Pangungkapon Bindu 12 ᯇᯝᯮᯰᯄ᯦ᯇᯬᯉ᯲ ᯅᯪᯉ᯲ᯑᯮ ᯘᯔ᯲ᯇᯮᯞᯮ ᯑᯮᯀ
Sada boruboru na naeng mangintubu 1-6. ᯘᯑ ᯅᯬᯒᯮᯅᯬᯒᯮ ᯉ ᯉᯀᯩᯰ ᯔᯝᯪᯉ᯲ᯖᯮᯅᯮ ᯘᯑ - ᯀᯬᯉᯬᯔ᯲
I. 1 Dung i tarida ma partinandaan na balga di langit: I ma sada boruboru, na maruloshon mata ni ari, bulan i do ditoru ni patna, sampuludua bintang do tumpal ni uluna. ᯑᯮᯰ ᯤ ᯖᯒᯪᯑ ᯔ ᯇᯒ᯲ᯖᯪᯉᯉ᯲ᯑᯀᯉ᯲ ᯉ ᯅᯞ᯲ᯎ ᯑᯪ ᯞᯝᯪᯖ᯲ ; ᯤ ᯔ ᯘᯑ ᯅᯬᯒᯮᯅᯬᯒᯮ, ᯉ ᯔᯒᯮᯞᯬᯘ᯲ᯂᯬᯉ᯲ ᯔᯖ ᯉᯪ ᯀᯒᯪ, ᯅᯮᯞᯉ᯲ ᯤ ᯑᯬ ᯑᯪ ᯖᯬᯒᯮ ᯉᯪ ᯇᯖ᯲ ᯉ, ᯘᯔ᯲ᯇᯮᯞᯮᯑᯮᯀ ᯅᯪᯉ᯲ᯖᯰ ᯑᯬ ᯖᯮᯔ᯲ᯇᯞ᯲ ᯉᯪ ᯥᯞᯮᯉ
2 Na gabegabean do ibana, jala mangangguhi, ai pambebeonna do tongon jala mangae laho mangintubu. ᯉ ᯎᯅᯩᯎᯉᯩᯀᯉ᯲ ᯑᯬ ᯤᯅᯉ, ᯐᯞ ᯔᯝᯰᯎᯮᯂᯪ ᯀᯤ ᯇᯔ᯲ᯅᯩᯅᯩᯀᯬᯉ᯲ᯉ ᯑᯬ ᯖᯬᯝᯬᯉ᯲ ᯐᯞ ᯔᯝᯀᯩ ᯞᯂᯬ ᯔᯝᯪᯉ᯲ᯖᯮᯅᯮ
3 Dung i tarida ma partinandaan na asing di langit, i ma sada naga na bolon songon api; pitu do uluna, sampulu tandukna, pitu tumpal harajaon di angka uluna i. ᯑᯮᯰ ᯤ ᯖᯒᯪᯑ ᯔ ᯇᯒ᯲ᯖᯪᯉᯉ᯲ᯑᯀᯉ᯲ ᯉ ᯀᯘᯪᯰ ᯑᯪ ᯞᯝᯪᯖ᯲, ᯤ ᯔ ᯘᯑ ᯉᯎ ᯉ ᯅᯬᯞᯬᯉ᯲ ᯘᯬᯝᯬᯉ᯲ ᯀᯇᯪ, ᯇᯪᯖᯮ ᯑᯬ ᯥᯞᯮᯉ, ᯘᯔ᯲ᯇᯮᯞᯮ ᯖᯉ᯲ᯑᯮᯄ᯦᯲ᯉ, ᯇᯪᯖᯮ ᯖᯮᯔ᯲ᯇᯞ᯲ ᯂᯒᯐᯀᯬᯉ᯲ ᯑᯪ ᯀᯰᯄ᯦ ᯥᯞᯮᯉ ᯤ
4 Jadi disarat ihurna i sapartolu ni angka bintang na di langit i, gabe didabu tu tano i. Jadi jongjong ma naga i di jolo ni boruboru, na naeng mangintubu, asa