ᯖᯮᯒᯪᯖᯮᯪᯀᯉ᯲ ᯉᯪ ᯘᯪ ᯀᯐᯪ ᯇᯉᯰᯮᯄ᯦ᯮᯉᯉ᯲ Turi-turian ni si Aji Panungkunan Turpuk Pasampuluhon (Pangke Android)

Di na sadari disungkun inana ma si Aji Panungkunan, Ale amang Aji Panungkunan, ai ndang adong manang aha dilehon Raja Sohuturon Dolok di ho?

ᯑᯪ ᯉ ᯘᯑᯒᯪ ᯑᯪᯘᯮᯰᯂᯉᯮ ᯤᯉᯉ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯀᯞᯩ ᯀᯔᯰ ᯀᯐᯪ ᯇᯉᯮᯰᯂᯮᯉᯉ᯲ ᯀᯤ ᯀᯉᯪ᯲ᯑᯰ ᯀᯑᯰᯬ ᯔᯉᯰ ᯀᯂ ᯑᯪᯞᯩᯂᯉᯬ᯲ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯑᯪ ᯂᯬ

Adong do nian inang! Dilehon do nian mas tu ahu, di na laho borhat i hami sian Lobu Namaduma, alai ndang hujalo. 

ᯀᯑᯰᯬ ᯑᯬ ᯉᯪᯀᯉ᯲ ᯤᯉᯰ ᯑᯪᯞᯩᯂᯉᯬ᯲ ᯑᯬ ᯉᯪᯀᯉ᯲ ᯔᯘ᯲ ᯖᯮ ᯀᯂᯮ ᯑᯪ ᯉ ᯞᯂᯬ ᯅᯒᯬ᯲ᯂᯖ᯲ ᯤ ᯂᯔᯪ ᯘᯪᯀᯉ᯲ ᯞᯬᯅᯮ ᯉᯔᯑᯮᯔ ᯀᯞᯤ ᯀᯉᯪ᯲ᯑᯰ ᯂᯮᯐᯞᯬ

Ai aut unang na dapot pangisi ni huta Lobu Namaduma ahu di harangan hatubuan ni hotang i, ba nunga mate ahu da inang!

ᯀᯤ ᯀᯀᯖᯮ᯲ ᯥᯉᯰ ᯉ ᯑᯇᯖᯬ᯲ ᯇᯝᯪᯘᯪ ᯉᯪ ᯂᯮᯖ ᯞᯬᯅᯮ ᯉᯔᯑᯮᯔ ᯀᯂᯮ ᯑᯪ ᯂᯒᯝᯉ᯲ ᯂᯖᯮᯅᯮᯀᯉ᯲ ᯉᯪ ᯂᯬᯖᯰ ᯤ ᯅ ᯉᯮᯝ ᯔᯖᯩ ᯀᯂᯮ ᯑ ᯤᯉᯰ

Songon i muse na niluahon ni homang i ahu, tung sude do nasida maneahon gogona laho mangalului ahu, so marnaloja.

ᯘᯬᯝᯉᯬ᯲ ᯤ ᯔᯮᯘᯩ ᯉ ᯉᯪᯞᯮᯀᯂᯉᯬ᯲ ᯉᯪ ᯂᯬᯔᯰ ᯤ ᯀᯂᯮ ᯖᯮᯰ ᯘᯮᯑᯩ ᯑᯬ ᯉᯘᯪᯑ ᯔᯉᯩᯀᯂᯉᯬ᯲ ᯎᯬᯎᯬᯉ ᯞᯂᯬ ᯔᯝᯞᯮᯞᯮᯤ ᯀᯂᯮ ᯘᯬ ᯔᯒ᯲ᯉᯞᯬᯐ

Raja i pe inang mansai marsak do saleleng na so dapot i dope ahu. 

ᯒᯐ ᯤ ᯇᯩ ᯤᯉᯰ ᯔᯉ᯲ᯘᯤ ᯔᯒ᯲ᯘᯂ᯲ ᯑᯬ ᯘᯞᯩᯞᯰᯩ ᯉ ᯘᯬ ᯑᯇᯖᯬ᯲ ᯤ ᯑᯬᯇᯩ ᯀᯂᯮ

Malum do tutu sahit ni boru ni raja i, si Tapi Marhillong Sere, dibahen ubat na hulului i. 

ᯔᯞᯔᯮ᯲ ᯑᯬ ᯖᯮᯖᯮ ᯘᯂᯖᯪ᯲ ᯉᯪ ᯅᯬᯒᯮ ᯉᯪ ᯒᯐ ᯤ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯰᯬ ᯘᯩᯒᯩ ᯑᯪᯅᯂᯉᯩ᯲ ᯥᯅᯖ᯲ ᯉ ᯂᯮᯞᯮᯞᯮᯤ ᯤ

Alai ahu pe, dua hali ahu disoro sian baba ni hamatean. 

ᯀᯞᯤ ᯀᯂᯮ ᯇᯩ ᯑᯮᯀ ᯂᯞᯪ ᯀᯂᯮ ᯑᯪᯘᯬᯒᯬ ᯘᯪᯀᯉ᯲ ᯅᯅ ᯉᯪ ᯂᯔᯖᯩᯀᯉ᯲

Asa nang ahu pe, tung marutang bolon do huhilala maradophon raja i.

