Pangungkapon Bindu 11 ᯇᯝᯮᯰᯄ᯦ᯇᯬᯉ᯲ ᯅᯪᯉ᯲ᯑᯮ ᯘᯔ᯲ᯇᯮᯞᯮ ᯘᯑ
Disuhat do bagas joro. Tarbunu do dua sitindangi, gabe mulak mangolu 1-14. ᯑᯪᯘᯮᯂᯖ᯲ ᯑᯬ ᯅᯎᯘ᯲ ᯐᯬᯒᯬ. ᯖᯒ᯲ᯅᯮᯉᯮ ᯑᯬ ᯑᯮᯀ ᯘᯪᯖᯪᯉ᯲ᯑᯝᯪ, ᯎᯅᯩ ᯔᯮᯞᯄ᯦᯲ ᯔᯝᯬᯞᯮ ᯘᯑ - ᯘᯔ᯲ᯇᯮᯞᯮ ᯀᯬᯇᯖ᯲
I. 1 Dung i dilehon ma tu ahu arung sada songon tungkot, huhut ma didok: Hehe ma ho, suhati ma joro ni Debata ro di langgatan i, nang angka na marsomba disi. ᯑᯮᯰ ᯤ ᯑᯪᯞᯩᯂᯬᯉ᯲ ᯔ ᯖᯮ ᯀᯂᯮ ᯀᯒᯮᯰ ᯘᯑ ᯘᯬᯝᯬᯉ᯲ ᯖᯮᯰᯄ᯦ᯬᯖ᯲, ᯂᯮᯂᯮᯖ᯲ ᯔ ᯑᯪᯑᯬᯄ᯦᯲ : ᯂᯩᯂᯩ ᯔ ᯂᯬ, ᯘᯮᯂᯖᯪ ᯔ ᯐᯬᯒᯬ ᯉᯪ ᯑᯩᯅᯖ ᯒᯬ ᯑᯪ ᯞᯰᯎᯖᯉ᯲ ᯤ, ᯉᯰ ᯀᯰᯄ᯦ ᯉ ᯔᯒ᯲ᯘᯬᯔ᯲ᯅ ᯑᯪᯘᯪ
2 Laosi ma ia alaman parduru ni joro i, unang suhati anggo i; ai nunga dipasahat i tu angka parbegu: Padegedegeonnasida do huta na badia i, leleng ni opatpulu dua bulan. ᯞᯀᯬᯘᯪ ᯔ ᯤᯀ ᯀᯞᯔᯉ᯲ ᯇᯒ᯲ᯑᯮᯒᯮ ᯉᯪ ᯐᯬᯒᯬ ᯤ, ᯥᯉᯰ ᯘᯮᯂᯖᯪ ᯀᯰᯎᯬ ᯤ, ᯀᯤ ᯉᯮᯝ ᯑᯪᯇᯘᯂᯖ᯲ ᯤ, ᯖᯮ ᯀᯰᯄ᯦ ᯇᯒ᯲ᯅᯩᯎᯮ : ᯇᯑᯩᯎᯩᯑᯩᯎᯩᯀᯬᯉ᯲ᯉᯘᯪᯑ ᯑᯬ ᯂᯮᯖ ᯉ ᯅᯑᯪᯀ ᯤ, ᯞᯩᯞᯩᯰ ᯉᯪ ᯀᯬᯇᯖ᯲ᯇᯮᯞᯮ ᯑᯮᯀ ᯅᯮᯞᯉ᯲
3 Dung i lehononku ma tu na dua sitindangingku, asa manurirangi nasida, maruloshon hori, leleng ni saribu duaratus onompulu ari. ᯑᯮᯰ ᯤ ᯞᯩᯂᯬᯉᯬᯉ᯲ᯄ᯦ᯮ ᯔ ᯖᯮ ᯉ ᯑᯮᯀ ᯘᯪᯖᯪᯉ᯲ᯑᯝᯪᯰᯄ᯦ᯮ, ᯀᯘ ᯔᯉᯮᯒᯪᯒᯝᯪ ᯉᯘᯪᯑ, ᯔᯒᯮᯞᯬᯘ᯲ᯂᯬᯉ᯲ ᯂᯬᯒᯪ, ᯞᯩᯞᯩᯰ ᯉᯪ ᯘᯒᯪᯅᯮ ᯑᯮᯀᯒᯖᯮᯘ᯲ ᯀᯬᯉᯬᯔ᯲ᯇᯮᯞᯮ ᯀᯒᯪ
