ᯖᯮᯒᯪᯖᯮᯪᯀᯉ᯲ ᯉᯪ ᯘᯪ ᯀᯐᯪ ᯇᯉᯰᯮᯄ᯦ᯮᯉᯉ᯲ Turi-turian ni si Aji Panungkunan Turpuk Pasampulutoluhon (Pangke Android)

Dung dibege si Tapi Marhillong Sere na naeng borhat ma marsogot pangisi ni huta i dompak Dolok Pargarutan, sai songon na pusok ma hosana. Nunga antong piga hali si Aji Panungkunan sai
naeng mate.

 ᯑᯮᯰ ᯑᯪᯅᯩᯎᯩ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯰᯬ ᯘᯩᯒᯩ ᯉ ᯉᯀᯰᯩ ᯅᯒᯬ᯲ᯂᯖ᯲ ᯔ ᯔᯒ᯲ᯘᯬᯎᯖᯬ᯲ ᯇᯝᯪᯘᯪ ᯉᯪ ᯂᯮᯖ ᯤ ᯑᯔᯬ᯲ᯇᯄ᯦᯲ ᯑᯬᯞᯄ᯦ᯬ᯲ ᯇᯒ᯲ᯎᯒᯮᯖᯉ᯲ ᯘᯤ ᯘᯬᯝᯉᯬ᯲ ᯉ ᯇᯮᯘᯄ᯦ᯬ᯲ ᯔ ᯂᯬᯘᯉ ᯉᯮᯝ ᯀᯉ᯲ᯖᯰᯬ ᯇᯪᯎ ᯂᯞᯪ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲ ᯉᯀᯰᯩ ᯔᯖᯩ

"Atik na saut ma marsogot buaton ni bodil ni musu!" ninna roha ni boru ni raja i. 

ᯀᯖᯄ᯦ᯪ᯲ ᯉ ᯘᯀᯖᯮ᯲ ᯔ ᯔᯒ᯲ᯘᯬᯎᯖᯬ᯲ ᯅᯮᯀᯖᯉᯬ᯲ ᯉᯪ ᯅᯬᯑᯞᯪ᯲ ᯉᯪ ᯔᯮᯘᯮ ᯉᯉᯪ᯲ᯉ ᯒᯬᯂ ᯉᯪ ᯅᯬᯒᯮ ᯉᯪ ᯒᯐ ᯤ

Diatupi ma napuran, napuran sirara uruk na tabo; dung i laho ma ibana manisip-nisipi tu jabu ni namboruna. 

ᯑᯪᯀᯖᯮᯇᯪ ᯔ ᯉᯇᯮᯒᯉ᯲ ᯉᯇᯮᯒᯉ᯲ ᯘᯪᯒᯒ ᯥᯒᯄ᯦ᯮ᯲ ᯉ ᯖᯅᯬ ᯑᯮᯰ ᯤ ᯞᯂᯬ ᯔ ᯤᯅᯉ ᯔᯉᯪᯘᯇᯪ᯲ᯉᯪᯘᯇᯪ᯲ ᯖᯮ ᯐᯅᯮ ᯉᯪ ᯉᯔ᯲ᯅᯬᯒᯮᯉ

Dung sahat ro di jabu disungkun namboruna i ma, "Ro ho maen Tapi Marhillong Sere tuson, aha ma na naeng dohononmu?"

 ᯑᯮᯰ ᯘᯂᯖ᯲ ᯒᯬ ᯑᯪ ᯐᯅᯮ ᯑᯪᯘᯮᯰᯄ᯦ᯉᯮ᯲ ᯉᯔ᯲ᯅᯬᯒᯮᯉ ᯤ ᯔ ᯒᯬ ᯂᯬ ᯔᯀᯉᯩ᯲ ᯖᯇᯪ ᯔᯒ᯲ᯂᯞᯪ᯲ᯞᯰᯬ ᯘᯩᯒᯩ ᯖᯮᯘᯉᯬ᯲ ᯀᯂ ᯲ ᯉ ᯉᯀᯰᯩ ᯑᯬᯂᯬᯉᯉᯬ᯲ᯔᯮ

Adong ma da na naeng dohononku namboru. 

