Pangungkapon Bindu 18 ᯇᯝᯮᯰᯄ᯦ᯇᯬᯉ᯲ ᯅᯪᯉ᯲ᯑᯮ ᯘᯔ᯲ᯇᯮᯞᯮ ᯥᯀᯞᯮ
Halelengse ni huta Babel 1-8. ᯂᯞᯩᯞᯩᯰᯘᯩ ᯉᯪ ᯂᯮᯖ ᯅᯅᯩᯞ᯲ ᯘᯑ - ᯥᯀᯞᯮ
I. 1 Dung salpu i, huida ma surusuruan na asing tuat sian banua ginjang, na marhuaso godang, gabe tiur ma tano i dibahen hasangaponna. ᯑᯮᯰ ᯘᯞ᯲ᯇᯮ ᯤ, ᯂᯮᯤᯑ ᯔ ᯘᯮᯒᯮᯘᯮᯒᯮᯀᯉ᯲ ᯉ ᯀᯘᯪᯰ ᯖᯮᯀᯖ᯲ ᯘᯪᯀᯉ᯲ ᯅᯉᯮᯀ ᯎᯪᯉ᯲ᯐᯰ, ᯉ ᯔᯒ᯲ᯂᯮᯀᯘᯬ ᯎᯬᯑᯰ, ᯎᯅᯩ ᯖᯪᯀᯮᯒ᯲ ᯔ ᯖᯉᯬ ᯤ ᯑᯪᯅᯂᯩᯉ᯲ ᯂᯘᯝᯇᯬᯉ᯲ᯉ
2 Gogo ma soarana manjoujouhon: Nunga pesan, nunga pesan Babel na balga i, gabe inganan ni angka sibolis jala hurungan ni nasa tondi na hodar jala huruhuruan ni nasa pidong na ronsam, angka hagigian. ᯎᯬᯎᯬ ᯔ ᯘᯬᯀᯒᯉ ᯔᯉ᯲ᯐᯬᯥᯐᯬᯥᯂᯬᯉ᯲, ᯉᯮᯝ ᯇᯩᯘᯉ᯲, ᯉᯮᯝ ᯇᯩᯘᯉ᯲ ᯅᯅᯩᯞ᯲ ᯉ ᯅᯞ᯲ᯎ ᯤ, ᯎᯅᯩ ᯤᯝᯉᯉ᯲ ᯉᯪ ᯀᯰᯄ᯦ ᯘᯪᯅᯬᯞᯪᯘ᯲ ᯐᯞ ᯂᯮᯒᯮᯝᯉ᯲ ᯉᯪ ᯉᯘ ᯖᯬᯉ᯲ᯑᯪ ᯉ ᯂᯬᯑᯒ᯲ ᯐᯞ ᯂᯮᯒᯮᯂᯮᯒᯮᯀᯉ᯲ ᯉᯪ ᯉᯘ ᯇᯪᯑᯬᯰ ᯉ ᯒᯬᯉ᯲ᯘᯔ᯲, ᯀᯰᯄ᯦ ᯂᯎᯪᯎᯪᯀᯉ᯲
3 Ai naung minum do saluhut bangso sian anggur pangarimasan na sian parmainanonna, jala donganna, marmainan do angka raja na di tano on; naung gabe mamora do angka partigatiga ni tano on binahen ni hagogoon ni hageduhonna. ᯀᯤ ᯉᯀᯮᯰ ᯔᯪᯉᯮᯔ᯲ ᯑᯬ ᯘᯞᯮᯂᯮᯖ᯲ ᯅᯰᯘᯬ ᯘᯪᯀᯉ᯲ ᯀᯰᯎᯮᯒ᯲ ᯇᯝᯒᯪᯔᯘᯉ᯲ ᯉ ᯘᯪᯀᯉ᯲ ᯇᯒ᯲ᯔᯤᯉᯬᯉ᯲ᯉ, ᯐᯞ ᯑᯬᯝᯉ᯲ᯉ ᯔᯒ᯲ᯔᯤᯉᯉ᯲ ᯑᯬ ᯀᯰᯄ᯦ ᯒᯐ ᯉ ᯑᯪ ᯖᯉᯬ ᯀᯬᯉ᯲, ᯉᯀᯮᯰ ᯎᯅᯩ ᯔᯔᯬᯒ ᯑᯬ ᯀᯰᯄ᯦ ᯇᯒ᯲ᯖᯪᯎᯖᯪᯎ ᯉᯪ ᯖᯉᯬ ᯀᯬᯉ᯲ ᯅᯪᯉᯂᯩᯉ᯲ ᯉᯪ ᯂᯎᯬᯎᯬᯀᯬᯉ᯲ ᯉᯪ ᯂᯎᯩᯑᯮᯂᯬᯉ᯲ᯉ
