Pangungkapon Bindu 13 ᯇᯝᯮᯰᯄ᯦ᯇᯬᯉ᯲ ᯅᯪᯉ᯲ᯑᯮ ᯘᯔ᯲ᯇᯮᯞᯮ ᯖᯬᯞᯮ
Binatang na martanduk sampulu 1-10. ᯅᯪᯉᯖᯰ ᯉ ᯔᯒ᯲ᯖᯉ᯲ᯑᯮᯄ᯦᯲ ᯘᯔ᯲ᯇᯮᯞᯮ ᯘᯑ - ᯘᯔ᯲ᯇᯮᯞᯮ
I. 1 Dung i huida ma ruar sian laut i sada binatang: Sampulu do tandukna, pitu uluna; diatas ni angka tandukna adong ma sampulu tumpal, jadi angka goar panginsahion do di angka uluna i. ᯑᯮᯰ ᯤ ᯂᯮᯤᯑ ᯔ ᯒᯮᯀᯒ᯲ ᯘᯪᯀᯉ᯲ ᯞᯀᯮᯖ᯲ ᯤ ᯘᯑ ᯅᯪᯉᯖᯰ, ᯘᯔ᯲ᯇᯮᯞᯮ ᯑᯬ ᯖᯉ᯲ᯑᯮᯄ᯦᯲ᯉ, ᯇᯪᯖᯮ ᯥᯞᯮᯉ ; ᯑᯪ ᯀᯖᯘ᯲ ᯉᯪ ᯀᯰᯄ᯦ ᯖᯉ᯲ᯑᯮᯄ᯦᯲ᯉ ᯀᯑᯬᯰ ᯔ ᯘᯔ᯲ᯇᯮᯞᯮ ᯖᯮᯔ᯲ᯇᯞ᯲, ᯐᯑᯪ ᯀᯰᯄ᯦ ᯎᯬᯀᯒ᯲ ᯇᯝᯪᯉ᯲ᯘᯂᯪᯀᯬᯉ᯲ ᯑᯬ ᯑᯪ ᯀᯰᯄ᯦ ᯥᯞᯮᯉ ᯤ
2 Suman tu babiat do binatang i huida, patna songon pat ni gompul, babana songon baba ni singa; jadi dilehon naga i ma tu ibana gogona nang habangsana dohot sahala godang. ᯘᯮᯔᯉ᯲ ᯖᯮ ᯅᯅᯪᯀᯖ᯲ ᯑᯬ ᯅᯪᯉᯖᯰ ᯤ ᯂᯮᯤᯑ, ᯇᯖ᯲ᯉ ᯘᯬᯝᯬᯉ᯲ ᯇᯖ᯲ ᯉᯪ ᯎᯬᯔ᯲ᯇᯮᯞ᯲, ᯅᯅᯉ ᯘᯬᯝᯬᯉ᯲ ᯅᯅ ᯉᯪ ᯘᯪᯝ, ᯐᯑᯪ ᯑᯪᯞᯩᯂᯬᯉ᯲ ᯉᯎ ᯤ ᯔ ᯖᯮ ᯤᯅᯉ ᯎᯬᯎᯬᯉ ᯉᯰ ᯂᯅᯰᯘᯉ ᯑᯬᯂᯬᯖ᯲ ᯘᯂᯞ ᯎᯬᯑᯰ
3 Dung i huida ma sian angka uluna sada naung hona tagil, sihamatehononna hian; hape gabe malum do bugangna hamatean i. Jadi longang ma liat portibi on paidaida binatang i. ᯑᯮᯰ ᯤ ᯂᯮᯤᯑ ᯔ ᯘᯪᯀᯉ᯲ ᯀᯰᯄ᯦ ᯥᯞᯮᯉ ᯘᯑ ᯉᯀᯮᯰ ᯂᯬᯉ ᯖᯎᯪᯞ᯲, ᯘᯪᯂᯔᯖᯩᯂᯬᯉᯬᯉ᯲ᯉ ᯂᯪᯀᯉ᯲, ᯂᯇᯩ ᯎᯅᯩ ᯔᯞᯮᯔ᯲ ᯑᯬ ᯅᯮᯎᯰᯉ ᯂᯔᯖᯩᯀᯉ᯲ ᯤ. ᯐᯑᯪ ᯞᯝᯰ ᯔ ᯞᯪᯀᯖ᯲ ᯇᯬᯒ᯲ᯖᯪᯅᯪ ᯀᯬᯉ᯲ ᯇᯤᯑᯤᯑ ᯅᯪᯉᯖᯰ ᯤ