4 Nasida ma na dua hau jetun jala na dua parpalitoan, angka na jongjong di adopan ni Tuhan ni tano i. ᯉᯘᯪᯑ ᯔ ᯉ ᯑᯮᯀ ᯂᯥ ᯐᯩᯖᯮᯉ᯲ ᯐᯞ ᯉ ᯑᯮᯀ ᯇᯒ᯲ᯇᯞᯪᯖᯬᯀᯉ᯲, ᯀᯰᯄ᯦ ᯉ ᯐᯬᯰᯐᯬᯰ ᯑᯪ ᯀᯑᯬᯇᯉ᯲ ᯉᯪ ᯖᯮᯂᯉ᯲ ᯉᯪ ᯖᯉᯬ ᯤ
5 Ia adong na naeng manjahati nasida, rungkar ma api sian pamangannasida, mangallang musunasida; ia adong na naeng manjahati nasida, ingkon songon i do ibana mate. ᯤᯀ ᯀᯑᯬᯰ ᯉ ᯉᯀᯩᯰ ᯔᯉ᯲ᯐᯂᯖᯪ ᯉᯘᯪᯑ, ᯒᯮᯰᯄ᯦ᯒ᯲ ᯔ ᯀᯇᯪ ᯘᯪᯀᯉ᯲ ᯇᯔᯝᯉ᯲ᯉᯘᯪᯑ, ᯔᯝᯞ᯲ᯞᯰ ᯔᯮᯘᯮᯉᯘᯪᯑ, ᯤᯀ ᯀᯑᯬᯰ ᯉ ᯉᯀᯩᯰ ᯔᯉ᯲ᯐᯂᯖᯪ ᯉᯘᯪᯑ, ᯀᯪᯰᯄ᯦ᯬᯉ᯲ ᯘᯬᯝᯬᯉ᯲ ᯤ ᯑᯬ ᯤᯅᯉ ᯔᯖᯩ
6 Na marhuaso do nasida mangkinsu langit, asa unang ro udan di angka ari panurirangonnasida; jadi na marhuaso do nasida, paimbarhon angka aek gabe mudar, jala mangkonahon nasa haporsuhon tu tano i, manang beha pe jotjotna di rohanasida. ᯉ ᯔᯒ᯲ᯂᯮᯀᯘᯬ ᯑᯬ ᯉᯘᯪᯑ ᯔᯰᯄ᯦ᯪᯉ᯲ᯘᯮ ᯞᯝᯪᯖ᯲, ᯀᯘ ᯥᯉᯰ ᯒᯬ ᯥᯑᯉ᯲ ᯑᯪ ᯀᯰᯄ᯦ ᯀᯒᯪ ᯇᯉᯮᯒᯪᯒᯝᯬᯉ᯲ᯉᯘᯪᯑ, ᯐᯑᯪ ᯉ ᯔᯒ᯲ᯂᯮᯀᯘᯬ ᯑᯬ ᯉᯘᯪᯑ, ᯇᯀᯪᯔ᯲ᯅᯒ᯲ᯂᯬᯉ᯲ ᯀᯰᯄ᯦ ᯀᯀᯩᯄ᯦᯲ ᯎᯅᯩ ᯔᯮᯑᯒ᯲, ᯐᯞ ᯔᯰᯄ᯦ᯬᯉᯂᯬᯉ᯲ ᯉᯘ ᯂᯇᯬᯒ᯲ᯘᯮᯂᯬᯉ᯲ ᯖᯮ ᯖᯉᯬ ᯤ, ᯔᯉᯰ ᯅᯩᯂ ᯇᯩ ᯇᯬᯉ᯲ᯐᯬᯖ᯲ᯉ ᯑᯪ ᯒᯬᯂᯉᯘᯪᯑ