ᯀᯘ ᯉᯰ ᯀᯂᯮ ᯇᯩ ᯖᯮᯰ ᯔᯒᯮᯖᯰ ᯅᯬᯞᯉᯬ᯲ ᯑᯬ ᯂᯮᯂᯪᯞᯞ ᯔᯒᯑᯇᯬ᯲ᯂᯉᯬ᯲ ᯒᯐ ᯤ

I ma alana da inang, dang adong huhilala unena laho manjalo upa sian raja i. 

ᯤ ᯔ ᯀᯞᯉ ᯑ ᯤᯉᯰ ᯑᯰ ᯀᯑᯰᯬ ᯂᯮᯂᯪᯞᯞ ᯥᯉᯩᯉ ᯞᯂᯬ ᯔᯉ᯲ᯐᯞᯬ ᯥᯇ ᯘᯪᯀᯉ᯲ ᯒᯐ ᯤ

Tole dibahen do upa-upa ni tondingku, dibahen do haroan muse. 

ᯖᯬᯞᯩ ᯑᯪᯅᯂᯉᯩ᯲ ᯑᯬ ᯥᯇᯥᯇ ᯉᯪ ᯖᯉᯬ᯲ᯑᯰᯪᯂᯮ ᯑᯪᯅᯂᯉᯩ᯲ ᯑᯬ ᯂᯒᯬᯀᯉ᯲ ᯔᯮᯘᯩ

Ai manullang horbo do raja i marsogotna i! ninna si Aji Panungkunan mandok tu inana i.

ᯀᯤ ᯔᯉᯞᯮ᯲ᯞᯰ ᯂᯒᯬ᯲ᯅᯬ᯲ ᯑᯬ ᯒᯐ ᯤ ᯔᯒ᯲ᯘᯬᯎᯖᯬ᯲ᯉ ᯤ

 ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯔᯉ᯲ᯑᯂᯬ᯲ ᯖᯮ ᯤᯉᯉ ᯤ

Dung i didok inana i ma, Denggan do tutu na binahenmi!

ᯑᯮᯰ ᯤ ᯑᯪᯑᯂᯬ᯲ ᯤᯉᯉ ᯤ ᯔ ᯑᯰᯩᯎᯉ᯲ ᯑᯬ ᯖᯮᯖᯮ ᯉ ᯅᯪᯉᯂᯉᯩ᯲ᯔᯪ

Tuani ma dang dijalo ho mas i songon upam, ale amang Aji Panungkunan. 

ᯖᯮᯀᯉᯪ ᯔ ᯑᯰ ᯑᯪᯐᯞᯬ ᯂᯬ ᯔᯘ᯲ ᯤ ᯘᯬᯝᯉᯬ᯲ ᯥᯇᯔ᯲ ᯀᯞᯩ ᯀᯔᯰ ᯀᯐᯪ ᯇᯉᯮᯰᯂᯮᯉᯉ᯲

Aut sura dijalo ho, ba nunga sidung be sudena di roha ni Raja Sohuturon Dolok. 

ᯀᯀᯖᯮ᯲ ᯘᯮᯒ ᯑᯪᯐᯞᯬ ᯂᯬ ᯅ ᯉᯮᯝ ᯘᯪᯑᯮᯰ ᯅᯩ ᯘᯮᯑᯩᯉ ᯑᯪ ᯒᯬᯂ ᯉᯪ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲

Dang adong pola sai ingotonna be damang! 

ᯑᯰ ᯀᯑᯰᯬ ᯇᯬᯞ ᯘᯤ ᯤᯝᯬᯖᯉᯬ᯲ᯉ ᯅᯩ ᯑᯔᯰ

Nuaeng sai ingotonna nama ho, dang bolas lupa sian rohana. 

ᯉᯮᯀᯀᯰᯩ ᯘᯤ ᯤᯝᯬᯖᯉᯬ᯲ᯉ ᯉᯔ ᯂᯬ ᯑᯰ ᯅᯬᯞᯘ᯲ ᯞᯮᯇ ᯘᯪᯀᯉ᯲ ᯒᯬᯂᯉ

Sai urupanna ma ho, molo targogot ho muse!
ᯘᯤ ᯥᯒᯮᯇᯉ᯲ᯉ ᯔ ᯂᯬ ᯔᯬᯞᯬ ᯖᯒ᯲ᯎᯬᯎᯖᯬ᯲ ᯂᯬ ᯔᯮᯘᯩ

Jadi las ma roha ni si Aji Panungkunan umbege hata ni inana i; dang adong pola disolsoli ibana taringot tu mas na so jinalona sian raja i.
ᯐᯑᯪ ᯞᯘ᯲ ᯔ ᯒᯬᯂ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯀᯔᯮ᯲ᯅᯩᯎᯩ ᯂᯖ ᯉᯪ ᯤᯉᯉ ᯤ ᯑᯰ ᯀᯑᯰᯬ ᯇᯬᯞ ᯑᯪᯘᯞᯬ᯲ᯘᯬᯞᯪ ᯤᯅᯉ ᯖᯒᯪᯝᯖᯬ᯲ ᯖᯮ ᯔᯘ᯲ ᯉ ᯘᯬ ᯐᯪᯉᯞᯬᯉ ᯘᯪᯀᯉ᯲ ᯒᯐ ᯤ

