Pangungkapon Bindu 8 ᯇᯝᯮᯰᯄ᯦ᯇᯬᯉ᯲ ᯅᯪᯉ᯲ᯑᯮ ᯥᯀᯞᯮ
Tarungkap sahap na papituhon 1-5. ᯖᯒᯮᯄ᯦ᯇ᯲ ᯘᯂᯇ᯲ ᯉ ᯇᯇᯪᯖᯮᯂᯬᯉ᯲ ᯘᯑ - ᯞᯪᯔ
I. 1 Jadi dung diungkap sahap na papituhon i, hohom ma angka na di banua ginjang i, arga satonga jom lelengna. ᯐᯑᯪ ᯑᯮᯰ ᯑᯪᯀᯮᯰᯄ᯦ᯇ᯲ ᯘᯂᯇ᯲ ᯉ ᯇᯇᯪᯖᯮᯂᯬᯉ᯲ ᯤ, ᯂᯬᯂᯬᯔ᯲ ᯔ ᯀᯰᯄ᯦ ᯉ ᯑᯪ ᯅᯉᯮᯀ ᯎᯪᯉ᯲ᯐᯰ ᯤ, ᯀᯒ᯲ᯎ ᯘᯖᯬᯝ ᯐᯬᯔ᯲ ᯞᯩᯞᯩᯰᯉ
2 Dung i huida ma na pitu surusuruan, na jongjong di adopan ni Debata, jadi dilehon ma tu nasida pitu sarune. ᯑᯮᯰ ᯤ ᯂᯮᯤᯑ ᯔ ᯉ ᯇᯪᯖᯮ ᯘᯮᯒᯮᯘᯮᯒᯮᯀᯉ᯲, ᯉ ᯐᯬᯰᯐᯬᯰ ᯑᯪ ᯀᯑᯬᯇᯉ᯲ ᯉᯪ ᯑᯩᯅᯖ, ᯐᯑᯪ ᯑᯪᯞᯩᯂᯬᯉ᯲ ᯔ ᯖᯮ ᯉᯘᯪᯑ ᯇᯪᯖᯮ ᯘᯒᯮᯉᯩ
3 Dung i ro ma surusuruan na asing, jongjong tondongkon langgatan pamelean i, ditiop ma pardaupaan sere, gabe dilehon ma tu ibana godang daupa, asa lehononna i tu atas langgatan sere na di jolo ni habangsa i, manambai tangiang ni saluhut angka na badia. ᯑᯮᯰ ᯤ ᯒᯬ ᯔ ᯘᯮᯒᯮᯘᯮᯒᯮᯀᯉ᯲ ᯉ ᯀᯘᯪᯰ, ᯐᯬᯰᯐᯬᯰ ᯖᯬᯉ᯲ᯑᯬᯰᯄ᯦ᯬᯉ᯲ ᯞᯰᯎᯖᯉ᯲ ᯇᯔᯩᯞᯩᯀᯉ᯲ ᯤ, ᯑᯪᯖᯪᯀᯬᯇ᯲ ᯔ ᯇᯒ᯲ᯑᯥᯇᯀᯉ᯲ ᯘᯩᯒᯩ, ᯎᯅᯩ ᯑᯪᯞᯩᯂᯬᯉ᯲ ᯔ ᯖᯮ ᯤᯅᯉ ᯎᯬᯑᯰ ᯑᯥᯇ, ᯀᯘ ᯞᯩᯂᯬᯉᯬᯉ᯲ᯉ ᯤ ᯖᯮ ᯀᯖᯘ᯲ ᯞᯰᯎᯖᯉ᯲ ᯘᯩᯒᯩ ᯉ ᯑᯪ ᯐᯬᯞᯬ ᯉᯪ ᯂᯅᯰᯘ ᯤ, ᯔᯉᯔ᯲ᯅᯤ ᯖᯝᯪᯀᯰ ᯉᯪ ᯘᯞᯮᯂᯮᯖ᯲ ᯀᯰᯄ᯦ ᯉ ᯅᯑᯪᯀ
