ᯖᯮᯒᯪᯖᯮᯪᯀᯉ᯲ ᯉᯪ ᯘᯪ ᯀᯐᯪ ᯇᯉᯰᯮᯄ᯦ᯮᯉᯉ᯲ Turi-turian ni si Aji Panungkunan Turpuk Pasiahon (Pangke Android)

Dung dibege si Aji Panungkunan naung mate Datu Pamumas, didok ibana ma tu Raja Sohuturon Dolok, ale rajanami, paloas ma ahu jolo mulak tu hutanami, tu dainang. 

ᯑᯮᯰ ᯑᯪᯅᯩᯎᯩ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯉᯀᯮᯰ ᯔᯖᯩ ᯑᯖᯮ ᯇᯔᯒᯮ᯲ᯉᯘ᯲ ᯑᯪᯑᯂᯬ᯲ ᯤᯅᯉ ᯔ ᯖᯮ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯀᯞᯩ ᯒᯐᯉᯔᯪ ᯇᯞᯬᯀᯘ᯲ ᯔ ᯀᯂᯮ ᯐᯬᯞᯬ ᯔᯮᯞᯂ᯲ ᯖᯮ ᯂᯮᯖᯉᯔᯪ ᯖᯮ ᯑᯤᯉᯰ

Dang adong pola be sihabiaranku, ai nunga mate Datu Pamumas, na mambahen tahi na jahat tu ahu

ᯑᯰ ᯀᯑᯬᯰ ᯇᯬᯞ ᯅᯩ ᯘᯪᯂᯅᯪᯀᯖᯉ᯲ᯂᯮ ᯀᯤ ᯉᯮᯝ ᯔᯖᯩ ᯑᯖᯮ ᯇᯔᯒᯮ᯲ᯉᯘ᯲ ᯉ ᯔᯔ᯲ᯅᯂᯉᯩ᯲ ᯖᯂᯪ ᯉ ᯐᯂᯖ᯲ ᯖᯮ ᯀᯂᯮ

Na uli ma i tutu, ale Aji Panungkunan! Naeng ma tutu idaon ni inanta ho, asa diboto na mangolu do ho! 

ᯉ ᯥᯞᯪ ᯔ ᯤ ᯖᯮᯖᯮ ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲ ᯉᯀᯰᯩ ᯔ ᯖᯮᯖᯮ ᯤᯑᯀᯉᯬ᯲ ᯉᯪ ᯤᯉᯉ᯲ᯖ ᯂᯬ ᯀᯘ ᯑᯪᯅᯬᯖᯬ ᯉ ᯔᯝᯬᯞᯮ ᯑᯬ ᯂᯬ

Ndang tarhatahon balga ni rohanami, ala dipangkulingi Boru Saniang Naga ho di tingki na so marroha i ho di harangan pasihotangan i; gabe diboto ho antong ubat ni si Tapi Marhillong Sere. 

ᯀᯉᯪ᯲ᯑᯰ ᯖᯒ᯲ᯂᯖᯂᯉᯬ᯲ ᯅᯞ᯲ᯎ ᯉᯪ ᯒᯬᯂᯉᯔᯪ ᯀᯞ ᯑᯪᯇᯰᯂᯮᯞᯪᯝᯪ ᯅᯬᯒᯮ ᯘᯉᯪᯀᯰ ᯉᯎ ᯂᯬ ᯑᯪ ᯖᯪᯰᯂᯪ ᯉ ᯘᯬ ᯔᯒ᯲ᯒᯬᯂ ᯤ ᯂᯬ ᯑᯪ ᯂᯒᯝᯉ᯲ ᯇᯘᯪᯂᯬᯖᯝᯉ᯲ ᯤ ᯎᯅᯩ ᯑᯪᯅᯬᯖᯬ ᯂᯬ ᯀᯉ᯲ᯖᯬᯰ ᯥᯅᯖ᯲ ᯉᯪ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯬᯰ ᯘᯩᯒᯩ

Nunga malum sahitna tutu, nunga be hipas ibana.

