᯎᯞᯎᯞ ᯤ ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲ ᯉᯉᯪ᯲ᯉ ᯎᯔᯬ᯲ᯇᯞᯮ᯲ ᯉ ᯅᯪᯒᯬᯰ ᯤ

Na naeng mambahen ubat do i ale ompung.

ᯉ ᯉᯀᯩᯰ ᯔᯔ᯲ᯅᯂᯉᯩ᯲ ᯥᯅᯖ᯲ ᯑᯬ ᯤ ᯀᯞᯩ ᯀᯔᯬ᯲ᯇᯮᯰ

Ai marsahit boru ni Raja Sohuturon Dolok na di Lobu Namaduma, nunga pola dua hali.

ᯀᯤ ᯔᯒ᯲ᯘᯂᯖᯪ᯲ ᯅᯬᯒᯮ ᯉᯪ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯉ ᯑᯪ ᯞᯬᯅᯮ ᯉ ᯔᯑᯮᯔ ᯉᯮᯝ ᯇᯬᯞ ᯑᯮᯀ ᯂᯞᯪ

Jadi i do didok Boru Saniang Naga di nipi na gabe ubatna pamalumhon dohot papatehon.

ᯐᯑᯪ ᯤ ᯑᯬ ᯑᯪᯑᯂᯬ᯲ ᯅᯬᯒᯮ ᯘᯉᯪᯀᯰ ᯉᯎ ᯑᯪ ᯉᯪᯇᯪᯉ ᯉ ᯎᯅᯩ ᯥᯅᯖ᯲ᯉ ᯇᯔᯞᯔᯮ᯲ᯂᯉᯬ᯲ ᯑᯬᯂᯖᯬ᯲ ᯇᯇᯖᯩᯂᯉᯬ᯲

Dapot hami do tutu nangkin santurpuk gala-gala i; nunga be hujangkiti hami, laos so ada dapot! ninna si Aji Panungkunan mangalusi.

ᯑᯇᯖᯬ᯲ ᯂᯔᯪ ᯑᯬ ᯖᯮᯖᯮ ᯉᯰᯂᯉᯪ᯲ ᯘᯉ᯲ᯖᯒᯮ᯲ᯇᯂᯮ᯲ ᯎᯞᯎᯞ ᯤ ᯉᯮᯝ ᯅᯩ ᯂᯮᯐᯰᯂᯪᯖᯪ ᯂᯔᯪ ᯞᯀᯘᯬ᯲ ᯘᯬ ᯀᯑ ᯑᯇᯖᯬ᯲ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯔᯝᯞᯮᯘᯪ

dang adong dapot ho i dison, ale Aji Panungkunan!

ᯑᯰ ᯀᯑᯬᯰ ᯑᯇᯖᯬ᯲ ᯂᯬ ᯤ ᯑᯪᯘᯉᯬ᯲ ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲

Datdati ma pahulu, disi do dapot ho annon gala-gala na niluluanmi.

ᯑᯖ᯲ᯑᯖᯪ ᯔ ᯇᯂᯮᯞᯮ ᯑᯪᯘᯪ ᯑᯬ ᯑᯇᯖᯬ᯲ ᯂᯬ ᯀᯉ᯲ᯉᯉᯬ᯲ ᯎᯞᯎᯞ ᯉ ᯉᯪᯞᯮᯞᯮᯀᯉ᯲ᯔᯪ

Unang ho mandele, nunuti dalanmu manopi-nopi aek i, sai jumpang ho do i muse! ninna gompul na birong i.

ᯥᯉᯰ ᯂᯬ ᯔᯉ᯲ᯑᯩᯞᯩ ᯉᯮᯉᯮᯖᯪ ᯑᯞᯉ᯲ᯔᯮ ᯔᯉᯬᯇᯪᯉᯬᯇᯪ ᯀᯀᯂᯩ᯲ ᯤ ᯘᯤ ᯐᯔᯮ᯲ᯇᯰ ᯂᯬ ᯑᯬ ᯤ ᯔᯮᯘᯩ ᯉᯉᯪ᯲ᯉ ᯎᯔᯬ᯲ᯇᯞᯮ᯲ ᯉ ᯅᯪᯒᯬᯰ ᯤ

Olo da ompung, hununuti hami ma tutu dalannami on! ninna si Aji Panungkunan.

ᯀᯬᯞᯬ ᯑ ᯀᯔᯬ᯲ᯇᯮᯰ ᯂᯮᯉᯮᯉᯮᯖᯪ ᯂᯔᯪ ᯔ ᯖᯮᯖᯮ ᯑᯞᯉ᯲ᯉᯔᯪ ᯀᯉᯬ᯲ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Dung i mardalan ma nasida, sai manopi-nopi ma nasida mangihut-ihut aek i pahulu.

ᯑᯮᯰ ᯤ ᯔᯒ᯲ᯑᯞᯉ᯲ ᯔ ᯉᯘᯪᯑ ᯘᯤ ᯔᯉᯬᯇᯪᯉᯬᯇᯪ ᯔ ᯉᯘᯪᯑ ᯔᯝᯪᯂᯖᯮ᯲ᯤᯂᯖᯮ᯲ ᯀᯀᯂᯩ᯲ ᯤ ᯇᯂᯮᯞᯮ

Jadi potang ma ari, sahat ma nasida tu sada sopo na tarulang.

ᯐᯑᯪ ᯇᯬᯖᯰ ᯔ ᯀᯒᯪ ᯘᯂᯖ᯲ ᯔ ᯉᯘᯪᯑ ᯖᯮ ᯘᯑ ᯘᯬᯇᯬ ᯉ ᯖᯒᯮᯞᯰ

Nunga rangrang deba tarupna i, jadi dibuat nasida ma bulung siala panolotina, asa tampis antong.

ᯉᯮᯝ ᯒᯰᯒᯰ ᯑᯩᯅ ᯖᯒᯇᯮ᯲ᯉ ᯤ ᯐᯑᯪ ᯑᯪᯅᯮᯀᯖ᯲ ᯉᯘᯪᯑ ᯔ ᯅᯮᯞᯮᯰ ᯘᯪᯀᯞ ᯇᯉᯬᯞᯬᯖᯪᯉ ᯀᯘ ᯖᯔ᯲ᯇᯘᯪ᯲ ᯀᯉ᯲ᯖᯬᯰ

Disi nama nasida marborngin.

ᯑᯪᯘᯪ ᯉᯔ ᯉᯘᯪᯑ ᯔᯒ᯲ᯅᯒᯬ᯲ᯝᯉᯪ᯲

Manogotna i dung torang ari borhat ma nasida sian sopo na tarulang i; sai mardalan ma nasida pahulu, dompak soksok ni Aek Parbaraan.

ᯔᯉᯬᯎᯖᯬ᯲ᯉ ᯤ ᯑᯮᯰ ᯖᯬᯒᯰ ᯀᯒᯪ ᯅᯒᯬ᯲ᯂᯖ᯲ ᯔ ᯉᯘᯪᯑ ᯘᯪᯀᯉ᯲ ᯘᯬᯇᯬ ᯉ ᯖᯒᯮᯞᯰ ᯤ ᯘᯤ ᯔᯒ᯲ᯑᯞᯉ᯲ ᯔ ᯉᯘᯪᯑ ᯇᯂᯮᯞᯮ ᯑᯔᯬ᯲ᯇᯂ᯲ ᯘᯂᯬ᯲ᯘᯂᯬ᯲ ᯉᯪ ᯀᯀᯂᯩ᯲ ᯇᯒ᯲ᯅᯒᯀᯉ᯲

Nunga loja nasida na mardalan i, alai laos so adong do jumpang nasida nanggo sangkambona gala-gala.

ᯉᯮᯝ ᯞᯬᯐ ᯉᯘᯪᯑ ᯉ ᯔᯒ᯲ᯑᯞᯉ᯲ ᯤ ᯀᯞᯤ ᯞᯀᯘᯬ᯲ ᯘᯬ ᯀᯑᯬᯰ ᯑᯬ ᯐᯔᯮ᯲ᯇᯰ ᯉᯘᯪᯑ ᯉᯰᯎᯬ ᯘᯰᯂᯔ᯲ᯅᯬᯉ ᯎᯞᯎᯞ

Dung i hundul ma nasida di ginjang ni batu di topi aek i, dibereng-bereng ma angka dengke insor na metmet marlange-lange di aek i.

ᯑᯮᯰ ᯤ ᯂᯉᯮ᯲ᯑᯞᯮ᯲ ᯔ ᯉᯘᯪᯑ ᯑᯪ ᯎᯉᯪ᯲ᯐᯰ ᯉᯪ ᯅᯖᯮ ᯑᯪ ᯖᯬᯇᯪ ᯀᯀᯂᯩ᯲ ᯤ ᯑᯪᯅᯩᯒᯩᯰ ᯔ ᯀᯰᯂ ᯑᯩᯰᯂᯩ ᯀᯉᯪ᯲ᯘᯒᯬ᯲ ᯉ ᯔᯖᯩ᯲ᯔᯖᯩ᯲ ᯔᯒ᯲ᯞᯝᯩᯞᯝᯩ ᯑᯪ ᯀᯀᯂᯩ᯲ ᯤ

Jadi didok dongan ni si Aji Panungkunan i ma,

ᯐᯑᯪ ᯑᯪᯑᯂᯬ᯲ ᯑᯬᯝᯉ᯲ ᯉᯪ ᯘᯪ ᯀᯝᯪ ᯇᯉᯮᯂᯮᯉᯉ᯲ ᯤ ᯔ

Na sonang ma antong angka insor on marlange-lange di aek na tio on, so pola loja on mangalului gala-gala sipitu sangkariang, na mardongan gala-gala sirumondang bulan!

ᯉ ᯘᯬᯉᯰ ᯔ ᯀᯉ᯲ᯖᯬᯰ ᯀᯰᯂ ᯀᯉᯪ᯲ᯘᯒᯬ᯲ ᯀᯉᯬ᯲ ᯔᯒ᯲ᯞᯝᯩᯞᯝᯩ ᯑᯪ ᯀᯀᯂᯩ᯲ ᯉ ᯖᯪᯁᯬ ᯀᯉᯬ᯲ ᯘᯬ ᯇᯬᯞ ᯞᯬᯐ ᯀᯉᯬ᯲ ᯔᯝᯞᯮᯞᯮᯤ ᯎᯞᯎᯞ ᯘᯪᯇᯪᯖᯮ ᯘᯰᯂᯒᯪᯀᯰ ᯉ ᯔᯒ᯲ᯑᯬᯑᯉ᯲ ᯎᯞᯎᯞ ᯘᯪᯒᯮᯔᯉᯬ᯲ᯑᯰ ᯅᯮᯞᯉ᯲

Songon na pandelean do da hubege hatami! ninna si Aji Panungkunan.

ᯘᯬᯝᯉᯬ᯲ ᯉ ᯇᯉ᯲ᯑᯩᯞᯩᯀᯉ᯲ ᯑᯬ ᯑ ᯂᯮᯅᯩᯎᯩ ᯂᯖᯔᯪ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Ai aha ma so marhoi iba, ale Aji Panungkunan.

ᯀᯤ ᯀᯂ ᯔ ᯘᯬ ᯔᯒ᯲ᯂᯬᯤ ᯤᯅ ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲

Nunga nioloan na nidok ni bodat longlong i, nioloan do na nidok ni gompul na birong i, hape laos so adong do dapot na niluluan, ninna dongan ni si Aji Panungkunan i.

ᯉᯮᯝ ᯉᯪᯀᯬᯞᯬᯀᯉ᯲ ᯉ ᯉᯪᯑᯂᯬ᯲ ᯉᯪ ᯅᯬᯑᯖ᯲ ᯞᯬᯰᯞᯬᯰ ᯤ ᯉᯪᯀᯬᯞᯬᯀᯉ᯲ ᯑᯬ ᯉ ᯉᯪᯑᯂᯬ᯲ ᯉᯪ ᯎᯔᯬ᯲ᯇᯞᯮ᯲ ᯉ ᯅᯪᯒᯬᯰ ᯤ ᯂᯇᯩ ᯞᯀᯘᯬ᯲ ᯘᯬ ᯀᯑᯬᯰ ᯑᯬ ᯑᯇᯖᯬ᯲ ᯉᯪᯞᯮᯞᯮᯀᯉ᯲ ᯉᯉᯪ᯲ᯉ ᯑᯬᯝᯉ᯲ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯤ

Ai so sahat dope hita tu soksok ni Aek Parbaraan on, da Jae.

ᯀᯤ ᯘᯬ ᯘᯂᯖ᯲ ᯑᯬᯇᯩ ᯂᯪᯖ ᯖᯮ ᯘᯂᯬ᯲ᯘᯂᯬ᯲ ᯉᯪ ᯀᯀᯂᯩ᯲ ᯇᯒ᯲ᯅᯒᯀᯉ᯲ ᯀᯉᯬ᯲ ᯑ ᯐᯀᯩ

Alai molo dung sahat hita tusi, hape so adong tarida gala-gala na talului on, ba marhoi ma iba tutu.

ᯀᯞᯤ ᯔᯬᯞᯬ ᯑᯮᯰ ᯘᯂᯖ᯲ ᯂᯪᯖ ᯖᯮᯘᯪ ᯂᯇᯩ ᯘᯬ ᯀᯑᯬᯰ ᯖᯒᯪᯑ ᯎᯞᯎᯞ ᯉ ᯖᯞᯮᯞᯮᯤ ᯀᯉᯬ᯲ ᯅ ᯔᯒ᯲ᯂᯬᯤ ᯔ ᯤᯅ ᯖᯮᯖᯮ

Anggo didok rohangku, dang margabus bodat longlong dohot gompul na birong i! ninna si Aji Panungkunan.

ᯀᯰᯎᯬ ᯑᯪᯑᯂᯬ᯲ ᯒᯪᯂᯩᯂᯮ ᯑᯰ ᯔᯒ᯲ᯎᯅᯘᯮ᯲ ᯅᯬᯑᯖ᯲ ᯞᯬᯰᯞᯬᯰ ᯑᯬᯂᯖᯬ᯲ ᯎᯔᯬ᯲ᯇᯞᯮ᯲ ᯉ ᯅᯪᯒᯬᯰ ᯤ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Adong ma disi sada batu na lampas na balga; jadi dipapeak nasida ma disi satongkin songon na mangalap gogo.