Dung adong ma pitu bomgin na sahat i si Aji Panungkunan ro di hutana, didok inana i ma mandok ibana, 

ᯑᯮᯰ ᯀᯑᯰᯬ ᯔ ᯇᯪᯖᯮ ᯅᯒᯬ᯲ᯝᯉᯪ᯲ ᯉ ᯘᯂᯖ᯲ ᯤ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯒᯬ ᯑᯪ ᯂᯮᯖᯉ ᯑᯪᯑᯂᯬ᯲ ᯤᯉᯉ ᯤ ᯔ ᯔᯉ᯲ᯑᯂᯬ᯲ ᯤᯅᯉ

Ale amang hasian, Aji Panungkunan, dada nian na pasigat-sigat bulung, dada na parigat-rigat bulung gaol

ᯀᯞᯩ ᯀᯔᯰ ᯂᯘᯪᯀᯉ᯲ ᯀᯐᯪ ᯇᯉᯮᯰᯂᯮᯉᯉ᯲ ᯑᯑ ᯉᯪᯀᯉ᯲ ᯉ ᯇᯘᯪᯎᯖ᯲ᯘᯪᯎᯖ᯲ ᯅᯮᯞᯮᯰ ᯑᯑ ᯉ ᯇᯒᯪᯎᯖ᯲ᯒᯪᯎᯖ᯲ ᯅᯮᯞᯮᯰ ᯎᯀᯞᯬ᯲

Dang pola na pasigat-sigat hinalungun, dang pola na mangarungkari hinadangol.

ᯑᯰ ᯇᯬᯞ ᯉ ᯇᯘᯪᯎᯖ᯲ᯘᯪᯎᯖ᯲ ᯂᯪᯉᯞᯮᯝᯉᯮ᯲ ᯑᯰ ᯇᯬᯞ ᯉ ᯔᯝᯒᯮᯰᯂᯒᯪ ᯂᯪᯉᯑᯝᯞᯬ᯲

Ba nunga tang dagingmu, nunga toras pingkiran ni damang, alai laos so diboto ho dope manang aha taringot tu hita. 

ᯅ ᯉᯮᯝ ᯖᯰ ᯑᯎᯰᯪᯔᯮ ᯉᯮᯝ ᯖᯬᯒᯘ᯲ ᯇᯰᯪᯂᯪᯒᯉ᯲ ᯉᯪ ᯑᯔᯰ ᯀᯞᯤ ᯞᯀᯘᯬ᯲ ᯘᯬ ᯑᯪᯅᯬᯖᯬ ᯂᯬ ᯑᯬᯇᯩ ᯔᯉᯰ ᯀᯂ ᯖᯒᯪᯝᯖᯬ᯲ ᯖᯮ ᯂᯪᯖ

Sai binunihon do songon hahomion, hira naung pinabongot tu rumbi na so tarungkap. 

ᯘᯤ ᯅᯪᯉᯮᯉᯪᯂᯉᯬ᯲ ᯑᯬ ᯘᯬᯝᯉᯬ᯲ ᯂᯂᯬᯔᯪᯀᯉᯬ᯲ ᯂᯪᯒ ᯉᯀᯮᯰ ᯇᯪᯉᯅᯬᯝᯖᯬ᯲ ᯖᯮ ᯒᯔᯮ᯲ᯅᯪ ᯉ ᯘᯬ ᯖᯒᯮᯰᯂᯇ᯲

Alai tingkina ma da nuaeng anak hasian. Ai ingkon botoonmu ma nuaeng, so tung songon i dipalalap-lalap deba.

ᯀᯞᯤ ᯖᯰᯪᯂᯪᯉ ᯔ ᯑ ᯉᯮᯀᯀᯰᯩ ᯀᯉᯂ᯲ ᯂᯘᯪᯀᯉ᯲ ᯀᯤ ᯀᯰᯪᯂᯉᯬ᯲ ᯅᯬᯖᯬᯀᯉᯬ᯲ᯔᯮ ᯲ ᯉᯮᯀᯀᯰᯩ ᯘᯬ ᯖᯮᯰ ᯘᯬᯝᯉᯬ᯲ ᯤ ᯑᯪᯇᯞᯞᯇ᯲ᯞᯞᯇ᯲ ᯑᯩᯅ

Laho ma jolo damang mandapothon Datu Bolon Paniop Pagar, na di huta Lobu Parholean, asa dipaboa tu ho taringot tu hita!
ᯞᯂᯬ ᯔ ᯐᯬᯞᯬ ᯑᯔᯰ ᯔᯉ᯲ᯑᯇᯖᯬ᯲ᯂᯉᯬ᯲ ᯑᯖᯮ ᯅᯬᯞᯉᯬ᯲ ᯇᯉᯪᯀᯇᯬ᯲ ᯇᯎᯒ᯲ ᯉ ᯑᯪ ᯂᯮᯖ ᯞᯬᯅᯮ ᯇᯒ᯲ᯂᯬᯞᯩᯀᯉ᯲ ᯀᯘ ᯑᯪᯇᯅᯬᯀ ᯖᯮ ᯂᯬ ᯖᯒᯪᯝᯖᯬ᯲ ᯖᯮ ᯂᯪᯖ

Anggo ahu damang, dang na tarturihon ahu be i! Tung so malo be ahu paboahon i tu ho! ninna.

