.png "Turi-turian ni si Aji Panungkunan Turpuk Papituhon (Pangke Android)")
Di ari haboborhat ni ulubalang i rap dohot angka donganna, nunga be sun dipangan si Tapi Marhillong Sere gala-gala ubatna i.
ᯑᯪ ᯀᯒᯪ ᯂᯅᯬᯅᯒᯬ᯲ᯂᯖ᯲ ᯉᯪ ᯥᯞᯮᯅᯞᯰ ᯤ ᯒᯇ᯲ ᯑᯬᯂᯖᯬ᯲ ᯀᯰᯂ ᯑᯬᯝᯉ᯲ᯉ ᯉᯮᯝ ᯅᯩ ᯘᯉᯮ᯲ ᯑᯪᯇᯝᯉ᯲ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯬᯰ ᯘᯩᯒᯩ ᯎᯞᯎᯞ ᯥᯅᯖ᯲ᯉ ᯤ
Nunga mangan ibana, jala margogo mardalani. Dang sadia leleng tutu nunga suang dihilala gogona.
ᯉᯮᯝ ᯔᯝᯉ᯲ ᯤᯅᯉ ᯐᯞ ᯔᯒ᯲ᯎᯬᯎᯬ ᯔᯒ᯲ᯑᯞᯉᯪ ᯑᯰ ᯘᯑᯪᯀ ᯞᯩᯞᯰᯩ ᯖᯮᯖᯮ ᯉᯮᯝ ᯘᯮᯀᯰ ᯑᯪᯂᯪᯞᯞ ᯎᯬᯎᯬᯉ
Mansai las ma roha ni Raja Sohuturon Dolok dohot pardihutana mamida hamamalum ni borunasida i.
ᯔᯉ᯲ᯘᯤ ᯞᯘ᯲ ᯔ ᯒᯬᯂ ᯉᯪ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯑᯬᯂᯖᯬ᯲ ᯇᯒ᯲ᯑᯪᯂᯮᯖᯉ ᯔᯒ᯲ᯉᯪᯑ ᯂᯔᯔᯞᯔᯮ᯲ ᯉᯪ ᯅᯬᯒᯮᯉᯘᯪᯑ ᯤ
Alai molo dung diingot raja i si Aji Panungkunan, songon na ponjot ma dihilala hosana.
ᯀᯞᯤ ᯔᯬᯞᯬ ᯑᯮᯰ ᯑᯪᯤᯝᯖᯬ᯲ ᯒᯐ ᯤ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯘᯬᯝᯉᯬ᯲ ᯉ ᯇᯉᯬ᯲ᯐᯖᯬ᯲ ᯔ ᯑᯪᯂᯪᯞᯞ ᯂᯬᯘᯉ
Ulubalang Partallik pe antong dohot angka donganna laos so ra mulak sian harangan.
ᯥᯞᯮᯅᯞᯰ ᯇᯒ᯲ᯖᯞ᯲ᯞᯂᯪ᯲ ᯇᯩ ᯀᯉ᯲ᯖᯬᯰ ᯑᯬᯂᯖᯬ᯲ ᯀᯰᯂ ᯑᯬᯝᯉ᯲ᯉ ᯞᯀᯘᯬ᯲ ᯘᯬ ᯒ ᯔᯮᯞᯂ᯲ ᯘᯪᯀᯉ᯲ ᯂᯒᯝᯉ᯲
Na beha do ulaning? Na so ra dapot nasida do bogas ni homang i? sai ninna roha ni raja i.
ᯉ ᯅᯩᯂ ᯑᯬ ᯥᯞᯉᯪᯰ ᯉ ᯘᯬ ᯒ ᯑᯇᯖᯬ᯲ ᯉᯘᯪᯑ ᯑᯬ ᯅᯬᯎᯘ᯲ ᯉᯪ ᯂᯬᯔᯰ ᯤ ᯘᯤ ᯉᯉᯪ᯲ᯉ ᯒᯬᯂ ᯉᯪ ᯒᯐ ᯤ
Sai jongjong ma ibana sipata di harbangan i, songon na paima-imahon haroro ni angka na
borhat tu harangan i.
