Pangungkapon Bindu 21 ᯇᯝᯮᯰᯄ᯦ᯇᯬᯉ᯲ ᯅᯪᯉ᯲ᯑᯮ ᯑᯮᯀᯇᯮᯞᯮ ᯘᯑ
Banua ginjang dohot tano na imbaru 1-8. ᯅᯉᯮᯀ ᯎᯪᯉ᯲ᯐᯰ ᯑᯬᯂᯬᯖ᯲ ᯖᯉᯬ ᯉ ᯀᯪᯔ᯲ᯅᯒᯮ ᯘᯑ - ᯥᯀᯞᯮ
I. 1 Dung i huida ma banua ginjang na imbaru dohot tano na imbaru, ai nunga salpu banua ginjang na parjolo dohot tano na parjolo i; laut i pe ndang adong be. ᯑᯮᯰ ᯤ ᯂᯮᯤᯑ ᯔ ᯅᯉᯮᯀ ᯎᯪᯉ᯲ᯐᯰ ᯉ ᯀᯪᯔ᯲ᯅᯒᯮ, ᯀᯤ ᯉᯮᯝ ᯘᯞ᯲ᯇᯮ ᯅᯉᯮᯀ ᯎᯪᯉ᯲ᯐᯰ ᯉ ᯇᯒ᯲ᯐᯬᯞᯬ ᯑᯬᯂᯬᯖ᯲ ᯖᯉᯬ ᯉ ᯇᯒ᯲ᯐᯬᯞᯬ ᯤ : ᯞᯀᯮᯖ᯲ ᯤ ᯇᯩ ᯉ᯲ᯑᯰ ᯀᯑᯬᯰ ᯅᯩ
2 Jala huida ma huta na badia i tuat sian banua ginjang sian Debata, i ma Jerusalem na imbaru, na pinature songon oroan na sinanggulan mandapothon harajaanna. ᯐᯞ ᯂᯮᯤᯑ ᯔ ᯂᯮᯖ ᯉ ᯅᯑᯪᯀ ᯤ ᯖᯮᯀᯖ᯲ ᯘᯪᯀᯉ᯲ ᯅᯉᯮᯀ ᯎᯪᯉ᯲ᯐᯰ ᯘᯪᯀᯉ᯲ ᯑᯩᯅᯖ, ᯤ ᯔ ᯐᯩᯒᯮᯘᯞᯩᯔ᯲ ᯉ ᯀᯪᯔ᯲ᯅᯒᯮ, ᯉ ᯇᯪᯉᯖᯮᯒᯩ ᯘᯬᯝᯬᯉ᯲ ᯀᯬᯒᯬᯀᯉ᯲ ᯉ ᯘᯪᯉᯰᯎᯮᯞᯉ᯲ ᯔᯉ᯲ᯑᯬᯖ᯲ᯂᯬᯉ᯲ ᯂᯒᯐᯀᯉ᯲ᯉ
3 Jadi hubege ma soara na gogo sian habangsa i, na mandok: On do joro ni Debata di tongatonga ni angka jolma; na maringanan ma Ibana di tongatonganasida, jala nasida ma bangsona, jala Debata sandiri saor tu nasida! ᯐᯑᯪ ᯂᯮᯅᯩᯎᯩ ᯔ ᯘᯬᯀᯒ ᯉ ᯎᯬᯎᯬ ᯘᯪᯀᯉ᯲ ᯂᯅᯰᯘ ᯤ, ᯉ ᯔᯉ᯲ᯑᯬᯄ᯦᯲ : ᯀᯬᯉ᯲ ᯑᯬ ᯐᯬᯒᯬ ᯉᯪ ᯑᯩᯅᯖ ᯑᯪ ᯖᯬᯝᯖᯬᯝ ᯉᯪ ᯀᯰᯄ᯦ ᯐᯬᯞ᯲ᯔ : ᯉ ᯔᯒᯪᯝᯉᯉ᯲ ᯔ ᯤᯅᯉ ᯑᯪ ᯖᯬᯝᯖᯬᯝᯉᯘᯪᯑ, ᯐᯞ ᯉᯘᯪᯑ ᯔ ᯅᯰᯘᯬᯉ, ᯐᯞ ᯑᯩᯅᯖ ᯘᯉ᯲ᯑᯪᯒᯪ ᯘᯀᯬᯒ᯲ ᯖᯮ ᯉᯘᯪᯑ