4 Dung i hubege ma soara na asing sian banua ginjang, na mandok: Laho ma hamu, ale bangsongku, ruar sian i, asa unang partohap hamu di angka dosana, unang dohot hamu manjalo di haporsuhonna i! ᯑᯮᯰ ᯤ ᯂᯮᯅᯩᯎᯩ ᯔ ᯘᯬᯀᯒ ᯉ ᯀᯘᯪᯰ ᯘᯪᯀᯉ᯲ ᯅᯉᯮᯀ ᯎᯪᯉ᯲ᯐᯰ, ᯉ ᯔᯉ᯲ᯑᯬᯄ᯦᯲ : ᯞᯂᯬ ᯔ ᯂᯔᯮ, ᯀᯞᯩ ᯅᯰᯘᯬᯰᯄ᯦ᯮ, ᯒᯮᯀᯒ᯲ ᯘᯪᯀᯉ᯲ ᯤ, ᯀᯘ ᯥᯉᯰ ᯇᯒ᯲ᯖᯬᯂᯇ᯲ ᯂᯔᯮ ᯑᯪ ᯀᯰᯄ᯦ ᯑᯬᯘᯉ, ᯥᯉᯰ ᯑᯬᯂᯬᯖ᯲ ᯂᯔᯮ ᯔᯉ᯲ᯐᯞᯬ ᯑᯪ ᯂᯇᯬᯒ᯲ᯘᯮᯂᯬᯉ᯲ᯉ ᯤ!
5 Ai nunga sahat ro di banua ginjang angka dosana; nunga marningot Debata di angka hajahatonna. ᯀᯤ ᯉᯮᯝ ᯘᯂᯖ᯲ ᯒᯬ ᯑᯪ ᯅᯉᯮᯀ ᯎᯪᯉ᯲ᯐᯰ ᯀᯄ᯦ ᯑᯬᯘᯉ, ᯉᯮᯝ ᯔᯒ᯲ᯉᯪᯝᯬᯖ᯲ ᯑᯩᯅᯖ ᯑᯪ ᯀᯰᯄ᯦ ᯂᯐᯂᯖᯬᯉ᯲ᯉ
6 Baloshon hamu tu ibana songon naung binahenna i, silompit ma bahen hamu marguru tu angka ulaonna; silompit dua ma tahuhon hamu di ibana tu panginuman na sinaorhonna i! ᯅᯞᯬᯘ᯲ᯂᯬᯉ᯲ ᯂᯔᯮ ᯖᯮ ᯤᯅᯉ ᯘᯬᯝᯬᯉ᯲ ᯉᯀᯮᯰ ᯅᯪᯉᯂᯩᯉ᯲ᯉ ᯤ, ᯘᯪᯞᯬᯔ᯲ᯇᯪᯖ ᯔ ᯅᯂᯩᯉ᯲ ᯂᯔᯮ ᯔᯒ᯲ᯎᯮᯒᯮ ᯖᯮ ᯀᯰᯄ᯦ ᯥᯞᯀᯬᯉ᯲ᯉ : ᯘᯪᯞᯬᯔ᯲ᯇᯪᯖ᯲ ᯑᯮᯀ ᯔ ᯖᯂᯮᯂᯬᯉ᯲ ᯂᯔᯮ ᯑᯪ ᯤᯅᯉ ᯖᯮ ᯇᯝᯪᯉᯮᯔᯉ᯲ ᯉ ᯘᯪᯉᯀᯬᯒ᯲ᯂᯬᯉ᯲ᯉ ᯤ!
