ᯖᯮᯒᯪᯖᯮᯪᯀᯉ᯲ ᯉᯪ ᯘᯪ ᯀᯐᯪ ᯇᯉᯰᯮᯄ᯦ᯮᯉᯉ᯲ Turi-turian ni si Aji Panungkunan Turpuk Paduahon (Pangke Android)

Dao di dangsina ni huta Dolok Pargarutan, di jae adu, adong do sada rura na napu. 

ᯑᯀᯬ ᯘᯪᯀᯉ᯲ ᯑᯰᯘᯪᯉ ᯉᯪ ᯂᯮᯖ ᯑᯬᯞᯂᯬ᯲ ᯇᯒ᯲ᯎᯒᯮᯖᯉ᯲ ᯑᯪ ᯐᯀᯩ ᯀᯑᯮ ᯀᯑᯬᯰ ᯑᯪᯬ ᯘᯑ ᯒᯮᯒ ᯉ ᯉᯇᯮ

Disi ma huta Lobu Namaduma. 

ᯑᯪᯘᯪ ᯔ ᯂᯮᯖ ᯞᯬᯅᯮ ᯉᯔᯑᯮᯔ

Raja Sohuturon Dolok do maringanan disi, tar dingkan habinsaran ni Aek Godang Batangtoru. 

ᯒᯐ ᯘᯬᯂᯮᯖᯮᯝᯉᯬ᯲ ᯑᯬᯞᯂᯬ᯲ ᯑᯬ ᯔᯒᯪᯝᯉᯉ᯲ ᯑᯪᯘᯪ ᯖᯒ᯲ ᯑᯪᯰᯂᯉ᯲ ᯂᯅᯉᯪ᯲ᯘᯒᯉ᯲ ᯉᯪ ᯀᯀᯂᯩ᯲ ᯎᯬᯑᯰ ᯅᯖᯰᯖᯬᯒᯮ

Raja na tigor roha do ibana, parhatian na so ra teleng, sihorus na gurgur, siambai na hurang.

ᯖᯐ ᯉ ᯖᯪᯎᯒᯬ᯲ ᯒᯬᯂ ᯑᯬ ᯤᯅᯉ ᯇᯒ᯲ᯂᯖᯪᯂ ᯉ ᯘᯬ ᯒ ᯖᯩᯞᯩᯰ

Marsonang-sonang do sude pangisi ni huta i, ai sai satahi saoloan do sudena nasida mangula angka siulaon dohot manjaga hutana.

ᯔᯒ᯲ᯘᯬᯉᯰᯘᯬᯉᯰ ᯑᯬ ᯘᯮᯑᯩ ᯇᯝᯪᯘᯪ ᯉᯪ ᯂᯮᯖ ᯤ ᯀᯤ ᯘᯤ ᯘᯖᯂᯪ ᯘᯀᯬᯞᯬᯀᯉ᯲ ᯑᯬ ᯘᯮᯑᯩᯉ ᯉᯘᯪᯑ ᯔᯝᯮᯞ ᯀᯰᯂ ᯘᯪᯥᯞᯀᯉᯬ᯲ ᯑᯬᯂᯖᯬ᯲ ᯔᯉ᯲ᯐᯎ ᯂᯮᯖᯉ

Adong do tubu hariara bolon di lambung ni harbangan ni huta i; hariara na rugun parlinggoman di las ni ari. 

ᯀᯑᯬᯰ ᯑᯬ ᯖᯮᯅᯮ ᯂᯒᯪᯀᯒ ᯅᯬᯞᯉᯬ᯲ ᯑᯪ ᯞᯔ᯲ᯅᯮᯰ ᯉᯪ ᯂᯒ᯲ᯅᯝᯉ᯲ ᯉᯪ ᯂᯮᯖ ᯤ ᯂᯒᯪᯀᯒ ᯉ ᯒᯮᯎᯉᯮ᯲ ᯇᯒ᯲ᯞᯪᯰᯎᯬᯔᯉ᯲ ᯑᯪ ᯞᯘ᯲ ᯉᯪ ᯀᯒᯪ

Di toru ni hariara i ma hundul-hundul angka natua-tua marnonang-nonang manang mansisudu di manogot i, jumpa ngali ari.

