ᯖᯮᯒᯪᯖᯮᯪᯀᯉ᯲ ᯉᯪ ᯘᯪ ᯀᯐᯪ ᯇᯉᯰᯮᯄ᯦ᯮᯉᯉ᯲ Turi-turian ni si Aji Panungkunan Turpuk Pasampuluduahon (Pangke Android)

Ia si Aji Panungkunan, sai marlojongi ma ibana maninggalhon ramba parburuan aili i. ᯤᯀ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲ ᯘᯤ ᯔᯒ᯲ᯞᯬᯐᯬᯝᯪ ᯔ ᯤᯅᯉ ᯔᯉᯰᯪᯎᯞ᯲ᯂᯉᯬ᯲ ᯒᯔ᯲ᯅ ᯇᯒ᯲ᯅᯮᯒᯮᯀᯉ᯲ ᯀᯤᯞᯪ ᯤ

Nunga tung loja ibana, nunga sai marhosa-hosa. ᯉᯮᯝ ᯖᯮᯰ ᯞᯬᯐ ᯤᯅᯉ ᯉᯮᯝ ᯘᯤ ᯔᯒ᯲ᯂᯬᯘᯂᯬᯘ

Dung potang ari sahat ma ibana tu sopo parbornginan, uju na mangalului gala-gala i ibana, rap dohot donganna na dua halak i. ᯑᯮᯰ ᯇᯬᯖᯰ ᯀᯒᯪ ᯘᯂᯖ᯲ ᯔ ᯤᯅᯉ ᯖᯮ ᯘᯬᯇᯬ ᯇᯒ᯲ᯅᯒᯬ᯲ᯝᯪᯉᯉ᯲ ᯥᯐᯮ ᯉ ᯔᯝᯞᯮᯞᯮᯤ ᯎᯞᯎᯞ ᯤ ᯤᯅᯉ ᯒᯇ᯲ ᯑᯬᯂᯖᯬ᯲ ᯑᯬᯝᯉ᯲ᯉ ᯉ ᯑᯮᯀ ᯂᯞᯄ᯦᯲ ᯤ

Hundul ma ibana songon na mandate di sopo i, jadi tangis ma ibana marningot inana na tinggal di hutanasida. ᯂᯉᯮ᯲ᯑᯞᯮ᯲ ᯔ ᯤᯅᯉ ᯘᯬᯝᯉᯬ᯲ ᯉ ᯔᯉ᯲ᯑᯖᯩ ᯑᯪ ᯘᯬᯇᯬ ᯤ ᯐᯑᯪ ᯖᯝᯘᯪ᯲ ᯔ ᯤᯅᯉ ᯔᯒ᯲ᯉᯪᯝᯖᯬ᯲ ᯤᯉᯉ ᯉ ᯖᯰᯪᯎᯞ᯲ ᯑᯪ ᯂᯮᯖᯉᯘᯪᯑ

Mangandung-andung ma ibana, ninna ma, dang da na tartamparhon, bulusan ma niathon. ᯔᯝᯉ᯲ᯑᯮᯰᯀᯉ᯲ᯑᯮᯰ ᯔ ᯤᯅᯉ ᯉᯉᯪ᯲ᯉ ᯔ ᯑᯰ ᯑ ᯉ ᯖᯒ᯲ᯖᯔ᯲ᯇᯒ᯲ᯂᯉᯬ᯲ ᯅᯮᯞᯮᯘᯉ᯲ ᯔ ᯉᯪᯀᯖ᯲ᯂᯉᯬ᯲

Dang be na tarhatahon, bulusan ma tinangishon. ᯑᯰ ᯅᯩ ᯉ ᯖᯒ᯲ᯂᯖᯂᯉᯬ᯲ ᯅᯮᯞᯮᯘᯉ᯲ ᯔ ᯖᯪᯉᯝᯘᯪ᯲ᯂᯉᯬ᯲

Ai molo tinangishon, atik lumumbang hilalaon. ᯀᯤ ᯔᯬᯞᯬ ᯖᯪᯉᯝᯘᯪ᯲ᯂᯉᯬ᯲ ᯀᯖᯄ᯦ᯪ᯲ ᯞᯮᯔᯔᯮ᯲ᯅᯰ ᯂᯪᯞᯞᯀᯉᯬ᯲

Dung i dibege bodat longlong ma tangisna i, jadi mangkuling ma bodat i, didok ma, Boasa pola songon i tangismu, ale Aji Panungkunan? ᯑᯮᯰ ᯤ ᯑᯪᯅᯩᯎᯩ ᯅᯪᯑᯖ᯲ ᯞᯰᯬᯞᯰᯬ ᯔ ᯖᯝᯘᯪ᯲ᯉ ᯤ ᯐᯑᯪ ᯔᯰᯄ᯦ᯮᯞᯰᯪ ᯔ ᯅᯬᯑᯖ᯲ ᯤ ᯑᯪᯑᯄ᯦ᯬ᯲ ᯔ ᯅᯬᯀᯘ ᯇᯬᯞ ᯘᯬᯝᯉᯬ᯲ ᯤ ᯖᯝᯘᯪ᯲ᯔᯮ ᯀᯞᯩ ᯀᯐᯪ ᯇᯉᯮᯰᯄᯮ᯦ᯉᯉ᯲

Nunga naeng dibodil Raja Parbaliung ahu da ompung! ᯉᯮᯝ ᯉᯀᯰᯩ ᯑᯪᯅᯬᯑᯞᯪ᯲ ᯒᯐ ᯇᯒ᯲ᯅᯞᯪᯀᯮᯰ ᯀᯂᯮ ᯑ ᯀᯔᯬ᯲ᯇᯮᯰ

Unang na sanga mamereng ahu dompak pudi, ba nunga mate ahu. ᯥᯉᯰ ᯉ ᯘᯝ ᯔᯔᯩᯒᯰᯩ ᯀᯂᯮ ᯑᯔᯬ᯲ᯇᯄ᯦᯲ ᯇᯮᯑᯪ ᯅ ᯉᯮᯝ ᯔᯖᯩ ᯀᯂᯮ

Holan na hansit dohot na dangol do hutaon. Aha ma so sai tangis ahu! ninna si Aji Panungkunan. ᯂᯬᯞᯉ᯲ ᯉ ᯂᯉ᯲ᯘᯖᯪ᯲ ᯑᯬᯂᯖᯬ᯲ ᯉ ᯑᯝᯞᯬ᯲ ᯑᯬ ᯂᯮᯖᯀᯉᯬ᯲ ᯀᯂ ᯔ ᯘᯬ ᯘᯤ ᯖᯝᯘᯪ᯲ ᯀᯂᯮ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲

Unang magogohu tangismu da ale Aji Panungkunan, atik na bangkit raja do ho sogot. ᯥᯉᯰ ᯔᯎᯬᯎᯬᯂᯮ ᯖᯝᯘᯪ᯲ᯔᯮ ᯑ ᯀᯞᯩ ᯀᯐᯪ ᯇᯉᯰᯮᯄ᯦ᯮᯉᯉ᯲ ᯀᯖᯄ᯦ᯪ᯲ ᯉ ᯅᯰᯄᯖᯪ᯲ ᯒᯐ ᯑᯬ ᯂᯬ ᯘᯬᯎᯖᯬ᯲

Ia dung bangkit raja ho, so tung magakgakhu ho sogot! ninna bodat longlong i. ᯤᯀ ᯑᯮᯰ ᯅᯰᯄ᯦ᯖᯪ᯲ ᯒᯐ ᯂᯬ ᯘᯬ ᯖᯮᯰ ᯔᯎᯄ᯦᯲ᯎᯄ᯦᯲ᯂᯮ ᯂᯬ ᯘᯬᯎᯖᯬ᯲ ᯉᯉᯪ᯲ᯉ ᯅᯬᯑᯖ᯲ ᯞᯰᯬᯞᯰᯬ ᯤ

Bolas ma ompung, songon ahu on na lea, jolma na pinalelelele ni sidangolon, gabe bangkit raja? ninna si Aji Panungkunan. ᯅᯬᯞᯘ᯲ ᯔ ᯀᯔᯬ᯲ᯇᯮᯰ ᯘᯬᯝᯉᯬ᯲ ᯀᯂᯮ ᯀᯉᯬ᯲ ᯉ ᯞᯩᯀ ᯐᯞᯬ᯲ᯔ ᯉ ᯇᯪᯉᯞᯩᯁᯞᯩᯀ ᯉᯪ ᯘᯪᯑᯝᯬᯞᯉᯬ᯲ ᯎᯅᯩ ᯅᯰᯄ᯦ᯖᯪ᯲ ᯒᯐ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲

Nunga hudok tu ho, unang sai tangis be ho, betak na bangkit raja do ho sogot: ᯉᯮᯝ ᯂᯮᯑᯄ᯦ᯬ᯲ ᯖᯮ ᯂᯬ ᯥᯉᯰ ᯘᯤ ᯖᯝᯘᯪ᯲ ᯅᯩ ᯂᯬ ᯅᯩᯖᯄ᯦᯲ ᯉ ᯅᯰᯄ᯦ᯖᯪ᯲ ᯒᯐ ᯑᯬ ᯂᯬ ᯘᯬᯎᯖᯬ᯲

Molo dung torang ari marsogot, borhat ma ho tu Lumban Namaduma. Pir ma tondim. ᯔᯬᯞᯬ ᯑᯮᯰ ᯖᯬᯒᯰ ᯀᯒᯪ ᯔᯒ᯲ᯘᯬᯎᯖᯬ᯲ ᯅᯒᯬ᯲ᯂᯖ᯲ ᯔ ᯂᯬ ᯖᯮ ᯞᯔᯮ᯲ᯅᯉ᯲ ᯉᯔᯑᯮᯔ ᯇᯒᯪ᯲ ᯔ ᯖᯉᯬ᯲ᯑᯔᯪ᯲

Las do roha ni Raja Sohuturon Dolak manjangkon ho. Modom ma ho di sopo i! ninna bodat longlong i. ᯞᯘ᯲ ᯑᯬ ᯒᯬᯂ ᯉᯪ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯄ᯦ᯬ᯲ ᯔᯉ᯲ᯐᯰᯄ᯦ᯉᯬ᯲ ᯂᯬ ᯔᯬᯑᯔᯬ᯲ ᯔ ᯂᯬ ᯑᯪ ᯘᯬᯇᯬ ᯤ ᯉᯉᯪ᯲ᯉ ᯅᯬᯑᯖ᯲ ᯞᯰᯬᯞᯰᯬ ᯤ

Torang ari manogotna i borhat ma si Aji Panungkunan, sai didatdati ma mardalan, asa gira sahat tu Lobu Namaduma. ᯖᯬᯒᯰ ᯀᯒᯪ ᯔᯉᯬᯎᯖᯬ᯲ᯉ ᯤ ᯅᯒᯬ᯲ᯂᯖ᯲ ᯔ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲ ᯘᯤ ᯑᯪᯑᯖ᯲ᯑᯖᯪ ᯔ ᯔᯒ᯲ᯑᯞᯉ᯲ ᯀᯘ ᯎᯪᯒ ᯘᯂᯖ᯲ ᯖᯮ ᯞᯬᯅᯮ ᯉᯔᯑᯮᯔ

Asa diboto Raja Sohuturon Dolak antong na masa i, jala asa diboto sipatupaonna laho mangurupi ibana. ᯀᯘ ᯑᯪᯅᯬᯖᯬ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯄ᯦ᯬ᯲ ᯀᯉ᯲ᯖᯰᯬ ᯉ ᯔᯘ ᯤ ᯐᯞ ᯀᯘ ᯑᯪᯅᯬᯖᯬ ᯘᯪᯇᯖᯮᯇᯀᯉᯬ᯲ᯉ ᯞᯂᯬ ᯔᯝᯮᯒᯮᯇᯪ ᯤᯅᯉ

Dung i sahat ma ibana tu harbangan ni huta i; las ma antong roha ni pangisi ni huta i mamida ibana, jala diboan ma ibana tu bagas ni raja i. ᯑᯮᯰ ᯤ ᯘᯂᯖ᯲ ᯔ ᯤᯅᯉ ᯖᯮ ᯂᯒ᯲ᯅᯝᯉ᯲ ᯉᯪ ᯂᯮᯖ ᯤ ᯞᯘ᯲ ᯔ ᯀᯉ᯲ᯖᯰᯬ ᯒᯬᯂ ᯉᯪ ᯇᯝᯪᯘᯪ ᯉᯪ ᯂᯮᯖ ᯤ ᯔᯒ᯲ᯉᯪᯑ ᯤᯅᯉ ᯐᯞ ᯑᯪᯅᯬᯀᯉ᯲ ᯔ ᯤᯅᯉ ᯖᯮ ᯅᯎᯘ᯲ ᯉᯪ ᯒᯐ ᯤ

Aha na masa ale Aji Panungkunan, umbahen songon i langan bohim jala sai marhosa-hosa ho? ninna Raja Sohuturon Dolok manungkun. ᯀᯂ ᯉ ᯔᯘ ᯀᯞᯩ ᯀᯐᯪ ᯇᯉᯮᯰᯄ᯦ᯮᯉᯉ᯲ ᯀᯔᯮ᯲ᯅᯂᯉᯩ᯲ ᯘᯬᯝᯉᯬ᯲ ᯤ ᯞᯝᯉ᯲ ᯅᯬᯂᯔᯪ᯲ ᯐᯞ ᯘᯤ ᯔᯒ᯲ᯂᯬᯘᯂᯬᯘ ᯂᯬ ᯉᯉᯪ᯲ᯉ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯄ᯦ᯬ᯲ ᯔᯉᯮᯰᯄ᯦ᯉᯮ᯲

