ᯖᯮᯒᯪᯖᯮᯪᯀᯉ᯲ ᯉᯪ ᯘᯪ ᯀᯐᯪ ᯇᯉᯰᯮᯄ᯦ᯮᯉᯉ᯲ Turi-turian ni si Aji Panungkunan Turpuk Paonomhon (Pamangke Android)

Disi do dohot hundul ulubalang ni Lobu Namaduma, na margoar si Partallik Najingar; sai hohom do ibana umbege barita ni na paboahon i; huhut do dibereng dompak Raja Sohuturon Dolok songon na paimahon hata ni raja i.

ᯑᯪᯘᯪ ᯑᯬ ᯑᯬᯂᯖᯬ᯲ ᯂᯉᯮᯑᯞᯮ᯲ ᯥᯞᯮᯅᯞᯰ ᯉᯪ ᯞᯬᯅᯮ ᯉᯔᯑᯮᯔ ᯉ ᯔᯒ᯲ᯎᯬᯀᯖ᯲ ᯘᯪ ᯇᯒ᯲ᯖᯞ᯲ᯞᯂᯪ᯲ ᯉᯐᯪᯝᯒ᯲ ᯘᯤ ᯂᯬᯂᯔᯬ᯲ ᯑᯬ ᯤᯅᯉ ᯀᯔᯮ᯲ᯅᯩᯎᯩ ᯅᯒᯪᯖ ᯉᯪ ᯉ ᯇᯅᯬᯀᯂᯉᯬ᯲ ᯤ ᯂᯮᯂᯖᯮ᯲ ᯑᯬ ᯑᯪᯅᯩᯒᯰᯩ ᯑᯔᯬ᯲ᯇᯂ᯲ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯘᯬᯝᯉᯬ᯲ ᯉ ᯇᯤᯔᯂᯉᯬ᯲ ᯂᯖ ᯉᯪ ᯒᯐ ᯤ

Mangkuling ma tutu raja i, didok ma, nunga tabege angka amang, aha alana umbahen so dohot si AJI Panungkunan mulak tu huta on. 

ᯔᯰᯂᯮᯞᯪᯰ ᯔ ᯖᯮᯖᯮ ᯒᯐ ᯤ ᯑᯪᯑᯂᯬ᯲ ᯔ ᯉᯮᯝ ᯖᯅᯩᯎᯩ ᯀᯰᯂ ᯀᯔᯰ ᯀᯂ ᯀᯞᯉ ᯀᯔᯮ᯲ᯅᯂᯉᯩ᯲ ᯘᯬ ᯑᯬᯂᯖᯬ᯲ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯔᯮᯞᯂ᯲ ᯖᯮ ᯂᯮᯖ ᯀᯉᯬ᯲

Nuaeng pe ale ulubalang Partallik Najingar dohot sude hita na dison tahe, dia ma sibahenonta manogot di torang ni ari ?

ᯉᯮᯀᯀᯰᯩ ᯇᯩ ᯀᯞᯩ ᯥᯞᯮᯅᯞᯰ ᯇᯒ᯲ᯖᯞ᯲ᯞᯂᯪ᯲ ᯉ ᯐᯪᯝᯒ᯲ ᯑᯬᯂᯖᯬ᯲ ᯘᯮᯑᯩ ᯂᯪᯖ ᯉ ᯑᯪᯘᯉᯬ᯲ ᯖᯂᯩ ᯑᯪᯀ ᯔ ᯘᯪᯅᯂᯩᯉᯉᯬ᯲ᯖ ᯔᯉᯬᯎᯖᯬ᯲ ᯑᯪ ᯖᯬᯒᯰ ᯉᯪ ᯀᯒᯪ

Ale rajanami, dison do Ompu ni Daras, naung dung dohot nahinan mangalului na niluahon ni homang. 

ᯀᯞᯩ ᯒᯐᯉᯔᯪ ᯑᯪᯘᯉᯬ᯲ ᯑᯬ ᯀᯔᯬ᯲ᯇᯮ ᯉᯪ ᯑᯒᯘ᯲ ᯉᯀᯮᯰ ᯑᯮᯰ ᯑᯬᯂᯖᯬ᯲ ᯉᯂᯪᯉᯉ᯲ ᯔᯝᯞᯮᯞᯮᯤ ᯉ ᯉᯪᯞᯮᯀᯂᯉᯬ᯲ ᯉᯪ ᯂᯬᯔᯰ

Ba nunga nian tar binoto otik baritana, alai asa tung tangkas, dipaboa ma jolo tu hita manang beha do antong nahinan pangalahona laho mangalului na nililuahon ni homang, ninna ulubalang Partallik Najingar.

ᯅ ᯉᯮᯝ ᯉᯪᯀᯉ᯲ ᯖᯒ᯲ ᯅᯪᯉᯬᯖᯬ ᯀᯬᯖᯂᯪ᯲ ᯅᯒᯪᯖᯉ ᯀᯞᯤ ᯀᯘ ᯖᯮᯰ ᯖᯰᯂᯘ᯲ ᯝᯪᯇᯅᯬᯀ ᯔ ᯐᯬᯞᯬ ᯖᯮ ᯂᯪᯖ ᯔᯉᯰ ᯅᯩᯂ ᯑᯬ ᯀᯉ᯲ᯖᯬᯰ ᯉᯂᯪᯉᯉ᯲ ᯇᯝᯞᯂᯬᯉ ᯞᯂᯬ ᯔᯝᯞᯮᯞᯮᯤ ᯉ ᯉᯪᯞᯪᯞᯮᯂᯉᯬ᯲ ᯉᯪ ᯂᯬᯔᯰ ᯉᯉᯪ᯲ᯉ ᯥᯞᯮᯅᯞᯰ ᯇᯒ᯲ᯖᯞ᯲ᯞᯂᯪ᯲ ᯉᯐᯪᯝᯒ᯲

Olo tutu rajanami, sasahali do masa na songon on, molo dililuhon homang sada jolma. 

ᯀᯬᯞᯬ ᯖᯮᯖᯮ ᯒᯐᯉᯔᯪ ᯘᯘᯂᯞᯪ ᯑᯬ ᯔᯘ ᯉ ᯘᯬᯝᯉᯬ᯲ ᯀᯉᯬ᯲ ᯔᯬᯞᯬ ᯑᯪᯞᯪᯞᯮᯐᯉᯬ᯲ ᯂᯬᯔᯰ ᯘᯑ ᯐᯞᯬ᯲ᯔ

Anggo nahinan di na nililuhon ni homang sada halak pangisi ni huta on, ba huboan hami ma angka biang asa adong manganggo bogas. 

ᯀᯰᯎᯬ ᯉᯂᯪᯉᯉ᯲ ᯑᯪ ᯉ ᯉᯪᯞᯪᯞᯮᯂᯉᯬ᯲ ᯉᯪ ᯂᯬᯔᯰ ᯘᯑ ᯂᯞᯂ᯲ ᯇᯝᯪᯘᯪ ᯉᯪ ᯂᯮᯖ ᯀᯉᯬ᯲ ᯅ ᯂᯮᯅᯬᯀᯉ᯲ ᯂᯔᯪ ᯔ ᯀᯰᯂ ᯅᯪᯀᯰ ᯀᯘ ᯀᯑᯬᯰ ᯔᯝᯰᯎᯬ ᯅᯬᯎᯘ᯲

Ai anggo holan niida do bogas i, maol do botoon dompak dia homang i laho. 

ᯀᯤ ᯀᯰᯎᯬ ᯂᯬᯞᯉ᯲ ᯉᯪᯤᯑ ᯑᯬ ᯅᯬᯎᯘ᯲ ᯤ ᯔᯀᯞᯬ᯲ ᯑᯬ ᯅᯬᯖᯬᯀᯉᯬ᯲ ᯑᯔᯬ᯲ᯇᯂ᯲ ᯑᯪᯀ ᯂᯬᯔᯰ ᯤ ᯞᯂᯬ

Na bisuk do homang i, tung hira jolma do huroha malona. Ai olo do i mardalan, alai hira na dipabalik bulung ni patna. 

