ᯖᯮᯒᯪᯖᯮᯪᯀᯉ᯲ ᯉᯪ ᯘᯪ ᯀᯐᯪ ᯇᯉᯰᯮᯄ᯦ᯮᯉᯉ᯲ Turi-turian ni si Aji Panungkunan Turpuk Patoluhon (Pangke Android)

Pitu ari dung na masuak i dangka ni hariara i, marsahit ma boru hasian ni Raja Sohuturon Dolok, na margoar Si Tapi Marhillong Sere.

ᯇᯪᯖᯮ ᯀᯒᯪ ᯑᯮᯰ ᯉ ᯔᯘᯮᯀᯂ᯲ ᯤ ᯑᯰᯂ ᯉᯪ ᯂᯒᯪᯀᯒ ᯤ ᯔᯒ᯲ᯘᯂᯖᯪ᯲ ᯔ ᯅᯬᯒᯮ ᯂᯘᯪᯀᯉ᯲ ᯉᯪ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯉ ᯔᯒ᯲ᯎᯬᯀᯒ᯲ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯬᯰ ᯘᯩᯒᯩ

Sai marsak ma raja i dohot pardihutana.

ᯘᯤ ᯔᯒ᯲ᯘᯂ᯲ ᯔ ᯒᯐ ᯤ ᯑᯬᯂᯖᯬ᯲ ᯇᯒ᯲ᯑᯪᯂᯮᯖᯉ

Nunga tung torop nian naung mangubati, alai laos so ra malum do.

ᯉᯮᯝ ᯖᯮᯰ ᯖᯬᯒᯇᯬ᯲ ᯉᯪᯁᯉ᯲ ᯉᯀᯮᯰ ᯔᯝᯮᯅᯖᯪ ᯀᯞᯤ ᯞᯀᯘᯬ᯲ ᯘᯬ ᯒ ᯔᯞᯔᯮ᯲ ᯑᯬ

Nunga lam marniang antong si Tapi Marhillong Sere; nunga lam gale ibana.

ᯉᯮᯝ ᯞᯔ᯲ ᯔᯒ᯲ᯉᯪᯀᯰ ᯀᯉ᯲ᯖᯬᯰ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯬᯰ ᯘᯩᯒᯩ ᯉᯮᯝ ᯞᯔ᯲ ᯎᯞᯩ ᯤᯅᯉ

Dung i didok pardihuta ni raja i ma, 

ᯑᯮᯰ ᯤ ᯑᯪᯑᯂᯬ᯲ ᯇᯒ᯲ᯑᯪᯂᯮᯖ ᯉᯪ ᯒᯐ ᯤ ᯔ

Beha nama sahit ni borunta on, ale anak ni namboru, sai lam gale do huida ibana!

ᯅᯩᯂ ᯉᯔ ᯘᯂᯖᯪ᯲ ᯉᯪ ᯅᯬᯒᯉᯮ᯲ᯖ ᯀᯉᯬ᯲ ᯀᯞᯩ ᯀᯉᯂ᯲ ᯉᯪ ᯉᯔ᯲ᯅᯬᯒᯮ ᯘᯤ ᯞᯔ᯲ ᯎᯞᯩ ᯑᯬ ᯂᯮᯤᯑ ᯤᯅᯉ

Olo da boru ni datulang! Alai dang adong dope nipingku na
mandok, na so bolas malum sahit ni si Tapi Marhillong Sere on.

ᯀᯬᯞᯬ ᯑ ᯅᯬᯒᯮ ᯉᯪ ᯑᯖᯮᯞᯰ ᯀᯞᯤ ᯑᯰ ᯀᯑᯬᯰ ᯑᯬᯇᯩ ᯉᯪᯇᯪᯰᯂᯮ ᯉ ᯔᯉ᯲ᯑᯂᯬ᯲ ᯉ ᯘᯬ ᯅᯬᯞᯘ᯲ ᯔᯞᯔᯮ᯲ ᯘᯂᯖᯪ᯲ ᯉᯪ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯬᯰ ᯘᯩᯒᯩ ᯀᯉᯬ᯲

Hujou nama jolo Datu Pamurnas na sian huta Dolok Pargarutan.

ᯂᯮᯐᯬᯥ ᯉᯔ ᯐᯬᯞᯬ ᯑᯖᯮ ᯇᯔᯒᯮ᯲ᯉᯘ᯲ ᯉ ᯘᯪᯀᯉ᯲ ᯂᯮᯖ ᯑᯬᯞᯂᯬ᯲ ᯇᯒ᯲ᯎᯒᯮᯖᯉ᯲

dang sai hatingkian, atik tung ubatna i pinaima ni siboru hasian on, ninna raja i.
ᯑᯰ ᯘᯤ ᯂᯖᯪᯰᯂᯪᯀᯉ᯲ ᯀᯖᯂᯪ᯲ ᯖᯮᯰ ᯥᯅᯖ᯲ᯉ ᯤ ᯇᯪᯉᯤᯔ ᯉᯪ ᯘᯪᯅᯬᯒᯮ ᯂᯘᯪᯀᯉ᯲ ᯀᯉᯬ᯲ ᯉᯉᯪ᯲ᯉ ᯒᯐ ᯤ

Dung i borhat ma suruan ni Raja Sohuturon Dolok tu huta Dolok Pargarutan, laho mangalap Datu Pamumas.

ᯑᯮᯰ ᯤ ᯅᯒᯬ᯲ᯂᯖ᯲ ᯔ ᯘᯮᯒᯮᯀᯉ᯲ ᯉᯪ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯪ᯲ ᯖᯮ ᯂᯮᯖ ᯑᯬᯞᯂᯬ᯲ ᯇᯒ᯲ᯎᯒᯮᯖᯉ᯲ ᯞᯂᯬ ᯔᯝᯞᯇ᯲ ᯑᯖᯮ ᯇᯔᯒᯮ᯲ᯉᯘ᯲

Sahat ma nasida tutu tu huta ni datu i, jadi disungkun Datu Pamurnas ma suruan ni raja i, 

ᯘᯂᯖ᯲ ᯔ ᯉᯘᯪᯑ ᯖᯮᯖᯮ ᯖᯮ ᯂᯮᯖ ᯉᯪ ᯑᯖᯮ ᯤ ᯐᯑᯪ ᯑᯪᯘᯮᯰᯂᯉᯮ᯲ ᯑᯖᯮ ᯇᯔᯒ᯲ᯉᯘ᯲ ᯔ ᯘᯮᯒᯮᯀᯉ᯲ ᯉᯪ ᯒᯐ ᯤ

Dia ma ale amang, umbahen na ro hamu tu hutanami on?

ᯑᯪᯀ ᯔ ᯀᯞᯩ ᯀᯔᯰ ᯀᯔᯮ᯲ᯅᯂᯉᯩ᯲ ᯉ ᯒᯬ ᯂᯔᯮ ᯖᯮ ᯂᯮᯖᯉᯔᯪ ᯀᯉᯬ᯲

Olo da datunami, na mangalap ho ma hami antong.

ᯀᯬᯞᯬ ᯑ ᯑᯖᯮᯉᯔᯪ ᯉ ᯔᯝᯞᯇ᯲ ᯂᯬ ᯔ ᯂᯔᯪ ᯀᯉ᯲ᯖᯬᯰ

Ai marsahit boru ni raja i, Raja Sohuturon Dolok na di huta Lobu Namaduma.

ᯀᯤ ᯔᯒ᯲ᯘᯂᯖᯪ᯲ ᯅᯬᯒᯮ ᯉᯪ ᯒᯐ ᯤ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯉ ᯑᯪ ᯂᯮᯖ ᯞᯬᯅᯮ ᯉᯔᯑᯮᯔ

Nunga nian sai diubati na mangubati, alai ndang ra malum .