Nunga mansai loja ahu rajanami, sai marlojongi sian Dolok Pargarutan tu huta on! ninna si Aji Panungkunan. ᯉᯮᯝ ᯔᯉ᯲ᯘᯤ ᯞᯬᯐ ᯀᯂᯮ ᯒᯐᯉᯔᯪ ᯘᯤ ᯔᯒ᯲ᯞᯬᯐᯬᯝᯪ ᯘᯪᯀᯉ᯲ ᯑᯬᯞᯄ᯦ᯬ᯲ ᯇᯒ᯲ᯎᯒᯮᯖᯉ᯲ ᯖᯮ ᯂᯮᯖ ᯀᯉᯬ᯲ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲

Pahundul ma jolo songon na pahosahon, dung i jolo marsipanganon ma ho. ᯇᯂᯉᯮ᯲ᯑᯞᯮ᯲ ᯔ ᯐᯬᯞᯬ ᯘᯬᯝᯉᯬ᯲ ᯉ ᯇᯂᯬᯘᯂᯉᯬ᯲ ᯑᯮᯰ ᯤ ᯐᯬᯞᯬ ᯔᯒ᯲ᯘᯪᯇᯝᯉᯉᯬ᯲ ᯔ ᯂᯬ

I pe asa baritahon na masa na naeng paboaonmu, ai nunga tung songon na maheu ho huida! ninna raja i. ᯤ ᯇᯩ ᯀᯘ ᯅᯒᯪᯖᯂᯉᯬ᯲ ᯉ ᯔᯘ ᯉ ᯉᯀᯰᯩ ᯇᯅᯬᯀᯀᯉᯬ᯲ᯔᯮ ᯀᯤ ᯉᯮᯝ ᯖᯮᯰ ᯘᯬᯝᯉᯬ᯲ ᯉ ᯔᯂᯩᯥ ᯂᯬ ᯂᯮᯤᯑ ᯉᯉᯪ᯲ᯉ ᯒᯐ ᯤ

Na uli ma i rajanami, molo tung asi roha ni raja i mida ahu ! ᯉ ᯥᯞᯪ ᯔ ᯤ ᯒᯐᯉᯔᯪ ᯔᯬᯞᯬ ᯖᯮᯰ ᯀᯘᯪ ᯒᯬᯂ ᯉᯪ ᯒᯐ ᯤ ᯔᯪᯑ ᯀᯂᯮ

Nunga tung loja ahu tutu , nunga mansai male! ninna si Aji Panungkunan. ᯉᯮᯝ ᯖᯮᯰ ᯞᯬᯐ ᯀᯂᯮ ᯖᯮᯖᯮ ᯉᯮᯝ ᯔᯉ᯲ᯘᯤ ᯔᯞᯩ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯄᯮ᯦ᯉᯉ᯲

Dilompa ma sipanganon, jala dung masak dilehon ma ibana mangan. ᯑᯪᯞᯔᯬ᯲ᯇ ᯔ ᯘᯪᯇᯝᯉᯉᯬ᯲ ᯐᯞ ᯑᯮᯰ ᯔᯘᯄ᯦᯲ ᯑᯪᯞᯩᯂᯉᯬ᯲ ᯔ ᯤᯅᯉ ᯔᯝᯉ᯲

Dung sun si Aji Panungkunan na mangan i, didok raja i ma, Holan hita pe jolo mangakatai, ale Aji Panungkunan! ᯑᯮᯰ ᯘᯉᯮ᯲ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲ ᯉ ᯔᯝᯉ᯲ ᯤ ᯑᯪᯑᯄ᯦ᯬ᯲ ᯒᯐ ᯤ ᯔ ᯂᯬᯞᯉ᯲ ᯂᯪᯖ ᯇᯩ ᯐᯬᯞᯬ ᯔᯰᯄ᯦ᯖᯤ ᯀᯞᯩ ᯀᯐᯪ ᯇᯉᯮᯰᯄ᯦ᯮᯉᯉ᯲

Paboa ma, aha na masa, umbahen na ro ho antong tu huta on. ᯇᯅᯬᯀ ᯔ ᯀᯂ ᯉ ᯔᯘ ᯀᯔᯮ᯲ᯅᯂᯉᯩ᯲ ᯉ ᯒᯬ ᯂᯬ ᯀᯉ᯲ᯖᯰᯬ ᯖᯮ ᯂᯮᯖ ᯀᯉᯬ᯲

Nunga na uli binahenmon, ro ho tuson mangalualuhon parsorionmu tu hami! ninna Raja Sohuturon Dolok. ᯉᯮᯝ ᯉ ᯥᯞᯪ ᯅᯪᯉᯂᯉᯩ᯲ᯔᯉᯬ᯲ ᯒᯬ ᯂᯬ ᯖᯮᯘᯉᯬ᯲ ᯔᯝᯞᯮᯀᯞᯮᯂᯉᯬ᯲ ᯇᯒ᯲ᯘᯬᯒᯪᯀᯉᯬ᯲ᯔᯮ ᯖᯮ ᯂᯔᯪ ᯉᯉᯪ᯲ᯉ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯄ᯦ᯬ᯲

Olo rajanami, mauliate ma hudok ala ungkap roha ni raja i umbege alualungkon. Paboaonku ma tutu sude! ᯀᯬᯞᯬ ᯒᯐᯉᯔᯪ ᯔᯥᯞᯪᯀᯖᯩ ᯔ ᯂᯮᯑᯄ᯦ᯬ᯲ ᯀᯞ ᯀᯮᯰᯄᯇ᯲ ᯒᯬᯂ ᯉᯪ ᯒᯐ ᯤ ᯀᯔᯮ᯲ᯅᯩᯎᯩ ᯀᯞᯮᯀᯞᯮᯰᯄ᯦ᯉᯬ᯲ ᯇᯅᯬᯀᯀᯉᯬ᯲ᯄ᯦ᯮ ᯔ ᯖᯮᯖᯮ ᯘᯮᯑᯩ

Nantoari ale rajanami, diarahon Raja Parbaliung do hami na sahuta marburu tu ramba poso na jonok tu hutanami. ᯉᯉ᯲ᯖᯬᯀᯒᯪ ᯀᯞᯩ ᯒᯐᯉᯔᯪ ᯑᯪᯀᯒᯂᯉᯬ᯲ ᯒᯐ ᯇᯒ᯲ᯅᯞᯪᯀᯮᯰ ᯑᯬ ᯂᯔᯪᯉ ᯘᯂᯮᯖ ᯔᯒ᯲ᯅᯮᯒᯮ ᯖᯮ ᯒᯔ᯲ᯅ ᯇᯬᯘᯬ ᯉ ᯐᯬᯉᯄ᯦ᯬ᯲ ᯖᯮ ᯂᯮᯖᯉᯔᯪ