ᯑᯪ ᯖᯬᯒᯮ ᯉᯪ ᯂᯒᯪᯀᯒ ᯤ ᯔ ᯂᯉᯮ᯲ᯑᯞᯮ᯲ ᯂᯉᯮ᯲ᯑᯞᯮ᯲ ᯀᯰᯂ ᯉᯖᯮᯀᯖᯮᯀ ᯔᯒ᯲ᯉᯬᯉᯰᯉᯬᯉᯰ ᯔᯉᯰ ᯔᯉ᯲ᯘᯪᯘᯮᯑᯮ ᯑᯪ ᯔᯉᯬᯝᯖᯬ᯲ ᯤ ᯐᯔᯮ᯲ᯇ ᯝᯞᯪ ᯀᯒᯪ

Sai longang do halak marnida rugun ni hariara i dohot hinauli ni angka dangkana; songon tanda ma i di na marnidasa. 

ᯘᯤ ᯞᯬᯑᯰ ᯑᯬ ᯂᯞᯂ᯲ ᯔᯒ᯲ᯉᯪᯑ ᯒᯮᯎᯉᯮ᯲ ᯉᯪ ᯂᯒᯪᯀᯒ ᯤ ᯑᯬᯂᯖᯬ᯲ ᯂᯪᯉᯥᯞᯪ ᯉᯪ ᯀᯰᯂ ᯑᯰᯂᯉ ᯘᯬᯝᯉᯬ᯲ ᯖᯉ᯲ᯑ ᯔ ᯤ ᯑᯪ ᯉ ᯔᯒ᯲ᯉᯪᯑᯘ

I ma na paboahon hinaduma ni Lobu Namaduma.

ᯤ ᯔ ᯉ ᯇᯅᯬᯀᯂᯉᯬ᯲ ᯂᯪᯉᯑᯮᯔ ᯉᯪ ᯞᯬᯅᯮ ᯉᯔᯑᯮᯔ

Dung i ro ma tingki i buat emeon; marlas ni roha ma saluhutna, na poso dohot na matua. 

ᯑᯮᯰ ᯤ ᯒᯬ ᯔ ᯖᯪᯰᯂᯪ ᯤ ᯅᯮᯀᯖ᯲ ᯀᯩᯔᯩᯀᯉᯬ᯲ ᯔᯒ᯲ᯞᯘ᯲ ᯉᯪ ᯒᯪᯂ ᯔ ᯘᯞᯮᯂᯖᯮ᯲ᯉ ᯉ ᯇᯬᯘᯬ ᯑᯪᯬᯂᯖᯬ᯲ ᯉ ᯔᯖᯮᯀ

Diporsan be ma emena tu huta, simpan ma sudena dibahen.

ᯑᯪᯇᯒᯬ᯲ᯘᯉ᯲ ᯅᯩ ᯔ ᯀᯩᯔᯩᯉ ᯖᯮ ᯂᯮᯖ ᯘᯔᯪ᯲ᯇᯉ᯲ ᯔ ᯘᯮᯑᯩᯉ ᯑᯪᯅᯂᯉᯩ᯲

Dung simpul na mambuat eme i, di na sadari sai marhobot ma langit. 

ᯑᯮᯰ ᯘᯔᯪ᯲ᯇᯞᯮ᯲ ᯉ ᯔᯔ᯲ᯅᯮᯀᯖ᯲ ᯀᯩᯔᯩ ᯤ ᯑᯪ ᯉ ᯘᯑᯒᯪ ᯘᯤ ᯔᯒ᯲ᯂᯬᯅᯖᯬ᯲ ᯔ ᯞᯝᯖᯪ᯲

Dung i ro ma udan nene; sai songon i manang na piga ari.

ᯑᯮᯰ ᯤ ᯒᯬ ᯔ ᯥᯑᯉ᯲ ᯉᯩᯉᯩ ᯘᯤ ᯘᯬᯝᯉᯬ᯲ ᯤ ᯔᯉᯰ ᯉ ᯇᯪᯎ ᯀᯒᯪ

Dung i por ma udan, pur ma haba-haba, sai mangullus gogo; sai songon na gasa-gasaon ma mamiu dangka parginjang ni hariara i.