ᯉᯮᯝ ᯔᯞᯔᯮ᯲ ᯘᯂᯖᯪ᯲ᯉ ᯖᯮᯖᯮ ᯉᯮᯝ ᯅᯩ ᯂᯪᯇᯘ᯲ ᯤᯅᯉ

Nuaeng pe hulehon ma di ho mas, tanda ni balga ni rohanami di ho, asa adong lehononmu tu inanta! ninna Raja Sohuturon Dolak mandok tu si Aji Panungkunan.

ᯉᯮᯀᯀᯰᯩ ᯇᯩ ᯂᯮᯞᯩᯂᯉᯬ᯲ ᯔ ᯑᯪ ᯂᯬ ᯔᯘ᯲ ᯖᯉ᯲ᯑ ᯉᯪ ᯅᯞ᯲ᯎ ᯉᯪ ᯒᯬᯂᯉᯔᯪ ᯑᯪ ᯂᯬ ᯀᯘ ᯀᯑᯬ᯦ᯰ ᯞᯩᯂᯬᯉᯉᯬ᯲ᯔᯮ ᯖᯮ ᯤᯉᯉ᯲ᯖ ᯉᯉᯪ᯲ᯉ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯔᯉ᯲ᯑᯂᯬ᯲ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Dang songon i ale rajanami! Na asi do roha ni Boru Saniang Naga di hita, umbahen na huboto i. Dada hamaloonku i. 

ᯑᯰ ᯘᯬᯝᯉᯬ᯲ ᯤ ᯀᯞᯩ ᯒᯐᯉᯔᯪ ᯉ ᯀᯘᯪ ᯑᯬ ᯒᯬᯂ ᯉᯪ ᯅᯬᯒᯮ ᯘᯉᯪᯀᯰ ᯉᯎ ᯑᯪ ᯂᯪᯖ ᯀᯔᯮ᯲ᯅᯂᯉᯩ᯲ ᯉ ᯂᯮᯅᯬᯖᯬ ᯤ ᯑᯑ ᯂᯔᯞᯬᯀᯉᯬ᯲ᯂᯮ ᯤ

Dung i rajanami, aut so diurupi raja i dohot pangisi ni huta on ahu, ba nunga mate ahu di tombak i, di pasihotangan i; ba manang di harangan na niluahon ni homang i ahu. 

ᯑᯮᯰ ᯤ ᯒᯐᯉᯔᯪ ᯀᯀᯖᯮ᯲ ᯘᯬ ᯑᯪᯥᯒᯮᯇᯪ ᯒᯐ ᯤ ᯑᯬᯂᯖᯬ᯲ ᯇᯝᯪᯘᯪ ᯉᯪ ᯂᯮᯖ ᯀᯉᯬ᯲ ᯀᯂᯮ ᯅ ᯉᯮᯝ ᯔᯖᯩ ᯀᯂᯮ ᯑᯪ ᯖᯔᯬ᯲ᯅᯂ᯲ ᯤ ᯑᯪ ᯇᯘᯪᯂᯬᯖᯝᯉ᯲ ᯤ ᯅ ᯔᯉᯰ ᯑᯪ ᯂᯒᯝᯉ᯲ ᯉ ᯉᯪᯞᯮᯀᯂᯉᯬ᯲ ᯉᯪ ᯂᯬᯔᯰ ᯤ ᯀᯂᯮ

Ahu do na marutang tu raja i ! ninna si Aji Panungkunan.

ᯀᯂᯮ ᯑᯬ ᯉ ᯔᯒᯮᯖᯰ ᯖᯮ ᯒᯐ ᯤ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲
Manang beha pe pangelek ni Raja Sohuturon Dolok, tung so olo do si Aji Panungkunan manjalo mas i sian raja i.

ᯔᯉᯰ ᯅᯩᯂ ᯇᯩ ᯇᯝᯩᯞᯂᯩ᯲ ᯉᯪ ᯒᯤ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯖᯮᯰ ᯘᯬ ᯀᯬᯞᯬ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯔᯉ᯲ᯐᯞᯬ ᯔᯘ᯲ ᯤ ᯘᯪᯀᯉ᯲ ᯒᯐ ᯤ

Holan on ma hupangido rajanami! ninna si Aji Panungkunan, adong ma nian na pataruhon ahu tu hutanami, Ia sahat ahu tu bagasnami, asa huboto antong na bolas sonang ahu maringanan di hutanami!