ᯉᯮᯝ ᯉᯪᯀᯉ᯲ ᯘᯤ ᯑᯪᯥᯅᯖᯪ ᯉ ᯔᯝᯮᯅᯖᯪ ᯀᯞᯤ ᯑᯰ ᯒ ᯔᯞᯔᯮ᯲

 Jadi didok raja i ma, atik na ubat na binahenmu dona pinaima ni Si Tapi Marhillong Sere.

ᯐᯑᯪ ᯑᯪᯑᯂᯬ᯲ ᯎᯒᯐ ᯤ ᯔ ᯀᯖᯂᯪ᯲ ᯉ ᯥᯅᯖ᯲ ᯉ ᯅᯪᯉᯂᯉᯩ᯲ᯔᯮ ᯑᯬ ᯉ ᯇᯪᯉᯤᯔ ᯉᯪ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯬᯰ ᯘᯩᯒᯩ

I ma umbahen na disuru raja i hami mangalap ho, ale datunami! ninna suruan ni Raja Sohuturon Dolok i.

ᯤ ᯔ ᯀᯔᯮ᯲ᯅᯂᯉᯩ᯲ ᯉ ᯑᯪᯘᯮᯒᯮ ᯒᯐ ᯤ ᯂᯔᯪ ᯔᯝᯞᯇ᯲ ᯂᯬ ᯀᯞᯩ ᯑᯖᯮᯉᯔᯪ ᯉᯉᯪ᯲ᯉ ᯘᯮᯒᯮᯀᯉ᯲ ᯉᯪ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯤ

Ba molo songon i do hape, ba na uli ma i!

ᯅ ᯔᯬᯞᯬ ᯘᯬᯝᯉᯬ᯲ ᯤ ᯑᯬ ᯂᯇᯩ ᯅ  ᯦ᯉ ᯤᯞᯪ ᯔ ᯤ

Marsogot ma hita borhat, di tiur ni ari! ninna datu i mangalusi.

ᯔᯒ᯲ᯘᯬᯎᯖᯬ᯲ ᯔ ᯂᯪᯖ ᯅᯒᯬ᯲ᯂᯖ᯲ ᯑᯪ ᯖᯪᯀᯒᯮ᯲ ᯉᯪ ᯀᯒᯪ ᯉᯉᯪ᯲ᯉ ᯝᯖᯮ ᯤ ᯔᯝᯞᯮᯘᯪ

Marsogotna i dung sun nasida mangan, borhat ma nasida laho tu Lobu Namaduma.

ᯔᯒ᯲ᯘᯬᯎᯖᯬ᯲ᯉ ᯤ ᯑᯮᯰ ᯘᯉᯮ᯲ ᯉᯘᯪᯝ ᯔᯝᯉ᯲ ᯅᯒ᯲ᯂᯖ᯲ ᯔ ᯉᯘᯪᯑ ᯞᯂᯬ ᯖᯮ ᯞᯬᯅᯮ ᯉᯔᯑᯮᯔ

Diboan Datu Pamurnas ma si Aji Panungkunan mandongani ibana.

ᯑᯪᯅᯬᯀᯉ᯲ ᯑᯖᯮ ᯇᯔᯒᯮ᯲ᯉᯘ᯲ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯔᯉ᯲ᯑᯬᯝᯉᯪ ᯤᯅᯉ

Leleng do nasida na mardalan i, dung i sahat ma nasida tutu tu huta i.

ᯞᯩᯞᯩᯰ ᯑᯬ ᯉᯘᯪᯑ ᯉ ᯔᯒ᯲ᯑᯞᯉ᯲ ᯤ ᯦᯦ᯑᯮᯰ ᯤ ᯘᯂᯖ᯲ ᯔ ᯉᯘᯪᯑ ᯖᯮᯖᯮ ᯖᯮ ᯂᯮᯖ ᯤ

Dung i dijou Raja Sohuturon Dolok ma datu i, asa masuk tu bagas.

ᯑᯮᯰ ᯤ ᯑᯪᯐᯬᯥ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯔ ᯑᯖᯮ ᯤ ᯀᯘ ᯔᯘᯂᯮ᯲ ᯖᯮ ᯅᯎᯘ᯲

Jadi disungkun Datu Pamurnas ma, "Dia ma ale rajanami, umbahen na disuru ho mangalap ahu tu hutanami?

ᯐᯑᯪ ᯑᯪᯘᯮᯰᯂᯉᯮ᯲ ᯑᯖᯮ ᯇᯔᯒᯮ᯲ᯉᯘ᯲ ᯔ ᯑᯪᯀ ᯔ ᯀᯞᯩ ᯒᯐᯉᯔᯪ ᯀᯔᯮ᯲ᯅᯂᯉᯩ᯲ ᯉ ᯑᯪᯘᯮᯒᯮ ᯂᯬ ᯔᯝᯞᯇ᯲ ᯀᯂᯮ ᯖᯮ ᯂᯮᯖᯉᯔᯪ

Olo tutu datunami, Datu Pamurnas! Na sai marsahit do borunami Si Tapi Marhillong Sere, nunga pola songon i leleng!

ᯀᯬᯞᯬ ᯖᯮᯖᯮ ᯑᯖᯮᯉᯔᯪ ᯑᯖᯮ ᯇᯔᯒᯮ᯲ᯉᯘ᯲ ᯉ ᯘᯤ ᯔᯒ᯲ᯘᯂᯖᯪ᯲ ᯑᯬ ᯅᯬᯒᯮ ᯉᯔᯪ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯬᯰ ᯘᯩᯒᯩ ᯉᯮᯝ ᯇᯬᯞ ᯘᯬᯝᯉᯬ᯲ ᯤ ᯞᯩᯞᯩ᯦

Ba nunga nian torop na mangubati, hape laos so ra malum.

ᯅ ᯉᯮᯝ ᯉᯪᯀᯉ᯲ ᯖᯬᯒᯇᯬ᯲ ᯉ ᯔᯝᯮᯅᯖᯪ ᯂᯇᯩ ᯞᯀᯘᯬ᯲ ᯘᯬ ᯒ ᯔᯞᯔᯮ᯲

Atik na ho do datunami pinaima ni borungkon, atik na ubatmu do na mangasi.

ᯀᯖᯂᯪ᯲ ᯉ ᯂᯬ ᯑᯬ ᯑᯖᯮᯉᯔᯪ ᯇᯪᯉᯤᯔ ᯉᯪ ᯅᯬᯒᯮᯰᯂᯉᯬ᯲ ᯀᯖᯂᯪ᯲ ᯉ ᯥᯅᯖ᯲ᯔᯮ ᯑᯬ ᯉ ᯔᯝᯘᯪ

I ma da alana, umbahen na husuru mangalap ho tu hutamuna! ninna Raja Sohuturon Dolok.

ᯤ ᯔ ᯑ ᯀᯞᯉ ᯀᯔᯮ᯲ᯅᯂᯉᯩ᯲ ᯉ ᯂᯮᯘᯮᯒᯮ ᯔᯝᯞᯇ᯲ ᯂᯬ ᯖᯮ ᯂᯮᯖᯔᯮᯉ ᯉᯉᯪ᯲ᯉ ᯒᯐ ᯘᯬ ᯂᯮᯖᯮᯒᯉᯬ᯲ ᯑᯬᯞᯂᯬ᯲

Na uli ma i tutu rajanami! Sai malum ma; alai ala nunga potang ari, marsogot ma tapulung ubatna di tiur ni ari! ninna Datu Pamurnas.

