Pangungkapon Bindu 7 ᯇᯝᯮᯰᯄ᯦ᯇᯬᯉ᯲ ᯅᯪᯉ᯲ᯑᯮ ᯇᯪᯖᯮ

Pangungkapon Bindu 7  ᯇᯝᯮᯰᯄ᯦ᯇᯬᯉ᯲ᯅᯪᯉ᯲ᯑᯮ ᯇᯪᯖᯮ

Angka na tarsahap 1-8. ᯀᯰᯄ᯦ ᯉ ᯖᯒ᯲ᯘᯂᯇ᯲ ᯘᯑ - ᯥᯀᯞᯮ

I. 1 Dung salpu i, huida ma opat surusuruan jongjong di na opat desa ni tano i, angka na maniop na opat alogo ni tano i, asa unang mangombus alogo di tano, nang di laut nang tu sada hau pe.  ᯑᯮᯰ ᯘᯞ᯲ᯇᯮ ᯤ, ᯂᯮᯤᯑ ᯔ ᯀᯬᯇᯖ᯲ ᯘᯮᯒᯮᯘᯮᯒᯮᯀᯉ᯲ ᯐᯬᯰᯐᯬᯰ ᯑᯪ ᯉ ᯀᯬᯇᯖ᯲ ᯑᯩᯘ ᯉᯪ ᯖᯉᯬ ᯤ, ᯀᯰᯄ᯦ ᯉ ᯔᯉᯪᯀᯬᯇ᯲  ᯉ ᯀᯬᯇᯖ᯲ ᯀᯞᯬᯎᯬ ᯉᯪ ᯖᯉᯬ ᯤ, ᯀᯘ ᯥᯉᯰ ᯔᯝᯬᯔ᯲ᯅᯮᯘ᯲ ᯀᯞᯬᯎᯬ ᯑᯪ ᯖᯉᯬ, ᯉᯰ ᯑᯪ ᯞᯀᯮᯖ᯲ ᯉᯰ ᯖᯮ ᯘᯑ ᯂᯥ ᯇᯩ

2 Dung i huida ma surusuruan na asing hehe sian habinsaran ni mata ni ari, na maniop sahap ni Debata na mangolu, jadi balga ma soarana manjouhon dompak surusuruan na opat i, angka naung manjalo sahala mangago tano dohot laut. ᯑᯮᯰ ᯤ ᯂᯮᯤᯑ ᯔ ᯘᯮᯒᯮᯘᯮᯒᯮᯀᯉ᯲ ᯉ ᯀᯘᯪᯰ ᯂᯩᯂᯩ ᯘᯪᯀᯉ᯲ ᯂᯅᯪᯉ᯲ᯘᯒᯉ᯲ ᯉᯪ ᯔᯖ ᯉᯪ ᯀᯒᯪ, ᯉ ᯔᯉᯪᯀᯬᯇ᯲ ᯘᯂᯇ᯲ ᯉᯪ ᯑᯩᯅᯖ ᯉ ᯔᯝᯬᯞᯮ, ᯐᯑᯪ ᯅᯞ᯲ᯎ ᯔ ᯘᯬᯀᯒᯉ ᯔᯉ᯲ᯐᯬᯥᯂᯬᯉ᯲ ᯑᯬᯔ᯲ᯇᯄ᯦᯲ ᯘᯮᯒᯮᯘᯮᯒᯮᯀᯉ᯲ ᯉ ᯀᯬᯇᯖ᯲ ᯤ, ᯀᯰᯄ᯦ ᯉᯀᯮᯰ  ᯔᯉ᯲ᯐᯞᯬ ᯘᯂᯞ ᯔᯝᯎᯬ ᯖᯉᯬ ᯑᯬᯂᯬᯖ᯲ ᯞᯀᯮᯖ᯲

3 Ninna ma: Unang ma ago hamu tano nang laut nang angka hau, paima husahapi hami angka naposo ni Debatanta di bohinasida be!  ᯉᯪᯉ᯲ᯉ ᯔ : ᯥᯉᯰ ᯔ ᯀᯎᯬ ᯂᯔᯮ ᯖᯉᯬ ᯉᯰ ᯞᯀᯮᯖ᯲ ᯉᯰ ᯀᯰᯄ᯦ ᯂᯥ, ᯇᯤᯔ ᯂᯮᯘᯂᯇᯪ ᯂᯔᯪ ᯀᯰᯄ᯦ ᯉᯇᯬᯘᯬ ᯉᯪ ᯑᯩᯅᯖᯉ᯲ᯖ ᯑᯪ ᯅᯬᯂᯪᯉᯘᯪᯑ ᯅᯩ !