ᯘᯤ ᯐᯬᯰᯐᯬᯰ ᯔ ᯤᯅᯉ ᯘᯪᯇᯖ ᯑᯪ ᯂᯒ᯲ᯅᯝᯉ᯲ ᯤ ᯘᯬᯝᯉᯬ᯲ ᯉ ᯇᯤᯔᯤᯔᯂᯉᯬ᯲ ᯂᯒᯬᯒᯬ ᯉᯪ ᯀᯰᯂ ᯉ ᯅᯒᯬ᯲ᯂᯖ᯲ ᯖᯮ ᯂᯒᯝᯉ᯲ ᯤ
Dung so ra ro di ari patoluhon didok raja i ma tu pardihutana, ua borhat ma ahu ale boru ni datulang, manomu tu harangan an, asa huboto manang na dapot nasida do si Aji Panungkunan.
ᯑᯮᯰ ᯘᯬ ᯒ ᯒᯬ ᯑᯪ ᯀᯒᯪ ᯇᯖᯬᯞᯮᯂᯉᯬ᯲ ᯑᯪᯑᯂᯬ᯲ ᯒᯐ ᯤ ᯔ ᯖᯮ ᯇᯒ᯲ᯑᯪᯂᯮᯖᯉ ᯥᯀ ᯅᯒᯬ᯲ᯂᯖ᯲ ᯔ ᯀᯂᯮ ᯀᯞᯩ ᯅᯬᯒᯮ ᯉᯪ ᯑᯖᯮᯞᯰ ᯔᯉᯬᯔᯮ ᯖᯮ ᯂᯒᯝᯉ᯲ ᯀᯉ᯲ ᯀᯘ ᯂᯮᯅᯬᯖᯬ ᯔᯉᯰ ᯉ ᯑᯇᯖᯬ᯲ ᯉᯘᯪᯑ ᯑᯬ ᯘᯪ ᯀᯐᯪ ᯇᯉᯮᯰᯂᯮᯉᯉ᯲
Nunga nian malum sahit ni borunta, alai songon na so tartaon ahu be na sai paima-imahon on!
ᯉᯮᯝ ᯉᯪᯀᯉ᯲ ᯔᯞᯔᯮ᯲ ᯘᯂᯖᯪ᯲ ᯉᯪ ᯅᯬᯒᯉᯮ᯲ᯖ ᯀᯞᯤ ᯘᯬᯝᯉᯬ᯲ ᯉ ᯘᯬ ᯖᯒ᯲ᯖᯀᯉᯬ᯲ ᯀᯂᯮ ᯅᯩ ᯉ ᯘᯤ ᯇᯤᯔᯤᯔᯂᯉᯬ᯲ ᯀᯉᯬ᯲
Jadi dialusi pardihutana i ma, unang ma jolo ho, ale anak ni namboru! borhat
ᯐᯑᯪ ᯑᯪᯀᯞᯮᯘᯪ ᯇᯒ᯲ᯑᯪᯂᯮᯖᯉ ᯤ ᯔ ᯥᯉᯰ ᯔ ᯐᯬᯞᯬ ᯅᯒᯬ᯲ᯂᯖ᯲ ᯂᯬ ᯀᯞᯩ ᯀᯉᯂ᯲ ᯉᯪ ᯉᯔ᯲ᯅᯬᯒᯮ
So tung lilu ho annon di tombak i; hape ro ma annon nasida, so didapot ho di huta. Ba luluanna ma ho muse. Lam so botoon be annon manang aha bahenon!
ᯘᯬ ᯖᯮᯰ ᯞᯪᯞᯮ ᯂᯬ ᯀᯉ᯲ᯉᯉᯬ᯲ ᯑᯪ ᯖᯔᯬ᯲ᯅᯂ᯲ ᯤ ᯂᯇᯩ ᯒᯬ ᯔ ᯀᯔ᯲ᯉᯉᯬ᯲ ᯉᯘᯪᯑ ᯘᯬ ᯑᯪᯑᯇᯖᯬ᯲ ᯂᯬ ᯑᯪ ᯂᯮᯖ ᯅ ᯞᯮᯞᯮᯀᯉ᯲ᯉ ᯔ ᯂᯬ ᯔᯮᯘᯩ ᯞᯔ᯲ ᯘᯬ ᯅᯬᯖᯬᯀᯉᯬ᯲ ᯅᯩ ᯀᯉ᯲ᯉᯉᯬ᯲ ᯔᯉᯰ ᯀᯂ ᯅᯂᯩᯉᯉᯬ᯲
Molo songon i didok ho da boru ni datulang, ba hupaima nama tutu di huta
on! ninna Raja Sohuturon Dolok mangalusi pardihutana i.