ᯉ ᯅᯪᯘᯂᯮ᯲ ᯑᯬ ᯂᯬᯔᯰ ᯤ ᯖᯮᯰ ᯂᯪᯒ ᯐᯞᯬ᯲ᯔ ᯑᯬ ᯂᯮᯒᯬᯂ ᯔᯞᯬᯉ ᯀᯤ ᯀᯬᯞᯬ ᯑᯬ ᯤ ᯔᯒ᯲ᯑᯞᯉ᯲ ᯀᯞᯤ ᯂᯪᯒ ᯉ ᯑᯪᯇᯅᯞᯂᯪ᯲ ᯅᯮᯞᯮᯰ ᯉᯪ ᯇᯖ᯲ᯉ

Nirimpu na tu pudi, hape nunga tu jolo laho. 

ᯉᯪᯒᯔᯪ᯲ᯇᯮ ᯉ ᯖᯮ ᯇᯮᯑᯪ ᯂᯇᯩ ᯉᯮᯝ ᯖᯮ ᯐᯬᯞᯬ ᯞᯂᯬ

Dung i sai dilului homang i do dalan, laho mangagohon bogasna, ia adong aek siboluson.

ᯑᯮᯰ ᯤ ᯘᯤ ᯑᯪᯞᯮᯞᯮᯤ ᯂᯬᯔᯰ ᯤ ᯑᯬ ᯑᯞᯉ᯲ ᯞᯂᯬ ᯔᯝᯎᯬᯂᯉᯬ᯲ ᯅᯬᯎᯘ᯲ᯉ ᯤᯀ ᯀᯑᯬᯰ ᯀᯀᯂᯩ᯲ ᯘᯪᯅᯬᯞᯮᯘᯉᯬ᯲

Huboan hami do nahinan ogung, sai pinaluan ma i di tombak i. Ai mabiar do homang umbege soara ni ogung. Umbege soara ni biang pe, mabiar do i. 

ᯂᯮᯅᯬᯀᯉ᯲ ᯂᯔᯪ ᯑᯬ ᯉᯂᯪᯉᯉ᯲ ᯀᯬᯎᯮᯰ ᯘᯤ ᯇᯪᯉᯞᯮᯀᯉ᯲ ᯔ ᯤ ᯑᯪ ᯖᯔᯬ᯲ᯅᯂ᯲ ᯤ ᯀᯤ ᯔᯅᯪᯀᯒ᯲ ᯑᯬ ᯂᯬᯔᯰ ᯀᯔᯮ᯲ᯅᯩᯎᯩ ᯘᯬᯀᯒ ᯉᯪ ᯀᯬᯎᯮᯰ ᯀᯔᯮ᯲ᯅᯩᯎᯩ ᯘᯪᯀᯒ ᯉᯪ ᯅᯪᯀᯰ ᯇᯩ ᯔᯅᯪᯀᯒ᯲ ᯑᯬ ᯤ

Molo dung diboto homang i naung jonok jolma na mangihuthon i, pintor ditandingkon do jolma na niluahonna i, marlojongi ma ibana palua lingkisna.

ᯔᯬᯞᯬ ᯑᯮᯰ ᯑᯪᯅᯬᯖᯬ ᯂᯬᯔᯰ ᯤ ᯉᯀᯮᯰ ᯐᯬᯉᯂᯬ᯲ ᯐᯞᯬ᯲ᯔ ᯉ ᯔᯝᯪᯂᯖᯮᯂᯉᯬ᯲ ᯤ ᯇᯉᯪ᯲ᯖᯒᯬ᯲ ᯑᯪᯖᯑᯪᯰᯂᯉᯬ᯲ ᯑᯬ ᯐᯞᯬ᯲ᯔ ᯉ ᯉᯪᯞᯮᯀᯂᯉᯬ᯲ᯉ ᯤ ᯔᯒ᯲ᯞᯬᯐᯬᯝᯪ ᯔ ᯤᯅᯉ ᯇᯞᯮᯀ ᯞᯪᯰᯂᯘᯪ᯲ᯉ

Dapot hami do tutu nahinan jolma na niluahon ni homang i, alai nunga mansai dao, di balik ni Tor Parbaringbingan.

ᯑᯇᯖᯬ᯲ ᯂᯔᯪ ᯑᯬ ᯖᯮᯖᯮ ᯉᯂᯪᯉᯉ᯲ ᯐᯞᯬ᯲ᯔ ᯉ ᯉᯪᯞᯮᯀᯂᯉᯬ᯲ ᯉᯪ ᯂᯬᯔᯰ ᯤ ᯀᯞᯤ ᯉᯮᯝ ᯔᯉ᯲ᯘᯤ ᯑᯀᯬ᯲ ᯑᯪ ᯅᯞᯂᯪ᯲ ᯉᯪ ᯖᯒᯬ᯲ ᯇᯒ᯲ᯅᯒᯔᯪ᯲ᯅᯪᯝᯉ᯲

Ba songon i ma da rajanami na huingot, jala i ma poda ni angka natua-tua laho mangalului homang na mangaliluhon i! ninna Ompu ni Daras mandok tu Raja Sohuturon Dolok.

ᯅ ᯘᯬᯑᯉᯬ᯲ ᯤ ᯔ ᯑ ᯒᯐᯉᯔᯪ ᯉ ᯂᯮᯤᯝᯖᯬ᯲ ᯐᯞ ᯤ ᯔ ᯇᯬᯑ ᯉᯪ ᯀᯰᯂ ᯉᯖᯮᯀᯖᯮᯀ ᯞᯂᯬ ᯔᯝᯞᯮᯞᯮᯤ ᯂᯬᯔᯰ ᯉ ᯔᯝᯞᯪᯞᯮᯂᯉᯬ᯲ ᯤ ᯉᯉᯪ᯲ᯉ ᯀᯔᯬ᯲ᯇᯮ ᯉᯪ ᯑᯒᯘ᯲ ᯔᯉ᯲ᯑᯂᯬ᯲ ᯖᯮ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲

Na uli ma i tutu, songon i ma marsogot tabahen. Beha ia pandokmu, ale ulubalang Partallik Najingar? ninna raja i manungkun ulubalang i.

ᯉ ᯥᯞᯪ ᯔ ᯤ ᯖᯮᯖᯮ ᯘᯬᯎᯉᯬ᯲ ᯤ ᯔ ᯔᯒ᯲ᯘᯬᯎᯖᯬ᯲ ᯖᯅᯂᯉᯩ᯲ ᯅᯩᯂ ᯤᯀ ᯇᯉ᯲ᯑᯂᯬ᯲ᯔᯮ ᯀᯞᯩ ᯥᯞᯮᯅᯞᯰ ᯇᯒ᯲ᯖᯞ᯲ᯞᯂᯪ᯲ ᯉᯐᯪᯝᯒ᯲ ᯉᯉᯪ᯲ᯉ ᯒᯐ ᯤ ᯔᯉᯮᯰᯂᯉᯮ᯲ ᯥᯞᯮᯅᯞᯰ ᯤ

Olo tutu rajanami, nunga tung denggan i. Alai deba ma borhat tu harangan mamboan biang, sinjata dohot ogung. Anggo deba ingkon tinggal ma di huta on marjaga. 