4 Gabe disomba nasida ma naga i, ala ibana mangalehon sahala tu binatang i; laos disomba ma binatang i, angka ninna ma: Ise ma tudos tu binatang i; ise tarbahen marmusu dompak ibana? ᯎᯅᯩ ᯑᯪᯘᯬᯔ᯲ᯅ ᯉᯘᯪᯑ ᯔ ᯉᯎ ᯤ, ᯀᯞ ᯤᯅᯉ ᯔᯝᯞᯩᯂᯬᯉ᯲ ᯘᯂᯞ ᯖᯮ ᯅᯪᯉᯖᯰ ᯤ, ᯞᯀᯘᯬ᯲ ᯑᯪᯘᯬᯔ᯲ᯅ ᯔ ᯅᯪᯉᯖᯰ ᯤ, ᯀᯰᯄ᯦ ᯉᯪᯉ᯲ᯉ ᯔ : ᯤᯘᯩ ᯔ ᯖᯮᯑᯬᯘ᯲ ᯖᯮ ᯅᯪᯉᯖᯰ ᯤ ; ᯤᯘᯩ ᯖᯒ᯲ᯅᯂᯩᯉ᯲ ᯔᯒ᯲ᯔᯮᯘᯮ ᯑᯬᯔ᯲ᯇᯄ᯦᯲ ᯤᯅᯉ ?
5 Dung i dilehon ma tu ibana soara mangkatahon hata na balga dohot panginsahion, jala dilehon tu ibana huaso mangulahonsa leleng ni opatpulu dua bulan. ᯑᯮᯰ ᯤ ᯑᯪᯞᯩᯂᯬᯉ᯲ ᯔ ᯖᯮ ᯤᯅᯉ ᯘᯬᯀᯒ ᯔᯰᯄ᯦ᯖᯂᯬᯉ᯲ ᯂᯖ ᯉ ᯅᯞ᯲ᯎ ᯑᯬᯂᯬᯖ᯲ ᯇᯝᯪᯉ᯲ᯘᯂᯪᯀᯬᯉ᯲, ᯐᯞ ᯑᯪᯞᯩᯂᯬᯉ᯲ ᯖᯮ ᯤᯅᯉ ᯂᯮᯀᯘᯬ ᯔᯝᯮᯞᯂᯬᯉ᯲ᯘ ᯞᯩᯞᯩᯰ ᯉᯪ ᯀᯬᯇᯖ᯲ᯇᯮᯞᯮ ᯑᯮᯀ ᯅᯮᯞᯉ᯲
6 Gabe dibungka ma pamanganna manginsahi Debata, manginsahi Goarna dohot jorona, ro di angka na maringanan di banua ginjang. ᯎᯅᯩ ᯑᯪᯅᯮᯰᯄ᯦ ᯔ ᯇᯔᯝᯉ᯲ᯉ ᯔᯝᯪᯉ᯲ᯘᯂᯪ ᯑᯩᯅᯖ, ᯔᯝᯪᯉ᯲ᯘᯂᯪ ᯎᯬᯀᯒ᯲ᯉ ᯑᯬᯂᯬᯖ᯲ ᯐᯬᯒᯬᯉ, ᯒᯬ ᯑᯪ ᯀᯰᯄ᯦ ᯉ ᯔᯒᯪᯝᯉᯉ᯲ ᯑᯪ ᯅᯉᯮᯀ ᯎᯪᯉ᯲ᯐᯰ
