Pangungkapon Bindu 20 ᯇᯝᯮᯰᯄ᯦ᯇᯬᯉ᯲ ᯅᯪᯉ᯲ᯑᯮ ᯑᯮᯀᯇᯮᯞᯮ
Tarihot sibolis i, saribu taon lelengna. Harajaon sisaribu taon 1-10. ᯖᯒᯪᯂᯬᯖ᯲ ᯘᯪᯅᯬᯞᯪᯘ᯲ ᯤ, ᯘᯒᯪᯅᯮ ᯖᯀᯬᯉ᯲ ᯞᯩᯞᯩᯰᯉ. ᯂᯒᯐᯀᯬᯉ᯲ ᯘᯪᯘᯒᯪᯅᯮ ᯖᯀᯬᯉ᯲ ᯘᯑ - ᯘᯔ᯲ᯇᯮᯞᯮ
I. 1 Dung i huida ma sada surusuruan tuat sian banua ginjang, na maniop anak hinsu ni banua toru, jala rante na balga do di tanganna. ᯑᯮᯰ ᯤ ᯂᯮᯤᯑ ᯔ ᯘᯑ ᯘᯮᯒᯮᯘᯮᯒᯮᯀᯉ᯲ ᯖᯮᯀᯖ᯲ ᯘᯪᯀᯉ᯲ ᯅᯉᯮᯀ ᯎᯪᯉ᯲ᯐᯰ, ᯉ ᯔᯉᯪᯀᯬᯇ᯲ ᯀᯉᯄ᯦᯲ ᯂᯪᯉ᯲ᯘᯮ ᯉᯪ ᯅᯉᯮᯀ ᯖᯬᯒᯮ, ᯐᯞ ᯒᯉ᯲ᯖᯩ ᯉ ᯅᯞ᯲ᯎ ᯑᯬ ᯑᯪ ᯖᯝᯉ᯲ᯉ
2 Jadi ditangkup ma naga i, ulok na robi i, i ma sibolis jala setan, gabe dirante ma ibana leleng ni saribu taon. ᯐᯑᯪ ᯑᯪᯖᯰᯄ᯦ᯮᯇ᯲ ᯔ ᯉᯎ ᯤ, ᯥᯞᯬᯄ᯦᯲ ᯉ ᯒᯬᯅᯪ ᯤ, ᯤ ᯔ ᯘᯪᯅᯬᯞᯪᯘ᯲ ᯐᯞ ᯘᯩᯖᯉ᯲, ᯎᯅᯩ ᯑᯪᯒᯉ᯲ᯖᯩ ᯔ ᯤᯅᯉ ᯞᯩᯞᯩᯰ ᯉᯪ ᯘᯒᯪᯅᯮ ᯖᯀᯬᯉ᯲
3 Laos didabu ma ibana tu banua toru, jala dihinsu jadi disahap tu atasna, unang be dililuhon angka bangso, paima salpu na saribu taon i. Dung salpu i, ingkon paluaon ibana sangombas na jempek. ᯞᯀᯬᯘ᯲ ᯑᯪᯑᯅᯮ ᯔ ᯤᯅᯉ ᯖᯮ ᯅᯉᯮᯀ ᯖᯬᯒᯮ, ᯐᯞ ᯑᯪᯂᯪᯉ᯲ᯘᯮ ᯐᯑᯪ ᯑᯪᯘᯂᯇ᯲ ᯖᯮ ᯀᯖᯘ᯲ᯉ, ᯥᯉᯰ ᯅᯩ ᯑᯪᯞᯪᯞᯮᯂᯬᯉ᯲ ᯀᯰᯄ᯦ ᯅᯰᯘᯬ, ᯇᯤᯔ ᯘᯞ᯲ᯇᯮ ᯉ ᯘᯒᯪᯅᯮ ᯖᯀᯬᯉ᯲ ᯤ. ᯑᯮᯰ ᯘᯞ᯲ᯇᯮ ᯤ , ᯀᯪᯰᯄ᯦ᯬᯉ᯲ ᯇᯞᯮᯀᯀᯬᯉ᯲ ᯤᯅᯉ ᯘᯝᯬᯔ᯲ᯅᯘ᯲ ᯉ ᯐᯩᯔ᯲ᯇᯩᯄ᯦᯲