4 Gabe manaek ma timus ni daupa i, tamba ni tangiang ni angka na badia i, sian tangan ni surusuruan i tujolo ni Debata. ᯎᯅᯩ ᯔᯉᯀᯩᯄ᯦᯲ ᯔ ᯖᯪᯔᯮᯘ᯲ ᯉᯪ ᯑᯥᯇ ᯤ, ᯖᯔ᯲ᯅ ᯉᯪ ᯖᯝᯪᯀᯰ ᯉᯪ ᯀᯰᯄ᯦ ᯉ ᯅᯑᯪᯀ ᯤ. ᯘᯪᯀᯉ᯲ ᯖᯝᯉ᯲ ᯉᯪ ᯘᯮᯒᯮᯘᯮᯒᯮᯀᯉ᯲ ᯤ ᯖᯮ ᯐᯬᯞᯬ ᯉᯪ ᯑᯩᯅᯖ
5 Dung i dibuat surusuruan i ma pardaupaan i, digohi ma i dohot api na sian langgatan i, didabu ma i tu tano i, gabe masa ma angka ronggur dohot soara na mardoromdorom, angka hilap dohot lalo. ᯑᯮᯰ ᯤ ᯑᯪᯅᯮᯀᯖ᯲ ᯘᯮᯒᯮᯘᯮᯒᯮᯀᯉ᯲ ᯤ ᯔ ᯇᯒ᯲ᯑᯥᯇᯀᯉ᯲ ᯤ, ᯑᯪᯎᯬᯂᯪ ᯔ ᯤ ᯑᯬᯂᯬᯖ᯲ ᯀᯇᯪ ᯉ ᯘᯪᯀᯉ᯲ ᯞᯰᯎᯖᯉ᯲ ᯤ, ᯑᯪᯑᯅᯮ ᯔ ᯤ ᯖᯮ ᯖᯉᯬ ᯤ, ᯎᯅᯩ ᯔᯘ ᯔ ᯀᯰᯄ᯦ ᯒᯬᯰᯎᯮᯒ᯲ ᯑᯬᯂᯬᯖ᯲ ᯘᯬᯀᯒ ᯉ ᯔᯒ᯲ᯑᯬᯒᯬᯔ᯲ᯑᯬᯒᯬᯔ᯲, ᯀᯰᯄ᯦ ᯂᯪᯞᯇ᯲ ᯑᯬᯂᯬᯖ᯲ ᯞᯞᯬ
Pitu surusuruan na marsarune 6-13. ᯇᯪᯖᯮ ᯘᯮᯒᯮᯘᯮᯒᯮᯀᯉ᯲ ᯉ ᯔᯒ᯲ᯘᯒᯮᯉᯩ ᯀᯬᯉᯬᯔ᯲ - ᯘᯔ᯲ᯇᯮᯞᯮ ᯖᯬᯞᯮ
II. 6 Jadi marhobas ma na pitu surusuruan, na maniop sarune na pitu i, asa dipalu sarunena be. ᯐᯑᯪ ᯔᯒ᯲ᯂᯬᯅᯘ᯲ ᯔ ᯉ ᯇᯪᯖᯮ ᯘᯮᯒᯮᯘᯮᯒᯮᯀᯉ᯲, ᯉ ᯔᯉᯪᯀᯬᯇ᯲ ᯘᯒᯮᯉᯩ ᯉ ᯇᯪᯖᯮ ᯤ, ᯀᯘ ᯑᯪᯇᯞᯮ ᯘᯒᯮᯉᯩᯉ ᯅᯩ
7 Gabe dipalu na parjolo i ma sarunena, jadi masa ma ambolas dohot api saor mudar didabu tu tano i, gabe mosok ma sapartolu ni tano i, mosok ma dohot sapartolu ni angka hau, mosok ma nang saluhut duhutduhut na rata i. ᯎᯅᯩ ᯑᯪᯇᯞᯮ ᯉ ᯇᯒ᯲ᯐᯬᯞᯬ ᯤ ᯔ ᯘᯒᯮᯉᯩᯉ, ᯐᯑᯪ ᯔᯘ ᯔ ᯀᯔ᯲ᯅᯬᯞᯘ᯲ ᯑᯬᯂᯬᯖ᯲ ᯀᯇᯪ ᯘᯀᯬᯒ᯲ ᯔᯮᯑᯒ᯲ ᯑᯪᯑᯅᯮ ᯖᯮ ᯖᯉᯬ ᯤ, ᯎᯅᯩ ᯔᯬᯘᯬᯄ᯦᯲ ᯔ ᯘᯇᯒ᯲ᯖᯬᯞᯮ ᯉᯪ ᯖᯉᯬ ᯤ, ᯔᯬᯘᯬᯄ᯦᯲ ᯔ ᯑᯬᯂᯬᯖ᯲ ᯘᯇᯒ᯲ᯖᯬᯞᯮ ᯉᯪ ᯀᯰᯄ᯦ ᯂᯥ, ᯔᯬᯘᯬᯄ᯦᯲ ᯔ ᯉᯰ ᯘᯞᯮᯂᯮᯖ᯲ ᯑᯮᯂᯮᯖ᯲ᯑᯮᯂᯮᯖ᯲ ᯉ ᯒᯖ ᯤ
