ᯖᯮᯒᯪᯖᯮᯪᯀᯉ᯲ ᯉᯪ ᯘᯪ ᯀᯐᯪ ᯇᯉᯰᯮᯄ᯦ᯮᯉᯉ᯲ Turi-turian ni si Aji Panungkunan Turpuk Paualuhon (Pangke Android)

Ia Datu Pamurnas dung dibege na so mate do hape si Aji Panungkunan, nunga sai humasusa rohana, tung so adong be hasonangan ni rohana. 

ᯤᯀ ᯑᯖᯮ ᯇᯔᯒᯮ᯲ᯉᯘ᯲ ᯑᯮᯰ ᯑᯪᯅᯩᯎᯩ ᯉ ᯘᯬ ᯔᯖᯩ ᯑᯬ ᯂᯇᯩ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯉᯮᯝ ᯘᯤ ᯂᯮᯔᯘᯮᯘ ᯒᯬᯂᯉ ᯖᯮᯰ ᯘᯬ ᯀᯑᯰᯬ ᯅᯩ ᯂᯘᯬᯉᯝᯉ᯲ ᯉᯪ ᯒᯬᯂᯉ

Sahat muse ma barita tu ibana diboan angka pamolus, na mandok naung ro do Boru Saniang Naga di nipi ni si Aji Panungkunan, jala na paboahon ubat ni si Tapi Marhillong Sere. 

ᯘᯂᯖ᯲ ᯔᯮᯘᯩ ᯔ ᯅᯒᯪᯖ ᯖᯮ ᯤᯅᯉ ᯑᯪᯅᯬᯀᯉ᯲ ᯀᯰᯂ ᯇᯔᯬᯞᯘᯮ᯲ ᯉ ᯔᯉ᯲ᯑᯂᯬ᯲ ᯉᯀᯮᯰ ᯒᯬ ᯑᯬ ᯅᯬᯒᯮ ᯘᯉᯪᯀᯰ ᯉᯎ ᯑᯪ ᯉᯪᯇᯪ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯐᯞ ᯉ ᯇᯅᯬᯀᯂᯉᯬ᯲ ᯥᯅᯖ᯲ ᯉᯪ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯬᯰ ᯘᯩᯒᯩ

Diingot ibana ma gala-gala na tinallikna, na mardekdehan tu toru gotana. 

ᯑᯪᯤᯝᯖᯬ᯲ ᯤᯅᯉ ᯔ ᯎᯞᯎᯞ ᯉ ᯖᯪᯉᯞ᯲ᯞᯂᯪ᯲ᯉ ᯉ ᯔᯒ᯲ᯑᯂᯩ᯲ᯑᯩᯂᯉ᯲ ᯖᯮ ᯖᯬᯒᯮ ᯎᯬᯖᯉ

Nunga malum ninna antong sahit ni boru ni Raja Sohuturon Dolok.

ᯉᯮᯝ ᯔᯞᯔᯮ᯲ ᯉᯉᯪ᯲ᯉ ᯀᯉ᯲ᯖᯬᯰ ᯘᯂᯖᯪ᯲ ᯉᯪ ᯅᯬᯒᯮ ᯉᯪ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲

Las situtu ma rohana dung adong muse na paboahon, naung diluahon homang si Aji Panungkunan; donganna i do anggo na mamboan gala-gala ubat ni si Tapi Marhillong Sere i.

ᯞᯘ᯲ ᯘᯪᯖᯮᯖᯮ ᯔ ᯒᯬᯂᯉ ᯑᯮᯰ ᯀᯑᯬᯰ ᯔᯮᯘᯩ ᯉ ᯇᯅᯬᯀᯂᯉᯬ᯲ ᯉᯀᯮᯰ ᯑᯪᯞᯮᯀᯂᯉᯬ᯲ ᯂᯬᯔᯰ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯑᯬᯝᯉ᯲ᯉ ᯤᯑᯬ ᯀᯰᯎᯬ ᯉ ᯔᯔ᯲ᯅᯬᯀᯉ᯲ ᯎᯞᯎᯞ ᯥᯅᯖ᯲ ᯉᯪ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯬᯰ ᯘᯩᯒᯩ ᯤ

Sai mago ma nian ibana di harangan i, sai dao ma nian diluahon homang i, unang dapot eahan ni manisia! ninna rohana.

ᯘᯤ ᯔᯎᯬ ᯔ ᯉᯪᯀᯉ᯲ ᯤᯅᯉ ᯑᯪ ᯂᯒᯝᯉ᯲ ᯤ ᯘᯤ ᯑᯀᯬ ᯲ ᯔ ᯉᯪᯀᯉ᯲ ᯑᯪᯞᯮᯀᯂᯉᯬ᯲ ᯂᯬᯔᯰ ᯤ ᯥᯉᯰ ᯑᯇᯖᯬ᯲ ᯀᯩᯀᯂᯉ᯲ ᯉᯪ ᯔᯉᯪᯘᯪᯀ ᯉᯉᯪ᯲ᯉ ᯒᯬᯂᯉ

Tarsonggot situtu ma Datu Pamurnas dung sahat muse tu ibana barita, naung diupa-upa Raja Sohuturon Dolok hape si Aji Panungkunan; jadi tahuton ma ibana.