4 Dung i huida ma angka habangsa, angka dihunduli ma, dilehon ma tu nasida panguhumon; angkup ni i huida ma tondi ni angka na binunu ala ni panindangion di Jesus dohot ala ni hata ni Debata, i ma angka na so marsomba tu binatang i nang tu gombaranna, jala angka na so manjalo partinandaan i tu pardompahannasida pe. Na mangolu do nasida jala mangarajai rap dohot Kristus leleng ni saribu taon. ᯑᯮᯰ ᯤ ᯂᯮᯤᯑ ᯔ ᯀᯰᯄ᯦ ᯂᯅᯰᯘ, ᯀᯰᯄ᯦ ᯑᯪᯂᯮᯉ᯲ᯑᯮᯞᯪ ᯔ, ᯑᯪᯞᯩᯂᯬᯉ᯲ ᯔ ᯖᯮ ᯉᯘᯪᯑ ᯇᯝᯮᯂᯮᯔᯬᯉ᯲, ᯀᯰᯄ᯦ᯮᯇ᯲ ᯉᯪ ᯤ ᯂᯮᯤᯑ ᯔ ᯖᯬᯉ᯲ᯑᯪ ᯉᯪ ᯀᯰᯄ᯦ ᯉ ᯅᯪᯉᯮᯉᯮ ᯀᯞ ᯉᯪ ᯇᯉᯪᯉ᯲ᯑᯝᯪᯀᯬᯉ᯲ ᯑᯪ ᯐᯩᯘᯮᯘ᯲ ᯑᯬᯂᯬᯖ᯲ ᯀᯞ ᯉᯪ ᯂᯖ ᯉᯪ ᯑᯩᯅᯖ. ᯤ ᯔ ᯀᯰᯄ᯦ ᯉ ᯘᯬ ᯔᯒ᯲ᯘᯬᯔ᯲ᯅ ᯖᯮ ᯅᯪᯉᯖᯰ ᯤ ᯉᯰ ᯖᯮ ᯎᯬᯔ᯲ᯅᯒᯉ᯲ᯉ, ᯐᯞ ᯉ ᯘᯬ ᯔᯉ᯲ᯐᯞᯬ ᯇᯒ᯲ᯖᯪᯉᯉ᯲ᯑᯀᯉ᯲ ᯤ, ᯖᯮ ᯇᯒ᯲ᯑᯬᯔ᯲ᯇᯂᯉ᯲ᯉᯘᯪᯑ ᯇᯩ. ᯉ ᯔᯝᯬᯞᯮ ᯑᯬ ᯉᯘᯪᯑ ᯐᯞ ᯔᯝᯒᯐᯤ ᯒᯇ᯲ ᯑᯬᯂᯬᯖ᯲ ᯄ᯦᯲ᯒᯪᯘ᯲ᯖᯮᯘ᯲ ᯞᯩᯞᯩᯰ ᯉᯪ ᯘᯒᯪᯅᯮ ᯖᯀᯬᯉ᯲
5 Ia na mate, angka na asing, ndang mulak mangolu, paima salpu na saribu taon i. I ma haheheon parjolo! ᯤᯀ ᯉ ᯔᯖᯩ, ᯀᯰᯄ᯦ ᯉ ᯀᯘᯪᯰ, ᯉ᯲ᯑᯰ ᯔᯮᯞᯄ᯦᯲ ᯔᯝᯬᯞᯮ, ᯇᯤᯔ ᯘᯞ᯲ᯇᯮ ᯉ ᯘᯒᯪᯅᯮ ᯖᯀᯬᯉ᯲ ᯤ. ᯤ ᯔ ᯂᯂᯩᯂᯩᯀᯬᯉ᯲ ᯇᯒ᯲ᯐᯬᯞᯬ !
