ᯒᯐ ᯇᯒ᯲ᯂᯖ Raja Parhata di Partuat ni Ompu Maruarar Simanullang di Matiti

Partuat ni Ompu Maruarar Doli Simanullang di Matiti. 

ᯇᯒ᯲ᯖᯮᯀᯖ᯲ ᯉᯪ ᯀᯔᯬ᯲ᯇᯮ ᯔᯒᯮᯀᯒᯒ᯲ ᯑᯬᯞᯪ ᯘᯪᯔᯉᯞᯮ᯲ᯞᯰ ᯑᯪ ᯔᯖᯪᯖᯪ

Acara maralaman, gabe sada parsiajaran marhata di ulaon Adat Batak, asa gabe parsiajaran di hita angka naumposo. 

ᯀᯘᯒ ᯔᯒᯞᯔᯉ᯲ ᯎᯅᯩ ᯘᯑ ᯇᯒ᯲ᯘᯪᯀᯐᯒᯉ᯲ ᯔᯒ᯲ᯂᯖ ᯑᯪ ᯥᯞᯀᯉᯬ᯲ ᯀᯑᯖ᯲ ᯅᯖᯂ᯲ ᯀᯘ ᯎᯅᯩ ᯇᯒ᯲ᯘᯪᯀᯐᯒᯉ᯲ ᯑᯪ ᯀᯰᯂ ᯉ ᯀᯔᯮ᯲ᯇᯬᯘᯬ

Ompu raja di jolo martungkot siala gundi, pinungka ni ompunta, amanta na jolo, tontong do i hubereng taihuthon sian pudi na denggan. 

ᯀᯔᯬ᯲ᯇᯮ ᯒᯐ ᯑᯪ ᯐᯬᯞᯬ ᯔᯒ᯲ᯖᯮᯰᯂᯖᯬ᯲ ᯘᯪᯀᯞ ᯎᯉᯮ᯲ᯑᯪ ᯇᯪᯉᯮᯰᯂ ᯉᯪ ᯀᯔᯬ᯲ᯇᯉᯮ᯲ᯖ ᯀᯔᯉ᯲ᯖ ᯉ ᯐᯬᯞᯬ ᯖᯬᯰᯖᯬᯰ ᯑᯬ ᯤ ᯂᯮᯅᯩᯒᯰᯩ ᯖᯤᯂᯖᯮ᯲ᯂᯉᯬ᯲ ᯘᯪᯀᯉ᯲ ᯇᯮᯑᯪ ᯉ ᯑᯰᯩᯎᯉ᯲

Asa didok daompung tu ahu, sada gabe dua, na dua gabe onom, na onom sia pulu. 

ᯀᯘ ᯑᯪᯑᯂᯬ᯲ ᯑᯀᯔᯬ᯲ᯇᯮᯰ ᯖᯮ ᯀᯂᯮ ᯘᯑ ᯎᯅᯩ ᯑᯮᯀ ᯉ ᯑᯮᯀ ᯎᯅᯩ ᯀᯬᯉᯔᯬ᯲ ᯉ ᯀᯬᯉᯔᯬ᯲ ᯘᯪᯀᯇᯮᯞᯮ

Di tingki on, tung jagar do ahu dibahen ho haha doli, hundul pe ahu jagar nang di talaga, sangap muse dibahen ho di halangulu. 

ᯑᯬ ᯖᯪᯰᯂᯪ ᯀᯉᯬ᯲ ᯖᯮᯰ ᯐᯎᯒ᯲ ᯑᯬ ᯀᯂᯮ ᯑᯪᯅᯂᯉᯩ᯲ ᯂᯬ ᯂᯂ ᯑᯬᯞᯪ ᯂᯉᯮ᯲ᯑᯞᯮ᯲ ᯇᯩ ᯀᯂᯮ ᯐᯎᯒ᯲ ᯉᯰ ᯑᯪ ᯖᯞᯎ ᯘᯝᯇ᯲ ᯔᯮᯘᯩ ᯑᯪᯅᯂᯉᯩ᯲ ᯂᯬ ᯑᯪ ᯂᯞᯝᯮᯞᯮ

Nunga be tung toho, poda ni daompung i, poda ni ompunta i, hodong pahu, holi-holi sangkalia, ho do ahu, hita na marsisada ina. 