ᯔᯬᯞᯬ ᯘᯬᯝᯉᯬ᯲ ᯤ ᯑᯪᯑᯂᯬ᯲ ᯂᯬ ᯑ ᯅᯬᯒᯮ ᯉᯪ ᯑᯖᯮᯞᯰ ᯅ ᯂᯮᯇᯤᯔ ᯉᯔ ᯖᯮᯖᯮ ᯑᯪ ᯂᯮᯖ ᯀᯉᯬ᯲ ᯉᯉᯪ᯲ᯉ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯔᯝᯞᯮᯘᯪ ᯇᯒ᯲ᯑᯪᯂᯮᯖᯉ ᯤ
Dua ari nari dung na mangkatai i raja i dohot pardihutana, tarbege ma angka soara na marlas ni roha.
ᯑᯮᯀ ᯀᯒᯪ ᯉᯒᯪ ᯑᯮᯰ ᯉ ᯔᯰᯂᯖᯤ ᯤ ᯒᯐ ᯤ ᯑᯬᯂᯖᯬ᯲ ᯇᯒ᯲ᯑᯪᯂᯮᯖᯉ ᯖᯒ᯲ᯅᯩᯎᯩ ᯔ ᯀᯰᯂ ᯘᯬᯀᯒ ᯉ ᯔᯒ᯲ᯞᯘ᯲ ᯉᯪ ᯒᯬᯂ
Tung hira na marsurak-surak nama begeon soaranasida mandok, Horas, horas!
ᯖᯮᯰ ᯂᯪᯒ ᯉ ᯔᯒ᯲ᯘᯮᯒᯂ᯲ᯘᯮᯒᯂ᯲ ᯉᯔ ᯅᯩᯎᯩᯀᯉᯬ᯲ ᯘᯬᯀᯒᯉᯘᯪᯑ ᯔᯉ᯲ᯑᯂᯬ᯲ ᯂᯬᯒᯘ᯲ ᯂᯬᯒᯘ᯲
Marlojongi ma raja i sian bagasna tu harbangan; diida ma tutu angka na mangalului i nunga ro.
ᯔᯒ᯲ᯞᯬᯐᯬᯝᯪ ᯔ ᯒᯐ ᯤ ᯘᯪᯀᯉ᯲ ᯅᯎᯘ᯲ᯉ ᯖᯮ ᯂᯒ᯲ᯅᯝᯉ᯲ ᯑᯪᯤᯑ ᯔ ᯖᯮᯖᯮ ᯀᯰᯂ ᯉ ᯔᯝᯞᯮᯞᯮᯤ ᯉᯮᯝ ᯒᯬ
Di jolo sahali ma ulubalang Partallik Najingar rap dohot si Aji Panungkunan.
ᯑᯪ ᯐᯬᯞᯬ ᯘᯂᯞᯪ ᯔ ᯥᯞᯮᯅᯞᯰ ᯇᯒ᯲ᯖᯞ᯲ᯞᯂᯪ᯲ ᯉᯐᯪᯝᯒ᯲ ᯒᯇ᯲ ᯑᯬᯂᯖᯬ᯲ ᯘᯪ ᯀᯐᯪ ᯇᯉᯮᯰᯂᯮᯉᯉ᯲
Dang tarhatahon las ni roha ni raja i, sude tahe pangisi ni huta i, ama dohot ina, na magodang dohot angka dakdanak.
ᯑᯰ ᯖᯒ᯲ᯂᯖᯂᯉᯬ᯲ ᯞᯘ᯲ ᯉᯪ ᯒᯬᯂ ᯉᯪ ᯒᯐ ᯤ ᯘᯮᯑᯩ ᯖᯂᯩ ᯇᯝᯪᯘᯪ ᯉᯪ ᯂᯮᯖ ᯤ ᯀᯔ ᯑᯬᯂᯖᯬ᯲ ᯤᯉ ᯉ ᯔᯎᯬᯑᯰ ᯑᯬᯂᯖᯬ᯲ ᯀᯰᯂ ᯑᯂ᯲ᯑᯉᯂ᯲
Dung i diboan ma si Aji Panungkunan tu bagas ni raja i; dijomput ma dahanon tu simanjujung ni si Aji Panungkunan, jala didok ma :
ᯑᯮᯰ ᯤ ᯑᯪᯅᯬᯀᯉ᯲ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯖᯮ ᯅᯎᯘ᯲ ᯉᯪ ᯒᯐ ᯤ ᯑᯪᯐᯔᯬ᯲ᯇᯖᯮ᯲ ᯔ ᯑᯂᯉᯉᯬ᯲ ᯖᯮ ᯘᯪᯔᯉ᯲ᯐᯮᯐᯮᯰ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯐᯞ ᯑᯪᯑᯂᯬ᯲ ᯔ
Pir ma tondim ale Aji Panungkunan, nunga mulak tondi tu ruma, nunga sahat
ho di jabunta!