6 Na martua jala na badia do halak na martohap di haheheon na parjolo i; ndang marhuaso hamatean paduahon mangago nasida; na gabe malim ni Debata dohot Kristus do nasida, jala mangarajai rap dohot Ibana leleng ni na saribu taon i. ᯉ ᯔᯒ᯲ᯖᯮᯀ ᯐᯞ ᯉ ᯅᯑᯪᯀ ᯑᯬ ᯂᯞᯄ᯦᯲ ᯉ ᯔᯒ᯲ᯖᯬᯂᯇ᯲ ᯑᯪ ᯂᯂᯩᯂᯩᯀᯬᯉ᯲ ᯉ ᯇᯒ᯲ᯐᯬᯞᯬ ᯤ ; ᯉ᯲ᯑᯰ ᯔᯒ᯲ᯂᯮᯀᯘᯬ ᯂᯔᯖᯩᯀᯉ᯲ ᯇᯑᯮᯀᯂᯬᯉ᯲ ᯔᯝᯎᯬ ᯉᯘᯪᯑ ; ᯉ ᯎᯅᯩ ᯔᯞᯪᯔ᯲ ᯉᯪ ᯑᯩᯅᯖ ᯑᯬᯂᯬᯖ᯲ ᯄ᯦᯲ᯒᯪᯘ᯲ᯖᯮᯘ᯲ ᯑᯬ ᯉᯘᯪᯑ, ᯐᯞ ᯔᯝᯒᯐᯮᯤ ᯒᯇ᯲ ᯑᯬᯂᯬᯖ᯲ ᯤᯅᯉ ᯞᯩᯞᯩᯰ ᯉᯪ ᯘᯒᯪᯅᯮ ᯖᯀᯬᯉ᯲ ᯤ
7 Dung salpu na saribu taon i, malua ma sibolis i sian hurunganna. ᯑᯮᯰ ᯘᯞ᯲ᯇᯮ ᯉ ᯘᯒᯪᯅᯮ ᯖᯀᯬᯉ᯲ ᯤ, ᯔᯞᯮᯀ ᯔ ᯘᯪᯅᯬᯞᯪᯘ᯲ ᯤ ᯘᯪᯀᯉ᯲ ᯂᯮᯒᯮᯝᯉ᯲ᯉ
8 Jadi ruar ma ibana mangaliluhon angka bangso di na ualu desa ni tano on, i ma Gog dohot Magog, papunguhon nasida tu parmusuon; na sarihit na di laut do bilangannasida. ᯐᯑᯪ ᯒᯮᯀᯒ᯲ ᯔ ᯤᯅᯉ ᯔᯝᯞᯪᯞᯮᯂᯬᯉ᯲ ᯀᯰᯄ᯦ ᯅᯰᯘᯬ ᯑᯪ ᯉ ᯥᯀᯞᯮ ᯑᯩᯘ ᯉᯪ ᯖᯉᯬ ᯀᯬᯉ᯲, ᯤ ᯔ ᯎᯬᯎ᯲ ᯑᯬᯂᯬᯖ᯲ ᯔᯎᯬᯎ᯲, ᯇᯇᯮᯝᯮᯂᯬᯉ᯲ ᯉᯘᯪᯑ ᯖᯮ ᯇᯒ᯲ᯔᯮᯘᯮᯀᯬᯉ᯲ : ᯉ ᯘᯒᯪᯂᯪᯖ᯲ ᯉ ᯑᯪ ᯞᯀᯮᯖ᯲ ᯑᯬ ᯅᯪᯞᯝᯉ᯲ᯉᯘᯪᯑ
9 Jala nangkok ma nasida tu adaran ni tano i, dihaliangi ma parsaroan ni angka na badia dohot huta na hinaholongan i, gabe madabu ma api sian banua ginjang; i do mangallang nasida. ᯐᯞ ᯉᯰᯄ᯦ᯬᯄ᯦᯲ ᯔ ᯉᯘᯪᯑ ᯖᯮ ᯀᯑᯒᯉ᯲ ᯉᯪ ᯖᯉᯬ ᯤ, ᯑᯪᯂᯞᯪᯀᯝᯪ ᯔ ᯇᯒ᯲ᯘᯀᯬᯒᯉ᯲ ᯉᯪ ᯀᯰᯄ᯦ ᯉ ᯅᯑᯪᯀ ᯑᯬᯂᯬᯖ᯲ ᯂᯮᯖ ᯉ ᯂᯪᯉᯂᯬᯞᯬᯝᯉ᯲ ᯤ, ᯎᯅᯩ ᯔᯑᯅᯮ ᯔ ᯀᯇᯪ ᯘᯪᯀᯉ᯲ ᯅᯉᯮᯀ ᯎᯪᯉ᯲ᯐᯰ, ᯤ ᯑᯬ ᯔᯝᯞ᯲ᯞᯰ ᯉᯘᯪᯑ