ᯀᯑᯰᯬ ᯔ ᯑ ᯉ ᯉᯀᯰᯩ ᯑᯬᯂᯬᯉᯉᯬ᯲ᯄ᯦ᯮ ᯉᯔ᯲ᯅᯬᯒᯮ

Nunga manang piga hali sai naeng marmara si Aji Panungkunan. 

ᯉᯮᯝ ᯔᯉᯰ ᯇᯪᯎ ᯂᯞᯪ ᯘᯤ ᯉᯀᯰᯩ ᯔᯒ᯲ᯔᯒ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲

Ndang bolas dohononmu namboru, asa tinggal ibana di huta on? 

ᯉ᯲ᯑᯰ ᯅᯬᯞᯘ᯲ ᯑᯬᯂᯬᯉᯉᯬ᯲ᯔᯮ ᯉᯔ᯲ᯅᯬᯒᯮ ᯀᯘ ᯖᯰᯪᯎᯞ᯲ ᯤᯅᯉ ᯑᯪ ᯂᯮᯖ ᯀᯉᯬ᯲

So tung hona bodil ma muse ibana, da namboru!" ninna si Tapi Marhillong Sere. 

ᯘᯬ ᯖᯮᯰ ᯂᯬᯉ ᯅᯬᯑᯞᯪ᯲ ᯔ ᯔᯮᯘᯩ ᯤᯅᯉ ᯑ ᯉᯔ᯲ᯅᯬᯒᯮ ᯉᯉᯪ᯲ᯉ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯰᯬ ᯘᯩᯒᯩ

O ale maen Tapi Marhillong Sere! Huboto do na di rohami; aut sura pe bolas ibana tinggal di huta on, ndang olo i.

 ᯀᯬ ᯀᯞᯩ ᯔᯀᯉᯩ? ᯖᯇᯪ ᯔᯒ᯲ᯂᯞᯪ᯲ᯞᯰᯬ ᯘᯩᯒᯩ ᯂᯮᯅᯬᯖᯬ ᯑᯬ ᯉ ᯑᯪ ᯒᯬᯂᯔᯪ ᯀᯀᯖᯮ᯲ ᯘᯮᯒ ᯇᯩ ᯅᯬᯞᯘ᯲ ᯤᯅᯉ ᯖᯰᯪᯎᯞ᯲ ᯑᯪ ᯂᯮᯖ ᯀᯉᯬ᯲ ᯉ᯲ᯑᯰ ᯀᯬᯞᯬ ᯤ

Haleaon do i rajumanna, ai na mangalengsehon musuna do pangisi ni huta on, umbahen borhat marsogot tu Dolak Pargarutan. 

ᯂᯞᯩᯀᯀᯉᯬ᯲ ᯑᯬ ᯤ ᯒᯐᯮᯔᯉ᯲ᯉ ᯀᯤ ᯉ ᯔᯝᯞᯰᯩᯘᯩᯂᯉᯬ᯲ ᯔᯮᯘᯮᯉ ᯑᯬ ᯇᯝᯪᯘᯪ ᯉᯪ ᯂᯮᯖ ᯀᯉᯬ᯲ ᯀᯔᯮ᯲ᯅᯂᯉᯩ᯲ ᯅᯒᯬ᯲ᯂᯖ᯲ ᯔᯒ᯲ᯘᯬᯎᯖᯬ᯲ ᯖᯮ ᯑᯬᯞᯄ᯦ᯬ᯲ ᯇᯒ᯲ᯎᯒᯮᯖᯉ᯲

lngkon dohot do ibana laho, i do tandana na lahi-lahi daba!"
ninna namboruna i.