4 Jadi apusan ni Debata ma nasa iluilunasida sian matanasida: Ndang adong be hamatean nang arsak ni roha; nang angguhangguk, nang na hansit, ndang disi be; ai nunga salpu na parjolo i! ᯐᯑᯪ ᯀᯇᯮᯘᯉ᯲ ᯉᯪ ᯑᯩᯅᯖ ᯔ ᯉᯘ ᯤᯞᯮᯤᯞᯮᯉᯘᯪᯑ ᯘᯪᯀᯉ᯲ ᯔᯖᯉᯘᯪᯑ : ᯉ᯲ᯑᯰ ᯀᯑᯬᯰ ᯅᯩ ᯂᯔᯖᯩᯀᯉ᯲ ᯉᯰ ᯀᯒ᯲ᯘᯄ᯦᯲ ᯉᯪ ᯒᯬᯂ : ᯉᯰ ᯀᯰᯎᯮᯂᯰᯎᯮᯄ᯦᯲, ᯉᯰ ᯉ ᯂᯉ᯲ᯘᯪᯖ᯲, ᯉ᯲ᯑᯰ ᯑᯪᯘᯪ ᯅᯩ ; ᯀᯤ ᯉᯮᯝ ᯘᯞ᯲ᯇᯮ ᯉ ᯇᯒ᯲ᯐᯬᯞᯬ ᯤ
5 Dung i didok na hundul di habangsa i ma: Ida ma, saluhutna do hupaimbaru! Jadi didok ma: Surathon ma i, ai haposan do angka hata on jala na sintong! ᯑᯮᯰ ᯤ ᯑᯪᯑᯬᯄ᯦᯲ ᯉ ᯂᯮᯉ᯲ᯑᯮᯞ᯲ ᯑᯪ ᯂᯅᯰᯘ ᯤ ᯔ ; ᯤᯑ ᯔ ᯘᯞᯮᯂᯮᯖ᯲ᯉ ᯑᯬ ᯂᯮᯇᯀᯪᯔ᯲ᯅᯒᯮ ! ᯐᯑᯪ ᯑᯪᯑᯬᯄ᯦᯲ ᯔ, ᯘᯮᯒᯖ᯲ᯂᯬᯉ᯲ ᯔ ᯤ ᯀᯤ ᯂᯇᯬᯘᯉ᯲ ᯑᯪ ᯀᯰᯄ᯦ ᯂᯖ ᯀᯬᯉ᯲ ᯐᯞ ᯉ ᯘᯪᯉ᯲ᯖᯬᯰ !
6 Laos didok ma tu ahu: Nunga saut! Ahu do Parjolo jala Parpudi, Bonana jala Ujungna. Lehononku ma tu na mauas sian mual aek hangoluan i, so pola tuhoron! ᯞᯀᯬᯘ᯲ ᯑᯪᯑᯬᯄ᯦᯲ ᯔ ᯖᯮ ᯀᯂᯮ : ᯉᯮᯝ ᯘᯀᯮᯖ᯲ ! ᯀᯂᯮ ᯑᯬ ᯇᯒ᯲ᯐᯬᯞᯬ ᯐᯞ ᯇᯒ᯲ᯇᯮᯑᯪ. ᯅᯬᯉᯉ ᯐᯞ ᯥᯐᯮᯰᯉ. ᯞᯩᯂᯬᯉᯬᯉ᯲ᯄ᯦ᯮ ᯔ ᯖᯮ ᯉ ᯔᯥᯀᯘ᯲ ᯘᯪᯀᯉ᯲ ᯔᯮᯀᯞ᯲ ᯀᯀᯩᯄ᯦᯲ ᯂᯝᯬᯞᯮᯀᯉ᯲ ᯤ, ᯘᯬ ᯇᯬᯞ ᯖᯮᯂᯬᯒᯬᯉ᯲ !
