ᯖᯮᯒᯪᯖᯮᯪᯀᯉ᯲ ᯉᯪ ᯘᯪ ᯀᯐᯪ ᯇᯉᯰᯮᯄ᯦ᯮᯉᯉ᯲ Turi-turian ni si Aji Panungkunan Turpuk Pasampulupituhon (Pangke Android)

Dung i dapot ma tingkina, borhat ma pangisi ni huta Dolok Pargarutan laho mandapothon Raja Sohuturon Dolok na di Lobu Na Maduma, ai margondang ma antong nasida di huta i.

 ᯑᯮᯰ ᯤ ᯑᯇᯖᯬ᯲ ᯔ ᯖᯰᯪᯄ᯦ᯪᯉ ᯅᯒᯬ᯲ᯂᯖ᯲ ᯔ ᯇᯝᯪᯘᯪ ᯉᯪ ᯂᯮᯖ ᯑᯬᯞᯄ᯦ᯬ᯲ ᯇᯒ᯲ᯎᯒᯮᯖᯉ᯲ ᯞᯂᯬ ᯔᯉ᯲ᯑᯇᯖᯬ᯲ᯂᯉᯬ᯲ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯄ᯦ᯬ᯲ ᯉ ᯑᯪ ᯞᯬᯅᯮ ᯉᯔᯑᯮᯔ ᯀᯤ ᯔᯒ᯲ᯎᯉᯬ᯲ᯑᯰ ᯔ ᯀᯉ᯲ᯖᯰᯬ ᯉᯘᯪᯑ ᯑᯪ ᯂᯮᯖᯤ

Ai nunga dijalo raja i si Aji Panungkunan gabe helana. 

ᯀᯤ ᯉᯮᯝ ᯑᯪᯐᯞᯬ ᯒᯐ ᯤ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲ ᯎᯅᯩ ᯂᯩᯞᯉ

Nunga be adong bahenonnasida laho mambuat angka na ringkot tu pesta i, ai dilehon ulok baganding tua antong mas palangki di si Aji Panungkunan. ᯉᯮᯝ ᯅᯩ ᯀᯑᯰᯬ ᯅᯂᯩᯉᯉᯬ᯲ᯉᯘᯪᯑ ᯞᯂᯬ ᯔᯔ᯲ᯅᯮᯀᯖ᯲ ᯀᯰᯄ᯦ ᯉ ᯒᯰᯪᯄ᯦ᯖᯬ᯲ ᯖᯮ ᯇᯘᯩ᯲ᯖ ᯤ ᯀᯤ ᯑᯪᯞᯩᯂᯉᯬ᯲ ᯥᯞᯄ᯦ᯬ᯲ ᯅᯎᯉ᯲ᯑᯰᯪ ᯖᯮᯀ ᯀᯉ᯲ᯖᯰᯬ ᯔᯘ᯲ ᯇᯞᯰᯄ᯦ᯪ ᯑᯪ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲

Upana ma i ala na tigor do rohana, ala naung songon i godang antong ditaon angka na hansit dibahen Datu Pamurnas dohot Raja Parbaliung. 

ᯥᯇᯉ ᯔ ᯤ ᯀᯞ ᯉ ᯖᯪᯎᯒᯬ᯲ ᯑᯬ ᯒᯬᯂᯉ ᯀᯞ ᯉᯀᯮᯰ ᯘᯬᯝᯉᯬ᯲ ᯤ ᯎᯬᯑᯰ ᯀᯉ᯲ᯖᯰᯬ ᯑᯪᯖᯀᯉᯬ᯲ ᯀᯰᯄ᯦ ᯉ ᯂᯉ᯲ᯘᯖᯪ᯲ ᯑᯪᯅᯂᯉᯩ᯲ ᯑᯖᯮ ᯇᯔᯒᯮ᯲ᯉᯘ᯲ ᯑᯬᯂᯖᯬ᯲ ᯒᯐ ᯇᯒ᯲ᯅᯞᯪᯀᯮᯰ

I ma na palambok pusu! 

ᯤ ᯔ ᯉ ᯇᯞᯔ᯲ᯅᯄ᯦ᯬ᯲ ᯇᯮᯘᯮ

Ina ni si Aji Panungkunan pe, ndada be holsoan; nunga sai las rohana, dang sai diingotingot be hapogosonna.

 ᯤᯉ ᯉᯪ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲ ᯇᯩ ᯉ᯲ᯑᯑ ᯅᯩ ᯂᯞᯬ᯲ᯘᯬᯀᯉ᯲ ᯉᯮᯝ ᯘᯤ ᯞᯘ᯲ ᯒᯬᯂᯉ ᯑᯰ ᯘᯤ ᯑᯪᯤᯝᯖᯬ᯲ᯤᯝᯖᯬ᯲ ᯅᯩ ᯂᯇᯬᯎᯬᯘᯉᯬ᯲ᯉ

Andorang so sahat nasida tu huta i, tar dao dope, maradian ma nasida di toru ni sada hau na bolon, hau maranti na opat hinaol balgana. ᯀᯉ᯲ᯑᯬᯒᯰ ᯘᯬ ᯘᯂᯖ᯲ ᯉᯘᯪᯑ ᯖᯮ ᯂᯮᯖ ᯤ ᯖᯒ᯲ ᯑᯀᯬ ᯑᯬᯇᯩ ᯔᯒᯑᯪᯀᯉ᯲ ᯔ ᯉᯘᯪᯑ ᯑᯪ ᯖᯬᯒᯮ ᯉᯪ ᯘᯑ ᯂᯥ ᯉ ᯅᯬᯞᯉᯬ᯲ ᯂᯥ ᯔᯒᯉ᯲ᯖᯪ ᯉ ᯀᯬᯇᯖ᯲ ᯂᯪᯉᯀᯞᯬ᯲ ᯅᯞ᯲ᯎᯉ

Adian maranti ma didok halak goar ni adian i; songon alaman nama di toru ni hau i, ala ni bidang ni hundulhundulan ni halak na maradian disi.

ᯀᯑᯪᯀᯉ᯲ ᯔᯒᯉ᯲ᯖᯪ ᯔ ᯑᯪᯑᯄ᯦ᯬ᯲ ᯂᯞᯄ᯦᯲ ᯎᯬᯀᯒ᯲ ᯉᯪ ᯀᯑᯪᯀᯉ᯲ ᯤ ᯑᯬᯝᯉᯬ᯲ ᯀᯞᯔᯉ᯲ ᯉᯔ ᯑᯪ ᯖᯬᯒᯮ ᯉᯪ ᯂᯥ ᯤ ᯘᯞ ᯉᯪ ᯅᯪᯑᯰ ᯉᯪ ᯂᯉᯮ᯲ᯑᯞᯮ᯲ᯂᯉᯮ᯲ᯑᯮᯞᯉ᯲ ᯉᯪ ᯂᯞᯄ᯦᯲ ᯉ ᯔᯒᯑᯪᯀᯉ᯲ ᯑᯪᯘᯪ

Marpahean na denggan be ma nasida. Martali-tali ma angka na martali-tali, marsabe-sabe ma angka na marsabe-sabe. Nunga tung uli nasida be idaon? ᯔᯒ᯲ᯇᯂᯩᯀᯉ᯲ ᯉ ᯑᯰᯩᯎᯉ᯲ ᯅᯩ ᯔ ᯉᯘᯪᯑ ᯔᯒ᯲ᯖᯞᯪᯖᯞᯪ ᯔ ᯀᯰᯄ᯦ ᯉ ᯔᯒ᯲ᯖᯞᯪᯖᯞᯪ ᯔᯒ᯲ᯘᯅᯩᯑᯅᯩ ᯔ ᯀᯰᯄ᯦ ᯉ ᯔᯒ᯲ᯘᯅᯩᯘᯅᯩ ᯉᯮᯝ ᯖᯮᯰ ᯥᯞᯪ ᯉᯘᯪᯑ ᯅᯩ ᯤᯑᯀᯉᯬ᯲

Songon i ma nang si Aji Panungkunan, nunga tongam idaon ibana. 

ᯘᯬᯝᯉᯬ᯲ ᯤ ᯔ ᯉᯰ ᯘᯪ ᯀᯐᯤ ᯇᯉᯮᯰᯄ᯦ᯮᯉᯉ᯲ ᯉᯮᯝ ᯖᯬᯝᯔ᯲ ᯤᯑᯀᯉᯬ᯲ ᯤᯅᯉ

Dung i mardalan ma nasida adong sangombas nari?

 ᯑᯮᯰ ᯤ ᯔᯒ᯲ᯑᯞᯉ᯲ ᯔ ᯉᯘᯪᯑ ᯀᯑᯰᯬ ᯘᯝᯔᯬ᯲ᯅᯘ᯲ ᯉᯒᯪ

Dung jonok nasida tu huta i, dipalu nasida ma antong bodil tu ginjang, i ma paboahon haroronasida.

 ᯑᯮᯰ ᯐᯬᯉᯄ᯦ᯬ᯲ ᯉᯘᯪᯑ ᯖᯮ ᯂᯮᯖ ᯤ ᯑᯪᯇᯞᯮ ᯉᯘᯪᯑ ᯔ ᯀᯉ᯲ᯖᯰᯬ ᯅᯬᯑᯞᯪ᯲ ᯖᯮ ᯎᯉᯪ᯲ᯐᯰ ᯤ ᯔ ᯇᯅᯬᯀᯂᯉᯬ᯲ ᯂᯒᯬᯒᯬᯉᯘᯪᯑ

Nunga sai mangkuling antong gordang sitinjuang di langit di huta Lobu Namaduma. 

ᯉᯮᯝ ᯘᯤ ᯔᯰ᯦ᯄ᯦ᯮᯞᯰᯪ ᯀᯉ᯲ᯖᯰᯬ ᯎᯒᯬ᯲ᯑᯰ ᯘᯪᯖᯉᯪ᯲ᯐᯮᯀᯰ ᯑᯪ ᯞᯝᯖᯪ᯲ ᯑᯪ ᯂᯮᯖ ᯞᯬᯅᯮ ᯉᯔᯑᯮᯔ

Dung i ro ma angka na manomu-nomu si Aji Panungkunan rap dohot angka donganna pangisi ni huta Dolok Pargarutan.

