ᯖᯮᯒᯪᯖᯮᯪᯀᯉ᯲ ᯉᯪ ᯘᯪ ᯀᯐᯪ ᯇᯉᯰᯮᯄ᯦ᯮᯉᯉ᯲ Turi-turian ni si Aji Panungkunan Turpuk Pasampulusadahon (Pangke Android)

Anggo Raja Parbaliung nunga sai mohop rohana. 

ᯀᯰᯎᯬ ᯒᯐ ᯇᯒ᯲ᯅᯞᯪᯀᯮᯰ ᯉᯮᯝ ᯘᯤ ᯔᯬᯂᯇᯬ᯲ ᯒᯬᯂᯉ

Nunga mate muse antong donganna Datu Pamurnas, parmatena pe mansai lea.

ᯉᯮᯝ ᯔᯖᯩ ᯔᯮᯘᯩ ᯀᯉ᯲ᯖᯬᯰ ᯑᯬᯝᯉ᯲ᯉ ᯑᯖᯮ ᯇᯔᯒᯮ᯲ᯉᯘ᯲ ᯇᯒ᯲ᯔᯖᯩᯉ ᯇᯩ ᯔᯉ᯲ᯘᯤ ᯞᯩᯀ

Hape si Aji Panungkunan on sai hipas dope. 

ᯂᯇᯩ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯀᯉᯬ᯲ ᯘᯤ ᯂᯪᯇᯘ᯲ ᯑᯬᯇᯩ

Nunga diihot di harangan, hape dipalua pangisi ni huta Lumban Namaduma. 

ᯉᯮᯝ ᯑᯪᯤᯂᯖᯬ᯲ ᯑᯪ ᯂᯒᯝᯉ᯲ ᯂᯇᯩ ᯑᯪᯇᯞᯮᯀ ᯇᯝᯪᯘᯪ ᯉᯪ ᯂᯮᯖ ᯞᯔᯮ᯲ᯅᯉ᯲ ᯉᯔᯑᯮᯔ

Ba nunga diluahon homang, hape bolas mulak tu huta.

ᯅ ᯉᯮᯝ ᯑᯪᯞᯮᯀᯂᯉᯬ᯲ ᯂᯬᯔᯰ ᯂᯇᯩ ᯅᯬᯞᯘ᯲ ᯔᯮᯞᯂ᯲ ᯖᯮ ᯂᯮᯖ

Dung i sai dilului ma dalan laho mangago si Aji Panungkunan.

ᯑᯮᯰ ᯤ ᯘᯤ ᯑᯪᯞᯮᯞᯮᯤ ᯔ ᯑᯞᯉ᯲ ᯞᯂᯬ ᯔᯝᯎᯬ ᯘᯪ ᯀᯝᯪ ᯇᯉᯮᯰᯂᯮᯉᯉ᯲

Di na sadari dipaboa pangisi ni huta i ma, naung sun gadong nasida dibarungkas angka aili. 

ᯑᯪ ᯉ ᯘᯑᯒᯪ ᯑᯪᯇᯅᯬᯀ ᯇᯝᯪᯘᯪ ᯉᯪ ᯂᯮᯖ ᯤ ᯔ ᯉᯀᯮᯰ ᯘᯉᯮ᯲ ᯎᯑᯰᯬ ᯉᯘᯪᯑ ᯑᯪᯅᯒᯮᯰᯂᯘ᯲ ᯀᯰᯂ ᯀᯤᯞᯪ

Jadi dung dibege Raja Parbaliung na pinaboa ni pangisi ni huta i, dapot ibana ma antong angkal na jahat, laho pamatehon si Aji Panungkunan.

ᯐᯑᯪ ᯑᯮᯰ ᯑᯪᯅᯩᯎᯩ ᯒᯐ ᯇᯒ᯲ᯅᯞᯪᯀᯮᯰ ᯉ ᯇᯪᯉᯅᯬᯀ ᯉᯪ ᯇᯝᯪᯘᯪ ᯉᯪ ᯂᯮᯖ ᯤ ᯑᯇᯖᯬ᯲ ᯤᯅᯉ ᯔ ᯀᯉ᯲ᯖᯰᯬ ᯀᯰᯂᯞ᯲ ᯉ ᯐᯂᯖ᯲ ᯞᯂᯬ ᯇᯔᯖᯩᯂᯉᯬ᯲ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Dihara raja i ma pangisi ni huta i marburu angka aili i. 

ᯑᯪᯂᯒ ᯒᯐ ᯤ ᯔ ᯇᯝᯪᯘᯪ ᯉᯪ ᯂᯮᯖ ᯤ ᯔᯒ᯲ᯅᯮᯒᯮ ᯀᯰᯂ ᯀᯤᯞᯪ ᯤ

Jadi masiboan bodilna be ma nasida, masiboan hujurna. 

ᯐᯑᯪ ᯔᯘᯪᯅᯬᯀᯉ᯲ ᯅᯬᯑᯞᯪ᯲ᯉ ᯅᯩ ᯔ ᯉᯘᯪᯑ ᯔᯘᯪᯅᯬᯀᯉ᯲ ᯂᯮᯐᯒᯮ᯲ᯉ

Dung sahat nasida di sada rura hatubuan ni ramba poso, diida nasida ma tutu bogas ni angka aili i.

ᯑᯮᯰ ᯘᯂᯖ᯲ ᯉᯘᯪᯑ ᯑᯪ ᯘᯑ ᯒᯮᯒ ᯂᯖᯮᯅᯮᯀᯉ᯲ ᯉᯪ ᯒᯔ᯲ᯅ ᯇᯬᯘᯬ ᯑᯪᯤᯑ ᯉᯘᯪᯑ ᯔ ᯖᯮᯖᯮ ᯅᯬᯎᯘ᯲ ᯉᯪ ᯀᯰᯂ ᯀᯤᯞᯪ

Nunga di ramba poso on angka aili i nuaeng! ninna raja i, tahaliangi ma rura on, sapunguan ma tu dolok an, sapunguan tu hasundutan, sapunguan tu habinsaran, ba sapunguan ma dison.

ᯉᯮᯝ ᯑᯪ ᯒᯔ᯲ᯅ ᯇᯬᯘᯬ ᯀᯉᯬ᯲ ᯀᯰᯂ ᯀᯤᯞᯪ ᯤ ᯉᯮᯀᯀᯰᯩ ᯉᯉᯪ᯲ᯉ ᯒᯐ ᯤ ᯖᯂᯞᯪᯀᯝᯪ ᯔ ᯒᯮᯒ ᯀᯉᯬ᯲ ᯘᯇᯮᯝᯮᯀᯉ᯲ ᯔ ᯖᯮ ᯑᯬᯞᯂᯬ᯲ ᯀᯉ᯲ ᯘᯇᯮᯝᯮᯀᯉ᯲ ᯖᯮ ᯂᯘᯉᯮ᯲ᯑᯮᯖᯉ᯲ ᯘᯇᯮᯝᯮᯀᯉ᯲ ᯖᯮ ᯂᯅᯉᯪ᯲ᯘᯒᯉ᯲ ᯅ ᯘᯇᯮᯝᯮᯀᯉ᯲ ᯔ ᯑᯪᯘᯉᯬ᯲

Dang bolas marhehe sian on, so jolo sahat na di dolok an!

ᯑᯰ ᯅᯬᯞᯘ᯲ ᯔᯒ᯲ᯂᯩᯂᯩ ᯘᯪᯀᯉ᯲ ᯀᯉᯬ᯲ ᯘᯬ ᯐᯬᯞᯬ ᯘᯂᯖ᯲ ᯉ ᯑᯪ ᯑᯬᯞᯂᯬ᯲ ᯀᯉ᯲

Tinggal ma raja i di inganan i rap dohot angka donganna sapunguan; disi ma nang si Aji Panungkunan.

ᯖᯰᯪᯎᯞ᯲ ᯔ ᯒᯐ ᯤ ᯑᯪ ᯤᯝᯉᯉ᯲ ᯤ ᯒᯇ᯲ ᯑᯬᯂᯖᯬ᯲ ᯀᯰᯂ ᯑᯬᯝᯉ᯲ᯉ ᯘᯇᯮᯝᯮᯀᯉ᯲ ᯑᯪᯘᯪ ᯔ ᯉᯰ ᯘᯪ ᯀᯐᯪ 

Dung sahat punguan na borhat tu ginjang an, manggora ma nasida sian dolok i. 

ᯑᯮᯰ ᯘᯂᯖ᯲ ᯇᯮᯝᯮᯀᯉ᯲ ᯉ ᯅᯒᯬ᯲ᯂᯖ᯲ ᯖᯮ ᯎᯉᯪ᯲ᯐᯰ ᯀᯉ᯲ ᯔᯰᯎᯬᯒ ᯔ ᯉᯘᯪᯑ ᯘᯪᯀᯉ᯲ ᯑᯬᯞᯂᯬ᯲ ᯤ

Disi pe asa borhat raja i rap dohot angka donganna dohot si Aji Panungkunan sian toru i, pajujuhon angka biang parburu tu ramba poso i.