ᯀᯑᯬᯰ ᯔ ᯑᯪᯘᯪ ᯘᯑ ᯅᯖᯮ ᯉ ᯞᯔ᯲ᯇᯘ᯲ ᯉ ᯅᯞ᯲ᯎ ᯐᯑᯪ ᯑᯪᯇᯇᯩᯀᯂ᯲ ᯉᯘᯪᯑ ᯔ ᯑᯪᯘᯪ ᯘᯖᯬᯰᯂᯉᯪ᯲ ᯘᯬᯝᯉᯬ᯲ ᯉ ᯔᯝᯞᯇ᯲ ᯎᯬᯎᯬ

Hape tarpodom ma nasida na tolu ala ni lojana dihilala.

ᯂᯇᯩ ᯖᯒ᯲ᯇᯬᯑᯔᯬ᯲ ᯔ ᯉᯘᯪᯑ ᯉ ᯖᯬᯞᯮ ᯀᯞ ᯉᯪ ᯞᯬᯐᯉ ᯑᯪᯂᯪᯞᯞ

Tung songon na didampol batu na lampas i do huroha dihilala tanggurungnasida.

ᯖᯮᯰ ᯘᯬᯝᯉᯬ᯲ ᯉ ᯑᯪᯑᯔ᯲ᯇᯞᯬ᯲ ᯅᯖᯮ ᯉ ᯞᯔ᯲ᯇᯘ᯲ ᯤ ᯑᯬ ᯂᯮᯒᯬᯂ ᯑᯪᯂᯪᯞᯞ ᯖᯰᯎᯮᯒᯮᯰᯉᯘᯪᯑ

Dung manang sadia leleng tarsunggul ma nasida huhut tarsonggot.

ᯑᯮᯰ ᯔᯉᯰ ᯘᯑᯪᯀ ᯞᯩᯞᯩᯰ ᯖᯒ᯲ᯘᯮᯰᯎᯞᯮ᯲ ᯔ ᯉᯘᯪᯑ ᯂᯮᯂᯖᯮ᯲ ᯖᯒ᯲ᯘᯬᯰᯎᯖᯬ᯲

Naung tarpodom do hita hape di batu na lampas on! ninna nasida.

ᯉᯀᯰᯮ ᯖᯒ᯲ᯇᯬᯑᯔᯬ᯲ ᯑᯬ ᯂᯪᯖ ᯂᯇᯩ ᯑᯪ ᯅᯖᯮ ᯉ ᯞᯔ᯲ᯇᯘ᯲ ᯀᯉᯬ᯲ ᯉᯉᯪ᯲ᯉ ᯉᯘᯪᯑ

Nunga naeng potang ari, jadi didok si Aji Panungkunan ma, Potang ne ma ari!

ᯉᯮᯝ ᯉᯀᯰᯩ ᯇᯬᯖᯰ ᯀᯒᯪ ᯐᯑᯪ ᯑᯪᯑᯂᯬ᯲ ᯘᯪ ᯀᯐᯪ ᯇᯉᯮᯂᯮᯉᯉ᯲ ᯔ ᯇᯬᯖᯰ ᯉᯩ ᯔ ᯀᯒᯪ

Di topi-topi on ma tabahen undung-undungta, asa adong parbornginanta.

ᯑᯪ ᯖᯬᯇᯪᯖᯬᯇᯪ ᯀᯉᯬ᯲ ᯔ ᯖᯅᯂᯉᯩ᯲ ᯀᯉᯮ᯲ᯑᯮᯰᯀᯉᯮ᯲ᯑᯮᯰᯖ ᯀᯘ ᯀᯑᯬᯰ ᯇᯒ᯲ᯅᯒᯬ᯲ᯝᯪᯉᯉ᯲ᯖ

Sangombas nari holom ma ari!

ᯘᯝᯔᯬ᯲ᯅᯘ᯲ ᯉᯒᯪ ᯂᯬᯞᯔᯬ᯲ ᯔ ᯀᯒᯪ

Na denggan ma i tutu! ninna donganna na dua i.

ᯉ ᯑᯰᯩᯎᯉ᯲ ᯔ ᯤ ᯖᯮᯖᯮ ᯉᯉᯪ᯲ᯉ ᯑᯬᯝᯉ᯲ᯉ ᯉ ᯑᯮᯀ ᯤ

Dung i ditallihi nasida  ma angka hau ni tambinsu dohot hau dolok, i ma dipagohon di hambirang dohot di siamun.

ᯑᯮᯰ ᯤ ᯑᯪᯖᯞ᯲ᯞᯪᯂᯪ ᯉᯘᯪᯑ ᯔ ᯀᯰᯂ ᯂᯥ ᯑᯬᯞᯂᯬ᯲ ᯤ ᯔ ᯑᯪᯇᯎᯬᯂᯉᯬ᯲ ᯑᯪ ᯂᯔ᯲ᯅᯪᯒᯰ ᯑᯬᯂᯖᯬ᯲ ᯑᯪ ᯘᯪᯀᯔᯉᯮ᯲

Ditali ma di ginjang dohot andor baliang, jala dipeakkon ma muse hau na rimpur di ginjang ni panalian i.

ᯑᯪᯖᯞᯪ ᯔ ᯑᯪ ᯎᯉᯪ᯲ᯐᯰ ᯑᯬᯂᯖᯬ᯲ ᯀᯉ᯲ᯑᯒᯬ᯲ ᯅᯞᯪᯀᯰ ᯐᯞ ᯑᯪᯇᯩᯀᯂ᯲ᯂᯉᯬ᯲ ᯔ ᯔᯮᯘᯩ ᯂᯥ ᯉ ᯒᯔᯪ᯲ᯇᯒᯮ᯲ ᯑᯪ ᯎᯉᯪ᯲ᯐᯰ ᯉᯪ ᯇᯉᯞᯪᯀᯉ᯲ ᯤ

Dung i dibuat ma bulung siala, i ma dipansandehon tu angka anak ni hau na pinagohon i; di hambirang dohot di siamun.

ᯑᯮᯰ ᯤ ᯑᯪᯅᯮᯀᯖ᯲ ᯔ ᯅᯮᯞᯮᯰ ᯘᯪᯀᯞ ᯤ ᯔ ᯑᯪᯇᯉ᯲ᯘᯉ᯲ᯑᯩᯂᯉᯬ᯲ ᯖᯮ ᯀᯰᯂ ᯀᯉᯂ᯲ ᯉᯪ ᯂᯥ ᯉ ᯇᯪᯉᯎᯬᯂᯉᯬ᯲ ᯤ ᯑᯪ ᯂᯔ᯲ᯅᯪᯒᯰ ᯑᯬᯂᯖᯬ᯲ ᯑᯪ ᯘᯪᯀᯔᯉᯮ᯲

Dibuat nasida ma bulung ni pahu, ai godang do i tubu humaliang undung-undung i; i ma dipanserakkon asa adong songon lage hapeahannasida.

ᯑᯪᯅᯮᯀᯖ᯲ ᯉᯘᯪᯑ ᯔ ᯅᯮᯞᯮᯰ ᯉᯪ ᯇᯂᯮ ᯀᯤ ᯎᯬᯑᯰ ᯑᯬ ᯤ ᯖᯮᯅᯮ ᯂᯮᯔᯞᯪᯀᯰ ᯀᯉᯮ᯲ᯑᯮᯰᯀᯉᯮ᯲ᯑᯮᯰ ᯤ ᯤ ᯔ ᯑᯪᯇᯉ᯲ᯘᯩᯒᯂ᯲ᯂᯉᯬ᯲ ᯀᯘ ᯀᯑᯬᯰ ᯘᯬᯝᯉᯬ᯲ ᯞᯎᯩ ᯂᯇᯩᯀᯂᯉ᯲ᯉᯘᯪᯑ

Mandapothon tahuak manuk tarbege ma adong mardarasdaras jonok tu undung-undung i.

ᯔᯉ᯲ᯑᯇᯖᯬ᯲ᯂᯉᯬ᯲ ᯖᯂᯮᯀᯂ᯲ ᯔᯉᯂᯮ᯲ ᯖᯒ᯲ᯅᯩᯎᯩ ᯔ ᯀᯑᯬᯰ ᯔᯒ᯲ᯑᯒᯘ᯲ᯑᯒᯘ᯲ ᯐᯬᯉᯂᯬ᯲ ᯖᯮ ᯀᯉᯮ᯲ᯑᯮᯰᯀᯉᯮ᯲ᯑᯮᯰ ᯤ

Tarsonggot ma si Aji Panungkunan, dung i pintor hundul ma ibana.

ᯖᯒ᯲ᯘᯬᯰᯎᯖᯬ᯲ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯑᯮᯰ ᯤ ᯇᯉᯪ᯲ᯖᯒᯬ᯲ ᯂᯉᯮ᯲ᯑᯞᯮ᯲ ᯔ ᯤᯅᯉ

Toho do antong tiur bulan, jadi dibereng ma dompak ruar, jadi diida ma tutu sada babiat balemun, sai jongjong disi.

ᯖᯬᯂᯬ ᯑᯬ ᯀᯉ᯲ᯖᯬᯰ ᯖᯪᯀᯒᯮ᯲ ᯅᯮᯞᯉ᯲ ᯐᯑᯪ ᯑᯪᯅᯩᯒᯰᯩ ᯔ ᯑᯔᯬ᯲ᯇᯂ᯲ ᯒᯮᯀᯒ᯲ ᯐᯑᯪ ᯑᯪᯤᯑ ᯔ ᯖᯮᯖᯮ ᯘᯑ ᯅᯅᯪᯀᯖ᯲ ᯅᯞᯩᯔᯉᯮ᯲ ᯘᯤ ᯐᯬᯰᯐᯬᯰ ᯑᯪᯘᯪ

Marsisir ma imbuluna, dung i pintor disungguli ma donganna i, mansai songgot dibahen.

ᯔᯒ᯲ᯘᯪᯘᯒᯪ᯲ ᯔ ᯀᯔᯪ᯲ᯅᯮᯞᯮᯉ ᯑᯮᯰ ᯤ ᯇᯉᯪ᯲ᯖᯒᯬ᯲ ᯑᯪᯘᯮᯰᯎᯮᯞᯪ ᯔ ᯑᯬᯝᯉ᯲ᯉ ᯤ ᯔᯉ᯲ᯘᯤ ᯘᯬᯰᯎᯖᯬ᯲ ᯑᯪᯅᯂᯉᯩ᯲

Aha do i ale Aji Panungkunan, songgotna i panunggulimi di donganmu! ninna.

ᯀᯂ ᯑᯪ ᯤ ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲ ᯘᯬᯰᯎᯖᯬ᯲ᯉ ᯤ ᯇᯉᯮᯰᯎᯮᯞᯪᯔᯪ ᯑᯪ ᯑᯬᯝᯉ᯲ᯔᯮ ᯉᯉᯪ᯲ᯉ

Hundul ma hamu, bereng ma dompak ruar! ninna si Aji Panungkunan.

ᯂᯉᯮ᯲ᯑᯞᯮ᯲ ᯔ ᯂᯔᯮ ᯅᯩᯒᯰᯩ ᯔ ᯑᯔᯬ᯲ᯇᯂ᯲ ᯒᯮᯀᯒ᯲ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Dung i tompu ma nasida hundul ; dibereng ma dompak ruar.

ᯑᯮᯰ ᯤ ᯖᯔᯬ᯲ᯇᯮ ᯔ ᯉᯘᯪᯑ ᯂᯉᯮ᯲ᯑᯞᯮ᯲ ᯑᯪᯅᯩᯒᯰᯩ ᯔ ᯑᯔᯬ᯲ᯇᯂ᯲ ᯒᯮᯀᯒ᯲

Diida ma babiat balemun i, nunga sai lam dipajonok dompak undung-undung i.

ᯑᯪᯤᯑ ᯔ ᯅᯅᯪᯀᯖ᯲ ᯅᯞᯩᯔᯉᯮ᯲ ᯤ ᯉᯮᯝ ᯘᯤ ᯞᯔ᯲ ᯑᯪᯇᯐᯬᯉᯂᯬ᯲ ᯑᯔᯬ᯲ᯇᯂ᯲ ᯀᯉᯮ᯲ᯑᯮᯰᯀᯉᯮ᯲ᯑᯮᯰ ᯤ

Lam mabiar ma dongan ni si Aji Panungkunan i, jadi saguru gogona ma didok, mate ma hita ale Aji Panungkunan!

ᯞᯔ᯲ ᯔᯅᯪᯀᯒ᯲ ᯔ ᯑᯬᯝᯉ᯲ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯤ ᯐᯑᯪ ᯘᯎᯮᯒᯮ ᯎᯬᯎᯬᯉ ᯔ ᯑᯪᯑᯂᯬ᯲ ᯔᯖᯩ ᯔ ᯂᯪᯖ ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲

Masitiopan ma nasida na tolu, dung i angkadotdot ma ala ni biarna, ngali nama badanna dihilala be.

ᯔᯘᯪᯖᯪᯀᯬᯇᯉ᯲ ᯔ ᯉᯘᯪᯑ ᯉ ᯖᯬᯞᯮ ᯑᯮᯰ ᯤ ᯀᯰᯂᯑᯖᯬ᯲ᯑᯖᯬ᯲ ᯔ ᯀᯞ ᯉᯪ ᯅᯪᯀᯒ᯲ᯉ ᯝᯞᯪ ᯉᯔ ᯅᯑᯉ᯲ᯉ ᯑᯪᯂᯪᯞᯞ ᯅᯩ

Ai dang adong hamu na mamboan unte pangir? ninna si Aji Panungkunan tu donganna i.

ᯀᯤ ᯑᯰ ᯀᯑᯬᯰ ᯂᯔᯮ ᯉ ᯔᯔ᯲ᯅᯬᯀᯉ᯲ ᯀᯉᯮ᯲ᯖᯩ ᯇᯝᯒᯪ᯲ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯖᯮ ᯑᯬᯝᯉ᯲ᯉ ᯤ

Adong do di hajuthi, alai nunga antairiron ahu; songon lili tunggal na hinutur-hutur ni alogo tanganku! ninna dongan ni si Aji Panungkunan i.

ᯀᯑᯬᯰ ᯑᯬ ᯑᯪ ᯂᯐᯖᯮ᯲ᯂᯪ ᯀᯞᯤ ᯉᯮᯝ ᯀᯉ᯲ᯖᯤᯒᯪᯒᯉᯬ᯲ ᯀᯂᯮ ᯘᯬᯝᯉᯬ᯲ ᯞᯪᯞᯪ ᯖᯮᯰᯎᯞ᯲ ᯉ ᯂᯪᯉᯮᯖᯒᯮ᯲ᯂᯮᯖᯒᯮ᯲ ᯉᯪ ᯀᯞᯬᯎᯬ ᯖᯝᯉ᯲ᯂᯮ ᯉᯉᯪ᯲ᯉ ᯑᯬᯝᯉ᯲ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯤ

Dung i dipagomos si Aji Panungkunan ma rohana, didadap ma hajut ni donganna i; dapotsa ma tutu unte pangir i di bagasan.