ᯀᯰᯎᯬ ᯀᯂᯮ ᯑᯔᯰ ᯑᯰ ᯉ ᯖᯒ᯲ᯖᯮᯒᯪᯂᯉᯬ᯲ ᯀᯂᯮ ᯅᯩ ᯤ ᯖᯮᯰ ᯘᯬ ᯔᯞᯬ ᯅᯩ ᯀᯂᯮ ᯇᯅᯬᯀᯂᯉᯬ᯲ ᯤ ᯖᯮ ᯂᯬ ᯉᯉᯪ᯲ᯉ

Molo songon i nimmu dainang, ba na uli ma i tutu! ninna si Aji Panungkunan.

ᯔᯬᯞᯬ ᯘᯬᯝᯉᯬ᯲ ᯤ ᯉᯔᯪ᯲ᯔᯮ ᯑᯤᯉᯰ ᯅ ᯉ ᯥᯞᯪ ᯔ ᯤ ᯖᯮᯖᯮ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Dung i borhat ma si Aji Panungkunan tu huta Lobu Parholean, huta ni Datu Bolon Paniop Pagar. 

ᯑᯮᯰ ᯤ ᯅᯒᯬ᯲ᯂᯖ᯲ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯖᯮ ᯂᯮᯖ ᯞᯬᯅᯮ ᯇᯒ᯲ᯂᯬᯞᯩᯀᯉ᯲ ᯂᯮᯖ ᯉᯪ ᯑᯖᯮ ᯅᯬᯞᯉᯬ᯲ ᯇᯉᯪᯀᯇᯬ᯲ ᯇᯎᯒ᯲

Dung sahat ibana tu huta i, bangkit ma ibana tu bagas ni Datu Bolon i.

ᯑᯮᯰ ᯘᯂᯖ᯲ ᯤᯅᯉ ᯖᯮ ᯂᯮᯖ ᯤ ᯅᯰᯂᯖᯪ᯲ ᯔ ᯤᯅᯉ ᯖᯮ ᯅᯎᯘ᯲ ᯉᯪ ᯑᯖᯮ ᯅᯬᯞᯉᯬ᯲ ᯤ

Aha ma na niulam umbahen na ro ho tu hutanami on? ninna Datu Bolon i manungkun.

ᯀᯂ ᯔ ᯉ ᯉᯪᯥᯞᯔ᯲ ᯀᯔᯮ᯲ᯅᯂᯉᯩ᯲ ᯉ ᯒᯬ ᯂᯬ ᯖᯮ ᯂᯮᯖᯉᯔᯪ ᯀᯉᯬ᯲ ᯉᯉᯪ᯲ᯉ ᯑᯖᯮ ᯅᯬᯞᯉᯬ᯲ ᯤ ᯔᯉᯮᯰᯂᯉᯮ᯲

Si Aji Panungkunan do ahu ompung Datu Bolon, na ro sian huta Lobu Pargarutan, anak ni Raja Panangian Sojuaon nahinan.

ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯑᯬ ᯀᯂᯮ ᯀᯔᯬ᯲ᯇᯮᯰ ᯑᯖᯮ ᯅᯬᯞᯉᯬ᯲ ᯉ ᯒᯬ ᯘᯪᯀᯉ᯲ ᯂᯮᯖ ᯞᯬᯅᯮ ᯇᯒ᯲ᯎᯒᯮᯖᯉ᯲ ᯀᯉᯂ᯲ ᯉᯪ ᯒᯐ ᯇᯉᯝᯪᯀᯉ᯲ ᯘᯬᯐᯮᯀᯀᯉᯬ᯲ ᯉᯂᯪᯉᯉ᯲

Na disuru dainang do ahu ro mandapothon ho ompung, ai ndang tarturihonsa ninna na masa tu hami. 

ᯉ ᯑᯪᯘᯮᯒᯮ ᯑᯤᯉᯰ ᯑᯬ ᯀᯂᯮ ᯒᯬ ᯔᯉ᯲ᯑᯇᯖᯬ᯲ᯂᯉᯬ᯲ ᯂᯬ ᯀᯔᯬ᯲ᯇᯮᯰ ᯀᯤ ᯀᯉᯪ᯲ᯑᯰ ᯖᯒ᯲ᯖᯮᯒᯪᯂᯉᯬ᯲ᯘ ᯉᯉᯪ᯲ᯉ ᯉ ᯔᯘ ᯖᯮ ᯂᯔᯪ

Laho ma ho tu Datu Bolon Paniop Pagar, asa dipaboa tu ho, na masa tu hita, ai nunga tang dagingmu! ninna dainang i. 

ᯞᯂᯬ ᯔ ᯂᯬ ᯖᯮ ᯑᯖᯮ ᯅᯬᯞᯉᯬ᯲ ᯇᯉᯪᯀᯇᯬ᯲ ᯇᯎᯒ᯲ ᯀᯘ ᯑᯪᯇᯅᯬᯀ ᯖᯮ ᯂᯬ ᯉ ᯔᯘ ᯖᯮ ᯂᯪᯖ ᯀᯤ ᯉᯮᯝ ᯖᯰ ᯑᯎᯰᯪᯔᯮ ᯉᯉᯪ᯲ᯉ ᯑᯤᯉᯰ ᯤ

I ma umbahen ro ahu ompung! ninna si Aji Panungkun.