ᯉ ᯥᯞᯪ ᯔ ᯤ ᯖᯮᯖᯮ ᯒᯐᯉᯔᯪ ᯘᯤ ᯔᯞᯔᯮ ᯔ ᯀᯞᯤ ᯀᯞ ᯉᯮᯝ ᯇᯬᯖᯰ ᯀᯒᯪ ᯔᯒ᯲ᯘᯬᯎᯖᯬ᯲ ᯔ ᯖᯇᯮᯞᯮᯰ ᯥᯅᯖ᯲ᯉ ᯑᯪ ᯖᯪᯀᯒᯮ᯲ ᯉᯪ ᯀᯒᯪ ᯉᯉᯪ᯲ᯉ ᯑᯖᯮ ᯇᯔᯒᯮ᯲ᯉᯘ᯲

Manogotna i dung torang ari, dung sun ma sude halak mangan, didokkon datu i ma mamulung ramuan ni ubat i.

ᯔᯉᯬᯎᯖᯬ᯲ᯉ ᯤ ᯑᯮᯰ ᯖᯬᯒᯰ ᯀᯒᯪ ᯑᯮᯰ ᯘᯉᯮ᯲ ᯔ ᯘᯮᯑᯩ ᯂᯞᯂ᯲ ᯔᯝᯉ᯲ ᯑᯪᯑᯂᯬ᯲ᯂᯉᯬ᯲ ᯑᯖᯮ ᯤ ᯔ ᯔᯔᯮᯞᯮᯰ ᯒᯔᯮᯀᯉ᯲ ᯉᯪ ᯥᯅᯖ᯲

On ma pulunganna i: pitu pohul tano sian pitu dolok-dolok, 

ᯀᯉᯬ᯲ ᯔ ᯇᯮᯞᯮᯝᯉ᯲ᯉ ᯤ ᯇᯪᯖᯮ ᯇᯬᯂᯞᯮ᯲ ᯖᯉᯬ ᯘᯪᯀᯉ᯲ ᯇᯪᯖᯮ ᯑᯬᯞᯂᯬ᯲ᯑᯬᯞᯂᯬ᯲ 

pitu unte pangir sian pitu hambona; 

ᯇᯪᯖᯮ ᯀᯉᯮ᯲ᯖᯩ ᯇᯝᯒᯪ᯲ ᯘᯪᯀᯉ᯲ ᯇᯪᯖᯮ ᯂᯔ᯲ᯅᯬᯉ

pitu tahu aek sian pitu pansur, 

ᯇᯪᯖᯮ ᯖᯂᯮ ᯁᯀᯂᯩ᯲ ᯘᯪᯀᯉ᯲ ᯇᯪᯖᯮ ᯇᯉ᯲ᯘᯒᯮ᯲

pitu mansam bunga-bunga, 

ᯇᯪᯖᯮ ᯔᯉ᯲ᯘᯔ᯲ ᯅᯮᯝᯅᯮᯝ

pitu mansam bulung ni unte, 

ᯇᯪᯖᯮ ᯔᯉ᯲ᯘᯔ᯲ ᯅᯮᯇᯮᯰ ᯉᯪ ᯀᯉᯮ᯲ᯖᯩ

pitu tumbur ni tolong sian pitu rura-rura.

ᯇᯪᯖᯮ ᯖᯔᯮ᯲ᯅᯒᯮ᯲ ᯉᯪ ᯖᯬᯞᯬᯰ ᯘᯪᯀᯉ᯲ ᯇᯪᯖᯮ ᯒᯮᯒᯒᯮᯒ

Dung singkop ma sude disi, dipatupa Datu Pamurnas ma ubat i.
ᯑᯮᯰ ᯘᯪᯰᯂᯇᯬ᯲ ᯔ ᯘᯮᯑᯩ ᯑᯪᯘᯪ ᯑᯪᯇᯖᯮᯇ ᯑᯖᯮ ᯇᯔᯒᯮ᯲ᯉᯘ᯲ ᯔ ᯥᯅᯖ᯲ ᯤ

Dibahen ma tano na pitu pohul i, i ma na sian pitu dolok-dolok tu pat ni si Tapi Marhillong Sere .

ᯑᯪᯅᯂᯉᯩ᯲ ᯔ ᯖᯉᯬ ᯉ ᯇᯪᯖᯮ ᯇᯬᯂᯞᯮ᯲ ᯤ ᯤ ᯔ ᯉ ᯘᯪᯀᯉ᯲ ᯇᯪᯖᯮ ᯑᯬᯞᯂᯬ᯲ᯑᯬᯞᯂᯬ᯲ ᯖᯮ ᯇᯖ᯲ ᯉᯪ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯬᯰ ᯘᯩᯒᯩ

Dung i dipispishon ma ramuan na asing i humaliang podomanna, dipispishon ma dohot tu simanjujungna.

ᯑᯮᯰ ᯤ ᯑᯪᯇᯘᯪ᯲ᯇᯘᯪ᯲ᯂᯉᯬ᯲ ᯔ ᯒᯔᯮᯀᯉ᯲ ᯉ ᯀᯘᯪᯰ ᯤ ᯂᯮᯔᯞᯪᯀᯰ ᯇᯬᯑᯬᯔᯉ᯲ᯉ ᯑᯪᯇᯘᯪ᯲ᯇᯘᯪ᯲ᯂᯉᯬ᯲ ᯔ ᯑᯬᯂᯖᯬ᯲ ᯖᯮ ᯘᯪᯔᯉ᯲ᯐᯮᯐᯮᯰᯉ

Jala humaliang simanjujungna dipeakkon ma unte pangir na pitu i.

ᯎᯞ ᯂᯮᯔᯞᯪᯀᯰ ᯘᯪᯔᯉ᯲ᯐᯮᯐᯮᯰᯉ ᯑᯪᯇᯩᯀᯂ᯲ᯂᯉᯬ᯲ ᯔ ᯀᯉᯮ᯲ᯖᯩ ᯇᯝᯒᯪ᯲ 
Dung potang ari dipangido datu i ma sada ulos sibolang, sada podang, sada sangkalan dohot sada unte pangir.

ᯑᯮᯰ ᯇᯬᯖᯰ ᯀᯒᯪ ᯑᯪᯇᯝᯪᯑᯬ ᯑᯖᯮ ᯤ ᯔ ᯘᯑ ᯥᯞᯘᯬ᯲ ᯘᯪᯅᯬᯞᯰ ᯘᯑ ᯇᯪᯑᯰ ᯘᯑ ᯘᯰᯂᯞᯉ᯲ ᯑᯪᯂᯖᯬ᯲ ᯘᯑ ᯀᯉᯮ᯲ᯖᯩ ᯇᯝᯒᯪ᯲

Dihadang ma ulos sibolang i; dung i dipeakkon ma unte pangir i tu ginjang ni sangkalan i.

ᯑᯪᯂᯑᯰ ᯔ ᯥᯞᯘᯬ᯲ ᯘᯪᯅᯬᯞᯰ ᯤ ᯑᯮᯰ ᯤ ᯑᯪᯇᯩᯀᯂ᯲ᯂᯉᯬ᯲ ᯔ ᯀᯉᯮ᯲ᯖᯩ ᯇᯝᯒᯪ᯲ ᯤ ᯖᯮ ᯎᯉᯪ᯲ᯐᯰ ᯉᯪ ᯘᯰᯂᯞᯉ᯲ ᯤ

Dung i ditiop ma podang i, jala didok ma, Lotahonghu ma unte pangir on, ale rajanami, dohot tanggurung ni podang on.

