ᯖᯮᯒᯪᯖᯮᯪᯀᯉ᯲ ᯉᯪ ᯘᯪ ᯀᯐᯪ ᯇᯉᯰᯮᯄ᯦ᯮᯉᯉ᯲ Turi-turian ni si Aji Panungkunan Turpuk Palimahon (Pangke Android)

Mansai loja dope nian tutu idaon sidua halak i, alai nunga be tiur rohana, nunga mulak tondi tu ruma. 

ᯔᯉ᯲ᯘᯤ ᯞᯬᯐ ᯑᯬᯇᯩ ᯉᯪᯀᯉ᯲ ᯖᯮᯖᯮ ᯤᯑᯀᯉᯬ᯲ ᯘᯪᯑᯮᯀ ᯂᯞᯂ᯲ ᯤ ᯀᯞᯤ ᯉᯮᯝ ᯅᯩ ᯖᯪᯀᯒᯮ᯲ ᯒᯬᯂᯉ ᯉᯮᯝ ᯔᯮᯞᯂ᯲ ᯖᯉᯬ᯲ᯑᯪ ᯖᯮ ᯒᯮᯔ

Jadi mangkatai ma na tumua sian nasida, ninna ma, 

ᯐᯑᯪ ᯔᯰᯂᯖᯤ ᯔ ᯉ ᯖᯮᯔᯮᯀ ᯘᯪᯀᯉ᯲ ᯉᯘᯪᯑ ᯉᯉᯪ᯲ᯉ ᯔ

Nunga huboan hami rajanami ubat ni boru ni raja i, i ma gala-gala, na pitu sangkariang, na mardongan gala-gala sirumondang bulan, na dapot di dangka papituhon. 

ᯉᯮᯝ ᯂᯮᯅᯬᯀᯉ᯲ ᯂᯔᯪ ᯒᯐᯉᯔᯪ ᯥᯅᯖ᯲ ᯉᯪ ᯅᯬᯒᯮ ᯉᯪ ᯒᯐ ᯤ ᯤ ᯔ ᯎᯞᯎᯞ ᯉ ᯇᯪᯖᯮ ᯘᯰᯂᯒᯪᯀᯰ ᯉ ᯔᯒ᯲ᯑᯬᯝᯉ᯲ ᯎᯞᯎᯞ ᯘᯪᯒᯮᯔᯉᯬ᯲ᯑᯰ ᯅᯮᯞᯉ᯲ ᯉ ᯑᯇᯖᯬ᯲ ᯑᯪ ᯑᯰᯂ ᯇᯇᯪᯖᯮᯂᯉᯬ᯲

Nuaeng pe rajanami, lehon hamu ma dipangan na marsahit i. 

ᯉᯮᯀᯀᯰᯩ ᯇᯩ ᯒᯐᯉᯔᯪ ᯞᯩᯂᯉᯬ᯲ ᯂᯔᯮ ᯔ ᯑᯪᯇᯝᯉ᯲ ᯉ ᯔᯒ᯲ᯘᯂᯖᯪ᯲ ᯤ

Si Aji Panungkunan do manjangkit i, dung dipaboa lali na tulis tulis disi tabasna laho manjangkit. 

ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯑᯬ ᯔᯉ᯲ᯐᯰᯂᯖᯪ᯲ ᯤ ᯑᯮᯰ ᯑᯪᯇᯅᯬᯀ ᯞᯞᯪ ᯉ ᯖᯮᯞᯘᯪ᯲ᯖᯮᯞᯘᯪ᯲ ᯑᯪᯘᯪ ᯖᯅᯘ᯲ᯉ ᯞᯂᯬ ᯔᯉ᯲ᯐᯰᯂᯖᯪ᯲

Ai sai runsur do hami na tolu di mulana i, dang adong na bolas tu ginjang. 

ᯀᯤ ᯘᯤ ᯒᯉᯮ᯲ᯘᯒᯮ᯲ ᯑᯬ ᯂᯔᯪ ᯉ ᯖᯬᯞᯮ ᯑᯪ ᯔᯮᯞᯉ ᯤ ᯑᯰ ᯀᯑᯬᯰ ᯉ ᯅᯬᯞᯘ᯲ ᯖᯮ ᯎᯉᯪ᯲ᯐᯰ

lbana do mamutikkon tampukna i, jala mansai las ma rohanami dung sahat ibana tu toru, di bona ni gala-gala i. 

ᯤᯅᯉ ᯑᯬ ᯔᯔᯮᯖᯂᯪ᯲ᯂᯉᯬ᯲ ᯖᯔ᯲ᯇᯂᯮ᯲ᯉ ᯤ ᯐᯞ ᯔᯉ᯲ᯘᯤ ᯞᯘ᯲ ᯔ ᯒᯬᯂᯉᯔᯪ ᯑᯮᯰ ᯘᯂᯖ᯲ ᯤᯅᯉ ᯖᯮ ᯖᯬᯒᯮ ᯑᯪ ᯅᯬᯉ ᯉᯪ ᯎᯞᯎᯞ ᯤ

Rap mamboan do hami sahat tu parbornginannami na parjolo, i ma sopo na tarulang!

ᯒᯇ᯲ ᯔᯔ᯲ᯅᯬᯀᯉ᯲ ᯑᯬ ᯂᯔᯪ ᯘᯂᯖ᯲ ᯖᯮ ᯇᯖ᯲ᯅᯒᯬ᯲ᯝᯪᯉᯉ᯲ᯉᯔᯪ ᯉ ᯇᯒ᯲ᯐᯬᯞᯬ ᯤ ᯤ ᯔ ᯘᯬᯇᯬ ᯉ ᯖᯒᯮᯞᯰ

Dung sahat ro disi dibaritahon, mulak ma ibana songon na mabiar, ai diingot ma bogas ni homang i. 