ᯖᯒ᯲ᯘᯰᯬᯎᯖᯬ᯲ ᯘᯪᯖᯮᯖᯮ ᯔ ᯑᯖᯮ ᯇᯔᯒᯮ᯲ᯉᯘ᯲ ᯑᯮᯰ ᯘᯂᯖ᯲ ᯔᯮᯘᯩ ᯖᯮ ᯤᯅᯉ ᯅᯒᯪᯖ ᯉᯀᯮᯰ ᯑᯪᯥᯇᯥᯇ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯂᯇᯩ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯐᯑᯪ ᯖᯂᯮᯖᯉᯬ᯲ ᯔ ᯤᯅᯉ

Mago ma ahu, anggo dung dohot Raja Sohuturon Dolok alongku ! ninna rohana.

ᯔᯎᯬ ᯔ ᯀᯂᯮ ᯀᯰᯎᯬ ᯑᯮᯰ ᯑᯬᯂᯖᯬ᯲ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯀᯞᯰᯬᯂᯮ ᯉᯉᯪ᯲ᯉ ᯒᯬᯂᯉ

Dung i laho ma ibana mandapothon guruna, Guru Datu Bolon Paniop Pagar, asa diajarhon tu ibana antong pagar pangaliluon.

ᯑᯮᯰ ᯤ ᯞᯂᯬ ᯔ ᯤᯅᯉ ᯔᯉ᯲ᯑᯇᯖᯬ᯲ᯂᯉᯬ᯲ ᯎᯮᯒᯮᯉ ᯎᯮᯒᯮ ᯑᯖᯮ ᯅᯬᯞᯉᯬ᯲ ᯇᯉᯪᯀᯇᯬ᯲ ᯇᯎᯒ᯲ ᯀᯘ ᯑᯪᯀᯐᯒ᯲ᯂᯉᯬ᯲ ᯖᯮ ᯤᯅᯉ ᯀᯉ᯲ᯖᯰᯬ ᯇᯎᯒ᯲ ᯇᯝᯞᯪᯞᯮᯀᯉᯬ᯲

Ia ro na naeng manangkup ibana, asa bolas ibana mangaliluhon pamerengan ni halak, gabe so tarida ibana.

ᯤᯀ ᯒᯬ ᯉ ᯉᯀᯰᯩ ᯔᯉᯰᯂᯇᯮ᯲ ᯤᯅᯉ ᯀᯘ ᯅᯬᯞᯘ᯲ ᯤᯅᯉ ᯔᯝᯞᯪᯞᯮᯂᯉᯬ᯲ ᯇᯔᯩᯒᯩᯝᯉ᯲ ᯉᯪ ᯂᯞᯂ᯲ ᯎᯅᯩ ᯘᯬ ᯖᯒᯪᯑ ᯤᯅᯉ

Dung sahat ibana tu huta Lobu Parholean, huta ni guruna i, manungkun ma Datu Bolon Paniop Pagar, Dia ma alana umbahen ro ho tu huta on, ale Datu Pamurnas ?

ᯑᯮᯰ ᯘᯂᯖ᯲ ᯤᯅᯉ ᯖᯮ ᯂᯮᯖ ᯞᯬᯅᯮ ᯇᯒ᯲ᯂᯬᯞᯩᯀᯉ᯲ ᯂᯮᯖ ᯉᯪ ᯎᯮᯒᯮᯉ ᯤ ᯔᯉᯮᯰᯂᯉᯮ᯲ ᯔ ᯑᯖᯮ ᯅᯬᯞᯉᯬ᯲ ᯇᯉᯪᯀᯇᯬ᯲ ᯇᯎᯒ᯲ ᯑᯪᯀ ᯀᯞᯉ ᯀᯔᯮ᯲ᯅᯂᯉᯩ᯲ ᯒᯬ ᯂᯬ ᯖᯮ ᯂᯮᯖ ᯀᯉᯬ᯲ ᯀᯞᯩ ᯑᯖᯮ ᯇᯔᯒᯮ᯲ᯉᯘ᯲

Olo ba gurunami Datu Bolon Paniop Pagar! Nunga godang nian huguruhon sian ho gurunami Datu Bolon; nuaeng ba na ro do ahu antong mangido, asa lehononmu nian tu ahu pagar pangaliluon! ninna Datu Pamurnas.

ᯀᯬᯞᯬ ᯅ ᯎᯮᯒᯮᯉᯔᯪ ᯑᯖᯮ ᯅᯬᯞᯉᯬ᯲ ᯇᯉᯪᯀᯇᯬ᯲ ᯇᯎᯒ᯲ ᯉᯮᯝ ᯎᯬᯑᯰ ᯉᯪᯀᯉ᯲ ᯂᯮᯎᯮᯒᯮᯂᯉᯬ᯲ ᯘᯪᯀᯉ᯲ ᯂᯬ ᯎᯮᯒᯮᯉᯔᯪ ᯑᯖᯮ ᯅᯬᯞᯉᯬ᯲ ᯉᯮᯀᯀᯰᯩᯩ ᯅ ᯉ ᯒᯬ ᯑᯬ ᯀᯂᯮ ᯀᯉ᯲ᯖᯰᯬ ᯔᯝᯪᯑᯬ ᯀᯘ ᯞᯩᯂᯬᯉᯉᯬ᯲ᯔᯮ ᯉᯪᯀᯉ᯲ ᯖᯮ ᯀᯂᯮ ᯇᯎᯒ᯲ ᯇᯝᯞᯪᯞᯮᯀᯉᯬ᯲ ᯉᯉᯪ᯲ᯉ ᯑᯖᯮ ᯇᯔᯒᯮ᯲ᯉᯘ᯲

Ai aha huroha na masa umbahen dipangido ho pagar pangaliluon? ninna Datu Bolon i manungkun.