7 Teanon ni na monang i ma saluhutna; jala Ahu gabe Debatana, ibana gabe anakku! ᯖᯩᯀᯉᯬᯉ᯲ ᯉᯪ ᯉ ᯔᯬᯉᯰ ᯤ ᯔ ᯘᯞᯮᯂᯮᯖ᯲ᯉ : ᯐᯞ ᯀᯂᯮ ᯎᯅᯩ ᯑᯩᯅᯖᯉ, ᯤᯅᯉ ᯎᯅᯩ ᯀᯉᯄ᯦᯲ᯄ᯦ᯮ !
8 Alai angka na mandele jala na so porsea jala angka na ramun ro di angka pamunu dohot parmainan dohot angka na sumomba ajiajian ro di saluhut pargabus manjalo tohapna di laut na gor api dohot barerang, i ma hamatean na paduahon i! ᯀᯞᯤ ᯀᯰᯄ᯦ ᯉ ᯔᯉ᯲ᯑᯩᯞᯩ ᯐᯞ ᯉ ᯘᯬ ᯇᯬᯒ᯲ᯘᯩᯀ ᯐᯞ ᯀᯰᯄ᯦ ᯉ ᯒᯔᯮᯉ᯲ ᯒᯬ ᯑᯪ ᯀᯰᯄ᯦ ᯇᯔᯮᯉᯮ ᯑᯬᯂᯬᯖ᯲ ᯇᯒ᯲ᯔᯤᯉᯉ᯲, ᯑᯬᯂᯬᯖ᯲ ᯀᯰᯄ᯦ ᯉ ᯘᯮᯔᯬᯔ᯲ᯅ ᯀᯐᯪᯀᯐᯪᯀᯉ᯲ ᯒᯬ ᯑᯪ ᯘᯞᯮᯂᯮᯖ᯲ ᯇᯒ᯲ᯎᯅᯮᯘ᯲ ᯔᯉ᯲ᯐᯞᯬ ᯖᯬᯂᯇ᯲ᯉ ᯑᯪ ᯞᯀᯮᯖ᯲ ᯉ ᯎᯬᯒ᯲ ᯀᯇᯪ ᯑᯬᯂᯬᯖ᯲ ᯅᯒᯩᯒᯰ, ᯤ ᯔ ᯂᯔᯖᯩᯀᯉ᯲ ᯉ ᯇᯑᯮᯀᯂᯬᯉ᯲ ᯤ !
Jerusalem na imbaru 9-27. ᯐᯩᯒᯮᯘᯞᯩᯔ᯲ ᯉ ᯀᯪᯔ᯲ᯅᯒᯮ ᯘᯪᯀ - ᯑᯮᯀᯇᯮᯞᯮ ᯇᯪᯖᯮ
II. 9 Dung i ro ma sada sian na pitu surusuruan i, naung maniop saoan na pitu, angka na marisi haporsuhon parpudi na pitu i, didok ma mandok ahu: Ro ma tuson; hupatuduhon ma tu ho oroan i, soripada ni Birubiru i! ᯑᯮᯰ ᯤ ᯒᯬ ᯔ ᯘᯑ ᯘᯪᯀᯉ᯲ ᯉ ᯇᯪᯖᯮ ᯘᯮᯒᯮᯘᯮᯒᯮᯀᯉ᯲ ᯤ ᯉᯀᯮᯰ ᯔᯉᯪᯀᯬᯇ᯲ ᯘᯀᯬᯀᯉ᯲ ᯉ ᯇᯪᯖᯮ, ᯀᯰᯄ᯦ ᯉ ᯔᯒᯪᯘᯪ ᯂᯇᯬᯒ᯲ᯘᯮᯂᯬᯉ᯲ ᯇᯒ᯲ᯇᯮᯑᯪ ᯉ ᯇᯪᯖᯮ ᯤ, ᯑᯪᯑᯬᯄ᯦᯲ ᯔ ᯔᯉ᯲ᯑᯬᯄ᯦᯲ ᯀᯂᯮ : ᯒᯬ ᯔ ᯖᯮ ᯘᯬᯉ᯲, ᯂᯮᯇᯖᯮᯑᯮᯂᯬᯉ᯲ ᯔ ᯖᯮ ᯂᯬ ᯀᯬᯒᯬᯀᯉ᯲ ᯤ, ᯘᯬᯒᯪᯇᯑ ᯉᯪ ᯅᯪᯒᯮᯅᯪᯒᯮ ᯤ !