ᯑᯮᯰ ᯘᯂᯖ᯲ ᯒᯬ ᯑᯪᯘᯪ ᯑᯪᯅᯒᯪᯖᯂᯉᯬ᯲ ᯔᯮᯞᯐ᯲ ᯔ ᯤᯅᯉ ᯘᯬᯝᯉᯬ᯲ ᯉ ᯔᯅᯪᯀᯒ᯲ ᯀᯤ ᯑᯪᯤᯝᯖᯬ᯲ ᯔ ᯅᯬᯎᯘ᯲ ᯉᯪ ᯂᯬᯔᯰ ᯤ

Dung i didok ma, ua tongkin nari ma huuduti ale rajanami!

ᯑᯮᯰ ᯤ ᯑᯪᯑᯂᯬ᯲ ᯔ ᯥᯀ ᯖᯬᯰᯂᯉᯪ᯲ ᯉᯒᯪ ᯔ ᯂᯮᯥᯑᯮᯖᯪ ᯀᯞᯩ ᯒᯐᯉᯔᯪ

Diida raja i ma tutu songon na langan bohina mangulakkon, dung i didok ma, na uli ma i amang. 

ᯑᯪᯤᯑ ᯒᯐ ᯤ ᯔ ᯖᯮᯖᯮ ᯘᯬᯝᯉᯬ᯲ ᯉ ᯞᯝᯉ᯲ ᯅᯬᯂᯪᯉ ᯔᯝᯮᯞᯰᯂᯉᯬ᯲ ᯑᯮᯰ ᯤ ᯑᯪᯑᯂᯬ᯲ ᯔ ᯉ ᯥᯞᯪ ᯔ ᯤ ᯀᯔᯰ

Nunga songon i loja hamu, nunga dihonghop hamu ubat on. Sai manumpak ma ompunta Na Martua Debata, mamboan hamalumon ma ubat on!

ᯉᯮᯝ ᯘᯬᯝᯉᯬ᯲ ᯤ ᯞᯬᯐ ᯂᯔᯮ ᯉᯮᯝ ᯑᯪᯂᯬᯰᯂᯇᯬ᯲ ᯂᯔᯮ ᯥᯅᯖ᯲ ᯀᯉᯬ᯲ ᯘᯤ ᯔᯉᯔᯮ᯲ᯇᯂ᯲ ᯔ ᯀᯔᯬ᯲ᯇᯉᯮ᯲ᯖ ᯉ ᯔᯒ᯲ᯖᯮᯀ ᯑᯩᯅᯖ ᯔᯔ᯲ᯅᯬᯀᯉ᯲ ᯂᯔᯞᯮᯔᯉᯬ᯲ ᯔ ᯥᯅᯖ᯲ ᯀᯉᯬ᯲

Dung i dilehon raja i ma gala-gala i tu pardihutana, jala dilehon pardihuta ni raja i ma antong sangkibung gala-gala i, sada na umposo idaon, tu si Tapi Marhillong Sere asa dipangan.

ᯑᯮᯰ ᯤ ᯑᯪᯞᯩᯂᯉᯬ᯲ ᯒᯐ ᯤ ᯔ ᯎᯞᯎᯞ ᯤ ᯖᯮ ᯇᯒ᯲ᯑᯪᯂᯮᯖᯉ ᯐᯞ ᯑᯪᯞᯩᯂᯉᯬ᯲ ᯇᯒ᯲ᯑᯪᯂᯮᯖ ᯉᯪ ᯒᯐ ᯤ ᯔ ᯀᯉ᯲ᯖᯬᯰ ᯘᯰᯂᯪᯅᯮᯰ ᯎᯞᯎᯞ ᯤ ᯘᯑ ᯉ ᯀᯔᯮ᯲ᯇᯬᯘᯬ ᯤᯑᯀᯉᯬ᯲ ᯖᯮ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯬᯰ ᯘᯩᯒᯩ ᯀᯘ ᯑᯪᯇᯝᯉ᯲

Sun dipangan boru ni raja i na sangkibung i, dilehon ma muse na paduahon; dung sun dipangan na paduahon, ba dilehon ma sada nari. 

ᯘᯉᯮ᯲ ᯑᯪᯇᯐᯉ᯲ ᯅᯬᯒᯮ ᯉᯪ ᯒᯐ ᯤ ᯉ ᯘᯰᯂᯪᯅᯮᯰ ᯤ ᯑᯪᯞᯩᯂᯉᯬ᯲ ᯔ ᯔᯮᯘᯩ ᯉ ᯇᯑᯮᯀᯂᯉᯬ᯲ ᯑᯮᯰ ᯘᯉᯮ᯲ ᯑᯪᯇᯝᯉ᯲ ᯉ ᯇᯑᯮᯀᯂᯉᯬ᯲ ᯅ ᯑᯪᯞᯩᯂᯉᯬ᯲ ᯔ ᯘᯑ ᯉᯒᯪ

Asa nunga tolu hibung dipangan si Tapi Marhillong Sere gala-gala i, jadi humusor ma ibana, jala didok, togu ma ahu inang, nunga bolas ahu hundul!