ᯑᯪᯘᯪ ᯇᯩ ᯀᯘ ᯅᯒᯬ᯲ᯂᯖ᯲ ᯒᯐ ᯤ ᯒᯇ᯲ ᯑᯬᯂᯖᯬ᯲ ᯀᯰᯂ ᯑᯬᯝᯉ᯲ᯉ ᯑᯬᯂᯖᯬ᯲ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯘᯪᯀᯉ᯲ ᯖᯬᯒᯮ ᯤ ᯇᯐᯮᯐᯮᯂᯉᯬ᯲ ᯀᯰᯂ ᯅᯪᯀᯰ ᯇᯒ᯲ᯅᯮᯒᯮ ᯖᯮ ᯒᯔ᯲ᯅ ᯇᯬᯘᯬ ᯤ

Manggorai ma nasida asa unang mabiar angka biang i, alai asa lam tamba garangna mangihuthon bogas ni angka aili i. 

ᯔᯰᯎᯬᯒᯤ ᯔ ᯉᯘᯪᯑ ᯀᯘ ᯥᯉᯰ ᯔᯅᯪᯀᯒ᯲ ᯀᯰᯂ ᯅᯪᯀᯰ ᯤ ᯀᯞᯤ ᯀᯘ ᯞᯔ᯲ ᯖᯔ᯲ᯅ ᯎᯒᯰᯉ ᯔᯝᯪᯂᯖᯮ᯲ᯂᯉᯬ᯲ ᯅᯬᯎᯘ᯲ ᯉᯪ ᯀᯰᯂ ᯀᯤᯞᯪ ᯤ

Manggorai ma antong nasida sian ginjang an, sian hasundutan, sian habinsaran. 

ᯔᯰᯎᯬᯒᯤ ᯔ ᯀᯉ᯲ᯖᯰᯬ ᯉᯘᯪᯑ ᯘᯪᯀᯉ᯲ ᯎᯉᯪ᯲ᯐᯰ ᯀᯉ᯲ ᯘᯪᯀᯉ᯲ ᯂᯘᯉᯮ᯲ᯑᯮᯖᯉ᯲ ᯘᯪᯀᯉ᯲ ᯂᯅᯉᯪ᯲ᯘᯒᯉ᯲

Dung i sai mangkulingi ma angka biang i, ai nunga dapot dianggo angka bogas na rata.

ᯑᯮᯰ ᯤ ᯘᯤ ᯔᯰᯂᯮᯞᯪᯝᯪ ᯔ ᯁᯰᯂ ᯅᯪᯀᯰ ᯤ ᯀᯤ ᯉᯮᯝ ᯑᯇᯖᯬ᯲ ᯑᯪᯀᯰᯎᯬ ᯀᯰᯂ ᯅᯬᯎᯘ᯲ ᯉ ᯒᯖ

Ia laho angka aili i dompak habinsaran, nunga sai diihuthon biang i huhut sai marlakang-lakang; ba manggorai ma punguan na sian habinsaran i, gabe dompak dolok ma muse maporus angka aili i.

ᯤᯀ ᯞᯂᯬ ᯀᯰᯂ ᯀᯤᯞᯪ ᯤ ᯑᯔᯬ᯲ᯇᯂ᯲ ᯂᯅᯉᯪ᯲ᯘᯒᯉ᯲ ᯉᯮᯝ ᯘᯤ ᯑᯪᯤᯂᯖᯮ᯲ᯂᯉᯬ᯲ ᯅᯪᯀᯰ ᯤ ᯂᯮᯂᯖᯮ᯲ ᯘᯤ ᯔᯒ᯲ᯞᯂᯰᯞᯂᯰ ᯅ ᯔᯰᯎᯬᯒᯤ ᯔ ᯇᯮᯝᯮᯀᯉ᯲ ᯤ ᯉ ᯘᯪᯀᯉ᯲ ᯂᯅᯉᯪ᯲ᯘᯒᯉ᯲ ᯤ ᯎᯅᯩ ᯑᯔᯬ᯲ᯇᯂ᯲ ᯑᯬᯞᯂᯬ᯲ ᯔ ᯔᯮᯘᯩ ᯔᯇᯬᯒᯘᯮ᯲ ᯀᯰᯂ ᯀᯤᯞᯪ ᯤ

Ia nunga dibege punguan na di dolok i soara ni biang i dompak nasida, manggorai ma nasida, jadi laho ma angka aili i maporus dompak hasundutan. 

ᯤᯀ ᯉᯮᯝ ᯑᯪᯅᯩᯎᯩ ᯇᯮᯝᯮᯀᯉ᯲ ᯉ ᯑᯪ ᯑᯬᯞᯂᯬ᯲ ᯤ ᯘᯬᯀᯒ ᯉᯪ ᯅᯪᯀᯰ ᯤ ᯑᯔᯬ᯲ᯇᯂ᯲ ᯉᯘᯪᯑ ᯔᯰᯎᯬᯒᯤ ᯔ ᯉᯘᯪᯑ ᯐᯑᯪ ᯞᯂᯬ ᯔ ᯀᯰᯂ ᯀᯤᯞᯪ ᯤ ᯔᯇᯬᯒᯘᯮ᯲ ᯑᯔᯬ᯲ᯇᯂ᯲ ᯂᯘᯉᯮ᯲ᯑᯮᯖᯉ᯲

Ia laho angka aili i maporus dompak hasundutan, ba manggorai ma punguan na disi, jadi tuat ma angka aili i tu toru.

ᯤᯀ ᯞᯂᯬ ᯀᯰᯂ ᯀᯤᯞᯪ ᯤ ᯔᯇᯬᯒᯘᯮ᯲ ᯑᯔᯬ᯲ᯇᯂ᯲ ᯂᯘᯉᯮ᯲ᯑᯮᯖᯉ᯲ ᯅ ᯔᯰᯎᯬᯒᯤ ᯔ ᯇᯮᯝᯮᯀᯉ᯲ ᯉ ᯑᯪᯘᯪ ᯐᯑᯪ ᯖᯮᯀᯖ᯲ ᯔ ᯀᯰᯂ ᯀᯤᯞᯪ ᯤ ᯖᯮ ᯖᯬᯒᯮ

Sai songon i ma marhationg-hationg angka aili i di ramba poso i, huhut sai lam masuk ma angka parburu i tu bagasan ramba i, asa lam sompit parlojongan ni aili i. 

ᯘᯤ ᯘᯬᯝᯉᯬ᯲ ᯤᯔ ᯔᯒ᯲ᯂᯖᯪᯀᯰᯬᯂᯖᯪᯀᯰᯬ ᯀᯰᯂ ᯀᯤᯞᯪ ᯤ ᯑᯪ ᯒᯔ᯲ᯅ ᯇᯬᯘᯬ ᯤ ᯂᯮᯂᯖᯮ᯲ ᯘᯤ ᯞᯔ᯲ ᯔᯘᯂᯮ᯲ ᯔ ᯀᯰᯂ ᯇᯒ᯲ᯅᯮᯒᯮ ᯤ ᯖᯮ ᯅᯎᯘᯉ᯲ ᯒᯔ᯲ᯅ ᯤ ᯀᯘ ᯞᯔ᯲ ᯘᯔᯬ᯲ᯇᯖᯪ᯲ ᯇᯒ᯲ᯞᯬᯐᯬᯝᯉ᯲ ᯉᯪ ᯀᯤᯞᯪ ᯤ

Dung i mura ma dapot hujuron ni sitiop hujur, dapot bodilon ni parbodil.

ᯑᯮᯰ ᯤ ᯔᯮᯒ ᯔ ᯑᯇᯖᯬ᯲ ᯂᯮᯐᯮᯒᯉᯬ᯲ ᯉᯪ ᯘᯪᯖᯪᯀᯇᯬ᯲ ᯂᯮᯐᯒᯮ᯲ ᯑᯇᯖᯬ᯲ ᯅᯬᯑᯪᯞᯉᯬ᯲ ᯉᯪ ᯇᯒ᯲ᯅᯬᯑᯞᯪ᯲

Anggo Raja Parbaliung nunga sai ditiop bodilna laho mamingkas, huhut ma sai disuruhi ramba i. 

ᯀᯰᯎᯬ ᯒᯐ ᯇᯒ᯲ᯅᯞᯪᯀᯮᯰ ᯉᯮᯝ ᯘᯤ ᯑᯪᯖᯪᯀᯇᯬ᯲ ᯅᯬᯑᯞᯪ᯲ᯉ ᯞᯂᯬ ᯔᯔᯰᯪᯂᯘ᯲ ᯂᯮᯂᯖᯮ᯲ ᯔ ᯘᯤ ᯑᯪᯘᯮᯒᯮᯂᯪ ᯒᯔ᯲ᯅ ᯤ

Alai sai dituntun ma tar jonok ibana, di pudi ni si Aji Panungkunan.

ᯀᯞᯤ ᯘᯤ ᯑᯪᯖᯉᯮ᯲ᯖᯉᯮ᯲ ᯔ ᯖᯒ᯲ ᯐᯬᯉᯂᯬ᯲ ᯤᯅᯉ ᯑᯪ ᯇᯮᯑᯪ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Nunga ro angka aili i maporus dompak nasida; ndang manggora be punguan nasida. 

ᯉᯮᯝ ᯒᯬ ᯀᯰᯂ ᯀᯤᯞᯪ ᯤ ᯔᯇᯬᯒᯘᯮ᯲ ᯑᯔᯬ᯲ᯇᯂ᯲ ᯉᯘᯪᯑ ᯀᯉᯪ᯲ᯑᯰ ᯔᯰᯎᯬᯒ ᯅᯩ ᯇᯮᯝᯮᯘᯉ᯲ ᯉᯘᯪᯑ

Monggop be ma nasida masitiop bodilna, masitiop hujurna.