ᯂᯬᯞᯉ᯲ ᯀᯉᯬ᯲ ᯔ ᯂᯮᯇᯝᯪᯑᯬ ᯒᯐᯉᯔᯪ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯀᯑᯬᯰ ᯔ ᯉᯪᯀᯉ᯲ ᯉ ᯇᯖᯒᯮᯂᯉᯬ᯲ ᯀᯂᯮ ᯖᯮ ᯂᯮᯖᯉᯔᯪ ᯤᯀ ᯘᯂᯖ᯲ ᯀᯂᯮ ᯖᯮ ᯅᯎᯑ᯲ᯉᯔᯪ ᯀᯘ ᯂᯮᯅᯬᯖᯬ ᯀᯉ᯲ᯖᯬᯰ ᯉ ᯅᯬᯞᯘ᯲ ᯘᯬᯉᯰ ᯀᯂᯮ ᯔᯒᯪᯝᯉᯉ᯲ ᯑᯪ ᯂᯮᯖᯉᯔᯪ 

Anggo i do ba na denggan ma i! ninna raja i.

ᯀᯰᯎᯬ ᯤ ᯑᯬ ᯅ ᯉ ᯑᯰᯩᯎᯉ᯲ ᯔ ᯤ ᯉᯉᯪ᯲ᯉ ᯒᯐ ᯤ

Dung i disuru raja i ma tolu halak haposan ni rohana manaruhon si Aji Panungkunan tu Lobu Pargarutan.

ᯑᯮᯰ ᯤ ᯑᯪᯘᯮᯒᯮ ᯒᯐ ᯤ ᯔ ᯖᯬᯞᯮ ᯂᯞᯂ᯲ ᯂᯇᯬᯘᯉ᯲ ᯉᯪ ᯒᯬᯂᯉ ᯔᯉᯒᯮᯂᯉᯬ᯲ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯖᯮ ᯞᯬᯅᯮ ᯇᯒ᯲ᯎᯒᯮᯖᯉ᯲

Dung sahat nasida tu huta, tarsonggot ma ina ni si Aji Panungkunan marnida anakna i; songon na mulak sian hamatean nama antong dirajumi inana i na pajumpang i dohot anak hasianna i.

ᯑᯮᯰ ᯘᯂᯖ᯲ ᯉᯘᯪᯑ ᯖᯮ ᯂᯮᯖ ᯖᯒ᯲ᯘᯬᯰᯎᯖᯬ᯲ ᯔ ᯤᯉ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯔᯒ᯲ᯉᯪᯑ ᯀᯉᯂ᯲ᯉ ᯤ ᯘᯬᯝᯉᯬ᯲ ᯉ ᯔᯮᯞᯂ᯲ ᯘᯪᯀᯉ᯲ ᯂᯔᯖᯩᯀᯉ᯲ ᯉᯔ ᯀᯉ᯲ᯖᯬᯰ ᯑᯪᯒᯐᯮᯔᯪ ᯤᯉᯉ ᯤ ᯉ ᯇᯐᯔᯮ᯲ᯇᯰ ᯤ ᯑᯬᯂᯖᯬ᯲ ᯀ ᯂ᯲ ᯂᯘᯪᯀᯉ᯲ᯉ ᯤ

Lelengna i ho da amang, asa mulak. Nunga sanga didok halak, naung mate ho da anak hasian! 

ᯞᯩᯞᯰᯩᯉ ᯤ ᯂᯬ ᯑ ᯀᯔᯰ ᯀᯘ ᯔᯮᯞᯂ᯲ ᯉᯮᯝ ᯘᯝ ᯑᯪᯑᯂᯬ᯲ ᯂᯞᯂ᯲ ᯉᯀᯮᯰ ᯔᯖᯩ ᯂᯬ ᯑ ᯀᯉᯂ᯲ ᯂᯘᯪᯀᯉ᯲

Dung i tarbege ma barita na mangolu do ho; dung i muse naung mago do ho amang di harangan diluahon homang. 