ᯀᯘ ᯉᯮᯝ ᯖᯬᯞᯮ ᯂᯪᯅᯮᯰ ᯑᯪᯇᯝᯉ᯲ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯬᯰ ᯘᯩᯒᯩ ᯎᯞᯎᯞ ᯤ ᯐᯑᯪ ᯂᯮᯔᯮᯘᯒᯬ᯲ ᯔ ᯤᯅᯉ ᯐᯞ ᯑᯪᯑᯂᯬ᯲ ᯖᯬᯎᯮ ᯔ ᯀᯂᯮ ᯤᯉᯰ ᯉᯮᯝ ᯅᯬᯞᯘ᯲ ᯀᯂᯮ ᯂᯉᯮ᯲ᯑᯞᯮ᯲

Olo da inang! ninna inana i. Ditogu ma tutu si Tapi Marhillong Sere, nunga bolas ibana hundul. 

ᯀᯬᯞᯬ ᯑ ᯤᯉᯰ ᯉᯉᯪ᯲ᯉ ᯤᯉᯉ ᯤ ᯑᯪᯖᯬᯎᯮ ᯔ ᯖᯮᯖᯮ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯬᯰ ᯘᯩᯒᯩ ᯉᯮᯝ ᯅᯬᯞᯑ᯲ ᯤᯅᯉ ᯂᯉᯮ᯲ᯑᯞᯮ᯲

Longang ma nasida sude marnida hatopna mangasi ubat i tu boru ni raja i. 

ᯞᯬᯝᯰ ᯔ ᯉᯘᯪᯑ ᯘᯮᯑᯩ ᯔᯒ᯲ᯉᯪᯑ ᯂᯖᯇᯬ᯲ᯉ ᯔᯝᯘᯪ ᯥᯅᯖ᯲ ᯤ ᯖᯮ ᯅᯬᯒᯮ ᯉᯪ ᯒᯐ ᯤ

Nunga tung las nang roha ni sidua halak i, dongan ni si Aji Panungkunan i, mamereng na masa i; lupa ma nasida di sude halojaonna.

ᯉᯮᯝ ᯖᯮᯰ ᯞᯘ᯲ ᯉᯰ ᯒᯬᯂ ᯉᯪ ᯘᯪᯑᯮᯀ ᯂᯞᯂ᯲ ᯤ ᯑᯬᯝᯉ᯲ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯤ ᯔᯔᯩᯒᯰᯩ ᯉ ᯔᯘ ᯤ ᯞᯮᯇ ᯔ ᯉᯘᯪᯑ ᯑᯪ ᯘᯮᯑᯩ ᯂᯞᯬᯐᯀᯉᯬ᯲ᯉ

Dung i didok si Tapi Marhillong Sere ma tu amana i, paloas ma amang dibaritahon nasida pardalananna sida i. 

ᯑᯮᯰ ᯤ ᯑᯪᯑᯂᯬ᯲ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯬᯰ ᯘᯩᯒᯩ ᯔ ᯖᯮ ᯀᯔᯉ ᯤ ᯇᯞᯬᯀᯘ᯲ ᯔ ᯀᯔᯰ ᯑᯪᯅᯒᯪᯖᯂᯉᯬ᯲ ᯉᯘᯪᯑ ᯇᯒ᯲ᯑᯞᯉᯉ᯲ᯉᯘᯪᯝ ᯤ

Ai aha do na masa? Tolu halak do nasida na borhat hape dua halak do na mulak tu huta on?

ᯀᯤ ᯀᯂ ᯑᯬ ᯉ ᯔᯘ ᯖᯬᯞᯮ ᯂᯞᯂ᯲ ᯑᯬ ᯉᯘᯪᯑ ᯉ ᯅᯒᯬ᯲ᯂᯖ᯲ ᯂᯇᯩ ᯑᯮᯀ ᯂᯞᯂ᯲ ᯑᯬ ᯉ ᯔᯮᯞᯂ᯲ ᯖᯮ ᯂᯮᯖ ᯀᯉᯬ᯲

Dung i didok raja i ma tu sidua halak i, nunga rap hita marnidasa, toho situtu do ubat na binoanmuna i, nunga bolas hundul borungku si Tapi Marhillong Sere. 

ᯑᯮᯰ ᯤ ᯑᯪᯑᯂᯬ᯲ ᯒᯐ ᯤ ᯔ ᯖᯮ ᯘᯪᯑᯮᯀ ᯂᯞᯂ᯲ ᯤ ᯉᯮᯝ ᯒᯇ᯲ ᯂᯪᯖ ᯔᯒ᯲ᯉᯪᯑᯘ ᯖᯬᯂᯬ ᯘᯪᯖᯮᯖᯮ ᯑᯬ ᯥᯅᯖ᯲ ᯉ ᯅᯪᯉᯬᯀᯉ᯲ᯔᯮᯉ ᯤ ᯉᯮᯝ ᯅᯬᯞᯘ᯲ ᯂᯉᯮ᯲ᯑᯞᯮ᯲ ᯅᯬᯒᯮᯰᯂᯮᯘᯪ ᯖᯇᯪ ᯔᯒ᯲ᯂᯞᯪ᯲ᯞᯬᯰ ᯘᯩᯒᯩ

Ba ibana pe, nunga dipangido ibana, asa binoto na masa. Asa huboto hami antong sidohononnami dohot siulaonnami. 

ᯅ ᯤᯅᯉ ᯇᯩ ᯉᯮᯝ ᯑᯪᯇᯝᯪᯑᯬ ᯤᯅᯉ ᯀᯘ ᯅᯪᯉᯬᯖᯬ ᯉ ᯔᯘ ᯀᯘ ᯂᯮᯅᯬᯖᯬ ᯂᯔᯪ ᯀᯉ᯲ᯖᯬᯰ ᯘᯪᯑᯬᯂᯬᯉᯉᯬ᯲ᯉᯔᯪ ᯑᯬᯂᯖᯬ᯲ ᯘᯪᯥᯞᯀᯉᯬ᯲ᯉᯔᯪ

Nunga songon na hiras idaon bohimuna; tuani ma i! Ba uduti hamu ma jolo si paboaonmuna tu hami!