7 Anggo dung dipatulus nasida panindangionnasida, nangkok ma binatang i sian banua toru marmusu dompak nasida; taluhononna ma nasida jala pusaonna. ᯀᯰᯎᯬ ᯑᯮᯰ ᯑᯪᯇᯖᯮᯞᯮᯘ᯲ ᯉᯘᯪᯑ ᯇᯉᯪᯉ᯲ᯑᯝᯪᯀᯬᯉ᯲ᯉᯘᯪᯑ, ᯉᯰᯄ᯦ᯬᯄ᯦᯲ ᯔ ᯅᯪᯉᯖᯰ ᯤ ᯘᯪᯀᯉ᯲ ᯅᯉᯮᯀ ᯖᯬᯒᯮ ᯔᯒ᯲ᯔᯮᯘᯮ ᯑᯬᯔ᯲ᯇᯄ᯦᯲ ᯉᯘᯪᯑ, ᯖᯞᯮᯂᯬᯉᯬᯉ᯲ᯉ ᯔ ᯉᯘᯪᯑ ᯐᯞ ᯇᯮᯘᯀᯬᯉ᯲ᯉ
8 Peak ma bangkenasida di alaman ni huta na balga i; ia goarna partondion Sodom dohot Misir, ai disi do naung tarpajal nang Tuhannasida i. ᯇᯩᯀᯄ᯦᯲ ᯔ ᯅᯰᯄ᯦ᯩᯉᯘᯪᯑ ᯑᯪ ᯀᯞᯔᯉ᯲ ᯉᯪ ᯂᯮᯖ ᯉ ᯅᯞ᯲ᯎ ᯤ: ᯤᯀ ᯎᯬᯀᯒ᯲ᯉ ᯇᯒ᯲ᯖᯬᯉ᯲ᯑᯪᯀᯬᯉ᯲ ᯘᯬᯑᯬᯔ᯲ ᯑᯬᯂᯬᯖ᯲ ᯔᯪᯘᯪᯒ᯲, ᯀᯤ ᯑᯪᯘᯪ ᯑᯬ ᯉᯀᯮᯰ ᯖᯒ᯲ᯇᯐᯞ᯲ ᯉᯰ ᯖᯮᯂᯉ᯲ᯉᯘᯪᯑ ᯤ
9 Dung i paberengberengon ni halak sian angka bangso dohot marga dohot hata dohot houm ma bangkenasida tonga opat ari lelengna: Ndang diloas tartanom bangkenasida. ᯑᯮᯰ ᯤ ᯇᯅᯩᯒᯩᯰᯅᯩᯒᯩᯝᯬᯉ᯲ ᯉᯪ ᯂᯞᯄ᯦᯲ ᯘᯪᯀᯉ᯲ ᯀᯰᯄ᯦ ᯅᯰᯘᯬ ᯑᯬᯂᯬᯖ᯲ ᯔᯒ᯲ᯎ ᯑᯬᯂᯬᯖ᯲ ᯂᯖ ᯑᯬᯂᯬᯖ᯲ ᯂᯬᯀᯮᯔ᯲ ᯔ ᯅᯰᯄ᯦ᯩᯉᯘᯪᯑ ᯖᯬᯝ ᯀᯬᯇᯖ᯲ ᯀᯒᯪ ᯞᯩᯞᯩᯰᯉ, ᯉ᯲ᯑᯰ ᯑᯪᯞᯬᯀᯘ᯲ ᯖᯒ᯲ᯖᯉᯬᯔ᯲ ᯅᯰᯄ᯦ᯩᯉᯘᯪᯑ
10 Marlas ni roha ma angka pangisi ni tano i mida nasida jala mariaia, pola masitongosan silua sama nasida, ala naung dipaporsukporsuk panurirang na dua i angka pangisi ni tano i. ᯔᯒ᯲ᯞᯘ᯲ ᯉᯪ ᯒᯬᯂ ᯔ ᯀᯰᯄ᯦ ᯇᯝᯪᯘᯪ ᯉᯪ ᯖᯉᯬ ᯤ ᯔᯪᯑ ᯉᯘᯪᯑ ᯐᯞ ᯔᯒᯪᯀᯤᯀ, ᯇᯬᯞ ᯔᯘᯪᯖᯬᯝᯬᯘᯉ᯲ ᯘᯪᯞᯮᯀ ᯘᯔ ᯉᯘᯪᯑ, ᯀᯞ ᯉᯀᯮᯰ ᯑᯪᯇᯇᯬᯒ᯲ᯘᯮᯄ᯦᯲ᯇᯬᯒ᯲ᯘᯮᯄ᯦᯲ ᯇᯉᯮᯒᯪᯒᯰ ᯉ ᯑᯮᯀ ᯤ ᯀᯰᯄ᯦ ᯇᯝᯪᯘᯪ ᯉᯪ ᯖᯉᯬ ᯤ