ᯑᯮᯰ ᯤ ᯖᯒ᯲ᯅᯩᯎᯩ ᯔ ᯅᯒᯪᯖ ᯉ ᯔᯝᯬᯞᯮ ᯑᯬ ᯂᯬ ᯑᯮᯰ ᯤ ᯔᯮᯘᯩ ᯉᯀᯮᯰ ᯔᯎᯬ ᯑᯬ ᯂᯬ ᯀᯔᯰ ᯑᯪ ᯂᯒᯝᯉ᯲ ᯑᯪᯞᯮᯀᯂᯉᯬ᯲ ᯂᯬᯔᯰ

Paboa damang ma jolo, ai tung aha do huroha na masa? ninna inana i.

ᯇᯅᯬᯀ ᯑᯔᯰ ᯔ ᯐᯬᯞᯬ ᯀᯤ ᯖᯮᯰ ᯀᯂ ᯑᯬ ᯂᯮᯒᯬᯂ ᯉ ᯔᯘ ᯉᯉᯪ᯲ᯉ ᯤᯉᯉ ᯤ

Dung i dibarltahon si Aji Panungkunan ma tutu sude na masa i, angka na hansit na niahapna, dohot las ni rohana ala malum sahit ni boru ni Raja Sohuturon Dolak.

ᯑᯮᯰ ᯤ ᯑᯪᯅᯒᯪᯖᯂᯉᯬ᯲ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯔ ᯖᯮᯖᯮ ᯘᯮᯑᯩ ᯉ ᯔᯘ ᯤ ᯀᯰᯂ ᯉ ᯂᯉ᯲ᯘᯖᯪ᯲ ᯉ ᯉᯪᯀᯂᯇ᯲ᯉ ᯑᯬᯂᯖᯬ᯲ ᯞᯘ᯲ ᯉᯪ ᯒᯬᯂᯉ ᯀᯞ ᯔᯞᯔᯮ᯲ ᯘᯂᯖᯪ᯲ ᯉᯪ ᯅᯬᯒᯮ ᯉᯪ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲

Songon i do tutu, sintong do i na pinaboana i! ninna donganna na tolu i.

ᯘᯬᯝᯉᯬ᯲ ᯤ ᯑᯬ ᯖᯮᯖᯮ ᯘᯉᯪ᯲ᯖᯬᯰ ᯑᯬ ᯤ ᯉ ᯇᯪᯉᯅᯬᯀᯉ ᯤ ᯉᯉᯪ᯲ᯉ ᯑᯬᯝᯉ᯲ᯉ ᯉ ᯖᯬᯞᯮ ᯤ 

Lompa ma jolo inang indahan i di hami, nunga male angka dongankon! ninna si Aji Panungkunan mandok inana i.

ᯞᯔᯬ᯲ᯇ ᯔ ᯐᯬᯞᯬ ᯤᯉᯰ ᯀᯉᯪ᯲ ᯑᯂᯉ᯲ ᯤ ᯑᯪ ᯂᯔᯪ ᯉᯮᯝ ᯔᯞᯩ ᯀᯰᯂ ᯑᯬᯝᯉ᯲ᯂᯉᯬ᯲ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯔᯉ᯲ᯑᯂᯬ᯲ ᯤᯉᯉ ᯤ

Dung i mangalompa ma inana i di nasida; jala dung masak mangan ma nasida. 

ᯑᯮᯰ ᯤ ᯔᯝᯞᯔᯬ᯲ᯇ ᯔ ᯤᯉᯉ ᯤ ᯑᯪ ᯉᯘᯪᯑ ᯐᯇ ᯑᯮᯰ ᯔᯘᯂ᯲ ᯔᯝᯉ᯲ ᯔ ᯉᯘᯪᯑ

Nunga be potang ari, borngin ma, gabe modom be ma nasida.