ᯇᯒᯪ᯲ ᯔ ᯖᯉᯬ᯲ᯑᯔᯪ᯲ ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲ ᯉᯮᯝ ᯔᯮᯞᯂ᯲ ᯖᯉᯬ᯲ᯑᯪ ᯖᯮ ᯒᯮᯔ ᯉᯮᯝ ᯘᯂᯖ᯲ ᯂᯬ ᯑᯪ ᯐᯅᯉᯮ᯲ᯖ
Dihudus ma mangalompa dengke dohot indahan.
ᯑᯪᯂᯮᯑᯘᯮ᯲ ᯔ ᯔᯝᯞᯔᯬ᯲ᯇ ᯑᯰᯩᯂᯩ ᯑᯬᯂᯖᯬ᯲ ᯀᯉᯪ᯲ᯑᯂᯉ᯲
Dung masak dibahen ma dengke i di atas ni indahan, songon upa-upa ni tondi ni si Aji Panungkunan.
ᯑᯮᯰ ᯔᯘᯂ᯲ ᯑᯪᯅᯂᯉᯩ᯲ ᯔ ᯑᯰᯩᯂᯩ ᯤ ᯑᯪ ᯀᯖᯘ᯲ ᯉᯪ ᯀᯉᯪ᯲ᯑᯂᯉ᯲ ᯘᯬᯝᯉᯬ᯲ ᯥᯇᯥᯇ ᯉᯪ ᯖᯉᯬ᯲ᯑᯪ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲
Dung i dipangan si Aji Panungkunan ma tutu indahan upa-upa i.
ᯑᯮᯰ ᯤ ᯑᯪᯇᯝᯉ᯲ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯔ ᯖᯮᯖᯮ ᯀᯉᯪ᯲ᯑᯂᯉ᯲ ᯥᯇᯥᯇ ᯤ
Marsogotna i disuru Raja Sohuturon Dolak ma na manambat horbo di tonga ni alaman.
ᯔᯒ᯲ᯘᯬᯎᯖᯬ᯲ᯉ ᯤ ᯑᯪᯘᯮᯒᯮ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯔ ᯉ ᯔᯉᯔ᯲ᯅᯖ᯲ ᯂᯒᯬ᯲ᯅᯬ ᯑᯪ ᯖᯬᯝ ᯉᯪ ᯀᯞᯔᯉ᯲
Dung i ditullang ma jala disahei; sun disahei diboan ma tu bagas, jala dilompa ma juhut i.
ᯑᯮᯰ ᯤ ᯑᯪᯖᯞᯮ᯲ᯞᯰ ᯔ ᯐᯞ ᯑᯪᯘᯂᯩᯤ ᯘᯉᯮ᯲ ᯑᯪᯘᯂᯩᯤ ᯑᯪᯅᯬᯀ᯲ ᯔ ᯖᯮ ᯅᯎᯘ᯲ ᯐᯞ ᯑᯪ ᯞᯔᯬ᯲ᯇ ᯔ ᯐᯮᯂᯖᯮ᯲ ᯤ
Dilompa ma nang indahan. Dung i disuru raja i ma naposona mamio pangisi ni huta i, asa ro mangan.
ᯑᯪᯞᯔᯬ᯲ᯇ ᯔ ᯉᯰ ᯀᯉᯪ᯲ᯑᯂᯉ᯲ ᯑᯮᯰ ᯤ ᯑᯪᯘᯮᯒᯮ ᯒᯐ ᯤ ᯔ ᯉᯇᯬᯘᯬᯉ ᯔᯔᯪᯀᯬ ᯇᯝᯪᯘᯪ ᯉᯪ ᯂᯮᯖ ᯤ ᯀᯘ ᯒᯬ ᯔᯝᯉ᯲
Dung sun nasida na mangan i, ba mandok hata ma natua-tua ni huta i, songon na manungkun, didok ma, boti do da rajanami!