Ai nunga sun gadong ni hutanami dibarungkari angka aili. ᯀᯤ ᯉᯮᯝ ᯘᯉᯮ᯲ ᯎᯑᯰᯬ ᯉᯪ ᯂᯮᯖᯉᯔᯪ ᯑᯪᯅᯒᯮᯰᯄ᯦ᯒᯪ ᯀᯰᯄ᯦ ᯀᯤᯞᯪ

Huhaliangi hami do ramba poso i, adong di hasundutan, adong di habinsaran, adong di dolok, adong nang di toruan. ᯂᯮᯂᯞᯪᯀᯝᯪ ᯂᯔᯪ ᯑᯬ ᯒᯔ᯲ᯅ ᯇᯬᯘᯬ ᯤ ᯀᯑᯰᯬ ᯑᯪ ᯂᯘᯉᯮ᯲ᯑᯮᯖᯉᯬ᯲ ᯀᯑᯰᯬ ᯑᯪ ᯂᯅᯉᯪ᯲ᯘᯒᯉ᯲ ᯀᯑᯰᯬ ᯑᯪ ᯑᯬᯞᯄ᯦ᯬ᯲ ᯀᯑᯰᯬ ᯉᯰ ᯑᯪ ᯖᯬᯒᯮᯀᯉ᯲

Di toruan ma hami deba rap dohot raja i. ᯑᯪ ᯖᯬᯒᯮᯀᯉ᯲ ᯔ ᯂᯔᯪ ᯑᯩᯅ ᯒᯇ᯲ ᯑᯬᯂᯖᯬ᯲ ᯒᯐ ᯤ

Dung sai jebu ma angka biang parburu mangalelei aili i, ba hami pe sian toruan mulai ma marserak mandapothon tu tonga ramba i ᯑᯮᯰ ᯘᯤ ᯐᯩᯅᯮ ᯔ ᯀᯰᯄ᯦ ᯅᯪᯀᯰ ᯇᯒ᯲ᯅᯮᯒᯮ ᯔᯝᯞᯩᯞᯩᯤ ᯀᯤᯞᯪ ᯤ ᯅ ᯂᯔᯪ ᯇᯩ ᯘᯪᯀᯉ᯲ ᯖᯬᯒᯮᯀᯉ᯲ ᯔᯮᯞᯤ ᯔ ᯔᯒ᯲ᯘᯩᯒᯄ᯦᯲ ᯔᯉ᯲ᯑᯇᯖᯬ᯲ᯂᯉᯬ᯲ ᯖᯮ ᯖᯬᯝ ᯒᯔ᯲ᯅ ᯤ

Hape na sai di pudinghu do Raja Parbaliung. ᯂᯇᯩ ᯉ ᯘᯤ ᯑᯬ ᯇᯮᯑᯰᯪᯄ᯦ᯮ ᯑᯬ ᯒᯐ ᯇᯒ᯲ᯅᯞᯪᯀᯮᯰ

Dung manang sadia dao hami masuk tu ramba i, adong ma gorakhu mamereng dompak pudi. ᯑᯮᯰ ᯔᯉᯰ ᯘᯑᯪᯀ ᯑᯀᯬ ᯂᯔᯪ ᯔᯘᯄ᯦ᯮ᯲ ᯖᯮ ᯒᯔ᯲ᯅ ᯤ ᯀᯑᯰᯬ ᯔ ᯎᯬᯒᯄ᯦᯲ᯄ᯦ᯮ ᯔᯔᯩᯒᯰᯩ ᯑᯔᯬ᯲ᯇᯄ᯦᯲ ᯇᯮᯑᯪ

Huida ma nunga dompak ahu dietenghon raja i bodilna. ᯂᯮᯤᯑ ᯔ ᯉᯮᯝ ᯑᯔᯬ᯲ᯬᯄ᯦᯲ ᯀᯂᯮ ᯑᯪᯀᯩᯖᯰᯩᯂᯉᯬ᯲ ᯒᯑ ᯤ ᯅᯬᯑᯞᯪ᯲ᯉ

Mamintor na manungkap ahu, ale rajanami. Jadi pintor hubege ma nang soara ni bodil ni raja i. ᯔᯔᯉᯪ᯲ᯖᯒᯬ᯲ ᯉ ᯔᯉᯮᯰᯄ᯦ᯇ᯲ ᯀᯂᯮ ᯀᯞᯩ ᯒᯐᯉᯔᯪ ᯐᯑᯪ ᯇᯉᯪᯖᯒᯬ᯲ ᯂᯮᯅᯩᯎᯩ ᯔ ᯉᯰ ᯘᯬᯀᯒ ᯉᯪ ᯅᯬᯑᯞᯪ᯲ ᯉᯪ ᯒᯐ ᯤ

Tuani ma mamintor manungkap ahu, ai aut sura so i nunga mate ahu. ᯖᯮᯀᯉᯪ ᯔ ᯔᯔᯉᯪ᯲ᯖᯒᯬ᯲ ᯔᯉᯮᯰᯄ᯦ᯇ᯲ ᯀᯂᯮ ᯀᯤ ᯀᯀᯖᯮ᯲ ᯘᯮᯒ ᯘᯬ ᯤ ᯉᯮᯝ ᯔᯖᯩ ᯀᯂᯮ

Adong do manang na sadia leleng songon na so tarjolma ahu, ala ni songgotna huhilala; sai tungkap ma ahu di tano i. ᯀᯑᯰᯬ ᯑᯬ ᯔᯉᯰ ᯉ ᯘᯑᯪᯀ ᯞᯩᯞᯰᯩ ᯘᯬᯝᯉᯬ᯲ ᯉ ᯘᯬ ᯖᯒ᯲ᯐᯞᯬ᯲ᯔ ᯀᯂᯮ ᯀᯞ ᯉᯪ ᯘᯰᯬᯎᯖᯬ᯲ᯉ ᯂᯮᯂᯪᯞᯞ ᯘᯤ ᯖᯮᯰᯄ᯦ᯇ᯲ ᯔ ᯀᯂᯮ ᯑᯪ ᯖᯉᯬ ᯤ