ᯀᯤ ᯀᯂ ᯂᯮᯒᯬᯂ ᯉ ᯔᯘ ᯀᯔᯮ᯲ᯅᯂᯉᯩ᯲ ᯑᯪᯇᯝᯪᯑᯬ ᯂᯬ ᯇᯎᯒ᯲ ᯇᯝᯞᯪᯞᯮᯀᯉᯬ᯲ ᯉᯉᯪ᯲ᯉ ᯑᯖᯮ ᯅᯬᯞᯉᯬ᯲ ᯤ ᯔᯉᯮᯰᯂᯉᯮ᯲

Dung i didok Datu Pamurnas ma, Na laho do ahu dohot si Aji Panungkun, ale gurunami, mangubati boru ni Raja Sohuturon Dolok, na margoar si Tapi Marhillong Sere. 

ᯑᯮᯰ ᯤ ᯑᯪᯑᯂᯬ᯲ ᯑᯖᯮ ᯇᯔᯒᯮ᯲ᯉᯘ᯲ ᯔ ᯉ ᯞᯂᯬ ᯑᯬ ᯀᯂᯮ ᯑᯬᯂᯖᯬ᯲ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯀᯞᯩ ᯎᯮᯒᯮᯉᯔᯪ ᯔᯝᯮᯅᯖᯪ ᯅᯬᯒᯮ ᯉᯪ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯉ ᯔᯒ᯲ᯎᯬᯀᯒ᯲ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯰᯬ ᯘᯩᯒᯩ

Jadi dung ummaha dihilala boru ni raja i, mulak ma hami.

ᯐᯑᯪ ᯑᯮᯰ ᯀᯔᯮ᯲ᯔᯂ ᯑᯪᯂᯪᯞᯞ ᯅᯬᯒᯮ ᯉᯪ ᯒᯐ ᯤ ᯔᯮᯞᯂ᯲ ᯔ ᯂᯔᯪ

Ia laho ma hami tu harangan pasihotangan, ba lilu ma si Aji Panungkunan, so huida be. 

ᯤᯀ ᯞᯂᯬ ᯔ ᯂᯔᯪ ᯖᯮ ᯂᯒᯝᯉ᯲ ᯇᯒ᯲ᯘᯪᯂᯬᯖᯝᯉ᯲ ᯅ ᯞᯪᯞᯮ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯘᯬ ᯂᯮᯤᯑ ᯅᯩ

Jadi mulak ma sasada ahu tu huta.

ᯐᯑᯪ ᯔᯮᯞᯂ᯲ ᯔ ᯘᯘᯑ ᯀᯂᯮ ᯖᯮ ᯂᯮᯖ

Hape hubege ma, nunga dapot pangisi ni huta Lobu Namaduma ibana di harangan pasihotangan i peak-peak, hona ihot dohot hotang.

ᯂᯇᯩ ᯂᯮᯅᯩᯎᯩᯔ ᯉᯮᯝ ᯑᯇᯖᯬ᯲ ᯇᯝᯪᯘᯪ ᯉᯪ ᯂᯮᯖ ᯞᯬᯅᯮ ᯉᯔᯑᯮᯔ ᯤᯅᯉ ᯑᯪ ᯂᯒᯝᯉ᯲ ᯇᯒ᯲ᯘᯪᯂᯬᯖᯝᯉ᯲ ᯤ ᯇᯩᯀᯂ᯲ᯇᯩᯀᯂ᯲ ᯂᯬᯉ ᯤᯂᯖᯬ᯲ ᯑᯬᯂᯖᯬ᯲ ᯂᯬᯖᯰ

Marsahit posa ma muse boru ni raja i, ba diboto si Aji Panungkunan ma ninna ubatna; jadi nunga malum jala pate.

ᯔᯒ᯲ᯘᯂᯖᯪ᯲ ᯇᯬᯘ ᯔ ᯔᯮᯘᯩ ᯅᯬᯒᯮ ᯉᯪ ᯒᯐ ᯤ ᯅ ᯑᯪᯅᯬᯖᯬ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯔ ᯉᯉᯪ᯲ᯉ ᯥᯅᯖ᯲ᯉ ᯐᯑᯪ ᯉᯮᯝ ᯔᯞᯔᯮ᯲ ᯐᯞ ᯇᯖᯩ

Ndang tagamon ale gurunami, Datu Bolon, so dohonon ni raja i, na ahu do mangihot si Aji Panungkunan. 

ᯀᯉᯪ᯲ᯑᯰ ᯖᯎᯔᯉᯬ᯲ ᯀᯞᯩ ᯎᯮᯒᯮᯉᯔᯪ ᯑᯖᯮ ᯅᯬᯞᯉᯬ᯲ ᯘᯬ ᯑᯬᯂᯬᯉᯉᯬ᯲ ᯉᯪ ᯒᯐ ᯤ ᯉ ᯀᯂᯮ ᯑᯬ ᯔᯝᯪᯂᯖᯬ᯲ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Luluanna ma ahu asa uhumona. Dang mangate pangisi ni hutanami tu pangisi ni Lobu Namaduma. 