10 Jadi diboan ma ahu di bagasan tondi tu dolok na balga jala na timbo, dipatuduhon ma tu ahu huta na badia, i ma Jerusalem, tuat sian banua ginjang, sian Debata. ᯐᯑᯪ ᯑᯪᯅᯬᯀᯉ᯲ ᯔ ᯀᯂᯮ ᯑᯪ ᯅᯎᯘᯉ᯲ ᯖᯬᯉ᯲ᯑᯪ ᯖᯮ ᯑᯬᯞᯬᯄ᯦᯲ ᯉ ᯅᯞ᯲ᯎ ᯐᯞ ᯉ ᯖᯪᯔ᯲ᯅᯬ, ᯑᯪᯇᯖᯮᯑᯮᯂᯬᯉ᯲ ᯔ ᯖᯮ ᯀᯂᯮ ᯂᯮᯖ ᯉ ᯅᯑᯪᯀ, ᯤ ᯔ ᯐᯩᯒᯮᯘᯞᯩᯔ᯲, ᯖᯮᯀᯖ᯲ ᯘᯪᯀᯉ᯲ ᯎᯪᯉ᯲ᯐᯰ, ᯘᯪᯀᯉ᯲ ᯑᯩᯅᯖ
11 Hasangapon sian Debata do di huta i. Ia sondangna tudos do tu mata intan na ummarga, songon batu Jaspis na marhillong. ᯂᯘᯝᯇᯉᯬ᯲ ᯘᯪᯀᯉ᯲ ᯑᯩᯅᯖ ᯑᯬ ᯑᯪ ᯂᯮᯖ ᯤ. ᯤᯀ ᯘᯬᯉ᯲ᯑᯰᯉ ᯖᯮᯑᯬᯘ᯲ ᯖᯮ ᯔᯖ ᯀᯪᯉ᯲ᯖᯉ᯲ ᯉ ᯀᯮᯔ᯲ᯔᯒ᯲ᯎ, ᯘᯬᯝᯬᯉ᯲ ᯅᯖᯮ ᯐᯘ᯲ᯇᯪᯘ᯲ ᯉ ᯔᯒ᯲ᯂᯪᯞ᯲ᯞᯬᯰ
12 Balga jala timbo do parik ni huta i, sampuludua do harbanganna; sampuludua surusuruan do di atas harbanganna; ia goar angka na sinuratan disi, i ma goar ni marga Israel na sampuludua i. ᯅᯞ᯲ᯎ ᯐᯞ ᯖᯪᯔ᯲ᯅᯬ ᯑᯬ ᯇᯒᯪᯄ᯦᯲ ᯉᯪ ᯂᯮᯖ ᯤ, ᯘᯔ᯲ᯇᯮᯞᯮᯑᯮᯀ ᯑᯬ ᯂᯒ᯲ᯅᯝᯉ᯲ᯉ ; ᯘᯔ᯲ᯇᯮᯞᯮᯑᯮᯀ ᯘᯮᯒᯮᯘᯮᯒᯮᯀᯉ᯲ ᯑᯬ ᯑᯪ ᯀᯖᯘ᯲ ᯂᯒ᯲ᯅᯝᯉ᯲ᯉ ; ᯤᯀ ᯎᯬᯀᯒ᯲ ᯀᯰᯄ᯦ ᯉ ᯘᯪᯉᯮᯒᯖᯉ᯲ ᯑᯪᯘᯪ, ᯤ ᯔ ᯎᯬᯀᯒ᯲ ᯔᯒ᯲ᯎ ᯀᯪᯘ᯲ᯒᯀᯩᯞ᯲ᯉ ᯘᯔ᯲ᯇᯮᯞᯮᯑᯮᯀ ᯤ