ᯀᯬᯞᯬ ᯖᯮᯖᯮ ᯒᯐᯉᯔᯪ ᯉᯮᯝ ᯖᯮᯰ ᯑᯰᯩᯎᯉ᯲ ᯤ ᯀᯞᯤ ᯑᯩᯅ ᯔ ᯅᯒᯬ᯲ᯂᯖ᯲ ᯖᯮ ᯂᯒᯝᯉ᯲ ᯔᯔ᯲ᯅᯬᯀᯉ᯲ ᯅᯪᯀᯰ ᯘᯉᯪ᯲ᯐᯖ ᯑᯬᯂᯖᯬ᯲ ᯀᯬᯎᯮᯰ ᯀᯰᯎᯬ ᯑᯩᯅ ᯀᯪᯰᯂᯉᯬ᯲ ᯖᯪᯰᯎᯞ᯲ ᯔ ᯑᯪ ᯂᯮᯖ ᯀᯉᯬ᯲ ᯔᯒ᯲ᯐᯎ

Dang sai hatingkian, rajanami, so tung ro panangko manang na jahat roha tu hutanta on! ninna ulubalang i. 

ᯑᯰ ᯘᯤ ᯂᯖᯪᯰᯂᯪᯀᯉ᯲ ᯒᯐᯉᯔᯪ ᯘᯬ ᯖᯮᯰ ᯒᯬ ᯇᯉᯰᯂᯬ ᯔᯉᯰ ᯉ ᯐᯂᯖ᯲ ᯒᯬᯂ ᯖᯮ ᯂᯮᯖᯉ᯲ᯖ ᯀᯉᯬ᯲ ᯉᯉᯪ᯲ᯉ ᯥᯞᯮᯅᯞᯰ ᯤ

Ba na denggan ma i na nidokmi tutu! 

ᯅ ᯉ ᯑᯰᯩᯎᯉ᯲ ᯔ ᯤ ᯉ ᯉᯪᯑᯂᯬ᯲ᯔᯪ ᯖᯮᯖᯮ

Masipatajom rabina ma marsogot, masipatajom hujurna, atik tung adong angka sihabiaran mangambat di ramba i. 

ᯔᯘᯪᯇᯖᯐᯔᯬ᯲ ᯒᯅᯪᯉ ᯔ ᯔᯒ᯲ᯘᯬᯎᯖᯬ᯲ ᯔᯘᯪᯇᯖᯐᯔᯬ᯲ ᯂᯮᯐᯒᯮ᯲ᯉ ᯀᯖᯂᯪ᯲ᯖᯮᯰ ᯀᯑᯬᯰ ᯀᯰᯂ ᯘᯪᯂᯅᯪᯀᯒᯉ᯲ ᯔᯝᯔ᯲ᯅᯖ᯲ ᯑᯪ ᯒᯔ᯲ᯅ ᯤ

Diboan ma deba bodil. Dung i sude ma angka biang parburu diboan! ninna Raja Sohuturon Dolok.

ᯑᯪᯅᯬᯀᯉ᯲ ᯔ ᯑᯩᯅ ᯅᯬᯑᯞᯪ᯲ ᯑᯮᯰ ᯤ ᯘᯮᯑᯩ ᯔ ᯀᯰᯂ ᯅᯪᯀᯰ ᯇᯒ᯲ᯅᯮᯒᯮ ᯑᯪᯅᯬᯀᯉ᯲ ᯉᯉᯪ᯲ᯉ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲

Marsogotna i dung torang ari, tole ma tutu nasida masipatajom rabina dohot hujuma; adong ma deba mamboan bodil. 

ᯔᯒ᯲ᯘᯬᯎᯖᯬ᯲ᯉ ᯤ ᯑᯮᯰ ᯖᯬᯒᯰ ᯀᯒᯪ ᯖᯬᯞᯩ ᯔ ᯖᯮᯖᯮ ᯉᯘᯪᯑ ᯔᯘᯪᯇᯖᯐᯔᯬ᯲ ᯒᯅᯪᯉ ᯑᯬᯂᯖᯬ᯲ ᯂᯮᯐᯒᯮ᯲ᯉ ᯀᯑᯬᯰ ᯔ ᯑᯩᯅ ᯔᯔ᯲ᯅᯬᯀᯉ᯲ ᯅᯬᯑᯞᯪ᯲

Nunga ditodo ulubalang i angka na gogo mardalan, na gogo manangkohi dolok, laho mangalului si Aji Panungkunan tu harangan.

ᯉᯮᯝ ᯑᯪᯖᯬᯑᯬ ᯥᯞᯮᯅᯞᯰ ᯤ ᯀᯰᯂ ᯉ ᯎᯬᯎᯬ ᯔᯒ᯲ᯑᯞᯉ᯲ ᯉ ᯎᯬᯎᯬ ᯔᯉᯰᯂᯬᯂᯪ ᯑᯬᯞᯂᯬ᯲ ᯞᯂᯬ ᯔᯝᯞᯮᯞᯮᯤ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯖᯮ ᯂᯒᯝᯉ᯲

Dung i borhat ma nasida mamboan ogung dohot angka biang parburu; ditompi be ma balanjona. 

ᯑᯮᯰ ᯤ ᯅᯒᯬ᯲ᯂᯖ᯲ ᯔ ᯉᯘᯪᯑ ᯔᯔ᯲ᯅᯬᯀᯉ᯲ ᯀᯬᯎᯮᯰ ᯑᯬᯂᯖᯬ᯲ ᯀᯰᯂ ᯅᯪᯀᯰ ᯇᯒ᯲ᯅᯮᯒᯮ ᯑᯪᯖᯔᯬ᯲ᯇᯪ ᯅᯩ ᯔ ᯅᯞᯉ᯲ᯐᯬᯉ

Dohot ma sidua halak dongan ni si Aji Panungkunan hian patuduhon dalan sahat ro di sopo na tarulang, dohot inganan ni si Aji Panungkunan na marsuap i.

ᯑᯬᯂᯖᯬ᯲ ᯔ ᯘᯪᯑᯮᯀ ᯂᯞᯂ᯲ ᯑᯬᯝᯉ᯲ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯂᯪᯀᯉ᯲ ᯇᯖᯮᯑᯮᯂᯉᯬ᯲ ᯑᯞᯉ᯲ ᯘᯂᯖ᯲ ᯒᯬ ᯑᯪ ᯘᯬᯇᯬ ᯉ ᯖᯒᯮᯞᯰ ᯑᯬᯂᯖᯬ᯲ ᯤᯝᯉᯉ᯲ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯉ ᯔᯒ᯲ᯘᯮᯀᯇ᯲ ᯤ

Dung sahat nasida di Aek Parbaraan i, pintor dianggo angka biang parburu i ma tutu bogas ni homang i. 

ᯑᯮᯰ ᯤ ᯘᯂᯖ᯲ ᯔ ᯉᯘᯪᯑ ᯑᯪ ᯀᯀᯂᯩ᯲ ᯇᯒ᯲ᯅᯒᯀᯉ᯲ᯤ ᯇᯉᯪ᯲ᯖᯒᯬ᯲ ᯑᯪ ᯀᯰᯎᯬ ᯀᯰᯂ ᯅᯪᯀᯰ ᯇᯒ᯲ᯅᯮᯒᯮ ᯤ ᯔ ᯖᯮᯖᯮ ᯅᯬᯎᯘ᯲ ᯉᯪ ᯂᯬᯔᯰ ᯤ

Geor situtu ma angka biang i marlojong-lojongi, huhut mangkuling-kuling.

ᯎᯩᯀᯒᯬ᯲ ᯘᯪᯖᯮᯖᯮ ᯔ ᯀᯰᯂ ᯅᯪᯀᯰ ᯤ ᯔᯒ᯲ᯞᯬᯐᯬᯰᯞᯬᯐᯬᯝᯪ ᯂᯮᯂᯖᯮ᯲ ᯔᯰᯂᯮᯞᯪᯰᯂᯮᯞᯪᯰ

Alai dung sahat tu panariparan ni homang i, ndang diboto be dompak dia tondongonna. 