bondutonna posoposona, dung tubu. ᯐᯑᯪ ᯑᯪᯘᯒᯖ᯲ ᯤᯂᯮᯒ᯲ᯉ ᯤ ᯘᯇᯒ᯲ᯖᯬᯞᯮ ᯉᯪ ᯀᯰᯄ᯦ ᯅᯪᯉ᯲ᯖᯰ ᯉ ᯑᯪ ᯞᯝᯪᯖ᯲ ᯤ, ᯎᯅᯩ ᯑᯪᯑᯅᯮ ᯖᯮ ᯖᯉᯬ ᯤ. ᯐᯑᯪ ᯐᯬᯰᯐᯬᯰ ᯔ ᯉᯎ ᯤ ᯑᯪ ᯐᯬᯞᯬ ᯉᯪ ᯅᯬᯒᯮᯅᯬᯒᯮ, ᯉ ᯉᯀᯩᯰ ᯔᯝᯪᯉ᯲ᯖᯮᯅᯮ, ᯀᯘ ᯅᯬᯉ᯲ᯑᯮᯖᯬᯉ᯲ᯉ ᯇᯬᯘᯬᯇᯬᯘᯬᯉ, ᯑᯮᯰ ᯖᯮᯅᯮ
5 Dung i ditubuhon ma posoposo baoa, na naeng marmahanhon sogot nasa bangso marhitehite tungkot bosi. Jadi tarhinsat ma anakna i tu adopan ni Debata dohot tu habangsana. ᯑᯮᯰ ᯤ ᯑᯪᯖᯮᯅᯮᯂᯬᯉ᯲ ᯔ ᯇᯬᯘᯬᯇᯬᯘᯬ ᯅᯀᯬᯀ, ᯉ ᯉᯀᯩᯰ ᯔᯒ᯲ᯔᯂᯉ᯲ᯂᯬᯉ᯲ ᯘᯬᯎᯬᯖ᯲ ᯉᯘ ᯅᯰᯘᯬ ᯔᯒ᯲ᯂᯪᯖᯩᯂᯪᯖᯩ ᯖᯮᯰᯄ᯦ᯬᯖ᯲ ᯅᯬᯘᯪ. ᯐᯑᯪ ᯖᯒ᯲ᯂᯪᯉ᯲ᯘᯖ᯲ ᯔ ᯀᯉᯄ᯦᯲ᯉ ᯤ ᯖᯮ ᯀᯑᯬᯇᯉ᯲ ᯉᯪ ᯑᯩᯅᯖ ᯑᯬᯂᯬᯖ᯲ ᯖᯮ ᯂᯅᯰᯘᯉ
6 Na maporus do boruboru i tu halongonan, tu ingananna na pinarade ni Debata, asa disi dipatureture leleng ni saribu duaratus onompulu ari. ᯉ ᯔᯇᯬᯒᯮᯘ᯲ ᯑᯬ ᯅᯬᯒᯮᯅᯬᯒᯮ ᯤ ᯖᯮ ᯂᯞᯬᯝᯬᯉᯉ᯲, ᯖᯮ ᯤᯝᯉᯉ᯲ ᯉ ᯇᯪᯉᯒᯑᯩ ᯉᯪ ᯑᯩᯅᯖ, ᯀᯘ ᯑᯪᯘᯪ ᯑᯪᯇᯖᯮᯒᯩᯖᯮᯒᯩ ᯞᯩᯞᯩᯰ ᯉᯪ ᯘᯒᯪᯅᯮ ᯑᯮᯀᯒᯖᯮᯘ᯲ ᯀᯬᯉᯬᯔ᯲ ᯇᯮᯞᯮ ᯀᯒᯪ
Naga na tinaluhon ni surusuruan Mikhael 7-17. ᯉᯎ ᯉ ᯖᯪᯉᯞᯮᯂᯬᯉ᯲ ᯉᯪ ᯘᯮᯒᯮᯘᯮᯒᯮᯀᯉ᯲ ᯔᯪᯄ᯦᯲ᯂᯀᯩᯞ᯲
II. 7 Dung i masa ma hamusuon di banua ginjang, martongtang ma Mikhael rap dohot angka surusuruanna dompak naga i. Marmusu ma nang naga i rap dohot angka surusuruanna. ᯑᯮᯰ ᯤ ᯔᯘ ᯔ ᯂᯔᯮᯘᯮᯀᯬᯉ᯲ ᯑᯪ ᯅᯉᯮᯀ ᯎᯪᯉ᯲ᯐᯰ, ᯔᯒ᯲ᯖᯬᯰᯖᯰ ᯔ ᯔᯪᯄ᯦᯲ᯂᯀᯩᯞ᯲ ᯒᯇ᯲ ᯑᯬᯂᯬᯖ᯲ ᯀᯰᯄ᯦ ᯘᯮᯒᯮᯘᯮᯒᯮᯀᯉ᯲ᯉ ᯑᯬᯔ᯲ᯇᯄ᯦᯲ ᯉᯎ ᯤ. ᯔᯒ᯲ᯔᯮᯘᯮ ᯔ ᯉᯰ ᯉᯎ ᯤ ᯒᯇ᯲ ᯑᯬᯂᯬᯖ᯲ ᯀᯰᯄ᯦ ᯘᯮᯒᯮᯘᯮᯒᯮᯀᯉ᯲ᯉ