8 Dung i dipalu surusuruan na paduahon ma sarunena, gabe didabu ma api tu laut songon dolok na balga na marsigorgor, gabe mudar ma sapartolu ni laut i. ᯑᯮᯰ ᯤ ᯑᯪᯇᯞᯮ ᯘᯮᯒᯮᯘᯮᯒᯮᯀᯉ᯲ ᯉ ᯇᯑᯮᯀᯂᯬᯉ᯲ ᯔ ᯘᯒᯮᯉᯩᯉ, ᯎᯅᯩ ᯑᯪᯑᯅᯮ ᯔ ᯀᯇᯪ ᯖᯮ ᯞᯀᯮᯖ᯲ ᯘᯬᯝᯬᯉ᯲ ᯑᯬᯞᯬᯄ᯦᯲ ᯉ ᯅᯞ᯲ᯎ ᯉ ᯔᯒ᯲ᯘᯪᯎᯬᯒ᯲ᯎᯬᯒ᯲, ᯎᯅᯩ ᯔᯮᯑᯒ᯲ ᯔ ᯘᯇᯒᯖᯬᯞᯮ ᯉᯪ ᯞᯀᯮᯖ᯲ ᯤ
9 Laos mate ma sapartolu ni angka na tinompa na mangolu di laut, rendep ma sapartolu ni angka parau. ᯞᯀᯬᯘ᯲ ᯔᯖᯩ ᯔ ᯘᯇᯒ᯲ᯖᯬᯞᯮ ᯉᯪ ᯀᯰᯄ᯦ ᯉ ᯖᯪᯉᯬᯔ᯲ᯇ ᯉ ᯔᯝᯬᯞᯮ ᯑᯪ ᯞᯀᯮᯖ᯲, ᯒᯩᯉ᯲ᯑᯩᯇ᯲ ᯔ ᯘᯇᯒ᯲ᯖᯬᯞᯮ ᯉᯪ ᯀᯰᯄ᯦ ᯇᯒᯥ
10 Dung i dipalu surusuruan na patoluhon ma sarunena, gabe madabu ma sian langit sada bintang na balga, na marsigorgor songon palito, laos ditinggang ma sapartolu ni angka batang aek dohot mual. ᯑᯮᯰ ᯤ ᯑᯪᯇᯞᯮ ᯘᯮᯒᯮᯘᯮᯒᯮᯀᯉ᯲ ᯉ ᯇᯖᯬᯞᯮᯂᯬᯉ᯲ ᯔ ᯘᯒᯮᯉᯩᯉ, ᯎᯅᯩ ᯔᯑᯅᯮ ᯔ ᯘᯪᯀᯉ᯲ ᯞᯝᯪᯖ᯲ ᯘᯑ ᯅᯪᯉ᯲ᯖᯰ ᯉ ᯅᯞ᯲ᯎ ᯉ ᯔᯒ᯲ᯘᯪᯎᯬᯒ᯲ᯎᯬᯒ᯲ ᯘᯬᯝᯬᯉ᯲ ᯇᯞᯪᯖᯬ, ᯞᯀᯬᯘ᯲ ᯑᯪᯖᯪᯰᯎᯰ ᯔ ᯘᯇᯒ᯲ᯖᯬᯞᯮ ᯉᯪ ᯀᯰᯄ᯦ ᯅᯖᯰ ᯀᯀᯩᯄ᯦᯲ ᯑᯬᯂᯬᯖ᯲ ᯔᯮᯀᯞ᯲
11 Apsintos (hapaeton) do goar ni bintang i; jadi gabe paet do sapartolu ni aek i, laos mate do torop halak dibahen aek i, naung gabe paet. ᯀᯇ᯲ᯘᯪᯉ᯲ᯖᯬᯘ᯲ (ᯂᯇᯀᯩᯖᯬᯉ᯲) ᯑᯬ ᯎᯬᯀᯒ᯲ ᯉᯪ ᯅᯪᯉᯖᯰ ᯤ, ᯐᯑᯪ ᯎᯅᯩ ᯇᯀᯩᯖ᯲ ᯑᯬ ᯘᯇᯒ᯲ᯖᯬᯞᯮ ᯉᯪ ᯀᯀᯩᯄ᯲ ᯤ, ᯞᯀᯬᯘ᯲ ᯔᯖᯩ ᯑᯬ ᯖᯬᯒᯬᯇ᯲ ᯂᯞᯄ᯦᯲ ᯑᯪᯅᯂᯩᯉ᯲ ᯀᯀᯩᯄ᯦᯲ ᯤ ᯉᯀᯮᯰ ᯎᯅᯩ ᯇᯀᯩᯖ᯲
