ᯖᯮᯒᯪᯖᯮᯪᯀᯉ᯲ ᯉᯪ ᯘᯪ ᯀᯐᯪ ᯇᯉᯰᯮᯄ᯦ᯮᯉᯉ᯲ Turi-turian ni si Aji Panungkunan Turpuk Paonomhon (Pamangke Komputer)

Disi do dohot hundul ulubalang ni Lobu Namaduma, na margoar si Partallik Najingar; sai hohom do ibana umbege barita ni na paboahon i; huhut do dibereng dompak Raja Sohuturon Dolok songon na paimahon hata ni raja i.

Mangkuling ma tutu raja i, didok ma, nunga tabege angka amang, aha alana umbahen so dohot si AJI Panungkunan mulak tu huta on. 

Nuaeng pe ale ulubalang Partallik Najingar dohot sude hita na dison tahe, dia ma sibahenonta manogot di torang ni ari ?

Ale rajanami, dison do Ompu ni Daras, naung dung dohot nahinan mangalului na niluahon ni homang. 

Ba nunga nian tar binoto otik baritana, alai asa tung tangkas, dipaboa ma jolo tu hita manang beha do antong nahinan pangalahona laho mangalului na nililuahon ni homang, ninna ulubalang Partallik Najingar.

Olo tutu rajanami, sasahali do masa na songon on, molo dililuhon homang sada jolma. 

Anggo nahinan di na nililuhon ni homang sada halak pangisi ni huta on, ba huboan hami ma angka biang asa adong manganggo bogas. 

Ai anggo holan niida do bogas i, maol do botoon dompak dia homang i laho. 

Na bisuk do homang i, tung hira jolma do huroha malona. Ai olo do i mardalan, alai hira na dipabalik bulung ni patna. 

Nirimpu na tu pudi, hape nunga tu jolo laho. 

Dung i sai dilului homang i do dalan, laho mangagohon bogasna, ia adong aek siboluson.

Huboan hami do nahinan ogung, sai pinaluan ma i di tombak i. Ai mabiar do homang umbege soara ni ogung. Umbege soara ni biang pe, mabiar do i. 

Molo dung diboto homang i naung jonok jolma na mangihuthon i, pintor ditandingkon do jolma na niluahonna i, marlojongi ma ibana palua lingkisna.

Dapot hami do tutu nahinan jolma na niluahon ni homang i, alai nunga mansai dao, di balik ni Tor Parbaringbingan.

Ba songon i ma da rajanami na huingot, jala i ma poda ni angka natua-tua laho mangalului homang na mangaliluhon i! ninna Ompu ni Deras mandok tu Raja Sohuturon Dolok.

Na uli ma i tutu, songon i ma marsogot tabahen. Beha ia pandokmu, ale ulubalang Partallik Najingar? ninna raja i manungkun ulubalang i.

Olo tutu rajanami, nunga tung denggan i. Alai deba ma borhat tu harangan mamboan biang, sinjata dohot ogung. Anggo deba ingkon tinggal ma di huta on marjaga. 

Dang sai hatingkian, rajanami, so tung ro panangko manang na jahat roha tu hutanta on!

ninna ulubalang i. Ba na denggan ma i na nidokmi tutu! 

Masipatajom rabina ma marsogot, masipatajom hujurna, atik tung adong angka sihabiaran

mangambat di ramba i. 

Diboan ma deba bodil. Dung i sude ma angka biang parburu diboan! ninna Raja Sohuturon Dolok.

Marsogotna i dung torang ari, tole ma tutu nasida masipatajom rabina dohot hujuma; adong ma deba mamboan bodil. 

Nunga ditodo ulubalang i angka na gogo mardalan, na gogo manangkohi dolok, laho mangalului si Aji Panungkunan tu harangan.

Dung i borhat ma nasida mamboan ogung dohot angka biang parburu; ditompi be ma balanjona. 

Dohot ma sidua halak dongan ni si Aji Panungkunan hian patuduhon dalan sahat ro di sopo na tarulang, dohot inganan ni si Aji Panungkunan na marsuap i.

Dung sahat nasida di Aek Parbaraan i, pintor dianggo angka biang parburu i ma tutu bogas ni homang i. 