8 Alai ndang manahan nasida; ndang be dapot inganannasida di banua ginjang. ᯀᯞᯤ ᯉ᯲ᯑᯰ ᯔᯉᯂᯉ᯲ ᯉᯘᯪᯑ, ᯉ᯲ᯑᯰ ᯅᯩ ᯑᯇᯬᯖ᯲ ᯤᯝᯉᯉ᯲ᯉᯘᯪᯑ ᯑᯪ ᯅᯉᯮᯀ ᯎᯪᯉ᯲ᯐᯰ
9 Jadi dipabali ma naga na balga i, ulok na robi i, na margoar sibolis dohot setan, na paotootohon liat portibi on, dipabali ma ibana tu tano i, dipabali ma nang angka surusuruanna raphon ibana. ᯐᯑᯪ ᯑᯪᯇᯅᯞᯪ ᯔ ᯉᯎ ᯉ ᯅᯞ᯲ᯎ ᯤ, ᯥᯞᯬᯄ᯦᯲ ᯉ ᯒᯬᯅᯪ ᯤ, ᯉ ᯔᯒ᯲ᯎᯬᯀᯒ᯲ ᯘᯪᯅᯬᯞᯪᯘ᯲ ᯑᯬᯂᯬᯖ᯲ ᯘᯩᯖᯉ᯲, ᯉ ᯇᯀᯬᯖᯬᯀᯬᯖᯬᯂᯬᯉ᯲ ᯞᯪᯀᯖ᯲ ᯇᯬᯒ᯲ᯖᯪᯅᯪ ᯀᯬᯉ᯲, ᯑᯪᯇᯅᯞᯪ ᯔ ᯤᯅᯉ ᯖᯮ ᯖᯉᯬ ᯤ, ᯑᯪᯇᯅᯞᯪ ᯔ ᯉᯰ ᯀᯰᯄ᯦ ᯘᯮᯒᯮᯘᯮᯒᯮᯀᯉ᯲ᯉ ᯒᯇ᯲ᯂᯬᯉ᯲ ᯤᯅᯉ
10 Dung i hubege ma soara na gogo di banua ginjang, na mandok: Nunga sahat nuaeng haluaon dohot hagogoon dohot harajaon ni Debatanta dohot hamuliaon ni Kristusna; ai nunga dipabali pangasung i, na mangasungi angka hahaangginta arian dohot borngin di jolo ni Debata. ᯑᯮᯰ ᯤ ᯂᯮᯅᯩᯎᯩ ᯔ ᯘᯬᯀᯒ ᯉ ᯎᯬᯎᯬ ᯑᯪ ᯅᯉᯮᯀ ᯎᯪᯉ᯲ᯐᯰ, ᯉ ᯔᯉ᯲ᯑᯬᯄ᯦᯲ ; ᯉᯮᯝ ᯘᯂᯖ᯲ ᯉᯮᯀᯀᯩᯰ ᯂᯞᯮᯀᯀᯬᯉ᯲ ᯑᯬᯂᯬᯖ᯲ ᯂᯎᯬᯎᯬᯀᯬᯉ᯲ ᯑᯬᯂᯬᯖ᯲ ᯂᯒᯐᯀᯬᯉ᯲ ᯉᯪ ᯑᯩᯅᯖᯉ᯲ᯖ ᯑᯬᯂᯬᯖ᯲ ᯂᯔᯮᯞᯪᯀᯀᯬᯉ᯲ ᯉᯪ ᯄ᯦᯲ᯒᯪᯘ᯲ᯖᯮᯘ᯲ᯉ, ᯀᯤ ᯉᯮᯝ ᯑᯪᯇᯅᯞᯪ ᯇᯝᯘᯮᯰ ᯤ, ᯉ ᯔᯝᯘᯮᯝᯪ ᯀᯰᯄ᯦ ᯂᯂᯀᯰᯎᯪᯉ᯲ᯖ ᯀᯒᯪᯀᯉ᯲ ᯑᯬᯂᯬᯖ᯲ ᯅᯬᯒ᯲ᯝᯪᯉ᯲ ᯑᯪ ᯐᯬᯞᯬ ᯉᯪ ᯑᯩᯅᯖ