ᯑᯮᯰ ᯤ ᯑᯪᯖᯪᯀᯇᯬ᯲ ᯔ ᯇᯬᯑᯰ ᯤ ᯐᯞ ᯑᯪᯑᯂᯬ᯲ᯔ ᯞᯬᯖᯂᯉᯬ᯲ᯂᯮ ᯔ ᯀᯉᯮ᯲ᯖᯩ ᯇᯝᯒᯪ᯲ ᯀᯉᯬ᯲ ᯀᯞᯩ ᯒᯐᯉᯔᯪ ᯑᯬᯂᯖᯬ᯲ ᯖᯰᯎᯮᯒᯮᯰ ᯉᯪ ᯇᯬᯑᯰ ᯀᯉᯬ᯲

Manimbung ma annon unte pangir on dompak hambirang manang dompak siamun.

ᯔᯉᯔᯪ᯲ᯅᯮᯰ ᯔ ᯀᯉ᯲ᯉᯉᯬ᯲ ᯀᯉᯮ᯲ᯖᯩ ᯇᯝᯒᯪ᯲ ᯀᯉᯬ᯲ ᯑᯔᯬ᯲ᯇᯂ᯲ ᯂᯔ᯲ᯅᯪᯒᯰ ᯔᯉᯰ ᯑᯔᯬ᯲ᯇᯂ᯲  ᯘᯪᯀᯔᯉᯮ᯲

Ba i ma annon na paboahon taringot tu parmalum ni sahit ni boru ni raja i!

ᯅ ᯤ ᯔ ᯀᯉ᯲ᯉᯉᯬ᯲ ᯉ ᯇᯅᯬᯀᯂᯉᯬ᯲ ᯖᯒᯪᯝᯖᯬ᯲ ᯖᯮ ᯇᯒ᯲ᯔᯞᯔᯮ᯲ ᯉᯪ ᯘᯂᯖᯪ᯲ ᯉᯪ ᯅᯬᯒᯮ ᯉᯪ ᯒᯐ ᯤ

Dung i didok ma muse tu angka na hundul disi: 

ᯑᯮᯰ ᯤ ᯑᯪᯑᯂᯬ᯲ ᯔ ᯔᯮᯘᯩ ᯖᯮ ᯀᯰᯂ ᯉ ᯂᯉᯮ᯲ᯑᯞᯮ᯲ ᯑᯪᯘᯪ

Intopi hamu be ma jolo angka sulumuna i; annon pe pagalak hamu tu tataring i, dung hulotak unte pangir on!

ᯀᯉᯪ᯲ᯖᯬᯇᯪ ᯂᯔᯮ ᯅᯩ ᯔ ᯐᯬᯞᯬ ᯀᯰᯂ ᯘᯮᯞᯮᯔᯮᯉ ᯤ ᯀᯉ᯲ᯉᯉᯬ᯲ ᯇᯩ ᯇᯎᯞᯂ᯲ ᯂᯔᯮ ᯖᯮ ᯖᯖᯒᯪᯰ ᯤ ᯑᯮᯰ ᯂᯮᯞᯬᯖᯂ᯲ ᯀᯉᯮ᯲ᯖᯩ ᯇᯝᯒᯪ᯲ ᯀᯉᯬ᯲

Nunga holom di bagas i; holan api na di tataring i nama na patiurhon; mangkuling silonging ma tutu.

ᯉᯮᯑ ᯂᯬᯞᯔᯬ᯲ ᯑᯪ ᯅᯎᯘ᯲ ᯤ ᯂᯬᯞᯉ᯲ ᯀᯇᯪ ᯉ ᯑᯪ ᯖᯖᯒᯪᯰ ᯤ ᯉᯔ ᯉ ᯇᯖᯪᯀᯒᯮ᯲ᯂᯉᯬ᯲ ᯔᯰᯂᯮᯞᯪᯰ ᯘᯪᯞᯬᯝᯪᯰ ᯔ ᯖᯮᯖᯮ

Dung i tarbege ma soara ni datu i manghatahon nanget-nanget tabasna; 

ᯑᯮᯰ ᯤ ᯖᯒ᯲ᯅᯩᯎᯩ ᯔ ᯘᯬᯀᯒ ᯉᯪ ᯑᯖᯮ ᯤ ᯔᯰᯂᯖᯂᯉᯬ᯲ ᯉᯝᯖᯩ᯲ᯉᯝᯖᯩ᯲ ᯖᯅᯘ᯲ᯉ

tompu ma muse tarbege parlatak ni podang ma mangalotak unte pangir i.

ᯖᯔᯬ᯲ᯇᯮ ᯔ ᯔᯮᯘᯩ ᯖᯒ᯲ᯅᯩᯎᯩ ᯇᯒ᯲ᯞᯖᯂ᯲ ᯉᯪ ᯇᯬᯑᯰ ᯉ ᯔᯝᯞᯬᯖᯂ᯲ ᯀᯉᯮ᯲ᯖᯩ ᯇᯝᯒᯪ᯲ ᯤ

Pagalak sulumuna tu tataring i, asa taida manang dompak dia do mangangkat unte pangir i!" ninna datu i.
ᯇᯎᯞᯂ᯲ ᯘᯮᯞᯮᯔᯮᯉ ᯖᯮ ᯖᯖᯒᯪᯰ ᯤ ᯀᯘ ᯖᯤᯑ ᯔᯉᯰ ᯑᯔᯬ᯲ᯇᯂ᯲ ᯑᯪᯀ ᯑᯬ ᯔᯝᯰᯂᯖ᯲ ᯀᯉᯮ᯲ᯖᯩ ᯇᯑᯒᯪ᯲ ᯤ ᯉᯉᯪ᯲ᯉ ᯑᯖᯮ ᯤ

Dung i masipagalak suluna be ma nasida, tiur ma tutu.

ᯑᯮᯰ ᯤ ᯔᯘᯪᯇᯎᯞᯂ᯲ ᯘᯮᯞᯮᯉ ᯅᯩ ᯔ ᯉᯘᯪᯑ ᯖᯪᯀᯒᯮ᯲ ᯔ ᯖᯮᯖᯮ

Dompak dia do mangangkat unte pangir i datunami? ninna Raja Sohuturon Dolok manungkun.

ᯑᯔᯬ᯲ᯇᯂ᯲ ᯑᯪᯀ ᯑᯬ ᯔᯝᯰᯂᯖ᯲ ᯀᯉᯮ᯲ᯖᯩ ᯇᯝᯒᯪ᯲ ᯤ ᯑᯖᯮᯉᯔᯪ ᯉᯉᯪ᯲ᯉ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯔᯉᯮᯰᯂᯉᯮ᯲

Ndang huida dope rajanami!" ninna datu i mangalusi.

ᯑᯰ ᯂᯮᯤᯑ ᯑᯬᯇᯩ ᯒᯐᯉᯔᯪ ᯉᯉᯪ᯲ᯉ ᯑᯖᯮ ᯤ ᯔᯝᯞᯮᯘᯪ

Dung i sude ma nasida tutu mangalului; sitiop suluna be ma.

ᯑᯮᯰ ᯤ ᯘᯮᯑᯩ ᯔ ᯉᯘᯪᯑ ᯖᯮᯖᯮ ᯔᯝᯞᯮᯞᯮᯤ ᯘᯪᯖᯪᯀᯇᯬ᯲ ᯘᯮᯞᯮᯉ ᯅᯩ ᯔ

Dapot ma tutu dingkan hambirang ni datu i.

ᯑᯇᯖᯬ᯲ ᯔ ᯖᯮᯖᯮ ᯑᯪᯰᯂᯉ᯲ ᯂᯔ᯲ᯅᯪᯒᯰ ᯉᯪ ᯑᯖᯮ ᯤ

Sai dihirim Raja Sohuturon Dolok do, anggiat dompak siamun nian madabu unte pangir na pinasak ni datu i dohot podangna, hape tu hambirang do madabu.