ᯔᯰᯬᯎᯇᯬ᯲ ᯅᯩ ᯔ ᯉᯘᯪᯑ ᯔᯘᯪᯖᯪᯀᯇᯬ᯲ ᯅᯬᯑᯞᯪ᯲ᯉ ᯔᯘᯪᯖᯪᯀᯇᯬ᯲ ᯂᯮᯐᯒᯮ᯲ᯉ

Toho ma si Aji Panungkunan mamereng dompak pudi ; diida ma nunga dompak ibana bodil ni Raja Parbaliung ditujuhon. 

ᯖᯬᯂᯬ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯔᯔᯩᯒᯰᯩ ᯑᯔᯬ᯲ᯇᯂ᯲ ᯇᯮᯑᯪ ᯑᯪᯤᯑ ᯔ ᯉᯮᯝ ᯑᯔᯬ᯲ᯇᯂ᯲ ᯤᯅᯉ ᯅᯬᯑᯇᯪ᯲ ᯉᯪ ᯒᯐ ᯇᯒ᯲ᯅᯞᯪᯀᯮᯰ ᯑᯪᯖᯮᯐᯮᯂᯉᯬ᯲

Angka aili pe nunga ro dompak nasida maporus nilele ni angka biang parburu naung lam sikar antong mangalek, ai nunga sai dianggo uap ni aili na jonok i.

ᯀᯰᯂ ᯀᯤᯞᯪ ᯇᯩ ᯉᯮᯝ ᯒᯬ ᯑᯔᯬ᯲ᯇᯂ᯲ ᯉᯘᯪᯑ ᯔᯇᯬᯒᯘᯮ᯲ ᯉᯪᯞᯩᯞᯩ ᯉᯪ ᯀᯰᯂ ᯅᯪᯀᯰ ᯇᯒ᯲ᯅᯮᯒᯮ ᯉᯀᯮᯰ ᯞᯔ᯲ ᯘᯪᯂᯒ᯲ ᯀᯉ᯲ᯖᯰᯬ ᯔᯝᯞᯂᯩ᯲ ᯀᯤ ᯉᯮᯝ ᯘᯤ ᯑᯪᯀᯰᯎᯬ ᯥᯀᯇ᯲ ᯉᯪ ᯀᯤᯞᯪ ᯉ ᯐᯬᯉᯂᯬ᯲ ᯤ

Tompu ma unduk si Aji Panungkunan laos ditungkaphon dirina tu tano i; satongkin nari tarbege ma soara ni bodil ni Raja Parbaliung mardobur dibingkas.

ᯖᯔᯬ᯲ᯇᯮ ᯔ ᯀᯉᯮ᯲ᯑᯂᯮ᯲ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯞᯀᯘᯬ᯲ ᯑᯪᯖᯮᯰᯂᯇ᯲ᯂᯉᯬ᯲ ᯑᯪᯒᯪᯉ ᯖᯮ ᯖᯉᯬ ᯤ ᯘᯖᯰᯬᯂᯉᯪ᯲ ᯉᯒᯪ ᯖᯒ᯲ᯅᯩᯎᯩ ᯔ ᯘᯬᯀᯒ ᯉᯪ ᯅᯬᯑᯞᯪ᯲ ᯉᯪ ᯒᯐ ᯇᯒ᯲ᯅᯞᯪᯀᯮᯰ ᯔᯒ᯲ᯑᯬᯅᯒᯮ᯲ ᯑᯪᯅᯰᯪᯂᯘ᯲

Dapot do ale? ninna punguan na di habinsaran marsurak laho manungkun.

ᯑᯇᯖᯬ᯲ ᯑᯬ ᯀᯞᯩ ᯉᯉᯪ᯲ᯉ ᯇᯮᯝᯮᯀᯉ᯲ ᯉ ᯑᯪ ᯂᯅᯉᯪ᯲ᯘᯒᯉ᯲ ᯔᯒ᯲ᯘᯮᯒᯂ᯲ ᯞᯂᯬ ᯔᯉᯮᯰᯂᯉᯮ᯲

Ambat ma disi, nunga ro! ninna punguan na di toru i mangalusi, ai dibege nunga dompak habinsaran maporus angka aili i.

ᯀᯔ᯲ᯅᯖ᯲ ᯔ ᯑᯪᯘᯪ ᯉᯮᯝ ᯒᯬ ᯉᯉᯪ᯲ᯉ ᯇᯮᯝᯮᯀᯉ᯲ ᯉ ᯑᯪ ᯖᯬᯒᯮ ᯤ ᯔᯝᯞᯮᯘᯪ ᯀᯤ ᯑᯪᯅᯩᯎᯩ ᯉᯮᯝ ᯑᯔᯬ᯲ᯇᯂ᯲ ᯂᯅᯉᯪ᯲ᯘᯒᯉ᯲ ᯔᯇᯬᯒᯘᯮ᯲ ᯀᯰᯂ ᯀᯤᯞᯪ ᯤ

Anggo Raja Parbaliung nunga laho marlojongi sian inganan pamingkasan bodilna i; dipaula ma dohot manggorai. 

ᯀᯰᯎᯬ ᯒᯐ ᯇᯒ᯲ᯅᯞᯪᯀᯮᯰ ᯉᯮᯝ ᯞᯂᯬ ᯔᯒ᯲ᯞᯬᯐᯬᯝᯪ ᯘᯪᯀᯉ᯲ ᯤᯝᯉᯉ᯲ ᯇᯔᯰᯪᯂᯘᯉ᯲ ᯅᯬᯑᯞᯪ᯲ᯉ ᯤ ᯑᯪᯇᯥᯞ ᯔ ᯑᯬᯂᯖᯬ᯲ ᯔᯰᯎᯬᯒᯤ

Hape molo dung arina sai ingkon tardapot, dang diida raja i jala dang diparrohahon, naung sai jongjong do si Paralamat, anggi ni ulubalang Partahan Soaloon, di pudina; ndang pola sadia dao diondingi sampilpil na potpot. 

ᯂᯇᯩ ᯔᯬᯞᯬ ᯑᯮᯰ ᯀᯒᯪᯉ ᯘᯤ ᯀᯰᯪᯂᯉᯬ᯲ ᯖᯒ᯲ᯑᯇᯖᯬ᯲ ᯑᯰ ᯑᯪᯤᯑ ᯒᯐ ᯤ ᯐᯞ ᯑᯰ ᯑᯪᯇᯒ᯲ᯒᯬᯂᯂᯉᯬ᯲ ᯉᯀᯮᯰ ᯘᯤ ᯐᯰᯬᯐᯰᯬ ᯑᯬ ᯘᯪ ᯇᯒᯞᯔᯖ᯲ ᯀᯰᯎᯪ ᯉᯪ ᯥᯞᯮᯅᯞᯰ ᯇᯒ᯲ᯖᯂᯉ᯲ ᯘᯬᯀᯞᯬᯀᯉᯬ᯲ ᯑᯪ ᯇᯮᯑᯪᯉ ᯀᯉᯪ᯲ᯑᯰ ᯇᯬᯞ ᯘᯑᯪᯀ ᯑᯀᯬ ᯑᯪᯀᯉᯬ᯲ᯑᯪᯝᯪ ᯘᯔ᯲ᯇᯞᯪ᯲ᯇᯞᯪ᯲ ᯉ ᯇᯖᯬ᯲ᯇᯖᯬ᯲

Ai songon na asing-asing diida ibana pardalan ni Raja Parbaliung nang sian mulana marhehe nasida sian toru an.

ᯀᯤ ᯘᯬᯝᯉᯬ᯲ ᯉ ᯀᯘᯰᯪᯀᯘᯰᯪ ᯑᯪᯤᯑ ᯤᯅᯉ ᯇᯒ᯲ᯑᯞᯉ᯲ ᯉᯪ ᯒᯐ ᯇᯒ᯲ᯅᯞᯪᯀᯮᯰ ᯉᯰ ᯘᯪᯀᯉ᯲ ᯔᯮᯞᯉ ᯔᯒ᯲ᯂᯩᯂᯩ ᯉᯘᯪᯑ ᯘᯪᯀᯉ᯲ ᯖᯬᯒᯮ ᯀᯉ᯲

Sai dipapudi-pudi, dituntun sai di jolona si Aji Panungkunan.

ᯘᯤ ᯑᯪᯇᯇᯮᯑᯪᯇᯮᯑᯪ ᯑᯪᯖᯉᯮ᯲ᯖᯉᯮ᯲ ᯘᯤ ᯑᯪ ᯐᯬᯞᯬᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Nunga dapot antong diida ibana nangkin manang piga hali ma dieteng Raja Parbaliung dompak si Aji Panungkunan, hape di ginjang an do angka biang mangeak aili i.

ᯉᯮᯝ ᯑᯇᯖᯬ᯲ ᯀᯉ᯲ᯖᯰᯬ ᯑᯪᯤᯑ ᯤᯅᯉ ᯉᯰᯂᯉᯪ᯲ ᯔᯉᯰ ᯇᯪᯎ ᯂᯞᯪ ᯔ ᯑᯪᯀᯩᯖᯰᯩ ᯒᯐ ᯇᯒ᯲ᯅᯞᯪᯀᯮᯰ ᯑᯔᯬ᯲ᯇᯂ᯲ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯂᯇᯩ ᯑᯪ ᯎᯉᯪ᯲ᯐᯰ ᯀᯉ᯲ ᯑᯬ ᯀᯰᯂ ᯅᯪᯀᯰ ᯔᯝᯩᯀᯂ᯲ ᯀᯤᯞᯪ ᯤ

Jadi sai bukbak ma taroktokna mangida na masa i.