 ᯑᯮᯰ ᯤ ᯒᯬ ᯔ ᯀᯰᯄ᯦ ᯉ ᯔᯉᯬᯔᯮᯉᯬᯔᯮ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲ ᯒᯇ᯲ ᯑᯬᯂᯖᯬ᯲ ᯀᯰᯄ᯦ ᯑᯬᯝᯉ᯲ᯉ ᯇᯝᯪᯘᯪ ᯉᯪ ᯂᯮᯖ ᯑᯬᯞᯄ᯦ᯬ᯲ ᯇᯒ᯲ᯎᯒᯮᯖᯉ᯲

Dibolus nasida ma tutu harbangan ni huta i, dung i masuk ma nasida tu tonga ni alaman. 

ᯑᯪᯅᯬᯞᯘᯮ᯲ ᯉᯘᯪᯑ ᯔ ᯖᯮᯖᯮ ᯂᯒ᯲ᯅᯝᯉ᯲ ᯉᯪ ᯂᯮᯖ ᯤ ᯑᯮᯰ ᯤ ᯔᯘᯄ᯦ᯮ ᯔ ᯉᯘᯪᯑ ᯖᯮ ᯖᯬᯝ ᯉᯪ ᯀᯞᯔᯉ᯲

Dung sahat nasida sude tu tonga ni alaman, ba mangkuling ma ogung sabangunan , dung i manortor ma nasida antong sudena. 

ᯑᯮᯰ ᯘᯂᯖ᯲ ᯉᯘᯪᯑ ᯘᯮᯑᯩ ᯖᯮ ᯖᯬᯝ ᯉᯪ ᯀᯞᯔᯉ᯲ ᯅ ᯔᯰᯄ᯦ᯮᯞᯰᯪ ᯔ ᯘᯬᯎᯮᯰ ᯘᯉᯝᯮᯉᯉ᯲ ᯑᯮᯰ ᯤ ᯔᯉᯒᯬ᯲ᯖᯒᯬ᯲ ᯔ ᯉᯘᯪᯑ ᯀᯉ᯲ᯖᯰᯬ ᯘᯮᯑᯩᯉ

Nunga sai dipatohom si Aji Panungkunan bohina jala dipatenggal-tenggal ma tutu tanganna songon na binahen ni angka na malo manortor. 

ᯉᯮᯝ ᯘᯤ ᯑᯪᯇᯖᯬᯂᯔᯬ᯲ ᯘᯪ ᯀᯐᯪ ᯇᯉᯮᯰᯄᯮᯉᯉ᯲ ᯅᯬᯂᯪᯉ ᯐᯞ ᯑᯪᯇᯖᯰᯩᯎᯞ᯲ᯖᯰᯩᯂᯞ ᯔ ᯖᯮᯖᯮ ᯖᯝᯉ᯲ᯉ ᯘᯬᯝᯉᯬ᯲ ᯉ ᯅᯪᯉᯂᯉᯩ᯲ ᯉᯪ ᯀᯰᯄ᯦ ᯉ ᯔᯞᯬ ᯔᯉᯒᯬ᯲ᯖᯒᯬ᯲

Angka donganna i pe songon i do dibahen patuduhon las ni rohanasida, marhumaliang humaloho ma nasida, sai saurdot mangurdothon soara ni gondng i. ᯀᯰᯄ᯦ ᯑᯬᯝᯉ᯲ᯉ ᯤ ᯇᯩ ᯘᯬᯝᯉᯬ᯲ ᯤ ᯑᯬ ᯑᯪᯅᯂᯉᯩ᯲ ᯇᯖᯮᯝᯮᯂᯉᯬ᯲ ᯞᯘ᯲ ᯉᯪ ᯖᯬᯂᯉᯘᯪᯑ ᯔᯒ᯲ᯂᯮᯔᯞᯪᯀᯰ ᯂᯮᯔᯞᯬᯞᯬ ᯔ ᯉᯑᯪᯑ ᯘᯤ ᯘᯀᯒᯮ᯲ᯑᯖᯬ᯲ ᯔᯝᯒᯮ᯲ᯑᯖᯬ᯲ᯂᯉᯬ᯲ ᯘᯬᯀᯒ ᯉᯪ ᯎᯉᯬ᯲ᯑᯰ ᯤ

Dung i songon na dipananget ma gondang i, hape na naeng marsoara do Raja Sohuturon Dolok. 

ᯑᯮᯰ ᯤ ᯘᯬᯝᯉᯬ᯲ ᯉ ᯑᯪᯇᯉᯝᯖᯩ᯲ ᯔ ᯂᯉᯬ᯲ᯑᯰ ᯤ ᯂᯇᯩ ᯉ ᯉᯀᯰᯩ ᯔᯒ᯲ᯘᯬᯀᯒ ᯑᯬ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯄ᯦ᯬ᯲

Jadi didok raja i ma, Nunga ro dison ale berengku si Aji Panungkunan, na sian huta Pargarutan. 

ᯐᯑᯪ ᯑᯪᯑᯄ᯦ᯬ᯲ ᯒᯐ ᯤ ᯔ ᯉᯮᯝ ᯒᯬ ᯑᯪᯘᯉᯬ᯲ ᯀᯞᯩ ᯅᯩᯒᯰᯩᯄ᯦ᯮ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲ ᯉ ᯘᯪᯀᯉ᯲ ᯂᯮᯖ ᯇᯒ᯲ᯎᯒᯮᯖᯉ᯲

Sai songgop ma parhorasan, sai songgop ma panggabean, sai ro ma hamoraon dohot hasangapon di hita on sudena! 

ᯘᯤ ᯘᯰᯬᯎᯇᯬ᯲ ᯔ ᯇᯒ᯲ᯂᯬᯒᯘᯉ᯲ ᯑᯤ ᯘᯰᯬᯎᯇᯬ᯲ ᯔ ᯇᯰᯎᯅᯩᯀᯉ᯲ ᯘᯤ ᯒᯬ ᯔ ᯂᯔᯬᯒᯀᯉᯬ᯲ ᯑᯬᯂᯖᯬ᯲ ᯂᯑᯝᯇᯉᯬ᯲ ᯑᯪ ᯂᯪᯖ ᯀᯉᯬ᯲ ᯘᯮᯑᯩᯉ

I ma tutu, ale rajanami! Sai horas ma hita on sudenna! ninna pangisi ni Lobu Namaduma dohot pangisi ni Dolok Pargarutan i sudena. 

ᯤ ᯔ ᯖᯮᯖᯮ ᯀᯞᯩ ᯒᯐᯉᯔᯪ ᯘᯤ ᯂᯬᯒᯘ᯲ ᯔ ᯂᯪᯖ ᯀᯉᯬ᯲ ᯘᯮᯑᯩᯉ ᯉᯉᯪ᯲ᯉ ᯇᯝᯪᯘᯪ ᯉᯪ ᯞᯬᯅᯮ ᯉᯔᯑᯮᯔ ᯝᯬᯂᯖᯬ᯲ ᯇᯝᯪᯘᯪ ᯉᯪ ᯑᯬᯞᯄ᯦ᯬ᯲ ᯇᯒ᯲ᯎᯒᯮᯖᯉ᯲ ᯤ ᯘᯮᯑᯩᯉ

Dung i marpungu ma tu bagas ni raja i angka natuatua ni Lobu Namaduma dohot angka natuatua ni Dolok Pargarutan. 

ᯑᯮᯰ ᯤ ᯔᯒ᯲ᯇᯮᯝᯮ ᯔ ᯖᯮ ᯅᯎᯘ᯲ ᯉᯪ ᯒᯐ ᯤ ᯀᯰᯄ᯦ ᯉᯖᯮᯀᯖᯮᯀ ᯉᯪ ᯞᯬᯅᯮ ᯉᯔᯑᯮᯔ ᯑᯬᯂᯖᯬ᯲ ᯀᯰᯄ᯦ ᯉᯖᯮᯀᯖᯮᯀ ᯉᯪ ᯑᯬᯞᯄ᯦ᯬ᯲ ᯇᯒ᯲ᯎᯒᯮᯖᯉ᯲

Marhata ma antong disi angka raja parhata sian parboru dohot raja parhata na sian paranak ᯔᯒ᯲ᯂᯖ ᯔ ᯀᯉ᯲ᯖᯰᯬ ᯑᯪᯘᯪ ᯀᯰᯄ᯦ ᯒᯐ ᯇᯒ᯲ᯂᯖ ᯑᯪᯀᯉ᯲ ᯇᯒ᯲ᯅᯬᯒᯮ ᯑᯬᯂᯖᯬ᯲ ᯒᯐ ᯇᯒ᯲ᯂᯖ ᯔ ᯑᯪᯘᯉ᯲ ᯇᯒᯉᯄ᯦᯲

Dung i dipatop mangan ma si Aji Panungkunan dohot si Tapi Marhillong Sere, boru ni raja i.

