Pangungkapon Bindu 15 ᯇᯝᯮᯰᯄ᯦ᯇᯬᯉ᯲ ᯅᯪᯉ᯲ᯑᯮ ᯘᯔ᯲ᯇᯮᯞᯮ ᯞᯪᯔ
Ende ni angka naung monang 1-4. ᯀᯩᯉ᯲ᯑᯩ ᯉᯪ ᯀᯰᯄ᯦ ᯉᯀᯮᯰ ᯔᯬᯉᯰ ᯘᯑ - ᯀᯬᯇᯖ᯲
I. 1 Dung i huida ma di banua ginjang tanda na asing na balga jala halongangan: Adong ma pitu surusuruan, na umpeop pitu haporsuhon na parpudi; ai di bagasan i do marujung rimas ni Debata. ᯑᯮᯰ ᯤ ᯂᯮᯤᯑ ᯔ ᯑᯪ ᯅᯉᯮᯀ ᯎᯪᯉ᯲ᯐᯰ ᯖᯉ᯲ᯑ ᯉ ᯀᯘᯪᯰ ᯉ ᯅᯞ᯲ᯎ ᯐᯞ ᯂᯞᯬᯝᯝᯉ᯲ ; ᯀᯑᯬᯰ ᯔ ᯇᯪᯖᯮ ᯘᯮᯒᯮᯘᯮᯒᯮᯀᯉ᯲, ᯉᯀᯮᯔ᯲ᯇᯩᯀᯬᯇ᯲ ᯇᯪᯖᯮ ᯂᯇᯬᯒ᯲ᯘᯮᯂᯬᯉ᯲ ᯉ ᯇᯒ᯲ᯇᯮᯑᯪ ; ᯀᯤ ᯑᯪ ᯅᯎᯘᯉ᯲ ᯤ ᯑᯬ ᯔᯒᯮᯐᯮᯰ ᯒᯪᯔᯘ᯲ ᯉᯪ ᯑᯩᯅᯖ
2 Jadi huida ma laut sada songon sorminan, na marsaor api; na jongjong do di topi laut sorminan i angka naung monang maralohon binatang i nang taringot tu gombaranna dohot bilangan ni goarna, ditiop do angka hasapi ni Debata. ᯐᯑᯪ ᯂᯮᯤᯑ ᯔ ᯞᯀᯮᯖ᯲ ᯘᯬᯝᯬᯉ᯲ ᯘᯑ ᯘᯬᯒ᯲ᯔᯪᯉᯉ᯲, ᯉ ᯔᯒ᯲ᯘᯀᯬᯒ᯲ ᯀᯇᯪ, ᯉ ᯐᯬᯰᯐᯬᯰ ᯑᯪ ᯖᯬᯇᯪ ᯞᯀᯮᯖ᯲ ᯘᯬᯒ᯲ᯔᯪᯉᯉ᯲ ᯤ ᯀᯰᯄ᯦ ᯉᯀᯮᯰ ᯔᯬᯉᯰ ᯔᯒᯞᯬᯂᯬᯉ᯲ ᯅᯪᯉᯖᯰ ᯤ ᯉᯰ ᯖᯒᯪᯝᯬᯖ᯲ ᯖᯮ ᯎᯬᯔ᯲ᯅᯒᯉ᯲ᯉ ᯑᯬᯂᯬᯖ᯲ ᯅᯪᯞᯝᯉ᯲ ᯑᯪ ᯎᯬᯀᯒ᯲ᯉ, ᯑᯪᯖᯪᯀᯬᯇ᯲ ᯑᯬ ᯀᯰᯄ᯦ ᯂᯘᯇᯪ ᯉᯪ ᯑᯩᯅᯖ