ᯤ ᯔ ᯀᯔᯮ᯲ᯅᯂᯉᯩ᯲ ᯒᯬ ᯀᯂᯮ ᯀᯔᯬ᯲ᯇᯮᯰ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Dung i didok Datu Bolon Paniop Pagar ma, Na denggan ma i tutu na nidok ni inanta i. 

ᯑᯮᯰ ᯤ ᯑᯪᯑᯂᯬ᯲ ᯑᯖᯮ ᯅᯬᯞᯉᯬ᯲ ᯇᯉᯪᯀᯇᯬ᯲ ᯇᯎᯒ᯲ ᯔ ᯉ ᯑᯰᯩᯎᯉ᯲ ᯔ ᯤ ᯖᯮᯖᯮ ᯉ ᯉᯪᯑᯂᯬ᯲ ᯉᯪ ᯤᯉᯉ᯲ᯖ ᯤ

Sintong do i, nunga tang dagingmu, nunga marroha ho! 

ᯘᯉᯪ᯲ᯖᯰᯬ ᯑᯬ ᯤ ᯉᯮᯝ ᯖᯰ ᯑᯎᯰᯪᯔᯮ ᯉᯮᯝ ᯔᯒ᯲ᯒᯬᯂ ᯂᯬ

Dang tarpaboa salelengna on tu ho parsorion-muna, ai autsura pe nipaboa, ba ndang dapot tangkupon ni roham.

ᯑᯰ ᯖᯒ᯲ᯇᯅᯬᯀ ᯘᯞᯩᯞᯰᯩᯉ ᯀᯉᯬ᯲ ᯖᯮ ᯂᯬ ᯇᯒ᯲ᯘᯬᯒᯪᯀᯉᯬ᯲ᯔᯮᯉ ᯀᯤ ᯀᯀᯖᯮ᯲ᯘᯮᯒ ᯇᯩ ᯉᯪᯇᯅᯬᯀ ᯅ ᯀᯉᯪ᯲ᯑᯰ ᯑᯇᯖᯬ᯲ ᯖᯰᯂᯮᯇᯉᯬ᯲ ᯉᯪ ᯒᯬᯂᯔ᯲

Nunga huboto na hansit na niahapmu, nunga huboto na dipangkulingi Boru Saniang Naga ho , jala diboto ho ubat na tu boru ni Raja Sohuturon Dolok.

ᯉᯮᯝ ᯂᯮᯅᯬᯖᯬ ᯉ ᯂᯉ᯲ᯘᯖᯪ᯲ ᯉ ᯉᯪᯀᯂᯇ᯲ᯔᯮ ᯉᯮᯝ ᯂᯮᯅᯬᯖᯬ ᯉ ᯑᯪᯇᯰᯂᯮᯞᯪᯝᯪ ᯅᯬᯒᯮ ᯘᯉᯪᯀᯰ ᯉᯎ ᯂᯬ ᯐᯞ ᯑᯪᯅᯬᯖᯬ ᯂᯬ ᯥᯅᯖ᯲ᯉ ᯖᯮ ᯅᯬᯒᯮ ᯉᯪ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲

Diluahon homang ho muse, alai mulak do horas ho tu huta. Pir ma tondim ale Aji Panungkunan. 

ᯑᯪᯞᯮᯀᯂᯉᯬ᯲ ᯂᯬᯔᯰ ᯂᯬ ᯔᯮᯘᯩ ᯀᯞᯤ ᯔᯮᯞᯂ᯲ ᯑᯬ ᯂᯬᯒᯘ᯲ ᯂᯬ ᯖᯮ ᯂᯮᯖ ᯇᯒᯪ᯲ ᯔ ᯖᯉᯬ᯲ᯑᯔᯪ᯲ ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲

Paboaonku na tutu tu ho na pinangido ni inanta i, ai nunga jumpang tingkina, asa diboto ho dalan sibolusonmu jala diboto ho manjaga dirim!

ᯇᯅᯬᯀᯀᯉᯬ᯲ᯂᯮ ᯉ ᯖᯮᯖᯮ ᯖᯮ ᯂᯬ ᯉ ᯇᯪᯉᯝᯪᯑᯬ ᯉᯪ ᯤᯉᯉ᯲ᯖ ᯤ ᯀᯤ ᯉᯮᯝ ᯐᯔᯮ᯲ᯇᯰ ᯖᯰᯪᯂᯪᯉ ᯀᯘ ᯑᯪᯅᯬᯖᯬ ᯂᯬ ᯑᯞᯉ᯲ ᯘᯪᯅᯬᯞᯮᯘᯉᯬ᯲ᯔᯮ ᯐᯞ ᯑᯪᯅᯬᯖᯬ ᯂᯬ ᯔᯉ᯲ᯐᯎ ᯑᯪᯒᯔᯪ᯲

la raja ni huta Dolok Pargarutan sintong ma tutu amanta Raja Panangian Sojuaon, na umpompar ho.