ᯐᯑᯪ ᯘᯤ ᯅᯂᯮ᯲ᯅᯂ᯲ ᯔ ᯖᯒᯂᯬ᯲ᯖᯂᯬ᯲ᯉ ᯔᯝᯪᯑ ᯉ ᯔᯘ ᯤ

Asa dung bingkas bodil ni Raja Parbaliung i, jala nunga laho diida marlojongi dompak hambirang, pintor didapothon si Paralamat ma tu jolo, sai disuruhi ramba i.

ᯀᯘ ᯑᯮᯰ ᯅᯰᯪᯂᯘ᯲ ᯅᯬᯑᯞᯪ᯲ ᯉᯪ ᯒᯐ ᯇᯒ᯲ᯅᯞᯪᯁᯮᯰ ᯤ ᯐᯞ ᯉᯮᯝ ᯞᯂᯬ ᯑᯪᯤᯑ ᯔᯒ᯲ᯞᯬᯐᯬᯝᯪ ᯑᯔᯬ᯲ᯇᯂ᯲ ᯂᯔ᯲ᯅᯪᯒᯰ ᯇᯉᯪ᯲ᯖᯒᯬ᯲ ᯑᯪᯑᯇᯖᯬ᯲ᯂᯉᯬ᯲ ᯘᯪ ᯇᯒᯞᯔᯖ᯲ ᯔ ᯖᯮ ᯐᯬᯞᯬ ᯘᯤ ᯑᯪᯘᯮᯒᯮᯂᯪ ᯒᯔ᯲ᯅ ᯤ

Dung i diida ma si Aji Panungkunan tungkap di tano i

ᯑᯮᯰ ᯤ ᯑᯪᯤᯑ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯖᯮᯰᯂᯇ᯲ ᯑᯪ ᯖᯉᯬ ᯤ

Anggo didok rohana naung mate do hona dibahen bodil i. 

ᯀᯰᯎᯬ ᯑᯪᯑᯂᯬ᯲ ᯒᯬᯂᯉ ᯉᯀᯮᯰ ᯔᯖᯩ ᯑᯬ ᯂᯬᯉ ᯑᯪᯅᯂᯉᯩ᯲ ᯅᯬᯑᯎᯪ᯲ ᯤ

Alai dung diida dang adong mudar di daging ni si Aji Ranungkunan, pos ma rohana, na so hona do ibana.

ᯀᯞᯤ ᯑᯮᯰ ᯑᯪᯤᯑ ᯑᯰ ᯀᯑᯰᯬ ᯔᯮᯑᯒ᯲ ᯑᯪ ᯑᯎᯰᯪ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯇᯘᯬ᯲ ᯔ ᯒᯬᯂᯉ ᯉ ᯘᯬ ᯂᯬᯉ ᯑᯬ ᯤᯅᯉ

Dipahusor ma bohi ni si Aji Panungkunan, nunga tutu langanlangan bohina, songon mare-mare na pinaspas.

ᯑᯪᯇᯂᯮᯘᯒᯬ᯲ ᯔ ᯅᯬᯂᯪ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯉᯮᯝ ᯖᯮᯖᯮ ᯞᯝᯉ᯲ᯞᯝᯉ᯲ ᯅᯬᯂᯪᯉ ᯘᯬᯝᯉᯬ᯲ ᯔᯒᯩᯔᯒᯩ ᯉ ᯇᯪᯉᯘ᯲ᯇᯘ᯲

Pir ma tondim ale Aji Panungkunan, mangolu do ho hape. 

ᯇᯒᯪ᯲ ᯔ ᯖᯉᯬ᯲ᯑᯔᯪ᯲ ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲ ᯔᯝᯬᯞᯮ ᯑᯬ ᯂᯬ ᯂᯇᯩ

Nunga tahi na jahat, tahi ni Raja Parbaliung tu ho. 

ᯉᯮᯝ ᯖᯂᯪ ᯉ ᯐᯂᯖ᯲ ᯖᯂᯪ ᯉᯪ ᯒᯐ ᯇᯒ᯲ᯅᯞᯪᯀᯮᯰ ᯖᯮ ᯂᯬ

Aut hona ho, jala mate, dohononna hian ma, na mardaras do diida di ramba i; dirimpu aili, hape ho do! 

ᯀᯀᯖᯮ᯲ ᯂᯬᯉ ᯂᯬ ᯐᯞ ᯔᯖᯩ ᯑᯬᯂᯬᯉᯉᯬ᯲ᯉ ᯂᯪᯀᯉ᯲ ᯔ ᯉ ᯔᯒ᯲ᯑᯒᯘ᯲ ᯑᯬ ᯑᯪᯤᯑ ᯑᯪ ᯒᯔ᯲ᯅ ᯤ ᯑᯪᯒᯔᯪ᯲ᯇᯮ ᯀᯤᯞᯪ ᯂᯇᯩ ᯂᯬ ᯑᯬ

Na so uhum binahen ni raja on! ninna si Paralamat. 

ᯉ ᯘᯬ ᯥᯂᯔᯮ᯲ ᯅᯪᯉᯂᯉᯩ᯲ ᯉᯪ ᯒᯐ ᯀᯉᯬ᯲ ᯉᯉᯪ᯲ᯉ ᯘᯪ ᯇᯒᯞᯔᯖ᯲

Dung i ditogu ma si Aji Panungkunan.

ᯑᯮᯰ ᯤ ᯑᯪᯖᯬᯎᯮ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Beha nama didok roham, ale amang? Jorbutna i na masa on! ninna si Aji Panungkunan.

ᯅᯩᯂ ᯉᯔ ᯑᯪᯑᯂᯬ᯲ ᯒᯬᯂᯔ᯲ ᯀᯞᯩ ᯀᯔᯰ ᯐᯒᯬ᯲ᯅᯖᯮ᯲ᯉ ᯤ ᯉ ᯔᯘ ᯀᯉᯬ᯲ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮ ᯉᯉ᯲

Maila do raut dang dapotan. Betak dohonon ni Raja Parbaliung do annon, maila bodil ndang dapotan, gabe dilului dalan muse, padalanhon tahina na jahat i. 

ᯔᯤᯞ ᯑᯬ ᯒᯀᯖᯮ᯲ ᯑᯰ ᯑᯇᯬᯖᯉ᯲ ᯅᯩᯖᯂ᯲ ᯑᯬᯂᯬᯉᯉᯬ᯲ ᯉᯪ ᯒᯐ ᯇᯒ᯲ᯅᯞᯪᯀᯮᯰ ᯑᯬ ᯀᯉ᯲ᯉᯉᯬ᯲ ᯔᯤᯞ ᯅᯬᯑᯞᯪ᯲ ᯀᯉᯪ᯲ᯑᯰ ᯑᯇᯬᯖᯉ᯲ ᯎᯅᯩ ᯑᯪᯞᯮᯞᯮᯤ ᯑᯞᯉ᯲ ᯔᯮᯘᯩ ᯇᯑᯞᯉ᯲ᯂᯉᯬ᯲ ᯖᯂᯪᯉ ᯉ ᯐᯂᯖ᯲ ᯤ

Anggo ahu mandok, tung so bolas be ho dison! 

ᯀᯰᯎᯬ ᯀᯂᯮ ᯔᯉ᯲ᯑᯂᯬ᯲ ᯖᯮᯰ ᯘᯬ ᯅᯬᯞᯘ᯲ ᯅᯩ ᯂᯬ ᯑᯪᯘᯉᯬ᯲

Laho ma ho maporus tu Lobu Namaduma, tu Raja Sohuturon Dolok. Paboa ma sude tu raja i.

ᯞᯂᯬ ᯔ ᯂᯬ ᯔᯇᯬᯒᯘᯮ᯲ ᯖᯮ ᯞᯬᯅᯮ ᯉᯔᯑᯮᯔ ᯖᯮ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯇᯅᯬᯀ ᯔ ᯘᯮᯑᯩ ᯖᯮ ᯒᯐ ᯤ

Ahu pe annon, paboaonku ma tu dahahang, Partahan Soaloon.

ᯀᯂᯮ ᯇᯩ ᯀᯉ᯲ᯉᯉᯬ᯲ ᯇᯅᯬᯀᯀᯉᯬ᯲ᯂᯮ ᯔ ᯖᯮ ᯑᯂᯂᯰ ᯇᯒ᯲ᯖᯐᯉ᯲ ᯘᯬᯀᯞᯬᯀᯉᯬ᯲

Ia ro pe ho muse tu hutanta rap dohot Raja Sohuturon Dolok, ba nunga pungu hami angka donganmu. 

ᯤᯀ ᯒᯬ ᯇᯩ ᯂᯬ ᯔᯮᯘᯩ ᯖᯮ ᯂᯮᯖᯉ᯲ᯖ ᯒᯇ᯲ ᯑᯬᯂᯖᯬ᯲ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯅ ᯉᯮᯝ ᯇᯮᯝᯮ ᯂᯔᯪ ᯀᯰᯂ ᯑᯬᯝᯉ᯲ᯔᯮ

Tung na so uhum na binahen ni Raja Parbaliung on!

ᯖᯮᯰ ᯉ ᯘᯬ ᯥᯂᯔᯮ᯲ ᯉ ᯅᯪᯉᯂᯉᯩ᯲ ᯉᯪ ᯒᯐ ᯇᯒ᯲ᯅᯞᯪᯀᯮᯰ ᯀᯉᯬ᯲

Alai hami pe nunga leleng huida hami i. Sai alang roha salelengna on. 