7 Manang sadia hasangapon dohot pargadombuson na niaithonna tu dirina, na sai godang haporsuhon dohot arsak ni roha ma lehon hamu tu ibana? Ai didok ibana di bagasan rohana: Na hundul do ahu mangarajai, ndang na mabalu ahu, na so tupa idaonku arsak ni roha. ᯔᯉᯰ ᯘᯑᯪᯀ ᯂᯘᯝᯇᯬᯉ᯲ ᯑᯬᯂᯬᯖ᯲ ᯇᯒ᯲ᯎᯑᯬᯔ᯲ᯅᯮᯘᯬᯉ᯲ ᯉ ᯉᯪᯀᯀᯪᯖ᯲ᯂᯬᯉ᯲ᯉ ᯖᯮ ᯑᯪᯒᯪᯉ, ᯉ ᯘᯤ ᯎᯬᯑᯰ ᯂᯇᯬᯒ᯲ᯘᯮᯂᯬᯉ᯲ ᯑᯬᯂᯬᯖ᯲ ᯀᯒ᯲ᯘᯄ᯦᯲ ᯉᯪ ᯒᯬᯂ ᯔ ᯞᯩᯂᯬᯉ᯲ ᯂᯔᯮ ᯖᯮ ᯤᯅᯉ. ᯀᯤ ᯑᯪᯑᯬᯄ᯦᯲ ᯤᯅᯉ ᯑᯪ ᯅᯎᯘᯉ᯲ ᯒᯬᯂᯉ, ᯉ ᯂᯮᯉ᯲ᯑᯮᯞ᯲ ᯑᯬ ᯀᯂᯮ ᯔᯝᯒᯐᯤ, ᯉ᯲ᯑᯰ ᯉ ᯔᯅᯞᯮ ᯀᯂᯮ, ᯉ ᯘᯬ ᯖᯮᯇ ᯤᯑᯀᯬᯉ᯲ᯄ᯦ᯮ ᯀᯒ᯲ᯘᯄ᯦᯲ ᯉᯪ ᯒᯬᯂ
8 Dibahen i, di bagasan na sadari ma songgop tu ibana angka haporsuhon: Hamatean dohot andung dohot haraparon; dung i tutungon ma ibana tu api. Ai na gogo do Tuhan Debata, na manguhum ibana. ᯑᯪᯅᯂᯩᯉ᯲ ᯤ, ᯑᯪ ᯅᯎᯘᯉ᯲ ᯉ ᯘᯑᯒᯪ ᯔ ᯘᯬᯰᯎᯬᯇ᯲ ᯖᯮ ᯤᯅᯉ ᯀᯰᯄ᯦ ᯂᯇᯬᯒ᯲ᯘᯮᯂᯬᯉ᯲ : ᯂᯔᯖᯩᯀᯉ᯲ ᯑᯬᯂᯬᯖ᯲ ᯀᯉ᯲ᯑᯮᯰ ᯑᯬᯂᯬᯖ᯲ ᯂᯒᯇᯒᯬᯉ᯲: ᯑᯮᯰ ᯤ ᯖᯮᯖᯮᯝᯬᯉ᯲ ᯔ ᯤᯅᯉ ᯖᯮ ᯀᯇᯪ. ᯀᯤ ᯉ ᯎᯬᯎᯬ ᯑᯬ ᯖᯮᯂᯉ᯲ ᯑᯩᯅᯖ, ᯉ ᯔᯝᯮᯂᯮᯔ᯲ ᯤᯅᯉ
Angguhangguk ni angka na mangandungi huta i 9-19. ᯀᯰᯎᯮᯂᯰᯎᯮᯄ᯦᯲ ᯉᯪ ᯀᯰᯄ᯦ ᯉ ᯔᯝᯉ᯲ᯑᯮᯝᯪ ᯂᯮᯖ ᯤ ᯘᯪᯀ - ᯘᯔ᯲ᯇᯮᯞᯮ ᯘᯪᯀ
II. 9 Angka raja na di tano on, angka donganna marmainan jala margadombus, i ma mananangisi jala mangandungi ibana, di na idaonnasida timus ni panutunganna i. ᯀᯰᯄ᯦ ᯒᯐ ᯉ ᯑᯪ ᯖᯉᯬ ᯀᯬᯉ᯲, ᯀᯰᯄ᯦ ᯑᯬᯝᯉ᯲ᯉ ᯔᯒ᯲ᯔᯤᯉᯉ᯲ ᯐᯞ ᯔᯒ᯲ᯎᯑᯬᯔ᯲ᯅᯮᯘ᯲, ᯤ ᯔ ᯔᯉᯉᯝᯪᯘᯪ ᯐᯞ ᯔᯝᯉ᯲ᯑᯮᯝᯪ ᯤᯅᯉ, ᯑᯪ ᯉ ᯤᯑᯀᯬᯉ᯲ᯉᯘᯪᯑ ᯖᯪᯔᯮᯘ᯲ ᯉᯪ ᯇᯉᯮᯖᯮᯝᯉ᯲ᯉ ᯤ