4 Laos hubege do bilangan ni angka na tarsahap i: Saratus opatpulu opat ribu sian saluhut marga ni halak Israel:  ᯞᯀᯬᯘ᯲ ᯂᯮᯅᯩᯎᯩ ᯑᯬ ᯅᯪᯞᯝᯉ᯲ ᯉᯪ ᯀᯰᯄ᯦ ᯉ ᯖᯒ᯲ᯘᯂᯇ᯲ ᯤ : ᯘᯒᯖᯮᯘ᯲ ᯀᯬᯇᯖ᯲ᯇᯮᯞᯮ ᯀᯬᯇᯖ᯲ ᯒᯪᯅᯮ ᯘᯪᯀᯉ᯲ ᯘᯞᯮᯂᯮᯖ᯲ ᯔᯒ᯲ᯎ ᯉᯪ ᯀᯪᯘ᯲ᯒᯀᯩᯞ᯲

5 Sian marga Juda sampuludua ribu angka na tarsahap, sian marga Ruben sampuludua ribu, sian marga Gad sampuludua ribu, ᯘᯪᯀᯉ᯲ ᯔᯒ᯲ᯎ ᯐᯮᯑ ᯘᯔ᯲ᯇᯮᯞᯮᯑᯮᯀ ᯒᯪᯅᯮ ᯀᯰᯄ᯦ ᯉ ᯖᯒ᯲ᯘᯂᯇ᯲, ᯘᯪᯀᯉ᯲ ᯔᯒ᯲ᯎ ᯒᯮᯅᯩᯉ᯲ ᯘᯔ᯲ᯇᯮᯞᯮᯑᯮᯀ ᯒᯪᯅᯮ, ᯘᯪᯀᯉ᯲ ᯔᯒ᯲ᯎ ᯎᯑ᯲ ᯘᯔ᯲ᯇᯮᯞᯮᯑᯮᯀ ᯒᯪᯅᯮ

6 sian marga Aser sampuludua ribu, sian marga Naptali sampuludua ribu, sian marga Manasse sampuludua ribu, ᯘᯪᯀᯉ᯲ ᯔᯒ᯲ᯎ ᯀᯘᯩᯒ᯲ ᯘᯔ᯲ᯇᯮᯞᯮᯑᯮᯀ ᯒᯪᯅᯮ, ᯘᯪᯀᯉ᯲ ᯔᯒ᯲ᯎ ᯉᯇ᯲ᯖᯞᯪ ᯘᯔ᯲ᯇᯮᯞᯮᯑᯮᯀ ᯒᯪᯅᯮ, ᯘᯪᯀᯉ᯲ ᯔᯒ᯲ᯎ ᯔᯉᯘ᯲ᯘᯩ ᯘᯔ᯲ᯇᯮᯞᯮᯑᯮᯀ ᯒᯪᯅᯮ

7 sian marga Simeon sampuludua ribu, sian marga Lepi sampuludua ribu, sian marga Isasar sampuludua ribu, ᯘᯪᯀᯉ᯲ ᯔᯒ᯲ᯎ ᯘᯪᯔᯩᯀᯬᯉ᯲ ᯘᯔ᯲ᯇᯮᯞᯮᯑᯮᯀ ᯒᯪᯅᯮ, ᯘᯪᯀᯉ᯲ ᯔᯒ᯲ᯎ ᯞᯩᯇᯪ ᯘᯔ᯲ᯇᯮᯞᯮᯑᯮᯀ ᯒᯪᯅᯮ, ᯘᯪᯀᯉ᯲ ᯔᯒ᯲ᯎ ᯤᯘᯘᯒ᯲ ᯘᯔ᯲ᯇᯮᯞᯮᯑᯮᯀ ᯒᯪᯅᯮ