ᯞᯮᯞᯮᯀᯉ᯲ᯉ ᯔ ᯀᯂᯮ ᯀᯘ ᯥᯂᯮᯔᯉᯬ᯲ᯉ ᯑᯰ ᯔᯝᯖᯩ ᯇᯝᯪᯘᯪ ᯉᯪ ᯂᯮᯖᯉᯔᯪ ᯖᯮ ᯇᯝᯪᯘᯪ ᯉᯪ ᯞᯬᯅᯮ ᯉᯔᯑᯮᯔ

Agia sataon nasida so mangula, sai na adong ma panganonna. Anggo hutanami do, ba otik do pangisina jala na pogospogos do sude.

ᯀᯎᯪᯀ ᯘᯖᯀᯉᯬ᯲ ᯉᯘᯪᯑ ᯘᯬ ᯔᯝᯮᯞ ᯘᯤ ᯉ ᯀᯑᯰᯬ ᯔ ᯇᯝᯉᯉᯬ᯲ᯉ ᯀᯰᯎᯬ ᯂᯮᯖᯉᯔᯪ ᯑᯬ ᯅ ᯀᯬᯖᯂᯪ᯲ ᯑᯬ ᯇᯝᯪᯘᯪᯉ ᯐᯞ ᯉ ᯇᯬᯎᯘᯬ᯲ᯇᯬᯎᯘᯬ᯲ ᯑᯬ ᯘᯮᯑᯩ

Lehon ma di ahu pagar pangaliluon. Ia tung ro pe nasida, unang bolas ahu antong dapotsa!

ᯞᯩᯂᯉᯬ᯲ ᯔ ᯑᯪ ᯀᯂᯮ ᯇᯎᯒ᯲ ᯇᯝᯞᯪᯞᯮᯀᯉᯬ᯲ ᯤᯀ ᯖᯮᯰ ᯒᯬ ᯇᯩ ᯉᯘᯪᯑ ᯥᯉᯰ ᯅᯬᯞᯘ᯲ ᯀᯂᯮ ᯀᯉ᯲ᯖᯰᯬ ᯑᯇᯖᯬ᯲ᯘ

Dung i didok Datu Bolon Paniop Pagar ma, lngkon huboto do ale Datu Pamumas, manang aha na niula ni siseanhu, i pe asa bolas hulehon tamba ni angka hadatuon naung huajarhon.

ᯑᯮᯰ ᯤ ᯑᯪᯑᯂᯬ᯲ ᯑᯖᯮ ᯅᯬᯞᯉᯬ᯲ ᯇᯉᯪᯀᯇᯬ᯲ ᯇᯎᯒ᯲ ᯔ ᯀᯰᯪᯂᯉᯬ᯲ ᯂᯮᯅᯬᯖᯬ ᯑᯬ ᯀᯞᯩ ᯑᯖᯮ ᯇᯔᯒᯮ᯲ᯉᯘ᯲ ᯔᯉᯰ ᯀᯂ ᯉ ᯉᯪᯥᯞ ᯉᯪ ᯘᯪᯘᯩᯀᯉ᯲ᯂᯮ ᯤ ᯇᯩ ᯀᯘ ᯅᯬᯞᯘ᯲ ᯂᯮᯞᯩᯂᯉᯬ᯲ᯖᯔ᯲ᯅ ᯉᯪ ᯀᯰᯂ ᯂᯑᯖᯮᯀᯉᯬ᯲ ᯉᯀᯮᯰ ᯂᯮᯀᯐᯒ᯲ᯂᯉᯬ᯲

Anggo mangubati nunga diguruhon ho godang sian ahu; alai anggo pagar pangaliluon ingkon manat-manat do i lehonon. 

ᯀᯰᯎᯬ ᯔᯝᯮᯅᯖᯪ ᯉᯮᯝ ᯑᯪᯎᯮᯒᯮᯂᯉᯬ᯲ ᯂᯬ ᯎᯬᯑᯰ ᯘᯪᯀᯉ᯲ ᯀᯂᯮ ᯀᯞᯤ ᯀᯰᯎᯬ ᯇᯎᯒ᯲ ᯇᯝᯞᯪᯞᯮᯀᯉᯬ᯲ ᯀᯰᯪᯂᯉᯬ᯲ ᯔᯉᯖ᯲ᯔᯉᯖ᯲ ᯑᯬ ᯤ ᯞᯩᯂᯬᯉᯉᯬ᯲

Ai molo bolas angin masuk tu jabu, bolas ma na maniop pangaliluon bongot tu jabu i. 

ᯀᯤ ᯔᯬᯞᯬ ᯅᯬᯞᯘ᯲ ᯀᯝᯉᯪ᯲ ᯔᯘᯂᯮ᯲ ᯖᯮ ᯐᯅᯮ ᯅᯬᯞᯘ᯲ ᯔ ᯉ ᯔᯉᯪᯀᯇᯬ᯲ ᯇᯝᯞᯪᯞᯮᯀᯉᯬ᯲ ᯅᯬᯝᯖᯬ᯲ ᯖᯮ ᯐᯅᯮ ᯤ

Ia sala diulahon pangaliluon i, ingkon hosa ma tobusna. Ingkon mate ma anakmu manang borum!