ᯑᯮᯰ ᯘᯉᯮ᯲ ᯉᯘᯪᯑ ᯉ ᯔᯝᯉ᯲ ᯤ ᯅ ᯔᯉ᯲ᯑᯂᯬ᯲ ᯂᯖ ᯔ ᯉᯖᯮᯀᯖᯮᯀ ᯉᯪ ᯂᯮᯖ ᯤ ᯘᯬᯝᯉᯬ᯲ ᯉ ᯔᯉᯮᯰᯂᯉᯮ᯲ ᯑᯪᯑᯂᯬ᯲ ᯔ ᯅᯬᯖᯪ ᯑᯬ ᯑ ᯒᯐᯉᯔᯪ
Ba nunga on jolo ninangnang, da rajanami!
ᯅ ᯉᯮᯰᯝ ᯀᯉᯬ᯲ ᯐᯬᯞᯬ ᯉᯪᯉᯰᯉᯰ ᯑ ᯒᯐᯉᯔᯪ
Ba nunga i pe asa ninungnung!
ᯅ ᯉᯮᯝ ᯤ ᯇᯩ ᯀᯘ ᯉᯪᯉᯮᯰᯉᯮᯰ
Nunga on jolo pinangan, rajanami! Ba ipe asa sinungkun!
ᯉᯮᯝ ᯀᯉᯬ᯲ ᯐᯬᯞᯬ ᯇᯪᯉᯝᯉ᯲ ᯒᯐᯉᯔᯪ ᯅ ᯤᯇᯩ ᯀᯘ ᯘᯪᯉᯮᯰᯂᯉᯮ᯲
Ala ni tabo ni juhut horbo i mai dohot indahan na las i, da rajanami; parjolo tutu nipangan, i pe asa sinungkun.
ᯀᯞ ᯉᯪ ᯖᯅᯬ ᯉᯪ ᯐᯮᯂᯖᯮ᯲ ᯂᯒᯬ᯲ᯅᯬ ᯤ ᯔᯤ ᯑᯬᯂᯖᯬ᯲ ᯀᯉᯪ᯲ᯑᯂᯉ᯲ ᯉ ᯞᯘ᯲ ᯤ ᯑ ᯒᯐᯉᯔᯪ ᯇᯒ᯲ᯐᯬᯞᯬ ᯖᯮᯖᯮ ᯉᯪᯇᯝᯉ᯲ ᯤ ᯇᯩ ᯀᯘ ᯘᯪᯉᯮᯰᯂᯉᯮ᯲
Ba on pe, nunga bosur hami mangan indahan na las, mahap marlompan juhut, ba hata ni sipanganon i dipaboa raja i ma!
ᯅ ᯀᯉᯬ᯲ ᯇᯩ ᯉᯮᯝ ᯅᯬᯘᯒᯮ᯲ ᯂᯔᯪ ᯔᯝᯉ᯲ ᯀᯉᯪ᯲ᯑᯂᯉ᯲ ᯉ ᯞᯘ᯲ ᯔᯂᯇ᯲ ᯔᯒ᯲ᯞᯔᯬ᯲ᯇᯉ᯲ ᯐᯮᯂᯖᯮ᯲ ᯅ ᯂᯖ ᯉᯪ ᯘᯪᯇᯝᯉᯉᯬ᯲ ᯤ ᯑᯪᯇᯅᯬᯀ ᯒᯐ ᯤ ᯔ
Dung i didok raja i ma, olo tutu, hamu angka amang dohot hamu angka inang!
ᯑᯮᯰ ᯤ ᯑᯪᯑᯂᯬ᯲ ᯒᯐ ᯤ ᯔ ᯀᯬᯞᯬ ᯖᯮᯖᯮ ᯂᯔᯮ ᯀᯰᯂ ᯀᯔᯰ ᯑᯬᯂᯖᯬ᯲ ᯂᯔᯮ ᯀᯰᯂ ᯤᯉᯰ
Ba sihingkit ma sihompa, golang-golang tutu pangarahutna.