ᯉᯮᯝ ᯘᯬᯝᯉᯬ᯲ ᯉ ᯂᯪᯒᯘ᯲ ᯤᯑᯀᯉᯬ᯲ ᯅᯬᯂᯪᯔᯮᯉ ᯖᯮᯀᯉᯪ ᯔ ᯤ ᯅ ᯥᯑᯮᯖᯪ ᯂᯔᯮ ᯔ ᯐᯬᯞᯬ ᯘᯪᯇᯅᯬᯀᯀᯉᯬ᯲ᯔᯮᯉ ᯖᯮ ᯂᯔᯪ

Dung i didok na tumua i ma, olo tutu rajanami, sai malum ma dihilala boru ni raja i, sai pate ma i, unang olo be mangulakulakkon! 

ᯑᯮᯰ ᯤ ᯑᯪᯑᯂᯬ᯲ ᯉ ᯖᯮᯔᯮᯀ ᯤ ᯔ ᯀᯬᯞᯬ ᯖᯮᯖᯮ ᯒᯐᯉᯔᯪ ᯘᯤ ᯔᯞᯔᯮ᯲ ᯔ ᯑᯪᯂᯪᯞᯞ ᯅᯬᯒᯮ ᯉᯪ ᯒᯐ ᯤ ᯘᯤ ᯇᯖᯩ ᯔ ᯤ ᯥᯉᯰ ᯀᯬᯞᯬ ᯅᯩ ᯔᯝᯮᯞᯂ᯲ᯥᯞᯂ᯲ᯂᯉᯬ᯲

Nunga margogo iba tutu, dung niida pangkorhon ni ubat

ᯉᯮᯝ ᯔᯒ᯲ᯎᯬᯎᯬ ᯤᯅ ᯖᯮᯖᯮ ᯑᯮᯰ ᯉᯪᯤᯑ ᯇᯰᯂᯒᯬ᯲ᯂᯉᯬ᯲ ᯉᯪ ᯥᯅᯖ᯲

Taringot tu pardalanannami ba songon on ma rajanami! Ia di ari parjolo dung loja hami, hupahundul hami ma di bona ni hau bolon. 

ᯖᯒᯪᯝᯖᯬ᯲ ᯖᯮ ᯇᯒ᯲ᯑᯞᯉᯉ᯲ᯉᯔᯪ ᯅ ᯘᯬᯝᯉᯬ᯲ ᯀᯉᯬ᯲ ᯔ ᯒᯐᯉᯔᯪ ᯤᯀ ᯑᯪ ᯀᯒᯪ ᯇᯒ᯲ᯐᯬᯞᯬ ᯑᯮᯰ ᯞᯬᯐ ᯂᯔᯪ ᯂᯮᯇᯂᯉᯮ᯲ᯑᯞᯮ᯲ ᯂᯔᯪ ᯔ ᯑᯪ ᯅᯬᯉ ᯉᯪ ᯂᯥ ᯅᯬᯞᯉᯬ᯲

 Jadi marende-ende ma si Aji Panungkunan di bona ni hau i, lungun-lungun endena i. 

ᯐᯑᯪ ᯔᯒᯉᯩ᯲ᯑᯩᯀᯉᯩ᯲ᯑᯩ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯑᯪ ᯅᯬᯉ ᯉᯪ ᯂᯥ ᯤ ᯞᯮᯝᯉᯮ᯲ᯞᯮᯝᯉᯮ᯲ ᯀᯉᯩ᯲ᯑᯩᯉ ᯤ

Hape adong do di ginjang ni hau i sada bodat longlong na umbege ende-ende ni si Aji Panungkunan i; jadi didok bodat i ma, dang adong dison gala-gala na niluluanmuna i.

ᯂᯇᯩ ᯀᯑᯬᯰ ᯑᯬ ᯑᯪ ᯎᯉᯪ᯲ᯐᯰ ᯉᯪ ᯂᯥ ᯤ ᯘᯑ ᯅᯬᯑᯖ᯲ ᯞᯬᯰᯞᯬᯰ ᯉ ᯀᯔᯮ᯲ᯅᯩᯎᯩ ᯀᯉᯩ᯲ᯑᯩᯀᯉᯩ᯲ᯑᯩ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯤ ᯐᯑᯪ ᯑᯪᯑᯂᯬ᯲ ᯅᯬᯑᯖ᯲ ᯤ ᯔ ᯑᯰ ᯀᯑᯬᯰ ᯑᯪᯘᯉᯬ᯲ ᯎᯞᯎᯞ ᯉ ᯉᯪᯞᯮᯞᯮᯀᯉ᯲ᯔᯮᯉ ᯤ

Nunuti hamu ma tu dolok, sai jumpang hamu do i!

ᯉᯮᯉᯮᯖᯪ ᯂᯔᯮᯔ ᯖᯮ ᯑᯬᯞᯂᯬ᯲ ᯘᯤ ᯐᯔᯮ᯲ᯇᯰ ᯂᯔᯮ ᯑᯬ ᯤ

Nunga potang ari antong, jadi marborngin ma hami di sada sopo. 

ᯉᯮᯝ ᯇᯬᯖᯰ ᯀᯒᯪ ᯀᯉ᯲ᯖᯬᯰ ᯐᯑᯪ ᯔᯒ᯲ᯅᯒᯬ᯲ᯝᯉᯪ᯲ ᯔ ᯂᯔᯪ ᯑᯪ ᯘᯑ ᯘᯬᯇᯬ

Manogotna i mardalan ma hami muse, sai manopi-nopi Aek Parbaraan. 