ᯀᯞᯤ ᯂᯔᯪ ᯇᯩ ᯉᯮᯝ ᯞᯩᯞᯰᯩ ᯂᯮᯤᯑ ᯂᯔᯪ ᯤ ᯘᯤ ᯀᯞᯰ ᯒᯬᯂ ᯘᯞᯩᯞᯰᯩ ᯉ ᯀᯉᯬ᯲

Anggo nuaeng do, dung olo Raja Sohuturon Dolok mangondihon ho, ba nunga adong be donganta. 

ᯀᯰᯎᯬ ᯉᯮᯀᯀᯰᯩ ᯑᯬ ᯑᯮᯰ ᯀᯬᯞᯬ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯔᯝᯉᯬ᯲ᯑᯪᯂᯉᯬ᯲ ᯂᯬ ᯅ ᯉᯮᯝ ᯀᯑᯰᯬ ᯅᯩ ᯑᯬᯝᯉ᯲ᯖ

Dang pola be habiaranta Raja Parbaliung. Pos ma roham, borhat ma ho hatop. Sai pirma tondim! ninna si Paralamat .

ᯑᯰ ᯇᯬᯞ ᯅᯩ ᯂᯅᯪᯀᯒᯉ᯲ᯖ ᯒᯐ ᯇᯒ᯲ᯅᯞᯪᯀᯮᯰ ᯇᯘᯬ᯲ ᯔ ᯒᯬᯂᯔ᯲ ᯅᯒᯬ᯲ᯂᯖ᯲ ᯔ ᯂᯬ ᯂᯖᯇᯬ᯲ ᯘᯤ ᯇᯒᯪ᯲ ᯔ ᯖᯉᯬ᯲ᯑᯔᯪ᯲ ᯉᯉᯪ᯲ᯉ ᯘᯪ ᯇᯒᯞᯔᯖ᯲

Nunga lam margogo tutu si Aji Panungkunan, nunga salpu songgotna. 

ᯉᯮᯝ ᯞᯔ᯲ ᯔᯒ᯲ᯎᯬᯎᯬ ᯖᯮᯖᯮ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯉᯮᯝ ᯘᯞ᯲ᯇᯮ ᯘᯰᯬᯎᯖᯬ᯲ᯉ

Hehe ma ibana laho mardalan tu huta ni Raja Sohuturon Dolok.

ᯂᯩᯂᯩ ᯔ ᯤᯅᯉ ᯞᯂᯬ ᯔᯒ᯲ᯑᯞᯉ᯲ ᯖᯮ ᯂᯮᯖ ᯉᯪ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲

Nunga guling ari, jadi maradian ma nasida na marburu aili i; mulak ma nasida tu inganan na parjolo. 

ᯉᯮᯑ ᯎᯮᯞᯰᯪ ᯀᯒᯪ ᯐᯑᯪ ᯔᯒᯑᯪᯀᯉ᯲ ᯔ ᯉᯘᯪᯑ ᯉ ᯔᯒ᯲ᯅᯮᯒᯮ ᯀᯤᯞᯪ ᯤ ᯔᯮᯞᯂ᯲ ᯔ ᯉᯘᯪᯑ ᯖᯮ ᯤᯝᯉᯉ᯲ ᯉ ᯇᯒ᯲ᯐᯬᯞᯬ

Adong do antong dapot lima aili i. Dua ma i na mate dibahen sitiop hujur, jala tolu ma i mate dibahen bodil.

ᯀᯑᯰᯬ ᯑᯬ ᯀᯉ᯲ᯖᯰᯬ ᯑᯇᯖᯬ᯲ ᯞᯪᯔ ᯀᯤᯞᯪ ᯤ ᯑᯮᯀ ᯔ ᯤ ᯉ ᯔᯖᯩ ᯑᯪᯅᯂᯉᯩ᯲ ᯘᯪᯖᯪᯀᯇᯬ᯲ ᯂᯮᯐᯒᯮ᯲ ᯐᯞ ᯖᯬᯞᯮ ᯔ ᯤ ᯔᯖᯩ ᯑᯪᯅᯂᯉᯩ᯲ ᯅᯬᯑᯞᯪ᯲

Ai opat hali hubege pulu bodil, na somal nian sahali pulu ingkon mate ma sada aili. 

ᯀᯤ ᯀᯬᯇᯖ᯲ ᯂᯞᯪ ᯂᯮᯅᯩᯎᯩ ᯇᯮᯞᯮ ᯅᯬᯑᯞᯪ᯲ ᯉ ᯘᯬᯔᯞ᯲ ᯉᯪᯀᯉ᯲ ᯘᯂᯞᯪ ᯇᯮᯞᯮ ᯀᯰᯪᯂᯉᯬ᯲ ᯔᯖᯩ ᯔ ᯘᯑ ᯀᯤᯞᯪ

Ai bodil ni ise adong bingkas so dapotan? ninna ulubalang Partahan Soaloon manungkun angka sitiop bodil.

ᯀᯤ ᯅᯬᯑᯞᯪ᯲ ᯉᯪ ᯤᯘᯩ ᯀᯑᯬᯰ ᯅᯰᯪᯂᯘ᯲ ᯘᯬ ᯑᯇᯬᯖᯉ᯲ ᯉᯉᯪ᯲ᯉ ᯥᯞᯮᯅᯞᯰ ᯇᯒ᯲ᯖᯂᯉ᯲ ᯘᯪᯀᯞᯬᯀᯉᯬ᯲ ᯔᯉᯮᯰᯂᯉᯮ᯲ ᯀᯰᯂ ᯘᯪᯖᯪᯀᯇᯬ᯲ ᯅᯬᯑᯞᯪ᯲

Bodilhu do tutu dua hali bingkas, alai sahali do mangonai! ninna Raja Parbaliung.

ᯅᯬᯑᯞᯪ᯲ᯂᯮ ᯑᯬ ᯖᯮᯖᯮ ᯑᯮᯀ ᯂᯞᯪ ᯅᯰᯪᯂᯘ᯲ ᯀᯞᯤ ᯘᯂᯞᯪ ᯑᯬ ᯔᯝᯬᯉᯤ ᯉᯉᯪ᯲ᯉ ᯒᯐ ᯇᯒ᯲ᯅᯞᯪᯀᯮᯰ

Songon na so dung do nian songon i rajanami! ninna ulubalang i.

ᯘᯬᯝᯉᯬ᯲ ᯉ ᯘᯬ ᯑᯮᯰ ᯑᯬ ᯉᯪᯀᯉ᯲ ᯘᯬᯝᯉᯬ᯲ ᯤ ᯒᯐᯉᯔᯪ ᯉᯉᯪ᯲ᯉ ᯥᯞᯮᯅᯞᯰ ᯤ

Dung i masijouan ma nasida, dijoui ma angka na di pudi dope; ai songon i do nasida marburu; rap borhat sian huta, jala rap mulak sude tu huta.

ᯑᯮᯰ ᯤ ᯔᯘᯪᯐᯬᯥᯀᯉ᯲ ᯔ ᯉᯘᯪᯑ ᯑᯪᯐᯬᯥᯤ ᯔ ᯀᯰᯂ ᯉ ᯑᯪ ᯇᯮᯑᯪ ᯑᯬᯇᯩ ᯀᯤ ᯘᯬᯝᯉᯬ᯲ ᯤ ᯑᯬ ᯉᯘᯪᯑ ᯔᯒ᯲ᯅᯮᯒᯮ ᯒᯇ᯲ ᯅᯒᯬ᯲ᯂᯖ᯲ ᯘᯪᯀᯉ᯲ ᯂᯮᯖ ᯐᯞ ᯒᯇ᯲ ᯔᯮᯞᯂ᯲ ᯘᯮᯑᯩ ᯖᯮ ᯂᯮᯖ

Ba dang dison dope si Aji Panungkunan ! ninna sada halak.

ᯅ ᯑᯰ ᯑᯪᯘᯉᯬ᯲ ᯑᯬᯇᯩ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯉᯉᯪ᯲ᯉ ᯘᯑ ᯂᯞᯐ᯲

Ba tutu! ninna na sada nari. Olo da, na beha do? ninna na asing.

ᯅ ᯖᯮᯖᯮ ᯉᯉᯪ᯲ᯉ ᯉ ᯘᯑ ᯉᯒᯪ ᯀᯬᯞᯬ ᯑ ᯉ ᯅᯩᯂ ᯑᯬ ᯉᯉᯪ᯲ᯉ ᯉ ᯀᯘᯰᯪ

Longang roha, ba na tu dia ma i laho! ninna Raja Parbaliung.

ᯞᯬᯝᯰ ᯒᯬᯂ ᯅ ᯉ ᯖᯮ ᯑᯪᯀ ᯔ ᯤ ᯞᯂᯬ ᯉᯉᯪ᯲ᯉ ᯒᯐ ᯇᯒ᯲ᯅᯞᯪᯀᯮᯰ

Alai anggo di bagasan rohana, naung hona do huroha si Aji Panungkunan nangkin di ramba i.

ᯀᯞᯤ ᯀᯰᯎᯬ ᯑᯪ ᯅᯎᯘᯉ᯲ ᯒᯬᯂᯉ ᯉᯀᯮᯰ ᯂᯬᯉ ᯑᯬ ᯂᯮᯒᯬᯂ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯉᯰᯂᯉᯪ᯲ ᯑᯪ ᯒᯔ᯲ᯅ ᯤ

Dung i didok ulubalang i ma, Masuk tu punguan na di toru on do ibana nangkin, ndang sahat i nangkin tu dolok na marhehe i.