ᯤᯀ ᯘᯞ ᯑᯪᯥᯞᯂᯉᯬ᯲ ᯇᯝᯞᯪᯞᯮᯀᯉᯬ᯲ ᯤ ᯀᯰᯪᯂᯉᯬ᯲ ᯂᯬᯘ ᯔ ᯖᯬᯅᯘᯮ᯲ᯉ ᯀᯰᯪᯂᯉᯬ᯲ ᯔᯖᯩ ᯔ ᯀᯉᯂ᯲ᯔᯮ ᯔᯉᯰ ᯅᯬᯒᯔᯮ᯲

I ma tutu, gurunami Datu Bolon! ninna Datu Pamurnas.

ᯤ ᯔ ᯖᯮᯖᯮ ᯎᯮᯒᯮᯉᯔᯪ ᯑᯖᯮ ᯅᯬᯞᯉᯬ᯲ ᯉᯉᯪ᯲ᯉ ᯑᯖᯮ ᯇᯔᯒᯮ᯲ᯉᯘ᯲

Dung i dibuat Datu Bolon Paniop Pagar ma pinggan sada, diusehon ma aek na tio tusi. 

ᯑᯮᯰ ᯤ ᯑᯪᯅᯮᯀᯖ᯲ ᯑᯖᯮ ᯅᯬᯞᯉᯬ᯲ ᯇᯉᯪᯀᯇᯬ᯲ ᯇᯎᯒ᯲ ᯔ ᯇᯰᯪᯎᯉ᯲ ᯘᯑ ᯑᯪᯥᯘᯩᯂᯉᯬ᯲ ᯔ ᯀᯀᯂᯩ᯲ ᯉ ᯖᯪᯀᯬ ᯖᯮᯘᯪ

Dibuat ma hajutna, dung i diroro ma napuranna sian bagasan. 

ᯑᯪᯅᯮᯀᯖ᯲ ᯔ ᯂᯐᯖᯮ᯲ᯉ ᯑᯮᯰ ᯤ ᯑᯪᯒᯬᯒᯬ ᯔ ᯉᯇᯮᯒᯉ᯲ᯉ ᯘᯪᯘᯉ᯲ ᯅᯎᯘᯉ᯲

Dipeakkon ma sasambulung napuran i humaliang pinggan i. 

ᯑᯪᯇᯩᯀᯂ᯲ᯂᯉᯬ᯲ ᯔ ᯘᯘᯔ᯲ᯅᯮᯞᯮᯰ ᯉᯇᯮᯒᯉ᯲ ᯤ ᯂᯮᯔᯞᯪᯀᯰ ᯇᯰᯪᯎᯉ᯲ ᯤ

Ditutung ma haminjon saotik, mardongan hasior na mahiang. 

ᯑᯪᯖᯮᯖᯮᯰ ᯔ ᯂᯔᯉᯪ᯲ᯐᯉᯬ᯲ ᯘᯀᯬᯖᯂᯪ᯲ ᯔᯒ᯲ᯑᯬᯝᯉ᯲ ᯂᯘᯪᯀᯒᯬ᯲ ᯉ ᯔᯂᯪᯀᯰ

Dirintak ma rautna, sai diambal-ambalhon di atas ni haminjon i, sian hambirang tu siamun, mulah-ulak huhut sai mubit-ubit ma simangkudapna martabas.

ᯑᯪᯒᯉᯪ᯲ᯖᯂ᯲ ᯔ ᯒᯀᯖᯮ᯲ᯉ ᯘᯤ ᯑᯪᯀᯔ᯲ᯅᯞ᯲ᯀᯔ᯲ᯅᯞ᯲ᯂᯉᯬ᯲ ᯑᯪ ᯀᯖᯘ᯲ ᯉᯪ ᯂᯔᯉᯪ᯲ᯐᯉᯬ᯲ ᯤ ᯘᯪᯀᯉ᯲ ᯂᯔ᯲ᯅᯪᯒᯰ ᯖᯮ ᯘᯪᯀᯔᯉᯮ᯲ ᯔᯮᯞᯂ᯲ᯥᯞᯂ᯲ ᯂᯮᯂᯖᯮ᯲ ᯘᯤ ᯔᯮᯅᯖᯪ᯲ᯥᯅᯖᯪ᯲ ᯔ ᯘᯪᯔᯰᯂᯮᯑᯇ᯲ᯉ ᯔᯒ᯲ᯖᯅᯘ᯲

Dung sun na martabas i, dipamanat ma aek na di pinggan i, hape nunga litok.

ᯑᯮᯰ ᯘᯉᯮ᯲ ᯉ ᯔᯒ᯲ᯖᯅᯘ᯲ ᯤ ᯑᯪᯇᯔᯉᯖ᯲ ᯔ ᯀᯀᯂᯩ᯲ ᯉ ᯑᯪ ᯇᯰᯪᯎᯉ᯲ ᯤ ᯂᯇᯩ ᯉᯮᯝ ᯞᯪᯖᯂᯬ᯲

Ale Datu Pamumas, beha do rupa ni aek on nangkin di pinggan on? ninna Datu Bolon i manungkun.