8 sian marga Zebulon sampuludua ribu, sian marga Josep sampuludua ribu, sian marga Benjamin sampuludua ribu angka na tarsahap.ᯘᯪᯀᯉ᯲ ᯔᯒ᯲ᯎ ᯐᯩᯅᯮᯞᯬᯉ᯲ ᯘᯔ᯲ᯇᯮᯞᯮᯑᯮᯀ ᯒᯪᯅᯮ, ᯘᯪᯀᯉ᯲ ᯔᯒ᯲ᯎ ᯐᯬᯘᯩᯇ᯲ ᯘᯔ᯲ᯇᯮᯞᯮᯑᯮᯀ ᯒᯪᯅᯮ, ᯘᯪᯀᯉ᯲ ᯔᯒ᯲ᯎ ᯅᯩᯉ᯲ᯐᯔᯪᯉ᯲ ᯘᯔ᯲ᯇᯮᯞᯮᯑᯮᯀ ᯒᯪᯅᯮ ᯀᯰᯄ᯦ ᯉ ᯖᯒ᯲ᯘᯂᯇ᯲

Angka na tinobus sian saluhut bangso 9-17. ᯀᯰᯄ᯦ ᯉ ᯖᯪᯉᯬᯅᯮᯘ᯲ ᯘᯪᯀᯉ᯲ ᯘᯞᯮᯂᯮᯖ᯲ ᯅᯰᯘᯬ  ᯘᯪᯀ - ᯘᯔ᯲ᯇᯮᯞᯮᯇᯪᯖᯮ  

II. 9 Dung salpu i, adong ma hubereng mansai torop, na so dapot bilangan ni jolma, sian nasa bangso, marga dohot houm dohot hata, angka na jongjong diadopan ni habangsa i dohot di adopan ni Birubiru i, angka na maruloshon abit na saksak jala na maniop maremare di tangannasida.  ᯑᯮᯰ ᯘᯞ᯲ᯇᯮ ᯤ, ᯀᯑᯬᯰ ᯔ ᯂᯮᯅᯩᯒᯩᯰ ᯔᯉ᯲ᯘᯤ ᯖᯬᯒᯬᯇ᯲, ᯉ ᯘᯬ ᯑᯇᯬᯖ᯲ ᯅᯪᯞᯝᯉ᯲ ᯉᯪ ᯐᯬᯞ᯲ᯔ, ᯘᯪᯀᯉ᯲ ᯉᯘ ᯅᯰᯘᯬ, ᯔᯒ᯲ᯎ ᯑᯬᯂᯬᯖ᯲ ᯂᯬᯀᯮᯔ᯲ ᯑᯬᯂᯬᯖ᯲ ᯂᯖ ᯀᯰᯄ᯦ ᯉ ᯐᯬᯰᯐᯬᯰ ᯑᯪ ᯀᯑᯬᯇᯉ᯲ ᯉᯪ ᯂᯅᯰᯘ ᯤ ᯑᯬᯂᯬᯖ᯲ ᯑᯪ ᯀᯑᯬᯇᯉ᯲ ᯉᯪ ᯅᯪᯒᯮᯅᯪᯒᯮ ᯤ, ᯀᯰᯄ᯦ ᯉ ᯔᯒᯮᯞᯬᯘ᯲ᯂᯬᯉ᯲ ᯀᯅᯪᯖ᯲ ᯉ ᯘᯄ᯦᯲ᯘᯄ᯦᯲ ᯐᯞ ᯉ ᯔᯉᯪᯀᯬᯇ᯲ ᯔᯒᯩᯔᯒᯩ ᯑᯪ ᯖᯝᯉ᯲ᯉᯘᯪᯑ

10 Gogo ma soaranasida manjoujou, angka ninna ma: Tua ma di Debatanta, na mangkunduli habangsa i, dohot di Birubiru i!  ᯎᯬᯎᯬ ᯔ ᯘᯬᯀᯒ ᯉᯘᯪᯑ ᯔᯉ᯲ᯐᯬᯥᯐᯬᯥ, ᯀᯰᯄ᯦ ᯉᯪᯉ᯲ᯉ ᯔ : ᯖᯮᯀ ᯔ ᯑᯪ ᯑᯩᯅᯖᯉ᯲ᯖ, ᯉ ᯔᯰᯄ᯦ᯮᯉ᯲ᯑᯮᯞᯪ ᯂᯅᯰᯘ ᯤ, ᯑᯬᯂᯬᯖ᯲ ᯑᯪ ᯅᯪᯒᯮᯅᯪᯒᯮ ᯤ !