10 Jadi didabu ma sibolis i, na mangaliluhon nasida, tu laut api dohot barerang, tu inganan ni binatang dohot panurirang pargapgap i, asa dipaporsukporsuk arian dohot borngin, ro di salelenglelengna. ᯐᯑᯪ ᯑᯪᯑᯅᯮ ᯔ ᯘᯪᯅᯬᯞᯪᯘ᯲ ᯤ, ᯉ ᯔᯝᯞᯪᯞᯮᯂᯬᯉ᯲ ᯉᯘᯪᯑ, ᯖᯮ ᯞᯀᯮᯖ᯲ ᯀᯇᯪ ᯑᯬᯂᯬᯖ᯲ ᯅᯒᯩᯒᯰ, ᯖᯮ ᯤᯝᯉᯉ᯲ ᯉᯪ ᯅᯪᯉᯖᯰ ᯑᯬᯂᯬᯖ᯲ ᯇᯉᯮᯒᯪᯒᯰ ᯇᯒ᯲ᯎᯇ᯲ᯎᯇ᯲ ᯤ, ᯀᯘ ᯑᯪᯇᯇᯬᯒ᯲ᯘᯮᯄ᯦᯲ᯇᯬᯒ᯲ᯘᯮᯄ᯦᯲ ᯀᯒᯪᯀᯉ᯲ ᯑᯬᯂᯬᯖ᯲ ᯅᯬᯒ᯲ᯝᯪᯉ᯲, ᯒᯬ ᯑᯪ ᯘᯞᯩᯞᯩᯰᯞᯩᯞᯩᯰᯉ
Uhum parpudi 11-15. ᯥᯂᯮᯔ᯲ ᯇᯒ᯲ᯇᯮᯑᯪ ᯘᯔ᯲ᯇᯮᯇᯮ ᯘᯑ - ᯘᯔ᯲ᯇᯮᯞᯮ ᯞᯪᯔ
II. 11 Dung i huida ma sada habangsa na balga, na bontar dohot na hundul di atasna: Na maporus do tano dohot langit maradophon bohina, so adong be jumpang inganannasida. ᯑᯮᯰ ᯤ ᯂᯮᯤᯑ ᯔ ᯘᯑ ᯂᯅᯰᯘ ᯉ ᯅᯞ᯲ᯎ, ᯉ ᯅᯬᯉ᯲ᯖᯒ᯲ ᯑᯬᯂᯬᯖ᯲ ᯉ ᯂᯮᯉ᯲ᯑᯮᯞ᯲ ᯑᯪ ᯀᯖᯘ᯲ᯉ ; ᯉ ᯔᯇᯬᯒᯮᯘ᯲ ᯑᯬ ᯖᯉᯬ ᯑᯬᯂᯬᯖ᯲ ᯞᯝᯪᯖ᯲ ᯔᯒᯑᯬᯇ᯲ᯂᯬᯉ᯲ ᯅᯬᯂᯪᯉ, ᯘᯬ ᯀᯑᯬᯰ ᯅᯩ ᯐᯮᯔ᯲ᯇᯰ ᯤᯝᯉᯉ᯲ᯉᯘᯪᯑ
12 Dung i huida ma angka naung mate i, angka na metmet nang angka na balga, jongjong di jolo ni habangsa i; jadi diungkap ma angka buku. Dung i diungkap ma sada buku na asing, i ma buku hangoluan, gabe