13 Tolu harbangan sian habinsaran, tolu sian utara, tolu sian dangsina, tolu sian hasundutan. ᯖᯬᯞᯮ ᯂᯒ᯲ᯅᯝᯉ᯲ ᯘᯪᯀᯉ᯲ ᯂᯅᯪᯉ᯲ᯘᯒᯉ᯲, ᯖᯬᯞᯮ ᯘᯪᯀᯉ᯲ ᯥᯖᯒ, ᯖᯬᯞᯮ ᯘᯪᯀᯉ᯲ ᯑᯰᯘᯪᯉ, ᯖᯬᯞᯮ ᯘᯪᯀᯉ᯲ ᯂᯘᯮᯉ᯲ᯑᯮᯖᯉ᯲
14 Sampuludua do batu ojahan ni parik ni huta i; disi do na sampuludua goar ni na sampuludua apostel ni Birubiru i. ᯘᯔ᯲ᯇᯮᯞᯮᯑᯮᯀ ᯑᯬ ᯅᯖᯮ ᯀᯬᯐᯂᯉ᯲ ᯉᯪ ᯇᯒᯪᯄ᯦᯲ ᯉᯪ ᯂᯮᯖ ᯤ : ᯑᯪᯘᯪ ᯑᯬ ᯉ ᯘᯔ᯲ᯇᯮᯞᯮᯑᯮᯀ ᯎᯬᯀᯒ᯲ ᯉᯪ ᯉ ᯘᯔ᯲ᯇᯮᯞᯮᯑᯮᯀ ᯀᯇᯬᯘ᯲ᯖᯩᯞ᯲ ᯉᯪ ᯅᯪᯒᯮᯅᯪᯒᯮ ᯤ
15 Ditiop na mangkatai dohot ahu do sada tungkot sere, asa suhatonna huta i dohot angka harbanganna ro di parikna. ᯑᯪᯖᯪᯀᯬᯇ᯲ ᯉ ᯔᯰᯄ᯦ᯖᯤ ᯑᯬᯂᯬᯖ᯲ ᯀᯂᯮ ᯑᯬ ᯖᯮᯰᯄ᯦ᯬᯖ᯲ ᯘᯩᯒᯩ, ᯀᯘ ᯘᯮᯂᯖᯉ᯲ᯉ ᯂᯮᯖ ᯤ ᯑᯬᯂᯬᯖ᯲ ᯀᯰᯄ᯦ ᯂᯒ᯲ᯅᯝᯉ᯲ᯉ ᯒᯬ ᯑᯪ ᯇᯒᯪᯄ᯦᯲ᯉ
16 Na maropatsuhi do hapeahan ni huta i, dos do bohangna dohot unjurna. Jadi disuhat ma huta i marhitehite tungkot i; dapot ma saribu limaratus paal: Dos do unjurna dohot bohangna dohot timbona. ᯉ ᯔᯒᯬᯇᯖ᯲ᯘᯮᯂᯪ ᯑᯬ ᯂᯇᯩᯀᯂᯉ᯲ ᯉᯪ ᯂᯮᯖ ᯤ, ᯑᯬᯘ᯲ ᯑᯬ ᯅᯬᯂᯰᯉ ᯑᯬᯂᯬᯖ᯲ ᯀᯮᯉ᯲ᯐᯮᯒ᯲ᯉ. ᯐᯑᯪ ᯑᯪᯘᯮᯂᯖ᯲ ᯔ ᯂᯮᯖ ᯤ ᯔᯒ᯲ᯂᯪᯖᯩᯂᯪᯖᯩ ᯖᯮᯰᯄ᯦ᯬᯖ᯲ ᯤ ; ᯑᯇᯬᯖ᯲ ᯔ ᯘᯒᯪᯅᯮ ᯞᯪᯔᯒᯖᯮᯘ᯲ ᯇᯀᯞ᯲. ᯑᯬᯘ᯲ ᯑᯬ ᯀᯮᯉ᯲ᯐᯮᯒ᯲ᯉ ᯑᯬᯂᯬᯖ᯲ ᯅᯬᯂᯰᯉ ᯑᯬᯂᯬᯖ᯲ ᯖᯪᯔ᯲ᯅᯬᯉ