ᯑᯮᯰ ᯤ ᯑᯪᯇᯎᯬᯔᯘᯬ᯲ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯔ ᯒᯬᯂᯉ ᯑᯪᯑᯑᯇ᯲ ᯔ ᯂᯐᯖᯮ᯲ ᯉᯪ ᯑᯬᯝᯉ᯲ᯉ ᯤ ᯑᯇᯖᯬ᯲ᯘ ᯔ ᯖᯮᯖᯮ ᯀᯉᯮ᯲ᯖᯩ ᯇᯝᯒᯪ᯲ ᯤ ᯑᯪ ᯅᯎᯘᯉ᯲

Dibagi tolu ma i, dung i didok ma, ganup ma hita mamiu-miu langkat ni unte pangir on.

ᯑᯪᯅᯎᯪ ᯖᯬᯞᯮ ᯔ ᯤ ᯑᯮᯰ ᯤ ᯑᯪᯑᯂᯬ᯲ ᯔ ᯎᯉᯇᯮ᯲ ᯔ ᯂᯪᯖ ᯔᯔᯪᯥᯔᯪᯥ ᯞᯰᯂᯖ᯲ ᯉᯪ ᯀᯉᯮ᯲ᯖᯩ ᯇᯝᯒᯪ᯲ ᯀᯉᯬ᯲

Ombushon uapna i dompak na gogo i, raja ni tombak on, unang adong tahi di ibana mangago hita on!

ᯀᯔᯬ᯲ᯅᯘᯮ᯲ᯂᯉᯬ᯲ ᯥᯀᯇ᯲ᯉ ᯤ ᯑᯔᯬ᯲ᯇᯂ᯲ ᯉ ᯎᯬᯎᯬ ᯤ ᯒᯐ ᯉᯪ ᯖᯔᯬ᯲ᯅᯂ᯲ ᯀᯉᯬ᯲ ᯥᯉᯰ ᯀᯑᯬᯰ ᯖᯂᯪ ᯑᯪ ᯤᯅᯉ ᯔᯝᯎᯬ ᯂᯪᯖ ᯀᯉᯬ᯲

Huhut angkadotdot, sai dipulos-pulos nasida ma langkat ni unte pangir i; dung diombushon ma dompak babiat balemun i uapna i.

ᯂᯮᯂᯖᯮ᯲ ᯀᯰᯂᯑᯖᯬ᯲ᯑᯖᯬ᯲ ᯘᯤ ᯑᯪᯇᯮᯞᯘᯬ᯲ᯇᯮᯞᯘᯬ᯲ ᯉᯘᯪᯑ ᯔ ᯞᯰᯂᯖ᯲ ᯉᯪ ᯀᯉᯮ᯲ᯖᯩ ᯇᯝᯒᯪ᯲ ᯤ ᯑᯮᯰ ᯑᯪᯀᯔᯬ᯲ᯅᯘᯮ᯲ᯂᯉᯬ᯲ ᯔ ᯑᯔᯬ᯲ᯇᯂ᯲ ᯅᯅᯪᯀᯖ᯲ ᯅᯞᯩᯔᯉᯮ᯲ ᯤ ᯥᯀᯇ᯲ᯉ ᯤ

Dung i tompu ma babiat i manimbung laho marlojongi.

ᯑᯮᯰ ᯤ ᯖᯔᯬ᯲ᯇᯮ ᯔ ᯅᯅᯪᯀᯖ᯲ ᯤ ᯔᯉᯔᯪ᯲ᯅᯮᯰ ᯞᯂᯬ ᯔᯒ᯲ᯞᯬᯐᯬᯝᯪ

Salpu ma sangombas dibege nasida ma adong aili mallangak, songon na dipongkik.

ᯘᯞ᯲ᯇᯮ ᯔ ᯘᯝᯔᯬ᯲ᯅᯘ᯲ ᯑᯪᯅᯩᯎᯩ ᯉᯘᯪᯑ ᯔ ᯀᯑᯬᯰ ᯀᯤᯞᯪ ᯔᯞ᯲ᯞᯝᯂ᯲ ᯘᯬᯝᯉᯬ᯲ ᯉ ᯑᯪᯇᯬᯰᯂᯂᯪ᯲

Jadi mamoto ma nasida na tolu, nunga manoro babiat balemun i di ramba i.

ᯐᯑᯪ ᯔᯔᯬᯖᯬ ᯔ ᯉᯘᯪᯑ ᯉ ᯖᯬᯞᯮ ᯉᯮᯝ ᯔᯉᯬᯒᯬ ᯅᯅᯪᯀᯖ᯲ ᯅᯞᯩᯔᯉᯮ᯲ ᯤ ᯑᯪ ᯒᯔ᯲ᯅ ᯤ

Dung torang ari jongjong be ma nasida, songon na so diboto be aha sibahenon, ala gok biar dope nasida.

ᯑᯮᯰ ᯖᯬᯒᯰ ᯀᯒᯪ ᯐᯬᯰᯐᯬᯰ ᯅᯩ ᯔ ᯉᯘᯪᯑ ᯘᯬᯝᯉᯬ᯲ ᯉ ᯘᯬ ᯑᯪᯅᯬᯖᯬ ᯅᯩ ᯀᯂ ᯘᯪᯅᯂᯩᯉᯉᯬ᯲ ᯀᯞ ᯎᯂᯬ᯲ ᯅᯪᯀᯒ᯲ ᯑᯬᯇᯩ ᯉᯘᯪᯑ

Hape tompu ma muse dibege nasida adong mardaras, jala tongkin nari nunga di jolonasida babiat balemun sinabodari.

ᯂᯇᯩ ᯖᯔᯬ᯲ᯇᯮ ᯔ ᯔᯮᯘᯩ ᯑᯪᯅᯩᯎᯩ ᯉᯘᯪᯑ ᯀᯑᯬᯰ ᯔᯒ᯲ᯑᯒᯘ᯲ ᯐᯞ ᯖᯬᯰᯂᯉᯪ᯲ ᯉᯒᯪ ᯉᯮᯝ ᯑᯪ ᯐᯬᯞᯬᯉᯘᯪᯑ ᯅᯅᯪᯀᯖ᯲ ᯅᯞᯩᯔᯉᯮ᯲ ᯘᯪᯉᯅᯬᯑᯒᯪ

Tung roham do  ompung, molo na tung panganonmu hami; alai molo siat pangidoan da ompung, asi ma roham di hami! ninna si Aji Panungkunan.

ᯖᯮᯰ ᯒᯬᯂᯔ᯲ ᯑᯬ ᯀᯔᯬ᯲ᯇᯮᯰ ᯔᯬᯞᯬ ᯉ ᯖᯮᯰ ᯇᯝᯉᯉᯬ᯲ᯔᯮ ᯂᯔᯪ ᯀᯞᯤ ᯔᯬᯞᯬ ᯘᯪᯀᯖ᯲ ᯇᯝᯪᯑᯬᯀᯉ᯲ ᯑ ᯀᯔᯬ᯲ᯇᯮᯰ ᯀᯘᯪ ᯔ ᯒᯬᯂᯔ᯲ ᯑᯪ ᯂᯔᯪ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Boasa pola panganonku ho, ai gok do dison aili; mura-mura do hutangkup.

ᯅᯬᯀᯘ ᯇᯬᯞ ᯇᯝᯉᯉᯬ᯲ᯂᯮ ᯂᯬ ᯀᯤ ᯎᯂᯬ᯲ ᯑᯬ ᯑᯪᯘᯉᯬ᯲ ᯀᯤᯞᯪ ᯔᯮᯒᯔᯮᯒ ᯑᯬ ᯂᯮᯖᯰᯂᯇᯮ᯲

So sidung dope ate-ate ni na sada hupangan, nunga dapot muse sada nari.

ᯘᯬ ᯘᯪᯑᯮᯰ ᯑᯬᯇᯩ ᯀᯖᯩᯀᯖᯩ ᯉᯪ ᯉ ᯘᯑ ᯂᯮᯇᯝᯉ᯲ ᯉᯮᯝ ᯑᯇᯖᯬ᯲ ᯔᯮᯘᯩ ᯘᯑᯉᯒᯪ

Lomo-lomongku do dison sipanganon.

ᯞᯬᯔᯬᯞᯬᯔᯬᯰᯂᯮ ᯑᯬ ᯑᯪᯘᯉᯬ᯲ ᯘᯪᯇᯝᯉᯉᯬ᯲

Unang pola mabiar ho, dang panganonhu ho!

ᯥᯉᯰ ᯇᯬᯞ ᯔᯅᯪᯀᯒ᯲ ᯂᯬ ᯑᯰ ᯇᯝᯉᯉᯬ᯲ᯂᯮ ᯂᯬ

Na sian dia do ho, jala laho tu dia? ninna babiat balemun i.

ᯉ ᯘᯪᯀᯉ᯲ ᯑᯪᯀ ᯑᯬ ᯂᯬ ᯐᯞ ᯞᯂᯬ ᯖᯮ ᯑᯪᯀ ᯉᯉᯪ᯲ᯉ ᯅᯅᯪᯀᯖ᯲ ᯅᯞᯩᯔᯉᯮ᯲ ᯤ

Si Aji Panungkunan do ahu, ompung!

ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯑᯬ ᯀᯂᯮ ᯀᯔᯬ᯲ᯇᯮᯰ

Na borhat sian Lobu Namaduma do ahu, sian huta ni Raja Sohuturon Dolok.

ᯉ ᯅᯒᯬ᯲ᯂᯖ᯲ ᯘᯪᯀᯉ᯲ ᯞᯬᯅᯮ ᯉᯔᯑᯮᯮᯔ ᯑᯬ ᯀᯂᯮ ᯘᯪᯀᯉ᯲ ᯂᯮᯖ ᯉᯪ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲

Na laho mangalului gala-gala do hami, sipitu sangkaraing, na mardongan gala-gala sirumondang bulan! ninna si Aji Panungkunan.

ᯉ ᯞᯂᯬ ᯔᯝᯞᯮᯞᯮᯤ ᯎᯞᯎᯞ ᯑᯬ ᯂᯔᯪ ᯘᯪᯇᯪᯖᯮ ᯘᯰᯂᯒᯪᯀᯰ ᯉ ᯔᯒ᯲ᯑᯬᯝᯉ᯲ ᯎᯞᯎᯞ ᯘᯪᯒᯮᯔᯉᯬ᯲ᯑᯰ ᯅᯮᯞᯉ᯲ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Dung i didok babiat balemun i ma, hutanda do tutu anggo Raja Sohuturon Dolok.

ᯑᯮᯰ ᯤ ᯑᯪᯑᯂᯬ᯲ ᯅᯅᯪᯘᯖ᯲ ᯅᯞᯩᯔᯉᯮ᯲ ᯤ ᯔ ᯂᯮᯖᯉ᯲ᯑ ᯑᯬ ᯖᯮᯖᯮ ᯀᯰᯎᯬ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲

Na tigor do uhumna, na sintong rohana.

ᯉ ᯖᯪᯎᯒᯬ᯲ ᯑᯬ ᯥᯂᯔᯮ᯲ᯉ ᯉ ᯘᯉᯪ᯲ᯖᯬᯰ ᯒᯬᯂ

Ibana ma parhatiha na so ra teleng, ibana ma sihorus na lobi, ibana ma sitambai na hurang.

ᯤᯅᯉ ᯔ ᯇᯒ᯲ᯂᯖᯪᯂ ᯉ ᯘᯬ ᯒ ᯖᯩᯞᯰᯩ ᯤᯅᯉ ᯔ ᯘᯪᯂᯬᯒᯘᯮ᯲ ᯉ ᯞᯬᯅᯪ ᯤᯅᯉ ᯔ ᯘᯪᯖᯔ᯲ᯅᯤ ᯉ ᯂᯮᯒᯰ

dang dung hudokkon suruanku tu huta i, ai so hea masa na so uhum di Lobu Namaduma, huta ni raja i.

ᯑᯰ ᯑᯮᯰ ᯂᯮᯑᯂᯬ᯲ᯂᯉᯬ᯲ ᯘᯮᯒᯮᯘᯉ᯲ᯂᯮ ᯖᯮ ᯂᯮᯖ ᯤ ᯀᯤ ᯘᯬ ᯂᯩᯀ ᯔᯘ ᯉ ᯘᯬ ᯥᯂᯔᯮ᯲ ᯑᯪ ᯞᯬᯅᯮ ᯉᯔᯑᯮᯔ ᯂᯮᯖ ᯉᯪ ᯒᯐ ᯤ

Ai tu aha ma huroha gala-gala i?

ᯀᯤ ᯖᯮ ᯀᯂ ᯔ ᯂᯮᯒᯬᯂ ᯎᯞᯎᯞ ᯤ

Songon on do ba ompung! Na marsahit do boru ni raja i, si Tapi Marhillong Sere, nunga pola dua hali.

ᯘᯬᯝᯉᯬ᯲ ᯀᯉᯬ᯲ ᯑᯬ ᯅ ᯀᯔᯬ᯲ᯇᯮᯰ ᯉ ᯒ᯲ᯘᯂᯖᯪ᯲ ᯑᯬ ᯅᯬᯒᯮ ᯉᯪ ᯒᯐ ᯤ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯬᯰ ᯘᯩᯒᯩ ᯉᯮᯝ ᯇᯬᯞ ᯑᯮᯀ ᯂᯞᯪ

Na laho ubat ni boru ni raja i do da ompung gala-gala na hulului hami on.

ᯉ ᯞᯂᯬ ᯥᯅᯖ᯲ ᯉᯪ ᯅᯬᯒᯮ ᯪ ᯒᯐ ᯤ ᯑᯬ ᯑ ᯀᯔᯬ᯲ᯇᯮᯰ ᯎᯞᯎᯞ ᯉ ᯂᯮᯞᯮᯞᯮᯤ ᯂᯔᯪ ᯀᯉᯬ᯲

Ingkon di dangka papituhon muse do i gantung! ninna si Aji Panungkunan.