11 Jadi jongjong ma saluhut surusuruan i humaliang habangsa i dohot humaliang angka sintua i dohot parngolu na opat i, dung i manungkap ma nasida di jolo ni habangsa i huhut marsomba tu Debata.  ᯐᯑᯪ ᯐᯬᯰᯐᯬᯰ ᯔ ᯘᯞᯮᯂᯮᯖ᯲ ᯘᯮᯒᯮᯘᯮᯒᯮᯀᯉ᯲ ᯤ ᯂᯮᯔᯞᯪᯀᯰ ᯂᯅᯰᯘ ᯤ ᯑᯬᯂᯬᯖ᯲ ᯂᯮᯔᯞᯪᯀᯰ ᯀᯰᯄ᯦ ᯘᯪᯉ᯲ᯖᯮᯀ ᯤ ᯑᯬᯂᯬᯖ᯲ ᯇᯒ᯲ᯝᯬᯞᯮ ᯉ ᯀᯬᯇᯖ᯲ ᯤ, ᯑᯮᯰ ᯤ ᯔᯉᯮᯰᯄ᯦ᯇ᯲ ᯔ ᯉᯘᯪᯑ ᯑᯪ ᯐᯬᯞᯬ ᯉᯪ ᯂᯅᯰᯘ ᯤ ᯂᯮᯂᯮᯖ᯲ ᯔᯒ᯲ᯘᯬᯔ᯲ᯅ ᯖᯮ ᯑᯩᯅᯖ

12 Ninna nasida ma: Amen! Pujipujian dohot hasangapon dohot hapistaran dohot hamauliateon dohot hagogoon dohot hatoguon ma di Debatanta ro di salelenglelengna! Amen.  ᯉᯪᯉ᯲ᯉ ᯉᯘᯪᯑ ᯔ : ᯀᯔᯩᯉ᯲ ! ᯇᯮᯐᯪᯇᯮᯐᯪᯀᯉ᯲ ᯑᯬᯂᯬᯖ᯲ ᯂᯘᯝᯇᯬᯉ᯲ ᯑᯬᯂᯬᯖ᯲ ᯂᯇᯪᯘ᯲ᯖᯒᯉ᯲ ᯑᯬᯂᯬᯖ᯲ ᯂᯔᯥᯞᯪᯀᯖᯩᯀᯬᯉ᯲ ᯑᯬᯂᯬᯖ᯲ ᯂᯎᯬᯎᯬᯀᯬᯉ᯲ ᯑᯬᯂᯬᯖ᯲ ᯂᯖᯬᯎᯮᯀᯬᯉ᯲ ᯔ ᯑᯪ ᯑᯩᯅᯖᯉ᯲ᯖ ᯒᯬ ᯑᯪ ᯘᯞᯩᯞᯩᯰᯞᯩᯞᯩᯰᯉ ! ᯀᯔᯩᯉ᯲

13 Dung i mangalusi ma sada sian angka sintua, didok ma mandok ahu: Ise do angka i; jala sian dia do ro angka na maruloshon abit na saksak i?  ᯑᯮᯰ ᯤ ᯔᯝᯞᯮᯘᯪ ᯔ ᯘᯑ ᯘᯪᯀᯉ᯲ ᯀᯰᯄ᯦ ᯘᯪᯉ᯲ᯖᯮᯀ, ᯑᯪᯑᯬᯄ᯦᯲ ᯔ ᯔᯉ᯲ᯑᯬᯄ᯦᯲ ᯀᯂᯮ : ᯤᯘᯩ ᯑᯬ ᯀᯰᯄ᯦ ᯤ : ᯐᯞ ᯘᯪᯀᯉ᯲ ᯑᯪᯀ ᯑᯬ ᯒᯬ ᯀᯰᯄ᯦ ᯉ ᯔᯒᯮᯞᯬᯘ᯲ᯂᯬᯉ᯲ ᯀᯅᯪᯖ᯲ ᯉ ᯘᯄ᯦᯲ᯘᯄ᯦᯲ ᯤ ? 