ᯉᯮᯝ ᯅᯩ ᯖᯮᯰ ᯖᯬᯂᯬ ᯇᯬᯑ ᯉᯪ ᯑᯀᯔᯬ᯲ᯇᯮᯰ ᯤ ᯇᯬᯑ ᯉᯪ ᯀᯔᯬ᯲ᯇᯉᯮ᯲ᯖ ᯤ ᯂᯬᯑᯬᯰ ᯇᯂᯮ ᯂᯬᯞᯪᯂᯬᯞᯪ ᯘᯰᯂᯞᯪᯀ ᯂᯬ ᯑᯬ ᯀᯂᯮ ᯂᯪᯖ ᯉ ᯔᯒ᯲ᯘᯪᯘᯑ ᯤᯉ

Anggiat ma tung tu joloan ni ari on, asa sipaihut-ihuton on di angka hita na mardongan tubu, lumobi tu hami anggi dolim Juara Toba. 

ᯀᯰᯎᯪᯀᯖ᯲ ᯔ ᯖᯮᯰ ᯖᯮ ᯐᯬᯞᯬᯀᯉ᯲ ᯉᯪ ᯀᯒᯪ ᯀᯉᯬ᯲ ᯀᯘ ᯘᯪᯇᯤᯂᯖᯮ᯲ᯤᯂᯮᯖᯉᯬ᯲ ᯀᯉᯬ᯲ ᯑᯪ ᯀᯰᯂ ᯂᯪᯖ ᯉ ᯔᯒ᯲ᯑᯬᯝᯉ᯲ ᯖᯮᯅᯮ ᯞᯮᯔᯬᯅᯪ ᯖᯮ ᯂᯔᯪ ᯀᯰᯎᯪ ᯑᯬᯞᯔᯪ᯲ ᯐᯮᯀᯒ ᯖᯬᯅ

Asa mas marassimun, marpege sangkarimpang, rap mangangkat hita marsogot, manimbung rap tu ginjang, saur tu dolok, sahata saoloan di angka hata nauli, dohot di pambahenan na dumenggan. 

ᯀᯘ ᯔᯘ᯲ ᯔᯒᯘ᯲ᯘᯪᯔᯉᯮ᯲ ᯔᯒ᯲ᯇᯩᯎᯩ ᯘᯰᯂᯒᯔᯪ᯲ᯇᯰ ᯒᯇ᯲ ᯔᯝᯰᯂᯖ᯲ ᯂᯪᯖ ᯔᯒ᯲ᯘᯬᯎᯖᯬ᯲ ᯔᯉᯔᯪ᯲ᯅᯮᯰ ᯒᯇ᯲ ᯖᯮ ᯎᯉᯪ᯲ᯐᯰ ᯘᯀᯒᯮ᯲ ᯖᯮ ᯑᯬᯞᯂᯬ᯲ ᯘᯂᯖ ᯘᯀᯬᯞᯬᯀᯉ᯲ ᯑᯪ ᯀᯰᯂ ᯂᯖ ᯉᯥᯞᯪ ᯑᯬᯂᯖᯬ᯲ ᯑᯪ ᯇᯔ᯲ᯅᯂᯩᯉᯉ᯲ ᯉ ᯑᯮᯔᯰᯩᯎᯉ᯲

Ima hatangku raja nami, andorang so hupasahat hami dope, nauli na denggan tu, bona hasuhuton, i ma saluhutna tu raja bius, nang haha doli, lumobi pinompar ni daompung Raja Napasang. Gabe jala horas. 

ᯤᯔ ᯂᯖᯰᯂᯮ ᯒᯐ ᯉᯔᯪ ᯀᯉ᯲ᯑᯬᯒᯰ ᯘᯬ ᯂᯮᯇᯘᯐᯖ᯲ ᯂᯔᯪ ᯑᯬᯇᯩ ᯉ ᯥᯞᯪ ᯉ ᯑᯰᯩᯎᯉ᯲ ᯖᯮ ᯅᯬᯉ ᯉᯪ ᯂᯘᯮᯂᯮᯖᯉᯬ᯲ ᯤ ᯔ ᯘᯞᯮᯂᯖᯮ᯲ᯉ ᯖᯮ ᯒᯐ ᯅᯪᯀᯘᯮ᯲ ᯉᯰ ᯂᯂ ᯑᯬᯞᯪ ᯞᯮᯔᯬᯅᯪ ᯇᯪᯉᯔᯬ᯲ᯇᯒ᯲ ᯉᯪ ᯑᯀᯔᯬ᯲ᯇᯮᯰ ᯒᯐ ᯉᯇᯘᯰ ᯎᯅᯩ ᯐᯞ ᯂᯬᯒᯘ᯲

Raja nami raja bolon, haha doli, mauliate raja ni anggi doli, manghatai ma hita di tingki on. 