ᯔᯉᯬᯎᯖᯬ᯲ᯉ ᯤ ᯔᯒ᯲ᯑᯞᯉ᯲ ᯔ ᯂᯔᯪ ᯔᯮᯘᯩ ᯘᯤ ᯔᯉᯬᯇᯪᯉᯬᯇᯪ ᯀᯀᯂᯩ᯲ ᯇᯒ᯲ᯅᯒᯀᯉ᯲

Dung loja hundul ma hami di sada bona ni hau bolon.

ᯑᯮᯰ ᯞᯬᯐ ᯂᯉᯮ᯲ᯑᯞᯮ᯲ ᯔ ᯂᯔᯪ ᯑᯪ ᯘᯑ ᯅᯬᯉ ᯉᯪ ᯂᯥ ᯅᯬᯞᯉᯬ᯲

Marende-ende ma nang disi si Aji Panungkunan, diendehon ma endena na lungun-lungun i. 

ᯔᯒᯉᯩ᯲ᯑᯩᯀᯉᯩ᯲ᯑᯩ ᯔ ᯉᯰ ᯑᯪᯘᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯑᯪᯀᯉᯩ᯲ᯑᯩᯂᯉᯬ᯲ᯔ ᯀᯉᯩ᯲ᯑᯩᯉ ᯉ ᯞᯮᯝᯉᯮ᯲ᯞᯮᯝᯉᯮ᯲ ᯤ

Hape na adong do di ginjang ni hau i sada gompul na birong, na bolon. 

ᯂᯇᯩ ᯉ ᯀᯑᯬᯰ ᯑᯬ ᯑᯪ ᯎᯉᯪ᯲ᯐᯰ ᯉᯪ ᯂᯥ ᯤ ᯘᯑ ᯎᯔᯬ᯲ᯇᯞᯮ᯲ ᯉ ᯅᯪᯒᯬᯰ ᯉ ᯅᯬᯞᯉᯬ᯲

Jadi didok gompul i ma, Ale Aji Panungkunan, dang adong dison gala-gala na niluluanmuna i! 

ᯐᯑᯪ ᯑᯪᯑᯂᯬ᯲ ᯎᯔᯬ᯲ᯇᯞᯮ᯲ ᯤ ᯔ ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲ ᯑᯰ ᯀᯑᯬᯰ ᯑᯪᯘᯉᯬ᯲ ᯎᯞᯎᯞ ᯉ ᯉᯪᯞᯮᯞᯮᯀᯉᯔᯮᯉ ᯤ

Alai nunuti hamu ma mardalan pahulu, sai na jumpang hamu do i! 

ᯀᯞᯤ ᯉᯮᯉᯮᯖᯪ ᯂᯔᯮ ᯔ ᯔᯒ᯲ᯑᯞᯉ᯲ ᯇᯂᯮᯞᯮ ᯘᯤ ᯐᯔᯮ᯲ᯇᯰ ᯂᯔᯮ ᯑᯬ ᯤ

Jadi nunga potang ari, gabe marborngin ma hami di sada sopo na tarulang.

ᯐᯑᯪ ᯉᯮᯝ ᯇᯬᯖᯰ ᯀᯒᯪ ᯎᯅᯩ ᯔᯒ᯲ᯅᯒᯬ᯲ᯝᯉᯪ᯲ ᯔ ᯂᯔᯪ ᯑᯪ ᯘᯑ ᯘᯬᯇᯬ ᯉ ᯖᯒᯮᯞᯰ

Manogotna i dung torang ari sai hununuti hami ma mardalan, huihuthon hami aek i pahulu. 

ᯔᯉᯬᯎᯖᯬ᯲ᯉ ᯤᯑᯮᯰ ᯖᯪᯒᯰ ᯀᯒᯪ ᯘᯤ ᯂᯮᯉᯮᯉᯮᯖᯪ ᯂᯔᯪ ᯔ ᯔᯒ᯲ᯑᯞᯉ᯲ ᯂᯮᯤᯂᯖᯮ᯲ᯂᯉᯬ᯲ ᯂᯔᯪ ᯀᯀᯂᯩ᯲ ᯤ ᯇᯂᯮᯞᯮ

Dung naeng potang ari, sai huberengi hami ma, hape dang adong tarida sopo. 

ᯑᯮᯰ ᯉᯀᯰᯩ ᯇᯬᯖᯰ ᯀᯒᯪ ᯘᯤ ᯂᯮᯅᯩᯒᯩᯝᯪ ᯂᯔᯪ ᯔ ᯂᯇᯩ ᯑᯰ ᯀᯝᯬᯰ ᯖᯒᯪᯑ ᯘᯬᯇᯬ

Jadi hupauli hami ma undung-undung sian anak ni hau dohot angka bulung ni
siala.

ᯐᯑᯪ ᯂᯮᯇᯥᯞᯪ ᯂᯔᯪ ᯔ ᯀᯉᯮ᯲ᯑᯮᯰᯀᯉᯮ᯲ᯑᯮᯰ ᯘᯪᯀᯉ᯲ ᯀᯉᯂ᯲ ᯉᯪ ᯂᯥ ᯑᯪᯂᯖᯬ᯲ ᯀᯰᯂ ᯅᯮᯞᯮᯰ ᯉᯪ ᯘᯪᯀᯞ

Manogotna i mareak tahuak manuk ro ma babiat balemun, tarsunggul ma hami, sai angkadotdot be ma hami; nirimpu laho panganonna ma hami. 