Geor situtu ma angka biang i marlojong-lojongi, huhut mangkuling-kuling.

Alai dung sahat tu panariparan ni homang i, ndang diboto be dompak dia tondongonna. Songon na jut ma idaon roha ni angka biang i.

Dung diida ulubalang i nunga sai so disi angka biang i, taripar ma ibana. Diida ma tutu bogas ni si Aji Panungkunan dohot bogas ni homang i di bariba i. 

Dijou ma angka biang i asa taripar tu hajongjonganna i. 

Dung sahat disi pintor jebu ma tutu muse angka biang i manganggoi huhut mangkuling-kuling. 

Sai ditustus ma mangulului, jala nangkok ma dompak dolok-dolok.

Mulai ma dipalu ogung, lam ribur ma tarbege soara ni angka biang i; jala lam doras ma parlojongna dompak harangan bolak.

Nunga potang ari, jadi dipajongjong nasida ma angka undungundung parbornginan. 

Dijoui nasida ma angka biang i asa mulak sian harangan i. Jadi marroan ma tutu tu inganannasida i, hajongjongan ni angka undung-undung i.

Marsogotna i dung torang ari mardalan ma muse nasida, dipalu ma ogung i, jala sai diihuthon nasida ma biang na sai manustus bogas i. 

Nunga sahat be nasida tu Tor Nabolak. Dang tarhatahon disi ngalina, jala godang ma diida nasida disi angka hau na bolonbolon, naung limut-limuton. 

Molo limut-limuton angka hau di harangan, i ma tandana na mansai ngali disi. Holom nama sudena humaliang idaon.

Nunga mansai loja nasida. Olat ni i ma jolo sadarina i na hadalanan nasida. 

Jadi dipauli nasida ma undung-undung. Tampis situtu ma dibahen humaliang, asa manahan nasida tu ngali ni ari i.

Marsogotna i dung torang ari tuat ma nasida tu bariba ni Tor Nabolak, ai dompak i do angka biang i mangihuthon bogas ni homang i. 

Huhut ma sai dipalui nasida ogung i. 

Godang situtu do nang disi angka hau bolon, alai dang limut-limuton be. Tompu ma dibege nasida marsiadu gogo angka biang i mangkuling.

Dung i sai dipalu sipalu ogung ma lam gogo ogungna; huhut sai marsurahi ma nasida. 

Jadi maporus ma angka pidong na di tombak i dohot nasa bodat, nang imbo, songon i nang angka sarudung na adong di tombak i.

Didapothon nasida ma tu inganan ni angka biang na sai marlakang-lakang i. 

Dung sahat nasida disi diida nasida ma adong ruang na bolon di dolok-dolok i, i ma ruang ni homang na mangaluahon si Aji Panungkunan i. 

Tangkas do tutu tarida bogas ni pat ni jolma di baba ni liang ni homang i, ai tano liat na dauk do di toru mardongan rihit na lamot.

Dison ma hamu deba, asa hunangkohi hami dolok-dolok on, asa hubereng hami manang na puas di bariha an do liang ni homang on ninna Partallik Najingar.

Ola ba ulubalangnami, denggan ma i tutu  inna nasida.

Dung i dinangkohi ulubalang i rap dohot deba donganna ma dolok-dolok i. 

Sahat ro di bariba ni dolok-dolok i. diida ma sahat do tutu tusi ruang i. 

Dipamanat nasida ma manang naung haruar sian i na niluahon ni homang i. 

Dapot ma diida nasida bogas ni pat ni jolma. 

Dijou nasida ma angka donganna na tinggal i. Jadi ro ma nasida, diboan ma huhut angka biang i.

Dung sahat angka biang i di bariba ni dolok-dolok i, dianggo ma bogas i, sai mangkulingi ma, marlakang-lakang mangihutihut bogas i. Ogung pe sai dipalu ma gogo.

Nunga tung loja nasida, jadi hundul ma nasida maradian. 

Ditatap nasida ma sian ginjang ni dolok-dolok i, nunga tarida antong Aek Parholangan di torn adu. 

Dao situtu dompak habinsaran suman tarida timus ni huta Lobu Parholean.