ᯤᯀ ᯒᯐ ᯉᯪ ᯂᯮᯖ ᯑᯬᯞᯂᯬ᯲ ᯇᯒ᯲ᯎᯒᯮᯖᯉ᯲ ᯘᯉᯪ᯲ᯖᯰᯬ ᯔ ᯖᯮᯖᯮ ᯀᯔᯉ᯲ᯖ ᯒᯐ ᯇᯉᯝᯪᯀᯉ᯲ ᯘᯬᯐᯮᯀᯀᯉᯬ᯲ ᯉ ᯀᯔᯮ᯲ᯇᯔᯬ᯲ᯇᯒ᯲ ᯂᯬ

Tibu do ibana mate, jadi metmet dope ho ditinggalhon; asa ho ma na ginoaran na tading maetek.

ᯖᯪᯅᯮ ᯑᯬ ᯤᯅᯉ ᯔᯖᯩ ᯐᯑᯪ ᯔᯖᯩ᯲ᯔᯖᯩ᯲ ᯑᯬᯇᯩ ᯂᯬ ᯑᯪᯖᯰᯪᯎᯞ᯲ᯂᯉᯬ᯲ ᯀᯘ ᯂᯬ ᯔ ᯉ ᯎᯪᯉᯬᯀᯒᯉ᯲ ᯉ ᯖᯑᯰᯪ ᯔᯀᯩᯖᯂᯩ᯲

Dung i bangkit ma gabe raja ni hutamuna Raja Parbaliung. 

ᯑᯮᯰ ᯤ ᯅᯰᯂᯖᯪ᯲ ᯔ ᯎᯅᯩ ᯒᯐ ᯉᯪ ᯂᯮᯖᯔᯮᯉ ᯒᯐ ᯇᯒ᯲ᯅᯞᯪᯀᯮᯰ

Na jingar do raja on; jadi nang naung magodang ho, dang olo ibana manaringoti, na ingkon tu ho do nian pampe harajaon muse.

ᯉ ᯐᯪᯝᯒ᯲ ᯑᯬ ᯒᯐ ᯀᯉᯬ᯲ ᯐᯑᯪ ᯉᯰ ᯉᯀᯮᯰ ᯔᯎᯬᯑᯨ ᯂᯬ ᯑᯰ ᯀᯬᯞᯬ ᯤᯅᯉ ᯔᯉᯒᯪᯝᯬᯖᯪ ᯉ ᯀᯰᯪᯂᯉᯬ᯲ ᯖᯮ ᯂᯬ ᯉᯪᯀᯉ᯲ ᯇᯔ᯲ᯇᯩ ᯂᯒᯐᯀᯉᯬ᯲ ᯔᯮᯘᯩ

Disuru Raja Parbaliung ma Datu Pamurnas na mate i mamboanboan ho, mandongani ibana, jumpa laho tu huta ni halak laho mambahen ubat. 

ᯑᯪᯘᯮᯒᯮ ᯒᯐ ᯇᯒ᯲ᯅᯞᯪᯀᯮᯰ ᯔ ᯑᯖᯮ ᯇᯔᯒᯮ᯲ᯉᯘ᯲ ᯉ ᯔᯖᯩ ᯤ ᯔᯔ᯲ᯅᯬᯀᯉ᯲ᯅᯬᯀᯉ᯲ ᯂᯬ ᯔᯉ᯲ᯑᯬᯝᯉᯪ ᯤᯅᯉ ᯐᯔᯮ᯲ᯇ ᯞᯂᯬ ᯖᯮ ᯂᯮᯖ ᯉᯪ ᯂᯞᯂ᯲ ᯞᯂᯬ ᯔᯔ᯲ᯅᯂᯉᯩᯩ᯲ ᯥᯅᯖ᯲

Ai dohot do Datu Pamurnas dihabiari pangisi ni hutamuna. 

ᯀᯤ ᯑᯬᯂᯖᯬ᯲ ᯑᯬ ᯑᯖᯮ ᯇᯔᯒᯮ᯲ᯉᯘ᯲ ᯑᯪᯂᯅᯪᯀᯒᯪ ᯇᯝᯪᯘᯪ ᯉᯪ ᯂᯮᯖᯔᯮᯉ

I do ale Aji Panungkunan, umbahen na so arga ho diida Datu Pamurnas i, dietong do ho songon alo sililuhononhon.
ᯤ ᯑᯬ ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲ ᯀᯔᯮ᯲ᯅᯂᯉᯩ᯲ ᯉ ᯘᯬ ᯀᯒ᯲ᯎ ᯂᯬ ᯑᯪᯤᯑ ᯑᯖᯮ ᯇᯔᯒᯮ᯲ᯉᯘ᯲ ᯤ ᯑᯪᯀᯩᯖᯰᯬ ᯑᯬ ᯂᯬ ᯘᯬᯝᯉᯬ᯲ ᯀᯞᯬ ᯘᯪᯞᯪᯞᯮᯂᯬᯉᯉᯬ᯲ᯂᯉᯬ᯲

Bidang do haumam naung dibuat Raja Parbaliung, i ma umbahen
na marpogos hamu !

ᯅᯪᯑᯰ ᯑᯬ ᯂᯥᯔᯔ᯲ ᯉᯀᯮᯰ ᯑᯪᯅᯮᯀᯖ᯲ ᯒᯐ ᯇᯒ᯲ᯅᯞᯪᯀᯮᯰ ᯤ ᯔ ᯀᯔᯮ᯲ᯅᯂᯉᯩ᯲ ᯉ ᯔᯒ᯲ᯇᯬᯎᯘᯬ᯲ ᯂᯔᯮ

Ba nuaeng pe nunga diboto ibana na niondihon ni Raja Sohuturon Dolok nama ho. 