ᯘᯤ ᯑᯪᯂᯪᯒᯔᯪ᯲ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯑᯬ ᯀᯰᯎᯪᯀᯖ᯲ ᯑᯔᯬ᯲ᯇᯂ᯲ ᯘᯪᯀᯔᯉᯮ᯲ ᯉᯪᯀᯉ᯲ ᯔᯑᯅᯮ ᯀᯉᯮ᯲ᯖᯩ ᯇᯝᯒᯪ᯲ ᯉ ᯇᯪᯉᯘᯂ᯲ ᯉᯪ ᯑᯖᯮ ᯤ ᯑᯬᯂᯖᯬ᯲ ᯇᯬᯑᯰᯉ ᯂᯇᯩ ᯖᯮ ᯂᯔ᯲ᯅᯪᯒᯰ ᯑᯬ ᯔᯑᯅᯮ

Marsak ma roha ni raja i, jadi disungkun ma datu i, didok ma,

ᯔᯒ᯲ᯘᯂ᯲ ᯔ ᯒᯬᯂ ᯉᯪ ᯒᯐ ᯤ ᯐᯑᯪ ᯑᯪᯘᯮᯰᯂᯉᯮ᯲ ᯔ ᯑᯖᯮ ᯤ ᯑᯪᯑᯂᯬ᯲ ᯔ

Beha do amang datunami. Aha do lapatan ni unte pangir na sampat tu hambirang i?

ᯅᯩᯂ ᯑᯬ ᯀᯔᯰ ᯑᯖᯮᯉᯔᯪ ᯀᯂ ᯑᯬ ᯞᯇᯖᯉ᯲ ᯉᯪ ᯀᯉᯮ᯲ᯖᯩ ᯇᯝᯒᯪ᯲ ᯉ ᯘᯔ᯲ᯇᯖ᯲ ᯖᯮ ᯂᯔ᯲ᯅᯪᯒᯰ ᯤ

Ndang pola dia i da rajanami! Ubat do na mangubati, tabas dona manabasi! ninna Datu Pamumas mangalusi.

ᯑᯰ ᯇᯬᯞ ᯑᯪᯀ ᯤ ᯑ ᯒᯐᯉᯔᯪ ᯥᯅᯖ᯲ᯑᯬ ᯉ ᯔᯝᯮᯅᯖᯪ ᯖᯅᯘ᯲ ᯑᯬ ᯉ ᯔᯉᯅᯘᯪ ᯉᯉᯪ᯲ᯉ ᯑᯖᯮ ᯇᯔᯒᯮ᯲ᯉᯘ᯲ ᯔᯝᯞᯮᯘᯪ

Olo ma tutu amang datunami, sintong do na nidokmi, ubat do tutu na mangubati, tabas do na manabasi.

ᯀᯬᯞᯬ ᯔ ᯖᯮᯖᯮ ᯀᯔᯰ ᯑᯖᯮᯉᯔᯪ ᯘᯉᯪ᯲ᯖᯬᯰ ᯑᯬ ᯉ ᯉᯪᯑᯂᯬ᯲ᯔᯪ ᯦᯦ᯥᯅᯖ᯲ ᯑᯬ ᯖᯮᯖᯮ ᯉ ᯔᯝᯮᯅᯖᯪ ᯖᯅᯘ᯲ ᯑᯬ ᯉ ᯔᯉᯅᯘᯪ

Alai so datung adong nidok ni pardabu ni unte pangir na dompak hambirang i? ninna Raja Sohuturon Dolok.

ᯀᯞᯤ ᯘᯬ ᯑᯖᯮᯰ ᯀᯑᯬᯰ ᯉᯪᯑᯂᯬ᯲ ᯉᯪ ᯇᯒ᯲ᯑᯅᯮ ᯉᯪ ᯀᯉᯮ᯲ᯖᯩ ᯇᯝᯒᯪ᯲ ᯉ ᯑᯔᯬ᯲ᯇᯂ᯲ ᯂᯔ᯲ᯅᯪᯒᯰ ᯤ ᯉᯉᯪ᯲ᯉ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲

Olo da rajanami, songon di parmanuhon aji nangka piring Nai Boru Sinomba ma i, di datu ma sihabunianna, siidaonta ma i di ari mandatang!" ninna datu i, mangalusi.

ᯀᯬᯞᯬ ᯑ ᯒᯐᯉᯔᯪ ᯘᯬᯝᯉᯬ᯲ ᯑᯪ ᯇᯒ᯲ᯔᯉᯮᯂᯉᯬ᯲ ᯀᯐᯪ ᯉᯰᯂ ᯇᯪᯒᯪᯰ ᯉᯤ ᯅᯬᯒᯮ ᯘᯪᯉᯔᯬ᯲ᯅ ᯔ ᯤ ᯑᯪ ᯑᯖᯮ ᯔ ᯘᯪᯂᯅᯮᯉᯪᯀᯉ᯲ᯉ ᯘᯪᯤᯑᯀᯉᯬ᯲ᯖ ᯔ ᯤ ᯑᯪ ᯀᯒᯪ ᯔᯉ᯲ᯑᯖᯰ ᯉᯉᯪ᯲ᯉ ᯑᯖᯮ ᯤ ᯔᯝᯞᯮᯘᯪ

Nunga bagas borngin; dung i modom be ma sudena nasida.

ᯉᯮᯝ ᯅᯎᯘ᯲ ᯅᯒᯬ᯲ᯝᯉᯪ᯲ ᯑᯮᯰ ᯤ ᯔᯬᯑᯔᯬ᯲ ᯅᯩ ᯔ ᯘᯮᯑᯩᯉ ᯉᯘᯪᯑ

Adong ma pitu borngin Datu Pamumas di Lobu Namaduma namangubati si Tapi Marhillong Sere i; ummaha ma dihilala boru ni raja i.

ᯀᯑᯬᯰ ᯔ ᯇᯪᯖᯮ ᯅᯖᯬ᯲ᯝᯉᯪ᯲ ᯑᯖᯮ ᯇᯔᯒᯮ᯲ᯉᯘ᯲ ᯑᯪ ᯞᯬᯅᯮ ᯉᯔᯑᯮᯔ ᯉ ᯔᯝᯮᯅᯖᯪ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯬᯰ ᯘᯩᯒᯩ ᯤ ᯀᯔᯮ᯲ᯔᯂ ᯔ ᯑᯪᯂᯪᯞᯞ ᯅᯬᯒᯮ ᯉᯪ ᯒᯐ ᯤ

Nunga bolas antong ibana jongjong, nunga olo mangan.

ᯉᯮᯝ ᯅᯬᯞᯘ᯲ ᯀᯉ᯲ᯖᯬᯰ ᯤᯅᯉ ᯐᯬᯰᯐᯬᯰ ᯉᯮᯝ ᯀᯬᯞᯬ ᯔᯝᯉ᯲

Dung i diubati ma pitu bomgin nari, tarbahen boru ni raja i ma mardalan-dalan, nunga mulai boi muse tu tapian.

ᯑᯮᯰ ᯤ ᯑᯪᯥᯅᯖᯪ ᯔ ᯇᯪᯖᯮ ᯅᯒᯬ᯲ᯝᯉᯪ᯲ ᯉᯒᯪ ᯖᯒ᯲ᯅᯂᯉᯩ᯲ ᯅᯬᯒᯮ ᯉᯪ ᯒᯐ ᯤ ᯔ ᯔᯒ᯲ᯑᯞᯉ᯲ᯑᯞᯉ᯲ ᯉᯮᯝ ᯔᯮᯞᯤ ᯅᯬᯤ ᯔᯮᯘᯩ ᯖᯮ ᯖᯇᯪᯀᯉ᯲

Mansai las ma roha ni Raja Sohuturon Dolok; las ma nang roha ni pardihutana; songon i ma nang roha ni pangisi ni huta i.