 ᯑᯮᯰ ᯤ ᯑᯪᯇᯖᯇᯬ᯲ ᯔᯝᯉ᯲ ᯔ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲ ᯑᯬᯂᯖᯬ᯲ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯰᯬ ᯘᯩᯒᯩ ᯅᯬᯒᯮ ᯉᯪ ᯒᯐ ᯤ

Nunga denggan be sudena mardalan, nunga be tung uli ulaon i, mandok hata pasupasu ma nasida tu anak dohot boru i. ᯉᯮᯝ ᯑᯰᯩᯂᯉ᯲ ᯅᯩ ᯘᯮᯑᯩᯉ ᯔᯒ᯲ᯑᯞᯉ᯲ ᯉᯮᯝ ᯅᯩ ᯖᯮᯰ ᯥᯞᯪ ᯥᯞᯘᯉᯬ᯲ ᯤ ᯔᯉ᯲ᯑᯄ᯦ᯬ᯲ ᯂᯖ ᯇᯘᯮᯇᯘᯮ ᯔ ᯉᯘᯪᯑ ᯖᯮ ᯀᯉᯄ᯦᯲ ᯑᯬᯂᯖᯬ᯲ ᯅᯬᯒᯮ ᯤ

Eme sitamba tua ma, parlinggoman ni siborok. Luhut ma hita martua, debata ma na marorot. ᯀᯩᯔᯩ ᯘᯪᯖᯔ᯲ᯅ ᯖᯮᯀ ᯔ ᯇᯒ᯲ᯞᯰᯪᯎᯬᯔᯉ᯲ ᯉᯪ ᯘᯪᯅᯬᯒᯄ᯦ᯬ᯲ ᯞᯮᯂᯖᯮ᯲ ᯔ ᯂᯪᯖ ᯔᯒ᯲ᯖᯮᯀ ᯑᯩᯅᯖ ᯔ ᯉ ᯔᯒᯬᯒᯖᯬ᯲

Bintang na rumiris, ombun na sumorop. Anak pe antong di hamu riris, ba boru pe antong torop. 

ᯅᯉᯪ᯲ᯖᯰ ᯔ ᯒᯮᯔᯪᯒᯘᯪ᯲ ᯘᯔᯬ᯲ᯅᯉᯮ᯲ ᯉᯘᯮᯔᯬᯒᯇᯬ᯲ ᯀᯉᯄ᯦᯲ ᯇᯩ ᯀᯉ᯲ᯖᯰᯬ ᯑᯪ ᯂᯔᯮ ᯒᯪᯒᯘᯪ᯲ ᯅ ᯅᯬᯒᯮ ᯇᯩ ᯀᯉ᯲ᯖᯰᯬ ᯖᯬᯒᯇᯬ᯲

Tubu ma lata, di tonga-tonga ni bunga-bunga, Sai tubu ma anak na marsangap,
dohot boru angka na martua. ᯖᯮᯅᯮ ᯔ ᯞᯖ ᯑᯪ ᯖᯬᯝᯖᯬᯝ ᯉᯪ ᯅᯮᯝᯅᯮᯝ ᯘᯤ ᯖᯮᯅᯮ ᯔ ᯀᯉᯄ᯦᯲ ᯉ ᯔᯒ᯲ᯘᯝᯇ᯲ ᯑᯬᯂᯖᯬ᯲ ᯅᯬᯒᯮ ᯀᯰᯄ᯦ ᯉ ᯔᯒ᯲ᯖᯮᯀ

Sahat-sahat ni solu ma, sai sahat tu bontean. Sai horas-horas ma hita on mangolu, sahat ma hita on luhutna tu panggabean. ᯘᯂᯖ᯲ᯘᯂᯖ᯲ ᯉᯪ ᯘᯬᯞᯮ ᯔ ᯘᯤ ᯘᯂᯖ᯲ ᯖᯮ ᯅᯉᯬ᯲ᯖᯩᯀᯉ᯲ ᯘᯤ ᯂᯬᯒᯘ᯲ᯂᯬᯒᯘ᯲ ᯔ ᯂᯪᯖ ᯀᯉᯬ᯲ ᯔᯝᯬᯞᯮ ᯘᯂᯖ᯲ ᯔ ᯂᯪᯖ ᯀᯉᯬ᯲ ᯞᯮᯂᯖᯮ᯲ᯉ ᯖᯮ ᯇᯰᯎᯅᯩᯀᯉ᯲

I ma tutu! ninna na pungu i sudena mangolophon angka hata na denggan, na pinandok ni angka amanta raja na liat na Iola i. ᯤ ᯔ ᯖᯮᯖᯮ ᯉᯉᯪ᯲ᯉ ᯉ ᯇᯮᯝᯮ ᯤ ᯘᯮᯑᯩᯉ ᯔᯝᯬᯞᯇᯬ᯲ᯐᯉᯬ᯲ ᯀᯰᯄ᯦ ᯂᯖ ᯉ ᯑᯰᯩᯎᯉ᯲ ᯉ ᯇᯪᯉᯉ᯲ᯑᯄ᯦ᯬ᯲ ᯉᯪ ᯀᯰᯄ᯦ ᯀᯔᯉ᯲ᯖ ᯒᯐ ᯉ ᯞᯪᯀᯖ᯲ ᯉ ᯞᯬᯞᯬ ᯤ

Pitu ari pitu borngin nasida na margondang i; dang hapalang tutu balga ni pesta ni Raja Sohuturon Dolak i. 

ᯇᯪᯖᯮ ᯀᯒᯪ ᯇᯪᯖᯮ ᯅᯒᯬ᯲ᯝᯉᯪ᯲ ᯉᯘᯪᯑ ᯉ ᯔᯒ᯲ᯎᯉᯬ᯲ᯑᯰ ᯤ ᯑᯰ ᯂᯇᯞᯰ ᯖᯮᯖᯮ ᯅᯞ᯲ᯎ ᯉᯪ ᯇᯘᯩ᯲ᯖ ᯉᯪ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯄ᯦ᯬ᯲ ᯤ

Ganup ari do nasida manullang horbo; ba dongan ni i muse diseati dope angka pinahan lobu. ᯎᯉᯇᯮ᯲ ᯀᯒᯪ ᯑᯬ ᯉᯘᯪᯑ ᯔᯉᯞᯮ᯲ᯞᯰ ᯂᯒᯬ᯲ᯅᯬ ᯅ ᯑᯬᯝᯉ᯲ ᯉᯪ ᯤ ᯔᯮᯘᯩ ᯑᯪᯘᯩᯀᯖᯪ ᯑᯬᯇᯩ ᯀᯰᯄ᯦ ᯇᯪᯉᯂᯉ᯲ ᯞᯬᯅᯮ

Bosur ma sude halak mangan indahan dohot mangan juhut. ᯅᯬᯘᯒᯮ᯲ ᯔ ᯘᯮᯑᯩ ᯂᯞᯄ᯦᯲ ᯔᯝᯉ᯲ ᯀᯉᯪ᯲ᯑᯂᯉ᯲ ᯑᯬᯂᯖᯬ᯲ ᯔᯝᯉ᯲ ᯐᯮᯂᯖᯮ᯲

 Ai tarpatupa do i sude, ala sinur do pinahan antong, jala gabe na niula di Lobu Namaduma. 

ᯀᯤ ᯖᯒ᯲ᯇᯖᯮᯇ ᯑᯬ ᯤ ᯘᯮᯑᯩ ᯀᯞ ᯘᯪᯉᯒᯮ᯲ ᯑᯬ ᯇᯪᯉᯂᯉ᯲ ᯀᯉ᯲ᯖᯰᯬ ᯐᯞ ᯎᯅᯩ ᯉ ᯉᯪᯥᯞ ᯑᯪ ᯞᯬᯅᯮ ᯉᯔᯑᯮᯔ

Dung i godang do tutu sihalashonon ni Raja Sohuturon Dolak. 

ᯑᯮᯰ ᯤ ᯎᯬᯑᯰ ᯑᯬ ᯖᯮᯖᯮ ᯘᯪᯂᯞᯘ᯲ᯂᯬᯉᯉᯬ᯲ ᯉᯪ ᯒᯐ ᯘᯪᯂᯮᯖᯮᯒᯉᯬ᯲ ᯑᯬᯞᯄ᯦ᯬ᯲

Malum do antong sahit ni boruna binahen ni ubat na dapot si Aji Panungkunan 

ᯔᯞᯔᯮ᯲ ᯑᯬ ᯀᯉ᯲ᯖᯰᯬ ᯘᯂᯖᯪ᯲ ᯉᯪ ᯅᯬᯒᯮᯉ ᯅᯪᯉᯂᯉᯩ᯲ ᯉᯪ ᯥᯅᯖ᯲ ᯉ ᯑᯇᯖᯬ᯲ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲ 

Piga hali ma malua si Aji Panungkunan sian parmaraan bolon, na so tinagam be mangolu ibana. 

ᯇᯪᯎ ᯂᯞᯪ ᯔ ᯔᯞᯮᯀ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲ ᯘᯪᯀᯉ᯲ ᯇᯒ᯲ᯔᯒᯀᯉ᯲ ᯅᯬᯞᯉᯬ᯲ ᯉ ᯘᯬ ᯖᯪᯉᯎᯔ᯲ ᯅᯩ ᯔᯝᯬᯞᯮ ᯤᯅᯉ

Ba nunga gabe helana ibana, jala bangkit ma raja di huta Dolak Pargarutan. 

ᯅ ᯉᯮᯝ ᯎᯅᯩ ᯂᯩᯞᯉ ᯤᯅᯉ ᯐᯞ ᯅᯰᯄ᯦ᯖᯪ᯲ ᯔ ᯒᯐ ᯑᯪ ᯂᯮᯖ ᯑᯬᯞᯄ᯦ᯬ᯲ ᯇᯒ᯲ᯎᯒᯮᯖᯉ᯲

Sai margondang ma nasida na pitu ari i, sai manortori ro di na sombu be dihilala. 

ᯘᯤ ᯔᯒ᯲ᯎᯉᯬ᯲ᯑᯰ ᯔ ᯉᯘᯪᯑ ᯉ ᯇᯪᯖᯮ ᯀᯒᯪ ᯤ ᯘᯤ ᯔᯉᯒᯬ᯲ᯖᯬᯒᯪ ᯒᯬ ᯑᯪ ᯉ ᯘᯔᯬ᯲ᯅᯮ ᯅᯩ ᯑᯪᯂᯪᯞᯞ

Dung loja ba mangan bosur di bagasan las ni roha bolon. 