 ᯀᯰᯪᯄ᯦ᯉᯬ᯲ ᯑᯬᯂᯖᯬ᯲ ᯑᯬ ᯤᯅᯉ ᯞᯂᯬ ᯤ ᯑᯬ ᯖᯉ᯲ᯑᯉ ᯉ ᯞᯂᯪᯞᯂᯪ ᯑᯅ ᯉᯉᯪ᯲ᯉ ᯉᯔ᯲ᯅᯬᯒᯮᯉ ᯤ

"Antong lehon ma jolo namboru napuran sirara uruk na huatupi on di ibana; alai so tung adong marnida! " ninna si Tapi Marhillong Sere.

 ᯀᯉ᯲ᯖᯰᯬ ᯞᯩᯂᯉᯬ᯲ ᯔ ᯐᯬᯞᯬ ᯉᯔ᯲ᯅᯬᯒᯮ ᯉᯇᯮᯒᯉ᯲ ᯘᯪᯒᯒ ᯥᯒᯄ᯦ᯮ᯲ ᯉ ᯂᯮᯀᯖᯮᯇᯪ ᯀᯉᯬ᯲ ᯑᯪ ᯤᯅᯉ ᯀᯞᯤ ᯘᯬ ᯖᯮᯰ ᯀᯑᯰᯬ ᯔᯒ᯲ᯉᯪᯑ ᯉᯉᯪ᯲ᯉ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯰᯬ ᯘᯩᯒᯩ

Hape tompu ma ro si Aji Panungkunan tu bagas ni namboru ni
si Tapi Marhillong Sere i. 

ᯂᯇᯩ ᯖᯔᯬ᯲ᯇᯮ ᯔ ᯒᯬ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲ ᯖᯮ ᯅᯎᯘ᯲ ᯉᯪ ᯉᯔ᯲ᯅᯬᯒᯮ ᯉᯪ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯰᯬ ᯘᯩᯒᯩ ᯤ

Dung diida na disi do boru ni raja i, pintor naeng mijur ma ibana. 

ᯑᯮᯰ ᯑᯪᯤᯑ ᯉ ᯑᯪᯘᯪ ᯑᯬ ᯅᯬᯒᯮ ᯉᯪ ᯒᯐ ᯤ ᯇᯉᯪ᯲ᯖᯒᯬ᯲ ᯉᯀᯰᯩ ᯔᯪᯐᯒᯮ᯲ ᯔ ᯤᯅᯉ

Dung i didok namboru ni si Tapi Marhillong Sere i ma, "Ro ma
ho amang Aji Panungkunan, dison ma ho hundul!

 ᯑᯮᯰ ᯤ ᯑᯪᯑᯄ᯦ᯬ᯲ ᯉᯔ᯲ᯅᯬᯒᯮ ᯉᯪ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯰᯬ ᯘᯩᯒᯩ ᯤ ᯔ ᯒᯬ ᯔ ᯂᯬ ᯀᯔᯰ ᯀᯐᯪ ᯇᯉᯮᯰᯄ᯦ᯮᯉᯉ᯲ ᯑᯪᯘᯉᯬ᯲ ᯔ ᯂᯬ ᯂᯉᯮ᯲ᯑᯞᯮ᯲

Hundul ma tutu si Aji Panungkunan, dibereng ma dompak boru ni raja i. 

ᯂᯉᯮ᯲ᯑᯞᯮ᯲ ᯔ ᯖᯮᯖᯮ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲ ᯑᯪᯅᯩᯒᯰᯩ ᯔ ᯝᯔᯬ᯲ᯇᯄ᯦᯲ ᯅᯬᯒᯮ ᯉᯪ ᯒᯐ ᯤ

Tutu do antong:
Na so ada landina,
na so ada landona.
Na so adong tandina,
na so adong tudosna. 