ᯅ ᯘᯪᯂᯪᯰᯂᯖᯪ᯲ ᯔ ᯘᯪᯂᯔᯬ᯲ᯇ ᯎᯬᯞᯰᯎᯬᯞᯰ ᯖᯮᯖᯮ ᯇᯝᯒᯂᯖᯮ᯲ᯉ
So sadia pe tutu na pinatupa i, sai godang ma pinasuna.
ᯘᯬ ᯘᯑᯪᯀ ᯇᯩ ᯖᯮᯖᯮ ᯉ ᯇᯪᯉᯖᯮᯇ ᯤ ᯘᯤ ᯎᯬᯑᯰ ᯔ ᯇᯪᯉᯘᯮᯉ
Pamurnas ma i tu daging, ba saudara ma tutu tu bohi!
ᯇᯔᯒᯮ᯲ᯉᯘ᯲ ᯔ ᯤ ᯖᯮ ᯑᯎᯪᯰ ᯅ ᯘᯥᯑᯒ ᯔ ᯖᯮᯖᯮ ᯖᯮ ᯅᯬᯂᯪ
Ba ia manungkun ma hamu tutu ale amang taringot tu hata ni sipanganon na so sadia i, ba sipanganon haroan do i.
ᯅ ᯤᯀ ᯔᯉᯮᯰᯂᯉᯮ᯲ ᯔ ᯂᯔᯮ ᯖᯮᯖᯮ ᯀᯞᯩ ᯀᯔᯰ ᯖᯒᯪᯝᯖᯬ᯲ ᯖᯮ ᯂᯖ ᯉᯪ ᯘᯪᯇᯝᯉᯉᯬ᯲ ᯉ ᯘᯬ ᯘᯑᯪᯀ ᯤ ᯅ ᯘᯪᯇᯝᯉᯉᯬ᯲ ᯂᯒᯬᯀᯉ᯲ ᯑᯬ ᯤ
Ala las ni rohangku naung horas antong mulak si Aji Panungkunan on tu hutanta on, tu bagasta on.
ᯀᯞ ᯞᯘ᯲ ᯑᯬ ᯒᯬᯂᯰᯂᯮ ᯉᯀᯮᯰ ᯂᯬᯒᯘ᯲ ᯀᯉ᯲ᯖᯬᯰ ᯔᯮᯞᯂ᯲ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯀᯉᯬ᯲ ᯖᯮ ᯂᯮᯖᯉ᯲ᯖ ᯀᯉᯬ᯲ ᯖᯮ ᯅᯎᯘ᯲ᯖ ᯀᯉᯬ᯲
Las situtu roha, ala horas do ulubalangta Partallik Najingar rap dohot angka donganna mulak sian dolok dohot harangan golap.
ᯞᯘ᯲ ᯘᯪᯖᯮᯖᯮ ᯒᯬᯂ ᯀᯞ ᯂᯬᯒᯘ᯲ ᯑᯬ ᯥᯞᯮᯅᯞᯰᯖ ᯇᯒ᯲ᯖᯞ᯲ᯞᯂᯪ᯲ ᯉ ᯐᯪᯝᯒ᯲ ᯒᯇ᯲ ᯑᯬᯂᯖᯬ᯲ ᯀᯰᯂ ᯑᯬᯝᯉ᯲ᯉ ᯔᯮᯞᯂ᯲ ᯘᯪᯀᯉ᯲ ᯑᯬᯞᯂᯬ᯲ ᯑᯬᯂᯖᯬ᯲ ᯂᯒᯝᯉ᯲ ᯎᯬᯞᯇ᯲
Songon i loja ma antong nasida, manangkohi dolok, mandalani angka rura
ᯘᯬᯝᯉᯬ᯲ ᯤ ᯞᯬᯐ ᯔ ᯀᯉ᯲ᯖᯬᯰ ᯉᯘᯪᯑ ᯔᯉᯰᯂᯬᯂᯪ ᯑᯬᯞᯂᯬ᯲ ᯔᯉ᯲ᯑᯞᯉᯪ ᯀᯰᯂ ᯒᯮᯒ
On pe hamu ale angka amang dohot hamu angka inang, na marharoan si Aji Panungkunan on ma ahu, umbahen na pinio hamu sude mangan tu bagas on!