Adong gorakku, nunga jonok situtu na talului! ninna ulubalang Partallik Najingar, marnapuran be ma hita jolo songon na manga lap gogo! ninna.

Dung i masibuat hajutna be ma nasida, diatupi be ma napuranna ; dung i dipangan ma. 

Dung songon na mulak gogonasida, jongjong be ma nasida. 

Dung i tompu ma dibege nasida muse mangkuling angka biang i, sahali sude.

Beha dibege hamu pangkuling ni angka biang i? ninna ulubalang i manungkun angka donganna i.

Songon na ribur! ninna angka donganna i.

Ndang i na hudok! Dang dibege hamu songon na mangorong jolma soara i? ninna ulubalang i.

I do tutu, i do tutu! ninna angka donganna i, hira na sahali sude rap mangalusi.

Dung i marlojongi ma nasida mandapothon soara ni angka biang i. Tung so diboto nasida be samban. 

Adong ma na tarrunsur, adong ma na pola tungkap ala ni hudusna. Alai dang adong idaon dihilala nasida manang na mahua be pe nasida.

Di jolo sahali ma ulubalang Partallik Najingar, sai marlojongi ma ibana, sai disuruhi ma angka ramba-ramba i. 

Sahat ma nasida tutu tu inganan ni angka biang na mangorong i, marhaliang sudena.

Dung i diida ulubalang i ma rap dohot angka donganna, nunga disi si Aji Panungkunan, hundul di atas ni hau na marumpak, jala mangunsande tu tungko-tungko.

O Aji Panungkunan, pir ma tondim, nunga ro hami! ninna ulubalang i rap dohot angka donganna i.

ᯀᯞᯤ ᯉ᯲ᯑᯰ  ᯀᯑᯰᯬ ᯔᯝᯞᯮᯘᯪ ᯘᯪ ᯀᯐᯪ ᯇᯉᯰᯮᯮᯄᯱᯮᯉᯉ᯲ ᯘᯤ ᯘᯬᯝᯉᯬ᯲ ᯉ ᯔᯒ᯲ᯉᯪᯇᯪ ᯑᯬ ᯤᯅᯉ ᯘᯬᯝᯉᯬ᯲ ᯉ ᯘᯬ ᯑᯪᯅᯩᯎᯩ ᯀᯰᯄᯱ ᯘᯬᯀᯒ ᯤ ᯐᯞ ᯐᯪᯒ ᯉ ᯘᯬ ᯑᯪᯤᯑ ᯑᯬ ᯀᯰᯄᯱ ᯑᯬᯝᯉ᯲ᯉ ᯉ ᯒᯬ ᯤ

Alai ndang adong mangalusi si Aji Panungkunan, sai songon na marnipi do ibana, songon na so dibege angka soara i, jala hira na so diida do angka donganna na ro i.

ᯑᯰᯮ ᯤ ᯑᯪᯇᯞᯮ ᯉᯘᯪᯑ ᯔ ᯀᯬᯎᯰᯮ ᯤ ᯀᯘ ᯔᯇᯬᯒᯘᯮ᯲ ᯇᯪᯖᯰᯬᯎᯔ᯲ ᯉᯪ ᯂᯬᯔᯰ ᯉ ᯞᯬᯂᯖᯬ᯲ ᯑᯬᯇᯩ ᯖᯮ ᯤᯅᯉ ᯑᯪᯅᯮᯀᯖ᯲ ᯔ ᯀᯀᯄᯱᯩ᯲ ᯘᯪᯀᯉ᯲ ᯞᯬᯂᯄᯱᯮ᯲ᯞᯬᯂᯄᯱᯮ᯲ ᯑᯪᯘᯮᯀᯇᯪ ᯔ ᯤᯅᯉ

Dung i dipalu nasida ma ogung i, asa maporus pitonggam ni homang na lohot dope tu ibana; dibuat ma aek sian lohuk-lohuk, disuapi ma ibana. 

ᯞᯔ᯲ ᯘᯬᯝᯉᯬ᯲  ᯉ ᯔᯒ᯲ᯒᯬᯂ ᯔ ᯑᯪᯤᯑ ᯉᯘᯪᯑ ᯘᯪ ᯀᯐᯪ ᯇᯉᯰᯮᯄᯱᯮᯉᯉ᯲

Lam songon na marroha ma diida nasida si Aji Panungkunan. 