ᯖᯮᯖᯮ ᯑᯬ ᯀᯉ᯲ᯖᯰᯬ ᯉ ᯘᯬ ᯀᯘ ᯞᯉ᯲ᯑᯪᯉ ᯉ ᯘᯬ ᯀᯑ ᯞᯉ᯲ᯑᯬᯉ ᯉ ᯘᯬ ᯀᯑᯰᯬ ᯖᯉ᯲ᯑᯪᯉ ᯉ ᯘᯬ ᯀᯑᯰᯬ ᯖᯮᯑᯬᯘᯉ᯲ᯉ

Dung i tungki ma siTapi. Marhillong Sere 

ᯑᯮᯰ ᯤ ᯖᯮᯰᯄ᯦ᯪ ᯔ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯰᯬ ᯘᯩᯒᯩ

Atehe Aji Panungkunan, aut ma didok bolas do tinggal ho di huta on, unang pola dohot mandongani pangisi ni huta on tu Dolak Pargarutan, olo do ho?" ninna namboru ni si Tapi Marhillong Sere. 

ᯀᯖᯩᯂᯩ ᯀᯐᯪ ᯇᯉᯮᯰᯄ᯦ᯮᯉᯉ᯲ ᯀᯀᯖᯮ᯲ ᯔ ᯑᯪᯑᯄ᯦ᯬ᯲ ᯅᯬᯞᯘ᯲ ᯑᯬ ᯖᯰᯪᯎᯞ᯲ ᯂᯬ ᯑᯪ ᯂᯮᯖ ᯀᯉᯬ᯲ ᯥᯉᯰ ᯇᯬᯞ ᯑᯬᯂᯖᯬ᯲ ᯔᯉ᯲ᯑᯬᯝᯉᯪ ᯇᯝᯪᯘᯪ ᯉᯪ ᯂᯮᯖ ᯀᯉᯬ᯲ ᯖᯮ ᯑᯬᯞᯄ᯦ᯬ᯲ ᯇᯒ᯲ᯎᯒᯮᯖᯉ᯲ ᯀᯬᯞᯬ ᯑᯬ ᯂᯬ ᯉᯉᯪ᯲ᯉ ᯉᯔ᯲ᯅᯬᯒᯮ ᯉᯪ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯰᯬ ᯘᯩᯒᯩ

Ndang olo ahu ba inang. Na paleahon ahu do huhilala, molo
disuru ahu tinggal di huta. 

ᯉ᯲ᯑᯰ ᯀᯬᯞᯬ ᯀᯂᯮ ᯅ ᯤᯉᯰ ᯉ ᯇᯞᯩᯀᯂᯉᯬ᯲ ᯀᯂᯮ ᯑᯬ ᯂᯮᯂᯪᯞᯞ ᯔᯬᯞᯬ ᯑᯪᯘᯮᯒᯮ ᯀᯂᯮ ᯖᯰᯪᯎᯞ᯲ ᯑᯪ ᯂᯮᯖ

Malo lahi-lahi daba inang, ingkon dohot do tu partongtangan. ᯔᯬᯞᯬ ᯞᯂᯪᯞᯂᯪ ᯑᯅ ᯤᯉᯰ ᯀᯰᯪᯄ᯦ᯉᯬ᯲ ᯑᯬᯂᯖᯬ᯲ ᯑᯬ ᯖᯮ ᯇᯒ᯲ᯖᯰᯬᯖᯝᯉ᯲

Dung i dainang tinggal do di hutanami.

 ᯑᯮᯰ ᯤ ᯑᯤᯉᯰ ᯖᯰᯪᯎᯞ᯲ ᯑᯬ ᯑᯪ ᯂᯮᯖᯉᯔᯪ

Beha ma nuaeng dibahen Raja Parbaliung tu dainang? ninna si Aji Panungkunan.

 ᯅᯩᯂ ᯔ ᯉᯮᯀᯀᯰᯩ ᯑᯪᯅᯂᯉᯩ᯲ ᯒᯐ ᯇᯒ᯲ᯅᯞᯪᯀᯮᯰ ᯖᯮ ᯑᯤᯉᯰ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲

Nunga dibege ho maen Tapi Marhillong Sere! Sintong do na
hudok i! ninna namboruna i.