7 Jadi dilehon ma tu ibana huaso, marmusu dompak angka na badia ro di na manaluhon nasida; laos dilehon tu ibana sahala manggomgomi saluhut marga dohot houm dohot hata dohot bangso. ᯐᯑᯪ ᯑᯪᯞᯩᯂᯬᯉ᯲ ᯔ ᯖᯮ ᯤᯅᯉ ᯂᯮᯀᯘᯬ. ᯔᯒ᯲ᯔᯮᯘᯮ ᯑᯬᯔ᯲ᯇᯄ᯦᯲ ᯀᯰᯄ᯦ ᯉ ᯅᯑᯪᯀ ᯒᯬ ᯑᯪ ᯉ ᯔᯉᯞᯮᯂᯬᯉ᯲ ᯉᯘᯪᯑ ᯞᯀᯬᯘ᯲ ᯑᯪᯞᯩᯂᯬᯉ᯲ ᯖᯮ ᯤᯅᯉ ᯘᯂᯞ ᯔᯰᯎᯬᯔ᯲ᯎᯬᯔᯪ ᯘᯞᯮᯂᯮᯖ᯲ ᯔᯒ᯲ᯎ ᯑᯬᯂᯬᯖ᯲ ᯂᯬᯀᯮᯔ᯲ ᯑᯬᯂᯬᯖ᯲ ᯂᯖ ᯑᯬᯂᯬᯖ᯲ ᯅᯰᯘᯬ
8 Sombaon ni saluhut pangisi ni tano on ma ibana, nasa na so tarsurat goarna olat ni haoojak ni hasiangan on di buku hangoluan ni Birubiru naung tarbunu i. ᯘᯬᯔ᯲ᯅᯀᯬᯉ᯲ ᯉᯪ ᯘᯞᯮᯂᯮᯖ᯲ ᯇᯝᯪᯘᯪ ᯉᯪ ᯖᯉᯬ ᯀᯬᯉ᯲ ᯔ ᯤᯅᯉ, ᯉᯘ ᯉ ᯘᯬ ᯖᯒ᯲ᯘᯮᯒᯖ᯲ ᯎᯬᯀᯒ᯲ᯉ ᯀᯬᯞᯖ᯲ ᯉᯪ ᯂᯀᯬᯀᯬᯐᯄ᯦᯲ ᯉᯪ ᯂᯘᯪᯀᯝᯉ᯲ ᯀᯬᯉ᯲ ᯑᯪ ᯅᯮᯄ᯦ᯮ ᯂᯝᯬᯞᯮᯀᯉ᯲ ᯉᯪ ᯅᯪᯒᯮᯅᯪᯒᯮ ᯉᯀᯮᯰ ᯖᯒ᯲ᯅᯮᯉᯮ ᯤ
9 Ganup na marpinggol, ditangihon ma! ᯎᯉᯮᯇ᯲ ᯉ ᯔᯒ᯲ᯇᯪᯰᯎᯬᯞ᯲. ᯑᯪᯖᯝᯪᯂᯬᯉ᯲ ᯔ !
10 Nasa na martaban, ingkon tartaban do; nasa na mambunu dohot podang, ingkon mate bunuon ni podang! Disi ma jumpang habengeton dohot haporseaon ni angka na badia! ᯉᯘ ᯉ ᯔᯒ᯲ᯖᯅᯉ᯲, ᯀᯪᯰᯄ᯦ᯬᯉ᯲ ᯖᯒ᯲ᯖᯅᯉ᯲ ᯑᯬ, ᯉᯘ ᯉ ᯔᯔ᯲ᯅᯮᯉᯮ ᯑᯬᯂᯬᯖ᯲ ᯇᯬᯑᯰ, ᯀᯪᯰᯄ᯦ᯬᯉ᯲ ᯔᯖᯩ ᯅᯮᯉᯮᯀᯬᯉ᯲ ᯉᯪ ᯇᯬᯑᯰ ! ᯑᯪᯘᯪ ᯔ ᯐᯮᯔ᯲ᯇᯰ ᯂᯅᯩᯝᯩᯖᯬᯉ᯲ ᯑᯬᯂᯬᯖ᯲ ᯂᯇᯬᯒ᯲ᯘᯩᯀᯀᯬᯉ᯲ ᯉᯪ ᯀᯰᯄ᯦ ᯉ ᯅᯑᯪᯀ !