ᯒᯐ ᯉᯔᯪ ᯒᯐ ᯅᯬᯞᯉᯬ᯲ ᯂᯂ ᯑᯬᯞᯪ ᯔᯥᯞᯪᯀᯖᯩ ᯒᯐ ᯉᯪ ᯀᯰᯎᯪ ᯑᯬᯞᯪ ᯔᯰᯂᯖᯤ ᯔ ᯂᯪᯖ ᯑᯪ ᯖᯪᯰᯂᯪ ᯀᯉᯬ᯲

Sinandehon sige di pagaran ni sopo, nang pola be manise ai nunga tangkas binoto. 

ᯘᯪᯉᯉ᯲ᯑᯩᯂᯉᯬ᯲ ᯘᯪᯎᯩ ᯑᯪ ᯇᯎᯒᯉ᯲ ᯉᯪ ᯘᯬᯇᯬ ᯉᯰ ᯇᯬᯞ ᯅᯩ ᯔᯉᯪᯘᯩ ᯀᯤ ᯉᯮᯝ ᯖᯰᯂᯘ᯲ ᯅᯪᯉᯬᯖᯬ

Asa tuak tangkasan do sian Angkola, laos tuak tangkasan do nang sian Toba, nunga tung tangkas raja i marboa-boa, hami pe anggi dolim tangkas do laho mangolophonsa. 

ᯀᯘ ᯖᯮᯀᯂ᯲ ᯖᯰᯂᯘᯉ᯲ ᯑᯬ ᯘᯪᯀᯉ᯲ ᯀᯰᯂᯬᯞ ᯞᯀᯘᯬ᯲ ᯖᯮᯀᯂ᯲ ᯖᯰᯂᯘᯉ᯲ ᯑᯬ ᯉᯰ ᯘᯪᯀᯉ᯲ ᯖᯬᯅ ᯉᯮᯝ ᯖᯮᯰ ᯖᯰᯂᯘ᯲ ᯒᯐ ᯤ ᯔᯒ᯲ᯅᯬᯀᯅᯬᯀ ᯂᯔᯪ ᯇᯩ ᯀᯰᯎᯪ ᯑᯬᯞᯔᯪ᯲ ᯖᯰᯂᯘ᯲ ᯑᯬ ᯞᯂᯬ ᯔᯝᯬᯞᯇᯬ᯲ᯂᯉᯬ᯲ᯘ

Di naung malos bulung rata, sian tangan ni Ompu Maruarar Doli, marumur 61 taon, di ari na uli di bulan na denggan di taon parasian on raja nami, tataruhon tu paradian parsatongkinan i , tu dolok na timbo, mardolok-dolok na timbo. 

ᯑᯪ ᯉᯀᯮᯰ ᯔᯞᯘᯬ᯲ ᯅᯮᯞᯮᯰ ᯒᯖ ᯘᯪᯀᯉ᯲ ᯖᯝᯉ᯲ ᯉᯪ ᯀᯔᯬ᯲ᯇᯮ ᯔᯒᯮᯀᯒᯒ᯲ ᯑᯬᯞᯪ ᯔᯒᯮᯔᯒᯮ᯲ 61 ᯖᯀᯉᯬ᯲ ᯑᯪ ᯀᯒᯪ ᯉ ᯥᯞᯪ ᯑᯪ ᯅᯮᯞᯉ᯲ ᯉ ᯑᯰᯩᯎᯉ᯲ ᯑᯪ ᯖᯀᯉᯬ᯲ ᯇᯒᯘᯪᯀᯉ᯲ ᯀᯉᯬ᯲ ᯒᯐ ᯉᯔᯪ ᯖᯖᯒᯮᯂᯉᯬ᯲ ᯖᯮ ᯇᯒᯑᯪᯀᯉᯉ᯲ ᯇᯒ᯲ᯘᯖᯬᯰᯂᯪᯉᯉ᯲ ᯤ ᯖᯮ ᯑᯬᯞᯂᯬ᯲ ᯉ ᯖᯔᯪ᯲ᯅᯬ ᯔᯒ᯲ᯑᯬᯞᯂᯬ᯲ᯑᯬᯞᯂᯬ᯲ ᯉ ᯖᯔᯪ᯲ᯅᯬ

Tung tangkas di angka bukti, nga marlapis-lapis, di lambungna ditahi rohamu manuan hau na margota, asa mansai bagas marurat to toru, timbo ma nian marbulung tu gingjang, mamampar tu siamun, mangerbang nang tu hambirang. 