ᯔᯉ᯲ᯘᯤ ᯞᯘ᯲ ᯔ ᯒᯬᯂ ᯉᯪ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯞᯘ᯲ ᯔ ᯉᯰ ᯒᯬᯂ ᯉᯪ ᯇᯒ᯲ᯑᯪᯂᯮᯖᯉ ᯘᯬᯝᯉᯬ᯲ ᯤ ᯔ ᯉᯰ ᯒᯬᯂ ᯉᯪ ᯇᯝᯪᯘᯪ ᯉᯪ ᯂᯮᯖ ᯤ

Sonang ma tutu roha ni datu i dibahen nasida.

ᯘᯬᯉᯰ ᯔ ᯖᯮᯖᯮ ᯒᯬᯂ ᯉᯪ ᯑᯖᯮ ᯤ ᯑᯪᯅᯂᯉᯩ᯲ ᯉᯘᯪᯑ

Tung lomo-lomo ni datu do mangido juhut panganonna, manang dengke parlaslas, laho mamulung angka ramuan tu dolok manang tu rura

ᯖᯮᯰ ᯞᯬᯔᯬᯞᯬᯔᯬ ᯉᯪ ᯑᯖᯮ ᯤ ᯑᯪ ᯔᯝᯪᯑᯬ ᯐᯮᯂᯖᯮ᯲ ᯇᯝᯉᯉᯬ᯲ᯉ ᯔᯉᯰ ᯑᯩᯰᯂᯩ ᯇᯒ᯲ᯞᯘ᯲ᯞᯘ᯲ ᯞᯂᯬ ᯔᯔᯮᯞᯮᯰ ᯀᯰᯂ ᯒᯔᯮᯀᯉ᯲ ᯖᯮ ᯑᯬᯞᯂᯬ᯲ ᯔᯉᯰ ᯖᯮ ᯒᯮᯒ

Dilehon Raja Sohuturon Dolok ma mas tu datu i, dibahen las ni rohana; dung i mulak ma Datu Pamumas tu hutana rap dohot donganna Si Aji Panungkunan.

ᯑᯪᯞᯩᯂᯉᯬ᯲ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯔ ᯔᯘ᯲ ᯖᯮ ᯑᯖᯮ ᯤ ᯑᯪᯅᯂᯉᯩ᯲ ᯞᯘ᯲ ᯉᯪ ᯒᯬᯂᯉ ᯑᯮᯰ ᯤ ᯔᯮᯞᯂ᯲ ᯔ ᯑᯖᯮ ᯇᯔᯒᯮ᯲ᯉᯘ᯲ ᯖᯮ ᯂᯮᯖᯉ ᯒᯇ᯲ ᯑᯬᯂᯖᯬ᯲ ᯑᯬᯝᯉ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Di tongan dalan di topi Aek Parbaraan hundul ma nasida maradian di toru ni hau gala-gala.

ᯑᯪ ᯖᯬᯝᯉ᯲ ᯑᯞᯉ᯲ ᯑᯪ ᯖᯬᯇᯪ ᯀᯀᯂᯩ᯲ ᯇᯒ᯲ᯅᯒᯀᯉ᯲ ᯂᯉᯮ᯲ᯑᯞᯮ᯲ ᯔ ᯉᯘᯪᯑ ᯔᯒᯑᯪᯀᯉ᯲ ᯑᯪ ᯖᯬᯒᯮ ᯉᯪ ᯂᯥ ᯎᯞᯎᯞ

Ditallik datu i ma bona ni gala-gala i, jadi ruar ma tutu gotana, madekdehi tu toru.

ᯑᯪᯖᯞ᯲ᯞᯂᯪ᯲ ᯑᯖᯮ ᯤ ᯔ ᯅᯬᯉ ᯉᯪ ᯎᯞᯎᯞ ᯤ ᯐᯑᯪ ᯒᯮᯀᯒ᯲ ᯔ ᯖᯮᯖᯮ ᯎᯬᯖᯉ ᯔᯑᯂᯩ᯲ᯑᯩᯂᯪ ᯔ ᯖᯮ ᯖᯬᯒᯮ

Sai didok ma nanget-nanget songon na manabasi, "Dua hali pitu borngin nari, dua hali pitu borngin nari!"

ᯘᯤ ᯑᯪᯑᯂᯬ᯲ ᯔ ᯉᯝᯖᯩ᯲ᯉᯝᯖᯩ᯲ ᯘᯬᯝᯉᯬ᯲ ᯉ ᯔᯉᯅᯘᯪ ᯑᯮᯀ ᯂᯞᯪ ᯇᯪᯖᯮ ᯅᯒᯪ᯲ᯝᯉᯪ᯲ ᯉᯒᯪ ᯑᯮᯀ ᯂᯞᯪ ᯇᯪᯖᯮ ᯅᯒᯬ᯲ᯝᯉᯪ᯲ ᯉᯒᯪ

Dung i dibereng ma dompak si Aji Panungkunan, didok ma,

ᯑᯮᯰ ᯤ ᯑᯪᯅᯩᯒᯩᯰ ᯔ ᯑᯔᯬ᯲ᯇᯂ᯲ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯑᯪᯑᯂᯬ᯲ ᯔ

Dua hali pitu borngin nari ale Aji Panungkunan, ro ma hita muse tu huta ni Raja Sohuturon Dolok!

ᯑᯮᯀ ᯂᯞᯪ ᯇᯪᯖᯮ ᯅᯖᯪ᯲ᯝᯉᯪ᯲ ᯉᯒᯪ ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲ ᯒᯬ ᯔ ᯂᯪᯖ ᯔᯮᯘᯩ ᯖᯮ ᯂᯮᯖ ᯉᯪ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲

Boasa ro hita muse ompung datunami? ninna si Aji Panungkunan manungkun datu i.

ᯅᯬᯀᯘ ᯒᯬ ᯂᯪᯖ ᯔᯮᯘᯩ ᯀᯔᯬ᯲ᯇᯮᯰ ᯑᯖᯮᯉᯔᯪ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯔᯉᯮᯰᯂᯉᯮ᯲ ᯑᯖᯮ ᯤ

Marsahit ma muse boru ni raja i, si Tapi Marhillong Sere! ninna datu i.

ᯔᯒ᯲ᯘᯂᯖᯪ᯲ ᯔ ᯔᯮᯘᯩ ᯅᯬᯒᯮ ᯉᯪ ᯒᯐ ᯤ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯬᯰ ᯘᯩᯒᯩ ᯉᯉᯪ᯲ᯉ ᯑᯖᯮ ᯤ

Alai nunga malum, ompung! ninna si Aji Panungkunan.

ᯀᯞᯤ ᯉᯮᯝ ᯔᯞᯔᯮ᯲ ᯀᯔᯬ᯲ᯇᯮᯰ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

dang diboto si Aji Panungkunan, naung sai tu mas i roha ni datu i.

ᯑᯰ ᯑᯪᯅᯬᯖᯬ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯉᯀᯮᯰ ᯘᯤ ᯖᯮ ᯔᯘ᯲ ᯤ ᯒᯬᯂ ᯉᯪ ᯑᯖ ᯤ

Molo didadap mas i di hajutna, sai songon na dapotan sorna-soma ma dihilala, songon na hona pitonggam rohana dibahen mas i, songon na mabuk.