ᯉᯮᯝ ᯅᯩ ᯇᯬᯖᯰ ᯀᯒᯪ ᯅᯒᯬ᯲ᯝᯉᯪ᯲ ᯔ ᯎᯅᯩ ᯔᯬᯑᯔᯬ᯲ ᯅᯩ ᯔ ᯉᯘᯪᯑ

Manogotna i dung torang ari mangkata-hatai ma dongan ni si Aji Panungkunan dohot pangisi ni huta i. 

ᯔᯉᯬᯎᯖᯬ᯲ᯉ ᯤ ᯑᯮᯰ ᯖᯬᯒᯰ ᯀᯒᯪ ᯔᯰᯂᯖᯂᯖᯤ ᯔ ᯑᯬᯝᯉ᯲ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯑᯬᯂᯖᯬ᯲ ᯇᯝᯪᯘᯪ ᯉᯪ ᯂᯮᯖ ᯤ

Asa diboto nasida antong manang na bolas do sonang si Aji Panungkunan tinggalhonon nasida maringanan di huta i. 

ᯀᯘ ᯑᯪᯅᯬᯖᯬ ᯉᯘᯪᯑ ᯀᯉ᯲ᯖᯰᯬ ᯔᯉᯰ ᯉ ᯅᯬᯞᯘ᯲ ᯑᯬ ᯘᯬᯉᯰ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯖᯰᯪᯎᯞ᯲ᯂᯬᯉᯉᯬ᯲ ᯉᯘᯪᯑ ᯔᯒᯪᯝᯉᯉ᯲ ᯑᯪ ᯂᯮᯖ ᯤ

Ai songon i do ditonahon Raja Sohuturon Dolak. 

ᯀᯤ ᯘᯬᯝᯉᯬ᯲ ᯤ ᯑᯬ ᯑᯪᯖᯬᯉᯂᯉᯬ᯲ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲

Ndang adong tutu pangisi ni huta i mandok na roa taringot tu si Aji Panungkunan. 

ᯀᯉᯪ᯲ᯑᯰ ᯀᯑᯬᯰ ᯖᯮᯖᯮ ᯇᯝᯪᯘᯪ ᯉᯪ ᯂᯮᯖ ᯤ ᯔᯉ᯲ᯑᯂᯬ᯲ ᯉ ᯒᯬᯀ ᯖᯒᯪᯝᯖᯬ᯲ ᯖᯮ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Dung i mabiar do nasida mida Raja Sohuturon Dolak, ala na sangap do raja i, Jala na mora. 

ᯑᯮᯰ ᯤ ᯔᯅᯪᯀᯒ᯲ ᯑᯬ ᯉᯘᯪᯑ ᯔᯪᯑ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯀᯞ ᯉ ᯘᯝᯇ᯲ ᯑᯬ ᯒᯐ ᯤ ᯐᯞ ᯉ ᯔᯬᯒ

Tole ulubalangna dohot pangisi ni hutana angka na so matahµt di bohi do.

ᯖᯬᯞᯩ ᯥᯞᯮᯅᯞᯰᯉ ᯑᯬᯂᯖᯬ᯲ ᯇᯝᯪᯘᯪ ᯉᯪ ᯂᯮᯖᯉ ᯀᯰᯂ ᯉ ᯘᯬ ᯔᯖᯂᯖᯮ᯲ ᯑᯪ ᯅᯬᯂᯪ ᯑᯬ

Dung sun mangan manogotna i, didok angka dongan ni si Aji Panungkunan ma, Nunga be hudongani hami angka pangisi ni huta on mangkatai, ale Aji Panungkunan dang adong na mangkata ho, manang na marsogo ni roha mida ho. 