10 Na mandaodao nama nasida jongjong dibahen biarnasida mida parniahapanna i; ia hatanasida: Na marjea, na marjea do ho, huta na balga, huta Babel na togu i, ai di bagasan na sajom do lalu uhum na tu ho! ᯉ ᯔᯉ᯲ᯑᯀᯬᯑᯀᯬ ᯉᯔ ᯉᯘᯪᯑ ᯐᯬᯰᯐᯬᯰ ᯑᯪᯅᯂᯩᯉ᯲ ᯅᯪᯀᯒ᯲ᯉᯘᯪᯑ ᯔᯪᯑ ᯇᯒ᯲ᯉᯪᯀᯂᯇᯉ᯲ᯉ ᯤ ; ᯤᯀ ᯂᯖᯉᯘᯪᯑ, ᯉ ᯔᯒ᯲ᯐᯩᯀ, ᯉ ᯔᯒ᯲ᯐᯩᯀ ᯑᯬ ᯂᯬ, ᯂᯮᯖ ᯉ ᯅᯞ᯲ᯎ, ᯂᯮᯖ ᯅᯅᯬᯉ᯲ ᯉ ᯖᯬᯎᯮ ᯤ, ᯀᯤ ᯑᯪᯅᯎᯘᯉ᯲ ᯉ ᯘᯐᯬᯔ᯲ ᯑᯬ ᯞᯞᯮ ᯥᯂᯮᯔ᯲ ᯉ ᯖᯮ ᯂᯬ !
11 Tangis ma angka partigatiga ni tano on, angka naung marsak mida ibana, ala so adong be na manuhor boniaganasida. ᯖᯝᯪᯘ᯲ ᯔ ᯀᯰᯄ᯦ ᯇᯒ᯲ᯖᯪᯎᯖᯪᯎ ᯉᯪ ᯖᯉᯬ ᯀᯬᯉ᯲, ᯀᯰᯄ᯦ ᯉᯀᯮᯰ ᯔᯒ᯲ᯘᯄ᯦᯲ ᯔᯪᯑ ᯤᯅᯉ, ᯀᯤ ᯘᯬ ᯀᯑᯬᯰ ᯅᯩ ᯉ ᯔᯉᯮᯂᯬᯒ᯲ ᯅᯬᯉᯪᯀᯎᯉᯘᯪᯑ
12 I ma angka boniaga sere dohot perak, mata intan, mutiha, haen na bontar, hasumba, surta, abit na rara dohot nasa na hushus ro di ragam ni ulaula na sian gading, sian hau na arga, sian haksa, bosi dohot batu marmar, ᯤ ᯔ ᯀᯰᯄ᯦ ᯅᯬᯉᯪᯀᯎ ᯘᯩᯒᯩ ᯑᯬᯂᯬᯖ᯲ ᯇᯩᯒᯄ᯦᯲, ᯔᯖ ᯀᯪᯉ᯲ᯖᯉ᯲ ᯔᯮᯖᯪᯂ, ᯂᯀᯩᯉ᯲ ᯉ ᯅᯬᯉ᯲ᯖᯒ᯲, ᯂᯘᯮᯔ᯲ᯅ, ᯘᯮᯒ᯲ᯖ, ᯀᯅᯪᯖ᯲ ᯉ ᯒᯒ, ᯑᯬᯂᯬᯖ᯲ ᯉᯘ ᯉ ᯂᯮᯉ᯲ᯘᯮᯘ᯲ ᯒᯬ ᯑᯪ ᯒᯎᯔ᯲ ᯉᯪ ᯥᯞᯥᯞ ᯉ ᯘᯪᯀᯉ᯲ ᯎᯑᯪᯰ, ᯘᯪᯀᯉ᯲ ᯂᯥ ᯉ ᯀᯒ᯲ᯎ, ᯘᯪᯀᯉ᯲ ᯂᯄ᯦᯲ᯘ, ᯅᯬᯘᯪ ᯑᯬᯂᯬᯖ᯲ ᯅᯖᯮ ᯔᯒ᯲ᯔᯒ᯲