ᯀᯞᯤ ᯑᯮᯰ ᯘᯂᯖ᯲ ᯖᯮ ᯇᯉᯒᯪᯇᯒᯉ᯲ ᯉᯪ ᯂᯬᯔᯰ ᯤ ᯑᯰ ᯑᯪᯅᯬᯖᯬ ᯅᯩ ᯑᯔᯬ᯲ᯇᯂ᯲ ᯑᯪᯀ ᯖᯉᯬ᯲ᯑᯬᯝᯉᯬ᯲ᯉ

Songon na jut ma idaon roha ni angka biang i.

ᯘᯬᯝᯉᯬ᯲ ᯉ ᯐᯖᯮ᯲ ᯔ ᯤᯑᯀᯉᯬ᯲ ᯒᯬᯂ ᯉᯪ ᯀᯰᯂ ᯅᯪᯀᯰ ᯤ

Dung diida ulubalang i nunga sai so disi angka biang i, taripar ma ibana. Diida ma tutu bogas ni si Aji Panungkunan dohot bogas ni homang i di bariba i. 

ᯑᯮᯰ ᯑᯪᯤᯑ ᯥᯞᯮᯅᯞᯰ ᯤ ᯉᯮᯝ ᯘᯤ ᯘᯬ ᯑᯪᯘᯪ ᯀᯰᯂ ᯅᯪᯀᯰ ᯤ ᯖᯒᯪᯇᯒ᯲ ᯔ ᯤᯅᯉ ᯑᯪᯤᯑ ᯔ ᯖᯮᯖᯮ ᯅᯬᯎᯘ᯲ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯑᯬᯂᯖᯬ᯲ ᯅᯬᯎᯘ᯲ ᯉᯪ ᯂᯬᯔᯰ ᯤ ᯑᯪ ᯅᯒᯪᯅ ᯤ

Dijou ma angka biang i asa taripar tu hajongjonganna i. 

ᯑᯪᯐᯬᯥ ᯔ ᯀᯰᯂ ᯅᯪᯀᯰ ᯤ ᯀᯘ ᯖᯒᯪᯇᯒ᯲ ᯖᯮ ᯂᯐᯬᯰᯐᯬᯝᯉ᯲ᯉ ᯤ

Dung sahat disi pintor jebu ma tutu muse angka biang i manganggoi huhut mangkuling-kuling. 

ᯑᯮᯰ ᯘᯂᯖ᯲ ᯑᯪᯘᯪ ᯇᯉᯪ᯲ᯖᯒᯬ᯲ ᯐᯩᯅᯮ ᯔ ᯖᯮᯖᯮ ᯔᯮᯘᯩ ᯀᯰᯂ ᯅᯪᯀᯰ ᯤ ᯔᯝᯰᯎᯬᯤ ᯂᯮᯂᯖᯮ᯲ ᯔᯰᯂᯮᯞᯪᯰᯂᯮᯞᯪᯰ

Sai ditustus ma mangulului, jala nangkok ma dompak dolok-dolok.
ᯘᯤ ᯑᯪᯖᯘᯮ᯲ᯖᯘᯮ᯲ ᯔ ᯔᯝᯞᯮᯞᯮᯤ ᯐᯞ ᯉᯰᯂᯂᯬ᯲ ᯔ ᯑᯔᯬ᯲ᯇᯂ᯲ ᯑᯬᯞᯂᯬ᯲ᯑᯬᯞᯂᯬ᯲

Mulai ma dipalu ogung, lam ribur ma tarbege soara ni angka biang i; jala lam doras ma parlojongna dompak harangan bolak.

ᯔᯮᯞᯤ ᯔ ᯑᯪᯇᯞᯮ ᯀᯬᯎᯮᯰ ᯞᯔ᯲ ᯒᯪᯅᯒᯮ᯲ ᯔ ᯖᯒ᯲ᯅᯩᯎᯩ ᯘᯬᯀᯒ ᯉᯪ ᯀᯰᯂ ᯅᯪᯀᯰ ᯤ ᯐᯞ ᯞᯔ᯲ ᯑᯬᯒᯘ᯲ ᯔ ᯇᯒ᯲ᯞᯬᯐᯬᯰᯉ ᯑᯔᯬ᯲ᯇᯂ᯲ ᯂᯒᯝᯉ᯲ ᯅᯬᯞᯂ᯲

Nunga potang ari, jadi dipajongjong nasida ma angka undungundung parbornginan. 

ᯉᯮᯝ ᯇᯬᯖᯰ ᯀᯒᯪ ᯐᯑᯪ ᯑᯪᯇᯐᯬᯰᯐᯬᯰ ᯉᯘᯪᯑ ᯔ ᯀᯰᯂ ᯀᯉᯮ᯲ᯑᯮᯰᯀᯉᯮ᯲ᯑᯮᯰ ᯇᯒ᯲ᯅᯒᯬ᯲ᯝᯪᯉᯉ᯲

Dijoui nasida ma angka biang i asa mulak sian harangan i. Jadi marroan ma tutu tu inganannasida i, hajongjongan ni angka undung-undung i.

ᯑᯪᯐᯬᯥ ᯉᯘᯪᯑ ᯔ ᯀᯰᯂ ᯅᯪᯀᯰ ᯤ ᯀᯘ ᯔᯮᯞᯂ᯲ ᯘᯪᯀᯉ᯲ ᯂᯒᯝᯉ᯲ ᯤ ᯐᯑᯪ ᯔᯒ᯲ᯒᯬᯀᯉ᯲ ᯔ ᯖᯮᯖᯮ ᯖᯮ ᯤᯝᯉᯉ᯲ᯉᯘᯪᯑ ᯤ  ᯂᯐᯬᯰᯐᯬᯝᯉ᯲ ᯉᯪ ᯀᯰᯂ ᯀᯉᯮ᯲ᯑᯮᯰᯀᯉᯮ᯲ᯑᯮᯰ ᯤ

Marsogotna i dung torang ari mardalan ma muse nasida, dipalu ma ogung i, jala sai diihuthon nasida ma biang na sai manustus bogas i. 

ᯔᯒ᯲ᯘᯬᯎᯖᯬ᯲ᯉ ᯤ ᯑᯮᯰ ᯖᯬᯒᯰ ᯀᯒᯪ ᯔᯒ᯲ᯑᯞᯉ᯲ ᯔ ᯔᯮᯘᯩ ᯉᯘᯪᯑ ᯑᯪᯇᯞᯮ ᯔ ᯀᯬᯎᯮᯰ ᯤ ᯐᯞ ᯘᯤ ᯑᯪᯤᯂᯖᯮ᯲ᯂᯉᯬ᯲ ᯉᯘᯪᯑ ᯔ ᯅᯪᯀᯰ ᯉ ᯘᯤ ᯔᯉᯘᯮ᯲ᯖᯘᯮ᯲ ᯅᯬᯎᯘ᯲ ᯤ

Nunga sahat be nasida tu Tor Nabolak. Dang tarhatahon disi ngalina, jala godang ma diida nasida disi angka hau na bolonbolon, naung limut-limuton. 

ᯉᯮᯝ ᯘᯂᯖ᯲ ᯅᯩ ᯉᯘᯪᯑ ᯖᯮ ᯖᯒᯬ᯲ ᯉᯅᯬᯞᯂ᯲ ᯑᯰ ᯖᯒ᯲ᯂᯖᯂᯉᯬ᯲ ᯑᯪᯘᯪ ᯝᯞᯪᯉ ᯐᯞ ᯎᯬᯑᯰ ᯔ ᯑᯪᯤᯑ ᯉᯘᯪᯑ ᯑᯪᯘᯪ ᯀᯰᯂ ᯂᯥ ᯉ ᯅᯬᯞᯉᯬ᯲ᯅᯬᯞᯉᯬ᯲ ᯉᯀᯮᯰ ᯞᯪᯔᯖᯮ᯲ᯞᯪᯔᯮᯖᯉᯬ᯲

Molo limut-limuton angka hau di harangan, i ma tandana na mansai ngali disi. Holom nama sudena humaliang idaon.