diuhumi ma angka na mate i marguru tu na tarsurat di bagasan angka buku i, hombar tu na niulanasida be. ᯑᯮᯰ ᯤ ᯂᯮᯤᯑ ᯔ ᯀᯰᯄ᯦ ᯉᯀᯮᯰ ᯔᯖᯩ ᯤ, ᯀᯰᯄ᯦ ᯉ ᯔᯩᯖ᯲ᯔᯩᯖ ᯉᯰ ᯀᯰᯄ᯦ ᯉ ᯅᯞ᯲ᯎ, ᯐᯬᯰᯐᯬᯰ ᯑᯪ ᯐᯬᯞᯬ ᯉᯪ ᯂᯅᯰᯘ ᯤ : ᯐᯑᯪ ᯑᯪᯀᯮᯰᯄ᯦ᯇ᯲ ᯔ ᯀᯰᯄ᯦ ᯅᯮᯄ᯦ᯮ. ᯑᯮᯰ ᯤ ᯑᯪᯀᯮᯰᯄ᯦ᯇ᯲ ᯔ ᯘᯑ ᯅᯮᯄ᯦ᯮ ᯉ ᯀᯘᯪᯰ, ᯤ ᯔ ᯅᯮᯄ᯦ᯮ ᯂᯝᯬᯞᯮᯀᯉ᯲, ᯎᯅᯩ ᯑᯪᯥᯂᯮᯔᯪ ᯔ ᯀᯰᯄ᯦ ᯉ ᯔᯖᯩ ᯤᯔᯒ᯲ᯎᯮᯒᯮ ᯖᯮ ᯉ ᯖᯒ᯲ᯘᯮᯒᯖ᯲ ᯑᯪ ᯅᯎᯘᯉ᯲ ᯀᯰᯄ᯦ ᯅᯮᯄ᯦ᯮ ᯤ, ᯂᯬᯔ᯲ᯅᯒ᯲ ᯖᯮ ᯉ ᯉᯪᯥᯞᯂᯬᯉ᯲ᯉᯘᯪᯑ ᯅᯩ
13 Dung i dilehon laut i ma angka na mate na disini, dilehon nang hamatean dohot banua toru i ma angka na mate na tiniopna, gabe diuhumi ma ganup, marguru tu na niulana be. ᯑᯮᯰ ᯤ ᯑᯪᯞᯩᯂᯬᯉ᯲ ᯞᯀᯮᯖ᯲ ᯤ ᯔ ᯀᯰᯄ᯦ ᯉ ᯔᯖᯩ ᯉ ᯑᯪᯘᯪᯉᯪ, ᯑᯪᯞᯩᯂᯬᯉ᯲ ᯔ ᯉᯰ ᯂᯔᯖᯩᯀᯉ᯲ ᯑᯬᯂᯬᯖ᯲ ᯅᯉᯮᯀ ᯖᯬᯒᯮ ᯤ ᯔ ᯀᯰᯄ᯦ ᯉ ᯔᯖᯩ ᯉ ᯖᯪᯉᯪᯀᯬᯇ᯲ᯉ, ᯎᯅᯩ ᯑᯪᯥᯂᯮᯔᯪ ᯔ ᯎᯉᯮᯇ᯲ ᯔᯒ᯲ᯎᯮᯒᯮ ᯖᯮ ᯉ ᯉᯪᯥᯞᯉ ᯅᯩ
14 Dung i didabu ma hamatean dohot banua toru tubagasan laut api i. I ma hamatean na paduahon; laut api i do i. ᯑᯮᯰ ᯤ ᯑᯪᯑᯅᯮ ᯔ ᯂᯔᯖᯩᯀᯉ᯲ ᯑᯬᯂᯬᯖ᯲ ᯅᯉᯮᯀ ᯖᯬᯒᯮ ᯖᯮ ᯅᯎᯘᯉ᯲ ᯞᯀᯮᯖ᯲ ᯀᯇᯪ. ᯤ ᯔ ᯂᯔᯀᯖᯩᯀᯉ᯲ ᯉ ᯇᯑᯮᯀᯂᯬᯉ᯲, ᯞᯀᯮᯖ᯲ ᯀᯇᯪ ᯤ ᯑᯬ ᯤ
15 Manang ise na so jumpang tarsurat di buku hangoluan i, i ma didabu tubagasan laut api i. ᯔᯉᯰ ᯤᯘᯩ ᯉ ᯘᯬ ᯐᯮᯔ᯲ᯇᯰ ᯖᯒ᯲ᯘᯮᯒᯖ᯲ ᯑᯪ ᯉᯮᯄ᯦ᯮ ᯂᯝᯬᯞᯮᯀᯉ᯲ ᯤ, ᯤ ᯔ ᯑᯪᯑᯅᯮ ᯖᯮ ᯅᯎᯘᯉ᯲ ᯞᯀᯮᯖ᯲ ᯀᯇᯪ ᯤ