ᯑᯮᯰ ᯞᯬᯐ ᯅ ᯔᯝᯉ᯲ ᯅᯬᯘᯒᯮ᯲ ᯑᯪ ᯅᯎᯘᯉ᯲ ᯞᯘ᯲ ᯉᯪ ᯒᯬᯂ ᯅᯬᯞᯉᯬ᯲

Salpu ma na pitu ari, marujung ma gondang ni raja bolon i, na sangap i, Raja Sohuturon Dolak . ᯘᯞ᯲ᯇᯮ ᯔ ᯉ ᯇᯪᯖᯮ ᯀᯒᯪ ᯔᯒᯮᯐᯮᯰ ᯔ ᯎᯉᯬ᯲ᯑᯰ ᯉᯪ ᯒᯐ ᯅᯬᯞᯉᯬ᯲ ᯤ ᯉ ᯘᯝᯇ᯲ ᯤ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯄ᯦ᯬ᯲

Dung i dipaborhat Raja Sohurturon Dolak ma boruna dohot helana si Aji Panungkunan laho tu hutana Dolak Pargarutan. ᯑᯮᯰ ᯤ ᯑᯪᯇᯅᯒᯬ᯲ᯂᯖ᯲ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯄ᯦ᯬ᯲ ᯔ ᯅᯬᯒᯮᯉ ᯑᯬᯂᯖᯬ᯲ ᯂᯩᯞᯉ ᯘᯪ ᯀᯐᯪ ᯇᯉᯮᯰᯄᯮ᯦ᯉᯉ᯲ ᯞᯂᯬ ᯖᯮ ᯂᯮᯖᯉ ᯑᯬᯞᯄ᯦ᯬ᯲ ᯇᯒ᯲ᯎᯒᯮᯖᯉ᯲

Tangkas do nasida dipodai huhut muse dipasu-pasu.

 ᯖᯰᯄ᯦ᯘ᯲ ᯑᯬ ᯉᯘᯪᯑ ᯑᯪᯇᯬᯑᯤ ᯂᯮᯂᯖᯮ᯲ ᯔᯮᯘᯩ ᯑᯪᯇᯘᯮᯇᯘᯮ

Didok raja i ma, Masianju-anjuan ma hamu amang hela dohot ho inang, masiolo-oloan

 ᯑᯪᯑᯄ᯦ᯬ᯲ ᯒᯐ ᯤ ᯔ ᯔᯘᯪᯀᯉ᯲ᯐᯮᯀᯉ᯲ᯐᯮᯀᯉ᯲ ᯔ ᯂᯔᯮ ᯀᯔᯰ ᯂᯩᯞ ᯑᯬᯂᯖᯬ᯲ ᯂᯬ ᯤᯉᯰ ᯔᯘᯪᯀᯬᯞᯬᯀᯬᯞᯬᯀᯉ᯲

Sai adong do tutu angka na hurang di ngolu dohot angka pambahenan, alai dang tarida na mabikbik, ia adong na mandungkapi; ba dang adong tarida na matombuk, ia adong na olo manjarumi. 

ᯘᯤ ᯀᯑᯰᯬ ᯑᯬ ᯖᯮᯖᯮ ᯀᯰᯄ᯦ ᯉ ᯂᯮᯒᯰ ᯑᯪ ᯝᯬᯞᯮ ᯑᯬᯂᯖᯬ᯲ ᯀᯰᯄ᯦ ᯇᯔ᯲ᯅᯂᯩᯉᯉ᯲ ᯀᯞᯤ ᯑᯰ ᯖᯒᯪᯑ ᯉ ᯔᯅᯄ᯦ᯪ᯲ᯅᯄ᯦ᯪ᯲ ᯤᯀ ᯀᯑᯰᯬ ᯉ ᯔᯉ᯲ᯑᯮᯰᯄᯇᯪ ᯅ ᯑᯰ ᯀᯑᯰᯬ ᯖᯒᯪᯑ ᯉ ᯔᯖᯔᯬ᯲ᯅᯄ᯦ᯮ᯲ ᯤᯀ ᯀᯑᯰᯬ ᯉ ᯀᯬᯞᯬ ᯔᯉ᯲ᯐᯒᯮᯔᯪ

Ba sai ingot hamu ma na nidok ni angka natuatua dohot angka na bisuk marroha,pantun do hangoluan, tois hamagoan

 ᯅ ᯘᯤ ᯤᯝᯖᯬ᯲ ᯂᯔᯮ ᯔ ᯉ ᯉᯪᯑᯄ᯦ᯬ᯲ ᯉᯪ ᯀᯰᯄ᯦ ᯉᯖᯮᯀᯖᯮᯀ ᯑᯬᯂᯖᯬ᯲ ᯀᯰᯄ᯦ ᯉ ᯅᯪᯘᯄ᯦ᯮ᯲ ᯔᯒ᯲ᯒᯬᯂ ᯇᯉ᯲ᯖᯉᯮ᯲ ᯑᯬ ᯂᯝᯬᯞᯮᯘᯉ᯲ ᯖᯀᯘᯪ᯲ ᯂᯔᯎᯬᯀᯉ᯲

Pantun hamu marpangalaho maradophon angka hula-hula, dongan sabutuha dohot angka dongan ale-ale , songon i nang tu sude angka natua-tua.

ᯇᯉ᯲ᯖᯉᯮ᯲ ᯂᯔᯮ ᯔᯒ᯲ᯇᯝᯞᯂᯬ ᯔᯒᯑᯇᯬ᯲ᯂᯉᯬ᯲ ᯀᯰᯄ᯦ ᯂᯮᯞᯂᯮᯞ ᯑᯬᯝᯉ᯲ ᯘᯅᯮᯖᯮᯂ ᯑᯬᯂᯖᯬ᯲ ᯑᯬᯝᯉ᯲ ᯀᯞᯩᯀᯞᯩ ᯘᯬᯝᯉᯬ᯲ ᯤ ᯉᯰ ᯖᯮ ᯘᯮᯑᯩ ᯀᯰᯄ᯦ ᯉᯖᯮᯀᯖᯮᯀ

Balintang ma pagabe… tumandangkon sitadoan. Arimuna do gabe, mamora jala dapotan pansamotan. 

ᯅᯞᯉᯪ᯲ᯖᯰ ᯔ ᯇᯎᯅᯩ ᯖᯮᯔᯉ᯲ᯑᯰᯄ᯦ᯉᯬ᯲ ᯘᯪᯖᯑᯬᯀᯉ᯲ ᯀᯒᯪᯔᯮᯉ ᯑᯬ ᯎᯅᯩ ᯔᯔᯬᯒ ᯐᯞ ᯑᯇᯬᯖᯉ᯲ ᯇᯉ᯲ᯘᯔᯬᯖᯉ

Sai tubuan laklak ma, sai tubuan singkoru, di dolok ni Purbatua. Sai tubu ma anak di hamu tubu ma nang boru, angka donganmuna sarimatua. 

ᯘᯤ ᯖᯮᯅᯮᯀᯉ᯲ ᯞᯄ᯦᯲ᯞᯄ᯦᯲ ᯔ ᯘᯤ ᯖᯮᯅᯮᯀᯉ᯲ ᯘᯰᯪᯄ᯦ᯬᯒᯮ ᯑᯪ ᯑᯬᯞᯄ᯦ᯬ᯲ ᯉᯪ ᯇᯒᯮ᯲ᯅᯖᯮᯘ ᯘᯤ ᯖᯮᯅᯮ ᯔ ᯀᯉᯄ᯦᯲ ᯑᯪ ᯂᯔᯮ ᯖᯮᯅᯮ ᯔ ᯉᯰ ᯅᯬᯒᯮ ᯀᯰᯄ᯦ ᯑᯬᯝᯉ᯲ᯔᯮᯉ ᯘᯒᯪᯔᯖᯮᯀ

Habang ma simarsimbulan, tangki ma i jala ualang, rabion sibarebe. Tapangido ma sian Tuhan, tubu anak na gabe ulubalang, ba boru pe na mora jala pareme. 

ᯂᯅᯰ ᯔ ᯘᯪᯔᯒ᯲ᯘᯔ᯲ᯅᯮᯞᯉ᯲ ᯖᯰᯄ᯦ᯪ ᯔ ᯤ ᯐᯞ ᯥᯀᯞᯰ ᯒᯅᯪᯘᯉᯬ᯲ ᯘᯪᯅᯒᯩᯅᯩ ᯖᯇᯝᯪᯑᯬ ᯔ ᯘᯪᯀᯉ᯲ ᯖᯮᯂᯉ᯲ ᯖᯮᯅᯮ ᯀᯉᯄ᯦᯲ ᯉ ᯎᯅᯩ ᯥᯞᯮᯅᯞᯰ ᯅ ᯅᯬᯒᯮ ᯇᯩ ᯉ ᯔᯬᯒ ᯐᯞ ᯇᯒᯩᯔᯩ

Sahat-sahat ni solu, ba sahat ma tu bontean. Sai horas ma hita mangolu , sai sahat antong tu panggabean. 

ᯘᯂᯖ᯲ᯘᯂᯖ᯲ ᯉᯪ ᯘᯬᯞᯮ ᯅ ᯘᯂᯖ᯲ ᯔ ᯖᯮ ᯅᯉᯬ᯲ᯖᯩᯀᯉ᯲ ᯘᯤ ᯂᯬᯒᯘ᯲ ᯔ ᯂᯪᯖ ᯔᯝᯬᯞᯮ ᯘᯤ ᯘᯂᯖ᯲ ᯀᯉ᯲ᯖᯰᯬ ᯖᯮ ᯇᯰᯎᯅᯩᯀᯉ᯲

Borhat ma hamu amang hela, dainang dohot sude angka donganmuna, didongani Na Martua Debata!  ninna Raja Sohuturon Dolok laho paborhathon nasida . ᯅᯒᯬ᯲ᯂᯖ᯲ ᯔ ᯂᯔᯮ ᯀᯔᯰ ᯂᯩᯞ ᯑᯤᯉᯰ ᯑᯬᯂᯖᯬ᯲ ᯘᯮᯑᯩ ᯀᯰᯄ᯦ ᯑᯬᯝᯉ᯲ᯔᯮᯉ ᯑᯪ ᯑᯬᯝᯉᯪ ᯉ ᯔᯒ᯲ᯖᯮᯀ ᯑᯩᯅᯖ ᯉᯉᯪ᯲ᯉ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯄ᯦ᯬ᯲ ᯞᯂᯬ ᯇᯅᯒᯬ᯲ᯂᯖ᯲ᯂᯉᯬ᯲ ᯉᯘᯪᯑ

Dung i mandok hata ma ulubalang Partahan Soaloon, songon na mangamai si Aji Panungkunan, Olo tutu rajanami, mauliate ma di sude hata na uli, angka hata pasu-pasu na nilehon ni raja i di hami. 

ᯑᯮᯰ ᯤ ᯔᯉ᯲ᯑᯄ᯦ᯬ᯲ ᯂᯖ ᯔ ᯥᯞᯮᯅᯞᯰ ᯇᯒ᯲ᯖᯂᯉ᯲ ᯘᯬᯀᯞᯬᯀᯉᯬ᯲ ᯘᯬᯝᯉᯬ᯲ ᯉ ᯔᯝᯔᯤ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲ ᯀᯬᯞᯬ ᯖᯮᯖᯮ ᯒᯐᯉᯔᯪ ᯔᯥᯞᯪᯀᯖᯩ ᯔ ᯑᯪ ᯘᯮᯑᯩ ᯂᯖ ᯉ ᯥᯞᯪ ᯀᯰᯄ᯦ ᯂᯖ ᯇᯘᯮᯇᯘᯮ ᯉ ᯉᯪᯞᯩᯂᯉᯬ᯲ ᯉᯪ ᯒᯐ ᯤ ᯑᯪ ᯂᯔᯪ

Ba on ma dokononnami,

 ᯅ ᯀᯉᯬ᯲ ᯔ ᯑᯪᯂᯪᯉᯉᯬ᯲ᯉᯔᯪ

Hariara na bolon ma rajanami, bahen parlape-lapean. Hamu ma tutu raja bolon, na tau pangunsandean. ba hami marhulahula hamu rajanami, asa adong ma antong paulaean. 

ᯂᯒᯪᯀᯒ ᯉ ᯅᯬᯞᯉᯬ᯲ ᯔ ᯒᯐᯉᯔᯪ ᯅᯂᯉᯩ᯲ ᯇᯒ᯲ᯞᯇᯩᯞᯇᯩᯀᯉ᯲ ᯂᯔᯮ ᯲ ᯖᯮᯖᯮ ᯒᯐ ᯅᯬᯞᯉᯬ᯲ ᯉ ᯖᯥ ᯇᯝᯉᯮ᯲ᯘᯉ᯲ᯑᯩᯀᯉ᯲ ᯅ ᯂᯔᯪ ᯔᯒ᯲ᯂᯮᯞᯂᯮᯞ ᯂᯔᯮ ᯒᯐᯉᯔᯪ ᯀᯘ ᯀᯑᯰᯬ ᯔ ᯀᯉ᯲ᯖᯰᯬ ᯇᯥᯞᯀᯩᯀᯉ᯲

Anduhur martutu ma rajanami, di atas ni Purbatua. Horas ma hami na laho mardalan, Songon i ma nang hamu na tinggal di huta, rajanami! 

ᯀᯉ᯲ᯑᯮᯂᯒᯮ᯲ ᯔᯒ᯲ᯖᯮᯖᯮ ᯔ ᯒᯐᯉᯔᯪ ᯑᯪ ᯀᯖᯘ᯲ ᯉᯪ ᯇᯒᯮ᯲ᯅᯖᯮᯀ ᯂᯬᯒᯘ᯲ ᯔ ᯂᯔᯪ ᯉ ᯞᯂᯬ ᯔᯒ᯲ᯑᯞᯉ᯲ ᯘᯬᯝᯉᯬ᯲ ᯤ ᯔ ᯉᯰ ᯂᯔᯮ ᯉ ᯖᯰᯪᯎᯞ᯲ ᯑᯪ ᯂᯮᯖ ᯒᯐᯉᯔᯪ

Ba songon pangujungina, ba dohononnami ma muse:

 ᯅ ᯘᯬᯝᯉᯬ᯲ ᯇᯝᯮᯐᯮᯝᯪᯉ ᯅ ᯑᯬᯂᯬᯉᯉᯬ᯲ᯉᯔᯪ ᯔ ᯔᯮᯘᯩ

Sahat sahat ni solu, sai sahat ma tu bontean. Horas jala leleng hita mangolu, sahat ma tutu tu panggabean. 

ᯘᯂᯖ᯲ᯘᯂᯖ᯲ ᯉᯪ ᯘᯬᯞᯮ ᯘᯤ ᯘᯂᯖ᯲ ᯔ ᯖᯮ ᯅᯉᯬ᯲ᯖᯩᯀᯉ᯲ ᯂᯬᯒᯘ᯲ ᯐᯞ ᯞᯩᯞᯰᯩ ᯂᯪᯖ ᯔᯝᯬᯞᯮ ᯘᯂᯖ᯲ ᯔ ᯖᯮᯖᯮ ᯖᯮ ᯇᯰᯎᯅᯩᯀᯉ᯲

Boti ma da rajanami, Raja Sohuturon Dolok, dohot sude angka pangisi ni huta on! 

ᯅᯬᯖᯪ ᯔ ᯑ ᯒᯐᯉᯔᯪ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯄ᯦ᯬ᯲ ᯑᯬᯂᯖᯬ᯲ ᯘᯮᯑᯩ ᯀᯰᯄ᯦ ᯇᯝᯪᯘᯪ ᯉᯪ ᯂᯮᯖ ᯀᯉᯬ᯲

Songon i ma ulubalang Partahan Soaloon mangalusi hata ni raja i. ᯘᯬᯝᯉᯬ᯲ ᯤ ᯔ ᯥᯞᯮᯅᯞᯰ ᯇᯒ᯲ᯖᯂᯉ᯲ ᯘᯬᯀᯞᯬᯀᯉᯬ᯲ ᯔᯝᯞᯮᯘᯪ ᯂᯖ ᯉᯪ ᯒᯐ ᯤ

Dung i borhat ma si Aji Panungkunan dohot pardihutana si Tapi Marhillong Sere rap dohot angka pangisi ni huta Dolok Pargarutan tu hutanasida. 

ᯑᯮᯰ ᯤ ᯅᯒᯬ᯲ᯂᯖ᯲ ᯔ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲ ᯑᯬᯂᯖᯬ᯲ ᯇᯒ᯲ᯑᯪᯂᯮᯖᯉ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯰᯬ ᯘᯩᯒᯩ ᯒᯇ᯲ ᯑᯬᯂᯖᯬ᯲ ᯀᯰᯄ᯦ ᯇᯝᯪᯘᯪ ᯉᯪ ᯂᯮᯖ ᯑᯬᯞᯄ᯦ᯬ᯲ ᯇᯒ᯲ᯎᯒᯮᯖᯉ᯲ ᯖᯮ ᯂᯮᯖᯉᯘᯪᯑ

Di na mardalan i nasida, sanga dope diida si Aji Panungkunan bona ni gala-gala na tinalik ni Datu Pamurnas, na di topi ni Aek Parbaraan

 ᯑᯪ ᯉ ᯔᯒ᯲ᯑᯞᯉ᯲ ᯤ ᯉᯘᯪᯑ ᯘᯝ ᯑᯬᯇᯩ ᯑᯪᯤᯑ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲ ᯅᯬᯉ ᯉᯪ ᯎᯞᯎᯞ ᯉ ᯖᯪᯉᯞ᯲ᯞᯄ᯦ᯪ᯲ ᯉᯪ ᯑᯖᯮ ᯇᯔᯒᯮ᯲ᯉᯘ᯲ ᯉ ᯑᯪ ᯖᯬᯇᯪ ᯉᯪ ᯀᯀᯄᯩ᯲ ᯇᯒ᯲ᯅᯒᯀᯉ᯲

Jadi sai lungun ma rohana marningot i sudena, ai disi ma dialo ibana antong hata ni Datu Pamurnas na so uhum i, gabe i ma mula ni singkam mabarbar. Marudut-udut ma angka na hansit tinaonna.

 ᯐᯑᯪ ᯘᯤ ᯞᯮᯝᯉᯮ᯲ ᯔ ᯒᯬᯂᯉ ᯔᯒ᯲ᯉᯪᯝᯖᯬ᯲ ᯤ ᯘᯮᯑᯩᯉ ᯀᯤ ᯑᯪᯘᯪ ᯔ ᯑᯪᯀᯞᯬ ᯤᯅᯉ ᯀᯉ᯲ᯖᯰᯬ ᯂᯖ ᯉᯪ ᯑᯖᯮ ᯇᯔᯒᯮ᯲ᯉᯘ᯲ ᯉ ᯘᯬ ᯥᯂᯔᯮ᯲ ᯤ ᯎᯅᯩ ᯤ ᯔ ᯔᯮᯞ ᯉᯪ ᯘᯰᯪᯄ᯦ᯔ᯲ ᯔᯅᯒ᯲ᯅᯒ᯲ ᯔᯒᯮᯑᯖᯮ᯲ᯥᯝᯖᯮ᯲ ᯔ ᯀᯰᯄ᯦ ᯉ ᯂᯉ᯲ᯘᯖᯪ᯲ ᯖᯪᯉᯀᯉᯬ᯲ᯉ

Dung i diida si Tapi Mahillong Sere ma sai tungki si Aji Panungkunan, jadi dituntun ma tar jumolo angka pangisi ni huta i. 