14 Jadi hudok ma mandok ibana: Ale tuanku, ho do umbotosa. Gabe didok ma tu ahu: I ma angka naung ro sian haporsuhon godang; nunga diburi nasida abitnasida jala dipasaksak di bagasan mudar ni Birubiru i.  ᯐᯑᯪ ᯂᯮᯑᯬᯄ᯦᯲ ᯔ ᯔᯉ᯲ᯑᯬᯄ᯦᯲ ᯤᯅᯉ : ᯀᯞᯩ ᯖᯮᯀᯉ᯲ᯄ᯦ᯮ, ᯂᯬ ᯑᯬ ᯀᯮᯔ᯲ᯅᯬᯖᯬᯘ. ᯎᯅᯩ ᯑᯪᯑᯬᯄ᯦᯲ ᯔ ᯖᯮ ᯀᯂᯮ : ᯤ ᯔ ᯀᯰᯄ᯦ ᯉᯀᯮᯰ  ᯒᯬ ᯘᯪᯀᯉ᯲ ᯂᯇᯬᯒ᯲ᯘᯮᯂᯬᯉ᯲ ᯎᯬᯑᯰ : ᯉᯮᯝ ᯑᯪᯅᯮᯒᯪ ᯉᯘᯪᯑ ᯀᯅᯪᯖ᯲ᯉᯘᯪᯑ ᯐᯞ ᯑᯪᯇᯘᯄ᯦᯲ᯘᯄ᯦᯲ ᯑᯪᯅᯎᯘᯉ᯲ ᯔᯮᯑᯒ᯲ ᯉᯪ ᯅᯪᯒᯮᯅᯪᯒᯮ ᯤ

15 Ala ni i sai di jolo ni habangsa ni Debata do nasida, mangoloi Ibana arian dohot borngin di bagasan jorona i, jala Ibana, na mangkunduli habangsa i, ma paulihon inganan di atasnasida.  ᯀᯞ ᯉᯪ ᯤ ᯘᯤ ᯑᯪ ᯐᯬᯞᯬ ᯉᯪ ᯂᯅᯰᯘ ᯉᯪ ᯑᯩᯅᯖ ᯑᯬ ᯉᯘᯪᯑ, ᯔᯝᯬᯞᯬᯤ ᯤᯅᯉ ᯀᯒᯪᯀᯉ᯲ ᯑᯬᯂᯬᯖ᯲ ᯅᯬᯒ᯲ᯝᯪᯉ᯲ ᯑᯪ ᯅᯎᯘᯉ᯲ ᯐᯬᯒᯬᯉ ᯤ, ᯐᯞ ᯤᯅᯉ, ᯉ ᯔᯰᯄ᯦ᯮᯉ᯲ᯑᯮᯞᯪ ᯂᯅᯰᯘ ᯤ ᯔ ᯇᯥᯞᯪᯂᯬᯉ᯲ ᯤᯝᯉᯉ᯲ ᯑᯪ ᯀᯖᯘ᯲ᯉᯘᯪᯑ

16 Ndang be male nasida, ndang be mauas, ndang be ditinggang las ni ari nasida, manang dia na mohop pe.  ᯉ᯲ᯑᯰ ᯅᯩ ᯔᯞᯩ ᯉᯘᯪᯑ, ᯉ᯲ᯑᯰ ᯅᯩ ᯔᯥᯀᯘ᯲, ᯉ᯲ᯑᯰ ᯅᯩ ᯑᯪᯖᯪᯰᯎᯰ ᯞᯘ᯲ ᯉᯪ ᯀᯒᯪ ᯉᯘᯪᯑ, ᯔᯉᯰ ᯑᯪᯀ ᯉ ᯔᯬᯂᯬᯇ᯲ ᯇᯩ

17 Ai parmahanon ni Birubiru na di parsitongaan ni habangsa i do nasida jadi togihononna ma nasida tu angka mual aek hangoluan, jadi apusan ni Debata nasa iluilu sian matanasida. ᯀᯤ ᯇᯒ᯲ᯔᯂᯉᯬᯉ᯲ ᯉᯪ ᯅᯪᯒᯮᯅᯪᯒᯮ ᯉ ᯑᯪ ᯇᯒ᯲ᯘᯪᯖᯬᯝᯀᯉ᯲ ᯉᯪ ᯂᯅᯰᯘ ᯤ ᯑᯬ ᯉᯘᯪᯑ ᯐᯑᯪ ᯖᯬᯎᯪᯂᯬᯉᯬᯉ᯲ᯉ ᯔ ᯉᯘᯪᯑ ᯖᯮ ᯀᯰᯄ᯦ ᯔᯮᯀᯞ᯲ ᯀᯀᯩᯄ᯦᯲ ᯂᯝᯬᯞᯮᯀᯉ᯲, ᯐᯑᯪ ᯀᯇᯮᯘᯉ᯲ ᯉᯪ ᯑᯩᯅᯖ ᯉᯘ ᯤᯞᯮᯤᯞᯮ ᯘᯪᯀᯉ᯲ ᯔᯖᯉᯘᯪᯑ