17 Laos disuhat ma parikna, saratus opatpulu opat asta; suhatsuhat ni jolma do na di surusuruan i. ᯞᯀᯬᯘ᯲ ᯑᯪᯘᯮᯂᯖ᯲ ᯔ ᯇᯒᯪᯄ᯦᯲ᯉ, ᯘᯒᯖᯮᯘ᯲ ᯀᯬᯇᯖ᯲ᯇᯮᯞᯮ ᯀᯬᯇᯖ᯲ ᯀᯘ᯲ᯖ ; ᯘᯮᯂᯖ᯲ᯘᯮᯂᯖ᯲ ᯉᯪ ᯐᯬᯞ᯲ᯔ ᯑᯬ ᯉ ᯑᯪ ᯘᯮᯒᯮᯘᯮᯒᯮᯀᯉ᯲ ᯤ
18 Sian batu Jaspis do parik i dipauli, jala sere na pinapita do huta i songon sorminan na tio. ᯘᯪᯀᯉ᯲ ᯅᯖᯮ ᯐᯘ᯲ᯇᯪᯘ᯲ ᯑᯬ ᯇᯒᯪᯄ᯦᯲ ᯤ ᯑᯪᯇᯥᯞᯪ, ᯐᯞ ᯘᯩᯒᯩ ᯉ ᯇᯪᯉᯇᯪᯖ ᯑᯬ ᯂᯮᯖ ᯤ ᯘᯬᯝᯬᯉ᯲ ᯘᯬᯒ᯲ᯔᯪᯉᯉ᯲ ᯉ ᯖᯪᯀᯬ
19 Dipajeges do angka ojahan ni parik ni huta i marhitehite ragam ni batu na arga: Ia ojahan na parjolo batu Jaspis do, ia na paduahon Sapir, na patoluhon Kalkedon, na paopathon batu Samarados. ᯑᯪᯇᯐᯩᯎᯩᯘ᯲ ᯑᯬ ᯀᯰᯄ᯦ ᯀᯬᯐᯂᯉ᯲ ᯉᯪ ᯇᯒᯪᯄ᯦᯲ ᯉᯪ ᯂᯮᯖ ᯤ ᯔᯒ᯲ᯂᯪᯖᯩᯂᯪᯖᯩ ᯒᯎᯔ᯲ ᯉᯪ ᯅᯖᯮ ᯉ ᯀᯒ᯲ᯎ : ᯤᯀ ᯀᯬᯐᯂᯉ᯲ ᯉ ᯇᯒ᯲ᯐᯬᯞᯬ ᯅᯖᯮ ᯐᯘ᯲ᯇᯪᯘ᯲ ᯑᯬ, ᯤᯀ ᯉ ᯇᯑᯮᯀᯂᯉᯬ᯲ ᯘᯇᯪᯒ᯲, ᯉ ᯇᯖᯬᯞᯮᯂᯬᯉ᯲ ᯄ᯦ᯞ᯲ᯄ᯦ᯩᯑᯬᯉ᯲ ᯉ ᯇᯀᯬᯇᯖ᯲ᯂᯬᯉ᯲ ᯅᯖᯮ ᯘᯔᯒᯑᯬᯘ᯲