3 Jadi diendehon nasida ma ende ni Musa, naposo ni Debata, dohot ende ni Birubiru i, angka ninna ma: Na balga jala halongangan do angka ulaonmu, ale Tuhan Debata. Sigomgom saluhutna; na tigor jala na sintong do angka dalanmu, ale Raja ni angka bangso! ᯐᯑᯪ ᯑᯪᯀᯩᯉ᯲ᯑᯩᯂᯬᯉ᯲ᯉᯘᯪᯑ ᯔ ᯀᯩᯉ᯲ᯑᯩ ᯉᯪ ᯔᯮᯘ, ᯉᯇᯬᯘᯬ ᯉᯪ ᯑᯩᯅᯖ, ᯑᯬᯂᯬᯖ᯲ ᯀᯩᯉ᯲ᯑᯩ ᯉᯪ ᯅᯪᯒᯮᯅᯪᯒᯮ ᯤ, ᯀᯰᯄ᯦ ᯉᯪᯉ᯲ᯉ ᯔ : ᯉ ᯅᯞ᯲ᯎ ᯐᯞ ᯂᯞᯬᯝᯝᯉ᯲ ᯑᯬ ᯀᯰᯄ᯦ ᯥᯞᯀᯮᯉ᯲ᯔᯮ, ᯀᯞᯩ ᯖᯮᯂᯉ᯲ ᯑᯩᯅᯖ, ᯘᯪᯎᯬᯔ᯲ᯎᯬᯔ᯲ ᯘᯞᯮᯂᯮᯖ᯲ᯉ, ᯉ ᯖᯪᯎᯬᯒ᯲ ᯐᯞ ᯉ ᯘᯪᯉ᯲ᯖᯬᯰ ᯑᯬ ᯀᯰᯄ᯦ ᯑᯞᯉ᯲ᯔᯮ, ᯀᯞᯩ ᯒᯐ ᯉᯪ ᯀᯰᯄ᯦ ᯅᯰᯘᯬ !
4 Tung ise ma na so mangkabiari Ho, ale Tuhan, dohot pasangaphon Goarmu? Ai sasada Ho do na badia; ai na ro ma saluhut bangso marsomba tu jolom, ai nunga gabe patar angka panguhummu na tigor i! ᯖᯮᯰ ᯤᯘᯩ ᯔ ᯉ ᯘᯬ ᯔᯰᯄ᯦ᯅᯪᯀᯒᯪ ᯂᯬ, ᯀᯞᯩ ᯖᯮᯂᯉ᯲, ᯑᯬᯂᯬᯖ᯲ ᯇᯘᯝᯇ᯲ᯂᯬᯉ᯲ ᯎᯬᯀᯒ᯲ᯔᯮ ? ᯀᯤ ᯘᯘᯑ ᯂᯬ ᯑᯬ ᯉ ᯅᯑᯪᯀ; ᯀᯤ ᯉ ᯒᯬ ᯔ ᯘᯞᯮᯂᯮᯖ᯲ ᯅᯰᯘᯬ ᯔᯒ᯲ᯘᯬᯔ᯲ᯅ ᯖᯮ ᯐᯬᯞᯬᯔ᯲, ᯀᯤ ᯉᯮᯝ ᯎᯅᯩ ᯇᯖᯒ᯲ ᯀᯰᯄ᯦ ᯇᯝᯮᯂᯮᯔᯬᯉ᯲ᯔᯮ ᯉ ᯖᯪᯎᯬᯒ᯲ ᯤ !