ᯑᯮᯰ ᯤ ᯑᯪᯤᯑ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯰᯬ ᯘᯩᯒᯩ ᯔ ᯘᯤ ᯖᯮᯰᯄ᯦ᯪ ᯘᯪ ᯀᯐᯪ ᯇᯉᯮᯰᯄ᯦ᯉᯉ᯲ ᯐᯑᯪ ᯑᯪᯖᯉᯮ᯲ᯖᯉᯮ᯲ ᯔ ᯖᯒ᯲ ᯐᯮᯔᯬᯞᯬ ᯀᯰᯄ᯦ ᯇᯝᯪᯘᯪ ᯉᯪ ᯂᯮᯖ ᯤ

Dung tar anding nasida mardalan ma ibana di lambung ni si Aji Panungkunan, didok ma,

 ᯑᯮᯰ ᯖᯒ᯲ ᯀᯉᯬ᯲ᯑᯰᯪ ᯉᯘᯪᯑ ᯔᯒ᯲ᯑᯞᯉ᯲ ᯔ ᯤᯅᯉ ᯑᯪ ᯞᯔ᯲ᯅᯮᯰ ᯉᯪ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲ ᯑᯪᯑᯄ᯦ᯬ᯲ ᯔ

Olo dope ho anak ni namboru mangalap gala-gala na mardongan sirumondang bulan i! ᯀᯬᯞᯬ ᯑᯬᯇᯩ ᯂᯬ ᯀᯉᯄ᯦᯲ ᯉᯪ ᯉᯔ᯲ᯅᯬᯒᯮ ᯔᯝᯞᯇ᯲ ᯎᯞᯎᯞ ᯉ ᯔᯒ᯲ᯑᯬᯝᯉ᯲ ᯘᯪᯒᯮ᯲ᯉᯬ᯲ᯑᯰ ᯅᯮᯞᯉ᯲ ᯤ

Ndang olo be ahu da boru ni datulang, ai tung so tarturihon do hansitna. 

ᯑᯰ ᯀᯬᯞᯬ ᯅᯩ ᯀᯂᯮ ᯑ ᯅᯬᯒᯮ ᯉᯪ ᯑᯖᯮᯞᯰ ᯀᯤ ᯖᯮᯰ ᯘᯬ ᯖᯒ᯲ᯖᯮᯒᯪᯖᯮᯒᯪᯂᯉᯬ᯲ ᯑᯬ ᯂᯉ᯲ᯘᯖᯪ᯲ᯉ

I do umbahen sai tungki ahu, ala na huingot ma i sude! ninna si Aji Panungkunan. 

ᯤ ᯑᯬ ᯀᯔᯮ᯲ᯅᯂᯉᯩ᯲ ᯘᯤ ᯖᯮᯰᯄ᯦ᯪ ᯀᯂᯮ ᯀᯞ ᯉ ᯂᯮᯤᯎᯖᯬ᯲ ᯔ ᯤ ᯘᯮᯑᯩ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲

Olo tutu anak ni namboru. Tutu do i, godang na i na hansit dohot na dangol ditaon ho. 

ᯀᯬᯞᯬ ᯖᯮᯖᯮ ᯀᯉᯄ᯦᯲ ᯉᯪ ᯉᯔ᯲ᯅᯬᯒᯮ ᯖᯮᯖᯮ ᯑᯬ ᯤ ᯎᯬᯑᯰ ᯉ ᯤ ᯉ ᯂᯉ᯲ᯘᯖᯪ᯲ ᯑᯬᯂᯖᯬ᯲ ᯉ ᯑᯝᯞᯬ᯲ ᯑᯪᯖᯀᯉᯬ᯲ ᯂᯬ

lngkon dalananmu do i huroha saluhutna asa pajumpang hita, asa rap hita sahangoluan. ᯀᯰᯪᯄ᯦ᯉᯬ᯲ ᯑᯞᯉᯉ᯲ᯔᯮ ᯑᯬ ᯤ ᯂᯮᯒᯬᯂ ᯘᯞᯮᯂᯖᯮ᯲ᯉ ᯀᯘ ᯇᯐᯔᯮ᯲ᯇᯰ ᯂᯪᯖ ᯀᯘ ᯒᯇ᯲ ᯂᯪᯖ ᯘᯂᯝᯬᯞᯮᯀᯉ᯲

Aut so hona ihot ho di harangan pasihotangan i, atik na so ro do Boru Saniang Naga paboahon ubathi tu ho! ninna si Tapi Marhillong Sere. 

ᯀᯀᯖᯮ᯲ ᯘᯬ ᯂᯬᯉ ᯤᯂᯖᯬ᯲ ᯂᯬ ᯑᯪ ᯂᯒᯝᯉ᯲ ᯇᯑᯪᯂᯬᯖᯝᯉ᯲ ᯤ ᯀᯖᯄ᯦ᯪ᯲ ᯉ ᯘᯬ ᯒᯬ ᯑᯬ ᯅᯬᯒᯮ ᯘᯉᯪᯀᯰ ᯉᯎ ᯇᯅᯬᯀᯂᯉᯬ᯲ ᯥᯅᯖ᯲ᯂᯪᯅᯖᯮ ᯂᯬ ᯉᯉᯪ᯲ᯉ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯰᯬ ᯘᯩᯒᯩ

Tutu do na nidokmi ale boru ni datulang, dalan do i sude! ninna si Aji Panungkunan. 

ᯖᯮᯖᯮ ᯑᯪ ᯉ ᯉᯪᯑᯂᯬ᯲ᯔᯪ ᯀᯞᯩ ᯅᯬᯒᯮ ᯉᯪ ᯑᯖᯮᯞᯰ ᯑᯞᯉ᯲ ᯑᯬ ᯤ ᯘᯮᯑᯩ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲

Mago ma antong lungun ni rohana; indang tungki be ibana mardalan. 

ᯔᯎᯬ ᯔ ᯀᯉ᯲ᯖᯰᯬ ᯞᯮᯝᯉᯮ᯲ ᯉᯪ ᯒᯬᯂᯉ ᯀᯉᯪ᯲ᯑᯰ ᯖᯮᯰᯄ᯦ᯪ ᯅᯩ ᯤᯅᯉ ᯔᯒ᯲ᯑᯞᯉ᯲

Si Tapi Marhillong Sere pe dihudus ma tu jolo mangeahi angka donganna, ai nunga songon na dao di jolo an nasida. ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯰᯬ ᯘᯩᯒᯩ ᯇᯩ ᯑᯪᯂᯮᯑᯘᯮ᯲ ᯔ ᯖᯮ ᯐᯬᯞᯬ ᯔᯝᯩᯘᯂᯪ ᯀᯰᯄ᯦ ᯑᯬᯝᯉ᯲ᯉ ᯀᯤ ᯉᯮᯝ ᯘᯬᯝᯉᯬ᯲ ᯉ ᯑᯀᯬ ᯑᯪ ᯐᯬᯞᯬᯀᯉ᯲ ᯉᯘᯪᯑ

Dung i sai dihudus nasida ma na mardalan i, asa gira sahat tu Dolok Pargarutan, ai nunga antong guling dao ari. 

ᯑᯮᯰ ᯤ ᯘᯤ ᯑᯪᯂᯮᯑᯘᯮ᯲ ᯉᯘᯪᯑ ᯔ ᯉ ᯔᯒ᯲ᯑᯞᯉ᯲ ᯤ ᯀᯘ ᯎᯪᯒ ᯘᯂᯖ᯲ ᯖᯮ ᯑᯬᯞᯄ᯦ᯬ᯲ ᯇᯒ᯲ᯎᯒᯮᯖᯉ᯲ ᯀᯤ ᯉᯮᯝ ᯀᯉ᯲ᯖᯰᯬ ᯎᯮᯞᯰᯪ ᯑᯀᯬ ᯀᯒᯪ

Horas-horas do nasida sude sahat tu Dolok Pargarutan, jala songon na so dihilala nasida do na mardalan i, nang pe songon i dao, ala las ni rohanasida be ma i. 

ᯂᯬᯒᯘ᯲ᯂᯬᯒᯘ᯲ ᯑᯬ ᯉᯘᯪᯑ ᯘᯮᯑᯩ ᯑᯂᯖ᯲ ᯖᯮ ᯑᯬᯞᯄ᯦ᯬ᯲ ᯇᯒ᯲ᯎᯒᯮᯖᯉ᯲ ᯐᯞ ᯘᯬᯝᯉᯬ᯲ ᯉ ᯘᯬ ᯑᯪᯂᯪᯞᯞ ᯉᯘᯪᯑ ᯑᯬ ᯉ ᯔᯒ᯲ᯑᯞᯉ᯲ ᯤ ᯉᯰ ᯇᯩ ᯘᯬᯝᯉᯬ᯲ ᯤ ᯑᯀᯬ ᯀᯞ ᯞᯘ᯲ ᯉᯪ ᯒᯬᯂ ᯉᯘᯪᯑ ᯅᯩ ᯔ ᯤ

Marsogotna i marpio mangan ma si AJi Panungkunan, ro ma tutu sude pangisi ni huta i. ᯔᯒ᯲ᯘᯬᯎᯖᯬ᯲ᯉ ᯤ ᯔᯒ᯲ᯇᯪᯀᯬ ᯔᯝᯉ᯲ ᯔ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲ ᯒᯬ ᯔ ᯖᯮᯖᯮ ᯘᯮᯑᯩ ᯇᯝᯪᯘᯪ ᯉᯪ ᯂᯮᯖ ᯤ

Sipanganon las ni roha ma i, ala nunga denggan sude antong ulaon i marujung, horas-horas sahat nasida tu huta. ᯘᯪᯇᯝᯉᯉᯬ᯲ ᯞᯘ᯲ ᯉᯪ ᯒᯬᯂ ᯔ ᯤ ᯀᯞ ᯉᯮᯝ ᯑᯰᯩᯎᯉ᯲ ᯘᯮᯑᯩ ᯀᯉ᯲ᯖᯰᯬ ᯥᯞᯀᯉᯬ᯲ ᯤ ᯔᯒᯮᯐᯮᯰ ᯂᯬᯒᯘ᯲ᯂᯬᯒᯘ᯲ ᯘᯂᯖ᯲ ᯉᯘᯪᯑ ᯖᯮ ᯂᯮᯖ

Dang na mangkolit ahu da angka amang dohot hamu angka inang, molo tung hurang butong hamu; ba sibahenon dona so ada. 