ᯔᯬᯞᯬ ᯞᯪᯔᯖᯮ᯲ᯞᯪᯔᯮᯖᯉᯬ᯲ ᯀᯰᯂ ᯂᯥ ᯑᯪ ᯂᯒᯝᯉ᯲ ᯤ ᯔ ᯖᯉ᯲ᯑᯉ ᯉ ᯔᯉ᯲ᯘᯤ ᯝᯞᯪ ᯑᯪᯘᯪ ᯂᯬᯞᯔᯬ᯲ ᯉᯔ ᯘᯮᯑᯩᯉ ᯂᯮᯔᯞᯪᯀᯰ ᯤᯑᯀᯉᯬ᯲

Nunga mansai loja nasida. Olat ni i ma jolo sadarina i na hadalanan nasida. 

ᯉᯮᯝ ᯔᯉ᯲ᯘᯤ ᯞᯬᯐ ᯉᯘᯪᯑ ᯀᯬᯞᯖ᯲ ᯉᯪ ᯤ ᯔ ᯐᯬᯞᯬ ᯘᯑᯒᯪᯉ ᯤ ᯉ ᯂᯑᯞᯉᯉ᯲ ᯉᯘᯪᯑ

Jadi dipauli nasida ma undung-undung. Tampis situtu ma dibahen humaliang, asa manahan nasida tu ngali ni ari i.

ᯐᯑᯪ ᯑᯪᯇᯥᯞᯪ ᯉᯘᯪᯑ ᯔ ᯀᯉᯮ᯲ᯑᯮᯰᯀᯉᯮ᯲ᯑᯰ ᯖᯔ᯲ᯇᯘᯪ᯲ ᯔ ᯑᯪᯅᯂᯉᯩ᯲ ᯂᯮᯔᯞᯪᯀᯰ ᯀᯘ ᯔᯉᯂᯉ᯲ ᯉᯘᯪᯑ ᯖᯮ ᯝᯞᯪ ᯉᯪ ᯀᯒᯪ

Marsogotna i dung torang ari tuat ma nasida tu bariba ni Tor Nabolak, ai dompak i do angka biang i mangihuthon bogas ni homang i. 

ᯔᯒ᯲ᯘᯬᯎᯖᯬ᯲ᯉ ᯤ ᯑᯮᯰ ᯖᯬᯒᯰ ᯀᯒᯪ ᯖᯮᯀᯖ᯲ ᯔ ᯉᯘᯪᯑ ᯖᯮ ᯅᯒᯪᯅ ᯉᯪ ᯖᯒᯬ᯲ ᯉᯅᯬᯞᯂ᯲ ᯀᯤ ᯑᯔᯬ᯲ᯇᯂ᯲ ᯤ ᯑᯬ ᯀᯰᯂ ᯅᯪᯀᯰ ᯤ ᯔᯝᯪᯂᯖᯮ᯲ᯂᯉᯬ᯲ ᯅᯬᯎᯘ᯲ ᯉᯪ ᯂᯬᯔᯰ ᯤ

Huhut ma sai dipalui nasida ogung i. 

ᯂᯮᯂᯖᯮ᯲ ᯔ ᯘᯤ ᯑᯪᯇᯞᯮᯤ ᯉᯘᯪᯑ ᯀᯬᯎᯮᯰ

Godang situtu do nang disi angka hau bolon, alai dang limut-limuton be. 

ᯎᯬᯑᯰ ᯘᯪᯖᯮᯖᯮ ᯑᯬ ᯉᯰ ᯑᯪᯘᯪ ᯀᯰᯂ ᯂᯥ ᯅᯬᯞᯉᯬ᯲ ᯀᯞᯤ ᯑᯰ ᯞᯪᯔᯖᯮ᯲ᯞᯪᯔᯮᯖᯉᯬ᯲ ᯅᯩ

Tompu ma dibege nasida marsiadu gogo angka biang i mangkuling. 

ᯖᯔᯬ᯲ᯇᯮ ᯔ ᯑᯪᯅᯩᯎᯩ ᯉᯘᯪᯑ ᯔᯒ᯲ᯘᯪᯀᯑᯮ ᯎᯬᯎᯬ ᯀᯰᯂ ᯅᯪᯀᯰ ᯤ ᯔᯰᯂᯮᯞᯪᯰ

Dung i sai dipalu sipalu ogung ma lam gogo ogungna; huhut sai marsurahi ma nasida. 

ᯑᯮᯰ ᯤ ᯘᯤ ᯑᯪᯇᯞᯮ ᯘᯪᯇᯞᯮ ᯀᯬᯎᯮᯰ ᯔ ᯞᯔ᯲ ᯎᯬᯎᯬ ᯀᯬᯎᯮᯰᯉ ᯂᯮᯂᯖᯮ᯲ ᯘᯤ ᯔᯒ᯲ᯘᯮᯒᯂᯪ ᯔ ᯉᯘᯪᯑ

Jadi maporus ma angka pidong na di tombak i dohot nasa bodat, nang imbo, songon i nang angka sarudung na adong di tombak i.

ᯐᯑᯪ ᯔᯇᯬᯒᯘᯮ᯲ ᯔ ᯀᯰᯂ ᯇᯪᯑᯬᯰ ᯉ ᯑᯪ ᯖᯔᯬ᯲ᯅᯂ᯲ ᯤ ᯑᯬᯂᯖᯬ᯲ ᯉᯘ ᯅᯬᯑᯖ᯲ ᯉᯰ ᯀᯔᯪ᯲ᯅᯬ ᯘᯬᯝᯉᯬ᯲ ᯤ ᯉᯰ ᯀᯰᯂ ᯘᯒᯮᯑᯮᯰ ᯉ ᯀᯑᯬᯰ ᯑᯪ ᯖᯔᯬ᯲ᯅᯂ᯲ ᯤ

Didapothon nasida ma tu inganan ni angka biang na sai marlakang-lakang i. 

ᯑᯪᯑᯇᯖᯬ᯲ᯂᯉᯬ᯲ ᯉᯘᯪᯑ ᯔ ᯖᯮ ᯤᯝᯉᯉ᯲ ᯉᯪ ᯀᯰᯂ ᯅᯪᯀᯰ ᯉ ᯘᯤ ᯔᯒ᯲ᯞᯂᯰᯞᯂᯰ ᯤ

Dung sahat nasida disi diida nasida ma adong ruang na bolon di dolok-dolok i, i ma ruang ni homang na mangaluahon si Aji Panungkunan i. 

ᯑᯮᯰ. ᯘᯂᯖ᯲ ᯉᯘᯪᯑ ᯑᯪᯘᯪ ᯑᯪᯤᯑ ᯉᯘᯪᯑ ᯔ ᯀᯑᯬᯰ ᯒᯮᯀᯰ ᯉ ᯅᯬᯞᯉᯬ᯲ ᯑᯪ ᯑᯬᯞᯂᯬ᯲ᯑᯬᯞᯂᯬ᯲ ᯤ ᯤ ᯔ ᯒᯮᯀᯰ ᯉᯪ ᯂᯬᯔ᯦ᯰ ᯉ ᯔᯝᯞᯮᯀᯂᯉᯬ᯲ ᯘᯪ ᯀᯐᯪ ᯇᯉᯮᯰᯂᯮ ᯉ᯲ ᯤ

Tangkas do tutu tarida bogas ni pat ni jolma di baba ni liang ni homang i, ai tano liat na dauk do di toru mardongan rihit na lamot.