ᯀᯪᯰᯂᯉᯬ᯲ ᯑᯪ ᯑᯩᯂ ᯇᯇᯪᯖᯮᯂᯉᯬ᯲ ᯔᯮᯘᯩ ᯑᯬ ᯤ ᯎᯉ᯲ᯖᯮᯰ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Ai ise ma huroha paboahon ubat i? ninna babiat i

ᯀᯤ ᯤᯘᯩ ᯔ ᯂᯮᯒᯬᯂ ᯇᯅᯬᯀᯂᯉᯬ᯲ ᯥᯅᯖ᯲ ᯤ ᯉᯉᯪ᯲ᯉ ᯅᯅᯪᯀᯖ᯲ ᯤ

Anggo i do ba ompung, ba Boru Saniang Naga do paboahon i di nipingku !  ninna si Aji Panungkunan.

ᯀᯰᯎᯬ ᯤ ᯑᯬ ᯅ ᯀᯔᯬ᯲ᯇᯮᯰ ᯅ ᯅᯬᯒᯮ ᯘᯉᯪᯀᯰ ᯉᯎ ᯑᯬ ᯇᯅᯬᯀᯂᯉᯬ᯲ ᯤ ᯑᯪ ᯉᯪᯇᯪᯰᯂᯮ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Na denggan ma i tutu; nunuti hamu ma dalanmuna pahulu aek on.

ᯉ ᯑᯰᯩ ᯎᯉ᯲ ᯔ ᯤ ᯖᯮᯖᯮ ᯉᯮᯉᯮᯖᯪ ᯂᯔᯮ ᯔ ᯑᯞᯉ᯲ᯔᯮ ᯇᯂᯮᯞᯮ ᯀᯀᯂᯩ᯲ ᯀᯉᯬ᯲

Tibu nama dapot hamu i; di topi aek i do tubu, jala rugun do bulungna.

ᯖᯪᯅᯮ ᯉᯔ ᯑᯇᯖᯬ᯲ ᯂᯔᯮ ᯤ ᯑᯪ ᯖᯬᯇᯪ ᯀᯀᯂᯩ᯲ ᯤ ᯑᯬ ᯖᯮᯅᯮ ᯐᯞ ᯒᯮᯎᯉᯮ᯲ ᯑᯬ ᯅᯮᯞᯮᯰᯉ

Mura do i idaonmuna, ai sanduduk dohot tambinsu do tubu humaliangna.

ᯔᯮᯒ ᯑᯬ ᯤ ᯤᯑᯀᯉᯬ᯲ᯔᯮᯉ ᯀᯤ ᯘᯉ᯲ᯑᯮᯑᯂᯮ᯲ ᯑᯬᯂᯖᯬ᯲ ᯖᯔ᯲ᯅᯉᯪ᯲ᯘᯮ ᯑᯬ ᯖᯮᯅᯮ ᯂᯮᯔᯞᯪᯀᯰᯉ

Ala na didok ho do goar ni Raja Sohuturon Dolok umbahen hupaboa i tu ho! ninna babiat balemun i.

ᯀᯞ ᯉ ᯑᯪᯑᯂᯬ᯲ ᯂᯬ ᯑᯬ ᯎᯬᯀᯒ᯲ ᯉᯪ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯀᯔᯮ᯲ᯅᯂᯉᯩ᯲ ᯂᯮᯇᯅᯬᯀ ᯤ ᯖᯮ ᯂᯬ ᯉᯉᯪ᯲ᯉ ᯅᯅᯪᯀᯖ᯲ ᯅᯞᯩᯔᯉᯮ᯲ ᯤ

Dung i didatdati nasida ma tutu mardalan pahulu aek i, sai manopi-nopi Aek Parbaraan i.

ᯑᯮᯰ ᯤ ᯑᯪᯑᯖ᯲ᯑᯖᯪ ᯉᯘᯪᯑ ᯔ ᯖᯮᯖᯮ ᯔᯒ᯲ᯑᯞᯉ᯲ ᯇᯂᯮᯞᯮ ᯀᯀᯂᯩ᯲ ᯤ ᯘᯤ ᯔᯉᯬᯇᯪᯉᯬᯇᯪ ᯀᯀᯂᯩ᯲ ᯇᯒ᯲ᯅᯒᯀᯉ᯲ ᯤ

Nunga tung neang dihilala nasida pangalangkana, ai mabiar nasida antong marnida babiat balemun i, nunga pola antairiron, hape i do na paboahon inganan ni galagala na niluluan nasida.

ᯉᯮᯝ ᯖᯮᯰ ᯉᯩᯀᯰ ᯑᯪᯂᯪᯞᯞ ᯉᯘᯪᯑ ᯇᯝᯞᯰᯂ ᯉ ᯀᯤ ᯔᯅᯪᯀᯒ᯲ ᯉᯘᯪᯑ ᯀᯉ᯲ᯖᯬᯰ ᯔᯒ᯲ᯉᯪᯑ ᯅᯅᯪᯀᯖ᯲ ᯅᯞᯩᯔᯉᯮ᯲ ᯤ ᯉᯮᯝ ᯇᯬᯞ ᯀᯉ᯲ᯖᯤᯒᯪᯒᯉᯬ᯲ ᯂᯇᯩ ᯤ ᯑᯬ ᯉ ᯇᯅᯬᯀᯂᯉᯬ᯲ ᯤᯝᯉᯉ᯲ ᯉᯪ ᯎᯞᯎᯞ ᯉ ᯉᯪᯞᯮᯞᯮᯀᯉ᯲ ᯉᯘᯪᯑ

Nunga tung dao nasida na mardalan i, sai manopi-nopi Aek Parbaraan i; dung i diida nasida ma sada lubuk na metmet, jala di ginjangna i adong tubu sada gala-gala.

ᯉᯮᯝ ᯖᯮᯰ ᯑᯀᯬ ᯉᯘᯪᯑ ᯉ ᯔᯒ᯲ᯑᯞᯉ᯲ ᯤ ᯘᯤ ᯔᯉᯬᯇᯪᯉᯬᯇᯪ ᯀᯀᯂᯩ᯲ ᯇᯒ᯲ᯅᯒᯀᯉ᯲ ᯤ ᯑᯮᯰ ᯤ ᯑᯪᯤᯑ ᯉᯘᯪᯑ ᯔ ᯘᯑ ᯞᯮᯅᯂᯮ᯲ ᯉ ᯖᯩ᯲ᯔᯖᯩ᯲ ᯐᯞ ᯑᯪ ᯎᯉᯪ᯲ᯐᯰᯉ ᯤ ᯀᯑᯬᯰ ᯖᯮᯅᯮ ᯘᯑ ᯎᯞᯎᯞ

Humaliang gala-gala i tubu do angka hau tambinsu dohot sanduduk.

ᯂᯮᯔᯞᯪᯀᯰ ᯎᯞᯎᯞ ᯤ  ᯖᯮᯅᯮ ᯑᯬ ᯀᯰᯂ ᯂᯥ ᯖᯔ᯲ᯅᯉᯪ᯲ᯘᯮ ᯑᯬᯂᯖᯬ᯲ ᯘᯉ᯲ᯑᯮᯑᯂᯮ᯲

On ma da ra na nidok ni na gogo i, raja ni tombak i.

ᯀᯉᯪ᯲ ᯉ ᯑ ᯒ ᯉ ᯉᯪᯑᯂᯬ᯲ ᯉᯪ ᯉ ᯎᯬᯎᯬ ᯤ ᯒᯐ ᯉᯪ ᯖᯔᯬ᯲ᯅᯂ᯲ ᯤ

Ai nunga tung toho huida na pinaboana i.

ᯀᯤ ᯉᯮᯝ ᯖᯮᯰ ᯖᯬᯂᯬ ᯂᯮᯤᯑ ᯉ ᯇᯪᯉᯅᯬᯀᯉ ᯤ

Tambinsu dohot sanduduk do humaliang! ninna si Aji Panungkunan.

ᯖᯔ᯲ᯅᯉᯪ᯲ᯘᯮ ᯑᯬᯂᯖᯬ᯲ ᯘᯉ᯲ᯑᯮᯑᯂᯮ᯲ ᯑᯬ ᯂᯮᯔᯞᯪᯀᯰ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Las situtu ma rohanasida mandapothon bonana i.

ᯞᯘ᯲ ᯘᯪᯖᯮᯖᯮ ᯔ ᯒᯬᯂᯉᯘᯪᯑ ᯔᯉ᯲ᯑᯇᯖᯬ᯲ᯂᯉᯬ᯲ ᯅᯬᯉᯉ ᯤ

Dung i manjangkit ma sahalak dongan ni si Aji Panungkunan, asa haru dapot didok rohana.

ᯑᯮᯰ ᯤ ᯔᯉ᯲ᯐᯰᯂᯖᯪ᯲ ᯔ ᯘᯂᯞᯂ᯲ ᯑᯬᯝᯉ᯲ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯀᯘ ᯂᯒᯮ ᯑᯇᯖᯬ᯲ ᯑᯪᯑᯂᯬ᯲ ᯒᯪᯂᯉ

Hape sai runsur do ibana sian bona ni gala-gala i, dang ra morot tu ginjang.

ᯂᯇᯩ ᯘᯤ ᯎᯉᯮ᯲ᯘᯒᯮ᯲ ᯑᯬ ᯤᯅᯉ ᯘᯪᯀᯉ᯲ ᯅᯬᯉ ᯉᯪ ᯎᯞᯎᯞ ᯤ ᯑᯰ ᯒ ᯔᯬᯒᯖᯬ᯲ ᯖᯮ ᯎᯉᯪ᯲ᯤᯰ

Na beha do panjangkitmu, sai runsur ho tu toru.

ᯉ ᯅᯩᯂ ᯑᯬ ᯇᯉ᯲ᯐᯰᯂᯖᯪ᯲ᯔᯮ ᯘᯤ ᯒᯉᯮ᯲ᯘᯒᯮ ᯂᯬ ᯖᯮ ᯖᯬᯒᯮ

Ba ahu ma jolo, da! ninna donganna na sada nari.

ᯅ ᯀᯂᯮ ᯔ ᯐᯬᯞᯬ ᯑ ᯉᯉᯪ᯲ᯉ ᯑᯬᯝᯉ᯲ᯉ ᯉ ᯘᯑ ᯉᯒᯪ

Dung i dijangkit donganna i ma gala-gala i, hape ibana pe dang ra bolas tu ginjang, sai manigor runsur do tu toru.

ᯑᯮᯰ ᯤ ᯑᯪᯐᯰᯂᯖᯪ᯲ ᯑᯬᯝᯉ᯲ᯉ ᯤ ᯔ ᯎᯞᯎᯞ ᯤ ᯂᯇᯩ ᯤᯅᯉ ᯇᯩ ᯑᯰ ᯒ ᯅᯬᯞᯘ᯲ ᯖᯮ ᯎᯉᯪ᯲ᯐᯰ ᯘᯤ ᯔᯉᯪᯎᯒᯬ᯲ ᯒᯉᯮ᯲ᯘᯒᯮ᯲ ᯖᯮ ᯖᯬᯒᯮ

Ba beha nama on ale Aji Panungkunan?

ᯅ ᯅᯩᯂ ᯉᯔ ᯀᯉᯬ᯲ ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲

Duansa hami so ra bolas tu ginjang.

ᯑᯮᯀᯉ᯲ᯘ ᯂᯔᯪ ᯘᯬ ᯒ ᯅᯬᯞᯘ᯲ ᯖᯮ ᯎᯉᯪ᯲ᯐᯰ

Ba ho nama jolo manjangkit! ninna donganna i mandok tu si Aji Panungkunan.

ᯅ ᯂᯬ ᯉᯔ ᯐᯬᯞᯬ ᯔᯉ᯲ᯐᯰᯂᯖᯪ᯲ ᯉᯉᯪ᯲ᯉ ᯑᯬᯝᯉ᯲ᯉ ᯤ ᯔᯉ᯲ᯑᯂᯬ᯲ ᯖᯮ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Sai longang ma si Aji Panungkunan paida-ida donganna na dua i, na so ra bolas morot tu ginjang, alai sai runsur tu toru.

ᯘᯤ ᯞᯬᯝᯰ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯇᯤᯑᯤᯑ ᯑᯬᯝᯉ᯲ᯉ ᯉ ᯑᯮᯀ ᯤ ᯉ ᯘᯬ ᯒ ᯅᯬᯞᯘ᯲ ᯔᯬᯒᯖᯬ᯲ ᯖᯮ ᯎᯉᯪ᯲ᯐᯰ ᯀᯞᯤ ᯘᯤ ᯒᯉᯮ᯲ᯘᯒᯮ᯲ ᯖᯮ ᯖᯬᯒᯮ

Dung i dipajonok ibana ma tu bona ni gala-gala i.

ᯑᯮᯰ ᯤ ᯑᯪᯇᯐᯬᯉᯂᯬ᯲ ᯤᯅᯉ ᯔ ᯖᯮ ᯅᯬᯉ ᯉᯪ ᯎᯞᯎᯞ ᯤ

Dipamanat ma tu ginjang, dua hali nasa timbona tu ginjang, dang adong dangka ni hau i, limus so adong sidegean.

ᯑᯪᯇᯔᯉᯖ᯲ ᯔ ᯖᯮ ᯎᯉᯪ᯲ᯐᯰ ᯑᯮᯀ ᯂᯞᯪ ᯉᯘ ᯖᯔᯪ᯲ᯅᯬᯉ ᯖᯮ ᯎᯉᯪ᯲ᯐᯰ ᯑᯰ ᯀᯑᯬᯰ ᯑᯰᯂ ᯉᯪ ᯂᯥ ᯤ ᯞᯪᯔᯘᯮ᯲ ᯘᯬ ᯀᯑᯬᯰ ᯘᯪᯑᯩᯎᯩᯀᯉ᯲

Ahu nama jolo tutu, betak tung asi rohana! ninna si Aji Panungkunan.

ᯀᯂᯮ ᯉᯔ ᯐᯬᯞᯬ ᯖᯮᯖᯮ ᯅᯩᯖᯂ᯲ ᯖᯮᯰ  ᯀᯘᯪ ᯒᯬᯂᯉ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Dung i dijangkit ma gala-gala i; nunga adong be saasta tu ginjang; nunga mansai las roha ni donganna i.