ᯑᯮᯰ ᯘᯉᯮ᯲ ᯔᯝᯉ᯲ ᯔᯉᯬᯎᯖᯬ᯲ᯉ ᯤ ᯑᯪᯑᯂᯬ᯲ ᯀᯰᯂ ᯑᯬᯝᯉ᯲ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯔ ᯉᯮᯝ ᯅᯩ ᯂᯮᯑᯬᯝᯉᯪ ᯂᯔᯪ ᯀᯰᯂ ᯇᯝᯪᯘᯪ ᯉᯪ ᯂᯮᯖ ᯀᯉᯬ᯲ ᯔᯰᯂᯖᯤ ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲ ᯑᯰ ᯀᯑᯰᯬ ᯉ ᯔᯒ᯲ᯘᯬᯎᯬ ᯉᯪ ᯒᯬᯂ ᯔᯪᯑ ᯂᯬ

Anggo ninna rohanami, nunga bolas ho sonang maringanan di hutamon. 

ᯀᯰᯎᯬ ᯉᯉᯪ᯲ᯉ ᯒᯬᯂᯉᯔᯪ ᯉᯮᯝ ᯅᯬᯞᯘ᯲ ᯂᯬ ᯘᯬᯉᯰ ᯔᯒᯪᯝᯉᯉ᯲ ᯑᯪ ᯂᯮᯖᯔᯉᯬ᯲

Ba laho ma hami mulak tu hutanami!

ᯅ ᯞᯂᯬ ᯔ ᯂᯔᯪ ᯔᯮᯞᯂ᯲ ᯖᯮ ᯂᯮᯖᯉᯔᯪ

Dang adong dibege hamu , manang na adong martahi-tahi na so uhum tu ahu? ninna si Aji Panungkunan manungkun.

ᯑᯰᯀᯑᯰᯬ ᯑᯪᯅᯩᯎᯩ ᯂᯔᯮ ᯔᯉᯰ ᯉ ᯀᯑᯰᯬ ᯔᯒ᯲ᯖᯂᯪᯖᯂᯪ ᯉ ᯘᯬ ᯥᯂᯔᯮ᯲ ᯖᯮ ᯀᯂᯮ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯔᯉᯮᯰᯂᯉᯮ᯲

Dang adong ba! Dung i molo tung adong diida ho muse na martahi na songon i, manang na adong muse na hurang didok roham, ba ro ma ho tu Lobu Namaduma . 

ᯑᯰ ᯀᯑᯰᯬ ᯅ ᯑᯮᯰ ᯤ ᯔᯬᯞᯬ ᯖᯮᯰ ᯀᯑᯰᯬ ᯑᯪᯤᯑ ᯂᯬ ᯔᯮᯘᯩ ᯉ ᯔᯒ᯲ᯖᯂᯪ ᯉ ᯘᯬᯝᯉᯬ᯲ ᯤ ᯔᯉᯰ ᯉ ᯀᯑᯰᯬ ᯔᯮᯘᯩ ᯉ ᯂᯮᯒᯰ ᯑᯪᯑᯂᯬ᯲ ᯒᯬᯂᯔ᯲ ᯅ ᯒᯬ ᯔ ᯂᯬ ᯖᯮ ᯞᯬᯅᯮ ᯉᯔᯑᯮᯔ

Dang paloason ni Raja Sohuturon Dolok ho leaan ni halak. 

ᯑᯰ ᯇᯞᯬᯀᯘᯉᯬ᯲ ᯉᯪ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯂᯬ ᯞᯩᯀᯀᯉ᯲ ᯉᯪ ᯂᯞᯂ᯲

Songon i do tona ni Raja Sohuturon Dolok sipasahatonnami tu ho! ninna donganna i.

ᯘᯬᯝᯉᯬ᯲ ᯤ ᯑᯬ ᯖᯬᯉ ᯉᯪ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯘᯪᯇᯘᯂᯖᯉᯬ᯲ᯉᯔᯪ ᯖᯮ ᯂᯬ ᯉᯉᯪ᯲ᯉ ᯑᯬᯝᯉ᯲ᯉ ᯤ

Dung i borhat ma dongan ni si Aji Panungkunan i mulak tu hutana.

ᯑᯮᯰ ᯤ ᯅᯒᯬ᯲ᯂᯖ᯲ ᯔ ᯑᯬᯝᯉ᯲ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯤ ᯔᯮᯞᯂ᯲ ᯖᯮ ᯂᯮᯖᯉ