Dung i hubege ma marderes-deres di pudingku, mangkuling mana di pudingki, didok ma tu ahu, "ir ma tondim, ale Aji Panungkunan! Mangolu do ho hape! ᯑᯮᯰ ᯤ ᯂᯮᯅᯩᯎᯩ ᯔ ᯔᯒ᯲ᯑᯩᯒᯘᯩ᯲ᯑᯩᯒᯘᯩ᯲ ᯑᯪ ᯇᯮᯑᯰᯪᯄ᯦ᯮ ᯔᯰᯄ᯦ᯮᯞᯰᯪ ᯔ ᯉ ᯑᯪ ᯇᯮᯑᯰᯪᯄ᯦ᯪ ᯑᯪᯑᯄ᯦ᯬ᯲ ᯔ ᯖᯮ ᯀᯂᯮ ᯇᯒᯪ᯲ ᯔ ᯖᯉᯬ᯲ᯑᯔᯪ᯲ ᯀᯞᯩ ᯀᯐᯪ ᯇᯉᯮᯰᯄ᯦ᯮᯉᯉ᯲ ᯔᯝᯬᯞᯮ ᯑᯬ ᯂᯬ ᯂᯇᯩ

Hutanda ma soara i, si Paralamat do hape na ro i, anggi ni ulubalang Partahan Soaloon. ᯂᯮᯖᯉ᯲ᯑ ᯑᯬ ᯘᯬᯀᯒ ᯤ ᯘᯪ ᯇᯒᯞᯔᯖ᯲ ᯑᯬ ᯂᯇᯩ ᯉ ᯒᯬ ᯤ ᯀᯰᯎᯪ ᯉᯪ ᯥᯞᯮᯅᯞᯰ ᯇᯒ᯲ᯖᯂᯉ᯲ ᯘᯬᯀᯞᯬᯀᯉᯬ᯲

Didok ma tu ahu, Maila do raut so dapotan. Betak dohonon ni Raja Parbaliung annon, maila do bodil so dapotan, gabe dilului dalan sahali nari. ᯑᯪᯑᯄ᯦ᯬ᯲ ᯔ ᯖᯮ ᯀᯂᯮ ᯔᯤᯞ ᯑᯬ ᯒᯀᯖᯮ᯲ ᯘᯬ ᯑᯇᯬᯖᯉ᯲ ᯅᯩᯖᯄ᯦᯲ ᯑᯬᯂᯬᯉᯉᯬ᯲ ᯉᯪ ᯒᯐ ᯇᯒ᯲ᯅᯞᯪᯀᯮᯰ ᯀᯉ᯲ᯉᯉᯬ᯲ ᯔᯤᯞ ᯑᯬ ᯅᯬᯑᯞᯪ᯲ ᯘᯬ ᯑᯇᯬᯖᯉ᯲ ᯎᯅᯩ ᯑᯪᯞᯮᯞᯮᯤ ᯑᯞᯉ᯲ ᯘᯂᯞᯪ ᯉᯒᯪ

Nunga jorbut na masa on. ᯉᯮᯝ ᯐᯒᯬ᯲ᯅᯖᯮ᯲ ᯉ ᯔᯘ ᯀᯉᯬ᯲

I pe laho ma ho maporus tu Lobu Namaduma, ai na so uhum nama tahi ni Raja Parbaliung on! ᯤ ᯇᯩ ᯞᯂᯬ ᯔ ᯂᯬ ᯔᯇᯬᯒᯘᯮ᯲ ᯖᯮ ᯞᯬᯅᯮ ᯉᯔᯑᯮᯔ ᯀᯤ ᯉ ᯘᯬ ᯥᯂᯔᯮ᯲ ᯉᯔ ᯖᯂᯪ ᯉᯪ ᯒᯐ ᯇᯒ᯲ᯅᯞᯪᯀᯮᯰ ᯀᯉᯬ᯲

Asa na didasdas si Paralamat do ahu tutu, umbahen na pintor tuson ahu ro, ninna si Aji Panungkunan. ᯀᯘ ᯉ ᯑᯪᯑᯘ᯲ᯑᯘ᯲ ᯘᯪ ᯇᯒᯞᯔᯖ᯲ ᯑᯬ ᯀᯂᯮ ᯖᯮᯖᯮ ᯀᯔᯮ᯲ᯅᯂᯉᯩ᯲ ᯉ ᯇᯉᯪ᯲ᯖᯒᯬ᯲ ᯖᯮᯘᯉᯬ᯲ ᯀᯂᯮ ᯒᯬ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯄ᯦ᯉᯉ᯲

Tung aha do alana, umbahen na naeng pamateonna ho? ninna Raja Sohuturon Dolak manungkun.ᯖᯮᯰ ᯀᯂ ᯑᯬ ᯀᯞᯉ ᯀᯔᯮ᯲ᯅᯂᯉᯩ᯲ ᯉ ᯉᯀᯰᯩ ᯇᯔᯖᯩᯀᯉᯬ᯲ᯉ ᯂᯬ ᯉᯉᯪ᯲ᯉ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯄ᯦ᯬ᯲ ᯔᯉᯮᯰᯄ᯦ᯉᯮ᯲

Songon on do rajanami! Nuaeng pe huboto tangkas, damang do raja hian di Dolak Pargarutan. ᯘᯬᯝᯉᯬ᯲ ᯀᯉᯬ᯲ ᯑᯬ ᯒᯐᯉᯔᯪ ᯉᯮᯀᯀᯰᯩ ᯇᯩ ᯂᯮᯅᯬᯖᯬ ᯖᯰᯄᯘ᯲ ᯑᯔᯰ ᯑᯬ ᯒᯐ ᯂᯪᯀᯉ᯲ ᯑᯪ ᯑᯬᯞᯄ᯦ᯬ᯲ ᯇᯒ᯲ᯎᯒᯮᯖᯉ᯲

Alai tibu do mate damang, ba tading maetek ma ahu. ᯀᯞᯤ ᯖᯪᯅᯮ ᯑᯬ ᯔᯖᯩ ᯑᯔᯰ ᯅ ᯖᯑᯰᯪ ᯔᯀᯩᯖᯄᯩ᯲ ᯔ ᯀᯂᯮ

Jadi Raja Parbaliung ma bangkit gabe raja. ᯐᯑᯪ ᯒᯐ ᯇᯒ᯲ᯅᯞᯪᯀᯮᯰ ᯔ ᯅᯰᯄᯖᯪ᯲ ᯎᯅᯩ ᯒᯐ

Disuru dainang do ahu laho mandapothon Datu Bolon Paniop Pagar, na maringanan di Lobu Parholean. ᯑᯪᯘᯮᯒᯮ ᯑᯤᯉᯰ ᯑᯬ ᯀᯂᯮ ᯞᯂᯬ ᯔᯉ᯲ᯑᯇᯖᯬ᯲ᯂᯉᯬ᯲ ᯑᯖᯮ ᯅᯬᯞᯉᯬ᯲ ᯇᯉᯪᯀᯇᯬ᯲ ᯇᯎᯒ᯲ ᯉ ᯔᯒᯪᯝᯉᯉ᯲ ᯑᯪ ᯞᯬᯅᯮ ᯇᯒ᯲ᯂᯬᯞᯩᯀᯉ᯲