ᯑᯮᯰ ᯤ ᯑᯪᯑᯂᯬ᯲ ᯥᯞᯮᯅᯞᯰ ᯤ ᯔ ᯔᯘᯂᯮ᯲ ᯖᯮ ᯇᯮᯝᯮᯀᯉ᯲ ᯉ ᯑᯪ ᯖᯬᯒᯮ ᯀᯉᯬ᯲ ᯑᯬ ᯤᯅᯉ ᯉᯰᯂᯉᯪ᯲ ᯀᯉᯪ᯲ᯑᯰ ᯘᯂᯖ᯲ ᯤ ᯉᯰᯂᯉᯪ᯲ ᯖᯮ ᯑᯬᯞᯂᯬ᯲ ᯉ ᯔᯒ᯲ᯂᯩᯂᯩ ᯤ

Beta ma talului, jonok do i; dang tagamon dao i. Betak na tinggang do ibana, jala tarngok nuaeng di ramba i! 

ᯅᯩᯖ ᯔ ᯖᯞᯮᯞᯮᯤ ᯐᯬᯉᯂᯬ᯲ ᯑᯬ ᯤ ᯑᯰ ᯖᯎᯔᯉᯬ᯲ ᯑᯀᯬ ᯤ ᯅᯩᯖᯂ᯲ ᯉ ᯖᯰᯪᯎᯰ ᯑᯬ ᯤᯅᯉ ᯐᯞ ᯖᯒ᯲ᯝᯂᯬ᯲ ᯉᯮᯀᯀᯰᯩ ᯑᯪ ᯒᯔ᯲ᯅ ᯤ

Dung i borhat ma nasida tutu sude tu ramba i; holan raja i ma tinggal di rura i rap dohot angka naung tar matua manjaga aili na dapot i.

ᯑᯮᯰ ᯤ ᯅᯒᯬ᯲ᯂᯖ᯲ ᯔ ᯉᯘᯪᯑ ᯖᯮᯖᯮ ᯘᯮᯑᯩ ᯖᯮ ᯒᯔ᯲ᯅ ᯤ ᯂᯬᯞᯉ᯲ ᯒᯐ ᯤ ᯔ ᯖᯰᯪᯎᯞ᯲ ᯑᯪ ᯒᯮᯒ ᯤ ᯒᯇ᯲ ᯑᯬᯂᯖᯬ᯲ ᯀᯰᯂ ᯉᯀᯮᯰ ᯖᯒ᯲ ᯔᯖᯮᯀ ᯔᯉ᯲ᯐᯎ ᯀᯤᯞᯪ ᯉ ᯑᯇᯖᯬ᯲ ᯤ

Dung marserak be nasida di ramba i, sai diihuthon si Paralamat ma hahana ulubalang i sian pudi. 

ᯑᯮᯰ ᯔᯒ᯲ᯘᯩᯒᯂ᯲ ᯅᯩ ᯉᯘᯪᯑ ᯑᯪ ᯒᯔ᯲ᯅ ᯤ ᯘᯤ ᯑᯪᯤᯂᯖᯮ᯲ᯂᯉᯬ᯲ ᯘᯪ ᯇᯒᯞᯔᯖ᯲ ᯔ ᯂᯂᯉ ᯥᯞᯮᯅᯞᯰ ᯤ ᯘᯪᯀᯉ᯲ ᯇᯮᯑᯪ

Dang adong antong halak na jonok tu nasida; jadi dung dapotsa digoit ma hahana i, jala dihusiphon ma,  Nunga husuru si Aji Panungkunan, ale hahang, asa mapous tu Lobu Namaduma.

ᯑᯰ ᯀᯑᯰᯬ ᯀᯉ᯲ᯖᯰᯬ ᯂᯞᯂ᯲ ᯉ ᯐᯬᯉᯂᯬ᯲ ᯖᯮ ᯉᯘᯪᯑ ᯐᯑᯪ ᯑᯮᯰ ᯑᯇᯖᯬ᯲ᯘ ᯑᯪᯎᯬᯀᯖᯪ᯲ ᯔ ᯂᯂᯉ ᯤ ᯐᯞ ᯑᯪᯂᯮᯘᯇᯪ᯲ᯂᯉᯬ᯲ ᯔ ᯉᯮᯝ ᯂᯮᯘᯮᯒᯮ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯀᯞᯩ ᯂᯂᯰ ᯀᯘ ᯔᯇᯬᯒᯘᯮ᯲ ᯖᯮ ᯞᯬᯅᯮ ᯉᯔᯑᯮᯔ

Toho do ahu di sampilpil na di toru an, jadi huida ma, nunga manang piga hali sai songon na naeng manembak raja i, hape so ada aili maporus dompak hami. 

ᯖᯬᯂᯬ ᯑᯬ ᯀᯂᯮ ᯑᯪ ᯘᯔ᯲ᯇᯞᯪ᯲ᯇᯞᯪ᯲ ᯉ ᯑᯪ ᯖᯬᯒᯮ ᯀᯉ᯲ ᯐᯑᯪ ᯂᯮᯤᯑ ᯔ ᯉᯮᯝ ᯔᯉᯰ ᯇᯪᯎ ᯂᯞᯪ ᯘᯤ ᯘᯬᯝᯉᯬ᯲ ᯉ ᯉᯀᯰᯩ ᯔᯉᯔᯩ᯲ᯅᯂ᯲ ᯒᯐ ᯤ ᯂᯇᯩ ᯘᯬ ᯀᯑ ᯀᯤᯞᯪ ᯔᯇᯬᯒᯘᯮ᯲ ᯑᯔᯬ᯲ᯇᯂ᯲ ᯂᯔᯪ

Adong do huroha tahi na jahat di raja on! ninna rohangku, da hahang!

ᯀᯝᯰᯬ ᯑᯬ ᯂᯮᯒᯬᯂ ᯖᯂᯪ ᯉ ᯐᯂᯖ᯲ ᯑᯪ ᯒᯐ ᯀᯉᯬ᯲ ᯉᯉᯪ᯲ᯉ ᯒᯬᯂᯰᯂᯮ ᯑ ᯂᯂᯰ

Sai nanget-nanget ma husisipi sian pudi, songon panisipi ni babiat.

ᯘᯤ ᯉᯝᯖᯩ᯲ᯉᯝᯖᯩ᯲ ᯔ ᯂᯮᯘᯪᯘᯪᯇᯪ ᯘᯪᯀᯉ᯲ ᯇᯮᯑᯪ ᯘᯬᯝᯉᯬ᯲ ᯇᯉᯪᯘᯪᯇᯪ ᯉᯪ ᯅᯅᯪᯀᯖ᯲

Jadi huida ma dibingkas bodilna, Dung i marlojongi ma ibana dompak hambirang. 

ᯐᯑᯪ ᯂᯮᯤᯑ ᯔ ᯑᯪᯅᯰᯪᯂᯘ᯲ ᯅᯬᯑᯞᯪ᯲ᯉ ᯑᯮᯰ ᯤ ᯔᯒ᯲ᯞᯬᯐᯬᯝᯪ ᯔ ᯤᯅᯉ ᯑᯔᯬ᯲ᯇᯂ᯲ ᯂᯔ᯲ᯅᯪᯒᯰ

Laho ma ahu nanget-nanget tu panembahanna i, huanto-anto di dia piruru i mangonai. 

ᯞᯂᯬ ᯔ ᯀᯂᯮ ᯉᯝᯖᯩ᯲ᯉᯝᯖᯩ᯲ ᯖᯮ ᯇᯉᯔᯩ᯲ᯅᯂᯉ᯲ᯉ ᯤ ᯂᯮᯀᯉ᯲ᯖᯬᯀᯉ᯲ᯖᯬ ᯑᯪ ᯑᯪᯀ ᯇᯪᯒᯮᯒᯮ ᯤ ᯔᯝᯬᯉᯤ

Hape huida ma si Aji Panungkunan nunga tungkap di tano i.

ᯂᯇᯩ ᯂᯮᯤᯑ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯉᯮᯝ ᯖᯮᯰᯂᯇ᯲ ᯑᯪ ᯖᯉᯬ ᯤ

Dang hona ibana, ai toho mamereng ibana dompak pudi di na laho bingkas bodil ni Raja Parbaliung i. 

ᯑᯰ ᯂᯬᯉ ᯤᯅᯉ ᯀᯤ ᯖᯬᯂᯬ ᯔᯔᯩᯒᯰᯩ ᯤᯅᯉ ᯑᯔᯬ᯲ᯇᯂ᯲ ᯇᯮᯝᯪ ᯑᯪ ᯉ ᯞᯂᯬ ᯅᯰᯪᯂᯘ᯲ ᯅᯬᯑᯞᯪ᯲ ᯉᯪ ᯒᯐ ᯇᯒ᯲ᯅᯞᯪᯀᯮᯰ ᯤ

Asa na dituntun do na manungkaphon badanna tu tano i. Aut so i, ba ingkon mate do ibana. 