ᯅ ᯉᯮᯀᯀᯰᯩ ᯇᯩ ᯉᯮᯝ ᯑᯪᯅᯬᯖᯬ  ᯤᯅᯉ ᯉ ᯉᯪᯀᯉᯬ᯲ᯑᯪᯂᯉᯬ᯲ ᯉᯪ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯉᯔ ᯂᯬ

Manat ho marroha, jaga dirim. 

ᯔᯉᯖ᯲ ᯂᯬ ᯔᯒ᯲ᯒᯬᯂ ᯐᯎ ᯑᯪᯒᯔᯪ᯲

Bisuk ho di ngolum, di hatam ai, Ijuk di para-para, hotang di parlabian. Na bisuk nampuna hata, na oto tu pargadisan.

ᯅᯪᯘᯂᯮ᯲ ᯂᯬ ᯑᯪ ᯝᯬᯞᯔᯮ᯲ ᯑᯪ ᯂᯖᯔ᯲ ᯀᯤ ᯤᯐᯂᯮ᯲ ᯑᯪ ᯇᯒᯇᯒ ᯂᯬᯖᯰ ᯑᯪ ᯇᯒ᯲ᯞᯅᯪᯀᯉ᯲ ᯉ ᯅᯪᯘᯂᯮ᯲ ᯉᯔ᯲ᯇᯮᯉ ᯂᯖ ᯉ ᯀᯬᯖᯬ ᯖᯮ ᯇᯒ᯲ᯎᯑᯪᯘᯉ᯲

Padao dirimu sian haotoon!

ᯇᯑᯀᯬ ᯑᯪᯒᯪᯔᯮ ᯘᯪᯀᯉ᯲ ᯂᯀᯬᯖᯬᯀᯉᯬ᯲

Alai pos ma roham, torop do donganmu di huta Dolok Pargarutan; jala lam torop dope i, dung mate Datu Pamurnas. 

ᯀᯞᯤ ᯇᯘᯬ᯲ ᯔ ᯒᯂᯔ᯲ ᯖᯬᯒᯇᯬ᯲ ᯑᯬ ᯑᯬᯝᯉ᯲ᯔᯮ ᯑᯪ ᯂᯮᯖ ᯑᯬᯞᯂᯬ᯲ ᯇᯒ᯲ᯎᯒᯮᯖᯉ᯲ ᯐᯞ ᯞᯔ᯲ ᯖᯬᯒᯇᯬ᯲ ᯑᯬᯇᯩ ᯤ ᯑᯮᯰ ᯔᯖᯩ ᯑᯖᯮ ᯇᯔᯒᯮ᯲ᯉᯘ᯲

Molo tung manang dia ditahi Raja Parbaliung, ba maporus ma ho tu Lobu Namaduma, tu Raja Sohuturon Dolok!

ᯔᯬᯞᯬ ᯖᯮᯰ ᯔᯉᯰ ᯑᯪᯀ ᯑᯪᯖᯂᯪ ᯒᯐ ᯇᯒ᯲ᯅᯞᯪᯀᯮᯰ ᯅ ᯔᯇᯬᯒᯘᯮ᯲ ᯔ ᯂᯬ ᯖᯮ ᯞᯬᯅᯮ ᯉ ᯔᯑᯮᯔ ᯖᯮ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲

I ma didok Datu Bolon Paniop Pagar tu si Aji Panungkunan.

ᯤ ᯔ ᯑᯪᯑᯂᯬ᯲ ᯑᯖᯮ ᯅᯬᯞᯉᯬ᯲ ᯇᯉᯪᯀᯇᯬ᯲ ᯇᯎᯒ᯲ ᯖᯮ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Ia nunga potang ari, ba di bagas ni Datu Bolon i ma si Aji Panungkunan bodarina i mangan; disi ma ibana marborngin. 

ᯤᯀ ᯉᯮᯝ ᯇᯬᯖᯰ ᯀᯒᯪ ᯅ ᯑᯪ ᯅᯎᯘ᯲ ᯉᯪ ᯑᯖᯮ ᯅᯬᯞᯉᯬ᯲ ᯤ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯅᯬᯑᯒᯪᯉ ᯤ ᯔᯝᯉ᯲ ᯑᯪᯘᯪ ᯔ ᯤᯅᯉ ᯔᯒ᯲ᯅᯒᯬ᯲ᯝᯉᯪ᯲

Manogotna i dung torang ari mulak ma ibana tu hutana.

ᯔᯉᯬᯎᯖᯬ᯲ᯉ ᯤ ᯑᯮᯰ ᯖᯬᯒᯰ ᯀᯒᯪ ᯔᯮᯞᯂ᯲ ᯔ ᯤᯅᯉ ᯖᯮ ᯂᯮᯖᯉ

 Dung sahat si Aji Panungkunan tu huta, ro ma Raja Parbaliung didok ma tu ibana, Songon na leleng do ho di pardalanan, ale Aji Panungkunan! Na sian dia do ho? ninna.