Tung so olo do dainang paboahon tu ahu, betak ala ni biarna do salelengna on, dang huboto ᯖᯮᯰ ᯘᯬ ᯀᯬᯞᯬ ᯑᯬ ᯑᯤᯉᯰ ᯇᯅᯬᯀᯂᯉᯬ᯲ ᯖᯮ ᯀᯂᯮ ᯅᯩᯖᯄ᯦᯲ ᯀᯞ ᯉᯪ ᯅᯪᯀᯒ᯲ᯉ ᯑᯬ ᯘᯞᯩᯞᯰᯩ ᯀᯉᯬ᯲ ᯑᯰ ᯂᯮᯅᯬᯖᯬ

Datu Bolon i do na patotorhonsa tu ahu sude. ᯑᯖᯮ ᯅᯬᯞᯉᯬ᯲ ᯤ ᯑᯬ ᯉ ᯇᯖᯬᯖᯒᯬ᯲ᯂᯉᯬ᯲ᯘ ᯖᯮ ᯀᯂᯮ ᯘᯮᯑᯩ

Ala diboto Raja Parbaliung naung malum sahit ni boru ni raja i marhite ubat na hulului i, ba ditagam rohana ma, na ingkon urupan ni raja i do ahu. ᯀᯞ ᯑᯪᯅᯬᯖᯬ ᯒᯐ ᯇᯒ᯲ᯅᯞᯪᯀᯮᯰ ᯉᯀᯮᯰ ᯔᯞᯔᯮ᯲ ᯘᯂᯖᯪ᯲ ᯉᯪ ᯅᯬᯒᯮ ᯉᯪ ᯒᯐ ᯤ ᯔᯒ᯲ᯂᯪᯖᯩ ᯥᯅᯖ᯲ ᯉ ᯉᯪᯞᯮᯞᯮᯤ ᯤ ᯅ ᯑᯪᯖᯎᯔ᯲ ᯒᯬᯂᯉ ᯔ ᯔ ᯀᯰᯪᯂᯉᯬ᯲ ᯉᯪ ᯒᯐ ᯤ ᯑᯬ ᯀᯂᯮ

Aut mate ahu dibodil, dohononna ma, aili do diida marlojong, jadi dibingkas ma bodilna; hape ahu dona hona.ᯀᯀᯖᯮ᯲ ᯔᯖᯩ ᯀᯂᯮ ᯑᯪ ᯅᯬᯑᯞᯪ᯲ ᯑᯬᯂᯬᯉᯉᯬ᯲ᯉ ᯔ ᯀᯤᯞᯪ ᯑᯬ ᯑᯪᯤᯑ ᯔᯒ᯲ᯞᯬᯐᯰᯬ ᯐᯑᯪ ᯑᯬᯪᯅᯰᯪᯄ᯦ᯘ᯲ ᯔ ᯅᯬᯑᯞᯪ᯲ᯉ ᯂᯇᯩ ᯀᯂᯮ ᯑᯬ ᯉ ᯂᯬᯉ

Anggo pandok ni si Paralamat, ale rajanami, paboaonna do na masa on tu hahana, ulubalang Partahan Soaloon, asa martahi nasida mandongani ahu, ai tung na so uhum do na binahen ni Raja Parbaliung i nang didok nasida! ninna si Aji Panungkunan. ᯀᯰᯎᯬ ᯇᯉ᯲ᯑᯄ᯦ᯬ᯲ ᯉᯪ ᯘᯪ ᯇᯒᯞᯔᯖ᯲ ᯀᯞᯩ ᯒᯐᯉ᯲ᯪ ᯇᯅᯬᯀᯀᯉᯬ᯲ᯉ ᯑᯬ ᯉ ᯔᯘ ᯀᯉᯬ᯲ ᯖᯮ ᯂᯂᯉ ᯥᯞᯮᯅᯞᯰ ᯇᯒ᯲ᯖᯂᯉ᯲ ᯘᯬᯀᯞᯬᯀᯉᯬ᯲ ᯀᯘ ᯔᯒ᯲ᯖᯂᯪ ᯉᯘᯪᯑ ᯔᯉ᯲ᯑᯬᯝᯉᯪ ᯀᯂᯮ ᯀᯤ ᯖᯮᯰ ᯉ ᯘᯬ ᯥᯂᯔᯮ᯲ ᯑᯬ ᯉ ᯅᯪᯉᯂᯉᯩ᯲ ᯉᯪ ᯒᯐ ᯇᯒ᯲ᯅᯞᯪᯀᯮᯰ ᯤ ᯉᯰ ᯑᯪᯑᯄ᯦ᯬ᯲ ᯉᯘᯪᯑ ᯉᯉᯪ᯲ᯉ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲

Jadi tarrimas ma Raja Sohuturon Dolak dompak Raja Parbaliung na di huta Dolak Pargarutan. ᯐᯑᯪ ᯖᯒ᯲ᯒᯪᯔᯘ᯲ ᯔ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯄ᯦ᯬ᯲ ᯑᯔᯬ᯲ᯇᯄ᯦᯲ ᯒᯐ ᯇᯒ᯲ᯅᯞᯪᯀᯮᯰ ᯉ ᯑᯪ ᯂᯮᯖ ᯑᯬᯞᯄ᯦ᯬ᯲ ᯇᯒ᯲ᯎᯒᯮᯖᯉ᯲

Dijou ma ulubalangna Partallik Najingar dohot Datu Pangontang. ᯑᯪᯐᯬᯥ ᯔ ᯥᯞᯮᯅᯞᯰᯉ ᯇᯒ᯲ᯖᯞ᯲ᯞᯄ᯦ᯪ᯲ ᯉ ᯐᯪᯝᯒ᯲ ᯑᯬᯂᯖᯬ᯲ ᯑᯖᯮ ᯇᯝᯉᯬ᯲ᯖᯰ

Mangkatai ma nasida sahat ro di na bagas borngin. ᯔᯰᯄ᯦ᯖᯤ ᯔ ᯉᯘᯪᯑ ᯒᯬ ᯑᯪ ᯉ ᯅᯎᯘ᯲ ᯅᯒᯬᯝᯉᯪ᯲

Marsogotna i disuru Raja Sohuturon Dolak ma naposona mamborothon sada horbo di tonga ni alaman. ᯔᯒ᯲ᯘᯬᯎᯖᯬ᯲ᯉ ᯤ ᯑᯪᯘᯮᯒᯮ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯄ᯦ᯬ᯲ ᯔ ᯉᯇᯬᯘᯬᯉ ᯔᯔ᯲ᯅᯬᯒᯖᯬ᯲ᯂᯉᯬ᯲ ᯘᯑ ᯂᯒᯬ᯲ᯅᯬ ᯑᯪ ᯖᯬᯝ ᯉᯪ ᯀᯞᯔᯉ᯲