ᯀᯘ ᯉ ᯑᯪᯖᯉᯮ᯲ᯖᯉᯮ᯲ ᯑᯬ ᯉ ᯔᯉᯮᯰᯂᯇ᯲ᯂᯉᯬ᯲ ᯅᯑᯉ᯲ᯉ ᯖᯮ ᯖᯉᯬ ᯤ ᯀᯀᯖᯮ᯲ ᯘᯬ ᯤ ᯅ ᯀᯰᯪᯂᯉᯬ᯲ ᯔᯖᯩ ᯑᯬ ᯤᯅᯉ

Jadi husuru ma ibana maninggalhon ramba on, jala hatop borhat tu Lobu Namaduma. 

ᯐᯑᯪ ᯂᯮᯘᯮᯒᯮ ᯔ ᯤᯅᯉ ᯔᯉᯰᯪᯎᯞ᯲ᯂᯉᯬ᯲ ᯒᯔ᯲ᯅ ᯀᯉᯬ᯲ ᯐᯞ ᯂᯖᯇᯬ᯲ ᯅᯒᯬ᯲ᯂᯖ᯲ ᯖᯮ ᯞᯬᯅᯮ ᯉᯔᯑᯮᯔ

Ai na so uhum do na binahen ni Raja Parbaliung i! I ma dihusiphon si Paralamat tu hahana ulubalang i.

ᯀᯤ ᯉ ᯘᯬ ᯥᯂᯔᯮ᯲ ᯑᯬ ᯉ ᯅᯪᯉᯂᯉᯩ᯲ ᯉᯪ ᯒᯐ ᯇᯒ᯲ᯅᯞᯪᯀᯮᯰ ᯤ ᯤ ᯔ ᯑᯪᯂᯮᯘᯇᯪ᯲ᯂᯉᯬ᯲ ᯘᯪ ᯇᯒᯞᯔᯖ᯲ ᯖᯮ ᯂᯂᯉ ᯥᯞᯅᯞᯰ ᯤ

Jorbutna i anggia! Ai tutu do i? ninna ulubalang i.

ᯐᯒᯬ᯲ᯅᯖᯮ᯲ᯉ ᯤ ᯀᯰᯎᯪᯀ ᯀᯤ ᯖᯮᯖᯮ ᯑᯬ ᯤ ᯉᯉᯪ᯲ᯉ ᯥᯞᯮᯅᯞᯰ ᯤ

Tung disuru ho pe ahu manolon manang tu begu dia pe taho, na rade do ahu manghatindangkon i! ninna si Paralamat.

ᯖᯮᯰ ᯑᯪᯘᯮᯒᯮ ᯂᯬ ᯇᯩ ᯀᯂᯮ ᯔᯉᯬᯞᯉᯬ᯲ ᯔᯉᯰ ᯖᯮ ᯅᯩᯎᯮ ᯑᯪᯀ ᯇᯩ ᯖᯂᯬ ᯉ ᯒᯑᯩ ᯑᯬ ᯀᯂᯮ ᯔᯰᯂᯖᯉᯪ᯲ᯑᯰᯂᯉᯬ᯲ ᯤ ᯉᯉᯪ᯲ᯉ ᯘᯪ ᯇᯒᯞᯔᯖ᯲

Hundul ma nasida satongkin di toru ni hau bolon, dung i ruar ma sian toru ni urat ni hau i sada ulok baganding.

ᯂᯉᯮ᯲ᯑᯞᯮ᯲ ᯔ ᯉᯘᯪᯑ ᯘᯖᯰᯬᯂᯉᯪ᯲ ᯑᯪ ᯖᯬᯒᯮ ᯉᯪ ᯂᯥ ᯅᯬᯞᯉᯬ᯲ ᯑᯮᯰᯤ ᯒᯮᯀᯒ᯲ ᯔ ᯘᯪᯀᯉ᯲ ᯖᯬᯒᯮ ᯉᯪ ᯥᯒᯖ᯲ ᯉᯪ ᯂᯥ ᯤ ᯘᯑ ᯥᯞᯂᯬ᯲ ᯅᯎᯉ᯲ᯑᯰᯪ

Dung i didok ulok baganding i ma, Tutu do na nidok ni anggimi, ale ulubalang Partahan Soaloon. Ndang adong gabus di hatana i !

ᯑᯮᯰ ᯤ ᯑᯪᯑᯂᯬ᯲ ᯥᯞᯂᯬ᯲ ᯅᯎᯉ᯲ᯑᯰᯪ ᯤ ᯔ ᯖᯮᯖᯮ ᯑᯬ ᯉ ᯉᯪᯑᯂᯬ᯲ ᯉᯪ ᯀᯰᯎᯪᯔᯪ ᯀᯞᯩ ᯥᯞᯮᯅᯞᯰ ᯇᯒ᯲ᯖᯂᯉ᯲ ᯘᯬᯀᯞᯬᯀᯉᯬ᯲ ᯀᯉᯪ᯲ᯑᯰ ᯀᯑᯰᯬ ᯎᯅᯘᯮ᯲ ᯑᯪ ᯂᯖᯉ ᯤ

Na uli ma i ba ompung! Nunga dohot ho hape mandok. 

ᯉ ᯥᯞᯪ ᯔ ᯤ ᯅ ᯀᯔᯬ᯲ᯇᯮᯰ ᯉᯮᯝ ᯑᯬᯂᯖᯬ᯲ ᯂᯬ ᯂᯇᯩ ᯔᯉ᯲ᯑᯂᯬ᯲

Ala ni jorbutna do tahi ni raja i, umbahen songon na so porsea ahu! ninna ulubalang i.

ᯀᯞ ᯉᯪ ᯐᯒᯬ᯲ᯅᯖᯮ᯲ᯉ ᯑᯬ ᯖᯂᯪ ᯉᯪ ᯒᯐ ᯤ ᯀᯔᯮ᯲ᯅᯂᯉᯩ᯲ ᯘᯬᯝᯉᯬ᯲ ᯉ ᯘᯬ ᯇᯒᯬ᯲ᯘᯩᯀ ᯀᯂᯮ ᯉᯉᯪ᯲ᯉ ᯥᯞᯮᯅᯞᯰ ᯤ

Na so matanggak di bohi do ho, na todos di ari! 

ᯉ ᯘᯬ ᯔᯖᯰᯎᯂ᯲ ᯑᯪ ᯅᯬᯂᯪ ᯑᯬ ᯂᯬ ᯉ ᯖᯬᯑᯘᯬ᯲ ᯑᯪ ᯀᯒᯪ

Ba urupi ma si Aji Panungkunan i, asa bangkit raja ibana. 

ᯅ ᯥᯒᯮᯇᯪ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯤ ᯀᯘ ᯅᯰᯂᯖᯪ᯲ ᯒᯐ ᯤᯅᯉ

Ai ingkon tu ibana do tutu pampe harajaon ni amana! ninna ulok baganding i mandok tu ulubalang i.

ᯀᯤ ᯀᯰᯪ᯲ᯂᯉᯬ᯲ ᯖᯮ ᯤᯅᯉ ᯑᯬ ᯖᯮᯖᯮ ᯇᯔ᯲ᯇᯩ ᯂᯒᯐᯀᯉᯬ᯲ ᯉᯪ ᯀᯔᯉ ᯉᯉᯪ᯲ᯉ ᯥᯞᯂᯬ᯲ ᯅᯎᯉ᯲ᯑᯰᯪ ᯤ ᯔᯉ᯲ᯑᯂᯬ᯲ ᯖᯮ ᯥᯞᯮᯅᯞᯰ ᯤ

Anggo nunga songon i didok ho ompung, ba patupaonnami ma na nidokmi. 

ᯀᯰᯎᯬ ᯉᯮᯝ ᯘᯬᯝᯉᯬ᯲ ᯤ ᯑᯪᯑᯂᯬ᯲ ᯂᯬ ᯀᯔᯬ᯲ᯇᯮᯰ ᯅ ᯇᯖᯮᯇᯀᯉᯬ᯲ ᯉᯔᯪ ᯔ ᯉ ᯉᯪᯑᯂᯬ᯲ᯔᯪ

Ai dang olo hami marrajahon raja na mangulahon na so uhum! ninna ulubalang Partahan Soaloon.

ᯀᯤ ᯑᯰ ᯀᯬᯞᯬ ᯂᯔᯪ ᯔᯒ᯲ᯒᯐᯂᯉᯬ᯲ ᯒᯐ ᯉ ᯔᯝᯮᯞᯂᯉᯬ᯲ ᯉ ᯘᯬ ᯥᯂᯔᯮ᯲ ᯉᯉᯪ᯲ᯉ ᯥᯞᯮᯅᯞᯰ ᯇᯒ᯲ᯖᯂᯉ᯲ ᯘᯬᯀᯞᯬᯀᯉᯬ᯲

Dung i mulak ma nasida angka na mangalului i mandapothon raja i.

ᯑᯮᯰ ᯤ ᯔᯮᯞᯂ᯲ ᯔ ᯉᯘᯪᯑ ᯀᯰᯂ ᯉ ᯔᯝᯞᯮᯞᯮᯤ ᯤ ᯔᯉ᯲ᯑᯇᯖᯬ᯲ ᯒᯐ ᯤ

Beha, dang adong diida hamu ibana? ninna Raja Parbaliung manungkun nasida.

ᯅᯩᯂ ᯑᯰ ᯀᯑᯰᯬ ᯑᯪᯤᯑ ᯂᯔᯮ ᯤᯅᯉ ᯉᯉᯪ᯲ᯉ ᯒᯐ ᯇᯒ᯲ᯅᯞᯪᯀᯮᯰ ᯔᯉᯮᯰᯂᯉᯮ᯲ ᯉᯘᯪᯑ

Olo ba rajanami, nunga tung loja hami na mangalului i, so binoto nanggo arimbosna. 