20 Ia na palimahon batu Sardonik, na paonomhon Sardion, na papituhon Krisopras, na paualuhon Berillos, na pasiahon Topasion, na pasampuluhan Krisopras, na pasampulusadahon Hiakintos, na pasampuluduahon batu Ametistos. ᯤᯀ ᯉ ᯇᯞᯪᯔᯂᯬᯉ᯲ ᯅᯖᯮ ᯘᯒ᯲ᯑᯬᯉᯪᯄ᯦᯲, ᯉ ᯇᯀᯬᯉᯬᯔ᯲ᯂᯬᯉ᯲ ᯘᯒ᯲ᯑᯪᯀᯬᯉ᯲, ᯉ ᯇᯇᯪᯖᯮᯂᯬᯉ᯲ ᯄ᯦᯲ᯒᯪᯘᯬᯇ᯲ᯒᯘ᯲, ᯉ ᯇᯥᯀᯞᯮᯂᯬᯉ᯲ ᯅᯩᯒᯪᯞ᯲ᯞᯬᯘ᯲, ᯉ ᯇᯘᯪᯀᯂᯬᯉ᯲ ᯖᯬᯇᯘᯪᯀᯬᯉ᯲, ᯉ ᯇᯘᯔ᯲ᯇᯮᯞᯮᯂᯬᯉ᯲ ᯄ᯦᯲ᯒᯪᯘᯬᯇ᯲ᯒᯘ᯲, ᯉ ᯇᯘᯔ᯲ᯇᯮᯞᯮᯘᯑᯂᯬᯉ᯲ ᯂᯪᯀᯄ᯦ᯪᯉ᯲ᯖᯬᯘ᯲, ᯉ ᯇᯘᯔ᯲ᯇᯮᯞᯮᯑᯮᯀᯂᯬᯉ᯲ ᯅᯖᯮ ᯀᯔᯩᯖᯪᯘ᯲ᯖᯬᯘ᯲
21 Ia na sampuludua harbangan i sampuludua mutiha do; ganup harbangan sian sada mutiha. Ia alaman ni huta i sere na ias do, songon sorminan na tio. ᯤᯀ ᯉ ᯘᯔ᯲ᯇᯮᯞᯮ ᯑᯮᯀ ᯂᯒ᯲ᯅᯝᯉ᯲ ᯤ ᯘᯔ᯲ᯇᯮᯞᯮ ᯑᯮᯀ ᯔᯮᯖᯪᯂ ᯑᯬ ; ᯎᯉᯮᯇ᯲ ᯂᯒ᯲ᯅᯝᯉ᯲ ᯘᯪᯀᯉ᯲ ᯘᯑ ᯔᯮᯖᯪᯂ, ᯤᯀ ᯀᯞᯔᯉ᯲ ᯉᯪ ᯂᯮᯖᯤ ᯘᯩᯒᯩ ᯉᯤᯀᯘ᯲ ᯑᯬ, ᯘᯬᯝᯬᯉ᯲ ᯘᯬᯒ᯲ᯔᯪᯉᯉ᯲ ᯉ ᯖᯪᯀᯬ
22 Ndang adong huida joro di bagasan huta i, ai Tuhan Debata, Sigomgom saluhutna, do jorona rap dohot Birubiru i. ᯉ᯲ᯑᯰ ᯀᯑᯬᯰ ᯂᯮᯤᯑ ᯐᯬᯒᯬ ᯑᯪ ᯅᯎᯘᯉ᯲ ᯂᯮᯖ ᯤ, ᯀᯤ ᯖᯮᯂᯉ᯲ ᯑᯩᯅᯖ, ᯘᯪᯎᯬᯔ᯲ᯎᯬᯔ᯲ ᯘᯞᯮᯂᯮᯖ᯲ᯉ, ᯑᯬ ᯐᯬᯒᯬᯉ ᯒᯇ᯲ ᯑᯬᯂᯬᯖ᯲ ᯅᯪᯒᯮᯅᯪᯒᯮ ᯤ