Dung i ditullang ma, jala disahei. Dung sun disahei diboan matu bagas, dung i diparmasak ma tutu. ᯑᯮᯰ ᯤ ᯑᯪᯖᯞᯮ᯲ᯞᯰ ᯔ ᯐᯞ ᯑᯪᯘᯂᯩᯤ ᯑᯮᯰ ᯘᯉᯮ᯲ ᯑᯪᯘᯂᯩᯤ ᯑᯪᯅᯬᯀᯉ᯲ ᯔ ᯖᯮ ᯅᯎᯘ᯲ ᯑᯮᯰ ᯤ ᯑᯪᯇᯒ᯲ᯔᯘᯄ᯦᯲ ᯔ ᯖᯮᯖᯮ

Dung masak juhut horbo i, masak ma nang indahan, jadi disuru raja i ma naposona, dipio ma pangisi ni huta i mangan. ᯑᯮᯰ ᯔᯘᯄ᯦᯲ ᯐᯮᯂᯖᯮ᯲ ᯂᯒᯬ᯲ᯅᯬ ᯤ ᯔᯘᯄ ᯔ ᯉᯰ ᯀᯉᯪ᯲ᯑᯂᯉ᯲ ᯐᯑᯪ ᯑᯪᯘᯮᯒᯮ ᯒᯐ ᯤ ᯔ ᯉᯇᯬᯘᯬᯉ ᯑᯪᯇᯪᯀᯬ ᯔ ᯇᯝᯪᯘᯪ ᯉᯪ ᯂᯮᯖ ᯤ ᯔᯝᯉ᯲

Dung sun na mangan i, didok natua-tua ni ni huta i ma, Ba nunga bosur hami ale rajanami mangan indahan na las, nunga mahap marlompan juhut. ᯑᯮᯰ ᯘᯉᯮ᯲ ᯉ ᯔᯝᯉ᯲ ᯤ ᯑᯪᯑᯄ᯦ᯬ᯲ ᯉᯖᯮᯀᯖᯮᯀ ᯉᯪ ᯂᯮᯖ ᯤ ᯔ ᯅ ᯉᯮᯝ ᯅᯬᯘᯒᯮ᯲ ᯂᯔᯪ ᯀᯞᯩ ᯒᯐᯉ᯲ᯪ ᯔᯝᯉ᯲ ᯀᯉᯪ᯲ᯑᯂᯉ᯲ ᯉ ᯞᯘ᯲ ᯉᯮᯝ ᯔᯂᯇ᯲ ᯔᯒ᯲ᯞᯔᯬ᯲ᯇᯉ᯲

Nunga on nian jolo ninangnang, i pe asa ninungnung. Nunga on jolo pinangan, ba i pe asa sinungkun. ᯉᯮᯝ ᯀᯉᯬ᯲ ᯉᯪᯀᯉ᯲ ᯐᯬᯞᯬ ᯉᯪᯉᯰᯉᯰ ᯤ ᯇᯩ ᯀᯘ ᯉᯪᯉᯮᯰᯉᯮᯰ ᯉᯮᯝ ᯀᯉᯬ᯲ ᯐᯬᯞᯬ ᯇᯪᯉᯝᯉ᯲ ᯉ ᯤ ᯇᯩ ᯀᯘ ᯘᯪᯉᯮᯰᯄ᯦ᯉᯮ᯲

Ba dia ma alana, umbahen dipio raja i hami mangan tu bagas na martua on, dipaboa raja i ma! ᯅ ᯑᯪᯀ ᯔ ᯀᯞᯉ ᯀᯔᯮ᯲ᯅᯂᯉᯩ᯲ ᯑᯪᯇᯪᯀᯬ ᯒᯐ ᯤ ᯂᯔᯪ ᯔᯝᯉ᯲ ᯖᯮ ᯅᯎᯘ᯲ ᯉ ᯲᯲ᯒ᯲ᯖᯮᯀ ᯀᯉᯬ᯲ ᯑᯪᯇᯅᯬᯀ ᯒᯐ ᯤ ᯔ

Olo angka amang, anggo taringot tu sipanganon na so sadia i, ba dang na mangkolit hami. ᯀᯬᯞᯬ ᯀᯰᯄ᯦ ᯀᯔᯰ ᯀᯰᯎᯬ ᯖᯒᯪᯝᯖᯬ᯲ ᯖᯮ ᯘᯪᯇᯝᯉᯉᯬ᯲ ᯉ ᯘᯬ ᯘᯑᯪᯀ ᯤ ᯅ ᯑᯰ ᯉ ᯔᯰᯄ᯦ᯬᯞᯖᯪ᯲ ᯂᯔᯪ

Sihingkit ma ninna sihompa, ba golanggolang ma pangarahutna. So sadia pe na pinatupa i,
ba sai godang ma na pinasuna. ᯘᯪᯂᯰᯪᯄ᯦ᯪ᯲ ᯔ ᯉᯉᯪ᯲ᯉ ᯘᯪᯂᯔᯬ᯲ᯇ ᯅ ᯎᯬᯞᯰᯎᯬᯞᯰ ᯔ ᯇᯝᯒᯂᯖᯮ᯲ᯉ ᯘᯬ ᯘᯑᯪᯀ ᯇᯩ ᯉ ᯇᯪᯉᯖᯮᯇ ᯤ ᯅ ᯘᯤ ᯎᯬᯑᯰ ᯔ ᯇᯪᯉᯘᯮᯉ

Pamurnas ma i antong tu daging, saudara ma i tu bohi. ᯇᯔᯒᯮ᯲ᯉᯘ᯲ ᯔ ᯤ ᯘᯉᯖᯰᯬ ᯖᯮ ᯑᯎᯰᯪ ᯘᯥᯑᯒ ᯔ ᯤ ᯖᯮ ᯅᯬᯂᯪ

Sipalomak imbulu ma i, sipaneang holi-holi. ᯘᯪᯇᯞᯬᯔᯄ᯦᯲ ᯀᯔᯪ᯲ᯅᯮᯞᯮ ᯔ ᯤ ᯑᯪᯇᯉᯩᯀᯰ ᯂᯬᯞᯪᯂᯪᯞᯪ