ᯑᯰ ᯉ ᯔᯰᯄ᯦ᯬᯞᯖᯪ᯲ ᯀᯂᯮ ᯑ ᯀᯰᯄ᯦ ᯀᯔᯰ ᯑᯬᯂᯖᯬ᯲ ᯂᯔᯮ ᯀᯰᯄ᯦ ᯤᯉᯰ ᯔᯬᯞᯬ ᯖᯮᯰ ᯂᯮᯒ᯦ᯰ ᯅᯮᯖᯰᯬ ᯂᯔᯮ ᯅ ᯘᯪᯅᯂᯩᯉᯉᯬ᯲ ᯑᯬ ᯉ ᯘᯬ ᯀᯑ

Alai manang beha pe pangalaho ni sipanganon i, ba godang ma sibutong-butong, otik sipir ni tondi. 

ᯀᯞᯤ ᯔᯉᯰ ᯅᯩᯂ ᯇᯩ ᯇᯝᯞᯂᯬ ᯉᯪ ᯘᯪᯇᯝᯉᯉᯬ᯲ ᯤ ᯅ ᯎᯬᯑᯰ ᯔ ᯘᯪᯅᯮᯖᯰᯬᯅᯮᯖᯰᯬ ᯀᯬᯖᯄ᯦ᯪ᯲ ᯘᯪ ᯇᯒᯪ᯲ ᯉᯪ ᯖᯉᯬ᯲ᯑᯪ

Pamurnas ma i tu daging, ba saudara ma i tu bohi, sipalomak imbulu ma i, sipaneang holi-holi. 

ᯇᯔᯒᯮ᯲ᯉᯘ᯲ ᯔ ᯤ ᯖᯮ ᯑᯎᯰᯪ ᯅ ᯘᯥᯑᯒ ᯲ ᯤ ᯖᯮ ᯅᯬᯂᯪ ᯘᯪᯇᯞᯬᯔᯄ᯦᯲ ᯀᯔᯪ᯲ᯅᯮᯞᯮ ᯔ ᯤ ᯘᯪᯇᯉᯩᯀᯰ ᯂᯬᯞᯪᯂᯬᯞᯪ

Baboti ma da angka amang dohot hamu angka inang! ninna si Aji Panungkunan. 

ᯅᯬᯖᯪ ᯔ ᯑ ᯀᯰᯄ ᯀᯔᯰ ᯑᯬᯂᯖᯬ᯲ ᯂᯔᯮ ᯀᯰᯄ᯦ ᯤᯉᯰ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲

Jadi mangalusi ma natua-tua ni huta i, didok ma, Dang adong hami manarita da amang Aji Panungkunan. 

ᯐᯑᯪ ᯔᯝᯞᯮᯘᯪ ᯔ ᯉᯖᯮᯀᯖᯮᯀ ᯉᯪ ᯂᯮᯖ ᯤ ᯑᯪᯑᯄ᯦ᯬ᯲ ᯔ ᯑᯰ ᯀᯑᯰᯬ ᯂᯔᯪ ᯔᯉᯒᯪᯖ ᯑ ᯀᯔᯰ ᯀᯐᯪ ᯇᯉᯮᯰᯄ᯦ᯮᯉᯉ᯲

Nunga tung bosur hami mangan indahan na las, mahap do marlompan juhut.

 ᯉᯮᯝ ᯖᯮᯰ ᯅᯬᯘᯒᯮ᯲ ᯂᯔᯪ ᯔᯝᯉ᯲ ᯀᯉᯪ᯲ᯑᯂᯉ᯲ ᯉ ᯞᯘ᯲ ᯔᯂᯇ᯲ ᯑᯬ ᯔᯒ᯲ᯞᯔᯬ᯲ᯇᯉ᯲ ᯐᯮᯂᯖᯮ᯲

Ba on do dohononna mi:

 ᯅ ᯀᯉᯬ᯲ ᯑᯬ ᯑᯬᯂᯬᯉᯉᯬ᯲ ᯉᯔᯪ

Bagot na marhalto ma, na tubu di robean. Horas hami na manganhon, tubu di hamu singkat ni i na mangalehon. ᯅᯎᯖᯬ᯲ ᯉ ᯔᯒ᯲ᯂᯞ᯲ᯖᯬ ᯔ ᯉ ᯖᯮᯅᯮ ᯑᯪ ᯒᯬᯅᯩᯀᯉ᯲ ᯂᯬᯒᯘ᯲ ᯂᯔᯪ ᯉ ᯔᯝᯉ᯲ᯂᯉᯬ᯲ ᯖᯮᯅᯮ ᯝᯪ ᯂᯔᯮ ᯘᯰᯪᯄ᯦ᯖ᯲ ᯉᯪ ᯤ ᯉ ᯔᯝᯞᯩᯂᯉᯬ᯲

 
Ba andor ras ma andor ris, andor ni Simamora. Sai horas ma hita on jala torkis, sai rap gabe ma jala namora. 

ᯅ ᯀᯉ᯲ᯑᯒᯬ᯲ ᯒᯘ ᯔ ᯀᯉ᯲ᯑᯒᯬ᯲ ᯒᯘᯪ᯲ ᯀᯉᯑᯒᯬ᯲ ᯉᯪ ᯘᯪᯔᯔᯬᯒ? ᯘᯤ ᯂᯬᯒᯘ᯲ ᯔ ᯂᯪᯖ ᯀᯉᯬ᯲ ᯐᯞ ᯖᯒᯬ᯲ᯂᯘᯪ᯲ ᯘᯤ ᯒᯇ᯲ ᯎᯅᯩ ᯔ ᯐᯞ ᯔᯔᯬᯒ

Ba nunga hita horas-horas mulak sian Lobu Namaduma; sahat tu hutanta on so ada na hurang?

 ᯅ ᯉᯮᯝ ᯂᯪᯖ ᯂᯬᯒᯘ᯲ᯂᯬᯒᯘ᯲ ᯔᯮᯞᯄ᯦᯲ ᯘᯪᯀᯉ᯲ ᯞᯬᯅᯮ ᯉᯔᯑᯮᯔ ᯘᯂᯖ᯲ ᯖᯮ ᯂᯮᯖᯉ᯲ᯖ ᯀᯉᯬ᯲ ᯘᯬ ᯀᯑ ᯉ ᯂᯮᯒᯰ

Sai manumpak ma Na Martua Debata dipasaut sude angka na tasangkap; sahat ma tu hita on saluhutna parhorasan dohot panggabean! 

ᯘᯤ ᯔᯉᯔᯮ᯲ᯇᯄ᯦᯲ ᯔ ᯉ ᯔᯒ᯲ᯖᯮᯀ ᯑᯩᯅᯖ ᯑᯪᯇᯘᯀᯖᯮ᯲ ᯘᯮᯑᯩ ᯀᯰᯄ᯦ ᯉ ᯖᯘᯰᯄ᯦ᯇ᯲ ᯘᯂᯖ᯲ ᯔ ᯖᯮ ᯂᯪᯖ ᯀᯉᯬ᯲ ᯘᯞᯮᯂᯖᯮ᯲ᯉ ᯇᯒ᯲ᯂᯬᯒᯘᯉ᯲ ᯑᯬᯂᯖᯬ᯲ ᯇᯰᯎᯅᯩᯀᯉ᯲

Dung sun na mangan i, laos marpungu ma pangisi ni huta i muse tu sopo mangkatai taringot tu na bangkit raja si Aji Panungkunan. 

ᯑᯮᯰ ᯘᯉᯮ᯲ ᯉ ᯔᯝᯉ᯲ ᯤ ᯞᯀᯘᯬ᯲ ᯔᯒ᯲ᯇᯮᯝᯮ ᯔ ᯇᯝᯪᯘᯪ ᯉᯪ ᯂᯮᯖ ᯤ ᯔᯮᯘᯩ ᯖᯮ ᯘᯬᯇᯬ ᯔᯰᯄ᯦ᯖᯤ ᯖᯒᯪᯝᯖᯬ᯲ ᯖᯮ ᯉ ᯅᯰᯄ᯦ᯖᯪ᯲ ᯒᯐ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲

Nunga satolop nasida di bagasan las ni roha, ba dibuhul ma arina. 

ᯉᯮᯝ ᯘᯖᯬᯞᯇᯬ᯲ ᯉᯘᯪᯑ ᯑᯪ ᯅᯎᯘᯉ᯲ ᯞᯘ᯲ ᯉᯪ ᯒᯬᯂ ᯅ ᯑᯪᯅᯮᯂᯞᯮ᯲ ᯔ ᯀᯒᯪᯉ

Dijou nasida ma Raja Sohuturon Dolok sian Lobu Namaduma dohot angka natua-tua ni huta i, asa dohot nasida antong mangadopi ulaon i. ᯑᯪᯐᯬᯥ ᯉᯘᯪᯑ ᯔ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯄ᯦ᯬ᯲ ᯘᯪᯀᯉ᯲ ᯞᯬᯅᯮ ᯉ ᯔᯑᯮᯔ ᯑᯬᯂᯖᯬ᯲ ᯀᯰᯄ᯦ ᯉᯖᯮᯀᯖᯮᯀ ᯉᯪ ᯂᯮᯖ ᯤ ᯀᯘ ᯑᯬᯂᯖᯬ᯲ ᯉᯘᯪᯑ ᯀᯉ᯲ᯖᯰᯬ ᯔᯝᯑᯬᯇᯪ ᯥᯞᯀᯉᯬ᯲ ᯤ

Dung dapot arina marroan ma angka na jinou, ro ma nang raja ni Lobu Namaduma, simatua ni si Aji Panungkunan. 

ᯑᯮᯰ ᯑᯇᯖᯬ᯲ ᯀᯒᯪᯉ ᯔᯒᯒᯬᯀᯉ᯲ ᯔ ᯀᯰᯄ᯦ ᯉ ᯐᯪᯉᯬᯥ ᯒᯬ ᯔ ᯉᯰ ᯒᯐ ᯉᯪ ᯞᯬᯅᯮ ᯉᯔᯑᯮᯔ ᯘᯪᯔᯖᯮᯀ ᯉᯪ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲

Diborothon ma horbo di tonga ni alaman, ditullang ma, disahe jala diparmasak.