ᯑᯮᯰ ᯤ ᯑᯪᯐᯰᯂᯖᯪ᯲ ᯔ ᯎᯞᯎᯞ ᯤ ᯉᯮᯝ ᯀᯑᯬᯰ ᯅᯩ ᯘᯀᯘ᯲ᯖ ᯖᯮ ᯎᯉᯪ᯲ᯐᯰ ᯉᯮᯝ ᯔᯉ᯲ᯘᯤ ᯞᯘ᯲ ᯒᯪᯂ ᯉᯪ ᯑᯬᯝᯉ᯲ᯉ ᯤ

Hape dung sahat otik nari tu ginjang, dung dipaeret tanganna dohot patna, tompu ma runsur si Aji Panungkunan tu toru.

ᯎᯇᯩ ᯑᯮᯰ ᯘᯂᯖ᯲ ᯀᯬᯖᯂᯪ᯲ ᯉᯒᯪ ᯖᯮ ᯎᯉᯪ᯲ᯐᯰ ᯑᯮᯰ ᯑᯪᯇᯀᯩᯒᯖᯩ᯲ ᯖᯝᯉ᯲ᯉ ᯑᯬᯂᯖᯬ᯲ ᯇᯖ᯲ᯉ ᯖᯔᯬ᯲ᯇᯮ ᯔ ᯒᯉᯮ᯲ᯘᯒᯮ᯲ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯖᯮ ᯖᯬᯒᯮ

Sambor ni nipingkon, anggo tung so tarjangkit hita do gala-gala on.

ᯘᯔ᯲ᯅᯒᯬ᯲ ᯉᯪ ᯉᯪᯇᯪᯰᯂᯉᯬ᯲ ᯀᯰᯎᯬ ᯖᯮᯰ ᯘᯬ ᯖᯒ᯲ᯐᯰᯂᯖᯪ᯲ ᯂᯪᯖ ᯑᯬ ᯎᯞᯎᯞ ᯀᯉᯬ᯲

Ai tung suman do huida parbue na di dangka papituhon an, pitu hibung sangkaraing, jala bereng ma na ditonga-tongana i, so da gala-gala sirumondang bulan do i? ninna si Aji Panungkunan.

ᯀᯤ ᯖᯮᯰ ᯘᯮᯔᯉ᯲ ᯑᯬ ᯂᯮᯤᯑ ᯇᯒ᯲ᯅᯮᯀᯩ ᯉ ᯑᯪ ᯑᯰᯂ ᯇᯇᯪᯖᯮᯂᯉᯬ᯲ ᯀᯉ᯲ ᯇᯪᯖᯮ ᯂᯪᯅᯮᯰ ᯘᯰᯂᯒᯪᯀᯰ ᯐᯞ ᯅᯩᯒᯰᯩ ᯔ ᯉ ᯑᯪᯖᯬᯝᯖᯬᯝᯉ ᯤ ᯘᯬ ᯑ ᯎᯞᯎᯞ ᯘᯪᯒᯮᯔᯉᯬ᯲ᯑᯰ ᯅᯮᯞᯉ᯲ ᯑᯬ ᯤ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Hundul ma ibana di bona ni gala-gala i, songon na mandate.

ᯂᯉᯮ᯲ᯑᯞᯮ᯲ ᯔ ᯤᯅᯉ ᯑᯪ ᯅᯬᯉ ᯉᯪ ᯎᯞᯎᯞ ᯤ ᯘᯬᯝᯉᯬ᯲ ᯉ ᯔᯉ᯲ᯑᯖᯩ

Dung i mangandung-andung ma ibana mangendehon endena, ninna ma,

ᯑᯮᯰ ᯤ ᯔᯝᯉ᯲ᯑᯮᯰᯀᯉ᯲ᯑᯰᯮ ᯔ ᯤᯅᯉ ᯔᯝᯉᯩ᯲ᯑᯩᯂᯉᯬ᯲ ᯀᯉᯩ᯲ᯑᯩᯉ ᯉᯉᯪ᯲ᯉ ᯔ

Tu dia ma da ompung langkahononhon, mangalului pitu sangkariang gala-gala

ᯖᯮ ᯑᯪᯀ ᯔ ᯑ ᯀᯔᯬ᯲ᯇᯮᯰ ᯞᯰᯂᯂᯬᯉᯉᯬ᯲ᯂᯉᯬ᯲ ᯔᯝᯞᯮᯞᯮᯤ ᯇᯪᯖᯮᯘᯰᯂᯒᯪᯀᯰ ᯎᯞᯎᯞ

Simanjojak nunga so tarondolhon, beha ma bahenon mangalangka.

ᯘᯪᯔᯉ᯲ᯐᯬᯐᯂ᯲ ᯉᯮᯝ ᯘᯬ ᯖᯒᯉᯬ᯲ᯑᯞᯬ᯲ᯂᯉᯬ᯲ ᯅᯩᯂ ᯔ ᯅᯂᯩᯉᯉᯬ᯲ ᯔᯝᯞᯰᯂ

Si Tapi Marhillong Sere, boru ni raja, marsahit daba ompung di huta.

ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯬᯰ ᯘᯩᯒᯩ ᯅᯬᯒᯮ ᯉᯪ ᯒᯐ ᯔᯒ᯲ᯘᯂᯖᯪ᯲ ᯑᯅ ᯀᯔᯬ᯲ᯇᯮᯰ ᯑᯪ ᯂᯮᯖ

Ubatna ninna i ma gala-gala, nidok ni Boru Saniang Naga.

ᯥᯅᯖ᯲ᯉ ᯉᯉᯪ᯲ᯉ ᯤ ᯔ ᯎᯞᯎᯞ ᯉᯪᯑᯂᯬ᯲ ᯉᯪ ᯅᯬᯒᯮ ᯘᯉᯪᯀᯰ ᯉᯎ

Ia nunga huida daba ompung di ginjang gala-gala, hape tangan so bolas manjama.

ᯤᯀ ᯉᯮᯝ ᯂᯮᯤᯑ ᯑᯅ ᯀᯔᯬ᯲ᯇᯮᯰ ᯑᯪ ᯎᯉᯪ᯲ᯐᯰ ᯎᯞᯎᯞ ᯂᯇᯩ ᯖᯝᯉ᯲ ᯘᯬ ᯅᯬᯞᯘ᯲ ᯔᯉ᯲ᯐᯔ

Dung i mangkuling ma sada lali di atas ni gala-gala i, tulis, tulis!

ᯑᯮᯰ ᯤ ᯔᯰᯂᯮᯞᯪᯰ ᯔ ᯘᯑ ᯞᯞᯪ ᯑᯪ ᯀᯖᯘ᯲ ᯉᯪ ᯎᯞᯎᯞ ᯤ ᯖᯮᯞᯘᯪ᯲ ᯖᯮᯎᯘᯪ᯲

Tongkin nari songgop ma tutu tu dangka papituhon, toho di lambung ni gala-gala i, na pitu sangkariang i.

ᯖᯬᯰᯂᯉᯪ᯲ ᯉᯒᯪ ᯘᯬᯰᯎᯇᯬ᯲ ᯔ ᯖᯮᯖᯮ ᯖᯮ ᯑᯰᯂ ᯇᯇᯪᯖᯮᯂᯉᯬ᯲ ᯖᯬᯂᯬ ᯑᯪ ᯞᯔ᯲ᯅᯮᯰ ᯉᯪ ᯎᯞᯎᯞ ᯤ ᯉ ᯇᯪᯖᯮ ᯘᯰᯂᯒᯪᯀᯰ ᯤ

Mamereng ma si Aji Panungkun dompak ginjang, dung i didok ma, Asi ma da roham ompung, nunga suman hiuda, i do gala-gala na hulului hami i.

ᯔᯔᯩᯒᯰᯩ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯑᯔᯬ᯲ᯇᯂ᯲ ᯎᯉᯪ᯲ᯐᯰ ᯑᯮᯰ ᯤ ᯑᯪᯑᯂᯬ᯲ ᯀᯘᯪ ᯔ ᯑ ᯒᯬᯂᯔ᯲ ᯀᯔᯬ᯲ᯇᯮᯰ ᯉᯮᯝ ᯘᯮᯔᯉ᯲ ᯂᯮᯤᯑ ᯤ ᯑᯬ ᯎᯞᯎᯞ ᯉ ᯂᯮᯞᯮᯞᯮᯤ ᯂᯔᯪ ᯤ

Ua dabuhon ma ale ompung tu toru on, ai so adong sian hami na tolu na bolas manjangkit tu ginjang! ninna si Aji Panungkunan

ᯥᯀ ᯑᯅᯮᯂᯉᯬ᯲ ᯔ ᯀᯞᯩ ᯀᯔᯬ᯲ᯇᯮᯰ ᯖᯮ ᯖᯬᯒᯮ ᯀᯉᯬ᯲ ᯀᯤ ᯘᯬ ᯀᯑᯬᯰ ᯘᯪᯀᯉ᯲ ᯂᯔᯪ ᯉ ᯖᯬᯞᯮ ᯉ ᯅᯬᯞᯘ᯲ ᯔᯉ᯲ᯐᯰᯂᯖᯪ᯲ ᯖᯮ ᯎᯉᯪ᯲ᯐᯰ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Dung i didok lali i ma, Ai ise do ho, jala dia ma umbahen pola loja hamu mangalului parbue ni gala-gala on?

ᯑᯮᯰ ᯤ ᯑᯪᯑᯂᯬ᯲ ᯞᯞᯪ ᯤ ᯔ ᯀᯤ ᯤᯘᯩ ᯑᯬ ᯂᯬ ᯐᯞ ᯑᯪᯀ ᯔ ᯀᯔᯮ᯲ᯅᯂᯉᯩ᯲ ᯇᯬᯞ ᯞᯬᯐ ᯂᯔᯮ ᯔᯝᯞᯮᯞᯮᯤ ᯇᯒ᯲ᯅᯮᯀᯩ ᯉᯪ ᯎᯞᯎᯞ ᯀᯉᯬ᯲

Si Aji Panungkunan do ahu ompung!

ᯘᯪ ᯁᯐᯪ ᯇᯉᯮᯰᯂᯮᯉᯉ᯲ ᯑᯬ ᯀᯂᯮ ᯀᯔᯬ᯲ᯇᯮᯰ

Na marsahit do boru ni Raja Sohuturon Dolok, na di Lobu Namaduma, nunga pola dua hali da ompung.

ᯉ ᯔᯒ᯲ᯘᯂᯖᯪ᯲ ᯑᯬ ᯅᯬᯒᯮ ᯉᯪ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯉ ᯑᯪ ᯞᯬᯅᯮ ᯉ ᯔᯑᯮᯔ

I do dipaboa Boru Saniang Naga di nipingku ubat ni boru ni raja i! ninna si Aji Panungkunan.

ᯤ ᯑᯬ ᯑᯪᯇᯅᯬᯀ ᯅᯬᯒᯮ ᯘᯉᯪᯀᯰ ᯉᯎ ᯑᯪ ᯉᯪᯇᯪᯰᯂᯮ ᯥᯅᯖ᯲ ᯉᯪ ᯅᯬᯒᯮ ᯉᯪ ᯒᯐ ᯤ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Olo do ahu nian mangurupi ho, ale Aji Panungkunan!

ᯀᯬᯞᯬ ᯑᯬ ᯀᯂᯮ ᯉᯪᯀᯉ᯲ ᯔᯝᯮᯒᯮᯇᯪ ᯂᯬ ᯀᯞᯩ ᯀᯝᯪ ᯇᯉᯮᯂᯮᯉᯉ᯲

dang boi hudabuhon himpal na sangkariang on tu toru, masarsar nama i annon.

ᯑᯰ ᯅᯬᯤ ᯂᯮᯑᯅᯮᯂᯉᯬ᯲ ᯂᯔᯪ᯲ᯇᯞ᯲ ᯉ ᯘᯰᯂᯒᯪᯀᯰ ᯀᯉᯪ᯲ ᯖᯮ ᯖᯬᯒᯮ ᯔᯒ᯲ᯘᯘᯒ᯲ ᯉᯔ ᯤ ᯀᯉ᯲ᯉᯉ᯲

Huboto do ingkon denggan do pungu parbue na pitu on boanonmu, dang bolas maputik! ninna lali i.

ᯂᯮᯅᯬᯖᯬ ᯑᯬ ᯀᯪᯰᯂᯉᯬ᯲ ᯑᯰᯩᯎᯉ᯲ ᯑᯬ ᯇᯮᯝᯮ ᯇᯒ᯲ᯅᯮᯀᯩ ᯉ ᯇᯪᯖᯮ ᯀᯉᯬ᯲ ᯅᯬᯀᯉᯉᯬ᯲ᯔᯮ ᯑᯰ ᯅᯬᯞᯘ᯲ ᯔᯇᯮᯖᯂᯪ᯲ ᯉᯉᯪ᯲ᯉ ᯞᯞᯪ ᯤ
Sintong do na nidokmi ale ompung! dang boi tutu maputik, ingkon pungu do i di tampukna.

ᯘᯉᯪ᯲ᯖᯬᯰ ᯑᯬ ᯉ ᯉᯪᯑᯂᯬ᯲ᯔᯪ ᯀᯞᯩ ᯀᯔᯬ᯲ᯇᯮᯰ ᯑᯰ ᯅᯬᯤ ᯖᯮᯖᯮ ᯔᯇᯮᯖᯂᯪ᯲ ᯀᯪᯰᯂᯉᯬ᯲ ᯇᯮᯝᯮ ᯑᯬ ᯤ ᯑᯪ ᯖᯔ᯲ᯇᯂᯮ᯲ᯉ

Ba dia nama dalan ompung? ninna si Aji Panungkunan ; nunga naeng tangis ibana.

ᯅ ᯑᯪᯀ ᯉᯔ ᯑᯞᯉ᯲ ᯀᯔᯬ᯲ᯇᯮᯰ ᯉᯉᯪ᯲ᯉ ᯘᯪ ᯀᯐ ᯇᯉᯮᯰᯂᯮᯉᯉ᯲ ᯉᯮᯝ ᯉᯀᯰᯩ ᯖᯝᯘᯪ᯲ ᯤᯅᯉ

Adong do dalan ale Aji Panungkunan!

ᯁᯑᯬᯰ ᯑᯬ ᯑᯞᯉ᯲ ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲

Urupanku do ho tutu, ai tung sai lungun-lungun do begeon endemi nangkin!

ᯥᯒᯮᯇᯉ᯲ᯂᯮ ᯑᯬ ᯂᯬ ᯖᯮᯖᯮ ᯀᯤ ᯖᯮᯰ  ᯘᯤ ᯞᯮᯝᯉᯮ᯲ᯞᯮᯝᯉᯮ᯲ ᯑᯬ ᯅᯩᯎᯩᯀᯉᯬ᯲ ᯀᯉᯩ᯲ᯑᯩᯔᯪ ᯉᯰᯂᯉᯪ᯲

Atupi ma napuran tolu.