ᯖᯮᯰ ᯖᯰᯂᯘ᯲ ᯑᯪ ᯀᯰᯂ ᯅᯂᯮ᯲ᯖᯪ ᯝ ᯔᯒ᯲ᯞᯇᯘᯪ᯲ᯞᯇᯘᯪ᯲ ᯑᯪ ᯞᯔ᯲ᯅᯮᯰᯉ ᯑᯪᯖᯂᯪ ᯒᯬᯂᯔᯮ ᯔᯉᯮᯀᯉ᯲ ᯂᯥ ᯉ ᯔᯒ᯲ᯎᯬᯖ ᯀᯘ ᯔᯉ᯲ᯘᯤ ᯅᯎᯘ᯲ ᯔᯒᯮᯒᯖ᯲ ᯖᯮ ᯖᯬᯒᯮ ᯖᯔᯪ᯲ᯅᯬ ᯔ ᯉᯪᯀᯉ᯲ ᯔᯒ᯲ᯅᯮᯞᯮᯰ ᯖᯮ ᯎᯉᯪ᯲ᯐᯰ ᯔᯔᯔ᯲ᯇᯒ᯲ ᯖᯮ ᯘᯪᯀᯔᯉᯮ᯲ ᯔᯝᯒᯩ᯲ᯅᯰ ᯉᯰ ᯖᯮ ᯂᯔ᯲ᯅᯪᯒᯰ

Nang so mantap sihol, nang pe si partalu di jabu, si parmonang  ma nang di balian. 

ᯉᯰ ᯘᯬ ᯔᯉ᯲ᯖᯇ᯲ ᯘᯪᯂᯞᯬ᯲ ᯉᯰ ᯇᯩ ᯘᯪ ᯇᯒ᯲ᯖᯞᯮ ᯑᯪ ᯐᯅᯮ ᯘᯪ ᯇᯒ᯲ᯔᯬᯉᯰ ᯔ ᯉᯰ ᯑᯪ ᯅᯞᯪᯀᯉ᯲

I ma pasu-pasu sijaloonta nang di hamuna raja ni hasuhuton songon i haha doli nami. 

ᯤ ᯔ ᯇᯘᯮᯇᯘᯮ ᯘᯪᯐᯞᯬᯀᯉᯬ᯲ᯖ ᯉᯰ ᯑᯪ ᯂᯔᯮᯉ ᯒᯐ ᯉᯪ ᯂᯘᯮᯂᯮᯖᯉᯬ᯲ ᯘᯬᯝᯉᯬ᯲ ᯤ ᯂᯂ ᯑᯬᯞᯪ ᯉᯔᯪ

Jadi husorsori ma haha doli, tangkas ma bahen raja ni anggi doli. 

ᯐᯑᯪ ᯂᯮᯘᯒᯬ᯲ᯘᯬᯒᯪ ᯔ ᯂᯂ ᯑᯬᯞᯪ ᯖᯰᯂᯘ᯲ ᯔ ᯅᯂᯉᯩ᯲ ᯒᯐ ᯉᯪ ᯀᯰᯎᯪ ᯑᯬᯞᯪ

Balintang ma pagabe, tumundalhon sitadoan, di pudian ni Ompu Maruarar, di hamu haha doli nami, sai gabe ma hamuna, tu angka ari na mangihut, molo marsipaolo-oloan. emma tutu

ᯅᯞᯉᯪ᯲ᯖᯰ ᯔ ᯇᯎᯅᯩ ᯖᯮᯔᯉᯮ᯲ᯑᯞ᯲ᯂᯉᯬ᯲ ᯘᯪᯖᯝᯬᯀᯉ᯲ ᯑᯪ ᯇᯮᯑᯪᯀᯉ᯲ ᯉᯪ ᯀᯔᯬ᯲ᯇᯮ ᯔᯒᯮᯀᯒᯒ᯲ ᯑᯪ ᯂᯔᯮ ᯂᯂ ᯑᯬᯞᯪ ᯉᯔᯪ ᯘᯤ ᯎᯅᯩ ᯔ ᯂᯔᯮᯉ ᯖᯮ ᯀᯰᯂ ᯀᯒᯪ ᯉ ᯔᯝᯪᯂᯖᯮ᯲ ᯔᯬᯞᯬ ᯔᯒ᯲ᯘᯪᯇᯀᯬᯞᯬᯀᯬᯞᯬᯘᯉ᯲ ᯀᯔᯩ᯲ᯔ ᯖᯮᯖᯮ

Mas maransimun marpege sangkarimpang, saholbung sapunguan, tangiang nami tu amanta na Martua Debata, sada ma hamu saluhutna na tininggalhon ni Ompu Maruarar on, mangangkat tu ginjang, manimbung rap tu toru, udur sahata saoloan. emma tutu