ᯀᯞᯩ ᯑᯖᯮ ᯇᯔᯒᯮ᯲ᯉᯘ᯲ ᯅᯩᯂ ᯑᯬ ᯒᯮᯇ ᯉᯪ ᯀᯀᯂᯩ᯲ ᯀᯉᯬ᯲ ᯉᯰᯂᯉᯪ᯲ ᯑᯪ ᯇᯰᯪ᯲ᯎᯉ᯲ ᯀᯉᯬ᯲ ᯉᯉᯪ᯲ᯉ ᯑᯖᯮ ᯅᯬᯞᯉᯬ᯲ ᯤ ᯔᯉᯮᯰᯂᯉᯮ᯲

Tio do gurunami, Datu Bolon! ninna Datu Pamumas.

ᯖᯪᯀᯬ ᯑᯬ ᯎᯮᯒᯮᯉᯔᯪ ᯑᯖᯮ ᯅᯬᯞᯉᯬ᯲ ᯉᯉᯪ᯲ᯉ ᯑᯖᯮ ᯇᯔᯒᯮ᯲ᯉᯘ᯲

Boasa litok ia nuaeng? ninna Datu Bolon i muse manungkun.

ᯅᯬᯀᯘ ᯞᯪᯖᯂᯬ᯲ ᯤᯀ ᯉᯮᯀᯀᯰᯩ ᯉᯉᯪ᯲ᯉ ᯑᯖᯮ ᯅᯬᯞᯉᯬ᯲ ᯤ ᯔᯮᯘᯩ ᯔᯉᯮᯰᯂᯉᯮ᯲

Dang huboto, gurunami Datu Bolon ! ninna Datu Pamurnas.

ᯑᯰ ᯂᯮᯅᯬᯖᯬ ᯎᯮᯒᯮᯉᯔᯪ ᯑᯖᯮ ᯅᯬᯞᯉᯬ᯲ ᯉᯉᯪ᯲ᯉ ᯑᯖᯮ ᯇᯔᯒᯮ᯲ᯉᯘ᯲

Dung i dijonggor Datu Bolon Paniop Pagar ma siseanna i, mansai tajom simalolongna, songon tajom ni raut parnabung dihilala Datu Pamurnas na manorusi ate-atena.

ᯑᯮᯰ ᯤ ᯑᯪᯐᯰᯬᯎᯒᯬ᯲ ᯑᯖᯮ ᯅᯬᯞᯉᯬ᯲ ᯇᯉᯪᯀᯇᯬ᯲ ᯇᯎᯒ᯲ ᯔ ᯘᯪᯘᯩᯀᯉ᯲ᯉ ᯤ ᯔᯉ᯲ᯘᯤ ᯖᯐᯔᯬ᯲ ᯘᯪᯔᯞᯬᯞᯰᯬᯉ ᯘᯬᯝᯉᯬ᯲ ᯖᯐᯔᯬ᯲ ᯉᯪ ᯒᯀᯖᯮ᯲ ᯇᯒ᯲ᯉᯅᯮᯰ ᯑᯪᯂᯪᯞᯞ ᯑᯖᯮ ᯇᯔᯒᯮ᯲ᯉᯘ᯲ ᯉ ᯔᯉᯬᯒᯮᯘᯪ ᯀᯖᯩᯀᯖᯩᯉᯮᯮ

Dung i didok Datu Bolona i ma, Marjea ma ho ale Datu Pamurnas! Nunga digabusi ho ahu, gurum ! Paboa ma tu ahu sintong!

ᯑᯮᯰ ᯤ ᯑᯪᯑᯂᯬ᯲ ᯑᯖᯮ ᯅᯬᯞᯉᯬ᯲ ᯤ ᯔ ᯔᯒ᯲ᯐᯩᯀ ᯔ ᯂᯬ ᯀᯞᯩ ᯑᯖᯮ ᯇᯔᯒᯮ᯲ᯉᯘ᯲ ᯉᯮᯝ ᯑᯪᯎᯅᯮᯘᯪ ᯂᯬ ᯀᯂᯮ ᯎᯮᯒᯔᯮ᯲ ᯇᯅᯬᯀ ᯔ ᯖᯮ ᯀᯂᯮ ᯘᯉᯪ᯲ᯖᯰᯬ

Sai angkadotdot ma Datu Pamurnas, ninna ma, Gurunami Datu Bolon Paniop Pagar, dung ummaha sahit ni boru ni Raja Sohuturon Dolok huubati, dilehon raja i ma di ahu mas. 

ᯘᯤ ᯀᯰᯂᯑᯖᯬ᯲ᯑᯖᯬ᯲ ᯔ ᯑᯖᯮ ᯇᯔᯒᯮ᯲ᯉᯘ᯲ ᯉᯉᯪ᯲ᯉ ᯔ ᯎᯮᯒᯮᯉᯔᯪ ᯑᯖᯮ ᯅᯬᯞᯉᯬ᯲ ᯇᯉᯪᯀᯇᯬ᯲ ᯇᯎᯒ᯲ ᯑᯮᯰ ᯀᯔᯮ᯲ᯔᯂ ᯘᯂᯖᯪ᯲ ᯉᯪ ᯅᯬᯒᯮ ᯉᯪ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯂᯮᯥᯅᯖᯪ ᯑᯪᯞᯩᯂᯉᯬ᯲ ᯒᯐ ᯤ ᯔ ᯑᯪ ᯀᯂᯮ ᯔᯘ᯲

Jadi di tongan dalan, di na laho mulak hami tu huta, maradian ma hami di topi Aek Parbaraan. 