ᯖᯰᯂ᯦᯲ ᯑᯬ ᯖᯮᯖᯮ ᯖᯒᯪᯑ ᯅᯬᯎᯘ᯲ ᯉᯪ ᯇᯖ᯲ ᯉᯪ ᯐᯞᯬ᯲ᯔ ᯑᯪ ᯅᯅ ᯉᯪ ᯞᯪᯀᯰ ᯉᯪ ᯂᯬᯔᯰ ᯤ ᯀᯤ ᯖᯉᯬ ᯞᯪᯀᯖ᯲ ᯉ ᯑᯀᯂᯮ᯲ ᯑᯬ ᯑᯪ ᯖᯬᯒᯮ ᯔᯒ᯲ᯑᯬᯝᯉ᯲ ᯒᯪᯂᯖᯪ᯲ ᯉ ᯞᯔᯖᯬ᯲

Dison ma hamu deba, asa hunangkohi hami dolok-dolok on, asa hubereng hami manang na puas di bariha an do liang ni homang on ninna Partallik Najingar.

ᯑᯪᯘᯉᯬ᯲ ᯔ ᯂᯔᯮ ᯑᯩᯅ ᯀᯘ ᯂᯮᯉᯰᯂᯬᯂᯪ ᯂᯔᯪ ᯑᯬᯞᯂᯬ᯲ᯑᯬᯞᯂᯬ᯲ ᯀᯉᯬ᯲ ᯀᯘ ᯂᯮᯅᯩᯒᯰᯩ ᯂᯔᯪ ᯔᯉᯰ ᯉ ᯇᯮᯀᯘ᯲ ᯑᯪ ᯅᯒᯪᯅ ᯀᯉ᯲ ᯑᯬ ᯞᯪᯀᯰ ᯉᯪ ᯂᯬᯔᯰ ᯀᯉᯬ᯲ ᯉᯉᯬ᯲ᯉ ᯇᯒᯖᯞ᯲ᯞᯂᯪ᯲ ᯉᯐᯪᯝᯒ᯲

Ola ba ulubalangnami, denggan ma i tutu  inna nasida.

ᯀᯬᯞᯬ ᯅ ᯥᯞᯮᯅᯞᯰᯉᯔᯪ ᯑᯰᯩᯎᯉ᯲ ᯔ ᯤ ᯖᯮᯖᯮ ᯉᯉᯪ᯲ᯉ ᯉᯘᯪᯑ

Dung i dinangkohi ulubalang i rap dohot deba donganna ma dolok-dolok i. 

ᯑᯮᯰ ᯤ ᯑᯪᯉᯰᯂᯬᯂᯪ ᯥᯞᯮᯅᯞᯰ ᯤ ᯎᯇ᯲ ᯑᯬᯂᯖᯬ᯲ ᯑᯩᯅ ᯑᯬᯝᯉ᯲ᯉ ᯔ ᯑᯬᯞᯂᯬ᯲ᯑᯬᯞᯂᯬ᯲ ᯤ

Sahat ro di bariba ni dolok-dolok i. diida ma sahat do tutu tusi ruang i.

ᯘᯂᯖ᯲ ᯒᯬ ᯑᯪ ᯅᯒᯪᯅ ᯉᯪ ᯑᯬᯞᯂᯬ᯲ ᯑᯬᯞᯂᯬ᯲ ᯤ ᯑᯪᯤᯑ ᯔ ᯘᯂᯖ᯲ ᯑᯬ ᯖᯮᯖᯮ ᯖᯮᯘᯪ ᯒᯮᯀᯰ ᯤ 

Dipamanat nasida ma manang naung haruar sian i na niluahon ni homang i. 

ᯑᯪᯇᯔᯉᯖ᯲ ᯉᯘᯪᯑ ᯔ ᯔᯉᯰ᯲ ᯉᯀᯰ ᯂᯒᯮᯀᯒ᯲ ᯘᯪᯀᯉ᯲ ᯤ ᯉ ᯉᯪᯞᯮᯀᯂᯉᯬ᯲ ᯉᯪ ᯂᯬᯔᯰ ᯤ

Dapot ma diida nasida bogas ni pat ni jolma. 

ᯑᯇᯖᯬ᯲ ᯔ ᯑᯪᯤᯑ ᯉᯘᯪᯑ ᯅᯬᯎᯘ᯲ ᯉᯪ ᯇᯖ᯲ ᯉᯪ ᯐᯞᯬ᯲ᯔ

Dijou nasida ma angka donganna na tinggal i. Jadi ro ma nasida, diboan ma huhut angka biang i.

ᯑᯪᯐᯬᯥ ᯉᯘᯪᯑ ᯔ ᯀᯰᯂ ᯑᯬᯝᯉ᯲ᯉ ᯉ ᯖᯪᯰᯎᯞ᯲ ᯤ ᯐᯑᯪ ᯒᯬ ᯔ ᯉᯘᯪᯑ ᯑᯪᯅᯪᯀᯉ᯲ ᯔ ᯂᯮᯂᯖᯮ᯲ ᯀᯰᯂ ᯅᯪᯀᯰ ᯤ

Dung sahat angka biang i di bariba ni dolok-dolok i, dianggo ma bogas i, sai mangkulingi ma, marlakang-lakang mangihutihut bogas i. Ogung pe sai dipalu ma gogo.

ᯑᯮᯰ ᯘᯂᯖ᯲ ᯀᯰᯂ ᯅᯪᯀᯰ ᯤ ᯑᯪ ᯅᯒᯪᯅ ᯉᯪ ᯑᯬᯞᯂᯬ᯲ᯑᯬᯞᯂᯬ᯲ ᯤ ᯑᯪᯀᯰᯎᯬ ᯔ ᯅᯬᯎᯘ᯲ ᯤ ᯘᯤ ᯔᯰᯂᯮᯞᯪᯝᯪ ᯔ ᯔᯒ᯲ᯞᯂᯰᯞᯂᯰ ᯔᯝᯪᯂᯖᯮ᯲ᯤᯂᯖᯮ᯲ ᯅᯬᯎᯘ᯲ ᯤ ᯀᯬᯎᯮᯰ ᯇᯩ ᯘᯤ ᯑᯪᯇᯞᯮ ᯔ ᯎᯬᯎᯬ

Nunga tung loja nasida, jadi hundul ma nasida maradian. 

ᯉᯮᯝ ᯖᯮᯰ ᯞᯬᯐ ᯉᯘᯪᯑ ᯐᯑᯪ ᯂᯉᯮ᯲ᯑᯞᯮ᯲ ᯔ ᯉᯘᯪᯑ ᯔᯒᯑᯪᯀᯉ᯲

Ditatap nasida ma sian ginjang ni dolok-dolok i, nunga tarida antong Aek Parholangan di torn adu. 

ᯑᯪᯖᯖᯇ᯲ ᯉᯘᯪᯑ ᯔ ᯘᯪᯀᯉ᯲ ᯎᯉᯪ᯲ᯐᯰ ᯉᯪ ᯑᯬᯞᯂᯬ᯲ᯑᯬᯞᯂᯬ᯲ ᯤ ᯉᯮᯝ ᯖᯒᯪᯑ ᯀᯉ᯲ᯖᯬᯰ ᯀᯀᯂᯩ᯲ ᯇᯒ᯲ᯂᯬᯞᯝᯉ᯲ ᯑᯪ ᯖᯒᯬ᯲ ᯀᯑᯮ

Dao situtu dompak habinsaran suman tarida timus ni huta Lobu Parholean.