13 angkup ni i ulu mamis dohot miak na hushus, pamurpuri dohot mir dohot haminjon, anggur, miak, itak, eme, horbo, birubiru, hoda, hureta, hatoban ro di hosa ni jolma. ᯀᯰᯄ᯦ᯮᯇ᯲ ᯉᯪ ᯤ ᯥᯞᯮ ᯔᯔᯪᯘ᯲ ᯑᯬᯂᯬᯖ᯲ ᯔᯪᯀᯄ᯦᯲ ᯉ ᯂᯮᯉ᯲ᯘᯮᯘ᯲, ᯇᯔᯮᯒ᯲ᯇᯮᯒᯪ ᯑᯬᯂᯬᯖ᯲ ᯔᯪᯒ᯲ ᯑᯬᯂᯬᯖ᯲ ᯂᯔᯪᯉ᯲ᯐᯬᯉ᯲, ᯀᯰᯎᯮᯒ᯲, ᯔᯪᯀᯄ᯦᯲, ᯤᯖᯄ᯦, ᯀᯩᯔᯩ, ᯂᯬᯒᯅᯬ, ᯅᯪᯒᯮᯅᯪᯒᯮ, ᯂᯬᯑ, ᯂᯮᯒᯩᯖ, ᯂᯖᯬᯅᯉ᯲ ᯒᯬ ᯑᯪ ᯂᯬᯘ ᯉᯪ ᯐᯬᯞ᯲ᯔ
14 Nunga munsat sian ho parbue ni hau na hinasolohon ni roham; nunga mago sian ho nasa na uli jala na tiur berengon, na so tupa be jumpang angka i! ᯉᯮᯝ ᯔᯮᯉ᯲ᯘᯖ᯲ ᯘᯪᯀᯉ᯲ ᯂᯬ ᯇᯒ᯲ᯅᯮᯀᯩ ᯉᯪ ᯂᯥ ᯉ ᯂᯪᯉᯘᯬᯞᯬᯂᯬᯉ᯲ ᯉᯪ ᯒᯬᯂᯔ᯲, ᯉᯮᯝ ᯔᯎᯬ ᯘᯪᯀᯉ᯲ ᯂᯬ ᯉᯘ ᯉ ᯥᯞᯪ ᯐᯞ ᯉ ᯖᯪᯀᯮᯒ᯲ ᯅᯩᯒᯩᯝᯬᯉ᯲, ᯉ ᯘᯬ ᯖᯮᯇ ᯅᯩ ᯐᯮᯔ᯲ᯇᯰ ᯀᯰᯄ᯦ ᯤ !
15 Angka na martigatigahon sisongon i, angka naung gabe mamora binahenna i, jongjong mandaodao dibahen biarnasida mida parniahapanna, tumatangis jala mangangguhi. ᯀᯰᯄ᯦ ᯉ ᯔᯒ᯲ᯖᯪᯎᯖᯪᯎᯂᯬᯉ᯲ ᯘᯪᯘᯬᯝᯬᯉ᯲ ᯤ, ᯀᯰᯄ᯦ ᯉᯀᯮᯰ ᯎᯅᯩ ᯔᯔᯬᯒ ᯅᯪᯉᯂᯩᯉ᯲ᯉ ᯤ, ᯐᯬᯰᯐᯬᯰ ᯔᯉ᯲ᯑᯀᯬᯑᯀᯬ ᯑᯪᯅᯂᯩᯉ᯲ ᯅᯪᯀᯒ᯲ᯉᯘᯪᯑ ᯔᯪᯑ ᯇᯒ᯲ᯉᯪᯀᯂᯇᯉ᯲ᯉ, ᯖᯮᯔᯖᯝᯪᯘ᯲ ᯐᯞ ᯔᯝᯰᯎᯮᯂᯪ
16 Ninna nasida ma: Na marjea, na marjea do ho, huta na balga, na marabithon abit na bontar dohot na rara dohot hasumba, na nilampisan dohot sere nang mata intan ro di mutiha, ai di bagasan sajom do gabe suda hamoraon na songon i! ᯉᯪᯉ᯲ᯉ ᯉᯘᯪᯑ ᯔ : ᯉ ᯔᯒ᯲ᯐᯩᯀ, ᯉ ᯔᯒ᯲ᯐᯩᯀ ᯑᯬ ᯂᯬ, ᯂᯮᯖ ᯉ ᯅᯞ᯲ᯎ, ᯉ ᯔᯒᯅᯪᯖ᯲ᯂᯬᯉ᯲ ᯀᯅᯪᯖ᯲ ᯉ ᯅᯬᯉ᯲ᯖᯒ᯲, ᯑᯬᯂᯬᯖ᯲ ᯉ ᯒᯒ, ᯑᯬᯂᯬᯖ᯲ ᯂᯘᯮᯔ᯲ᯅ, ᯉ ᯉᯪᯞᯔ᯲ᯇᯪᯘᯉ᯲ ᯑᯬᯂᯬᯖ᯲ ᯘᯩᯒᯩ, ᯉᯰ ᯔᯖ ᯀᯪᯉ᯲ᯖᯉ᯲ ᯒᯬ ᯑᯪ ᯔᯮᯖᯪᯂ, ᯀᯤ ᯑᯪ ᯅᯎᯘᯉ᯲ ᯘᯐᯬᯔ᯲ ᯑᯬ ᯎᯅᯩ ᯘᯮᯑ ᯂᯔᯬᯒᯀᯬᯉ᯲ ᯉ ᯘᯬᯝᯬᯉ᯲ ᯤ !