ᯔᯘ᯲ ᯔᯒᯉ᯲ᯘᯪᯔᯉᯮ᯲ ᯔᯒ᯲ᯇᯩᯎᯩ ᯘᯰᯂᯒᯔᯪ᯲ᯇᯰ ᯘᯂᯞᯬ᯲ᯅᯮᯰ ᯘᯇᯮᯝᯮᯀᯉ᯲ ᯖᯝᯪᯀᯰ ᯉᯔᯪ ᯖᯮ ᯀᯔᯉ᯲ᯖ ᯉ ᯔᯒ᯲ᯖᯮᯀ ᯑᯩᯅᯖ ᯘᯑ ᯔ ᯂᯔᯮ ᯘᯞᯮᯂᯖᯮ᯲ᯉ ᯖᯪᯉᯪᯰᯎᯞ᯲ᯂᯉᯬ᯲ ᯉᯪ ᯀᯔᯬ᯲ᯇᯮ ᯔᯒᯮᯀᯖᯒ᯲ ᯀᯉᯬ᯲ ᯔᯝᯰᯂᯖ᯲ ᯖᯮ ᯎᯉᯪ᯲ᯐᯰ ᯔᯉᯔᯪ᯲ᯅᯮᯰ ᯒᯇ᯲ ᯖᯮ ᯖᯬᯒᯮ ᯥᯑᯒᯮ᯲ ᯘᯂᯖ ᯘᯀᯬᯞᯬᯀᯉ᯲ ᯀᯔᯩ᯲ᯔ ᯖᯮᯖᯮ

Asa hot songon dalihan na tolu, asa horbo sitingko tanduk si sapang na ualu, parbutuha mangalilit parmata mangalu-alu, nang pe di balian manjampal, di huta do ianggo marngalu-ngalu, sude pasu-pasu na sian raja dongan tubu, annon sian angka raja ni hula-hula, tangiang nami tu Amanta Debata, hot ma i ompaon mu martonga ni jabu. emma tutu

ᯀᯘ ᯂᯖᯬ᯲ ᯘᯬᯝᯉᯬ᯲ ᯑᯞᯪᯂᯉ᯲ ᯉ ᯖᯬᯞᯮ ᯀᯘ ᯂᯒᯬ᯲ᯅᯬ ᯘᯪᯖᯪᯰᯂᯬ ᯖᯉ᯲ᯑᯂᯮ᯲ ᯘᯪ ᯘᯇᯰ ᯉ ᯥᯀᯞᯮ ᯇᯒ᯲ᯅᯮᯖᯮᯂ ᯔᯝᯞᯪᯞᯖᯪ᯲ ᯇᯒ᯲ᯔᯖ ᯔᯝᯞᯮᯀᯞᯮ ᯉᯰ ᯇᯩ ᯑᯪ ᯅᯞᯪᯀᯉ᯲ ᯔᯉ᯲ᯐᯔ᯲ᯇᯞ᯲ ᯑᯪ ᯂᯮᯖ ᯑᯬ ᯤᯀᯰᯎᯬ ᯔᯒ᯲ᯝᯞᯮᯝᯞᯮ ᯘᯮᯑᯩ ᯇᯘᯮᯇᯘᯮ ᯉ ᯘᯪᯀᯉ᯲ ᯒᯐ ᯑᯬᯑᯉ᯲ ᯖᯮᯅᯮ ᯀᯉ᯲ᯉᯉᯬ᯲ ᯘᯪᯀᯉ᯲ ᯀᯰᯂ ᯒᯐ ᯉᯪ ᯂᯮᯞᯂᯮᯞ ᯖᯝᯪᯀᯰ ᯉᯔᯪ ᯖᯮ ᯀᯔᯉ᯲ᯖ ᯑᯩᯅᯖ ᯂᯖᯬ᯲ ᯔ ᯤ ᯀᯔᯬ᯲ᯇᯀᯉᯬ᯲ ᯔᯮ ᯔᯒ᯲ᯖᯬᯝ ᯉᯪ ᯐᯅᯮ ᯀᯔᯩ᯲ᯔ ᯖᯮᯖᯮ

 Gabe ma jala horas sian anggi doli, ditambai angka dongan, mauliate ma

ᯎᯅᯩ ᯔ ᯐᯞ ᯂᯬᯒᯘ᯲ ᯘᯪᯀᯉ᯲ ᯀᯰᯎᯪ ᯑᯬᯞᯪ  ᯑᯪᯖᯔ᯲ᯅᯤ ᯀᯰᯂ ᯑᯬᯝᯉ᯲ ᯔᯥᯞᯪᯀᯖᯩ ᯔ