Pitu saoan pangarimasan 5-8. ᯇᯪᯖᯮ ᯘᯀᯬᯀᯉ᯲ ᯇᯝᯒᯪᯔᯘᯉ᯲ ᯞᯪᯔ - ᯥᯀᯞᯮ
II. 5 Dung i huida ma, mungkap ma joro ni undungundung panindangion na di banua ginjang i. ᯑᯮᯰ ᯤ ᯂᯮᯤᯑ ᯔ, ᯔᯮᯰᯄ᯦ᯇ᯲ ᯔ ᯐᯬᯒᯬ ᯉᯪ ᯀᯮᯉ᯲ᯑᯮᯝᯮᯉ᯲ᯑᯮᯰ ᯇᯉᯪᯉ᯲ᯑᯝᯪᯀᯬᯉ᯲ ᯉ ᯑᯪ ᯅᯉᯮᯀ ᯎᯪᯉ᯲ᯐᯰ ᯤ
6 Jadi ruar ma sian joro i na pitu surusuruan na umpeop haporsuhon na pitu i; haen na ias na marlinanglinang do diuloshon nasida, jala marhohos sere di pamatangna. ᯐᯑᯪ ᯒᯮᯀᯒ᯲ ᯔ ᯘᯪᯀᯉ᯲ ᯐᯬᯒᯬ ᯤ ᯇᯪᯖᯮ ᯘᯮᯒᯮᯘᯮᯒᯮᯀᯉ᯲ ᯉ ᯀᯮᯔ᯲ᯇᯩᯀᯬᯇ᯲ ᯂᯇᯬᯒ᯲ᯘᯮᯂᯬᯉ᯲ ᯉ ᯇᯪᯖᯮ ᯤ' ᯂᯀᯩᯉ᯲ ᯉ ᯤᯀᯘ᯲ ᯉ ᯔᯒ᯲ᯞᯪᯉᯰᯞᯪᯉᯰ ᯑᯬ ᯑᯪᯥᯞᯬᯘ᯲ᯂᯬᯉ᯲ ᯉᯘᯪᯑ, ᯐᯞ ᯔᯒ᯲ᯂᯬᯂᯬᯘ᯲ ᯘᯩᯒᯩ ᯑᯪ ᯇᯔᯖᯰᯉ
7 Gabe dilehon sada sian na opat parngolu i ma tu na pitu surusuruan i pitu saoan sere, angka na gok rimas ni Debata, na mangolu ro di salelenglelengna. ᯎᯅᯩ ᯑᯪᯞᯩᯂᯬᯉ᯲ ᯘᯑ ᯘᯪᯀᯉ᯲ ᯉ ᯀᯬᯇᯖ᯲ ᯇᯒ᯲ᯝᯬᯞᯮ ᯤ ᯔ ᯖᯮ ᯉ ᯇᯪᯖᯮ ᯘᯮᯒᯮᯘᯮᯒᯮᯀᯉ᯲ ᯤ ᯇᯪᯖᯮ ᯘᯀᯬᯀᯉ᯲ ᯘᯩᯒᯩ, ᯀᯰᯄ᯦ ᯉ ᯎᯬᯄ᯦᯲ ᯒᯪᯔᯘ᯲ ᯉᯪ ᯑᯩᯅᯖ , ᯉ ᯔᯝᯬᯞᯮ ᯒᯬ ᯑᯪ ᯘᯞᯩᯞᯩᯰᯞᯩᯞᯩᯰᯉ
8 Jadi gok timus ma joro i, dibahen hasangapon ni Debata dohot hagogoonna; ndang tarbahen manang ise mambongoti joro i, paima marujung na pitu haporsuhon, sipatupaon ni surusuruan na pitu i. ᯐᯑᯪ ᯎᯬᯄ᯦᯲ ᯖᯪᯔᯮᯘ᯲ ᯔ ᯐᯬᯒᯬ ᯤ, ᯑᯪᯅᯂᯩᯉ᯲ ᯂᯘᯝᯇᯬᯉ᯲ ᯉᯪ ᯑᯩᯅᯖ ᯑᯬᯂᯬᯖ᯲ ᯂᯎᯬᯎᯬᯀᯬᯉ᯲ᯉ; ᯉ᯲ᯑᯰ ᯖᯒ᯲ᯅᯂᯩᯉ᯲ ᯔᯉᯰ ᯤᯘᯩ ᯔᯔ᯲ᯅᯬᯝᯬᯖᯪ ᯐᯬᯒᯬ ᯤ, ᯇᯤᯔ ᯔᯒᯮᯐᯮᯰ ᯉ ᯇᯪᯖᯮ ᯂᯇᯬᯒ᯲ᯘᯮᯂᯬᯉ᯲, ᯘᯪᯇᯖᯮᯇᯀᯬᯉ᯲ ᯉᯪ ᯘᯮᯒᯮᯘᯮᯒᯮᯀᯉ᯲ ᯉ ᯇᯪᯖᯮ ᯤ