11 Jadi dung salpu tonga opat ari, songgop ma tu nasida tondi hangoluan na sian Debata, gabe diojakkon ma patnasida, jadi lalu ma hatahuton godang tu angka na marnida nasida. ᯐᯑᯪ ᯑᯮᯰ ᯘᯞ᯲ᯇᯮ ᯖᯬᯝ ᯀᯬᯇᯖ᯲ ᯀᯒᯪ, ᯘᯬᯰᯎᯬᯇ᯲ ᯔ ᯖᯮ ᯉᯘᯪᯑ ᯖᯬᯉ᯲ᯑᯪ ᯂᯝᯬᯞᯮᯀᯉ᯲ ᯉ ᯘᯪᯀᯉ᯲ ᯑᯩᯅᯖ, ᯎᯅᯩ ᯑᯪᯀᯬᯐᯄ᯦᯲ᯄ᯦ᯬᯉ᯲ ᯔ ᯇᯖ᯲ᯉᯘᯪᯑ, ᯐᯑᯪ ᯞᯞᯮ ᯔ ᯂᯖᯂᯮᯖᯬᯉ᯲ ᯎᯬᯑᯰ ᯖᯮ ᯀᯰᯄ᯦ ᯉ ᯔᯒ᯲ᯉᯪᯑ ᯉᯘᯪᯑ
12 Jala dibege nasida ma soara na gogo sian banua ginjang, na mandok tu nasida: Manaek ma hamu tuson! Dung i manaek ma nasida di bagasan ombun tu banua ginjang, dipanotnoti angka musunasida. ᯐᯞ ᯑᯪᯅᯩᯎᯩ ᯉᯘᯪᯑ ᯔ ᯘᯬᯀᯒ ᯉ ᯎᯬᯎᯬ ᯘᯪᯀᯉ᯲ ᯅᯉᯮᯀ ᯎᯪᯉ᯲ᯐᯰ, ᯉ ᯔᯉ᯲ᯑᯬᯄ᯦᯲ ᯖᯮ ᯉᯘᯪᯑ : ᯔᯉᯀᯩᯄ᯦᯲ ᯔ ᯂᯔᯮ ᯖᯮᯘᯬᯉ᯲ ! ᯑᯮᯰ ᯤ ᯔᯉᯀᯩᯄ᯦᯲ ᯔ ᯉᯘᯪᯑ ᯑᯪ ᯅᯎᯘᯉ᯲ ᯀᯬᯔ᯲ᯅᯮᯉ᯲ ᯖᯮ ᯅᯉᯮᯀ ᯎᯪᯉ᯲ᯐᯰ, ᯑᯪᯇᯉᯬᯖ᯲ᯉᯬᯖᯪ ᯀᯰᯄ᯦ ᯔᯮᯘᯮᯉᯘᯪᯑ
13 Jadi di na sangombas i masa ma lalo bolon, marumpak ma saparsampulu ni huta i, mate ma di lalo i pitu ribu jolma, gabe mabiar ma angka na tading i, dipasangap ma Debata na di banua ginjang i. ᯐᯑᯪ ᯑᯪ ᯉ ᯘᯝᯬᯔ᯲ᯅᯘ᯲ ᯤ ᯔᯘ ᯔ ᯞᯞᯬ ᯅᯬᯞᯬᯉ᯲, ᯔᯒᯮᯔ᯲ᯇᯄ᯦᯲ ᯔ ᯘᯇᯒ᯲ᯘᯔ᯲ᯇᯮᯞᯮ ᯉᯪ ᯂᯮᯖ ᯤ, ᯔᯖᯩ ᯔ ᯑᯪ ᯞᯞᯬ ᯤ ᯇᯪᯖᯮ ᯒᯪᯅᯮ ᯐᯬᯞ᯲ᯔ, ᯎᯅᯩ ᯔᯅᯪᯀᯒ᯲ ᯔ ᯀᯰᯄ᯦ ᯉ ᯖᯑᯪᯰ ᯤ, ᯑᯪᯇᯘᯝᯇ᯲ ᯔ ᯑᯩᯅᯖ ᯉ ᯑᯪ ᯅᯉᯮᯀ ᯎᯪᯉ᯲ᯐᯰ ᯤ