11 Nunga ditaluhon nasida ibana hinorhon ni mudar ni Birubiru i dohot hinorhon ni hata na hinatindangkonnasida; ndang diparhamaol nasida hosanasida rasirasa mate. ᯉᯮᯝ ᯑᯪᯖᯞᯮᯂᯬᯉ᯲ ᯉᯘᯪᯑ ᯤᯅᯉ ᯂᯪᯉᯬᯒ᯲ᯂᯬᯉ᯲ ᯉᯪ ᯔᯮᯑᯒ᯲ ᯉᯪ ᯅᯪᯒᯮᯅᯪᯒᯮ ᯤ ᯑᯬᯂᯬᯖ᯲ ᯂᯪᯉᯬᯒ᯲ᯂᯬᯉ᯲ ᯉᯪ ᯂᯖ ᯉ ᯂᯪᯉᯖᯪᯉ᯲ᯑᯰᯄ᯦ᯬᯉ᯲ᯉᯘᯪᯑ ; ᯉ᯲ᯑᯰ ᯑᯪᯇᯒ᯲ᯂᯔᯀᯬᯞ᯲ ᯉᯘᯪᯑ ᯂᯬᯘᯉᯘᯪᯑ ᯒᯘᯪᯒᯘ ᯔᯖᯩ
12 Dibahen i marlas ni roha ma hamu, angka banua ginjang dohot pangisina! Marjea ma tano i dohot laut, ai nunga tuat sibolis i tu hamu, marrimas situtu; ai diboto, otik nama tingkina! ᯑᯪᯅᯂᯩᯉ᯲ ᯤ ᯔᯒ᯲ᯞᯘ᯲ ᯉᯪ ᯒᯬᯂ ᯔ ᯂᯔᯮ, ᯀᯰᯄ᯦ ᯅᯉᯮᯀ ᯎᯪᯉ᯲ᯐᯰ ᯑᯬᯂᯬᯖ᯲ ᯇᯝᯪᯘᯪᯉ ! ᯔᯒ᯲ᯐᯩᯀ ᯔ ᯖᯉᯬ ᯤ ᯑᯬᯂᯬᯖ᯲ ᯞᯀᯮᯖ᯲, ᯀᯤ ᯉᯮᯝ ᯖᯮᯀᯖ᯲ ᯘᯪᯅᯬᯞᯪᯘ᯲ ᯤ ᯖᯮ ᯂᯔᯮ, ᯔᯒ᯲ᯒᯪᯔᯘ᯲ ᯘᯪᯖᯮᯖᯮ, ᯀᯤ ᯑᯪᯅᯬᯖᯬ, ᯀᯬᯖᯪᯄ᯦᯲ ᯉᯔ ᯖᯪᯰᯄ᯦ᯪᯉ !
13 Alai dung diida naga i, naung bali ibana tu tano, dilele ma boruboru na tumubuhon anak i. ᯀᯞᯤ ᯑᯮᯰ ᯑᯪᯤᯑ ᯉᯎ ᯤ, ᯉᯀᯮᯰ ᯅᯞᯪ ᯤᯅᯉ ᯖᯮ ᯖᯉᯬ ᯑᯪᯞᯩᯞᯩ ᯔ ᯅᯬᯒᯮᯅᯬᯒᯮ ᯉ ᯖᯮᯔᯮᯅᯮᯂᯬᯉ᯲ ᯀᯉᯄ᯦᯲ ᯤ
14 Gabe dilehon ma tu boruboru i dua habonghabong ni pidong raja ualu na balga i, asa habang tu ingananna di halongonan, asa disi dipatureture sangombas dohot dua ngombas dohot satonga ombas, holang sian adopan ni ulok i. ᯎᯅᯩ ᯑᯪᯞᯩᯂᯬᯉ᯲ ᯔ ᯖᯮ ᯅᯬᯒᯮᯅᯬᯒᯮ ᯤ ᯑᯮᯀ ᯂᯅᯬᯰᯂᯅᯬᯰ ᯉᯪ ᯇᯪᯑᯬᯰ ᯒᯐ ᯥᯀᯞᯮ ᯉ ᯅᯞ᯲ᯎ ᯤ, ᯀᯘ ᯂᯅᯰ ᯖᯮ ᯤᯝᯉᯉ᯲ᯉ ᯑᯪ ᯂᯞᯬᯝᯬᯉᯉ᯲, ᯀᯘ ᯑᯪᯘᯪ ᯑᯪᯇᯖᯮᯒᯩᯖᯮᯒᯩ ᯘᯝᯬᯔ᯲ᯅᯘ᯲ ᯑᯬᯂᯬᯖ᯲ ᯑᯮᯀ ᯝᯬᯔ᯲ᯅᯘ᯲ ᯘᯬᯂᯬᯖ᯲ ᯘᯖᯬᯝ ᯀᯬᯔ᯲ᯅᯘ᯲, ᯂᯬᯞᯰ ᯘᯪᯀᯉ᯲ ᯀᯑᯬᯇᯉ᯲ ᯉᯪ ᯥᯞᯬᯄ᯦᯲ ᯤ
15 Ia ulok i, dibursikkon do sian babana aek na sabatang aek sian pudi ni boruboru i, anggiat diauphon batang aek i ibana. ᯤᯀ ᯥᯞᯬᯄ᯦᯲ ᯤ, ᯑᯪᯅᯮᯒ᯲ᯘᯪᯄ᯦᯲ᯄ᯦ᯬᯉ᯲ ᯑᯬ ᯘᯪᯀᯉ᯲ ᯅᯅᯉ ᯀᯀᯩᯄ᯦᯲ ᯉ ᯘᯅᯖᯰ ᯀᯀᯩᯄ᯦᯲ ᯘᯪᯀᯉ᯲ ᯇᯮᯑᯪ ᯉᯪ ᯅᯬᯒᯮᯅᯬᯒᯮ ᯤ, ᯀᯰᯎᯪᯀᯖ᯲ ᯑᯪᯀᯀᯮᯇ᯲ᯂᯬᯉ᯲ ᯅᯖᯰ ᯀᯀᯩᯄ᯦᯲ ᯤ ᯤᯅᯉ
16 Alai diurupi tano i ma boruboru i, ai dipangangang tano i do babana, dibondut do batang aek, na binursikkon ni naga i sian babana. ᯀᯞᯤ ᯑᯪᯥᯒᯮᯇᯪ ᯖᯉᯬ ᯤ ᯔ ᯅᯬᯒᯮᯅᯬᯒᯮ ᯤ, ᯀᯤᯑᯪᯇᯝᯝᯰ ᯖᯉᯬ ᯤ ᯑᯬ ᯅᯅᯉ, ᯑᯪᯅᯬᯉ᯲ᯑᯮᯖ᯲ ᯑᯬ ᯅᯖᯰ ᯀᯀᯩᯄ᯦᯲, ᯉ ᯅᯪᯉᯮᯒ᯲ᯘᯪᯄ᯦᯲ᯄ᯦ᯬᯉ᯲ ᯉᯪ ᯉᯎ ᯤ ᯘᯪᯀᯉ᯲ ᯅᯅᯉ
17 Jadi tarrimas ma naga i mida boruboru i, gabe laho ma ibana marmusu dompak angka pomparanna na tading i, angka na mangaradoti patik ni Debata jala marsihohot di panindangion ni Jesus. Jala didapothon ma tu pasir ni laut. ᯐᯑᯪ ᯖᯒ᯲ᯒᯪᯔᯘ᯲ ᯔ ᯉᯎ ᯤ ᯔᯪᯑ ᯅᯬᯒᯮᯅᯬᯒᯮ ᯤ, ᯎᯅᯩ ᯞᯂᯬ ᯔ ᯤᯅᯉ ᯔᯒ᯲ᯔᯮᯘᯮ ᯑᯬᯔ᯲ᯇᯄ᯦᯲ ᯀᯰᯄ᯦ ᯇᯬᯔ᯲ᯇᯒᯉ᯲ᯉ ᯉ ᯖᯑᯪᯰ ᯤ, ᯀᯰᯄ᯦ ᯉ ᯔᯝᯒᯑᯬᯖᯪ ᯇᯖᯪᯄ᯦᯲ ᯉᯪ ᯑᯩᯅᯖ ᯐᯞ ᯔᯒ᯲ᯘᯪᯂᯬᯂᯬᯖ᯲ ᯑᯪ ᯇᯉᯪᯉ᯲ᯑᯝᯪᯀᯬᯉ᯲ ᯉᯪ ᯐᯩᯘᯮᯘ᯲, ᯐᯞ ᯑᯪᯑᯇᯬᯖ᯲ᯂᯬᯉ᯲ ᯔ ᯖᯮ ᯇᯘᯪᯒ᯲ ᯉᯪ ᯞᯀᯮᯖ᯲