ᯀᯬᯞᯬ ᯅ ᯒᯐᯉᯔᯪ ᯉᯮᯝ ᯖᯮᯰ ᯞᯬᯐ ᯂᯔᯪ ᯉ ᯔᯝᯞᯮᯞᯮᯤ ᯤ ᯘᯬ ᯅᯪᯉᯬᯖᯬ ᯉᯰᯎᯬ ᯀᯒᯔᯪ᯲ᯅᯘᯬ᯲ᯉ

Atik naung diboan begu dia do si Aji Panungkunan on, songon homang uju i ninna ulubalang i.

ᯀᯖᯂᯪ᯲ ᯉᯀᯮᯰ ᯑᯪᯅᯬᯀᯉ᯲ ᯅᯩᯎᯮ ᯑᯪᯀ ᯑᯬ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯀᯉᯬ᯲ ᯘᯬᯝᯉᯬ᯲ ᯂᯬᯔᯰ ᯥᯐᯮ ᯤ ᯉᯉᯪ᯲ᯉ ᯥᯞᯮᯅᯞᯰ ᯤ

Nunga mulak sude na mangalului, ai nunga manihir mata ni ari. 

ᯉᯮᯝ ᯔᯮᯞᯂ᯲ ᯘᯮᯑᯩ ᯉ ᯔᯝᯞᯮᯞᯮᯤ ᯀᯤ ᯉᯮᯝ ᯔᯉᯪᯂᯒᯪ᯲ ᯔᯖ ᯉᯪ ᯀᯒᯪ

Jadi didok raja i ma, mulak ma hita jolo tu huta; marsogot ma di torang ni ari taulakhon mangalului.

ᯐᯑᯪ ᯑᯪᯑᯂᯬ᯲ ᯒᯐ ᯤ ᯔ ᯔᯮᯞᯂ᯲ ᯔ ᯂᯪᯖ ᯐᯬᯞᯬ ᯖᯮ ᯂᯮᯖ ᯔᯒ᯲ᯘᯬᯎᯖᯬ᯲ ᯔ ᯑᯪ ᯖᯬᯒᯰ ᯉᯪ ᯀᯒᯪ ᯖᯥᯞᯂ᯲ᯂᯉᯬ᯲ ᯔᯝᯞᯮᯞᯮᯤ

Olo ba rajanami, denggan ma i tutu, ai holom nama tongkin nari ! ninna ulu balang i.

ᯀᯬᯞᯬ ᯅ ᯒᯐᯉᯔᯪ ᯑᯰᯩᯎᯉ᯲ ᯔ ᯤ ᯖᯮᯖᯮ ᯀᯤ ᯂᯬᯞᯔᯬ᯲ ᯉᯔ ᯖᯰᯬᯂᯉᯪ᯲ ᯉᯒᯪ ᯉᯉᯪ᯲ᯉ ᯥᯞᯮ ᯅᯞᯰ ᯤ

Dung i mulak ma nasida sude tu huta; diporsan ma aili na dapot i.

ᯑᯮᯰ ᯤ ᯔᯮᯞᯂ᯲ ᯔ ᯉᯘᯪᯑ ᯘᯮᯑᯩ ᯖᯮ ᯂᯮᯖ ᯑᯪᯇᯒᯬ᯲ᯘᯉ᯲ ᯔ ᯀᯤᯞᯪ ᯉ ᯑᯇᯖᯬ᯲ ᯤ

Ianggo ina ni Si Aji Panungkunan, dung diida so dohot anakna i mulak, sai holan na mangandungi nama, so bolas apoan ni manang ise. 

ᯤᯀᯰᯎᯬ ᯤᯉ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯑᯮᯰ ᯑᯪᯤᯑ ᯘᯬ ᯑᯬᯂᯖᯬ᯲ ᯀᯉᯂ᯲ᯉ ᯤ ᯔᯮᯞᯂ᯲ ᯘᯤ ᯂᯬᯞᯉ᯲ ᯉ ᯔᯝᯉ᯲ᯑᯮᯝᯪ ᯉᯔ ᯘᯬ ᯅᯬᯞᯘ᯲ ᯀᯇᯬᯀᯉ᯲ ᯉᯪ ᯔᯉᯰ ᯤᯘᯩ

Dilehon do nian juhut aili jambarna, alai ndang olo manjalo.

ᯑᯪᯞᯩᯂᯉᯬ᯲ ᯑᯬ ᯉᯪᯀᯉ᯲ ᯐᯮᯂᯖᯮ᯲ ᯀᯤᯞᯪ ᯐᯔ᯲ᯅᯒ᯲ᯉ ᯀᯞᯤ ᯀᯉᯪ᯲ᯑᯰ ᯀᯬᯞᯬ ᯔᯉ᯲ᯐᯞᯬ

Dang tu aha di ahu juhut aili i, anakhi ma paulak hamu! ninna, huhut sai tumatangis.

ᯑᯰ ᯖᯮ ᯀᯂ ᯑᯪ ᯀᯂᯮ ᯐᯮᯂᯖᯮ ᯀᯤᯞᯪ ᯤ ᯀᯉᯂ᯲ᯂᯪ ᯔ ᯇᯥᯞᯂ᯲ ᯂᯔᯮ ᯉᯉᯪ᯲ᯉ ᯂᯮᯂᯖᯮ᯲ ᯘᯤ ᯖᯮᯔᯖᯝᯘᯪ᯲

Jadi ro ma si Paralamat, diboan ma tu jabuna jambar ni ina ni si Aji Panungkunan i, diparmasak ma antong denggan. 

ᯐᯑᯪ ᯒᯬ ᯔ ᯘᯪ ᯇᯒᯞᯔᯖ᯲ ᯑᯪᯅᯬᯀᯉ᯲ ᯔ ᯖᯮ ᯐᯅᯮᯉ ᯐᯔ᯲ᯅᯒ᯲ ᯉᯪ ᯤᯉ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯤ ᯑᯪᯇᯒ᯲ᯔᯘᯂ᯲ ᯔ ᯀᯉ᯲ᯖᯰᯬ ᯑᯰᯩᯎᯉ᯲

Dung masak, ditaruhon ma tu bagas ni ina ni si Aji Panungkunan i; diboan ma dohot indahan.

ᯑᯮᯰ ᯔᯘᯂ᯲ ᯑᯪᯖᯒᯮᯂᯉᯬ᯲ ᯔ ᯖᯮ ᯅᯎᯘ᯲ ᯉᯪ ᯤᯉ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯤ ᯑᯪᯅᯬᯀᯉ᯲ ᯔ ᯑᯬᯂᯖᯬ᯲ ᯀᯉᯪ᯲ᯑᯂᯉ᯲

Nangetnanget ma dipaboa na masa i, jala didok asa unang jolo adong na umbotosa, so holan nasida.

ᯉᯝᯖᯩ᯲ᯉᯝᯖᯩ᯲ ᯔ ᯑᯪᯇᯅᯬᯀ ᯉ ᯔᯘ ᯤ ᯐᯞ ᯑᯪᯑᯂᯬ᯲ ᯀᯘ ᯥᯉᯰ ᯐᯬᯞᯬ ᯀᯑᯰᯬ ᯉ ᯀᯔᯮ᯲ᯅᯬᯖᯬᯘ ᯘᯬ ᯂᯬᯞᯉ᯲ ᯉᯘᯪᯑ

Pangan ma inang, unang pola sai gogo be na tangis i. 

ᯇᯝᯉ᯲ ᯔ ᯤᯉᯰ ᯥᯉᯰ ᯇᯬᯞ ᯘᯤ ᯎᯬᯎᯬ ᯅᯩ ᯉ ᯖᯝᯘᯪ᯲ ᯤ

Horashoras do si Aji Panungkunan di huta ni Raja Sohuturon Dolak.

ᯂᯬᯒᯘ᯲ᯂᯬᯒᯘ᯲ ᯑᯬ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯑᯪ ᯂᯮᯖ ᯉᯪ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲

Dang pola piga ari nari idaonmu ma ibana! ninna si Paralamat, asa tarapul antong rohana.

ᯑᯰ ᯇᯬᯞ ᯇᯪᯎ ᯀᯒᯪ ᯉᯒᯪ ᯤᯑᯀᯉᯬ᯲ᯔᯮ ᯔ ᯤᯅᯉ ᯉᯉᯪ᯲ᯉ ᯘᯪ ᯇᯒᯞᯔᯖ᯲ ᯀᯘ ᯖᯒᯇᯞᯮ᯲ ᯀᯉ᯲ᯖᯰᯬ ᯒᯬᯂᯉ

Tuani ma i amang. Nunga songon na mulak ahu mangolu dibahen hatami. 

ᯖᯮᯀᯉᯪ ᯔ ᯤ ᯀᯔᯰ ᯉᯮᯝ ᯘᯬᯝᯉᯬ᯲ ᯉ ᯔᯮᯞᯂ᯲ ᯀᯂᯮ ᯔᯝᯬᯞᯮ ᯑᯪᯅᯂᯉᯩ᯲ ᯂᯖᯔᯪ

Horas do hape anakki! ninna ina ni si Aji Panungkunan.

ᯂᯬᯒᯘ᯲ ᯑᯬ ᯂᯇᯩ ᯀᯉᯂ᯲ᯂᯪ ᯉᯉᯪ᯲ᯉ ᯤᯉ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