ᯑᯀᯬ ᯘᯪᯖᯮᯖᯮ ᯑᯔᯬ᯲ᯇᯂ᯲ ᯂᯅᯉᯪ᯲ᯘᯒᯉ᯲ ᯘᯮᯔᯉ᯲ ᯖᯒᯪᯑ ᯖᯪᯔᯘᯮ᯲ ᯉᯪ ᯂᯮᯖ ᯞᯬᯅᯮ ᯇᯒ᯲ᯂᯬᯞᯩᯀᯉ᯲

Adong gorakku, nunga jonok situtu na talului! ninna ulubalang Partallik Najingar, marnapuran be ma hita jolo songon na manga lap gogo! ninna.

ᯀᯑᯬᯰ ᯎᯬᯒᯂ᯲ᯂᯮ ᯉᯮᯝ ᯐᯬᯉᯂᯬ᯲ ᯘᯪᯖᯮᯖᯮ ᯉ ᯖᯞᯮᯞᯮᯤ ᯉᯉᯪ᯲ᯉ ᯥᯞᯮᯅᯞᯰ ᯇᯒ᯲ᯖᯞ᯲ᯞᯂᯪ᯲ ᯉᯐᯪᯝᯒ᯲ ᯔᯒ᯲ᯉᯇᯮᯒᯉ᯲ ᯅᯩ ᯔ ᯂᯪᯖ ᯐᯬᯞᯬ ᯘᯬᯝᯉᯬ᯲ ᯉ ᯔᯝᯞᯇ᯲ ᯎᯬᯎᯬ ᯉᯉᯪ᯲ᯉ
Dung i masibuat hajutna be ma nasida, diatupi be ma napuranna ; dung i dipangan ma. 

ᯑᯮᯰ ᯤ ᯔᯘᯪᯅᯮᯀᯖ᯲ ᯂᯐᯖᯮ᯲ᯉ ᯅᯩ ᯔ ᯉᯘᯪᯑ ᯑᯪᯀᯖᯮᯇᯪ ᯅᯩ ᯔ ᯉᯇᯮᯒᯉ᯲ᯉ ᯑᯮᯰ ᯤ ᯑᯪᯇᯝᯉ᯲ᯔ

Dung songon na mulak gogonasida, jongjong be ma nasida. 

ᯑᯮᯰ ᯘᯬᯝᯉᯬ᯲ ᯉ ᯔᯮᯞᯂ᯲ ᯎᯬᯎᯬᯉᯘᯪᯑ ᯐᯬᯰᯐᯬᯰ ᯅᯩ ᯔ ᯉᯘᯪᯑ

Dung i tompu ma dibege nasida muse mangkuling angka biang i, sahali sude.

ᯑᯮᯰ ᯤ ᯖᯔᯬ᯲ᯇᯮ ᯔ ᯑᯪᯅᯩᯎᯩ ᯉᯘᯪᯑ ᯔᯮᯘᯩ ᯔᯰᯂᯮᯞᯪᯰ ᯀᯰᯂ ᯅᯪᯀᯰ ᯤ ᯘᯂᯞᯪ ᯘᯮᯑᯩ

Beha dibege hamu pangkuling ni angka biang i? ninna ulubalang i manungkun angka donganna i.

ᯅᯩᯂ ᯑᯪᯅᯩᯎᯩ ᯂᯔᯮ ᯇᯰᯂᯮᯞᯪᯰ ᯉᯪ ᯀᯰᯂ ᯅᯪᯀᯰ ᯤ ᯉᯉᯪ᯲ᯉ ᯥᯞᯮᯅᯞᯰ ᯤ ᯔᯉᯮᯰᯂᯉᯮ᯲ ᯀᯰᯂ ᯑᯬᯝᯉ᯲ᯉ ᯤ

Songon na ribur! ninna angka donganna i.

ᯘᯬᯝᯉᯬ᯲ᯉ ᯒᯪᯅᯒᯮ᯲ ᯉᯉᯪ᯲ᯉ ᯀᯰᯂ ᯑᯬᯝᯉ᯲ᯉ ᯤ

dang i na hudok! Dang dibege hamu songon na mangorong jolma soara i? ninna ulubalang i.

ᯑᯰ ᯤ ᯉ ᯂᯮᯑᯂᯬ᯲ ᯑᯰ ᯑᯪᯅᯩᯎᯩ ᯂᯔᯮ ᯘᯬᯝᯉᯬ᯲ ᯉ ᯔᯝᯬᯒᯬᯰ ᯐᯞᯬ᯲ᯔ ᯘᯬᯀᯒ ᯤ ᯉᯉᯪ᯲ᯉ ᯥᯞᯮᯅᯞᯰ ᯤ

I do tutu, i do tutu! ninna angka donganna i, hira na sahali sude rap mangalusi.

ᯤ ᯑᯬ ᯖᯮᯖᯮ ᯤ ᯑᯬ ᯖᯮᯖᯮ ᯉᯉᯪ᯲ᯉ ᯀᯰᯂ ᯑᯬᯝᯉ᯲ᯉ ᯤ ᯂᯪᯒ ᯉ ᯘᯂᯞᯪ ᯘᯮᯑᯩ ᯒᯇ᯲ ᯔᯝᯞᯮᯘᯪ

Dung i marlojongi ma nasida mandapothon soara ni angka biang i. Tung so diboto nasida be samban. 

ᯑᯮᯰ ᯤ ᯔᯒ᯲ᯞᯬᯐᯬᯝᯪ ᯔ ᯉᯘᯪᯑ ᯔᯉ᯲ᯑᯇᯖᯬ᯲ᯂᯉᯬ᯲ ᯘᯬᯀᯒ ᯉᯪ ᯀᯰᯂ ᯅᯪᯀᯰ ᯤ ᯖᯮᯰ ᯘᯬ ᯑᯪᯅᯬᯖᯬ ᯉᯘᯪᯑ ᯅᯩ ᯘᯔ᯲ᯅᯉ᯲

Adong ma na tarrunsur, adong ma na pola tungkap ala ni hudusna. Alai dang adong idaon dihilala nasida manang na mahua be pe nasida.

ᯀᯑᯬᯰ ᯔ ᯉ ᯖᯒ᯲ᯒᯉᯮ᯲ᯘᯒᯮ᯲ ᯀᯑᯬᯰ ᯔ ᯉ ᯇᯬᯞ ᯖᯮᯰᯂᯇ᯲ ᯀᯞ ᯉᯪ ᯂᯮᯑᯘᯮ᯲ᯉ ᯀᯞᯤ ᯑᯰ ᯀᯑᯬᯰ ᯤᯑᯀᯉᯬ᯲ ᯑᯪᯂᯪᯞᯞ ᯉᯘᯪᯑ ᯔᯉᯰ ᯉ ᯔᯂᯮᯀ ᯅᯩ ᯇᯩ ᯉᯘᯪᯑ

Di jolo sahali ma ulubalang Partallik Najingar, sai marlojongi ma ibana, sai disuruhi ma angka ramba-ramba i. 

ᯑᯪ ᯐᯬᯞᯬ ᯘᯂᯞᯪ ᯔ ᯥᯞᯮᯅᯞᯰ ᯇᯒ᯲ᯖᯞ᯲ᯞᯂᯪ᯲ ᯉᯐᯪᯝᯒ᯲ ᯘᯤ ᯔᯒ᯲ᯞᯬᯐᯬᯝᯪ ᯔ ᯤᯅᯉ ᯘᯤ ᯑᯪᯘᯮᯒᯮᯂᯪ ᯔ ᯀᯰᯂ ᯒᯔ᯲ᯅᯒᯔ᯲ᯅ ᯤ

Sahat ma nasida tutu tu inganan ni angka biang na mangorong i, marhaliang sudena.

ᯘᯂᯖ᯲ ᯔ ᯉᯘᯪᯑ ᯖᯮᯖᯮ ᯖᯮ ᯤᯝᯉᯉ᯲ ᯉᯪ ᯀᯰᯂ ᯅᯪᯀᯰ ᯉ ᯔᯝᯬᯒᯬᯰ ᯤ ᯔᯒ᯲ᯂᯞᯪᯀᯰ ᯘᯮᯑᯩᯉ

Dung i diida ulubalang i ma rap dohot angka donganna, nunga disi si Aji Panungkunan, hundul di atas ni hau na marumpak, jala mangunsande tu tungko-tungko.