17 Na jongjong mandaodao ma saluhut juaramudi dohot angka na marparau mangkoris topilaut dohot anak parau ro di saluhut na marulaon di laut. ᯉ ᯐᯬᯰᯐᯬᯰ ᯔᯉ᯲ᯑᯀᯬᯑᯀᯬ ᯔ ᯘᯞᯮᯂᯮᯖ᯲ ᯐᯮᯀᯒᯔᯮᯑᯪ ᯑᯬᯂᯬᯖ᯲ ᯀᯰᯄ᯦ ᯉ ᯔᯒ᯲ᯇᯒᯥ ᯔᯰᯄ᯦ᯬᯒᯪᯘ᯲ ᯖᯬᯇᯪᯞᯀᯮᯖ᯲ ᯑᯬᯂᯬᯖ᯲ ᯀᯉᯄ᯦᯲ ᯇᯒᯥ ᯒᯬ ᯑᯪ ᯘᯞᯮᯂᯮᯖ᯲ ᯉ ᯔᯒᯮᯞᯀᯬᯉ᯲ ᯑᯪ ᯞᯀᯮᯖ᯲
18 Jadi manjoujou ma nasida marnida timus ni pamurunanna, ninna ma: Dia na tudos tu huta na balga i? ᯐᯑᯪ ᯔᯉ᯲ᯐᯬᯥᯐᯬᯥ ᯔ ᯉᯘᯪᯑ ᯔᯒ᯲ᯉᯪᯑ ᯖᯪᯔᯮᯘ᯲ ᯉᯪ ᯇᯔᯮᯒᯮᯉᯉ᯲ᯉ, ᯉᯪᯉ᯲ᯉ ᯔ : ᯑᯪᯀ ᯉ ᯖᯮᯑᯬᯘ᯲ ᯖᯮ ᯂᯮᯖ ᯉ ᯅᯞ᯲ᯎ ᯤ ?
19 Gabe dipirpirhon nasida ma orbuk tu ulunasida, jala manjoujou ma nasida huhut tumatangis jala mangangguhi, angka ninna ma: Na marjea, na marjea do ho, huta na balga i; binahenna i do gabe mamora saluhut na marparau dilaut marhite sian hamoraonna, ai di bagasan sajom do dipanepnep! ᯎᯅᯩ ᯑᯪᯇᯪᯒ᯲ᯇᯪᯒ᯲ᯂᯬᯉ᯲ ᯉᯘᯪᯑ ᯔ ᯀᯬᯒ᯲ᯅᯮᯄ᯦᯲ ᯖᯮ ᯥᯞᯮᯉᯘᯪᯑ, ᯐᯞ ᯔᯉ᯲ᯐᯬᯥᯐᯬᯥ ᯔ ᯉᯘᯪᯑ ᯂᯮᯂᯮᯖ᯲ ᯖᯮᯔᯖᯝᯪᯘ᯲ ᯐᯞ ᯔᯝᯰᯎᯮᯂᯪ, ᯀᯰᯄ᯦ ᯉᯪᯉ᯲ᯉ ᯔ : ᯉ ᯔᯒ᯲ᯐᯩᯀ, ᯉ ᯔᯒ᯲ᯐᯩᯀ ᯑᯬ ᯂᯬ, ᯂᯮᯖ ᯉ ᯅᯞ᯲ᯎ ᯤ, ᯅᯪᯉᯂᯩᯉ᯲ᯉ ᯤ ᯑᯬ ᯎᯅᯩ ᯔᯔᯬᯒ ᯘᯞᯮᯂᯮᯖ᯲ ᯉ ᯔᯒ᯲ᯇᯒᯥ ᯑᯪ ᯞᯀᯮᯖ᯲ ᯔᯒ᯲ᯂᯪᯖᯩ ᯘᯪᯀᯉ᯲ ᯂᯔᯬᯒᯀᯬᯉ᯲ᯉ, ᯀᯤ ᯑᯪ ᯅᯎᯘᯉ᯲ ᯘᯐᯬᯔ᯲ ᯑᯬ ᯑᯪᯇᯉᯩᯇ᯲ᯉᯩᯇ᯲!