14 Nunga salpu jea na paduahon; tibu ma ro jea na patoluhon! ᯉᯮᯝ ᯘᯞ᯲ᯇᯮ ᯐᯩᯀ ᯉ ᯇᯑᯮᯀᯂᯬᯉ᯲, ᯖᯪᯅᯮ ᯔ ᯒᯬ ᯐᯩᯀ ᯉ ᯇᯖᯬᯞᯮᯂᯬᯉ᯲
Sarune na papituhon 15-19. ᯘᯒᯮᯉᯩ ᯉ ᯇᯇᯪᯖᯮᯂᯬᯉ᯲ ᯘᯔ᯲ᯇᯮᯞᯮ ᯞᯪᯔ - ᯘᯔ᯲ᯇᯮᯞᯮ ᯘᯪᯀ
II. 15 Dung i dipalu surusuruan na papituhon ma sarunena; jadi masa ma soara na gogo di banua ginjang, angka dipandok: Nunga sahat tu Tuhanta i dohot tu Kristusna i harajaon ni hasiangan on; bangkit Raja ma Ibana ro di salelenglelengna! ᯑᯮᯰ ᯤ ᯑᯪᯇᯞᯮ ᯘᯮᯒᯮᯘᯮᯒᯮᯀᯉ᯲ ᯉ ᯇᯇᯪᯖᯮᯂᯬᯉ᯲ ᯔ ᯘᯒᯮᯉᯩᯉ ; ᯐᯑᯪ ᯔᯘ ᯔ ᯘᯬᯀᯒ ᯉ ᯎᯬᯎᯬ ᯑᯪ ᯅᯉᯮᯀ ᯎᯪᯉ᯲ᯐᯰ, ᯀᯰᯄ᯦ ᯑᯪᯇᯉ᯲ᯑᯬᯄ᯦᯲ : ᯉᯮᯝ ᯘᯂᯖ᯲ ᯖᯮ ᯖᯮᯂᯉ᯲ᯖ ᯤ ᯑᯬᯂᯬᯖ᯲ ᯖᯮ ᯄ᯦᯲ᯒᯪᯘ᯲ᯖᯮᯘ᯲ᯉ ᯤ ᯂᯒᯐᯀᯬᯉ᯲ ᯉᯪ ᯂᯘᯪᯀᯝᯉ᯲ ᯀᯬᯉ᯲, ᯅᯰᯄ᯦ᯪᯖ᯲ ᯔ ᯤᯅᯉ ᯒᯬ ᯑᯪ ᯘᯞᯩᯞᯩᯰᯞᯩᯞᯩᯰᯉ
16 Ia sintua na duapulu opat na di adopan ni Debata, angka na masihunduli habangsana be, dipatungkap ma bohinasida huhut disomba ma Debata. ᯤᯀ ᯘᯪᯉ᯲ᯖᯮᯀ ᯉ ᯑᯮᯀᯇᯮᯞᯮ ᯀᯬᯇᯖ᯲ ᯉ ᯑᯪ ᯀᯑᯬᯇᯉ᯲ᯉᯪ ᯑᯩᯅᯖ, ᯀᯰᯄ᯦ ᯉ ᯔᯘᯪᯂᯮᯉ᯲ᯑᯮᯞᯪ ᯂᯅᯰᯘᯉ ᯅᯩ, ᯑᯪᯇᯖᯮᯰᯄ᯦ᯇ᯲ ᯔ ᯅᯬᯂᯪᯉᯘᯪᯑ ᯂᯮᯂᯮᯖ᯲ ᯑᯪᯘᯬᯔ᯲ᯅ ᯔ ᯑᯩᯅᯖ
17 Ninna nasida ma: Na mandok mauliate do hami tu Ho, ale Tuhan Debata, Sigomgom saluhutna, na mangolu nuaeng nang najolo, ala naung dialithon Ho hagogoonmu na balga i, jala ala naung bangkit Raja Ho! ᯉᯪᯉ᯲ᯉ ᯉᯘᯪᯑ ᯔ : ᯉ ᯔᯉ᯲ᯑᯬᯄ᯦᯲ ᯔᯥᯞᯪᯀᯖᯩ ᯑᯬ ᯂᯔᯪ ᯖᯮ ᯂᯬ, ᯀᯞᯩ ᯖᯮᯂᯉ᯲ ᯑᯩᯅᯖ, ᯘᯪᯎᯬᯔ᯲ᯎᯬᯔ᯲ ᯘᯞᯮᯂᯮᯖ᯲ᯉ, ᯉ ᯔᯝᯬᯞᯮ ᯉᯮᯀᯀᯩᯰ ᯉᯰ ᯉᯐᯬᯞᯬ, ᯀᯞ ᯉᯀᯮᯰ ᯑᯪᯀᯞᯪᯖ᯲ᯂᯬᯉ᯲ ᯂᯬ ᯂᯎᯬᯎᯬᯀᯬᯉ᯲ᯔᯮ ᯉ ᯅᯞ᯲ᯎ ᯤ ᯐᯞ ᯀᯞ ᯉᯀᯮᯰ ᯅᯰᯄ᯦ᯪᯖ᯲ ᯒᯐ ᯂᯬ
18 Nunga tarrimas angka bangso, gabe ro ma rimasmu, dapot ma tingki ni angka naung mate asa niuhuman, huhut mangalehon upa tu angka naposom, i ma angka panurirang i dohot angka na badia, angka na mangkabiari Goarmu, angka na metmet ro di angka na balga, huhut mangago angka na mangago tano i. ᯉᯮᯝ ᯖᯒ᯲ᯒᯪᯔᯘ᯲ ᯀᯰᯄ᯦ ᯅᯰᯘᯬ, ᯎᯅᯩ ᯒᯬ ᯔ ᯒᯪᯔᯘ᯲ᯔᯮ, ᯑᯇᯬᯖ᯲ ᯔ ᯖᯪᯰᯄ᯦ᯪ ᯉᯪ ᯀᯰᯄ᯦ ᯉᯀᯮᯰ ᯔᯖᯩ ᯀᯘ ᯉᯪᯥᯂᯮᯔᯉ᯲, ᯂᯮᯂᯮᯖ᯲ ᯔᯝᯞᯩᯂᯬᯉ᯲ ᯥᯇ ᯖᯮ ᯀᯰᯄ᯦ ᯉᯇᯬᯘᯬᯔ᯲, ᯤ ᯔ ᯀᯰᯄ᯦ ᯇᯉᯮᯒᯪᯒᯰ ᯤ ᯑᯬᯂᯬᯖ᯲ ᯀᯰᯄ᯦ ᯉ ᯅᯑᯪᯀ, ᯀᯰᯄ᯦ ᯉ ᯔᯰᯄ᯦ᯅᯪᯀᯒᯪ ᯎᯬᯀᯒ᯲ᯔᯮ, ᯀᯰᯄ᯦ ᯉ ᯔᯩᯖ᯲ᯔᯩᯖ᯲ ᯒᯬ ᯑᯪ ᯀᯰᯄ᯦ ᯉ ᯅᯞ᯲ᯎ ᯂᯮᯂᯮᯖ᯲ ᯔᯝᯎᯬ ᯀᯰᯄ᯦ ᯉ ᯔᯝᯎᯬ ᯖᯉᯬ ᯤ
19 Dung i tarungkap ma joro ni Debata na di banua ginjang i, gabe tarida ma poti parpadananna di jorona i, jadi masa ma angka hilap dohot soara, ronggur dohot lalo, nang ambolas na balga. ᯑᯮᯰ ᯤ ᯖᯒᯮᯰᯄ᯦ᯇ᯲ ᯔ ᯐᯬᯒᯬ ᯉᯪ ᯑᯩᯅᯖ ᯉ ᯑᯪ ᯅᯉᯮᯀ ᯎᯪᯉ᯲ᯐᯰ ᯤ, ᯎᯅᯩ ᯖᯒᯪᯑ ᯔ ᯇᯬᯖᯪ ᯇᯒ᯲ᯇᯑᯉᯉ᯲ᯉ ᯑᯪ ᯐᯬᯒᯬᯉ ᯤ, ᯐᯑᯪ ᯔᯘ ᯔ ᯀᯰᯄ᯦ ᯂᯪᯞᯇ᯲ ᯑᯬᯂᯬᯖ᯲ ᯘᯬᯀᯒ, ᯒᯬᯰᯎᯮᯒ᯲ ᯑᯬᯂᯬᯖ᯲ ᯞᯞᯬ, ᯉᯰ ᯀᯔ᯲ᯅᯬᯞᯘ᯲ ᯉ ᯅᯞ᯲ᯎ