ᯀᯖᯮᯇᯪ ᯔ ᯉᯇᯮᯒᯉ᯲ ᯎᯬᯞᯮ

Dung sun diatupi ho, peakkon ma sangatup di bona ni gala-gala i, huhut dok ma, Paloas ma da ompung, asa hujangkit gala-gala na bahen ubat an.

ᯑᯮᯰ ᯘᯉᯮ᯲ ᯑᯪᯀᯖᯮᯇᯪ ᯂᯬ ᯇᯩᯀᯂ᯲ᯂᯉᯬ᯲ ᯔ ᯘᯝᯖᯇᯮ᯲ ᯑᯪ ᯅᯬᯉ ᯉᯪ ᯎᯞᯎᯞ ᯤ ᯂᯮᯂᯖᯮ᯲ ᯑᯂᯬ᯲ ᯔ ᯇᯞᯬᯀᯘ᯲ ᯔ ᯑ ᯀᯔᯬ᯲ᯇᯮᯰ ᯀᯘ ᯂᯮᯐᯰᯂᯖᯪ᯲ ᯎᯞᯎᯞ ᯉ ᯅᯂᯉᯩ᯲ ᯥᯅᯖ᯲ ᯀᯉ᯲

Dabuhon ma sangatup tu lubuk na metmet na di toru an, asa sude umbotosa, jala dok ma muse

ᯑᯅᯮᯂᯉᯬ᯲ ᯔ ᯘᯝᯖᯇᯮ᯲ ᯖᯮ ᯞᯮᯅᯂᯮ᯲ ᯉ ᯔᯖᯩ᯲ᯔᯖᯩ᯲ ᯉ ᯑᯪ ᯖᯬᯒᯮ ᯀᯉ᯲ ᯀᯘ ᯘᯮᯑᯩ ᯀᯔᯮ᯲ᯅᯬᯖᯬᯘ ᯐᯞ ᯑᯂᯬ᯲ ᯔ ᯔᯮᯘᯩ

Paloas ma da ompung, asa hujangkit gala-gala na bahen ubat an.

ᯇᯞᯬᯀᯘ᯲ ᯔ ᯑ ᯀᯔᯬ᯲ᯇᯮᯰ ᯀᯘ ᯂᯮᯐᯰᯂᯖᯪ᯲ ᯎᯞᯎᯞ ᯉ ᯅᯂᯉᯩ᯲ ᯥᯅᯖ᯲ ᯀᯉ᯲

Hilhil ma anggo na sangatup nari, dung i bursik ma hira-hira dua dopa sian bonana i daona, unang adong ro na manundati!

ᯂᯞᯪ᯲ᯂᯞᯪ᯲ ᯔ ᯀᯩᯎᯬ ᯉ ᯘᯝᯖᯇᯮ᯲ ᯉᯒᯪ ᯑᯮᯰ ᯤ ᯅᯒᯮ᯲ᯘᯂᯪ᯲ ᯔ ᯂᯪᯒᯂᯪᯒ ᯑᯮᯀ ᯑᯬᯇ ᯘᯪᯀᯉ᯲ ᯅᯬᯉᯉ ᯤ ᯑᯀᯬᯉ ᯥᯉᯰ ᯀᯑᯬᯰ ᯒᯬ ᯉ ᯔᯉᯉᯮ᯲ᯑᯖᯪ

Dung i dipatupa si Aji Panungkunan ma nasa na nidok ni lali i; didabu ma tutu sangatup tu lubuk na metmet na di toru i, dipeakkon sangatup tu bona ni gala-gala i.

ᯑᯮᯰ ᯤ ᯑᯪᯇᯖᯮᯇ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯔ ᯉᯘ ᯉ ᯉᯪᯑᯎᯬ᯲ ᯉᯪ ᯞᯞᯪ ᯤ ᯑᯪᯑᯅᯮ ᯔ ᯖᯮᯖᯮ ᯘᯝᯖᯇᯮ᯲ ᯖᯮ ᯞᯮᯅᯂᯮ᯲ ᯉ ᯔᯖᯩ᯲ᯔᯖᯩ᯲ ᯉ ᯑᯪ ᯖᯬᯒᯮ ᯤ ᯑᯪᯇᯩᯀᯂ᯲ᯂᯉᯬ᯲ ᯘᯝᯖᯇᯮ᯲ ᯖᯮ ᯅᯬᯉ ᯉᯪ ᯎᯞᯎᯞ ᯤ

Nunga dibursik nang humaliang bona ni gala-gala i, hira-hira dua dopa daona sian bonana i.

ᯉᯮᯝ ᯑᯪᯅᯒᯮ᯲ᯘᯂᯪ᯲ ᯉᯰ ᯂᯮᯔᯞᯪᯀᯰ ᯅᯬᯉ ᯉᯪ ᯎᯞᯎᯞ ᯤ ᯂᯪᯒᯂᯪᯒ ᯑᯮᯀ ᯑᯬᯇ ᯑᯀᯬᯉ ᯘᯪᯀᯉ᯲ ᯅᯬᯉᯉ ᯤ

Dung i didok si Aji Panungkunan ma, Dia dope sibahenonku ale ompung? Nunga bolas hujangkit?

ᯑᯮᯰ ᯤ ᯑᯪᯑᯂᯬ᯲ ᯘᯪ ᯀᯐᯪ ᯇᯉᯮᯰ ᯂᯮᯉᯉ᯲ ᯔ ᯑᯪᯀ ᯑᯬᯇᯩ ᯘᯪᯅᯂᯩᯉᯉᯬ᯲ᯂᯮ ᯀᯞᯩ ᯀᯔᯬ᯲ᯇᯮᯰ ᯉᯮᯝ ᯅᯬᯞᯘ᯲ ᯂᯮᯐᯰᯂᯖᯪ᯲

dang bolas asal jangkitonmu antong, ale Aji Panungkunan.

ᯑᯰ ᯅᯬᯞᯘ᯲ ᯀᯘᯞ᯲ ᯐᯰᯂᯪᯖᯉᯬ᯲ᯔᯮ ᯀᯉ᯲ᯖᯬᯰ ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲

Molo dung jongjong ho di bonana i, dohononmu ma songon on,

ᯔᯬᯞᯬ ᯑᯮᯰ ᯐᯬᯰᯐᯬᯰ ᯂᯬ ᯑᯪ ᯅᯬᯉᯉ ᯤ ᯑᯬᯂᯬᯉᯉᯬ᯲ᯔᯮ ᯔ ᯘᯬᯝᯉᯬ᯲ ᯀᯉᯬ᯲

Hubuat ma jolo da ompung, gala-gala na di ginjang an, na di dangka papituhon, na pitu sangkariang, na mardongan gala-gala sirumondang bulan.

ᯂᯮᯅᯮᯀᯖ᯲ ᯔ ᯐᯬᯞᯬ ᯑ ᯀᯔᯬ᯲ᯇᯮᯰ ᯎᯞᯎᯞ ᯉ ᯑᯪ ᯎᯉᯪ᯲ᯐᯰ ᯀᯉ᯲ ᯉ ᯑᯪ ᯑᯰᯂ ᯇᯇᯪᯖᯮᯂᯉᯬ᯲ ᯉ ᯇᯪᯖᯮ ᯘᯰᯂᯒᯪᯀᯰ ᯉ ᯔᯒ᯲ᯑᯬᯝᯉ᯲ ᯎᯞᯎᯞ ᯘᯪᯒᯮᯔᯉᯬ᯲ᯑᯰ ᯅᯮᯞᯉ᯲

I ma bahen ubat ni boru ni raja i, Raja Sohuturon Dolak, na tigor di uhum, parhatiha na so ra teleng, sihorus na lobi, sitambai na hurang!

ᯤ ᯔ ᯅᯂᯉᯩ᯲ ᯥᯅᯖ᯲ ᯉᯪ ᯅᯬᯒᯮ ᯒᯐ ᯤ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯉ ᯖᯪᯎᯒᯬ᯲ ᯑᯪ ᯥᯂᯔᯮ᯲ ᯇᯒ᯲ᯂᯖᯪᯂ ᯉ ᯘᯬ ᯒ ᯖᯩᯞᯰᯩ ᯘᯪᯂᯬᯒᯘᯮ᯲ ᯉ ᯞᯬᯅᯪ ᯘᯪᯖᯔ᯲ᯅᯤ ᯉ ᯂᯮᯒᯰ

Mola dung didok ho i, bolas ma jangkitonmu, dang runsur be ho!

ᯔᯬᯞᯬ ᯑᯮᯰ ᯑᯪᯑᯂᯬ᯲ ᯂᯬ ᯤ ᯅᯬᯞᯘ᯲ ᯔ ᯐᯰᯂᯪᯖᯉᯬ᯲ᯔᯮ ᯑᯰ ᯒᯉᯮ᯲ᯘᯒᯮ᯲ ᯅᯩ ᯂᯬ

Dapot ho nama i! ninna lali i.

ᯑᯇᯖᯬ᯲ ᯂᯬ ᯉᯔ ᯤ ᯉᯉᯪ᯲ᯉ ᯞᯞᯪ ᯤ

Sai longang ma si Aji Panungkunan umbege poda ni lali i.

ᯘᯤ ᯞᯬᯝᯰ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯀᯔᯮ᯲ᯅᯩᯎᯩ ᯇᯬᯑ ᯉᯪ ᯞᯞᯪ ᯤ

Tulis! Tulis! ninna lali i ma muse, jala pintor habang ma tu ginjang so haidaan be.

ᯖᯮᯞᯘᯪ᯲ ᯖᯮᯞᯘᯪ᯲ ᯉᯉᯪ᯲ᯉ ᯞᯞᯪ ᯤ ᯔᯮᯘᯩ ᯐᯞ ᯇᯉᯪ᯲ᯖᯒᯬ᯲ ᯂᯅᯰ ᯔ ᯖᯮ ᯎᯉᯪ᯲ᯐᯰ ᯘᯬ ᯂᯤᯑᯀᯉ᯲ᯅᯩ

Dibereng si Aji Panungkunan ma dompak langit i, huhut didok, olo ma tutu ompung! Olo ma tutu ompung!

ᯑᯪᯅᯩᯒᯰᯩ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯔ ᯑᯔᯬ᯲ᯇᯂ᯲ ᯞᯝᯖᯪ᯲ ᯤ ᯂᯮᯂᯖᯮ᯲ ᯑᯪᯑᯂᯬ᯲ ᯀᯬᯞᯬ ᯔ ᯖᯮᯖᯮ ᯀᯔᯬ᯲ᯇᯮᯰ ᯀᯞᯬ ᯔ ᯖᯮᯖᯮ ᯀᯔᯬ᯲ᯇᯮᯰ

Dibereng ibana ma satongkin tu toru, tu lubuk na metmet i.

ᯑᯪᯅᯩᯒᯰᯩ ᯤᯅᯉ ᯔ ᯘᯖᯬᯰᯂᯉᯪ᯲ ᯖᯮ ᯖᯬᯒᯮ ᯖᯮ ᯞᯮᯅᯂᯮ᯲ ᯉ ᯔᯖᯩ᯲ᯔᯖᯩ᯲ ᯤ

Nunga gumalusak pora-pora di aek i, songon perak marhillongi, jumpa marbalik-balik dengke i di aek i.

ᯉᯮᯝ ᯎᯮᯔᯞᯮᯘᯂ᯲ ᯇᯬᯒᯇᯬᯒ ᯑᯪ ᯀᯀᯂᯩ᯲ ᯤ ᯘᯬᯝᯉᯬ᯲ ᯇᯩᯒᯂ᯲ ᯔᯒ᯲ᯂᯞᯪ᯲ᯞᯬᯝᯪ ᯐᯔᯮ᯲ᯇ ᯔᯒ᯲ᯅᯞᯂᯪ᯲ᯅᯞᯂᯪ᯲ ᯑᯰᯩᯂᯩ ᯤ ᯑᯪ ᯀᯀᯂᯩ᯲ ᯤ

Longang ma si Aji Panungkunan pabereng-berenghonsa.

ᯞᯬᯝᯰ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯇᯅᯩᯒᯰᯩᯅᯩᯒᯰᯩᯂᯉᯬ᯲ᯘ

Dung i ruar ma muse angka raba-raba sian duhut-duhut na hona bursik i, ro ma marhabangan humaliang bona ni gala-gala i.

ᯑᯮᯰ ᯤ ᯒᯮᯀᯒ᯲ ᯔ ᯔᯮᯘᯩ ᯀᯰᯂ ᯒᯅᯒᯅ ᯘᯪᯀᯉ᯲ᯑᯮᯂᯖᯮ᯲ᯑᯮᯂᯖᯮ᯲ ᯉ ᯂᯬᯉ ᯅᯒᯮ᯲ᯘᯂᯪ᯲ ᯤ ᯒᯬ ᯔ ᯔᯒ᯲ᯂᯅᯝᯉ᯲ ᯂᯮᯔᯞᯪᯀᯰ ᯅᯬᯉ ᯉᯪ ᯎᯞᯎᯞ ᯤ

Dung i didok si Aji Panungkunan ma hata na pinodahon ni lali i, dijangkit ma tutu gala-gala i.

ᯑᯮᯰ ᯤ ᯑᯪᯑᯂᯬ᯲ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯔ ᯂᯖ ᯉ ᯇᯪᯉᯬᯑᯂᯉᯬ᯲ ᯉᯪ ᯞᯞᯪ ᯤ ᯑᯪᯐᯰᯂᯖᯪ᯲ ᯔ ᯖᯮᯖᯮ ᯎᯞᯎᯞ ᯤ

dang runsur be ibana, nunga bolas ibana tu ginjang.

ᯑᯰ ᯒᯉᯮ᯲ᯘᯒᯮ᯲ ᯅᯩ ᯤᯅᯉ ᯉᯮᯝ ᯅᯬᯞᯘ᯲ ᯤᯅᯉ ᯖᯮ ᯎᯉᯪ᯲ᯐᯰ
ᯩᯩᯩ

Didege ma dangka parjolo, dung i paduahon; songon i ma sahat tu dangka paonomhon.

ᯑᯪᯑᯩᯎᯩ ᯔ ᯑᯰᯂ ᯇᯒ᯲ᯐᯬᯞᯬ ᯑᯮᯰ ᯤ ᯇᯑᯮᯀᯂᯉᯬ᯲ ᯘᯬᯝᯉᯬ᯲ ᯤ ᯔ ᯘᯂᯖ᯲ ᯖᯮ ᯑᯰᯂ ᯇᯀᯬᯉᯔᯬ᯲ᯂᯉᯬ᯲

Diida ma tutu di dangka papituhon, apala di pangkalna i gantung gala-gala sangkariang.