ᯔᯬᯞᯬ ᯑᯪᯑᯑᯇ᯲ ᯔᯘ᯲ ᯤ ᯑᯪ ᯂᯐᯖᯮ᯲ᯉ ᯘᯤ ᯘᯬᯑᯉᯬ᯲ ᯉ ᯑᯇᯬᯖᯉ᯲ ᯘᯒᯬ᯲ᯉᯘᯒᯬ᯲ᯉ ᯔ ᯑᯪᯂᯪᯞᯞ ᯘᯬᯝᯉᯬ᯲ ᯉ ᯂᯬᯉ ᯇᯪᯖᯬᯰᯎᯔ᯲ ᯒᯬᯂᯉ ᯑᯪᯅᯂᯉᯩ᯲ ᯔᯘ᯲ ᯤ ᯘᯬᯝᯉᯬ᯲ ᯉ ᯔᯅᯂᯮ᯲

Dung i didok datu Pamurnas ma muse,

ᯑᯮᯰ ᯤ ᯑᯪᯑᯂᯬ᯲ ᯑᯖᯮ ᯇᯔᯒᯮ᯲ᯉᯘ᯲ ᯔ ᯔᯮᯘᯩ

Ombushononku do muse sian hutanta, asa mulak boru ni raja i marsahit, asa dijou hita antong.

ᯀᯔᯬ᯲ᯅᯘᯮ᯲ᯂᯬᯉᯉᯬ᯲ᯂᯮ ᯑᯬ ᯔᯮᯘᯩ ᯘᯪᯀᯉ᯲ ᯂᯮᯖᯉ᯲ᯖ ᯀᯘ ᯔᯮᯞᯂ᯲ ᯅᯬᯒᯮ ᯉᯪ ᯒᯐ ᯤ ᯔᯒ᯲ᯘᯂᯖᯪ᯲ ᯀᯘ ᯑᯪᯐᯬᯥ ᯂᯪᯖ ᯀᯉ᯲ᯖᯬᯰ

Taubati ma muse, dung i lehonon ni Raja Sohuturon Dolok ma mas tu ahu.

ᯖᯥᯅᯖᯪ ᯔ ᯔᯮᯘᯩ ᯑᯮᯰ ᯤ ᯞᯩᯂᯬᯉᯉᯬ᯲ ᯉᯪ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯔ ᯔᯘ᯲ ᯖᯮ ᯀᯂᯮ

Na maduma do luat i daba, godang do horbona, godang masna, godang emena.

ᯉ ᯔᯑᯮᯔ ᯑᯬ ᯞᯮᯀᯖ᯲ ᯤ ᯑᯅ ᯎᯬᯑᯰ ᯑᯬ ᯂᯒᯬ᯲ᯅᯬᯉ ᯎᯬᯑᯰ ᯔᯘ᯲ᯉ ᯎᯬᯑᯰ ᯀᯩᯔᯩᯉ

Anggo di hutanta holan na hurangan do halak; aha ma mas disi?"

ᯀᯰᯎᯬ ᯑᯪ ᯂᯮᯖᯉ᯲ᯖ ᯑᯬ ᯂᯬᯞᯉ᯲ ᯉ ᯂᯮᯒᯝᯉ᯲ ᯑᯬ ᯂᯞᯂ᯲ ᯀᯂ ᯔ ᯔᯘ᯲ ᯑᯪᯘᯪ

dang asi roham ompung di raja i dohot di pardihutana i?

ᯑᯰ ᯀᯘᯪ ᯒᯪᯂᯔ᯲ ᯀᯔᯬ᯲ᯇᯮᯰ ᯑᯪ ᯒᯐ ᯤ ᯑᯬᯂᯖᯬ᯲ ᯑᯪ ᯇᯒ᯲ᯑᯪᯂᯮᯖᯉ ᯤ

dang asi roham di boru ni raja i, molo marsahit muse? ninna si Aji Panungkunan.

ᯑᯰ ᯀᯘᯪ ᯒᯪᯂᯔ᯲ ᯑᯪ ᯅᯬᯒᯮ ᯉᯪ ᯒᯐ ᯤ ᯔᯬᯞᯬ ᯔᯒ᯲ᯘᯂᯖᯪ᯲ ᯔᯮᯘᯩ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Dung i muruk ma datu i, didok ma,

ᯑᯮᯰ ᯤ ᯔᯮᯒᯂᯮ᯲ ᯔ ᯑᯖᯮ ᯤ ᯑᯪᯑᯂᯬ᯲ ᯔ

Sai poso na i ho; nunga songon i godang hatam.

ᯘᯤ ᯇᯬᯘᯬ ᯉ ᯤ ᯂᯬ ᯉᯮᯝ ᯘᯬᯝᯉᯬ᯲ ᯤ ᯎᯬᯑᯰ ᯂᯖᯔ᯲

Ahu ma nian ihuthon, na hudok ma tangihon!"
ᯀᯂᯮ ᯔ ᯉᯪᯀᯉ᯲ ᯤᯂᯖᯮ᯲ᯂᯉᯬ᯲ ᯉ ᯂᯮᯑᯂᯬ᯲ ᯔ ᯖᯝᯪᯂᯉᯬ᯲

Dung i hohom ma si Aji Panungkunan.

ᯑᯮᯰ ᯤ ᯂᯬᯂᯔᯬ᯲ ᯔ ᯘᯪ ᯀᯐᯪ ᯇᯉᯮᯰᯂᯮᯉᯉ᯲

Songon na tarjolma ma muse Datu Pamurnas.

ᯘᯪᯝᯉᯬ᯲ ᯉ ᯖᯒ᯲ᯐᯞᯬ᯲ᯔ ᯔ ᯔᯮᯘᯩ ᯑᯖᯮ ᯇᯔᯒᯮ᯲ᯉᯘ᯲

Nunga magodangku didok ibana dibege si Aji Panungkunan, na so boi botoonna hian.

ᯉᯮᯝ ᯔᯎᯬᯑᯰᯂᯮ ᯑᯪᯑᯂᯬ᯲ ᯤᯅᯉ ᯑᯪᯅᯩᯎᯩ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯉ ᯘᯬ ᯅᯬᯤ ᯅᯬᯖᯬᯀᯉᯬ᯲ᯉ ᯂᯪᯀᯉ᯲

Beasa hupandok i dibege anak lapa-lapa on? ninna rohana.

ᯅᯩᯀᯘ ᯂᯮᯇᯉ᯲ᯑᯂᯬ᯲ ᯤ ᯑᯪᯅᯩᯎᯩ ᯀᯉᯂ᯲ ᯞᯇᯞᯇ ᯀᯉᯬ᯲ ᯉᯉᯪ᯲ᯉ ᯒᯬᯂᯉ

Dung i tubu ma sangkap na roa di bagasan rohana; jadi didok ma,

ᯑᯮᯰ ᯤ ᯖᯮᯅᯮ ᯔ ᯘᯰᯂᯇ᯲ ᯉ ᯒᯬᯀ ᯑᯪ ᯅᯎᯘᯉ᯲ ᯒᯬᯂᯉ ᯐᯑᯪ ᯑᯪᯑᯂᯬ᯲ ᯔ

Ale Aji Panungkunan, laho ma jolo hita annon mambuat hotang tu Tor Nahapal na di habinsaran an.

ᯀᯞᯩ ᯀᯐᯪ ᯇᯉᯮᯰᯂᯮᯉᯉ᯲ ᯞᯂᯬ ᯔ ᯐᯬᯞᯬ ᯂᯪᯖ ᯀᯉ᯲ᯉᯉᯬ᯲ ᯔᯔ᯲ᯅᯮᯀᯖ᯲ ᯂᯬᯖᯰ ᯖᯮ ᯖᯒᯬ᯲ ᯉᯂᯇᯞ᯲ ᯉ ᯑᯪ ᯂᯅᯉᯪ᯲ᯘᯒᯉ᯲ ᯀᯉ᯲

Uli-uli do ninna halak disi hotang, ganjang jala rimpur-rimpur!