ᯑᯮᯰ ᯑᯪᯤᯑ ᯥᯞᯮᯅᯞᯰ ᯤ ᯔ ᯒᯇ᯲ ᯑᯬᯂᯖᯬ᯲ ᯀᯰᯂ ᯑᯬᯝᯉ᯲ᯉ ᯉᯮᯝ ᯑᯪᯘᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯂᯉᯮ᯲ᯑᯞᯮ᯲ ᯑᯪ ᯀᯖᯘ᯲ ᯉᯪ ᯂᯥ ᯉ ᯔᯒᯔᯮ᯲ᯇᯂ᯲ ᯐᯞ ᯔᯝᯉᯮ᯲ᯘᯉ᯲ᯑᯩ ᯖᯮ ᯖᯮᯰᯂᯬᯖᯮᯰᯂᯬ

O Aji Panungkunan, pir ma tondim, nunga ro hami! ninna ulubalang i rap dohot angka donganna i.

ᯀᯬ ᯀᯐᯪ ᯇᯉᯮᯰᯂᯮᯉᯉ᯲ ᯇᯒᯪ᯲ ᯔ ᯖᯉᯬ᯲ᯑᯔᯪ᯲ ᯉᯮᯝ ᯒᯬ ᯂᯔᯪ ᯉᯉᯪ᯲ᯉ ᯥᯞᯮᯅᯞᯰ ᯤ ᯒᯇ᯲ ᯑᯬᯂᯖᯬ᯲ ᯀᯰᯂ ᯑᯬᯝᯉ᯲ᯉ ᯤ

Alai dang adong mangalusi si Aji Panungkunan, sai songon na marnipi do ibana, songon na so dibege angka soara i, jala hira na so diida do angka donganna na ro i.

ᯀᯞᯤ ᯑᯰ ᯀᯑᯬᯰ ᯔᯝᯞᯮᯘᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯘᯤ ᯘᯬᯝᯉᯬ᯲ ᯉ ᯔᯒ᯲ᯉᯪᯇᯪ ᯑᯬ ᯤᯅᯉ  ᯘᯬᯝᯉᯬ᯲ ᯉ ᯘᯬ ᯑᯪᯅᯩᯎᯩ ᯀᯰᯂ ᯘᯬᯀᯒ ᯤ ᯐᯞ ᯂᯪᯒ ᯉ ᯘᯬ ᯑᯪᯤᯑ ᯑᯬ ᯀᯰᯂ ᯑᯬᯝᯉ᯲ᯉ ᯉ ᯒᯬ ᯤ

Dung i dipalu nasida ma ogung i, asa maporus pitonggam ni homang na lohot dope tu ibana; dibuat ma aek sian lohuk-lohuk, disuapi ma ibana. 

ᯑᯮᯰ ᯤ ᯑᯪᯇᯞᯮ ᯉᯘᯪᯑ ᯔ ᯀᯬᯎᯮᯰ ᯤ ᯀᯘ ᯔᯇᯬᯒ᯦ᯘᯮ᯲ ᯇᯪᯖᯬᯰᯎᯔ᯲ ᯉᯪ ᯂᯬᯔᯰ ᯉ ᯞᯬᯂᯖᯬ᯲ ᯑᯬᯇᯩ ᯖᯮ ᯤᯅᯉ ᯑᯪᯅᯮᯀᯖ᯲ ᯔ ᯀᯀᯂᯩ᯲ ᯘᯪᯀᯉ᯲ ᯞᯬᯂᯂᯮ᯲ᯞᯬᯂᯂᯮ᯲ ᯑᯪᯘᯮᯀᯇᯪ ᯔ ᯤᯅᯉ

Lam songon na marroha ma diida nasida si Aji Panungkunan. 

ᯞᯔ᯲ ᯘᯬᯝᯉᯬ᯲ ᯉ ᯔᯒ᯲ᯒᯬᯂ ᯔ ᯑᯪᯤᯑ ᯉᯘᯪᯑ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Dung i marnapuran ma ulubalang Partallik Najingar, dibursik ma sambubuna jala dipastap ma mansai tompu bohina. 

ᯑᯮᯰ ᯤ ᯔᯒ᯲ᯉᯇᯮᯒᯉ᯲ ᯔ ᯥᯞᯮᯅᯞᯰ ᯇᯒ᯲ᯖᯞ᯲ᯞᯂᯪ᯲ ᯉᯐᯪᯝᯒ᯲ ᯑᯪᯅᯒᯮ᯲ᯘᯂᯪ᯲ ᯔ ᯘᯔ᯲ᯅᯮᯅᯮᯉ ᯐᯞ ᯑᯪᯇᯘ᯲ᯖᯇ᯲ ᯔ ᯔᯉ᯲ᯘᯤ ᯖᯔᯬ᯲ᯇᯮ ᯅᯬᯂᯪᯉ

Dung i songon na manonggak ma soarana mandok, Dao ma pangago, mulak ma tondim tu ruma, ale Aji Panungkunan!

ᯑᯮᯰ ᯤ ᯘᯬᯝᯉᯬ᯲ ᯉ ᯔᯉᯬᯰᯎᯂ᯲ ᯔ ᯘᯬᯀᯒᯉ ᯔᯉ᯲ᯑᯂᯬ᯲ ᯑᯀᯬ ᯔ ᯇᯝᯎᯬ ᯔᯮᯞᯂ᯲ ᯔ ᯖᯉᯬ᯲ᯑᯔᯪ᯲ ᯖᯮ ᯒᯮᯔ ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲

Tarsonggot ma si Aji Panungkunan, dung i mangkuling ma ibana, Na didia do ahu? huhut diberengi ma sude angka na humaliang i.

ᯖᯒ᯲ᯘᯬᯰᯎᯖᯬ᯲ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯑᯮᯰ ᯤ ᯔᯰᯂᯮᯞᯪᯰ ᯔ ᯤᯅᯉ ᯉ ᯑᯪᯑᯪᯀ ᯑᯬ ᯀᯂᯮ ᯂᯮᯂᯖᯮ᯲ ᯑᯪᯅᯩᯒᯩᯝᯪ ᯔ ᯘᯮᯑᯩ ᯀᯰᯂ ᯉ ᯂᯮᯔᯞᯪᯀᯰ ᯤ

Unang ho mabiar! Na di tombak do ho, nunga dison hami angka donganmu mangalap ho! ninna ulubalang i, huhut ma·ditogu ibana.

ᯥᯉᯰ ᯂᯬ ᯔᯅᯪᯀᯒ᯲ ᯉ ᯑᯪ ᯖᯔᯬ᯲ᯅᯂ᯲ ᯑᯬ ᯂᯬ ᯉᯮᯝ ᯑᯪᯘᯉᯬ᯲ ᯂᯔᯪ ᯀᯰᯂ ᯑᯬᯝᯉ᯲ᯔᯮ ᯔᯝᯞᯇ᯲ ᯂᯬ ᯉᯉᯪ᯲ᯉ ᯥᯞᯮᯅᯞᯰ ᯤ ᯂᯮᯂᯖᯮ᯲ ᯔ ᯑᯪᯖᯬᯎᯮ ᯤᯅᯉ

Dung i diboan nasida ma si Aji Panungkunan tu huta Lobu Namaduma.

ᯑᯮᯰ ᯤ ᯑᯪᯅᯬᯀᯉ᯲ ᯉᯘᯪᯑ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯖᯮ ᯂᯮᯖ ᯞᯬᯅᯮ ᯉᯔᯑᯮᯔ