ᯔᯉᯬᯎᯖᯬ᯲ᯉ ᯤ ᯔᯒᯩᯀᯂ᯲ ᯖᯂᯮᯀᯂ᯲ ᯔᯉᯂᯮ᯲ ᯒᯬ ᯔ ᯅᯅᯪᯀᯖ᯲ ᯅᯞᯩᯔᯉᯮ᯲ ᯖᯒ᯲ᯘᯮᯰᯎᯞᯮ᯲ ᯔ ᯂᯔᯪ ᯘᯤ ᯀᯰᯂᯑᯖᯬ᯲ᯑᯖᯬ᯲ ᯅᯩ ᯔ ᯂᯔᯪ ᯉᯪᯒᯔᯪ᯲ᯇᯮ ᯞᯂᯬ ᯇᯝᯉᯉᯬ᯲ᯉ ᯔ ᯂᯔᯪ

Hape didok ma tu hami, unang hamu mabiar, godang do sipanganonku di tombak on. 

ᯂᯇᯩ ᯑᯪᯑᯂᯬ᯲ ᯔ ᯖᯮ ᯂᯔᯪ ᯥᯉᯰ ᯂᯔᯮ ᯔᯅᯪᯁᯒ᯲ ᯎᯬᯑᯰ ᯑᯬ ᯘᯪᯇᯝᯉᯉᯬ᯲ᯂᯮ ᯑᯪ ᯖᯔᯬ᯲ᯅᯂ᯲ ᯀᯉᯬ᯲

Anggo sian Lobu Namaduma do hamu, ba huboto do nang dung na so uhum diula halak di huta i. 

ᯀᯰᯎᯬ ᯘᯪᯀᯉ᯲ ᯞᯬᯅᯮ ᯉᯔᯑᯮᯔ ᯑᯬ ᯂᯔᯮ ᯅ ᯂᯮᯅᯬᯖᯬ ᯑᯬ ᯉᯰ ᯑᯮᯰ ᯉ ᯘᯬ ᯥᯂᯔᯮ᯲ ᯑᯪᯥᯞ ᯂᯞᯂ᯲ ᯑᯪ ᯂᯮᯖ ᯤ

Ala ni i paboaonku ma tu hanmuna tibu nama dapot hamu na niluluanmuna i.

ᯁᯞ ᯉᯪ ᯤ ᯇᯅᯬᯀᯀᯉᯬ᯲ᯂᯮ ᯔ ᯖᯮ ᯂᯔᯮᯉ ᯖᯪᯅᯮ ᯉᯔ ᯑᯇᯖᯬ᯲ ᯂᯔᯮ ᯉ ᯉᯪᯞᯮᯞᯮᯀᯉ᯲ᯔᯮᯉ ᯤ

Diboto babiat balemun i do hatubuan ni gala-gala na hulului hami i, ai dipaboa do manang aha tubu humaliang bonana i. 

ᯑᯪᯅᯬᯖᯬ ᯅᯅᯪᯀᯖ᯲ ᯅᯞᯩᯔᯉᯮ᯲ ᯤ ᯑᯬ ᯂᯖᯮᯅᯮᯀᯉ᯲ ᯉᯪ ᯎᯞᯎᯞ ᯉ ᯂᯮᯞᯮᯞᯮᯤ ᯂᯔᯪ ᯤ ᯀᯤ ᯑᯪᯇᯅᯬᯀ ᯑᯬ ᯔᯉᯰ ᯀᯂ ᯖᯮᯅᯮ ᯂᯮᯔᯞᯪᯀᯰ ᯅᯬᯉᯉ ᯤ

Jala di topi aek i do ninna hatubuanna. Mansai rugun do ninna bulung ni gala-gala i.

ᯐᯞ ᯑᯪ ᯖᯬᯇᯪ ᯀᯀᯂᯩ᯲ ᯤ ᯑᯬ ᯉᯉᯪ᯲ᯉ ᯂᯖᯮᯅᯮᯀᯉ᯲ᯉ ᯔᯉ᯲ᯘᯤ ᯒᯮᯎᯉᯮ᯲ ᯑᯬ ᯉᯉᯪ᯲ᯉ ᯅᯮᯞᯮᯰ ᯉᯪ ᯎᯞᯎᯞ ᯤ

Manogotna i dung tiur ari borhat ma hami sian undung-undung siala i dompak dolok. 

ᯔᯉᯬᯎᯖᯬ᯲ᯉ ᯤ ᯑᯮᯰ ᯖᯪᯀᯒᯮ᯲ ᯀᯒᯪ ᯅᯒᯬ᯲ᯂᯖ᯲ ᯔ ᯂᯔᯪ ᯘᯪᯀᯉ᯲ ᯀᯉᯮ᯲ᯑᯮᯰᯀᯉᯮ᯲ᯑᯮᯰ ᯘᯪᯀᯞ ᯤ ᯑᯔᯬ᯲ᯇᯂ᯲ ᯑᯬᯞᯂᯬ᯲

Dung adong hami manang sadia leleng na mardalan i, huida hami ma tutu sada lubuk na metmet, jala di ginjang lubuk i adong tubu sada gala-gala. 

ᯑᯮᯰ ᯀᯑᯬᯰ ᯂᯔᯪ ᯔᯉᯰ ᯘᯑᯪᯀ ᯞᯩᯞᯰᯩ ᯉ ᯔᯒ᯲ᯑᯞᯉ᯲ ᯤ ᯂᯮᯤᯑ ᯂᯔᯪ ᯔ ᯖᯮᯖᯮ ᯘᯑ ᯞᯮᯅᯂᯮ᯲ ᯉ ᯔᯖᯩ᯲ᯔᯖᯩ᯲ ᯐᯞ ᯑᯪ ᯎᯉᯪ᯲ᯐᯰ ᯞᯮᯅᯂᯮ᯲ ᯤ ᯀᯑᯬᯰ ᯖᯮᯅᯮ ᯘᯑ ᯎᯞᯎᯞ

Tambinsu dohot sanduduk humaliang bonana i; toho ma songon na pinaboa ni babiat balemun i tu hami di undung-undung siala i.