ᯥᯞᯪ᯦ᯥᯞᯪ ᯑᯬ ᯉᯉᯪ᯲ᯉ ᯂᯞᯂ᯲ ᯑᯪᯘᯪ ᯂᯬᯖᯰ ᯎᯉ᯲ᯐᯰ ᯐᯞ ᯒᯔᯪ᯲ᯇᯒᯮ᯲ᯒᯔᯪ᯲ᯇᯒᯮ᯲

Olo da ompung, na denggan ma i! ninna si Aji Panungkunan mangalusi.

ᯀᯬᯞᯬ ᯑ ᯀᯔᯬ᯲ᯇᯮᯰ ᯉ ᯑᯩᯰᯎᯉ᯲ ᯔ ᯤ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯔᯝᯞᯮᯘᯪ

Dung i laho ma nasida tutu dompak habinsaran tu Tor Nahapal, tu harangan golap.

ᯑᯮᯰ ᯤ ᯞᯂᯬ ᯔ ᯉᯘᯪᯑ ᯖᯮᯖᯮ ᯑᯔᯬ᯲ᯇᯂ᯲ ᯂᯅᯉᯪ᯲ᯘᯒᯉ᯲ ᯖᯮ ᯖᯒᯬ᯲ ᯉᯂᯇᯞ᯲ ᯖᯮ ᯂᯒᯝᯉ᯲ ᯎᯬᯞᯇ᯲

Dapot nasida ma disi hotang na ranjarranjar jala ganjang-ganjang. Sai dirintahi nasida ma i.

ᯑᯇᯖᯬ᯲ ᯉᯘᯪᯑ ᯔ ᯑᯪᯘᯪ ᯂᯬᯖᯰ ᯉ ᯒᯉ᯲ᯐᯒ᯲ᯒᯉ᯲ᯐᯒ᯲ ᯐᯞ ᯎᯉ᯲ᯐᯰᯎᯉ᯲ᯐᯰ ᯘᯤ ᯑᯪᯒᯉᯪ᯲ᯖᯂᯪ ᯉᯘᯪᯑ ᯔ ᯤ

Dung i na so pamotoan ni si Aji Panungkunan tompu ma dilotak Datu Pamurnas si Aji Panungkunan sian pudi.

ᯑᯮᯰ ᯤ ᯉ ᯘᯬ ᯇᯔᯬᯖᯬᯀᯉ᯲ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯖᯔᯬ᯲ᯇᯮ ᯔ ᯑᯪᯞᯬᯖᯂ᯲ ᯑᯖᯮ ᯇᯔᯒᯮ᯲ᯉᯘ᯲ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯘᯪᯀᯉ᯲ ᯇᯮᯑᯪ

Peak ma doli-doli i, nunga tung gale ibana, so ada be margellok.

ᯇᯩᯀᯂ᯲ ᯔ ᯑᯬᯞᯪᯑᯬᯞᯪ ᯤ ᯉᯮᯝ ᯖᯮᯰ ᯎᯞᯩ ᯤᯅᯉ ᯘᯬ ᯀᯑ ᯅᯩ ᯔᯒ᯲ᯎᯞᯩ᯲ᯞᯂᯬ᯲

Dung i diihoti datu i ma patna, diihot ma tanganna tu pudi; taos dipasombu ma peak di pasihotangan i.

ᯑᯮᯰ ᯤ ᯑᯪᯤᯂᯬᯖᯪ ᯑᯖᯮ ᯤ ᯔ ᯇᯖ᯲ᯉ ᯑᯪᯤᯂᯖᯬ᯲ ᯔ ᯖᯝᯉ᯲ᯉ ᯖᯮ ᯇᯮᯑᯪ ᯞᯀᯘᯬ᯲ ᯑᯪᯇᯘᯔᯬ᯲ᯅᯮ ᯔ ᯇᯩᯀᯂ᯲ ᯑᯪ ᯇᯘᯪᯂᯬᯖᯝᯉ᯲ ᯤ

Dung i dihudus ma tuat tu toru, sai marlojong-lojong ma ibana mandapothon hutanasida.

ᯑᯮᯰ ᯤ ᯑᯪᯂᯮᯑᯘᯮ᯲ ᯔ ᯖᯮᯀᯖ᯲ ᯖᯮ ᯖᯬᯒᯮ ᯘᯤ ᯔᯒ᯲ᯞᯬᯐᯬᯰᯞᯬᯐᯬᯰ ᯔ ᯤᯅᯉ ᯔᯉ᯲ᯑᯇᯖᯬ᯲ᯂᯉᯬ᯲ ᯂᯮᯖᯉᯘᯪᯑ

Nunga sai marhosa-hosa ibana sahat di huta, jadi dipaboa ma tu pangisi ni huta i, ninna ma,

ᯉᯮᯝ ᯘᯤ ᯔᯒ᯲ᯂᯬᯘᯂᯬᯘ ᯤᯅᯉ ᯘᯂᯖ᯲ ᯑᯪ ᯂᯮᯖ ᯐᯑᯪ ᯑᯪᯇᯅᯬᯀ ᯔ ᯖᯮ ᯇᯝᯪᯘᯪ ᯉᯪ ᯂᯮᯖ ᯤ ᯉᯉᯪ᯲ᯉ ᯔ

Hamu ale angka amang, na mardalan do hami dohot si Aji Panungkunan sian muara ni Aek Parbaraan.

ᯂᯔᯮ ᯀᯞᯩ ᯀᯰᯂ ᯀᯔᯰ ᯉ ᯔᯒ᯲ᯑᯞᯉ᯲ ᯑᯬ ᯂᯔᯪ ᯑᯬᯂᯖᯬ᯲ ᯘᯪ ᯀᯐᯪ ᯇᯉᯮᯰᯂᯮᯉᯉ᯲ ᯘᯪᯀᯉ᯲ ᯔᯮᯀᯒ ᯉᯪ ᯀᯀᯂᯩ᯲ ᯇᯒ᯲ᯅᯒᯀᯉ᯲

Didege ibana do batu na landit, gabe tarsulandit.

ᯑᯪ ᯑᯩᯎᯩ ᯤᯅᯉ ᯑᯬ ᯅᯖᯮ ᯉ ᯞᯉ᯲ᯑᯖᯪ᯲ ᯎᯅᯩ ᯖᯒ᯲ᯘᯮᯞᯉ᯲ᯑᯖᯪ᯲

Madabu ma ibana tu Aek Godang na doras i laos maup.

ᯔᯑᯅᯮ ᯔ ᯤᯅᯉ ᯖᯮ ᯀᯀᯂᯩ᯲ ᯎᯬᯑᯰ ᯉ ᯑᯪᯒᯘ᯲ ᯤ ᯞᯀᯘᯬ᯲ ᯔᯀᯇᯮ᯲

Sai hulului do nian alai ndang adong tarida be!

ᯘᯤ ᯂᯮᯞᯮᯞᯮᯤ ᯑᯬ ᯉᯪᯀᯉ᯲ ᯀᯞᯤ ᯑᯰ ᯀᯑᯬᯰ ᯖᯒᯪᯑ ᯅᯩ

Tarsongot ma sude pangisi ni huta i.

ᯖᯒ᯲ᯘᯬᯰᯎᯖᯬ᯲ ᯔ ᯘᯮᯑᯩ ᯇᯝᯪᯘᯪ ᯉᯪ ᯂᯮᯖ ᯤ

Dung i mangandung sibari-bari ma ina ni si Aji Panungkunan.

ᯑᯮᯰ ᯤ ᯔᯝᯉ᯲ᯑᯮᯰ ᯘᯪᯅᯒᯪᯅᯒᯪ ᯔ ᯤᯉ ᯉᯪ ᯘᯪ ᯀᯐᯪ ᯇᯉᯮᯰᯂᯮᯉᯉ᯲