ᯑᯪᯤᯑ ᯔ ᯖᯮᯖᯮ ᯑᯪ ᯑᯰᯂ ᯇᯇᯪᯖᯮᯂᯉᯬ᯲ ᯀᯇᯞ ᯑᯪ ᯇᯰᯂᯞ᯲ᯉ ᯤ ᯎᯉ᯲ᯖᯮᯰ ᯎᯞᯎᯞ ᯘᯰᯂᯒᯪᯀᯰ

Toho do pitu hibung; jala sada sian na pitu i tandi do balgana, tandi hinaulina; i ma galagala sirumondang bulan, naung leleng sai niluluan nasida.

ᯖᯬᯂᯬ ᯑᯬ ᯇᯪᯖᯮ ᯂᯪᯅᯮᯰ ᯐᯞ ᯘᯑ ᯘᯪᯀᯉ᯲ ᯉ ᯇᯪᯖᯮ ᯤ ᯖᯉ᯲ᯑᯪ ᯑᯬ ᯅᯞ᯲ᯎᯉ ᯖᯉ᯲ᯑᯪ ᯂᯪᯉᯥᯞᯪᯉ ᯤ ᯔ ᯎᯞᯎᯞ ᯘᯪᯒᯮᯔᯉᯬ᯲ᯑᯰ ᯅᯮᯞᯉ᯲ ᯉᯀᯮᯰ ᯞᯩᯞᯰᯩ ᯘᯤ ᯉᯪᯞᯮᯞᯮᯀᯉ᯲ ᯉᯘᯪᯑ

Hitir-hitir do tangan ni si Aji Panungkunan, ala las ni rohana, laho mamutikhon tampuk ni gala-gala i.

ᯂᯪᯖᯒᯪ᯲ᯂᯪᯖᯒᯪ᯲ ᯑᯬ ᯖᯝᯉ᯲ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯀᯞ ᯞᯘ᯲ ᯉᯪ ᯒᯬᯂᯉ ᯞᯂᯬ ᯔᯔᯮᯖᯂᯪ᯲ᯂᯉᯬ᯲ ᯖᯔ᯲ᯇᯂᯮ᯲ ᯉᯪ ᯎᯞᯎᯞ ᯤ

Dung i mansai jamot ma dipamasuk tu hajutna.

ᯑᯮᯰ ᯤ ᯔᯉ᯲ᯘᯤ ᯐᯔᯖᯬ᯲ ᯔ ᯑᯪᯇᯔᯘᯂᯮ᯲ ᯖᯮ ᯂᯐᯖᯮ᯲ᯉ

Nanget-nanget ma ibana mijur, songon na mamboan pira ni manuk, so tung matopar.

ᯉᯝᯖᯩ᯲ᯉᯝᯖᯩ᯲ ᯔ ᯤᯅᯉ ᯔᯪᯐᯒᯮ᯲ ᯘᯬᯝᯉᯬ᯲ ᯉ ᯔᯔ᯲ᯅᯬᯀᯉ᯲ ᯇᯪᯒ ᯉᯪ ᯔᯉᯂᯮ᯲ ᯘᯬ ᯖᯮᯰ ᯔᯖᯬᯇᯒ᯲

Nunga sai jongjong donganna na dua halak i di toru paima-imahon parmijur ni si Aji Panungkunan; dang tarhatahon tutu las ni rohanasida.

ᯉᯮᯝ ᯘᯤ ᯐᯬᯰᯐᯬᯰ ᯑᯬᯝᯉ᯲ᯉ ᯉ ᯑᯮᯀ ᯂᯞᯂ᯲ ᯤ ᯑᯪ ᯖᯬᯒᯮ ᯇᯤᯔᯤᯔᯂᯉᯬ᯲ ᯇᯒ᯲ᯔᯪᯐᯒᯮ᯲ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯑᯰ ᯖᯒ᯲ᯂᯖᯂᯉᯬ᯲ ᯖᯮᯖᯮ ᯞᯘ᯲ ᯉᯪ ᯒᯬᯂᯉᯘᯪᯑ

Dia ma jolo huida ba! ninna nasida, dung sahat di toru.

ᯑᯪᯀ ᯔ ᯐᯬᯞᯬ ᯂᯮᯤᯑ ᯅ ᯉᯉᯪ᯲ᯉ ᯉᯘᯪᯑ ᯑᯮᯰ ᯘᯂᯖ᯲ ᯑᯪ ᯖᯬᯒᯮ

Sai longang ma nasida na tolu pamanat-manathonsa

ᯘᯤ ᯞᯬᯝᯰ ᯔ ᯉᯘᯪᯑ ᯉ ᯖᯬᯞᯮ ᯇᯔᯉᯖ᯲ᯔᯉᯖ᯲ᯂᯉᯬ᯲ᯘ

Dung i borhat ma nasida sian inganan i laho mulak tu huta.

ᯑᯮᯰ ᯤ ᯅᯒᯬ᯲ᯂᯖ᯲ ᯔ ᯉᯘᯪᯑ ᯘᯪᯀᯉ᯲ ᯤᯝᯉᯉ᯲ ᯤ ᯞᯂᯬ ᯔᯮᯞᯂ᯲ ᯖᯮ ᯂᯮᯖ

Hatop situtu do nasida na mardalan i, songon na dihabangkon dihilala be.

ᯂᯖᯇᯬ᯲ ᯘᯪᯖᯮᯖᯮ ᯑᯬ ᯉᯘᯪᯑ ᯉ ᯔᯒ᯲ᯑᯞᯉ᯲ ᯤ ᯘᯬᯝᯉᯬ᯲ ᯉ ᯑᯪᯂᯅᯰᯂᯉᯬ᯲ ᯑᯪᯂᯪᯞᯞᯅᯩ

Nunga dapot antong na niluluan.

ᯉᯮᯝ ᯑᯇᯖᯬ᯲ ᯀᯉ᯲ᯖᯬᯰ ᯉ ᯉᯪᯞᯮᯞᯮᯀᯉ᯲

Jadi sahat ma nasida tu sopo na tarulang i, dung potang ari.

ᯐᯑᯪ ᯘᯂᯖ᯲ ᯔ ᯉᯘᯪᯑ ᯖᯮ ᯘᯬᯇᯬ ᯉ ᯖᯒᯮᯞᯰ ᯤ ᯑᯮᯰ ᯇᯬᯖᯰ ᯀᯒᯪ

Disi ma nasida maradian huhut marborngin, ai nunga tung taho daona na nidalanannasida i.

ᯑᯪᯘᯪ ᯔ ᯉᯘᯪᯑ ᯔᯒᯑᯪᯀᯉ᯲ ᯂᯮᯂᯖᯮ᯲ ᯔᯒ᯲ᯅᯒᯬ᯲ᯝᯉᯪ᯲ ᯀᯤ ᯉᯮᯝ ᯖᯮᯰ ᯖᯂᯬ ᯑᯀᯬᯉ ᯉ ᯉᯪᯑᯞᯉᯉ᯲ᯉᯘᯪᯑ ᯤ

Sai manat ma diramoti hajut inganan ni gala-gala i, so tung hona tondong manang hona dege.

ᯘᯤ ᯔᯉᯖ᯲ ᯔ ᯑᯪᯒᯔᯬᯖᯪ ᯂᯐᯖᯮ᯲ ᯤᯝᯉᯉ᯲ ᯉᯪ ᯎᯞᯎᯞ ᯤ ᯘᯬ ᯖᯮᯰ ᯂᯬᯉ ᯖᯉᯬ᯲ᯑᯬᯰ ᯔᯉᯰ ᯂᯬᯉ ᯑᯩᯎᯩ

Sogot dope manogot i nunga hehe si Aji Panungkunan, jadi laho ma ibana marsuap tu Aek Parbaraan, ai jonok do sian sopo i.

ᯘᯬᯎᯖᯬ᯲ ᯑᯬᯇᯩ ᯔᯉᯬᯎᯖᯬ᯲ ᯤ ᯉᯮᯝ ᯂᯩᯂᯩ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯐᯑᯪ ᯞᯂᯬ ᯔ ᯤᯅᯉ ᯔᯒ᯲ᯘᯮᯀᯇ᯲ ᯖᯮ ᯀᯀᯂᯩ᯲ ᯇᯒ᯲ᯅᯒᯀᯉ᯲ ᯀᯤ ᯐᯬᯉᯂᯬ᯲ ᯑᯬ ᯘᯪᯀᯉ᯲ ᯘᯬᯇᯬ ᯤ

Tiur antong di ruar, jadi didok rohana naung torang ari, hape na tiur do bulan manogot i.

ᯖᯪᯀᯒᯮ᯲ ᯀᯉ᯲ᯖᯬᯰ ᯑᯪ ᯒᯮᯀᯒ᯲ ᯐᯑᯪ ᯑᯪᯑᯂᯬ᯲ ᯒᯬᯂᯉ ᯉᯀᯮᯰ ᯖᯬᯒᯰ ᯀᯒᯪ ᯂᯇᯩ ᯉ ᯖᯪᯀᯒᯮ᯲ ᯑᯬ ᯅᯮᯞᯉ᯲ ᯔᯉᯬᯎᯖᯬ᯲ ᯤ

Dung dijama ibana aek i laho marsuap, tarsonggot ma ibana, ai diida adong jolma jongjong di jolona.

ᯑᯮᯰ ᯑᯪᯐᯔ ᯤᯅᯉ ᯀᯁᯂᯩ᯲ ᯤ ᯞᯂᯬ ᯔᯒ᯲ᯘᯮᯀᯇ᯲ ᯖᯒ᯲ᯘᯬᯰᯎᯖᯬ᯲ ᯔ ᯤᯅᯉ ᯀᯤ ᯑᯪᯤᯑ ᯀᯑᯬᯰ ᯐᯞᯬ᯲ᯔ ᯐᯬᯰᯐᯬᯰ ᯑᯪ ᯐᯬᯞᯬᯉ

Hape ndang jolma i, homang do na ro i.

ᯂᯇᯩ ᯑᯰ ᯐᯞᯬ᯲ᯔ ᯤ ᯂᯬᯔᯰ ᯑᯬ ᯉ ᯒᯬ ᯤ

Dibahen homang I ma pangaliluon, gabe jolma nama diida si Aji Panungkunan na di jolona i.

ᯑᯪᯅᯂᯉᯩ᯲ ᯂᯬᯔᯰ ᯤ ᯔ ᯇᯝᯞᯪᯞᯮᯀᯉᯬ᯲ ᯎᯅᯩ ᯐᯞᯬ᯲ᯔ ᯉᯔ ᯑᯪᯤᯑ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯉ ᯑᯪ ᯐᯬᯞᯬᯉ ᯤ

Dung jongjong si Aji Panungkunan, muba ma diida rupa ni jolma na dijolona i, gabe rupa ni donganna na sauduran i.

ᯑᯮᯰ ᯐᯬᯰᯐᯬᯰ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯔᯮᯅ ᯔ ᯑᯪᯤᯑ ᯒᯮᯇ ᯉᯪ ᯐᯞᯬ᯲ᯔ ᯉ ᯑᯪᯐᯬᯞᯬᯉ ᯤ ᯎᯅᯩ ᯒᯮᯇ ᯉᯪ ᯑᯬᯝᯉ᯲ᯉ ᯉ ᯘᯥᯑᯮᯒᯉ᯲ ᯤ

Dung i diihuthon ma mardalan di topi aek i; dang pola sadia dao dung i taripar ma nasida.

ᯑᯮᯰ ᯤ ᯑᯪᯤᯂᯖᯮ᯲ᯂᯉᯬ᯲ ᯔ ᯔᯒ᯲ᯑᯞᯉ᯲ ᯑᯪ ᯖᯬᯇᯪ ᯀᯀᯂᯩ᯲ ᯤ ᯑᯰ ᯇᯬᯞ ᯘᯑᯪᯀ ᯑᯀᯬ ᯑᯮᯰ ᯤ ᯖᯒᯪᯇᯒ᯲ ᯔ ᯉᯘᯪᯑ

Nunga mago roha ni si Aji Panungkunan dibahen homang i, holan na mangihuthon nama diboto, manang tudia ma ditogihon ibana.

ᯉᯮᯝ ᯔᯎᯬ ᯒᯬᯂ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯑᯪᯅᯂᯉᯩ᯲ ᯂᯬᯔᯰ ᯤ ᯂᯬᯞᯉ᯲ ᯉ ᯔᯝᯪᯂᯖᯮ᯲ᯂᯉᯬ᯲ ᯉᯔ ᯑᯪᯅᯬᯖᯬ ᯔᯉᯰ ᯖᯮᯑᯪᯀ ᯔ ᯑᯪᯖᯬᯎᯪᯂᯉᯬ᯲ ᯤᯅᯉ

Sai diihuthon ibana ma homang i, sai diihuthon.

ᯘᯤ ᯑᯪᯤᯂᯖᯮ᯲ᯂᯉᯬ᯲ ᯤᯅᯉ ᯔ ᯂᯬᯔᯰ ᯤ ᯘᯤ ᯑᯪᯤᯂᯖᯮ᯲ᯂᯉᯬ᯲

Torang ma ari manogotna i, tarsunggul ma dongan ni si Aji Panungkunan sidua halak i.

ᯖᯬᯒᯰ ᯔ ᯀᯒᯪ ᯔᯉᯬᯎᯖᯬ᯲ᯉ ᯤ ᯖᯒ᯲ᯘᯮᯰᯎᯞᯮ᯲ ᯔ ᯑᯬᯝᯉ᯲ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯘᯪᯑᯮᯀ ᯂᯞᯂ᯲ ᯤ

Diida nasida ma na so disi be si Aji Panungkunan.

ᯑᯪᯤᯑ ᯉᯘᯪᯑ ᯔ ᯉ ᯘᯬ ᯑᯪᯘᯪ ᯅᯩ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Ba nunga laho ibana huroha pajolohon marsuap! ninna rohanasida.

ᯅ ᯉᯮᯝ ᯞᯂᯬ ᯤᯅᯉ ᯂᯮᯒᯬᯂ ᯇᯐᯬᯞᯬᯂᯉᯬ᯲ ᯔᯒ᯲ᯘᯮᯀᯇ᯲ ᯉᯉᯪ᯲ᯉ ᯒᯬᯂᯉᯘᯪᯑ

Jadi didapothon ma tutu tu aek parsuapan i, tuat ma nasida tu toru.