ᯑᯮᯰ ᯘᯂᯖ᯲ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ᯖᯮ ᯂᯮᯖ ᯒᯬ ᯔ ᯒᯐ ᯇᯒ᯲ᯅᯞᯪᯀᯮᯰ ᯑᯪᯑᯂᯬ᯲ ᯔ ᯖᯮ ᯤᯅᯉ ᯘᯬᯝᯉᯬ᯲ ᯉ ᯞᯩᯞᯰᯩ ᯑᯬ ᯂᯬ ᯑᯪ ᯇᯒ᯲ᯑᯞᯉᯉ᯲ ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲ ᯉ ᯘᯪᯁᯉ᯲ ᯑᯪᯀ ᯑᯬ ᯂᯬ ᯉᯉᯪ᯲ᯉ

Na mardalani do rajanami mamereng hau sitabaon dohot hotang sirintahon tu harangan an! ninna si Aji Panungkunan mangalusi.

ᯉ ᯔᯒ᯲ᯑᯞᯉᯪ ᯑᯬ ᯒᯐᯉᯔᯪ ᯔᯔᯩᯒᯰᯩ ᯂᯥ ᯘᯪᯖᯅᯀᯉᯬ᯲ ᯑᯬᯂᯖᯬ᯲ ᯂᯬᯖᯰ ᯘᯪᯒᯉᯪ᯲ᯖᯂᯉᯬ᯲ ᯖᯮᯂᯝᯉ᯲ ᯀᯉ᯲ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯔᯝᯞᯮᯘᯪ

Dung sahat ibana di bagasnasida, didok inana ma, Nunga ro Raja Parbaliung nangkin tu bagasta on, ale amang Aji Panungkunan, laho manungkun ho manang na tu dia do ho lao. 

ᯑᯮᯰ ᯘᯂᯖ᯲ ᯤᯅᯉ ᯑᯪ ᯅᯎᯘ᯲ᯉᯘᯪᯑ ᯑᯪᯑᯂᯬ᯲ ᯤᯉᯉ ᯔ ᯉᯮᯝ ᯒᯬ ᯒᯐ ᯇᯒ᯲ᯅᯞᯪᯀᯮᯰ ᯉᯰᯂᯉᯪ᯲ ᯖᯮ ᯅᯎᯘ᯲ᯖ ᯀᯉᯬ᯲ ᯀᯞᯩ ᯀᯔᯰ ᯀᯐᯪ ᯇᯉᯮᯰᯂᯮᯉᯉ᯲ ᯞᯂᯬ ᯔᯉᯮᯰᯂᯉᯮ᯲ ᯂᯬ ᯔᯉᯰ ᯉ ᯖᯮ ᯑᯪᯀ ᯑᯬ ᯂᯬ ᯞᯂᯬ

Manatmanat ho amang hasian!

ᯔᯒ᯲ᯔᯉᯖ᯲ ᯂᯬ ᯀᯔᯰ ᯂᯘᯪᯀᯉ᯲

Beha do nian, nunga pajumpang ho dohot Datu Bolon Paniop Pagar i? 

ᯅᯩᯂ ᯑᯬ ᯉᯪᯀᯉ᯲ ᯉᯮᯝ ᯇᯐᯔᯮ᯲ᯇᯰ ᯂᯬ ᯑᯬᯂᯖᯬ᯲ ᯑᯖᯮ ᯅᯬᯞᯉᯬ᯲ ᯇᯉᯪᯀᯇᯬ᯲ ᯇᯎᯒ᯲ ᯤ

Nunga pajumpang ahu tutu, ale inang, dohot Datu Bolon i.

ᯉᯮᯝ ᯇᯐᯔᯮ᯲ᯇᯰ ᯀᯂᯮ ᯖᯮᯖᯮ ᯀᯞᯩ ᯤᯉᯰ ᯑᯬᯂᯖᯬ᯲ ᯑᯖᯮ ᯅᯬᯞᯉᯬ᯲ ᯤ

Mansai burju do ibana, nunga dipaboa sude tu ahu. 

ᯔᯉ᯲ᯘᯤ ᯅᯒᯮ᯲ᯐᯮ ᯑᯬ ᯤᯅᯉ ᯉᯮᯝ ᯑᯪᯇᯅᯬᯀ ᯘᯮᯑᯩ ᯖᯮ ᯀᯂᯮ

Didok do tu ahu songon na nidokmi, asa manat-manat ahu, jala bisuk marroha! ninna si Aji Panungkunan.

ᯑᯪᯑᯂᯬ᯲ ᯑᯬ ᯖᯮ ᯀᯂᯮ ᯘᯬᯝᯉᯬ᯲ ᯉ ᯉᯪᯑᯂᯬ᯲ᯔᯪ ᯀᯘ ᯔᯉᯖ᯲ᯔᯉᯖ᯲ ᯀᯂᯮ ᯐᯞ ᯅᯪᯘᯂᯮ᯲ ᯔᯒ᯲ᯒᯬᯂ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Nunga denggan i tutu amang. Sai pir ma tondim! ninna inana i.

ᯉᯮᯑ ᯑᯰᯩᯎᯉ᯲ ᯤ ᯖᯮᯖᯮ ᯀᯔᯰ ᯘᯤ ᯇᯒᯪ᯲ ᯔ ᯖᯉᯬ᯲ᯑᯔᯪ᯲ ᯉᯉᯪ᯲ᯉ ᯤᯉᯉ ᯤ