ᯑᯮᯰ ᯤ ᯇᯒᯬ᯲ ᯔ ᯥᯑᯉ᯲ ᯉᯩᯉᯩ ᯇᯒᯮ᯲ ᯔ ᯂᯅᯂᯅ ᯘᯤ ᯔᯝᯞᯮ᯲ᯞᯘᯮ᯲ ᯎᯬᯎᯬ ᯘᯤ ᯘᯬᯝᯉᯬ᯲ ᯉ ᯎᯘᯎᯘᯀᯉᯬ᯲ ᯔ ᯔᯔᯪᯥ ᯑᯰᯂ ᯇᯒ᯲ᯝᯉᯪ᯲ᯐᯰ ᯉᯪ ᯂᯒᯪᯀᯒ ᯤ

Alai dang nanggo diterge idaon. 

ᯀᯞᯤ ᯑᯰ ᯉᯰᯎᯬ ᯑᯪᯖᯒᯩ᯲ᯎᯩ ᯤᯑᯀᯉᯬ᯲

Hape bornginna i tarbege ma mardaras soara ni dangka na masuak, alai dang pola madabu dangka i.

ᯂᯇᯩ ᯅᯒᯬ᯲ᯝᯉᯪ᯲ᯉ ᯤ ᯖᯒ᯲ᯅᯩᯎᯩ ᯔ ᯔᯒ᯲ᯑᯒᯘ᯲ ᯘᯬᯀᯒ ᯉᯪ ᯑᯰᯂ ᯉ ᯔᯘᯮᯀᯂ᯲ ᯀᯞᯤ ᯑᯰ ᯇᯬᯞ ᯔᯑᯅᯮ ᯑᯰᯂ ᯤ

Manogotna i dung torang ari ro be ma pangisi ni huta i tu bona ni hariara i; diida nasida ma antong adong dangkana na masuak satonga, gaung-gaung di ginjang an.

ᯔᯉᯬᯎᯖᯬ᯲ᯉ ᯤ ᯑᯮᯰ ᯖᯬᯒᯰ ᯀᯒᯪ ᯒᯬ ᯅᯩ ᯔ ᯇᯝᯪᯘᯪ ᯉᯪ ᯂᯮᯖ ᯤ ᯖᯮ ᯅᯪᯉ ᯉᯪ ᯂᯒᯪᯀᯒ ᯤ ᯑᯪᯤᯑ ᯉᯘᯪᯑ ᯔ ᯀᯉ᯲ᯖᯬᯰ ᯀᯑᯬᯰ ᯑᯰᯂᯉ ᯉ ᯔᯘᯮᯀᯂ᯲ ᯘᯖᯬᯝ ᯎᯀᯮᯰᯎᯀᯮᯰ ᯑᯪ ᯎᯉᯪ᯲ᯐᯰ ᯀᯉ᯲

Alatan do salelengna on hariara i di nasida. 

ᯀᯞᯖᯉ᯲ᯑᯬ ᯘᯞᯩᯞᯩᯰᯉ ᯀᯉᯬ᯲ ᯂᯒᯪᯀᯒ ᯤ ᯑᯪ ᯉᯘᯪᯑ

Molo sai rugun bulungna, gogo sude dangkana mangalo alogo, i ma tandana na so ada mara manang sahit sitagamon. 

ᯔᯬᯞᯬ ᯘᯤ ᯒᯮᯎᯉᯮ᯲ ᯅᯮᯞᯮᯰᯉ ᯎᯬᯎᯬ ᯘᯮᯑᯩ ᯑᯰᯂᯉ ᯔᯝᯞᯬ ᯀᯞᯬᯎᯬ ᯤ ᯔ ᯖᯉ᯲ᯑᯉ ᯉ ᯘᯬ ᯀᯑ ᯔᯒ ᯔᯉ᯦ᯰ ᯘᯂᯖᯪ᯲ ᯘᯪᯖᯎᯔᯉᯬ᯲

Songon i ma salelengna on,sai hot do hariara i jongjong, sai rugun do bulungna.

ᯘᯬᯝᯉᯬ᯲ ᯤ ᯔ ᯘᯞᯩᯞᯩᯰᯉ ᯀᯉᯬ᯲ ᯘᯤ ᯂᯖᯬ᯲ ᯑᯬ ᯂᯒᯪᯀᯒ ᯤ ᯐᯬᯰᯐᯬᯰ ᯘᯤ ᯒᯮᯎᯉᯮ᯲ ᯑᯬ ᯅᯮᯞᯮᯰᯉ

Dung diida nasida dangka na masuak i, songon na tarhatotong be ma nasida. 