ᯖᯔ᯲ᯅᯉᯪ᯲ᯘᯮ ᯑᯬᯂᯖᯬ᯲ ᯘᯉ᯲ᯑᯮᯑᯂᯮ᯲ ᯂᯮᯔᯞᯪᯀᯰ ᯅᯬᯉᯉ ᯤ ᯖᯬᯂᯬ ᯔ ᯘᯬᯝᯉᯬ᯲ ᯉ ᯇᯪᯉᯅᯬᯀ ᯉᯪ ᯅᯅᯪᯀᯖ᯲ ᯅᯞᯩᯔᯉᯮ᯲ ᯤ ᯖᯮ ᯂᯔᯪ ᯑᯪ ᯀᯉᯮ᯲ᯑᯮᯰᯀᯉᯮ᯲ᯑᯮᯰ ᯘᯪᯀᯞ ᯤ

Marsorin-sorin ma hami na tolu manjangkit, alai sai runsur do tu toru, dang bolas morot tu ginjang.

ᯔᯒ᯲ᯘᯬᯒᯉᯪ᯲ᯘᯪᯒᯉᯪ᯲ ᯔ ᯂᯔᯪ ᯉ ᯖᯬᯞᯮ ᯔᯉ᯲ᯐᯰᯂᯖᯪ᯲ ᯀᯞᯤ ᯘᯤ ᯒᯉᯮ᯲ᯘᯒᯮ᯲ ᯑᯬ ᯖᯮ ᯖᯬᯒᯮ ᯑᯰ ᯅᯬᯞᯘ᯲ ᯔᯬᯒᯖᯬ᯲ ᯖᯮ ᯎᯉᯪ᯲ᯐᯰ

I ma na hupaboa nangkin rajanami parjolo, taringot tu lali na tulis-tulis i, na paboahon tabasna asa bolas jangkiton gala-gala i.

ᯤ ᯔ ᯉ ᯂᯮᯇᯅᯬᯀ ᯉᯰᯂᯉᯪ᯲ ᯒᯐᯉᯔᯪ ᯇᯒ᯲ᯐᯬᯞᯬ ᯖᯒᯪᯝᯖᯬ᯲ ᯖᯮ ᯞᯞᯪ ᯉ ᯖᯮᯞᯘᯪ᯲ ᯖᯮᯞᯘᯪ᯲ ᯤ ᯉ ᯇᯅᯬᯀᯂᯉᯬ᯲ ᯖᯅᯘ᯲ᯉ ᯀᯘ ᯅᯬᯞᯘ᯲ ᯐᯰᯂᯪᯖᯉᯬ᯲ ᯎᯞᯎᯞ ᯤ

Anggo tabasna i rajanami, ba songon on do. 

ᯀᯰᯎᯬ ᯖᯅᯘ᯲ᯉ ᯤ ᯒᯐᯉᯔᯪ ᯅ ᯘᯬᯝᯉᯬ᯲ ᯀᯉᯬ᯲ ᯑᯬ

Didokkon ma atupan ni si Aji Panungkunan napuran tolu; sada ma i dabuhononhon tu lubuk na di toru i, sada ma i peakhononhon tu bona ni gala-gala i; na sada nari hilhilon, jala bursihon humaliang bona ni gala-gala i. 

ᯑᯪᯑᯂᯬ᯲ᯂᯉᯬ᯲ ᯔ ᯀᯖᯮᯇᯉ᯲ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯉᯇᯮᯒᯉ᯲ ᯖᯬᯞᯮ ᯘᯑ ᯔ ᯔᯤ ᯑᯅᯮᯂᯬᯉᯉᯬ᯲ᯂᯉᯬ᯲ ᯖᯮ ᯞᯮᯅᯂᯮ᯲ ᯉ ᯑᯪ ᯖᯬᯒᯮ ᯤ ᯘᯑ ᯔ ᯤ ᯇᯩᯀᯂ᯲ᯂᯬᯉᯉᯬ᯲ᯂᯉᯬ᯲ ᯖᯮ ᯅᯬᯉ ᯉᯪ ᯎᯞᯎᯞ ᯤ ᯉ ᯘᯑ ᯉᯒᯪ ᯂᯞᯪ᯲ᯂᯪᯞᯉᯬ᯲ ᯐᯞ ᯅᯒᯮ᯲ᯘᯪᯂᯉᯬ᯲ ᯂᯮᯔᯞᯪᯀᯰ ᯅᯬᯉ ᯉᯪ ᯎᯞᯎᯞ ᯤ

Dung dipatupa i sude, bolas ma si Aji Panungkunan sahat tu ginjang mambuat gala-gala i, di dangka papituhon.

ᯑᯮᯰ ᯑᯪᯇᯖᯮᯇ ᯤ ᯘᯮᯑᯩ ᯅᯬᯞᯘ᯲ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯘᯂᯖ᯲ ᯖᯮ ᯎᯉᯪ᯲ᯐᯰ ᯔᯔ᯲ᯅᯮᯀᯖ᯲ ᯎᯞᯎᯞ ᯤ ᯑᯪ ᯑᯰᯂ ᯇᯇᯪᯖᯮᯂᯉᯬ᯲

Tung mansai las ma rohanami, hatop ma mulak hami. Mansai doras ma pardalannami. 