ᯑᯰᯮ ᯤ ᯔᯒ᯲ᯉᯇᯮᯒᯉ᯲ ᯔ ᯥᯞᯮᯅᯞᯰ ᯇᯒ᯲ᯖᯞ᯲ᯞᯄᯱᯪ᯲ ᯉ ᯐᯪᯝᯒ᯲ ᯑᯪᯅᯒᯮ᯲ᯘᯄᯱᯪ᯲ ᯔ ᯘᯔ᯲ᯅᯮᯅᯮᯉ ᯐᯞ ᯑᯪᯇᯘ᯲ᯖᯇ᯲ ᯔ ᯔᯉ᯲ᯘᯤ ᯖᯔᯬ᯲ᯇᯮ ᯅᯬᯂᯪᯉ

Dung i marnapuran ma ulubalang Partallik Najingar, dibursik ma sambubuna jala dipastap ma mansai tompu bohina. 

ᯑᯰᯮ ᯤ ᯘᯬᯝᯉᯬ᯲ ᯉ ,ᯉᯰᯬᯎᯄᯱ᯲ ᯔ ᯘᯬᯀᯒᯉ ᯔᯉ᯲ᯑᯄᯱᯬ᯲ ᯑᯀᯬ ᯔ ᯇᯝᯎᯬ ᯔᯮᯞᯄᯱ᯲ ᯔ ᯖᯉᯬ᯲ᯑᯔᯪ᯲ ᯖᯮ ᯒᯮᯔ ᯀᯞᯩ ᯀᯐᯪ ᯇᯉᯰᯮᯄᯱᯮᯉᯉ᯲

Dung i songon na manonggak ma soarana mandok, Dao ma pangago, mulak ma tondim tu ruma, ale Aji Panungkunan!

ᯖᯒ᯲ᯘᯰᯬᯎᯖᯬ᯲ ᯔ ᯘᯪ ᯀᯐᯪ ᯇᯉᯰᯮᯄᯱᯮᯉᯉ᯲ ᯑᯱᯮ ᯤ ᯔᯰᯄᯱᯮᯞᯰᯪ ᯔ ᯤᯅᯉ ᯉ ᯑᯪ ᯑᯪᯀ ᯑᯬ ᯀᯂᯮ ? ᯂᯮᯂᯖᯮ᯲ ᯑᯪᯅᯩᯒᯩᯝᯪ ,ᯔ ᯘᯮᯑᯩ ᯀᯰᯄᯱ ᯉ ᯂᯮᯔᯞᯪᯀᯰ ᯤ

Tarsonggot ma si Aji Panungkunan, dung i mangkuling ma ibana, Na didia do ahu? huhut diberengi ma sude angka na humaliang i.

ᯥᯉᯰ ᯂᯬ ᯔᯅᯪᯀᯒ᯲ ᯉ ᯑᯪ ᯖᯔᯬ᯲ᯅᯄᯱ᯲ ᯑᯬ ᯂᯬ ᯉᯮᯝ ᯑᯪᯘᯉᯬ᯲ ᯂᯔᯪ ᯀᯰᯄᯱ ᯑᯬᯝᯉ᯲ᯔᯮ ᯔᯝᯞᯇ᯲ ᯂᯬ ᯉᯉᯪ᯲ᯉ ᯥᯞᯮᯅᯞᯰ ᯤ ᯂᯮᯂᯖᯮ᯲ ᯔ ᯑᯪᯖᯬᯎᯮ ᯤᯅᯉ

Unang ho mabiar! Na di tombak do ho, nunga dison hami angka donganmu mangalap ho! ninna ulubalang i, huhut ma·ditogu ibana.

ᯑᯰᯮ ᯤ ᯑᯪᯅᯬᯀᯉ᯲ ᯉᯘᯪᯑ ᯔ ᯘᯪ ᯀᯐᯪ ᯇᯉᯱᯮᯄᯱᯮᯉᯉ᯲ ᯖᯮ ᯞᯬᯅᯮ ᯉᯔᯑᯮᯔ

Dung i diboan nasida ma si Aji Panungkunan tu huta Lobu Namaduma.