23 Ndang ringkot di huta i mata ni ari manang bulan, asa sondanganna; ai hasangapon ni Debata do patiurhonsa, Birubiru i do panondangna. ᯉ᯲ᯑᯰ ᯒᯪᯰᯄ᯦ᯬᯖ᯲ ᯑᯪ ᯂᯮᯖ ᯤ ᯔᯖ ᯉᯪ ᯀᯒᯪ ᯔᯉᯰ ᯅᯮᯞᯉ᯲, ᯀᯘ ᯘᯬᯉ᯲ᯑᯝᯉ᯲ᯉ ; ᯀᯤ ᯂᯘᯝᯇᯬᯉ᯲ ᯉᯪ ᯑᯩᯅᯖ ᯑᯬ ᯇᯖᯪᯀᯮᯒ᯲ᯂᯬᯉ᯲ᯘ, ᯅᯪᯒᯮᯅᯪᯒᯮ ᯤ ᯑᯬ ᯇᯉᯬᯉ᯲ᯑᯰᯉ
24 Na mardalani ma angka bangso di bagasan sondangna; boanon ni angka raja ni tano on ma hasangaponnasida tusi. ᯉ ᯔᯒ᯲ᯑᯞᯉ᯲ ᯔ ᯀᯰᯄ᯦ ᯅᯰᯘᯬ ᯑᯪ ᯅᯎᯘᯉ᯲ ᯘᯬᯉ᯲ᯑᯰᯉ : ᯅᯬᯀᯉᯬᯉ᯲ ᯉᯪ ᯀᯰᯄ᯦ ᯒᯐ ᯉᯪ ᯖᯉᯬ ᯀᯬᯉ᯲ ᯔ ᯂᯘᯝᯇᯬᯉ᯲ᯉᯘᯪᯑ ᯖᯮᯘᯪ
25 Ndang na hinsu harbanganna manipat ari, ai ndang masa disi borngin. ᯉ᯲ᯑᯰ ᯉ ᯂᯬᯉ᯲ᯘᯮ ᯂᯒ᯲ᯅᯝᯉ᯲ᯉ ᯔᯉᯪᯇᯖ᯲ ᯀᯒᯪ, ᯀᯤ ᯉ᯲ᯑᯰ ᯔᯘ ᯑᯪᯘᯪ ᯅᯬᯒ᯲ᯝᯪᯉ᯲
26 Jadi boanonnasida ma hasangapon dohot hamuliaon ni angka bangso tubagasan huta i. ᯐᯑᯪ ᯅᯬᯀᯉᯬᯉ᯲ᯉᯘᯪᯑ ᯔ ᯂᯘᯝᯇᯬᯉ᯲ ᯑᯬᯂᯬᯖ᯲ ᯂᯔᯮᯞᯪᯀᯀᯬᯉ᯲ ᯉᯪ ᯀᯰᯄ᯦ ᯅᯰᯘᯬ ᯖᯮ ᯅᯎᯘᯉ᯲ ᯂᯮᯖ ᯤ
27 Na so tupa masuk tu huta i nasa na ramun, nang siula hagigian dohot gabus, nda holan angka naung tarsurat di buku hangoluan na di Birubiru i. ᯉ ᯘᯬ ᯖᯮᯇ ᯔᯘᯮᯄ᯦᯲ ᯖᯮ ᯂᯮᯖ ᯤ ᯉᯘ ᯉ ᯒᯔᯮᯉ᯲, ᯉᯰ ᯘᯪᯥᯞ ᯂᯎᯪᯎᯪᯀᯉ᯲ ᯑᯬᯂᯬᯖ᯲ ᯎᯅᯮᯘ᯲, ᯉ᯲ᯑ ᯂᯬᯞᯉ᯲ ᯀᯰᯄ᯦ ᯉᯀᯮᯰ ᯖᯒ᯲ᯘᯮᯒᯖ᯲ ᯑᯪ ᯅᯮᯄ᯦ᯮ ᯂᯝᯬᯞᯮᯀᯉ᯲ ᯉ ᯑᯪ ᯅᯪᯒᯮᯅᯪᯒᯮ ᯤ