ᯐᯑᯪ ᯑᯪ ᯖᯬᯝᯉ᯲ ᯑᯞᯉ᯲ ᯑᯪ ᯉ ᯞᯂᯬ ᯔᯮᯞᯂ᯲ ᯂᯔᯪ ᯖᯮ ᯂᯮᯖ ᯔᯒᯑᯪᯀᯉ᯲ ᯔ ᯂᯔᯪ ᯑᯪ ᯖᯬᯇᯪ ᯀᯀᯂᯩ᯲ ᯇᯒ᯲ᯅᯒᯀᯉ᯲

Hu tallik ma disi gala-gala, laos hudok, Dua hali pitu borngin nari marsahit ma muse boru ni raja i. 

ᯂᯮᯖᯞ᯲ᯞᯂᯪ᯲ ᯔ ᯑᯪᯘᯪ ᯎᯞᯎᯞ ᯞᯀᯘᯬ᯲ ᯂᯮᯑᯂᯬ᯲ ᯑᯮᯀ ᯂᯞᯪ ᯇᯪᯖᯮ ᯅᯒᯬ᯲ᯝᯉᯪ᯲ ᯉᯒᯪ ᯔᯒ᯲ᯘᯂᯖᯪ᯲ ᯔ ᯔᯮᯘᯩ ᯅᯬᯒᯮ ᯉᯪ ᯒᯐ ᯤ

Ombushononku sian huta. Molo huubati muse, la lehonon ni raja i ma di ahu mas, ai na mora do Raja Sohuturon Dolok.

ᯀᯔᯬ᯲ᯅᯘᯮ᯲ᯂᯬᯉᯉᯬ᯲ᯂᯮ ᯘᯪᯀᯉ᯲ ᯂᯮᯖ ᯔᯬᯞᯬ ᯂᯮᯥᯅᯖᯪ ᯔᯮᯘᯩ ᯤᯀ ᯞᯩᯂᯬᯉᯉᯬ᯲ ᯉᯪ ᯒᯐ ᯤ ᯔ ᯑᯪ ᯀᯂᯮ ᯔᯘ᯲ ᯀᯤ ᯉ ᯔᯬᯒ ᯑᯬ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲

Sai dialo si Aji Panungkunan ma ahu, unang hubahen muse marsahit si Tapi Marhillong Sere.

ᯘᯤ ᯑᯪᯀᯞᯬ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯔ ᯀᯂᯮ ᯥᯉᯰ ᯂᯮᯅᯂᯉᯩ᯲ ᯔᯮᯘᯩ ᯔᯒ᯲ᯘᯂᯖᯪ᯲ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯰᯬ ᯘᯩᯒᯩ

Mabiar ma ahu ala nunga diboto ibana sangkaphi, so tung dipaboa tu raja i. 

ᯔᯅᯪᯀᯒ᯲ ᯔ ᯀᯂᯮ ᯀᯞ ᯉᯮᯝ ᯑᯪᯅᯬᯖᯬ ᯤᯅᯉ ᯘᯰᯂᯇ᯲ᯂᯪ ᯘᯬᯖᯮᯰ ᯑᯪᯇᯅᯬᯀ ᯖᯮ ᯒᯐ ᯤ

Mas i ma da mambahen i ale gurunami!

ᯔᯘ᯲ ᯤ ᯔ ᯑ ᯔᯔ᯲ᯅᯂᯉᯩ᯲ ᯤ ᯀᯞᯩ ᯎᯮᯒᯮᯉᯔᯪ

Huboan ma ibana tu Tor Nahapal, tu harangan golap laho mangalap hotang. Alai holan sidalianku do i.

ᯂᯮᯅᯬᯀᯉ᯲ ᯔ ᯤᯅᯉ ᯖᯮ ᯖᯒᯬ᯲ ᯉᯂᯇᯞ᯲ ᯖᯮ ᯂᯒᯝᯉ᯲ ᯎᯬᯞᯇ᯲ ᯞᯂᯬ ᯔᯝᯞᯇ᯲ ᯂᯬᯖᯰ ᯀᯞᯤ ᯂᯬᯞᯉ᯲ ᯘᯪᯑᯞᯪᯀᯉ᯲ᯂᯮ ᯑᯬ ᯤ 

Dung dapot hotang i, hulotak ma ibana sian pudi, dung i huihoti ma patna, huihoti tanganna tu pudi. 

ᯑᯮᯰ ᯑᯇᯖᯬ᯲ ᯂᯬᯖᯰ ᯤ ᯂᯮᯞᯬᯖᯂ᯲ ᯔ ᯤᯅᯉ ᯘᯪᯀᯉ᯲ ᯇᯮᯑᯪ ᯑᯮᯰ ᯤ ᯂᯮᯤᯂᯬᯎᯪ ᯔ ᯇᯖ᯲ᯉ ᯂᯪᯤᯂᯬᯖᯪ ᯖᯝᯉ᯲ᯉ ᯖᯮ ᯇᯮᯑᯪ

Disi ma ibana hupasombu, asa disi ibana nian mate. 