ᯖᯮᯰ ᯔᯉ᯲ᯘᯤ ᯞᯘ᯲ ᯔ ᯒᯬᯂᯉᯔᯪ ᯂᯖᯇᯬ᯲ ᯔ ᯔᯮᯞᯂ᯲ ᯂᯔᯪ ᯔᯉ᯲ᯘᯤ ᯑᯬᯒᯘ᯲ ᯔ ᯇᯒ᯲ᯑᯞᯉ᯲ᯉᯔᯪ

Sahat ro di sopo na tarulang i, maradian ma hami. Ba nunga potang ari, disi ma hami marborngin.

ᯘᯂᯖ᯲ ᯒᯬ ᯑᯪ ᯘᯬᯇᯬ ᯉ ᯖᯒᯮᯞᯰ ᯤ ᯔᯒᯑᯪᯀᯉ᯲ ᯔ ᯂᯔᯪ ᯅ ᯉᯮᯝ ᯇᯬᯖᯰ ᯀᯒᯪ ᯑᯪᯘᯪ ᯔ ᯂᯔᯪ ᯔᯒ᯲ᯅᯒᯬ᯲ᯝᯉᯪ᯲

Torang ma ari manogotna i, ngot ma ahu dohot dongankon, hape dang huida hami be si Aji Panungkunan. 

ᯖᯬᯒᯰ ᯔ ᯀᯒᯪ ᯔᯉᯬᯎᯖᯬ᯲ᯉ ᯤ ᯝᯖᯬ᯲ ᯔ ᯀᯂᯮ ᯑᯬᯂᯖᯬ᯲ ᯑᯬᯝᯉ᯲ᯂᯉᯬ᯲ ᯂᯇᯩ ᯑᯰ ᯂᯮᯤᯑ ᯂᯔᯪ ᯅᯩ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Anggo didok rohanami, na marsuap do ibana tu Aek Parbaraan. 

ᯀᯰᯎᯬ ᯑᯪᯑᯂᯬ᯲ ᯒᯬᯂᯉᯔᯪ ᯉ ᯔᯒ᯲ᯘᯮᯀᯇ᯲ ᯑᯬ ᯤᯅᯉ ᯖᯮ ᯀᯀᯂᯩ᯲ ᯇᯒ᯲ᯅᯒᯀᯉ᯲

Jadi laho ma hami tutu tu aek i. Huida hami do di rihit i bogas ni patna, alai ndang
adong tarida anggo si Aji Panungkunan.

ᯐᯑᯪ ᯞᯂᯬ ᯔ ᯂᯔᯪ ᯖᯮᯖᯮ ᯖᯮ ᯀᯀᯂᯩ᯲ ᯤ ᯂᯮᯤᯑ ᯂᯔᯪ ᯑᯬ ᯑᯪ ᯒᯪᯂᯖᯪ᯲ ᯤ ᯅᯪᯎᯘ᯲ ᯉᯪ ᯇᯖ᯲ᯉ ᯀᯞᯤ ᯑᯰ ᯀᯝᯬᯰ ᯖᯒᯪᯑ ᯀᯰᯎᯬ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Dung i sai hupamanat hami ma rihit i, hape dapot ma huida hami bogas na so hea dope huida hami. 

ᯑᯮᯰ ᯤ ᯘᯤ ᯂᯮᯇᯔᯉᯖ᯲ ᯂᯔᯪ ᯔ ᯒᯪᯂᯖᯪ᯲ ᯤ ᯂᯇᯩ ᯑᯇᯖᯬ᯲ ᯔ ᯂᯮᯤᯑ ᯂᯔᯪ ᯅᯬᯎᯘ᯲ ᯉ ᯘᯬ ᯂᯩᯀ ᯑᯬᯇᯩ ᯂᯮᯤᯑ ᯂᯔᯪ

Anggo disura rohanami, bogas ni homang do i, ale rajanami.

ᯀᯰᯎᯬ ᯑᯪᯘᯮᯒ ᯒᯬᯂᯉᯔᯪ ᯅᯬᯎᯘ᯲ ᯉᯪ ᯂᯬᯔᯰ ᯑᯬ ᯤ ᯀᯞᯩ ᯒᯐᯉᯔᯪ

Dung sidung hata ni si dua halak i jadi songon na tarhalomong ma sude na umbegesa.

ᯑᯮᯰ ᯘᯪᯑᯮᯰ ᯂᯖ ᯉᯪ ᯘᯪᯑᯮᯀ ᯎᯞᯂ᯲ ᯤ ᯐᯑᯪ ᯘᯬᯝᯉᯬ᯲ ᯉ ᯖᯒ᯲ᯂᯞᯬᯔᯬᯰ ᯔ ᯘᯮᯑᯩ ᯉ ᯀᯔᯮ᯲ᯅᯩᯎᯩᯘ

Sintong do na nidokmi! Nunga tutu diluahon homang anggo si Aji Panungkunan! ninna Raja Sohuturon Dolok, huhut marhosa godang.

ᯘᯉᯪ᯲ᯖᯬᯰ ᯑᯬ ᯉ ᯉᯪᯑᯂᯬ᯲ᯔᯪ ᯉᯮᯝ ᯖᯮᯖᯮ ᯑᯪᯞᯮᯀᯂᯉᯬ᯲ ᯂᯬᯔᯰ ᯀᯰᯎᯬ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯉᯉᯪ᯲ᯉ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯂᯮᯂᯖᯮ᯲ ᯔᯒ᯲ᯂᯬᯘ ᯎᯬᯑᯰ

Nunga inon tutu! ninna angka na pungu i.

ᯉᯮᯑ ᯤᯉᯉᯬ᯲ ᯖᯮᯖᯮ ᯉᯉᯪ᯲ᯉ ᯀᯰᯂ ᯉ ᯇᯮᯝᯮ ᯤ