Las ni roha na di banua ginjang 20-24. ᯞᯘ᯲ ᯉᯪ ᯒᯬᯂ ᯉ ᯑᯪ ᯅᯉᯮᯀ ᯎᯪᯉ᯲ᯐᯰ ᯑᯮᯀᯇᯮᯞᯮ - ᯑᯮᯀᯇᯮᯞᯮ ᯀᯬᯇᯖ᯲
III. 20 Halashon ma i, ale banua ginjang, dohot hamu, angka na badia ro di angka apostel nang panurirang; ai nunga diluluhon Debata hamu tu ibana! ᯂᯞᯘ᯲ᯂᯬᯉ᯲ ᯔ ᯤ, ᯀᯞᯩ ᯅᯉᯮᯀ ᯎᯪᯉ᯲ᯐᯰ, ᯑᯬᯂᯬᯖ᯲ ᯂᯔᯮ, ᯀᯰᯄ᯦ ᯉ ᯅᯑᯪᯀ, ᯒᯬ ᯑᯪ ᯀᯰᯄ᯦ ᯀᯇᯬᯘ᯲ᯖᯩᯞ᯲ ᯉᯰ ᯇᯉᯮᯒᯪᯒᯰ : ᯀᯤ ᯉᯮᯝ ᯑᯪᯞᯮᯞᯮᯂᯬᯉ᯲ ᯑᯩᯅᯖ ᯂᯔᯮ ᯖᯮ ᯤᯅᯉ !
21 Jadi dihindat sada surusuruan na gogo ma sada batu na salosung na bolon, didabu ma i tu laut, huhut ma didok: Songon i sahali mandanggurhon, bolongkononhon ma huta Babel na balga i, gabe ndang jumpang be! ᯐᯑᯪ ᯑᯪᯂᯪᯉ᯲ᯑᯖ᯲ ᯘᯑ ᯘᯮᯒᯮᯘᯮᯒᯀᯉ᯲ ᯉ ᯎᯬᯎᯬ ᯔ ᯘᯑ ᯅᯖᯮ ᯉ ᯘᯞᯬᯘᯮᯰ ᯉ ᯅᯬᯞᯬᯉ᯲, ᯑᯪᯑᯅᯮ ᯔ ᯤ ᯖᯮ ᯞᯀᯮᯖ᯲, ᯂᯮᯂᯮᯖ᯲ ᯔ ᯑᯪᯑᯬᯄ᯦᯲ : ᯘᯬᯝᯬᯉ᯲ ᯤ ᯘᯂᯞᯪ ᯔᯉ᯲ᯑᯰᯎᯮᯒ᯲ᯂᯬᯉ᯲ ᯅᯬᯞᯬᯰᯄ᯦ᯬᯉᯬᯉ᯲ᯂᯬᯉ᯲ ᯔ ᯂᯮᯖ ᯅᯅᯩᯞ᯲ ᯉ ᯅᯞ᯲ᯎ ᯤ, ᯎᯅᯩ ᯉ᯲ᯑᯰ ᯐᯮᯔ᯲ᯇᯰ ᯅᯩ !