 ᯉᯮᯝ ᯑᯪᯅᯩᯎᯩ ᯂᯬ ᯔᯀᯉᯩ᯲ ᯖᯇᯪ ᯔᯒ᯲ᯂᯞᯪ᯲ᯞᯰᯬ ᯘᯩᯒᯩ ᯘᯉᯪᯔᯖᯯᯬ ᯑᯬ ᯉ ᯂᯮᯑᯄᯬ᯲ ᯤ ᯉᯉᯪ᯲ᯉ ᯉᯔ᯲ᯅᯬᯒᯮᯉ ᯤ

"Olo ba namboru, laho ma ahu!" ninna si Tapi Marhillong Sere;. ᯀᯬᯞᯬ ᯉ ᯉᯔ᯲ᯅᯬᯒᯮ ᯞᯂᯬ ᯔ ᯀᯂᯮ ᯉᯉᯪ᯲ᯉ ᯘᯪ 

Laos mijur ma ibana tu toru, maila ibana antong atik diboto halak na pajumpang nasida na dua di jabu i.

ᯞᯀᯘᯬ᯲ ᯔᯪᯐᯒᯮ᯲ ᯔ ᯤᯅᯉ ᯖᯮ ᯖᯬᯒᯮ ᯔᯤᯞ ᯤᯅᯉ ᯀᯉᯖᯰᯬ ᯀᯖᯄ᯦ᯪ᯲ ᯑᯪᯅᯬᯖᯬ ᯂᯞᯄ᯦᯲ ᯉ ᯇᯐᯔᯮ᯲ᯇᯰ ᯉᯘᯪᯑ ᯉ ᯑᯮᯀ ᯑᯪ ᯤᯅᯮ ᯤ

Dung laho si Tapi Marhillong Sere, didok namboruna i ma tu si Aji Panungkunan, 

ᯑᯮᯰ ᯞᯂᯬ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯰᯬ ᯘᯩᯒᯩ ᯑᯪᯑᯂᯬ᯲ ᯉᯔ᯲ᯅᯬᯒᯮᯉ ᯤ ᯔ ᯖᯮ ᯘᯪ ᯀᯝᯪ ᯇᯉᯮᯰᯄ᯦ᯮᯉᯉ᯲

Jalo ma napuran na niatupan ni si Tapi Marhillong Sere on, ale amang Aji Panungkunan. 

ᯐᯞᯬ ᯔ ᯉᯇᯮᯒᯉ᯲ ᯉ ᯉᯪᯀᯖᯮᯇᯉᯮ᯲ ᯉᯪ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯰᯬ ᯘᯩᯒᯩ ᯀᯉᯬ᯲ ᯀᯞᯩ ᯀᯔᯰ ᯀᯐᯪ ᯇᯉᯮᯰᯄ᯦ᯮᯉᯉ᯲

Pir ma tondim, horas-horas ma ho di dalan dohot mulak tu huta on!"

ᯇᯒᯪ᯲ ᯔ ᯖᯉᯬ᯲ᯑᯔᯪ᯲ ᯂᯬᯒᯘ᯲ᯂᯬᯒᯘ᯲ ᯔ ᯂᯬ ᯑᯪ ᯑᯞᯉ᯲ ᯑᯬᯂᯖᯬ᯲ ᯔᯮᯞᯄᯱ᯲ ᯖᯮ ᯂᯮᯖ ᯀᯉᯬ᯲

"Olo ba inang, alai holan hita ma na umboto on!" ninna si Aji
Panungkunan. Dung i laho ma ibana mijur tu toru.

ᯀᯬᯞᯬ ᯅ ᯤᯉᯰ  ᯀᯞᯤ ᯂᯬᯞᯉ᯲ ᯂᯪᯖ ᯔ ᯉ ᯀᯔᯮ᯲ᯅᯬᯖᯬ ᯀᯉᯬ᯲ ! ᯉᯉᯪ᯲ᯉ ᯘᯪ ᯀᯐᯪ ᯇᯉᯰᯄᯱᯮᯉᯉ᯲. ᯑᯰᯮ ᯤ ᯞᯂᯬ ᯔ ᯤᯅᯉ ᯔᯪᯐᯒᯮ᯲ ᯖᯮ ᯖᯬᯒᯮ