Binatang na martanduk dua 11-18. ᯅᯪᯉᯖᯰ ᯉ ᯔᯒ᯲ᯖᯉ᯲ᯑᯮᯄ᯦᯲ ᯑᯮᯀ ᯘᯔ᯲ᯇᯮᯞᯮ ᯘᯑ - ᯘᯔ᯲ᯇᯮᯞᯮ ᯥᯀᯞᯮ
II. 11 Dung i huida ma binatang na asing ruar sian tano i: Dua do tandukna, songon tanduk ni birubiru; songon hata ni naga i do ia hatana. ᯑᯮᯰ ᯤ ᯂᯮᯤᯑ ᯔ ᯅᯪᯉᯖᯰ ᯉ ᯀᯘᯪᯰ ᯒᯮᯀᯒ᯲ ᯘᯪᯀᯉ᯲ ᯖᯉᯬ ᯤ ; ᯑᯮᯀ ᯑᯬ ᯖᯉ᯲ᯑᯮᯄ᯦᯲ᯉ, ᯘᯬᯝᯬᯉ᯲ ᯖᯉ᯲ᯑᯮᯄ᯦᯲ ᯉᯪ ᯅᯪᯒᯮᯅᯪᯒᯮ, ᯘᯬᯝᯬᯉ᯲ ᯂᯖ ᯉᯪ ᯉᯎ ᯤ ᯑᯬ ᯤᯀ ᯂᯖᯉ
12 Diulahon do nasa huaso ni binatang na parjolo i di jolona. Disuru do tano i dohot pangisina sumomba binatang na parjolo i, nampuna bugang hamatean naung gabe malum i. ᯑᯪᯥᯞᯂᯬᯉ᯲ ᯑᯬ ᯉᯘ ᯂᯮᯀᯘᯬ ᯉᯪ ᯅᯪᯉᯖᯰ ᯉ ᯇᯒ᯲ᯐᯬᯞᯬ ᯤ ᯑᯪ ᯐᯬᯞᯬᯉ. ᯑᯪᯘᯮᯒᯮ ᯑᯬ ᯖᯉᯬ ᯤ ᯑᯬᯂᯬᯖ᯲ ᯇᯝᯪᯘᯪᯉ ᯘᯮᯔᯬᯔ᯲ᯅ ᯅᯪᯉᯖᯰ ᯉ ᯇᯒ᯲ᯐᯬᯞᯬ ᯤ, ᯉᯔ᯲ᯇᯮᯉ ᯅᯮᯎᯰ ᯂᯔᯖᯩᯀᯉ᯲ ᯉᯀᯮᯰ ᯎᯅᯩ ᯔᯞᯮᯔ᯲ ᯤ
13 Diula do tanda angka na balga, pola dipatuat do api sian langit tu tano di jolo ni jolma. ᯑᯪᯥᯞ ᯑᯬ ᯖᯉ᯲ᯑ ᯀᯰᯄ᯦ ᯉ ᯅᯞ᯲ᯎ, ᯇᯬᯞ ᯑᯪᯇᯖᯮᯀᯖ᯲ ᯑᯬ ᯀᯇᯪ ᯘᯪᯀᯉ᯲ ᯞᯝᯪᯖ᯲ ᯖᯮ ᯖᯉᯬ ᯑᯪ ᯐᯬᯞᯬ ᯉᯪ ᯐᯬᯞ᯲ᯔ
14 Dililuhon do angka na maringanan di tano i hinorhon ni angka tanda, naung dilehon tu ibana, sipatupaonna di jolo ni binatang i, ai didokkon do angka na maringanan di tano i paulihon gombaran di binatang, naung mabugang najolo binahen ni podang, gabe mangolu. ᯑᯪᯞᯪᯞᯮᯂᯬᯉ᯲ ᯑᯬ ᯀᯰᯄ᯦ ᯉ ᯔᯒᯪᯝᯉᯉ᯲ ᯑᯪ ᯖᯉᯬ ᯤ ᯂᯪᯉᯬᯒ᯲ᯂᯬᯉ᯲ ᯉᯪ ᯀᯰᯄ᯦ ᯖᯉ᯲ᯑ, ᯉᯀᯮᯰ ᯑᯪᯞᯩᯂᯬᯉ᯲ ᯖᯮ ᯤᯅᯉ, ᯘᯪᯇᯖᯮᯇᯀᯬᯉ᯲ᯉ ᯑᯪ ᯐᯬᯞᯬ ᯉᯪ ᯅᯪᯉᯖᯰ ᯤ, ᯀᯤ ᯑᯪᯑᯬᯄ᯦᯲ᯄ᯦ᯬᯉ᯲ ᯑᯬ ᯀᯄ᯦ ᯉ ᯔᯒᯪᯝᯉᯉ᯲ ᯑᯪ ᯖᯉᯬ ᯤ ᯇᯥᯞᯪᯂᯬᯉ᯲ ᯎᯬᯔ᯲ᯅᯒᯉ᯲ ᯑᯪ ᯅᯪᯉᯖᯰ, ᯉᯀᯮᯰ ᯔᯅᯮᯎᯰ ᯉᯐᯬᯞᯬ ᯅᯪᯉᯂᯩᯉ᯲ ᯉᯪ ᯇᯬᯑᯰ ᯎᯅᯩ ᯔᯝᯬᯞᯮ