22 Na so tupa be tarbege di bagasan ho soara ni angka parhasapi dohot siparende dohot partulila dohot parsarune; ndang jumpang be di bagasan ho nanggo sada ragam ni siula hapandean; jala ndang be tarbege di bagasan ho pangkuling ni panduda. ᯉ ᯘᯬ ᯖᯮᯇ ᯅᯩ ᯖᯒ᯲ᯅᯩᯎᯩ ᯑᯪ ᯅᯎᯘᯉ᯲ ᯂᯬ ᯘᯬᯀᯒ ᯉᯪ ᯀᯰᯄ᯦ ᯇᯒ᯲ᯂᯘᯇᯪ ᯑᯬᯂᯬᯖ᯲ ᯘᯪᯇᯒᯩᯉ᯲ᯑᯩ, ᯑᯬᯂᯬᯖ᯲ ᯇᯒ᯲ᯖᯮᯞᯪᯞ, ᯑᯬᯂᯬᯖ᯲ ᯇᯒ᯲ᯘᯒᯮᯉᯩ : ᯉ᯲ᯑᯰ ᯐᯮᯔ᯲ᯇᯰ ᯅᯩ ᯑᯪ ᯅᯎᯘᯉ᯲ ᯂᯬ ᯉᯰᯎᯬ ᯘᯑ ᯒᯎᯔ᯲ ᯉᯪ ᯘᯪᯥᯞ ᯂᯇᯉ᯲ᯑᯩᯀᯉ᯲ ᯐᯞ ᯉ᯲ᯑᯰ ᯅᯩ ᯖᯒ᯲ᯅᯩᯎᯩ ᯑᯪ ᯅᯎᯘᯉ᯲ ᯂᯬ ᯇᯰᯄ᯦ᯮᯞᯪᯰ ᯉᯪ ᯇᯉ᯲ᯑᯮᯑ
23 Na so tupa be marsinondang di bagasan ho nanggo palito sada, ndang tagamon tarbege be di bagasan ho soara ni pangoli dohot oroan, ai naung dirajai angka partigatigamu do tano on, jala marhitehite hadatuonmu do gabe lilu angka bangso. ᯉ ᯘᯬ ᯖᯮᯇ ᯅᯩ ᯔᯒ᯲ᯘᯪᯉᯬᯉ᯲ᯑᯰ ᯑᯪ ᯅᯎᯘᯉ᯲ ᯂᯬ ᯉᯰᯎᯬ ᯇᯞᯪᯖᯬ ᯘᯑ, ᯉ᯲ᯑᯰ ᯖᯎᯔᯬᯉ᯲ ᯖᯒ᯲ᯅᯩᯎᯩ ᯅᯩ ᯑᯪ ᯅᯎᯘᯉ᯲ ᯂᯬ ᯘᯬᯀᯒ ᯉᯪ ᯇᯝᯬᯞᯪ ᯑᯬᯂᯬᯖ᯲ ᯀᯬᯒᯬᯀᯉ᯲, ᯀᯤ ᯉᯀᯮᯰ ᯑᯪᯒᯐᯤ ᯀᯰᯄ᯦ ᯇᯒ᯲ᯖᯪᯎᯖᯪᯎᯔᯮ ᯑᯪ ᯖᯉᯬ ᯀᯬᯉ᯲, ᯐᯞ ᯔᯒ᯲ᯂᯪᯖᯩᯂᯪᯖᯩ ᯂᯑᯖᯮᯀᯬᯉ᯲ᯔᯮ ᯑᯬ ᯎᯅᯩ ᯞᯪᯞᯮ ᯀᯰᯄ᯦ ᯅᯰᯘᯬ
24 Na jumpang do di bagasan huta i mudar ni angka panurirang dohot angka na badia, ro di mudar ni saluhut naung tarseat di tano on. ᯉ ᯐᯮᯔ᯲ᯇᯰ ᯑᯬ ᯑᯪ ᯅᯎᯘᯉ᯲ ᯂᯮᯖ ᯤ ᯔᯮᯑᯒ᯲ ᯉᯪ ᯀᯰᯄ᯦ ᯇᯉᯮᯒᯪᯒᯰ ᯑᯬᯂᯬᯖ᯲ ᯀᯰᯄ᯦ ᯉ ᯅᯑᯪᯀ, ᯒᯬ ᯑᯪ ᯔᯮᯑᯒ᯲ ᯉᯪ ᯘᯞᯮᯂᯮᯖ᯲ ᯉᯀᯮᯰ ᯖᯒ᯲ᯘᯩᯀᯖ᯲ ᯑᯪ ᯖᯉᯬ ᯀᯬᯉ᯲