ᯐᯑᯪ ᯑᯪᯑᯇᯖᯬ᯲ᯂᯉᯬ᯲ ᯔ ᯖᯮᯖᯮ ᯖᯮ ᯀᯀᯂᯩ᯲ ᯇᯒ᯲ᯘᯮᯀᯇᯉ᯲ ᯤ ᯖᯮᯀᯖ᯲ ᯔ ᯉᯘᯪᯑ ᯖᯮ ᯖᯬᯒᯮ

Diida nasida ma bogas ni si Aji Panungkunan di pasir na di lambung ni parsuapanna i.

ᯑᯪᯤᯑ ᯉᯘᯪᯑ ᯔ ᯅᯬᯎᯘ᯲ ᯉᯪ ᯘᯪ ᯀᯐᯪ ᯇᯉᯮᯂᯮᯉᯉ᯲ ᯑᯪ ᯇᯘᯒᯪ᯲ ᯉ ᯑᯪ ᯞᯔ᯲ᯅᯮᯰ ᯉᯪ ᯇᯒ᯲ᯘᯮᯇᯉ᯲ ᯤ

Dung i jou-jou ma nasida, o Aji Panungkunan, didia do ho? Beta hita muli tu huta! ninna nasida.

ᯑᯮᯰ ᯤ ᯐᯬᯥᯐᯬᯥ ᯔ ᯉᯘᯪᯑ ᯀᯬ ᯀᯐᯪ ᯇᯉᯮᯰᯂᯮᯉᯉ᯲ ᯑᯪᯑᯪᯀ ᯑᯬ ᯂᯬ ᯅᯩᯖ ᯂᯪᯖ ᯔᯮᯞᯪ ᯖᯮ ᯂᯮᯖ ᯉᯉᯪ᯲ᯉ ᯉᯘᯪᯑ

Hape so adong na mangalusi.

ᯂᯇᯩ ᯘᯬ ᯀᯑᯬᯰ ᯉ ᯔᯝᯞᯮᯘᯪ

Dipamanat nasida ma bogas i, diihuthon ma dompak dolok; dung i dang tarida be.

ᯑᯪᯇᯔᯉᯖ᯲ ᯉᯘᯪᯑ ᯔ ᯑᯔᯬ᯲ᯇᯂ᯲ ᯑᯬᯞᯂᯬ᯲ ᯑᯮᯰ ᯤ ᯑᯰ ᯖᯒᯪᯑ ᯅᯩ

Ai taripar do homang i dohot si Aji Panungkunan, unang dapot antong diboto halak bogasnasida

ᯀᯤ ᯖᯒᯪᯇᯒ᯲ ᯑᯬ ᯂᯬᯔᯰ ᯤ ᯑᯬᯂᯖᯬ᯲ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯥᯉᯰ ᯑᯪᯅᯬᯖᯬ ᯂᯞᯂ᯲ ᯅᯬᯎᯘ᯲ᯉᯘᯪᯑ

Dung sai dipamanat nasida bogas ni si Aji Panungkunan i, dapot ma diida bogas na asing di rihit i.

ᯑᯮᯰ ᯘᯤ ᯑᯪᯇᯔᯉᯖ᯲ ᯉᯘᯪᯑ ᯅᯬᯎᯘ᯲ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯤ ᯑᯇᯖᯬ᯲ ᯔ ᯑᯪᯤᯑ ᯅᯬᯎᯘ᯲ ᯉ ᯀᯘᯪᯰ ᯑᯪ ᯒᯪᯂᯖᯪ᯲ ᯤ

Mamoto ma nasida, manang bogas ni aha i.

ᯔᯔᯬᯖᯬ ᯔ ᯉᯘᯪᯑ ᯔᯉᯰ ᯅᯬᯎᯘ᯲ ᯉᯪ ᯀᯂ ᯤ

Amang oi amang! Nunga diluahon homang si Aji Panungkunan! ninna nasida mangangguk.
ᯀᯔᯰ ᯀᯬᯤ ᯀᯔᯰ ᯉᯮᯝ ᯑᯪᯞᯮᯀᯂᯉᯬ᯲ ᯂᯬᯔᯰ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯉᯉᯪ᯲ᯉ ᯉᯘᯪᯑ ᯔᯝᯰᯎᯂᯮ᯲

Dung i marlojong ma nasida tu sopo i, dibuat nasida ma hajutna be dohot hajut ni si Aji Panungkunan, inganan ni gala-gala ubat ni si Tapi Marhillong Sere i.

ᯑᯮᯰ ᯤ ᯔᯒ᯲ᯞᯬᯐᯬᯰ ᯔ ᯉᯘᯪᯑ ᯖᯮ ᯘᯬᯇᯬ ᯤ ᯑᯪᯅᯮᯀᯖ᯲ ᯉᯘᯪᯑ ᯔ ᯂᯐᯖᯮ᯲ᯉ ᯅᯩ ᯑᯬᯂᯖᯬ᯲ ᯂᯐᯖᯮ᯲ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯤᯝᯉᯉ᯲ ᯉᯪ ᯎᯞᯎᯞ ᯥᯅᯖ᯲ ᯉᯪ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯬᯰ ᯘᯩᯒᯩ ᯤ

Sai marlojongi ma nasida, diporpori sude ramba-ramba i, anggiat bolas tibu sahat tu huta.

ᯘᯤ ᯔᯒ᯲ᯞᯬᯐᯬᯝᯪ ᯔ ᯉᯘᯪᯑ ᯑᯪᯇᯒᯬ᯲ᯇᯬᯒᯪ ᯘᯮᯑᯩ ᯒᯔ᯲ᯅᯒᯔ᯲ᯅ ᯤ ᯀᯰᯎᯪᯀᯖ᯲ ᯅᯬᯞᯘ᯲ ᯖᯪᯅᯮ ᯘᯂᯖ᯲ ᯖᯮ ᯂᯮᯖ

Asa borhat nasida sahuta antong laho mangalului si Aji Panungkunan.

ᯀᯘ ᯅᯒᯬ᯲ᯂᯖ᯲ ᯉᯘᯪᯑ ᯘᯂᯮᯖ ᯀᯉ᯲ᯖᯬᯰ ᯞᯂᯬ ᯔᯝᯞᯮᯞᯮᯐ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Nang pe sai hudus nasida, jala hatop marlojongi, ba sai manat do dibahen anggo na mamboan hajut inganan ni gala-gala i.

ᯉᯰ ᯇᯩ ᯘᯤ ᯂᯮᯑᯘᯮ᯲ ᯉᯘᯪᯑ ᯐᯞ ᯂᯖᯇᯬ᯲ ᯔᯒ᯲ᯞᯬᯐᯬᯝᯪ ᯅ ᯘᯤ ᯔᯉᯖ᯲ ᯑᯬ ᯑᯪᯅᯂᯉᯩ᯲ ᯀᯰᯎᯬ ᯉ ᯔᯔ᯲ᯅᯬᯀᯉ᯲ ᯂᯐᯖᯮ᯲ ᯤᯝᯉᯉ᯲ ᯉᯪ ᯎᯞᯎᯞ ᯤ

Dung jonok nasida mandapothon huta diida nasida ma Raja Sohuturon Dolok nunga sai jongjong manatap-natap songon na paima-imahon di harbangan i.

ᯑᯮᯰ ᯐᯬᯉᯂᯬ᯲ ᯉᯘᯪᯑ ᯔᯉ᯲ᯑᯇᯖᯬ᯲ᯂᯉᯬ᯲ ᯂᯮᯖ ᯑᯪᯤᯑ ᯉᯘᯪᯑ ᯔ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯉᯮᯝ ᯘᯤ ᯐᯬᯰᯐᯬᯰ ᯔᯉᯖᯇ᯲ᯉᯖᯇ᯲ ᯘᯬᯝᯉᯬ᯲ ᯉ ᯇᯤᯔᯤᯔᯂᯉᯬ᯲ ᯑᯪ ᯂᯒ᯲ᯅᯝᯉ᯲ ᯤ

Sahat di jolo ni raja i ninna sahalak sian nasida ma,

ᯘᯂᯖ᯲ ᯑᯪ ᯐᯬᯞᯬ ᯉᯪ ᯒᯐ ᯤ ᯉᯉᯪ᯲ᯉ ᯘᯂᯞᯂ᯲ ᯘᯪᯀᯉ᯲ ᯉᯘᯪᯑ ᯔ

Nunga dison rajanami gala-gala sipitu sangkariang i na mardongan gala-gala sirumondang bulan, ubat ni boru ni raja i.

ᯉᯮᯝ ᯑᯪᯘᯉᯬ᯲ ᯒᯐᯉᯔᯪ ᯎᯞᯎᯞ ᯘᯪᯇᯪᯖᯮ ᯘᯰᯂᯒᯪᯀᯰ ᯤ ᯉ ᯔᯒ᯲ᯑᯬᯝᯉ᯲ ᯎᯞᯎᯞ ᯘᯪᯒᯮᯔᯉᯬ᯲ᯑᯰ ᯅᯮᯞᯉ᯲ ᯥᯅᯖ᯲ ᯉᯪ ᯅᯬᯒᯮ ᯉᯪ ᯒᯐ ᯤ

Lehon hamu ma dipangan, asa malum !

ᯞᯩᯂᯉᯬ᯲ ᯂᯔᯮ ᯔ ᯑᯪᯇᯝᯉ᯲ ᯀᯘ ᯔᯞᯔᯮ᯲

Dung dilehon hajut i tu raja i, pintor ngongong ma nasida na dua.

ᯑᯮᯰ ᯑᯪᯞᯩᯂᯉᯬ᯲ ᯂᯐᯖᯮ᯲ ᯤ ᯖᯮ ᯒᯐ ᯤ ᯇᯉᯪ᯲ᯖᯒᯬ᯲ ᯝᯬᯝᯬᯰ ᯔ ᯘᯪᯑ ᯉ ᯑᯮᯀ

Mangantusi ma roha ni raja i, naung adong na masa parmaraan bolon.

ᯔᯝᯉ᯲ᯖᯮᯘᯪ ᯔ ᯒᯬᯂ ᯉᯪ ᯒᯐ ᯤ ᯉᯀᯮᯰ ᯀᯑᯬᯰ ᯉ ᯔᯘ ᯇᯒ᯲ᯔᯒᯀᯉ᯲ ᯅᯬᯞᯉᯬ᯲

Marroan ma pangisi ni huta i masitungur; dung i diabing nasida ma sidua halak i tu bagas.

ᯔᯒ᯲ᯒᯬᯀᯉ᯲ ᯔ ᯇᯝᯪᯘᯪ ᯉᯪ ᯂᯮᯖ ᯤ ᯔᯘᯪᯖᯮᯝᯒᯮ᯲ ᯑᯮᯰ ᯤ ᯑᯪᯀᯅᯪᯰ ᯉᯘᯪᯑ ᯔ ᯘᯪᯑᯮᯀ ᯂᯞᯂ᯲ ᯤ ᯖᯮ ᯅᯎᯘ᯲

Disuapi ma antong, jala dipaspas dohot bulung rata.

ᯑᯪᯘᯮᯀᯇᯪ ᯔ ᯀᯉ᯲ᯖᯬᯰ ᯐᯞ ᯑᯪᯇᯘ᯲ᯇᯘ᯲ ᯑᯬᯂᯖᯬ᯲ ᯅᯮᯞᯮᯰ ᯒᯖ
Dung adong sangombas tarjolma ma nasida na dua.

ᯑᯮᯰ ᯀᯑᯬᯰ ᯘᯝᯔᯬ᯲ᯅᯘ᯲ ᯖᯒ᯲ᯐᯞᯬ᯲ᯔ ᯔ ᯉᯘᯪᯑ ᯉ ᯑᯮᯀ

Naeng ma sahali sude pangisi ni huta i manungkun, manang aha do na masa.

ᯉᯀᯰᯩ ᯔ ᯘᯂᯞᯪ ᯘᯮᯑᯩ ᯇᯝᯪᯘᯪ ᯉᯪ ᯂᯮᯖ ᯤ ᯔᯉᯮᯰᯂᯉᯮ᯲ ᯔᯉᯰ ᯀᯂ ᯑᯬ ᯉ ᯔᯘ

Di dia do antong si AJi Panungkunan umbahen so rap ro nasida, ai so tartaon nasida be na sai hohom i sian nangkin.

ᯑᯪ ᯑᯪᯀ ᯑᯬ ᯀᯉ᯲ᯖᯬᯰ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯀᯔᯮ᯲ᯅᯂᯉᯩ᯲ ᯘᯬ ᯒᯇ᯲ ᯒᯬ ᯉᯘᯪᯑ ᯀᯤ ᯘᯬ ᯖᯒ᯲ᯖᯀᯉᯬ᯲ ᯉᯘᯪᯑ ᯅᯩ ᯉ ᯘᯤ ᯂᯬᯐᯔᯬ᯲ ᯤ ᯘᯪᯀᯉ᯲ ᯉᯰᯂᯉᯪ᯲

Alai na bisuk do Raja Sohuturon Dolok, didok ma tu angka na humaliang i,

ᯀᯞᯤ ᯉ ᯅᯪᯘᯂᯮ᯲ ᯑᯬ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯑᯪᯑᯂᯬ᯲ ᯔ ᯖᯮ ᯀᯰᯂ ᯉ ᯂᯮᯔᯞᯪᯀᯰ ᯤ

Paloas hamu ma jolo angka amang humosa nasida na dua satongkin nari.

ᯇᯞᯬᯀᯘ᯲ ᯂᯔᯮ ᯔ ᯐᯬᯞᯬ ᯀᯰᯂ ᯀᯔᯰ ᯂᯮᯔᯬᯘ ᯉᯘᯪᯑ ᯉ ᯑᯮᯀ ᯘᯖᯬᯰᯂᯉᯪ᯲ ᯉᯒᯪ

Tapaima ma jolo asa tung tiur rohana.

ᯖᯇᯤᯔ ᯔ ᯐᯬᯞᯬ ᯀᯘ ᯖᯮᯰ ᯖᯪᯀᯒᯮ᯲ ᯒᯬᯂᯉ

Dung i asa sumuang jolo gogonasida na dua!

ᯑᯮᯰ ᯤ ᯀᯘ ᯘᯮᯔᯮᯀᯰ ᯐᯬᯞᯬ ᯎᯬᯎᯬᯉᯘᯪᯑ ᯉ ᯑᯮᯀ