Ia si Aji Panungkunan, na dapotan ubat jala na pamalumhon sahit ni borunami si Tapi Marhillong Sere, nunga ro tu huta on maporus, ala dibahen Raja Parbaliung na di Dolak Pargarutan na so uhum tu ibana. ᯤᯀ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲ ᯉ ᯑᯇᯬᯖᯉ᯲ ᯥᯅᯖ᯲ ᯐᯞ ᯉ ᯇᯔᯞᯔᯮ᯲ᯂᯉᯬ᯲ ᯘᯂᯖᯪ᯲ ᯉᯪ ᯅᯬᯒᯮᯉᯔᯪ ᯘᯪ ᯖᯇᯪ ᯔᯒ᯲ᯂᯞᯪ᯲ᯞᯰᯬ ᯘᯩᯒᯩ ᯉᯮᯝ ᯒᯬ ᯖᯮ ᯂᯮᯖ ᯀᯉᯬ᯲ ᯔᯇᯬᯒᯘᯮ᯲ ᯀᯞ ᯑᯪᯅᯂᯉᯩ᯲ ᯒᯐ ᯇᯒ᯲ᯅᯞᯪᯀᯮᯰ ᯉ ᯑᯪ ᯑᯬᯞᯄ᯦ᯬ᯲ ᯇᯒ᯲ᯎᯒᯮᯖᯉ᯲ ᯉ ᯘᯬ ᯥᯄᯔᯮ᯲ ᯖᯮ ᯤᯅᯉ

Na laho do nasida marburu tu ramba na jonok tu hutanasida, hape disi ma dibingkas Raja Parbaliung bodilna, laho pamatehon si Aji Panungkunanon. ᯉ ᯞᯂᯬ ᯑᯬ ᯉᯘᯪᯑ ᯔᯒ᯲ᯅᯮᯒᯮ ᯖᯮ ᯒᯔ᯲ᯅ ᯉ ᯐᯬᯉᯄ᯦ᯬ᯲ ᯖᯮ ᯂᯮᯖᯉᯘᯪᯑ ᯂᯇᯩ ᯑᯪᯘᯪ ᯔ ᯑᯪᯅᯰᯪᯄ᯦ᯘ᯲ ᯒᯐ ᯇᯒ᯲ᯅᯞᯪᯀᯮᯰ ᯅᯬᯑᯞᯪ᯲ᯉ ᯞᯂᯬ ᯇᯔᯖᯩᯂᯉᯬ᯲ ᯘᯪ ᯀᯐᯪ ᯇᯉᯮᯰᯄᯮ᯦ᯉᯉ᯲

Ia mamereng ma si Aji Panungkunan dompak pudi, nunga dida dompak ibana bodil ni Raja Parbaliung; tompu ma ditungkaphon dirina, gabe so hona ibana. ᯤᯀ ᯔᯔᯩᯒᯰᯩ ᯔ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲ ᯑᯔᯬ᯲ᯇᯄ᯦᯲ ᯇᯮᯑᯪ ᯉᯮᯝ ᯑᯪᯤᯑ ᯑᯔᯬ᯲ᯇᯄ᯦᯲ ᯤᯅᯉ ᯅᯬᯑᯞᯪ᯲ ᯉᯪ ᯒᯐ ᯇᯒ᯲ᯅᯞᯪᯀᯮᯰ ᯖᯔᯬ᯲ᯇᯮ ᯔ ᯑᯪᯖᯮᯰᯂᯇ᯲ᯂᯉᯬ᯲ ᯑᯪᯒᯪᯉ ᯎᯅᯩ ᯘᯬ ᯂᯬᯉ ᯤᯅᯉ

Adong do pangisi ni huta i, na margoar si Paralamat, na mamida hajahaton ni raja i. ᯀᯑᯰᯬ ᯑᯬ ᯇᯝᯪᯘᯪ ᯉᯪ ᯂᯮᯖ ᯤ ᯉ ᯔᯒ᯲ᯎᯬᯀᯒ᯲ ᯘᯪ ᯇᯒᯞᯔᯖ᯲ ᯉ ᯔᯒ᯲ᯉᯪᯑ ᯂᯐᯂᯖᯉᯬ᯲ ᯉᯪ ᯒᯐ ᯤ

Dung marlojongi Raja Parbaliung laho mangagohon langkana, ditogu si Paralamat ma si Aji Panungkunan on, jala disuru maporus tu hutanta on. ᯑᯮᯰ ᯔᯒ᯲ᯞᯬᯐᯬᯝᯪ ᯒᯐ ᯇᯒ᯲ᯅᯞᯪᯀᯮᯰ ᯞᯂᯬ ᯔᯝᯎᯬᯂᯉᯬ᯲ ᯞᯰᯂᯉ ᯑᯪᯖᯬᯎᯮ ᯘᯪ ᯇᯒᯞᯔᯖ᯲ ᯔ ᯘᯪ ᯀᯐᯪ ᯇᯉᯮᯰᯄ᯦ᯮᯉᯉ᯲ ᯀᯉᯬ᯲ ᯐᯞ ᯑᯪᯘᯮᯒᯮ ᯔᯇᯬᯒᯘᯮ᯲ ᯖᯮ ᯂᯮᯖᯉ᯲ᯖ ᯀᯉᯬ᯲

Nuaeng pe, ia sipanganon na hulehon i, sipanganon parhorasan ma i, asa borhat hita tu huta ni Raja Parbaliung, raja na sounboto uhum i. ᯉᯮᯀᯀᯰᯩ ᯇᯩ ᯤᯀ ᯘᯪᯇᯝᯉᯉᯬ᯲ ᯉ ᯂᯮᯞᯩᯂᯉᯬ᯲ ᯤ ᯘᯪᯇᯝᯉᯉᯬ᯲ ᯇᯒ᯲ᯂᯬᯒᯘᯉ᯲ ᯔ ᯤ ᯀᯘ ᯅᯒᯬ᯲ᯂᯖ᯲ ᯂᯪᯖ ᯖᯮ ᯂᯮᯖ ᯉᯪ ᯒᯐ ᯇᯒ᯲ᯅᯞᯪᯀᯮᯰ ᯒᯐ ᯉ ᯘᯬᯀᯔᯮ᯲ᯅᯬᯖᯬ ᯥᯂᯔᯮ᯲ ᯤ

Masiparade bodilna be ma marsogot, masipatajom hujurna, jala masipatajom podangna! ninna Raja Sohuturon Dolok. ᯔᯘᯪᯇᯒᯑᯩ ᯅᯬᯑᯞᯪ᯲ᯉ ᯅᯩ ᯔ ᯔᯒ᯲ᯘᯪᯎᯖᯬ᯲ ᯔᯘᯪᯇᯖᯐᯔᯬ᯲ ᯂᯮᯐᯒᯮ᯲ᯉ ᯐᯞ ᯔᯘᯪᯇᯖᯐᯔᯬ᯲ ᯇᯬᯑᯰᯉ ᯉᯉᯪ᯲ᯉ ᯒᯐ ᯘᯬᯂᯮᯖᯮᯒᯉᯬ᯲ ᯑᯬᯞᯄ᯦ᯬ᯲