ᯑᯪᯘᯪ ᯔ ᯤᯅᯉ ᯂᯮᯇᯘᯔᯬ᯲ᯅᯮ ᯀᯘ ᯑᯪᯘᯪ ᯤᯅᯉ ᯉᯪᯀᯉ᯲ ᯔᯖᯩ

Ba nunga hupaboa sude na huulahon i, ale gurunami, asi roham di ahu.

ᯅ ᯉᯮᯝ ᯂᯮᯇᯅᯬᯀ ᯘᯮᯑᯩ ᯉ ᯂᯮᯥᯞᯂᯉᯬ᯲ ᯤ ᯀᯞᯩ ᯎᯮᯒᯮᯉᯔᯪ ᯀᯘᯪ  ᯒᯬᯂᯔ᯲ ᯑᯪ ᯀᯂᯮ

Dung i ditutung Datu Bolon i ma muse saotik haminjon, dung martimus diombushon ma timus i dompak Datu Pamurnas huhut ma didok, Habang ma sude gogo ni hadatuon naung hulehon tu ho!

ᯑᯮᯰ ᯤ ᯑᯪᯖᯮᯖᯮᯰ ᯑᯖᯮ ᯅᯬᯞᯉᯬ᯲ ᯤ ᯔ ᯔᯮᯘᯩ ᯘᯀᯬᯖᯂᯪ᯲ ᯂᯔᯉᯪ᯲ᯐᯉᯬ᯲ ᯑᯮᯰ ᯔᯒ᯲ᯖᯪᯔᯘᯮ᯲ ᯑᯪᯀᯔᯬ᯲ᯅᯘᯮ᯲ᯂᯉᯬ᯲ ᯔ ᯖᯪᯔᯘᯮ᯲ ᯤ ᯑᯔᯬ᯲ᯇᯂ᯲ ᯑᯖᯮ ᯇᯔᯒᯮ᯲ᯉᯘ᯲ ᯂᯮᯂᯖᯮ᯲ ᯔ ᯑᯪᯑᯂᯬ᯲ ᯂᯅᯰ ᯔ ᯘᯮᯑᯩ ᯎᯬᯎᯬ ᯉᯪ ᯂᯑᯖᯮᯘᯉᯬ᯲ ᯉᯀᯮᯰ ᯂᯮᯞᯩᯂᯉᯬ᯲ ᯖᯮ ᯂᯬ

Dung i dipispishon ma aek na sian pinggan i tu Datu Pamurnas.

ᯑᯮᯰ ᯤ ᯑᯪᯇᯘᯪ᯲ᯇᯘᯪ᯲ᯂᯉᯬ᯲ ᯔ ᯀᯀᯂᯩ᯲ ᯉ ᯘᯪᯀᯉ᯲ ᯇᯰᯪ᯲ᯎᯉ᯲ ᯤ ᯖᯮ ᯑᯖᯮ ᯇᯔᯒᯮ᯲ᯉᯘ᯲

Songon na tarmali tondi ma Datu Pamurnas, hehe ma ibana, dung i mijur ma sian bagas tu toru. 

ᯘᯬᯝᯉᯬ᯲ ᯉ ᯖᯒ᯲ᯔᯞᯪ ᯖᯉᯬ᯲ᯑᯪ ᯔ ᯑᯖᯮ ᯇᯔᯒᯮᯔᯉᯘ᯲ ᯂᯩᯂᯩ ᯔ ᯤᯅᯉ ᯑᯮᯰ ᯤ ᯔᯪᯐᯒᯮ᯲ ᯔ ᯘᯪᯀᯉ᯲ ᯅᯎᯘ᯲ ᯖᯮ ᯖᯬᯒᯮ

Dung di balian ni huta i ibana, sai marlojongi ma ibana, songon na nieak ni musu, songon jolma naung mago rohana. 

ᯑᯮᯰ ᯑᯪ ᯅᯞᯪᯀᯉ᯲ ᯉᯪ ᯂᯮᯖ ᯤ ᯤᯅᯉ ᯘᯤ ᯔᯒ᯲ᯞᯬᯐᯬᯝᯪ ᯔ ᯤᯅᯉ ᯘᯬᯝᯉᯬ᯲ ᯉ ᯉᯪᯀᯩᯀᯂ᯲ ᯉᯪ ᯔᯮᯘᯮ ᯘᯬᯝᯉᯬ᯲ ᯐᯞᯬ᯲ᯔ ᯉᯀᯮᯰ ᯔᯎᯬ ᯒᯬᯂᯉ

Songon i ma Datu Pamurnas maringkati.

ᯘᯬᯝᯉᯬ᯲ ᯤ ᯔ ᯑᯖᯮ ᯇᯔᯒᯮ᯲ᯉᯘ᯲ ᯔᯒᯰᯪᯂᯖᯪ

Dung i tungkap ma ibana di dalan i tu batu, laos mate.

ᯑᯮᯰ ᯤ ᯖᯮᯰᯂᯇ᯲ ᯔ ᯤᯅᯉ ᯑᯪ ᯑᯞᯉ᯲ ᯤ ᯖᯮ ᯅᯖᯮ ᯞᯀᯘᯬ᯲ ᯔᯖᯩ