12 Dung i dipalu surusuruan na paopathon ma sarunena, gabe hona pungkul ma sapartolu ni mata ni ari dohot sapartolu ni bulan dohot sapartolu ni angka bintang, gabe mangkolom ma na sapartolu i, laos so marsinondang be na sapartolu i arianna, borngin i pe songon i do. ᯑᯮᯰ ᯤ ᯑᯪᯇᯞᯮ ᯘᯮᯒᯮᯘᯮᯒᯮᯀᯉ᯲ ᯉ ᯇᯀᯬᯇᯖ᯲ᯂᯬᯉ᯲ ᯔ ᯘᯒᯮᯉᯩᯉ, ᯎᯅᯩ ᯂᯬᯉ ᯇᯮᯰᯄ᯦ᯮᯞ᯲ ᯔ ᯘᯇᯒ᯲ᯖᯬᯞᯮ ᯉᯪ ᯔᯖ ᯉᯪ ᯀᯒᯪ ᯑᯬᯂᯬᯖ᯲ ᯘᯇᯒ᯲ᯖᯬᯞᯮ ᯉᯪ ᯅᯮᯞᯉ᯲ ᯑᯬᯂᯬᯖ᯲ ᯘᯇᯒ᯲ᯖᯬᯞᯮ ᯉᯪ ᯀᯰᯄ᯦ ᯅᯪᯉ᯲ᯖᯰ, ᯎᯅᯩ ᯔᯰᯄ᯦ᯬᯞᯬᯔ᯲ ᯔ ᯉ ᯘᯇᯒ᯲ᯖᯬᯞᯮ ᯤ, ᯞᯀᯬᯘ᯲ ᯘᯬ ᯔᯒ᯲ᯘᯪᯉᯬᯉ᯲ᯑᯰ ᯅᯩ ᯉ ᯘᯇᯒ᯲ᯖᯬᯞᯮ ᯤ ᯀᯒᯪᯀᯉ᯲ᯉ, ᯅᯬᯒ᯲ᯝᯪᯉ᯲ ᯤ ᯇᯩ ᯘᯬᯝᯬᯉ᯲ ᯤ ᯑᯬ
13 Dung i hubereng, jadi hubege ma sada pidong raja ualu habang martongatonga langit; marsoara na gogo do ibana mandok: Marjea, marjea, marjea ma angka na mangingani tano i, horhonon ni soara na tading i dope, i ma sarune ni surusuruan na tolu nari, angka na naeng marsarune dope! ᯑᯮᯰ ᯤ ᯂᯮᯅᯩᯒᯩᯰ ᯐᯑᯪ ᯂᯮᯅᯩᯎᯩ ᯔ ᯘᯑ ᯇᯪᯑᯬᯰ ᯒᯐᯥᯀᯞᯮ ᯂᯅᯰ ᯔᯒ᯲ᯖᯬᯝᯖᯬᯝ ᯞᯝᯪᯖ᯲, ᯔᯒ᯲ᯘᯬᯀᯒ ᯉ ᯎᯬᯎᯬ ᯑᯬ ᯤᯅᯉ ᯔᯉ᯲ᯑᯬᯄ᯦᯲ : ᯔᯒ᯲ᯐᯩᯀ ᯔᯒ᯲ᯐᯩᯀ ᯔᯒ᯲ᯐᯩᯀ ᯔ ᯀᯰᯄ᯦ ᯉ ᯔᯝᯪᯝᯉᯪ ᯖᯉᯬ ᯤ ᯂᯬᯒ᯲ᯂᯬᯉᯬᯉ᯲ ᯉᯪ ᯘᯬᯀᯒ ᯉ ᯖᯑᯪᯰ ᯤ ᯑᯬᯇᯩ, ᯤ ᯔ ᯘᯒᯮᯉᯩ ᯉᯪ ᯘᯮᯒᯮᯘᯮᯒᯮᯀᯉ᯲ ᯉ ᯖᯬᯞᯮ ᯉᯒᯪ, ᯀᯰᯄ᯦ ᯉ ᯉᯀᯩᯰ ᯔᯒ᯲ᯘᯒᯮᯉᯩ ᯑᯬᯇᯩ