ᯀᯉᯬ᯲ ᯇᯩ ᯂᯔᯮ ᯀᯞᯩ ᯀᯰᯂ ᯀᯔᯰ ᯑᯬᯂᯖᯬ᯲ ᯂᯔᯮ ᯀᯰᯂ ᯤᯉᯰ ᯉ ᯔᯒ᯲ᯂᯒᯬᯀᯉ᯲ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯀᯉᯬ᯲ ᯔ ᯀᯂᯮ ᯀᯔᯮ᯲ᯅᯂᯉᯩ᯲ ᯉ ᯇᯪᯉᯪᯀᯬ ᯂᯔᯮ ᯘᯮᯑᯩ ᯔᯝᯉ᯲ ᯖᯮ ᯅᯎᯘ᯲ ᯀᯉᯬ᯲
I ma didok raja i taringot tu hata ni sipanganon i.
ᯤ ᯔ ᯑᯪᯑᯂᯬ᯲ ᯒᯐ ᯤ ᯖᯒᯪᯝᯖᯬ᯲ ᯖᯮ ᯂᯖ ᯉᯪ ᯘᯪᯇᯝᯉᯉᯬ᯲ ᯤ
Dung i mandok hata ma natua-tua ni huta i, ninna ma.
ᯑᯮᯰ ᯤ ᯔᯉ᯲ᯑᯂᯬ᯲ ᯂᯖ ᯔ ᯉᯖᯮᯀᯖᯮᯀ ᯉᯪ ᯂᯮᯖ ᯤ ᯉᯉᯪ᯲ᯉ ᯔ
Olo ma tutu rajanami, ba nunga dipaboa raja i taringot tu hata ni sipanganon i, sialana na marpungu hita di bagas na martua on, na marampang na marjual on, sigomgom pangisina!
ᯀᯬᯞᯬ ᯔ ᯖᯮᯖᯮ ᯒᯐᯉᯔᯪ ᯅ ᯉᯮᯝ ᯑᯪᯇᯅᯬᯀ ᯒᯐ ᯤ ᯖᯒᯪᯝᯖᯬ᯲ ᯖᯮ ᯂᯖ ᯉᯪ ᯘᯪᯇᯝᯉᯉᯬ᯲ ᯤ ᯘᯪᯀᯞᯉ ᯉ ᯔᯒ᯲ᯇᯮᯝᯮ ᯂᯪᯖ ᯑᯪ ᯅᯎᯘ᯲ ᯉ ᯔᯒ᯲ᯖᯮᯀ ᯀᯉᯬ᯲ ᯉ ᯔᯒᯔ᯲ᯇᯰ ᯉ ᯔᯒ᯲ᯐᯮᯀᯞ᯲ ᯀᯉᯬ᯲ ᯘᯪᯎᯔᯬ᯲ᯎᯔᯬ᯲ ᯇᯝᯪᯘᯪᯉ
Haroan ni si Aji Panungkunan ma hape on, sipanganon na tabo naung pinangan i. Ba tung na uli ma i tu tu da rajanami.
ᯂᯒᯬᯀᯉ᯲ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯔ ᯂᯇᯩ ᯀᯉᯬ᯲ ᯘᯪᯇᯝᯉᯉᯬ᯲ ᯉ ᯖᯅᯬ ᯉᯀᯮᯰ ᯇᯪᯉᯝᯉ᯲ ᯤ ᯅ ᯖᯮᯰ ᯉ ᯥᯞᯪ ᯔ ᯤ ᯖᯮᯖᯮ ᯑ ᯒᯐᯉᯔᯪ
Ba on ma dohononnami.
ᯅ ᯀᯉᯬ᯲ ᯔ ᯑᯬᯂᯬᯉᯉᯬ᯲ᯉᯔᯪ
Bagot na marhalto ma rajanami, na tubu di robean.
ᯅᯎᯖᯬ᯲ ᯉ ᯔᯒ᯲ᯂᯞ᯲ᯖᯬ ᯔ ᯒᯐᯉᯔᯪ ᯉ ᯖᯮᯅᯮ ᯑᯪ ᯒᯬᯅᯩᯀᯉ᯲
Horas ma hami na manganhon, sai tubu ma singkat ni i di hamu, rajanami na mangalehon!
Dung hujaha sude mulai sian ginjang sahat tu toru,holan surat bataknai,adong panurathonna :amnon dohot annon dohot diboa manang diboan holan ido manurut ahu.
BalasHapus