ᯑᯮᯰ ᯑᯪᯤᯑ ᯉᯘᯪᯑ ᯑᯰᯂ ᯉ ᯔᯘᯮᯀᯂ᯲ ᯤ ᯘᯬᯝᯉᯬ᯲ ᯉ ᯖᯒ᯲ᯂᯖᯬᯖᯬᯰ ᯅᯩ ᯔ ᯉᯘᯪᯑ

Raja Sohuturon Dolok pe nunga ro; dipamanat ibana ma parsuak ni dangka i. 

ᯎᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲ ᯇᯩ ᯉᯮᯝ ᯒᯬ ᯑᯪᯇᯔᯉᯖ᯲ ᯤᯅᯉ ᯔ ᯇᯒ᯲ᯘᯮᯀᯂ᯲ ᯉᯪ ᯑᯰᯂ ᯤ

Dung i langan-langan ma bohina.

ᯑᯮᯰ ᯤ ᯞᯝᯉ᯲ᯞᯝᯉ᯲ ᯔ ᯅᯬᯂᯪᯉ

Diida ulubalangna, si Partallik Najingar, ma bohi ni raja i, dung i didok ibana ma 

ᯑᯪᯤᯑ ᯥᯞᯮᯅᯞᯰᯉ ᯘᯪ ᯇᯒ᯲ᯖᯞ᯲ᯞᯂᯪ᯲ ᯉᯐᯪᯝᯒ᯲ ᯔ ᯅᯬᯂᯪ ᯉᯪ ᯒᯐ ᯤ ᯑᯮᯰ ᯤ ᯑᯪᯑᯂᯬ᯲ ᯤᯅᯉ ᯔ

Ndang pola dia da rajanami! Satonga do suak dangka i; olo do i muse mardomu; dang pola dabu i tu toru!

ᯑᯰ ᯇᯬᯞ ᯑᯪᯀ ᯤ ᯒᯐᯉᯔᯪ ᯘᯖᯬᯝ ᯑᯬ ᯘᯮᯀᯂ᯲ ᯑᯰᯂ ᯤ ᯀᯬᯞᯬ ᯑᯬ ᯤ ᯔᯮᯘᯩ ᯔᯒ᯲ᯑᯬᯔᯮ ᯑᯰ ᯇᯬᯞ ᯑᯅᯮ ᯤ ᯖᯮ ᯖᯬᯒᯮ

Olo ba tutu! Alai so hea dope adong masa songon on!" ninna Raja Sohuturon Dolok.

ᯀᯬᯞᯬ ᯅ ᯖᯮᯖᯮ ᯀᯞᯤ ᯘᯬ ᯂᯩᯀ ᯑᯬᯇᯩ ᯀᯑᯬᯰ ᯔᯘ ᯘᯬᯝᯉᯬ᯲ ᯀᯉᯬ᯲ ᯉᯉᯪ᯲ᯉ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯂᯬ᯲

Parro ni udan i pe dohot alogo i tung tompu do da rajanami! ninna ulubalang i

ᯇᯒ᯲ᯒᯬ ᯉᯪ ᯥᯑᯉ᯲ ᯤ ᯇᯩ ᯑᯬᯂᯖᯬ᯲ ᯀᯞᯬᯎᯬ ᯤ ᯖᯮᯰ ᯖᯔᯬ᯲ᯇᯮ ᯑᯬ ᯑ ᯒᯐᯉᯔᯪ ᯉᯉᯪ᯲ᯉ ᯥᯞᯮᯅᯞᯰ ᯤ

Dung i mulak be ma nasida tu bagasna, laho mangan manogot i.

ᯑᯮᯰ ᯤ ᯔᯮᯞᯂ᯲ ᯅᯩ ᯔ ᯉᯘᯪᯑ ᯖᯮ ᯅᯎᯘ᯲ᯉ ᯞᯂᯬ ᯔᯝᯉ᯲ ᯔᯉᯬᯎᯖᯬ᯲ ᯤ