15 Laos dilehon do huaso tu ibana, mangalehon hosa tu gombaran ni binatang i, gabe marsoara do gombaran ni binatang i, jala mambahen mate nasa na so sumomba gombaran ni binatang i. ᯞᯀᯬᯘ᯲ ᯑᯪᯞᯩᯂᯬᯉ᯲ ᯑᯬ ᯂᯮᯀᯘᯬ ᯖᯮ ᯤᯅᯉ, ᯔᯝᯞᯩᯂᯬᯉ᯲ ᯂᯬᯘ ᯖᯮ ᯎᯬᯔ᯲ᯅᯒᯉ᯲ ᯉᯪ ᯅᯪᯉᯖᯰ ᯤ, ᯐᯞ ᯔᯔ᯲ᯅᯂᯩᯉ᯲ ᯔᯖᯩ ᯉᯘ ᯉ ᯘᯬ ᯘᯮᯔᯬᯔ᯲ᯅ ᯎᯬᯔ᯲ᯅᯒᯉ᯲ ᯉᯪ ᯅᯪᯉᯖᯰ ᯤ
16 Jadi disuru ma saluhutna, na metmet nang na magodang, na mora nang na pogos, anak mata nang hatoban, mambahen partinandaan tu tangannasida siamun manang tu pardompahannasida. ᯐᯑᯪ ᯑᯪᯘᯮᯒᯮ ᯔ ᯘᯞᯮᯂᯮᯖ᯲ᯉ, ᯉ ᯔᯩᯖ᯲ᯔᯩᯖ᯲ ᯉᯰ ᯉ ᯔᯎᯬᯑᯰ, ᯉ ᯔᯬᯒ ᯉᯰ ᯉ ᯇᯬᯎᯬᯘ᯲, ᯀᯉᯄ᯦᯲ ᯔᯖ ᯉᯰ ᯂᯖᯬᯅᯉ᯲, ᯔᯔ᯲ᯅᯂᯩᯉ᯲ ᯇᯒ᯲ᯖᯪᯉᯉ᯲ᯑᯀᯉ᯲ ᯖᯮ ᯖᯝᯉ᯲ ᯉᯘᯪᯑ ᯘᯪᯀᯔᯮᯉ᯲ ᯔᯉᯰ ᯖᯮ ᯇᯒ᯲ᯑᯬᯔ᯲ᯇᯂᯉ᯲ᯉᯘᯪᯑ
17 Asa unang tarbahen halak manuhor manang manggadis, anggo so di ibana partinandaan i, i ma goar ni binatang i manang bilangan ni goarna. ᯀᯘ ᯥᯉᯰ ᯖᯒ᯲ᯅᯂᯩᯉ᯲ ᯂᯞᯄ᯦᯲ ᯔᯉᯮᯂᯬᯒ᯲ ᯔᯉᯰ ᯔᯰᯎᯑᯪᯘ᯲, ᯀᯰᯎᯬ ᯘᯬ ᯑᯪ ᯤᯅᯉ ᯇᯒ᯲ᯖᯪᯉᯉ᯲ᯑᯀᯉ᯲ ᯤ, ᯤ ᯔ ᯎᯬᯀᯒ᯲ ᯉᯪ ᯅᯪᯉᯖᯰ ᯤ ᯔᯉᯰ ᯅᯪᯞᯝᯉ᯲ ᯉᯪ ᯎᯬᯀᯒ᯲ᯉ
18 Dison do habisuhon! Dirajumi na marroha ma bilangan ni binatang i, ai bilangan ni jolma do i. Onomratus onompulu onom do bilangan i. ᯑᯪᯘᯬᯉ᯲ ᯑᯬ ᯂᯅᯪᯘᯮᯂᯬᯉ᯲ ! ᯑᯪᯒᯐᯮᯔᯪ ᯉ ᯔᯒ᯲ᯒᯬᯂ ᯔ ᯅᯪᯞᯝᯉ᯲ ᯉᯪ ᯅᯪᯉᯖᯰ ᯤ, ᯀᯤ ᯅᯪᯞᯝᯉ᯲ ᯉᯪ ᯐᯬᯞ᯲ᯔ ᯑᯬ ᯤ. ᯀᯬᯉᯬᯔ᯲ᯒᯖᯮᯘ᯲ ᯀᯬᯉᯬᯔ᯲ᯇᯮᯞᯮ ᯀᯬᯉᯬᯔ᯲ ᯑᯬ ᯅᯪᯞᯝᯉ᯲ ᯤ.