 ᯑᯪᯅᯬᯒᯖᯬ᯲ᯂᯉᯬ᯲ ᯔ ᯂᯒᯬ᯲ᯅᯬ ᯑᯪ ᯖᯬᯝᯖᯬᯝ ᯉᯪ ᯀᯞᯔᯉ᯲ ᯑᯪᯖᯞᯮ᯲ᯞᯰ ᯔ ᯝᯪᯘᯂᯩᯤ ᯐᯞ ᯑᯪᯇᯒ᯲ᯔᯘᯄ᯦᯲

Dipalu ma gondang, manortor be ma nasida jala ditariashon ma antong naung bangkit si Aji Panungkunan gabe raja ni Dolok Pargarutan 

ᯑᯪᯇᯞᯮ ᯔ ᯎᯉᯬ᯲ᯑᯰ ᯔᯉᯒᯬ᯲ᯖᯒᯬ᯲ ᯅᯩ ᯔ ᯉᯘᯪᯑ ᯐᯞ ᯑᯪᯖᯒᯪᯀᯘ᯲ᯂᯉᯬ᯲ ᯔ ᯀᯉ᯲ᯖᯰᯬ ᯉᯀᯮᯰ ᯅᯰᯄ᯦ᯖᯪ᯲ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲ ᯎᯅᯩ ᯒᯐ ᯉᯪ ᯑᯬᯞᯄ᯦ᯬ᯲ ᯇᯒ᯲ᯎᯒᯮᯖᯉ᯲

Saut ma pampe tu ibana harajaon ni amana nahinan.

ᯘᯀᯖᯮ᯲ ᯔ ᯇᯔ᯲ᯇᯩ ᯖᯮ ᯤᯅᯉ ᯂᯒᯐᯀᯉᯬ᯲ ᯉᯪ ᯀᯔᯉ ᯉᯂᯪᯉᯉ᯲

Sidung na manortor i mangan ma nasida 

ᯘᯪᯑᯮᯰ ᯉ ᯔᯉᯒᯬ᯲ᯖᯒᯬ᯲ ᯤ ᯔᯝᯉ᯲ ᯔ ᯉᯘᯪᯑ

Sai las ma roha ni ina ni si Aji Panungkunan; sipata songon nipi dihilala na masa i? 

ᯘᯤ ᯞᯘ᯲ ᯔ ᯒᯬᯂ ᯉᯪ ᯤᯉ ᯉᯪ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲ ᯘᯪᯇᯖ ᯘᯬᯝᯉᯬ᯲ ᯉᯪᯇᯪ ᯑᯪᯂᯪᯞᯞ ᯉ ᯔᯘ ᯤ

Mansai las rohana, ai nunga bangkit raja anakna 

ᯔᯉ᯲ᯘᯤ ᯞᯘ᯲ ᯒᯬᯂᯉ ᯀᯤ ᯉᯮᯝ ᯅᯰᯄ᯦ᯖᯪ᯲ ᯒᯐ ᯀᯉᯄ᯦᯲ᯉ

Nunga adong antong donganna sahangoluan manungkol-nungkoli ibana di ngoluna. 

ᯉᯮᯝ ᯀᯑᯰᯬ ᯀᯉ᯲ᯖᯰᯬ ᯑᯬᯝᯉ᯲ᯉ ᯘᯂᯝᯬᯞᯮᯀᯉ᯲ ᯔᯉᯮᯰᯄ᯦ᯞᯬ᯲ᯉᯮᯰᯄ᯦ᯬᯞᯪ ᯤᯅᯉ ᯑᯪ ᯝᯬᯞᯮᯉ

Tung diapus do ate-atena molo dibereng parumaenna si Tapi Marhillong Sere na uli i, na so ada anian 

ᯖᯮᯰ ᯑᯪᯀᯇᯘᯮ᯲ ᯑᯬ ᯀᯖᯩᯀᯖᯩᯉ ᯔᯬᯞᯬ ᯑᯪᯅᯩᯒᯰᯩ ᯇᯒᯮᯔᯀᯉᯩ᯲ᯉ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯰᯬ ᯘᯩᯒᯩ ᯉ ᯥᯞᯪ ᯤ ᯘᯬ ᯀᯑ ᯀᯉᯪᯀᯉ᯲

Alai ndada holan rupana uli, tung dohot do pangalahona so hasurahan. ᯀᯞᯤ ᯉ᯲ᯑᯑ ᯂᯬᯞᯉ᯲ ᯒᯮᯇᯉ ᯥᯞᯪ ᯖᯮᯰ ᯑᯬᯂᯖᯬ᯲ ᯑᯬ ᯇᯝᯞᯂᯬᯉ ᯘᯬ ᯂᯘᯮᯒᯂᯉ᯲

Boru ni raja ma antong, na umboto sude ruhut-ruhut ni adat. ᯅᯬᯒᯮ ᯉᯪ ᯒᯐ ᯔ ᯀᯉ᯲ᯖᯰᯬ ᯉ ᯀᯔᯮ᯲ᯅᯬᯖᯬ ᯘᯮᯑᯩ ᯒᯮᯂᯖᯮ᯲ᯒᯮᯂᯖᯮ᯲ ᯉᯪ ᯀᯑᯖ᯲

Sude do pangisi hi huta i marlas ni roha. Hira na diboan si Tapi Marhillong Sere do pasu-pasuan ni Lobu Namaduma? 

ᯘᯮᯑᯩ ᯑᯬ ᯇᯝᯪᯘᯪ ᯉᯪ ᯂᯮᯖ ᯤ ᯔᯒ᯲ᯞᯘ᯲ ᯉᯪ ᯒᯬᯂ ᯂᯪᯒ ᯉ ᯑᯪᯅᯬᯀᯉ᯲ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯰᯬ ᯘᯩᯒᯩ ᯑᯬ ᯇᯘᯮᯇᯘᯮᯀᯉ᯲ ᯉᯪ ᯞᯬᯅᯮ ᯉᯔᯑᯮᯔ

Ai ringgas ma halak sude mulaulaon, ba gabe ma na niula, sinur ma na pinahan, mamora ma tutu pangisi ni Dolok Pargarutan. 

ᯘᯤ ᯒᯰᯪᯎᯘ᯲ ᯔ ᯂᯞᯄ᯦᯲ ᯘᯮᯑᯩ ᯔᯮᯞᯥᯞᯀᯉᯬ᯲ ᯅ ᯎᯅᯩ ᯔ ᯉ ᯉᯪᯥᯞ ᯘᯪᯉᯒᯮ᯲ ᯔ ᯉ ᯇᯪᯉᯂᯉ᯲ ᯔᯔᯬᯒ ᯔ ᯖᯮᯖᯮ ᯇᯝᯪᯘᯪ ᯉᯪ ᯑᯬᯞᯄ᯦ᯬ᯲ ᯇᯒ᯲ᯎᯒᯮᯖᯉ᯲

Sai satahi ma pangisi ni Lobu Namaduma dohot pangisi ni Dolok Pargarutan. 

ᯘᯤ ᯘᯖᯂᯪ ᯔ ᯇᯝᯪᯘᯪ ᯉᯪ ᯞᯬᯅᯮ ᯉᯔᯑᯮᯔ ᯑᯬᯂᯖᯬ᯲ ᯇᯝᯪᯘᯪ ᯉᯪ ᯑᯬᯞᯄ᯦ᯬ᯲ ᯇᯒ᯲ᯎᯒᯮᯖᯉ᯲

Dang adong manang huta dia pe na mangate mangalo nasida. 

ᯑᯰ ᯀᯑᯰᯬ ᯔᯉᯰ ᯂᯮᯖ ᯑᯪᯀ ᯇᯩ ᯉ ᯔᯝᯖᯩ ᯔᯝᯞᯬ ᯉᯘᯪᯑ

Sonang be ma nasida mangula angka ulaonna, so haribo-riboan. ᯘᯬᯉᯰ ᯅᯩ ᯔ ᯉᯘᯪᯑ ᯔᯝᯮᯞ ᯀᯰᯄ᯦ ᯥᯞᯀᯀᯉᯬ᯲ᯉ ᯘᯬ ᯂᯒᯪᯅᯬᯒᯪᯅᯬᯀᯉ᯲

Dung i mamora ma Raja Aji Panungkunan 

ᯑᯮᯰ ᯤ ᯔᯔᯬᯒ ᯔ ᯒᯐ ᯀᯐᯪ ᯇᯉᯮᯰᯄ᯦ᯮᯉᯉ᯲

Songon Raja Sohuturon Dolok do ibana mangarajai, parhatian na so teleng, sihorus na gurgur, sitambai na hurang. 

ᯘᯬᯝᯉᯬ᯲ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯄ᯦ᯬ᯲ ᯑᯬ ᯤᯅᯉ ᯔᯝᯒᯐᯤ ᯇᯒ᯲ᯂᯖᯪᯀᯉ᯲ ᯉ ᯘᯬ ᯖᯩᯞᯰᯩ ᯘᯪᯂᯬᯒᯘᯮ᯲ ᯉ ᯎᯒᯮ᯲ᯎᯒᯮ᯲ ᯘᯪᯖᯔ᯲ᯅᯤ ᯉ ᯂᯮᯒᯰ

Sonang ma raja i dohot pardihutana si Tapi Marhillong Sere, gabe ma huhut nasida, maranak marboru

 ᯘᯬᯉᯰ ᯔ ᯒᯐ ᯤ ᯑᯬᯂᯖᯬ᯲ ᯇᯒ᯲ᯑᯪᯂᯮᯖᯉ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯰᯬ ᯘᯩᯒᯩ ᯎᯅᯩ ᯔ ᯂᯮᯂᯖᯮ᯲ ᯉᯘᯪᯑ ᯔᯒᯉᯄ᯦᯲ ᯔᯒ᯲ᯅᯬᯒᯮ